ວກ.ອອນໄລ - ໂດຍຕອບສະໜອງຕາມຄຳເຊີນຂອງ ສົມເດັດອັກຄະຣະມະຫາພະຍາຈັກກຣີ ເຮງ ສຳຣິນ ປະທານສະພາແຫ່ງຊາດແຫ່ງລາຊະອານາຈັກກຳປູເຈຍ, ປະທານເວທີປາໄສລັດຖະສະພາອາຊີ-ປາຊີຟິກ ຄັ້ງທີ 27, ທ່ານນາງ ຫງວຽນທິກິມເງິນ ກຳມະການກົມການເມືອງສູນກາງພັກກອມມູນິດ, ປະທານສະພາແຫ່ງຊາດ ໄດ້ນຳໜ້າຄະນະຜູ້ແທນຂັ້ນສູງສະພາແຫ່ງຊາດຫວຽດນາມ ເຂົ້າຮ່ວມກອງປະຊຸມ APPF-27 ທີ່ເມືອງສຽມລຽບ (ກຳປູເຈຍ) ໃນລະຫວ່າງວັນທີ 14 – 16 ມັງກອນ 2019.
ທ່ານນາງ ຫງວຽນທິກິມເງິນ ປະທານສະພາແຫ່ງຊາດຫວຽດນາມ ກ່າວປາໄສໃນພິທີເປີດກອງປະຊຸມ APPF-27. (ພາບ: TTXVN)
ຄະນະຜູ້ແທນຂັ້ນສູງສະພາແຫ່ງຊາດຫວຽດນາມເຂົ້າຮ່ວມກອງປະຊຸມຄັ້ງທີ 27 ຂອງເວທີປາໄສລັດຖະສະພາອາຊີ-ປາຊີຟິກ (APPF-27) ເພື່ອສືບຕໍ່ປະຕິບັດບົດບາດເປັນເຈົ້າການ, ຕັ້ງໜ້າໃນການເຂົ້າຮ່ວມກິດຈະກຳທາງການທູດພະຫຸພາຄີ, ເສີມຂະຫຍາຍບົດບາດແລະຖານະທີ່ຕັ້ງຂອງຫວຽດນາມໃນເວທີປາໄສນີ້, ປະກອບສ່ວນສົ່ງເສີມຄວາມພະຍາຍາມທາງການທູດລວມຂອງລັດຂອງພວກເຮົາ ເພື່ອສັນຕິພາບ, ການຮ່ວມມື ແລະ ການພັດທະນາ. ນີ້ກໍ່ແມ່ນໂອກາດເພື່ອໃຫ້ສະມາຊິກສະພາແຫ່ງຊາດຫວຽດນາມ ຕິດຕໍ່ແລະແລກປ່ຽນກັບສະມາຊິກສະພາແຫ່ງຊາດຂອງບັນດາປະເທດ ກ່ຽວກັບຄວາມເອົາໃຈໃສ່ຮ່ວມກັນຂອງພາກພື້ນແລະຂອງໂລກ.
ເວທີປາໄສລັດຖະສະພາອາຊີ-ປາຊີຟິກ ຖືກສ້າງຕັ້ງຂຶ້ນໃນປີ 1993 ເພື່ອແນໃສ່ເພີ່ມທະວີການສົນທະນາລະຫວ່າງບັນດາສະມາຊິກລັດຖະສະພາໃນພາກພື້ນ ກ່ຽວກັບບັນດາບັນຫາຄວາມປອດໄພ - ການເມືອງ, ການຮ່ວມມືເສດຖະກິດ - ການຄ້າ ແລະ ວັດທະນະທຳ, ປະກອບສ່ວນແກ້ໄຂບັນດາບັນຫາພາກພື້ນ, ປະກອບສ່ວນເຂົ້າໃນການຮັກສາສັນຕິພາບ, ສະຖຽນລະພາບ, ການພັດທະນາແບບຍືນຍົງ ແລະ ຄວາມຈະເລີນຮຸ່ງເຮືອງໃນທົ່ວພາກພື້ນ.
ໃນປະຈຸບັນ ເວທີປາໄສລັດຖະສະພາອາຊີ-ປາຊີຟິກ ມີ 27 ສະພາແຫ່ງຊາດສະມາຊິກຄື: ອົດສະຕຣາລີ, ກຳປູເຈຍ, ການາດາ, ກົດສະຕາ ຣິກາ, ຊີເລ, ໂກໂລມບີ, ຈີນ, ເອກວາດໍ, ຟີຈີ, ອີນໂດເນເຊຍ, ຍີ່ປຸ່ນ, ສ.ເກົາຫຼີ, ລາວ, ມາເລເຊຍ, ມາດໂຊນ ອິດສະແລນ, ເມັກຊິກ, ມີໂກຣເນເຊຍ, ມົງໂກລີ, ນູແວນເຊລັງ, ປາປົວນິວກີເນ, ເປຣູ, ຟີລິບປິນ, ລັດເຊຍ, ສິງກະໂປ, ໄທ, ສະຫະລັດອາເມລິກາ ແລະ ຫວຽດນາມ.
ກອປະຊຸມປະຈຳປີຄັ້ງທີ 26 ຂອງເວທີປາໄສລັດຖະສະພາອາຊີ-ປາຊີຟິກ ໄດ້ຈັດຂຶ້ນທີ່ນະຄອນຮ່າໂນ້ຍໃນເດືອນມັງກອນ 2018 ດ້ວຍ “ຖະແຫຼງການຮ່າໂນ້ຍ” ຂີດໝາຍເສັ້ນທາງ 25 ປີແຫ່ງການພັດທະນາຂອງ APPF, ເປີດວິໄສທັດໃໝ່ໃຫ້ແກ່ການພົວພັນຄູ່ຮ່ວມມືລັດຖະສະພາອາຊີ-ປາຊີຟິກ ເຖິງປີ 2030.
ຫົວຂໍ້ຂອງກອງປະຊຸມປະຈຳປີ ຄັ້ງທີ 27 ຂອງເວທີປາໄສລັດຖະສະພາອາຊີ-ປາຊີຟິກ ຢູ່ເມືອງສຽມລຽບ, ກຳປູເຈຍ ແມ່ນ “ເພີ່ມທະວີການພົວພັນຄູ່ຮ່ວມມືລັດຖະສະພາເພື່ອສັນຕິພາບ, ຄວາມປອດໄພ ແລະ ການພັດທະນາແບບຍືນຍົງ”, ໃຫ້ບຸລິມະສິດແກ່ເປົ້າໝາຍຮັບປະກັນສັນຕິພາບ, ຄວາມປອດໄພ ແລະ ການພັດທະນາແບບຍືນຍົງ.
ໂດຍເປັນສະມາຊິກທີ່ຕັ້ງໜ້າ, ເປັນເຈົ້າການ ແລະ ມີຄວາມຮັບຜິດຊອບ, ຄະນະຜູ້ແທນຂັ້ນສູງສະພາແຫ່ງຊາດຫວຽດນາມເຂົ້າຮ່ວມກອງປະຊຸມ APPF-27 ຄັ້ງນີ້ໃນຖານະປະເທດເຈົ້າພາບຂອງກອງປະຊຸມ APPF-26, ໄດ້ມີການເຄື່ອນໄຫວທີ່ຕັ້ງໜ້າໃນການເຮັດໃຫ້ເຫັນແຈ້ງເຖິງສ່ວນຮ່ວມທີ່ສຳຄັນຂອງສະພາແຫ່ງຊາດຫວຽດນາມໃນການພັດທະນາຂອງ APPF.
ໃນພິທີເປີດການປະຊຸມ, ທ່ານນາງ ຫງວຽນທິກິມເງິນ ປະທານສະພາແຫ່ງຊາດຫວຽດນາມ ໄດ້ມີບົດປາໄສໃຫ້ເຫັນວ່າ ໃນປີ 2018 ທີ່ຜ່ານມາ, ສະພາແຫ່ງຊາດຫວຽດນາມໄດ້ຕັ້ງໜ້າຜັນຂະຫຍາຍມະຕິຂອງ APPF-26 ໃນບັນດາຂົງເຂດທີ່ກ່ຽວຂ້ອງ, ໃນນັ້ນມີມະຕິກ່ຽວກັບການຊຸກຍູ້ການທູດລັດຖະສະພາເພື່ອສັນຕິພາບ, ຄວາມປອດໄພ ແລະ ຄວາມຈະເລີນຮຸ່ງເຮືອງໃນພາກພື້ນ ແລະ ໃນໂລກ.
ເພື່ອໃຫ້ APPF ສືບຕໍ່ເປັນເວທີປາໄສທີ່ເຄື່ອນໄຫວຢ່າງມີປະສິດທິຜົນ, ປະທານສະພາແຫ່ງຊາດຫວຽດນາມຫງວຽນທິກິມເງິນ ຄາດຫວັງວ່າບັນດາລັດຖະສະພາສະມາຊິດຈະສືບຕໍ່ການຮ່ວມມືຢ່າງຮອບດ້ານ, ແໜ້ນແຟ້ນໃນຂົງເຂດຕ່າງໆຄື ການເມືອງ, ຄວາມປອດໄພ, ເສດຖະກິດ, ວິທະຍາສາດ-ເຕັກໂນໂລຊີ, ວັດທະນະທຳ-ສັງຄົມ ແລະ ການພັດທະນາແບບຍືນຍົງ. ໃນຂະບວນວິວັດນີ້, ຕ້ອງການເສັ້ນທາງທີ່ເໝາະສົມ, ອີງໃສ່ຄວາມເຫັນດີເຫັນພ້ອມ, ຄວາມສາມັກຄີດ້ວຍທິດນຳ “ບໍ່ປະໃຫ້ຜູ້ໃດຖືກຕົກຢູ່ຂ້າງຫຼັງ” ແລະ “ເຮັດໃຫ້ຄຳເວົ້າກາຍເປັນການກະທຳ”.
ຢູ່ທີ່ APPF-27, ຫວຽດນາມຮ່ວມອຸປະຖຳ 2 ມະຕິ. ມະຕິທີ່ໜຶ່ງແມ່ນກ່ຽວກັບການຮ່ວມມືພັດທະນາຄວາມຫຼາກຫຼາຍທາງວັດທະນະທຳແລະການທ່ອງທ່ຽວ. ມະຕິສະບັບນີ້ເໝາະສົມສຳລັບທັງປະເທດເພື່ອນແລະຫວຽດນາມທີ່ພວມພັດທະນາ, ຍ້ອນວ່າວັດທະນະທຳເປັນຮາກຖານທີ່ສຳຄັນເພື່ອການພັດທະນາ ແລະ ຄວາມສາມາບົ່ມຊ້ອນທາງດ້ານວັດທະນະທຳ, ການທ່ອງທ່ຽວຂອງສອງປະເທດຍັງມີຢ່າງຫຼວງຫຼາຍ. ຜ່ານມະຕິສະບັບນີ້, ສອງປະເທດຈະພ້ອມກັນແນະນຳກັບເພື່ອນມິດສາກົນກ່ຽວກັບຄວາມສາມາດບົ່ມຊ້ອນນີ້. ມະຕິທີ່ສອງແມ່ນການສ້າງສະຖາບັນທີ່ໝັ້ນຄົງເພື່ອຊຸກຍູ້ການຄ້າ ແລະ ການພັດທະນາແບບປົກຄຸມ.
ຫຼັງຈາກ 3 ວັນເຮັດວຽກ, ກອງປະຊຸມ APPF-27 ໄດ້ຮັບຮອງຜ່ານ 14 ມະຕິ ບົນພື້ນຖານຮ່າງມະຕິ 43 ສະບັບໂດຍບັນດາປະເທດສະມາຊິກນຳສະເໜີ ແລະ ປະກາດຮ່ວມສຽມລຽບ 2019. ມະຕິສອງສະບັບທີ່ໄດ້ສະເໜີໂດຍຫວຽດນາມກໍ່ໄດ້ຮັບຮອງຜ່ານ ແລະ ໄດ້ຮັບການເຫັນດີສູງ.
ຢູ່ຂ້າງກອງປະຊຸມ APPF-27, ທີ່ເມືອງສຽມລຽບ, ປະທານສະພາແຫ່ງຊາດຫວຽດນາມ ຫງວຽນທິກິມເງິນ ໄດ້ພົບປະຫາລືກັບ ສົມເດັດອັກຄະຣະມະຫາເສນາບໍດີເດໂຊ ຮຸນເຊນ, ນາຍົກລັດຖະມົນຕີແຫ່ງລາຊະອານາຈັກກຳປູເຈຍ; ພົບປະຫາລືກັບ ສົມເດັດວິບູນເສນາຜັກດີ ໄຊຈູມ, ປະທານສະພາສູງແຫ່ງລາຊະອານາຈັກກຳປູເຈຍ; ພົບປະຫາລືກັບ ສົມເດັດອັກຄະຣະມະຫາພະຍາຈັກກຣີ ເຮງ ສຳຣິນ, ປະທານສະພາແຫ່ງຊາດແຫ່ງລາຊະອານາຈັກກຳປູເຈຍ, ປະທານ APPF-27. ໃນການພົບປະຫາລືລະຫວ່າງສອງຝ່າຍດັ່ງກ່າວ, ບັນດານຜູ້ນຳຂັ້ນສູງຂອງກຳປູເຈຍໄດ້ສະແດງຄວາມຂອບໃຈ ປະທານສະພາແຫ່ງຊາດ ຫງວຽນທິກິມເງິນ ແລະ ຄະນະຜູ້ແທນຂັ້ນສູງສະພາແຫ່ງຊາດຫວຽດນາມ ທີ່ໄດ້ມາຮ່ວມກອງປະຊຸມ APPF-27, ຊ່ວຍໜູນກຳປູເຈຍໃນການຈັດຕັ້ງກອງປະຊຸມ ແລະ ປະກອບສ່ວນເຂົ້າໃນຜົນສຳເລັດລວມ.
ປະທານສະພາແຫ່ງຊາດຫວຽດນາມ ຫງວຽນທິກິມເງິນ ກໍ່ໄດ້ພົບປະຫາລືກັບປະທານສະພາແຫ່ງຊາດລາວ ປານີ ຢາທໍ່ຕູ້. ການພົບປະຫາລືດຳເນີນໄປໃນບັນຍາກາດມິດຕະພາບ, ຄວາມຮັກແພງຖານສະຫາຍອ້າຍນ້ອງລະຫວ່າງສອງປະເທດຫວຽດນາມ-ລາວ./.
ໂດຍ ເຟືອງຈ່າ
