ຫວຽດນາມຍາມໃດກໍ່ໃຫ້ບຸລິມະສິດແກ່ການປັບປຸງການພົວພັນກັບກຳປູເຈຍ
ວກ.ອອນໄລ - ໂດຍຕອບສະໜອງຕາມຄຳເຊີນຂອງເຈົ້າຊີວິດກຳປູເຂຍ ພະບາດສົມເດັດພະບໍລົມມະນາດ ນະໂຣດົມ ສີຫະມຸນີ, ທ່ານເລຂາທິການໃຫຍ່ຄະນະບໍລິຫານງານສູນກາງ ພັກກອມມູນິດຫວຽດນາມ, ປະທານປະເທດສາທາລະນະລັດສັງຄົມນິຍົມຫວຽດນາມ ຫງວຽນຝູຈ້ອງ ໄດ້ນຳໜ້າຄະນະຜູ້ແທນຂັ້ນສູງຫວຽດນາມ ດຳເນີນການຢ້ຽມຢາມທາງລັດຖະກິດທີ່ລາຊະອານາຈັກກຳປູເຈຍ ໃນລະຫວ່າງວັນທີ 25-26 ກຸມພາ 2019.
ທ່ານເລຂາທິການໃຫຍ່, ປະທານປະເທດຫວຽດນາມ ຫງວຽນຝູຈ້ອງ ພົບປະເຈລະຈາກັບ ເຈົ້າຊີວິດກຳປູເຈຍ ນະໂຣດົມ ສີຫະມຸນີ. (ພາບ: TTXVN)
ໃນເວລາຢ້ຽມຢາມກຳປູເຈຍ, ທ່ານເລຂາທິການໃຫຍ່, ປະທານປະເທດຫວຽດນາມ ຫງວຽນຝູຈ້ອງ ໄດ້ມີການພົບປະເຈລະຈາກັບເຈົ້າຊີວິດກຳປູເຈຍ ພະບາດສົມເດັດພະບໍລົມມະນາດ ນະໂຣດົມ ສີຫະມຸນີ; ຢ້ຽມຢາມສົມເດັດພະມະຫາວີລະກະສັດຕຣີ ນະໂຣດົມ ມະນີນາດ ສີຫະນຸ; ພົບປະຫາລືກັບ ສົມເດັດວິບູນເສນາພັກດີ ໄຊຈູນ, ປະທານສະພາສູງ; ສົມເດັດອັກຄະມະຫາພະຍາຈັກກຣີ ເຮງ ສຳຣີນ, ປະທານສະພາແຫ່ງຊາດ; ສົມເດັດອັກຄະມະຫາເສນາບໍດີເດໂຊ ຮຸນ ເຊນ, ປະທານພັກປະຊາຊົນກຳປູເຈຍ, ນາຍົກລັດຖະມົນຕີແຫ່ງລາຊະອານາຈັກກຳປູເຈຍ.
ໃນບັນຍາກາດທີ່ເຕັມໄປດ້ວຍຄວາມສາມັກຄີ, ມິດຕະພາບທີ່ເປັນມູນເຊື້ອ ແລະຄວາມໄວ້ເນື້ອເຊື່ອໃຈຊຶ່ງກັນແລະກັນ, ບັນດາຜູ້ນຳຂອງສອງປະເທດໄດ້ແຈ້ງໃຫ້ກັນຊາບ ກ່ຽວກັບສະພາບການຂອງແຕ່ລະປະເທດ, ແລກປ່ຽນຢ່າງກວ້າງຂວາງເລິກເຊິ່ງ ກ່ຽວກັບການຮ່ວມມືສອງຝ່າຍ ແລະແບ່ງປັນຄວາມເຫັນກ່ຽວກັບສະພາບການໂລກ, ພາກພື້ນ ທີ່ສອງຝ່າຍມີຄວາມສົນໃຈຮ່ວມກັນ.
ສອງຝ່າຍສະແດງຄວາມຍິນດີຕໍ່ການພັດທະນາຢ່າງດີງາມຂອງຄວາມພົວພັນມິດຕະພາບ ແລະການຮ່ວມມືຢ່າງຮອບດ້ານລະຫວ່າງຫວຽດນາມແລະກຳປູເຈຍ ໃນເວລາທີ່ຜ່ານມາ, ປະກອບສ່ວນຮັບປະກັນສັນຕິພາບ, ສະຖຽນລະພາບ ແລະນຳເອົາຜົນປະໂຫຍດຕົວຈິງມາໃຫ້ປະຊາຊົນສອງປະເທດ.
ສອງຝ່າຍຊົມເຊີຍການຕັດສິນຂອງສານສາກົນເມື່ອວັນທີ 16 ພະຈິກ 2018 ກ່ຽວກັບການດັບສູນເຊື້ອຊາດຂອງລະບອບຂະແມແດງ.
ສອງຝ່າຍເປັນເອກະສັນໃຫ້ທັດສະນະວ່າ ການປ້ອງກັນ, ອະນຸຮັກ ແລະ ພັດທະນາສາຍພົວພັນເພື່ອນບ້ານທີ່ດີງາມ, ມິດຕະພາບທີ່ເປັນມູນເຊື້ອ, ການຮ່ວມມືຮອບດ້ານ, ໝັ້ນຄົງຍາວນານ ບົນພື້ນຖານບັນດາຫຼັກການທີ່ໄດ້ລະບຸໄວ້ໃນຖະແຫຼງການຮ່ວມຫວຽດນາມ-ກຳປູເຈຍນັ້ນ ແມ່ນຄວາມຮັບຜິດຊອບລວມຂອງສອງປະເທດ ແລະປະຊາຊົນສອງປະເທດ ເພື່ອການພັດທະນາແບບຍືນຍົງແລະອະນາຄົດທີ່ສົດໃສ ຂອງທັງສອງປະເທດ, ປະກອບສ່ວນເຂົ້າໃນສັນຕະພາບ, ສະຖຽນລະພາບ, ການຮ່ວມມື ແລະການພັດທະນາ ຢູ່ໃນພາກພື້ນແລະໃນໂລກ.
ສອງຝ່າຍເປັນເອກະສັນຈະເພື່ມທະວີ ແລະ ນຳເອົາການພົວພັນດ້ານການເມືອງເຂົ້າສູ່ລວງເລິກ; ຍົກສູງປະສິດທິຜົນຂອງບັນດາກົນໄກການຮ່ວມມືລະຫວ່າງສອງປະເທດ; ເປີດກວ້າງການຮ່ວມມື, ຊ່ວຍເຫຼືອຊຶ່ງກັນແລະກັນ ລະຫວ່າງບັນດາກະຊວງ, ຄະນະ, ຂະແໜງການ, ອົງຄະນະມະຫາຊົນ, ອົງການຈັດຕັ້ງປະຊາຊົນ ຢູ່ສູນກາງແລະທ້ອງຖິ່ນຂອງສອງປະເທດ; ສືບຕໍ່ປະສານສົມທົບການຈັດຕັ້ງເປັນຢ່າງດີ ບັນດາກິດຈຳການການສະເຫຼີມສະຫຼອງລວມຂອງສອງປະເທດ ເພື່ອເຮັດໃຫ້ຄວາມໝາຍແລະຄວາມສຳຄັນຂອງການພົວພັນລະຫວ່າງສອງປະເທດມີຄວາມເລິກເຊິ່ງກວ່າອີກ; ຍູ້ແຮງການໂຄສະນາ, ອົບຮົມສຶກສາກ່ຽວກັບມູນເຊື້ອຄວາມພົວພັນສາມັກຄີ ມິດຕະພາບຫວຽດນາມ-ກຳປູເຈຍ ໃນປະຊາຊົນທຸກຊັ້ນຄົນ, ໂດຍສະເພາະແມ່ນຊາວໜຸ່ມ ຂອງສອງປະເທດ; ສືບຕໍ່ຮ່ວມມືໃນການເສີມສ້າງອະນຸສາວະລີມິດຕະພາບຫວຽດນາມ-ກຳປູເຈຍ ຢູ່ໃນແຕ່ລະປະເທດ ຕາມແຜນການທີ່ໄດ້ເປັນເອກະພາບກັນ.
ສອງຝ່າຍເນັ້ນເຖິງຄວາມສຳຄັນແລະເປັນເອກະພາບເພີ່ມທະວີການຮ່ວມມືທາງດ້ານການປ້ອງກັນປະເທດ, ປ້ອງກັນຄວາມສະຫງົບບົນຫຼັກການ ບໍ່ອະນຸຍາດໃຫ້ກອງກຳລັງທາງການເມືອງຫຼືການທະຫານໃດໆ ໃຊ້ດິນແດນຂອງປະເທດຕົນ ເພື່ອເປັນອັນຕະລາຍຕໍ່ຄວາມປອດໄພຂອງປະເທດອື່ນ ແລະ ແກ້ໄຂບັນດາບັນຫາທີ່ເກີດຂຶ້ນລະຫວ່າງສອງປະເທດດ້ວຍສັນຕິວິທີ; ເພີ່ມທະວີການປະສານສົມທົບແນໃສ່ຮັກສາສະຖຽນລະພາບທາງການເມືອງ, ຄວາມສະຫງົບ, ຄວາເປັນລະບຽບຮຽບຮ້ອຍແລະຄວາມປອດໄພທາງສັງຄົມ ຢູ່ທັງສອງປະເທດ; ເພີ່ມທະວີການຮ່ວມມືໃນການປ້ອງກັນໄພພິບັດ, ຈັດຕັ້ງການຝຶກຊ້ອມລວມກ່ຽວກັບການຄົ້ນຫາ, ກູ້ໄພກູ້ຊີບ; ກີດກັ້ນ ປ້ອງກັນແລະຕ້ານອາຊະຍາກຳຂ້າມຊາດ; ສືບຕໍ່ຄວາມພະຍາຍາມໃນການຄົ້ນຫາ, ເກັບກູ້ ແລະຍົກຍ້າຍ ອັດຖິຂອງທະຫານອາສາສະໝັກຫວຽດນາມທີ່ເສຍສະລະຊີວິດຢູ່ກຳປະເຈຍ ກັບຄືນປະເທດ.
ຝ່າຍຫວຽດນາມສະແດງຄວາມຂອບໃຈຕໍ່ລາຊະອານາຈັກກຳປຸເຈຍ ທີ່ໃຫ້ການສະໜັບສະໜູນແລະປະຕິບັດຕໍ່ຊາວຫວຽດນາມໃນກຳປູເຈຍ ຢ່າງເປັນທຳ.
ສອງຝ່າຍຢືນຢັນຄຳໝັ້ນສັນຍາເຄົາລົບແລະປະຕິບັດຢ່າງເຕັມສ່ວນ ບັນດາສົນທິສັນຍາກຳນົດເສັ້ນຊາຍແດນ ແລະ ບັນດາສັນຍາ, ຂໍ້ຕົກລົງທີ່ກ່ຽວຂ້ອງກັບຊາຍແດນ ທີ່ໄດ້ຮັບການອະນຸມັດແລະລົງນາມລະຫວ່າງສອງປະເທດ; ຕີລາຄາສູງຕໍ່ຄວາມພະຍາຍາມຂອງຄະນະກຳມະການປະສົມ ທີ່ໄດ້ສຳເລັດ 84% ຂອງວຽກງານການແບ່ງເຂດ, ປັກຫຼັກໝາຍຊາຍແດນເທິງບົກ.
ສອງຝ່າຍເປັນເອກະສັນໃນການແບ່ງປັນຂໍ້ມູນຂ່າວສານຢ່າງເປັນປະຈຳ ແລະສົມທົບກັນຢ່າງແໜ້ນແຟ້ນ, ມີປະສິດທິຜົນ, ສະໜັບສະໜູນຊຶ່ງກັນແລະກັນໃນບັນດາບັນຫາສາກົນແລະພາກພື້ນ, ໂດຍສະເພາະແມ່ນໃນຂອບການຮ່ວມມື ອາຊຽນ, ສະຫະປະຊາຊາດ ແລະ ບັນດາກົນໄກການຮ່ວມມືອະນຸພາກພື້ນແມ່ນ້ຳຂອງ, ປະກອບສ່ວນຮັກສາສັນຕິພາບ, ສະຖຽນລະພາບ, ການຮ່ວມມື ແລະ ການພັດທະນາຢູ່ພາກພື້ນແລະໃນໂລກ...
ສອງຝ່າຍສືບຕໍ່ເນັ້ນເຖິງຄວາມສຳຄັນຂອງການຮັກສາສັນຕິພາບ, ສະຖຽນລະພາບ, ຄວາມສະຫງົບ, ຄວາມປອດໄພໃນການເດີນເຮືອແລະການບິນ ຢູ່ທະເລຕາເວນອອກ; ເຫັນດີເປັນເອກະສັນຈະຊຸກຍູ້ການແກ້ໄຂຂໍ້ພິພາດຂັດແຍ້ງຢູ່ທະເລຕາເວັນອອກດ້ວຍສັນຕິວິທີ, ອົດທົນອົດກັ້ນ, ບໍ່ໃຊ້ຫຼືຂົ່ມຂູ່ຈະໃຊ້ກຳລັງອາວຸດ, ສອດຄ່ອງກັບບັນດາຫຼັກການ ທີ່ໄດ້ຮັບການຍອມຮັບຢ່າງກວ້າງຂວາງໂດຍກົດໝາຍສາກົນ ລວມທັງອະນຸສັນຍາສະຫະປະຊາຊາດກ່ຽວກັບກົດໝາຍທະເລປີ 1982 (UNCLOS); ໃຫ້ຄຳໝັ້ນສັນຍາຈະພ້ອມກັບບັນດາຝ່າຍທີ່ກ່ຽວຂ້ອງ ປະຕິບັດຖະແຫຼງການກ່ຽວກັບການປະພຶດຂອງບັນດາຝ່າຍຢູ່ທະເລຕາເວັນອອກ (DOC) ຢ່າງເຕັມສ່ວນແລະມີປະສິດທິຜົນ, ແລະຊຸກຍູ້ເພື່ອບັນລຸປະມວນຂໍ້ກຳນົດກ່ຽວກັບການປະພຶດຂອງບັນດາຝ່າຍຢູ່ທະເລຕາເວັນອອກ (COC) ທີ່ແທ້ຈິງແລະມີປະສິດທິຜົນໂດຍໄວ, ປະກອບສ່ວນຮັກສາສັນຕິພາບ, ສະຖຽນລະພາບ, ຄວາມປອດໄພ, ການຮ່ວມມືແລະການພັດທະນາ ຢູ່ພາກພື້ນແລະໃນໂລກ.
ສອງຝ່າຍຕີລາຄາສູງຜົນສຳເລັດທິ່ດີງານແລະຄວາມໝາຍປະຫວັດສາດ ຂອງການຢ້ຽມຢາມທາງລັດຖະກິດຢູ່ລາຊະອານາຈັກກຳປູເຈຍ ຂອງທ່ານເລຂາທິການໃຫຍ່, ປະທາປະເທດຫວຽດນາມ ຫງວຽນຝູຈ້ອງ, ປະກອບສ່ວນເຂົ້າໃນການເພີ່ມທະວີຄວາມໄວ້ວາງໃຈຊຶ່ງກັນແລະກັນ, ເພີ່ມທະວີຄວາມພົວພັນເພື່ອນບ້ານທີ່ດີງາມ, ມິດຕະພາບທີ່ເປັນມູນເຊື້ອ, ການຮ່ວມມືຮອບດ້ານ, ໝັ້ນຄົງຍາວນານ ລະຫວ່າງຫວຽດນາມ-ກຳປູເຈຍ ໃຫ້ພັດທະນາຍິ່ງຂຶ້ນ, ມີຜົນຕົວຈິງແລະມີປະສິດທິຜົນ, ເພື່ອຜົນປະໂຫຍດຂອງປະຊາຊົນໃນແຕ່ລະປະເທດ, ປະກອບສ່ວນໃຫ້ສັນຕະພາບ, ສະຖຽນລະພາບ, ການຮ່ວມມື ແລະການພັດທະນາ ຢູ່ພາກພື້ນແລະໃນໂລກ.
ສິ້ນສຸດການເຈລະຈາ, ທ່ານເລຂາທິການໃຫຍ່, ປະທາປະເທດຫວຽດນາມ ຫງວຽນຝູຈ້ອງ ແລະ ທ່ານນາຍົກກຳປູເຈຍ ຮຸນ ເຊນ ໄດ້ເປັນສັກຂີພະຍານພິທີເຊັນເອກະສານການຮ່ວມມື 5 ສະບັບ./.
ໂດຍ ຜບ. (ສັງລວມຈາກຂ່າວສານຫວຽດນາມ)
