ກໍ່ສ້າງ​ແມ່​ຍິງຫວຽດນາມ ​ເພື່ອ​ຕອບ​ສະໜອງ​
ຄວາມ​​ຕ້ອງການ​ຂອງ​ການ​ພັດທະນາ​ປະເທດຢ່າງ​ຍືນ​ຍົງ
ແລະ ​ການເຊື່ອມ​ໂຍງ​ເຂົ້າ​ກັບ​ສາກົນ

ໂດຍ ໂຕນ ງ້ອດ ແຮັ້ງ
ກຳມະການສຳລອງຄະນະບໍລິຫານງານສູນກາງພັກ, ຮອງປະທານສະຫະພັນແມ່ຍິງຫວຽດນາມ
08:40, 07-03-2023

ວກ. - ດ້ວຍມູນເຊື້ອ “ວິລະຊົນ - ບໍ່ອ່ອນຍອມ - ຈົງຮັກພັກດີ - ຮັບພາລະກ້າກັ່ນ”, ແມ່ຍິງຫວຽດນາມໄດ້​ມີ​ການ​ປະ​ກອບ​ສ່ວນ​ອັນ​ໃຫຍ່​ຫຼວງ​ ເຂົ້າ​ໃນ​ພາລະກິກ​ການ​ສ້າງ​ສາ ແລະ ປົກປັກຮັກສາ​ປະ​ເທດຊາດ. ໂດຍປະຕິບັດຕາມຄົນຮຸ່ນກ່ອນ, ແມ່​ຍິງ​ຫວຽດ​ນາມ​ໃນປະຈຸບັນ​ສືບ​ຕໍ່​ເສີມ​ຂະ​ຫຍາຍ​ຄຸນ​ສົມບັດ​ທີ່​ດີ, ປຸກຕື່ນຄວາມສາມັກຄີ, ຄວາມຂະຫຍັນຂັນເຄື່ອນ, ຄວາມຄິດສ້າງສັນ, ຄວາມມານະພະຍາຍາມປະກອບສ່ວນເຂົ້າໃນການພັດທະນາແບບຍືນຍົງ ແລະ ການເຊື່ອມໂຍງສາກົນຂອງປະເທດ.

ກຳມະການກົມການເມືອງ, ນາຍົກລັດຖະມົນຕີ ຟ້າມ ມິງ ຈີ້ງ ພົບປະກັບພະນັກງານແມ່ຍິງທີ່ດີເດັ່ນທີ່ເປັນຜູ້ຕາງໜ້າແມ່ຍິງທຸກຊັ້ນວັນນະ ເນື່ອງໃນໂອກາດ ວັນແມ່ຍິງຫວຽດນາມ 20 ຕຸລາ _ພາບ: TTXVN

1- ຢູ່ຫວຽດນາມ, ຜູ້ຍິງກວມເອົາ 50,2% ຂອງປະຊາກອນທັງໝົດຂອງປະເທດ, ເທົ່າກັບ 46,5% ຂອງແຮງງານສັງຄົມ(1) ແລະ 46% ຂອງພະນັກງານຄົ້ນຄວ້າ ແລະພັດທະນາ (R&D), ກວມເອົາຫຼາຍກວ່າ 40% ຂອງນັກວິທະຍາສາດ(2). ແມ່ຍິງຫວຽດນາມນັບມື້ນັບຢືນຢັນຄວາມສາມາດຊ້ອນແຝງ, ຖານະບົດບາດ ແລະ ຕຳແໜ່ງສຳຄັນ ໃນຄອບຄົວແລະສັງຄົມ. ອັດຕາສ່ວນແມ່ຍິງທີ່ເຂົ້າຮ່ວມວຽກງານການນຳພາ, ຄຸ້ມຄອງນັ້ນ ນັບມື້ນັບເພີ່ມຂຶ້ນ. ອັດຕາສ່ວນແມ່ຍິງໃນຄະນະພັກທຸກຂັ້ນເພີ່ມ​ຂຶ້ນ​ເມື່ອ​ທຽບ​ໃສ່​ໄລຍະ​ຜ່ານ​ມາ. ອັດ​ຕາ​ສ່ວນ​ຜູ້​ແທນ​ເພດ​ຍິງ​ໃນ​ສະ​ພາ​ແຫ່ງ​ຊາດ​ແມ່ນ​ຫຼາຍກວ່າ 30%, ສູງ​ກວ່າ​ຄ່າສະ​ເລ່ຍ​ຂອງ​ໂລກ ແລະ ພາກ​ພື້ນ, ຢືນ​ອັນ​ດັບ​ທີ 1 ໃນ​ສະພາສະຫະພັນລັດຖະສະພາຂອງສະມາຄົມປະຊາຊາດອາຊີຕາເວັນອອກສຽງໃຕ້. ອັດ​ຕາ​ສ່ວນ​ຜູ້ນໍາທີ່ສໍາຄັນເພດຍິງ​ຢູ່​​ບັນ​ດາ​ອົງ​ການ​ລະ​ດັບ​ລັດ​ຖະ​ມົນ​ຕີ​ມີເຖິງ 50%. ແຫຼ່ງກຳລັງຄົນເພດຍິງທີ່ຄົ້ນຄວ້າວິທະຍາສາດໄດ້ເພີ່ມຂຶ້ນຫຼາຍພໍຄວນ(3). ສາມາດຢືນຢັນວ່າ, ແມ່ຍິງຫວຽດນາມມີໜ້າໃນທຸກຂົງເຂດ, ທຸກພື້ນທີ່, ເປັນເຈົ້າການເຂົ້າຮ່ວມໃນທຸກກິດຈະກຳຂອງຊີວິດສັງຄົມ, ປະຕິບັດເປັນຢ່າງດີ ແຜນນະໂຍບາຍແລະແນວທາງຂອງພັກ, ນະໂຍບາຍແລະກົດໝາຍຂອງລັດ; ຕັ້ງໜ້າສະໜັບສະໜູນບັນດາຂະບວນການແຂ່ງຂັນກັນຮັກຊາດ ແລະ ບັນລຸຜົນສຳເລັດທີ່ດີເດັ່ນ ໃນທຸກຂົງເຂດ ການເມືອງ ເສດຖະກິດ ວັດທະນະທຳ ສັງຄົມ, ການປ້ອງກັນປະເທດ, ການຮັກສາຄວາມໝັ້ນຄົງ, ການຕ່າງປະເທດ... ພ້ອມກັນນັ້ນ, ແມ່ຍິງແມ່ນປັດໄຈສຳຄັນພິເສດ ໃນການສ້າງຄອບຄົວທີ່ຜາສຸກ; ຮັກສາແລະເສີມຂະຫຍາຍເອກະລັກວັດທະນະທຳຂອງຊາດ; ປະກອບສ່ວນຮັກສາຄວາມໝັ້ນຄົງທາງການເມືອງ, ຄວາມເປັນລະບຽບລຽບລ້ອຍ ແລະຄວາມປອດໄພທາງສັງຄົມ; ປະກອບສ່ວນຍົກສູງ ບົດບາດ, ຖານະທີ່ຕັ້ງ ແລະ ອິດທິພົນຂອງຫວຽດນາມໃນເວທີໂລກ. 

ຄຳສັ່ງເລກທີ່ 21-CT/TW, ລົງວັນທີ 20 ມັງກອນ 2018, ຂອງຄະນະເລຂາທິການສູນກາງພັກກອມມູນິດຫວຽດນາມ, “ວ່າດ້ວຍການສືບຕໍ່ຊຸກຍູ້ວຽກງານແມ່ຍິງໃນສະພາບການໃໝ່ ໄດ້ກຳນົດໜ້າທີ່ທີ່ສຳຄັນຄື: ກໍ່ສ້າງ​ແມ່​ຍິງ​ຫວຽດນາມ​ທີ່​ພັດທະນາ​ຢ່າງຮອບດ້ານ ຕອບສະໜອງຄວາມຕ້ອງການຂອງ​ຍຸກ​ໃໝ່ ​ເພື່ອ​ແນ​ໃສ່​ປະຕິບັດ​ຈຸດໝາຍ​ສ້າງຄົນ​ຫວຽດນາມໃຫ້​ພັດທະນາ​ຢ່າງຮອບດ້ານ ເຊິ່ງ​ກອງ​ປະຊຸມ​ໃຫຍ່​ຄັ້ງ​ທີ 13 ຂອງ​ພັກ​ໄດ້​ກຳນົດ​ໄວ້: ການ​ສ້າງຄົນ​ຫວຽດນາມ​ໃຫ້​ພັດທະນາ​ຢ່າງຮອບດ້ານຈະ​ຕ້ອງ​ກາຍ​ເປັນຈຸດໝາຍໜຶ່ງຂອງ​ຍຸດ​ທະ​ສາດການ​ພັດທະນາ. ພ້ອມກັນນັ້ນ, ກອງປະຊຸມໃຫຍ່ຂອງພັກກໍເນັ້ນໜັກວ່າ: “ເສີມຂະຫຍາຍສຸດຂີດປັດໄຈມະນຸດ, ຖືມະນຸດເປັນໃຈກາງ, ອັດຕະພາບ, ຊັບພະຍາກອນທີ່ສໍາຄັນທີ່ສຸດ ແລະ ເປົ້າໝາຍການພັດທະນາ; ຖື​ຄຸນຄ່າ​ວັດທະນະທຳ ແລະ ຄົນ​ຫວຽດນາມ​ເປັນຮາກຖານ, ​ເປັນ​ກຳລັງ​ແຮງພາຍໃນທີ່​ສຳຄັນ ທີ່ຮັບປະກັນ​ການ​ພັດທະນາ​ແບບ​ຍືນ​ຍົງ(4); “ກ້າວຂຶ້ນເທື່ອລະກ້າວເພື່ອແກ້ໄຂຜ່ານຜ່າຂໍ້ຈຳກັດຕ່າງໆຂອງຄົນຫວຽດນາມ; ກໍ່ສ້າງ​ຄົນ​ຫວຽດນາມ​ໃນ​ຍຸກ​ໃໝ່, ​ເຊື່ອມ​ໂຍງ​ຄຸນຄ່າດັ້ງເດີມ ກັບຄຸນຄ່າສະໄໝໃໝ່ເຂົ້າກັນຢ່າງແໜ້ນແຟ້ນແລະກົມກຽວ(5).

ເອກະສານກອງປະຊຸມໃຫຍ່ຄັ້ງທີ 13 ຂອງພັກກອມມູນິດຫວຽດນາມ ກໍຢືນຢັນວ່າ: “ເສີມຂະຫຍາຍມູນເຊື້ອ, ຄວາມສາມາດບົ່ມຊ້ອນ, ທ່າແຮງ, ຈິດໃຈເປັນເຈົ້າ ແລະ ຄວາມປາຖະໜາຂອງແມ່ຍິງທຸກຊັ້ນວັນນະ. ກໍ່ສ້າງແມ່ຍິງຫວຽດນາມໃນຍຸກໃໝ່. ຍົກສູງຄຸນນະພາບຂອງແຫຼ່ງກຳລັງຄົນແມ່ຍິງ, ຕອບສະໜອງຄວາມຕ້ອງການພັດທະນາປະເທດຢ່າງຍືນຍົງ ແລະ ການເຊື່ອມໂຍງເຂົ້າກັບສາກົນ(6). ການກໍ່ສ້າງແມ່ຍິງຫວຽດນາມ ຕອບສະໜອງຄວາມຕ້ອງການພັດທະນາຢ່າງຍືນຍົງ ແລະ ການເຊື່ອມໂຍງເຂົ້າກັບສາກົນ ແມ່ນເນື້ອໃນທີ່ໄດ້ລະບຸໄວ້ໃນຍຸດທະສາດພັດທະນາສະຫະພັນແມ່ຍິງຫວຽດນາມຮອດ​ປີ 2030, ວິ​ໄສ​ທັດ​ຮອດ​ປີ 2035 ແລະ ມະຕິຂອງກອງປະຊຸມໃຫຍ່ຜູ້ແທນແມ່ຍິງທົ່ວປະເທດຄັ້ງທີ 13.

​ໃນ​ຖານະ​ເປັນ​ອົງການ​ຈັດ​ຕັ້ງ​ການ​ເມືອງ-ສັງຄົມ​ທີ່​ເຮັດ​ວຽກ​ເພື່ອ​ພັດທະນາ​ແມ່ຍິງ ​ແລະ ຄວາມ​ສະ​ເໝີ​ພາບ​ທາງ​ເພດ, ​ໃນ​ໄລຍະ​ຜ່ານ​ມາ, ສະຫະພັນແມ່ຍິງຫວຽດນາມໄດ້ຜັນຂະຫຍາຍຫຼາຍຂະບວນການແຂ່ງຂັນ ແລະ ການຂົນຂວາຍເຊັ່ນແມ່ຍິງຕັ້ງໜ້າຮ່ຳຮຽນ, ອອກແຮງງານປະດິດສ້າງ, ການກໍ່ສ້າງຄອບຄົວຜາສຸກ”, “ການກໍ່ສ້າງຄອບຄົວ 5 ບໍ່, 3 ສະອາດ, “ການຝຶກຝົນຫຼໍ່ຫຼອມຄຸນສົມບັດ: ຄວາມໝັ້ນໃຈ, ເຄົາລົບຕົນເອງ, ຈົງຮັກພັກດີ, ຮັບພາລະກ້າກັ່ນ”; ພ້ອມກັນນັ້ນ, ໄດ້ຜັນຂະຫຍາຍບັນດາໜ້າທີ່ຈຸດໜັກໃຈກາງ ເພື່ອສະໜັບສະໜູນແມ່ຍິງໃນການຝຶກຝົນຫຼໍ່ຫຼອມຄົນສົມບັດ, ຍົກສູງຄວາມຮັບຮູ້, ລະດັບຮຽນຮູ້, ຄວາມສາມາດ, ທັກສະ, ປະກອບສ່ວນຊຸກຍູ້ໃຫ້ແມ່ຍິງພັດທະນາຢ່າງຮອບດ້ານ(7). ແມ່ຍິງຫວຽດນາມນັບມື້ມີຄວາມຮັບຮູ້ຢ່າງຄົບຖ້ວນກວ່າ ກ່ຽວກັບສິດທິ ແລະ ພັນທະຂອງຕົນເອງ; ຜ່ານນັ້ນ, ຕັ້ງໜ້າແລະເປັນເຈົ້າການ ໃນການປະຕິບັດສິດທິພົນລະເມືອງ, ເຂົ້າຮ່ວມການກໍ່ສ້າງພັກ, ອຳນາດການປົກຄອງ ແລະ ອົງການຈັດຕັ້ງສະມາຄົມໃຫ້ນັບມື້ນັບໝັ້ນຄົງ. ໃນໄລຍະປີ 2017 - 2022, ແມ່ຍິງນັບລ້ານຄົນ ພ້ອມກັນກັບປະຊາຊົນທົ່ວປະເທດ ໄດ້ເຂົ້າ​ຮ່ວມ​ການ​ລົງ​ຄະ​ແນນ​ສຽງ​​ເລືອກ​ຕັ້ງ​ສະ​ພາ​ແຫ່ງ​ຊາດ ແລະ​ ສະ​ພາ​ປະ​ຊາ​ຊົນ​ທຸກ​ຂັ້ນ(8); ການເຄື່ອນໄຫວ ແລະ ຂະບວນການແຂ່ງຂັນ ຂອງສະມາຄົນແມ່ຍິງທຸກຂັ້ນ ໃນທົ່ວປະເທດ ໄດ້ບັນລຸຜົນສຳເລັດຫຼາຍຢ່າງໃນຫຼາຍດ້ານທີ່ໜ້າຊົມເຊີຍ(9).

ຄຽງຄູ່ກັບການເຄື່ອນໄຫວຍົກສູງຄວາມຮູ້, ຄວາມສາມາດ, ທັກສະທີ່ຊ່ວຍໃຫ້ແມ່ຍິງພັດທະນາຢ່າງຮອບດ້ານນັ້ນ, ສະຫະພັນແມ່ຍິງຫວຽດນາມຍັງຍູ້ແຮງການເຄື່ອນໄຫວພົວພັນຕ່າງປະເທດ, ການຮ່ວມມືສອງຝ່າຍແລະຫຼາຍຝ່າຍ ເພື່ອສະໜັບສະໜູນແມ່ຍິງຫວຽດນາມຢູ່ຕ່າງປະເທດ ແລະ ປະກອບສ່ວນຊຸກຍູ້ການເຊື່ອມໂຍງສາກົນ. ໂດຍກຳໄດ້ໂອກາດ ແລະ ຮັບ​ຮູ້​ບັນດາ​ສິ່ງ​ທ້າ​ທາຍ​ທີ່​ເກີດ​ຈາກ​ການ​ປ່ຽນ​ແປງ​ຢ່າງ​ວ່ອງ​ໄວ ​ແລະ ບໍ່​ຢຸດ​ຢັ້ງ​ໃນ​ສະຖານະ​ການ​ສາກົນ ​ແລະ ພາກ​ພື້ນ, ສະຫະພັນແມ່ຍິງຫວຽດນາມໄດ້ສ້າງແລະປະກາດໃຊ້ມະຕິເລກທີ 18-NQ/BCH, ລົງວັນທີ 8 ມັງກອນ 2021, ວ່າດ້ວຍການສະໜັບສະໜູນ​ການ​ເຊື່ອມ​ໂຍງ​ຂອງ​ແມ່ຍິງ​ຮອດ​ປີ 2030”, ກຳນົດບັນດາ​ມາດ​ຕະການ​ແກ້​ໄຂ​ສະ​ເພາະ​ ເພື່ອ​ໜູນ​ຊ່ວຍ​ໃຫ້​ແມ່ຍິງ​ມີ​ຄວາມ​ຕັ້ງໜ້າ ​ແລະ ເປັນເຈົ້າການ​ ໃນ​ການ​ເຊື່ອມ​ໂຍງ​ເຂົ້າ​ກັບ​ສາກົນ.

ດ້ວຍການປ່ຽນແປງໃໝ່ເນື້ອໃນແລະວິທີການເຄື່ອນໄຫວ, ສະມາຄົມແມ່ຍິງຂັ້ນຕ່າງໆໄດ້ມີການເຄື່ອນໄຫວຫຼາຍຢ່າງໃນການໂຄສະນາ, ຂົນຂວາຍ ແລະ ສະໜັບສະໜູນແມ່ຍິງໃຫ້ພັດທະນາຢ່າງຮອບດ້ານ ແລະ ເຊື່ອມໂຍງສາກົນເທື່ອລະກ້າວ. ແບບຢ່າງແມ່ຍິງຈຳນວນຫຼາຍ ທີ່ພະຍາຍາມບັນລຸຜົນສໍາເລັດອັນດີເລີດໃນຫຼາຍຂົງເຂດຂອງຊີວິດສັງຄົມ ໄດ້ຮັບການຍ້ອງຍໍແລະຊົມເຊີຍ ຜ່ານ​ບັນດາ​ລາງວັນ​ແລະນາມມະຍົດ ເຊິ່ງໄດ້​ຢັ້ງຢືນ​ບົດບາດ​ ແລະ ການ​ປະກອບສ່ວນ​ອັນ​ໃຫຍ່​ຫຼວງ​ຂອງ​ແມ່ຍິງ, ພ້ອມ​ທັງສ້າງແຮງບັນດານໃຈ ​ແລະ ຊຸກຍູ້​ໃຫ້​ແມ່ຍິງ​ສືບ​ຕໍ່​ມານະ​ພະຍາຍາມ​ປັບປຸງ​ຄຸນ​ນະພາ​ບຂອງ​ແມ່ຍິງ ຫວຽດນາມ ​ໃນ​ໄລຍະ​ຫັນ​ເປັນ​ອຸດສາຫະກຳ, ທັນ​ສະ​ໄໝ ​ແລະ ​ເຊື່ອມ​ໂຍງ​ເຂົ້າ​ກັບ​ສາກົນ​ຢ່າງ​ເລິກ​ເຊິ່ງ.

2- ໃນເວລາທີ່ຈະມາເຖິງ, ສະພາບການສາກົນແລະໃນປະເທດ ຈະມີໂອກາດແລະສິ່ງທ້າທາຍຫຼາຍຢ່າງທີ່ຊ້ຳຊ້ອນກັບ ແລະ ສົ່ງຜົນກະທົບຢ່າງແຮງເຖິງຊີວິດແລະການພັດທະນາຂອງແມ່ຍິງ. ໂລກາພິວັດ ແລະ ການເຊື່ອມໂຍງສາກົນຍັງຄົງດຳເນີນຕໍ່ໄປ; ເຕັກໂນໂລຊີດິຈິຕອນພັດທະນາຢ່າງແຂງແຮງ; ສົ່ງເສີມຄວາມສະເໝີພາບທາງເພດ ແລະ ສ້າງແຮງບັນດານໃຈໃຫ້ກັບແມ່ຍິງ ໃຫ້ສືບ​ຕໍ່​ແມ່ນ​ຄວາມ​ເປັນ​ຫ່ວງ​ແນວໜ້າ​ໃນ​ຄວາມ​​ພະ​ຍາ​ຍາມ​ຂອງ​ບັນ​ດາ​ປະ​ເທດ ແລະ ປະ​ຊາ​ຄົມ​ສາ​ກົນ, ເພື່ອປະຕິບັດເປົ້າໝາຍການພັດທະນາແບບຍືນຍົງ. ຢູ່ໃນປະເທດ, ບັນດາຜົນສຳເລັດດ້ານເສດຖະກິດແລະສັງຄົມພາຍຫຼັງ 35 ປີແຫ່ງການປ່ຽນແປງໃໝ່ ສືບຕໍ່ເປັນພື້ນຖານ ປະຖົມປັດໃຈ ເພື່ອຍົກສູງຖານະບົດບາດ ແລະ ອິດດທິພົນຂອງປະເທດໃນເວທີສາກົນ; ຈິດ​ໃຈ​ສາມັກຄີແຫ່ງ​ຊາດ, ຄວາມ​ປາ​ຖະໜາ​ທີ່ຈະພັດທະນາ​ຢ່າງຍິ່ງໃຫຍ່, ຈະ​ເລີ​ນຮຸ່ງ​ເຮືອງ ແລະ ມີຄວາມ​ສຸກ ​ນັບ​ມື້​ນັບ​ໄດ້​ຮັບ​ການ​ປຸກລະດົມແຂງ​ແຮງ. ຫວຽດນາມໄດ້ເປັນເຈົ້າການ ແລະ ຕັ້ງໜ້າເຊື່ອມໂຍງເຂົ້າກັບສາກົນ, ຍູ້ແຮງ ແລະ ຍົກລະດັບການພົວພັນຕ່າງປະເທດຫຼາຍຝ່າຍ. ການເຂົ້າຮ່ວມບັນດາສັນຍາການຄ້າເສລີຮຸ່ນໃໝ່ໄດ້ສ້າງໂອກາດດີທີ່ເອື້ອອຳນວຍໃຫ້ຫວຽດນາມເຂົ້າຮ່ວມໃນລະບົບເສດຖະກິດສາກົນ. ການປະຕິວັດອຸດສາຫະກຳຄັ້ງທີ 4 ຈະສ້າງວຽກເຮັດງານທຳທີ່ມີລາຍໄດ້ສູງໃຫ້ຜູ້ອອກແຮງງານ, ໃນນັ້ນມີຜູ້ອອກແຮງງານເພດຍິງ. ລະບົບເສດຖະກິດຕະຫຼາດກຳນົດທິດສັງຄົມນິຍົມ ແລະ​ ການ​ເຊື່ອມ​ໂຍງ​ເຂົ້າ​ກັບ​ສາ​ກົນ​ຢ່າງ​ກວ້າງ​ຂວາງ ໄດ້ປຸກຕື່ນທ່າແຮງຄວາມສາມາດສ້າງສັນ, ປັບ​ປຸງຍົກສູງ​ຊີ​ວິດ​ທາງ​ດ້ານ​ວັດ​ຖຸ ແລະ ຈິດ​ໃຈ​ຂອງ​ແມ່​ຍິງ, ປະກອບສ່ວນຊຸກຍູ້ການເຕີບໂຕເສດຖະກິດ. ທ່າອ່ຽງເປີດປະຊາທິປະໄຕໃນທຸກການເຄື່ອນໄຫວຂອງຊີວິດສັງຄົມນັບມື້ນັບແຂງແຮງ; ປະຊາທິປະໄຕໂດຍກົງ, ປະຊາທິປະໄຕໂດຍຕົວແທນ ໄດ້ຮັບການເປີດກວ້າງຢ່າງຕໍ່ເນື່ອງ, ທັງອຳນວຍຄວາມສະດວກ, ທັງຊຸກຍູ້ແມ່ຍິງຍົກສູງລະດັບຄວາມຮູ້, ຄວາມຮັບຮູ້ທາງການເມືອງ ແລະ ຄວາມຮັບຜິດຊອບພົນລະເມືອງ. ບັນດາແຜນນະໂຍບາຍແລະແນວທາງຂອງພັກ, ນະໂຍບາຍແລະກົດໝາຍຂອງລັດທີ່ກ່ຽວຂ້ອງ ລ້ວນແຕ່ມຸ່ງສູ່ການສ້າງເງື່ອນໄຂ ອຳນວຍຄວາມສະດວກ ໃຫ້ແມ່ຍິງພັດທະນາ, ປະກອບສ່ວນເຂົ້າໃນພາລະກິດການສ້າງສາ ແລະ ປົກປັກຮັກສາປະເທດຊາດຫວຽດນາມສັງຄົມນິຍົມ ໃນເງື່ອນໄຂໃໝ່.

ແຕ່ຢ່າງໃດກໍຕາມ, ມີຫຼາຍບັນຫາສັງຄົມທີ່ສົ່ງຜົນກະທົບທາງລົບຕໍ່ແມ່ຍິງ ທີ່ຕ້ອງໄດ້ຮັບຮູ້ຢ່າງຈະແຈ້ງ ແລະ ແກ້ໄຂຢ່າງທັນທ່ວງທີ, ເຊັ່ນ: ຄວາມທຸກຍາກ, ການປ່ຽນແປງສະພາບອາກາດ, ການ​ປ່ຽນ​ແປງ​ພາລະໜ້າ​ທີ່​ຂອງ​ຄອບ​ຄົວ; ການໃຊ້ຄວາມຮຸນແຮງໃນຄອບຄົວ,  ການຕິດຢາເສບຕິດ, ໂສເພນີ, ການຕິດເຊື້ອ HIV/AIDS, ກໍລະນີການລ່ວງລະເມີດ ແລະ ການໃຊ້ຄວາມຮຸນແຮງຕໍ່ແມ່ຍິງ ແລະ ເດັກນ້ອຍ ນັບມື້ນັບຊັນຊ້ອນ ສັບສົນ ແລະ ຮ້າຍແຮງຂຶ້ນ; ການເພີ່ມຂຶ້ນຂອງອາຊະຍາກຳປະເພດໃໝ່, ອາຊະຍາກຳທີ່ໃຊ້ເຕັກໂນໂລຊີສູງ ພວມ​ນາບ​ຂູ່​ຄວາມ​ປອດ​ໄພ​ຂອງ​ແມ່​ຍິງ ແລະ​ເດັກ. ພິເສດ, ໃນ​ປະ​ເທດມີ​ຄວາມ​ຫຍຸ້ງ​ຍາກ ແລະ ສິ່ງ​ທ້າ​ທາຍ​ຫຼາຍ​ຢ່າງ​ທີ່​ບໍ່​ເຄີຍ​ມີ​ມາ​ກ່ອນ ເຊິ່ງ​ເກີດ​ຈາກ​ການ​ລະ​ບາດຂອງໂຄວິດ-19 ແລະ ວິ​ກິດ​​ເສດ​ຖະ​ກິດ​ໂລກ; ຄວາມໄວໃນການຫັນເປັນອຸດສາຫະກຳ ແລະ ຫັນເປັນຕົວເມືອງໄດ້ເພີ່ມຂຶ້ນຢ່າງໄວ; ການປ່ຽນແປງໃໝ່ສະພາບອາກາດຢ່າງຮ້າຍແຮງແລະສັບສົນ; ທ່າອ່ຽງພົນລະເມືອສູງອາຍຸ; ຄວາມບໍ່ສະເໝີພາບທາງເພດຍັງມີຢູ່. ສະພາບດັ່ງກ່າວໄດ້ສົ່ງຜົນກະທົບຢ່າງແຂງແຮງເຖິງທຸກດ້ານຂອງຊີວິດ ແລະ ການພັດທະນາຂອງແມ່ຍິງ.

ເພື່ອບັນລຸບັນດາເປົ້າໝາຍການພັດທະນາປະເທດທີ່ໄດ້ວາງໄວ້, ໃນເວລາຕໍ່ໄປຈຳເປັນຕ້ອງສືບຕໍ່ເສີມຂະຫຍາຍກຳລັງແຮງຂອງກ້ອນມະຫາສາມັກຄີປວງຊົນທັງຊາດ, ປຸກຕື່ຄວາມສາມາດບົ່ມຊ້ອນຂອງທຸກວົງການ ແລະ ທຸກຊັ້ນຄົນ, ລວມທັງແມ່ຍິງ. ໃນວາລະປີ 2022 - 2027, ສະຫະພັນແມ່ຍິງຫວຽດນາມໄດ້ປຸກລະດົມຂະບວນການແຂ່ງຂັນກັນກໍ່ສ້າງແມ່ຍິງຫວຽດນາມໃນຍຸກໃໝ່ ເພື່ອສະໜັບສະໜູນ, ຂົນຂວາຍພະນັກງານ, ສະມາຊິກສະມາຄົມ ແລະ ແມ່ຍິງ ໃຫ້ມານະພະຍາຍາມ, ເປັນເຈົ້າການໃນການຝືກຝົນຫຼໍ່ຫຼອມ​ຄຸນສົມບັດຕາມ​ຄຸນຄ່າ​ຫຼັກ​ຄື: ມີ​ຄວາມ​ຮູ້, ມີ​ຈະລິຍະທຳ, ມີ​ສຸຂະພາບ​ດີ, ມີ​ຄວາມ​ຮັບຜິດຊອບ​ຕໍ່​ຕົນ​ເອງ ຄອບຄົວ ສັງຄົມ ​ແລະ ປະ​ເທດ​ຊາດ, ດ້ວຍຈຸດປະສົງເພື່ອເສີມຂະຫຍາຍຈິດ​ໃຈ​ລຸກ​ຂຶ້ນສູ້​ຊົນ​, ​ຄວາມ​​ປາ​ຖະໜາ​ທີ່ຈະອຸທິດຄວາມສາມາດ ສະຕິ​ປັນຍາ ​ແລະ ຄວາມ​ມານະ​ພະຍາຍາມ​ຂອງ​ກຳລັງ​ແມ່ຍິງຫວຽດນາມ, ປະກອບສ່ວນສຳຄັນ​ເຂົ້າ​ໃນ​ການ​ກໍ່ສ້າງ ປົກ​ປັກ​ຮັກສາ ​ແລະ ພັດທະນາ​ປະ​ເທດ​ຊາດ​ຢ່າງ​ວ່ອງ​ໄວ ​ແລະ ໝັ້ນຄົງ. ພ້ອມກັນກັບການປຸກລະດົມຂະບວນການແຂ່ງຂັນນັ້ນ, ໃນເວລາທີ່ຈະມາເຖິງ, ສະມາຄົມແມ່ຍິງທຸກຂັ້ນຈຳເປັນຕ້ອງສຸມໃສ່ຜັນຂະຫຍາຍປະຕິບັດບັນດາໜ້າທີ່ ວິທີແກ້ພື້ນຖານໃຫ້ໄດ້ເປັນຢ່າງດີ ເພື່ອ​ຊຸກຍູ້​ຢ່າງແຂງແຮງແລະແທ້ຈິງ ໃນການສະໜັບສະໜູນ​ແມ່ຍິງໃຫ້ຕອບສະໜອງຄວາມຕ້ອງການ​ພັດທະນາ​ແບບ​ຍືນ​ຍົງ ​ແລະ ເຊື່ອມ​ໂຍງ​ເຂົ້າ​ກັບ​ສາກົນ​ຢ່າງ​ຕັ້ງໜ້າ​ແລະ​ເລິກ​ເຊິ່ງ, ​ໂດຍ​ສະ​ເພາະ​ຄື:

ທີໜຶ່ງ, ອົບຮົມສຶກສາມູນເຊື້ອ, ອົບຮົມສຶກສາຄຸນ​ນະພາ​ບ ​ແລະ ຄຸນສົມບັດ​ສິນ​ທຳ​ໃຫ້​ແກ່​ພະນັກງານ, ສະມາຊິກສະມາຄົມ ​ແລະ ​ແມ່ຍິງ ເພື່ອປຸກຕື່ນແລະເສີມຂະຫຍາຍມູນເຊື້ອຮັກຊາດ, ຄວາມທະນົງໃຈ, ຄວາມພາກພູມໃຈໃນຊາດ, ເຈດຈຳນົງບືນຕົວຂຶ້ນ ແລະຄວາມປາດຖະໜາທີ່ຈະປົກປັກຮັກສາ ກໍ່ສ້າງ ແລະ ພັດທະນາປະເທດໃຫ້ເຂັ້ມແຂງ ຈະເລີນຮຸ່ງເຮືອງ; ຂົນຂວາຍແມ່​ຍິງໃຫ້ຝຶກຝົນ​ຄຸນສົມບັດ​ “​​ຄວາມໝັ້ນໃຈ, ​ເຄົາລົບ​ຕົນ​ເອງ, ຈົງ​ຮັກ​ພັກດີ, ຮັບພາລະກ້າຫານ​ແລະ ປະຕິບັດ​ຂະບວນການແຂ່ງຂັນກັນ ກໍ່ສ້າງ​ແມ່ຍິງ ຫວຽດນາມ​ໃນ​ຍຸກ​ໃໝ່”.

ທີສອງ, ຊຸກຍູ້​​ແມ່ຍິງ​ທຸກ​​ວັນນະໃຫ້ຕັ້ງໜ້າ​ຮ່ຳຮຽນ, ຍົກ​ສູງ​ຄວາມ​ສາມາດ, ຄຸນສົມບັດ​ຂອງ​ຕົນ​ໃນ​ທຸກ​ດ້ານ ເພື່ອຕອບ​ສະໜອງ​ຄວາມ​ຕ້ອງການ ​ຂອງ​ການ​ພັດທະນາ​ເສດຖະກິດ - ສັງຄົມ ​ໃນ​ສະພາບ​ການ​ປະຕິວັດ​ອຸດສາຫະກຳ 4 ​ແລະ ການ​ເຊື່ອມ​ໂຍງ​ເຂົ້າ​ກັບ​ສາກົນ. ສ້າງແລະຈັດຕັ້ງປະຕິບັດ ໂຄງການສະໜັບສະໜູນແມ່ຍິງ 1 ລ້ານຄົນ ເພື່ອຍົກສູງຂີດຄວາມສາມາດໃນການນຳໃຊ້ເຕັກໂນໂລຊີຂໍ້ມູນຂ່າວສານ ແລະ ເຂົ້າເຖິງລັດຖະບານດິຈິຕອນ. ຜ່ານ​ການ​ເຄື່ອນ​ໄຫວ​ສ້າງ​ສັງ​ຄົມແຫ່ງ​ການ​ຮຽນ​ຮູ້, ສົ່ງ​ເສີມ​ການ​ສຶກ​ສາ, ສົ່ງເສີມ​ພອນ​ສະ​ຫວັນ, ສົ່ງເສີມນິໄສການອ່ານປຶ້ມໃນຊຸມຊົນ, ຊ່ວຍໃຫ້ແມ່ຍິງພັດທະນາຄວາມຮູ້ ແລະ ທັກສະໃນທຸກດ້ານ, ໂດຍສະເພາະ ພັດທະນາຄວາມຮູ້ ແລະ ຄວາມສາມາດດ້ານເຕັກໂນໂລຊີຂໍ້ມູນຂ່າວສານ ແລະ ພາສາຕ່າງປະເທດ; ຍູ້ແຮງການຄົ້ນຄວ້າ ແລະ ການນຳໃຊ້ຜົນສຳເລັດຂອງວິທະຍາສາດແລະເຕັກໂນໂລຊີທີ່ທັນສະໄໝ.

ທີ່ສາມ, ສຶກສາອົບຮົມແມ່ຍິງກ່ຽວກັບຄວາມງາມ, ທັກສະຊີວິດ, ການຝຶກຝົນທາງຮ່າງກາຍ, ການປັບປຸງຊີວິດທາງຈິດວິນຍານ; ຂົນຂວາຍແລະສະໜັບສະໜູນແມ່ຍິງໃນການດູແລສຸຂະພາບຂອງເຂົາເຈົ້າ. ເຊື່ອມໂຍງ​ເນື້ອ​ໃນ​ດ້ານສຸນທະລີຍະສຶກສາ ແລະ ທັກສະຊີວິດ​​ແມ່​ຍິງ ​ເຂົ້າ​ໃນ​ການ​ເຄື່ອນ​ໄຫວ​ຂອງ​ສະ​ມາ​ຄົມ​ແມ່ຍິງທຸກ​ຂັ້ນ; ສືບ​ຕໍ່​ຂົນຂວາຍ​ແມ່ຍິງ​ຮັກສາ​ຂະບວນການແຂ່ງຂັນ “​ແມ່ຍິງ​ແຕ່ລະຄົນ​ເລືອກຮູບແບບ​ວັດທະນະທຳ-ສິລະ​ປະທີ່​ເໝາະ​ສົມ​, ການຝຶກຮ່າງກາຍ-ກິລາ​ມວນ​ຊົນ ​ເພື່ອ​ສຸຂະ​ພາບ”; ຂົນຂວາຍ​ແມ່ຍິງ​ເຂົ້າ​ຮ່ວມ​ການ​ປະກັນ​ສຸຂະພາບ, ປະກັນ​ສັງຄົມ ​ແລະ ໜູນ​ຊ່ວຍ​ແມ່ຍິງ​ໃຫ້​ເຂົ້າເຖິງ​​ບໍລິການສຸຂະພາບ​​ທີ່​ເໝາະ​ສົມ ໂປ່ງໃສ.

ທີສີ່, ເສີມຂະຫຍາຍຄວາມສາມາດບົ່ມຊ້ອນ ແລະ ກຳລັງແຮງປະດິດສ້າງຂອງແມ່ຍິງ, ໂດຍສະເພາະຜູ້ນໍາຍິງ, ຜູ້ບໍລິຫານ ປັນຍາຊົນຍິງ, ສິລະປິນຍິງ, ນັກທຸລະກິດຍິງ ແລະ ແມ່ຍິງທີ່ມີພອນສະຫວັນໃນທຸກຂົງເຂດ. ຈັດ​ຕັ້ງ​ບັນດາ​ເວທີ​ປາ​ໄສ ​ແລະ ກິດຈະກຳໃຫ້ຄຳປຶກສາ​ ເພື່ອ​ດຶງ​ດູດ​ການ​ເຂົ້າ​ຮ່ວມ​ຂອງ​ແມ່ຍິງ​ທຸກ​ຊັ້ນ​ວັນນະ, ​ໂດຍ​ສະ​ເພາະ​ບັນດາ​ກຸ່ມ​ຜູ້ນຳ​ຍິງ, ນັກທຸລະກິດ, ຜູ້​ຊ່ຽວຊານ, ຊ່າງຝີມື ​ເພື່ອ​ຍົກ​ສູງ​ຄຸນ​ນະພາ​ບ ​ແລະ ປະສິດທິ​ຜົນການເຄື່ອນໄຫວ​ຂອງ​ສະຫະພັນ​ແມ່ຍິງ ​ແລະ ຂະບວນການແມ່ຍິງ; ຈັດ​ຕັ້ງ​ບັນດາ​ການ​ເຄື່ອນ​ໄຫວ​ຄົ້ນ​ພົບ, ຍ້ອງຍໍ ​ແລະ ​ເຊີດ​ຊູ​ແມ່ຍິງ ທີ່ມີຄວາມສາມາດ​ໃນ​ທຸກ​ຂົງ​ເຂດ, ສ້າງ​ການ​ເຜີຍ​ແຜ່​ແບບຢ່າງ​ແມ່ຍິງຫວຽດນາມ ​ໃຫ້​ນັບມື້ນັບກວ້າງຂວາງ​​ໃນ​ສັງຄົມ. 

ທີຫ້າ, ສະ​ໜັບ​ສະໜູນແມ່ຍິງ​ກຸ່ມ​ສະ​ເພາະ​, ແມ່​ຍິງ​ຊົນ​ເຜົ່າ​ສ່ວນ​ໜ້ອຍ​, ແມ່ຍິງຢູ່ເຂດພູດອຍ, ເຂດຊາຍແດນ, ໝູ່ເກາະ. ຄົ້ນຄວ້າ ແລະ ສະເໜີນະໂຍບາຍປ້ອງກັນຄວາມປອດໄພທາງສັງຄົມ, ໂຄງການ ແຜນງານຊ່ວຍເຫຼືອແມ່ຍິງພິການ, ແມ່ຍິງສູງອາຍຸ ແລະ ແຮງງານຍິງຂ້າມຊາດ; ແນະນຳ, ຊ່ວຍເຫຼືອ, ສ້າງເງື່ອນໄຂໃຫ້ແມ່ຍິງພິການເຂົ້າເຖິງ ແລະ ເຂົ້າຮ່ວມຂະບວນການ, ການຂົນຂວາຍ, ໂຄງການ, ແຜນງານ, ກິດຈະກຳຂອງສະມາຄົມແມ່ຍິງ ແລະ ເຂົ້າເຖິງບໍລິການສັງຄົມຕ່າງໆ. ສືບຕໍ່ຜັນຂະຫຍາຍປະຕິບັດ ໂຄງການໄປພ້ອມກັນກັບແມ່ຍິງຊາຍແດນ; ປະຕິບັດໂຄງການປະຕິບັດຄວາມສະເໝີພາບທາງເພດ ແລະ ແກ້ໄຂບັນດາບັນຫາຮີບດ່ວນ​ ທີ່​ແມ່​ຍິງ​ແລະ​ເດັກ​ນ້ອຍປະ​ເຊີນ​ໄລຍະປີ 2021- 2025, ປະກອບສ່ວນປະຕິບັດໂຄງການເປົ້າໝາຍແຫ່ງຊາດພັດທະນາເສດຖະກິດແລະສັງຄົມໃນເຂດຊົນເຜົ່າສ່ວນນ້ອຍ, ເຂດພູດອຍ ໄລຍະ 2021 - 2030” ຢ່າງມີປະສິດທິຜົນ.

ທີຫົກ, ເປັນເຈົ້າການ ແລະ ຕັ້ງໜ້າຊ່ວຍເຫຼືອແມ່ຍິງໃນການເຊື່ອມໂຍງສາກົນ ຕາມທິດທາງເສີມຂະຫຍາຍທ່າແຮງຂອງບັນດາກຸ່ມແມ່ຍິງ ແລະ ການຈັດຕັ້ງສະມາຄົມແມ່ຍິງ; ເຊື່ອມຕໍ່ແລະຂົນຂວາຍແມ່ຍິງຫວຽດນາມຢູ່ຕ່າງປະເທດ ໃຫ້ພ້ອມກັນຮັກສາພາສາຫວຽດນາມ ແລະ ເອກະລັກວັດທະນະທຳ, ຍົກ​ສູງ​ຄວາມ​ເອກອ້າງ​ທະ​ນົງ​ໃຈ, ຄວາມ​ເຄົາລົບ​ນັບຖື​ຕົນ​ເອງ​ຂອງ​ຊາດ, ຫັນມາຫາ​ຕົ້ນ​ກຳ​ເນີ​ດ ບ້ານ​ເກີດ​ເມືອງ​ນອນ ​ແລະ ປະ​ເທດ​ຊາດ; ຊີ້ນຳ​ສະ​ມາ​ຄົມ​ທຸກ​ຂັ້ນເສີມຂະຫຍາຍ​ກຳລັງ​ແຮງ​ຂອງ​ກຸ່ມ​ແມ່ຍິງ​ຫວຽດນາມ ຢູ່​ພາຍ​ໃນແລະຕ່າງປະ​ເທດ, ປະກອບສ່ວນຮັກສາເອກະລັກວັດທະນະທຳຫວຽດນາມ, ຮັບເອົາແກນສານຂອງວັດທະນະທຳມະນຸດ; ໂຄສະນາ​ເຜີຍແຜ່ວັດທະນະທຳ​ແລະ​ພາບ​ພົດ​ຂອງ​ປະ​ເທດ​ຊາດ, ​ແມ່ຍິງ​ຫວຽດນາມ ​ແລະ ອົງການ​ຈັດ​ຕັ້ງ​ສະມາຄົມ; ​ເຊື່ອມ​ຕໍ່​ການ​ຄ້າ, ຂົນຂວາຍນັກທຸລະກິດ​ຍິງ​ແລະປັນຍາ​ຊົນຍິງ ​ສະໜັບສະໜູນຊັບພະຍາກອນ​ຈັດກິດຈະກຳ ເພື່ອແມ່ຍິງ ແລະ ປະຕິບັດ​ຄວາມ​ສະ​ເໝີ​ພາບທາງເພດ. 

ດ້ວຍທັດສະນະທີ່ວ່າ ຖືເອົາການເສີມຂະຫຍາຍແລະສືບທອດມູນເຊື້ອທີ່ດີງາມຂອງແມ່ຍິງຫວຽດນາມ, ປຸກຕື່ນສຸດຂີດຄວາມສາມາດບົ່ມຊ້ອນ, ຄວາມຄິດສ້າງສັນ, ເຈດຈຳນົງອີງໃສ່ຕົນເອງສ້າງຕົນໃຫ້ເຂັ້ແຂງ, ຄວາມສາມັກຄີຂອງແມ່ຍິງ, ພ້ອມທັງເບິ່ງແຍງດູແລ ປົກປ້ອງສິດແລະຜົນປະໂຫຍດທີ່ຊອບທຳຖືກກົດໝາຍ, ພ້ອມກັນແກ້ໄຂບັນດາບັນຫາທີ່ໃກ້ຊິດຂອງແມ່ຍິງນັ້ນ ແມ່ນໜ້າທີ່ທີ່ເປັນປະຈຳ; ຖືເອົາຄວາມສຸກແລະຜົນປະໂຫຍດຂອງແມ່ຍິງເປັນເປົ້າໝາຍ”, ໃນເວລາຕໍ່ໄປນີ້, ສະຫະພັນແມ່ຍິງຫວຽດນາມສືບຕໍ່ເສີມຂະຫຍາຍບົດບາດຫຼັກທາງການເມືອງໃນວຽກງານຂອງແມ່ຍິງຢ່າງແຂງແຮງ, ປະກອບສ່ວນສ້າງຮູບ​ພາບ​ແມ່​ຍິງຫວຽດນາມ​ໃນ​ຍຸກ​ໃໝ່ ເຊິ່ງ​ບັນດາ​ຄຸນຄ່າ​ແລະຄຸນ​ນະພາ​ບ​​ໄດ້​ຮັບ​ການ​ສືບ​ທອດ, ​ເສີມ​ຂະຫຍາຍ ແລະ ເພີ່ມພູນຄູນສ້າງ ໃຫ້ສອດຄ່ອງກັບສິນທຳປະເພນີຂອງຊາດ ​ແລະ ຕອບ​ສະໜອງ​ຄວາມ​​ຕ້ອງການ​ຂອງຍຸກສະໄໝ.  

ຄວາມເປັນຈິງໃຫ້ເຫັນວ່າ, ການກໍ່ສ້າງແມ່ຍິງຫວຽດນາມໃນຍຸກໃໝ່ແມ່ນຂະບວນການທີ່ຍາວນານ, ຕ້ອງໄດ້ປະຕິບັດຢ່າງໜຽວແໜ້ນ ດ້ວບັນດາມາດຕະການທີ່ສອດຄ່ອງ ຄົບຊຸດ. ກ່ອນອື່ນໝົດ, ແມ່ຍິງເອງຕ້ອງມີສະຕິໃນການຮຽນຮູ້, ເປັນເຈົ້າການໃນການບືນຕົວຂຶ້ນ, ບຳລຸງຄູນສ້າງທຶນທາງວັດ​ທະ​ນະ​ທໍາ​ແລະ​ທຶນ​ທາງ​ປັນ​ຍາ​ຂອງ​ຕົນເອງ​. ປະທານໂຮ່ຈີມິນເຄີຍໃຫ້ທັດສະນະວ່າ, ຄວາມກ້າວໜ້າຂອງແມ່ຍິງຂຶ້ນກັບຫຼາຍປັດໄຈ: ນອກຈາກຄວາມເອົາໃຈໃສ່ຂອງພັກ ແລະ ລັດຖະບານແລ້ວ, ປັດ​ໄຈ​ທີ່ຕັດສິນ​ຊີ້​ຂາດ​ແມ່ນ ​ແມ່ຍິງ​ແຕ່ລະຄົນ ແລະ ແມ່ຍິງທັງໝົດ ​ຕ້ອງ​ພະຍາຍາມບືນຕົວ​ຂຶ້ນ ​ແລະ ຢືນຢັນ​ຕົນ​ເອງ. ຄວາມເປັນຈິງກໍໄດ້ພິສູດແລ້ວວ່າ, ການຮຽນຮູ້ແມ່ນ “ກຸນແຈສຳຄັນ” ສໍາລັບແມ່ຍິງໃນການເປີດປະຕູສູ່ການເຊື່ອມໂຍງເຂົ້າກັບສັງຄົມ ແລະ ເຂົ້າເຖິງທົ່ວໂລກ. ພ້ອມ​ກັນ​ນັ້ນ, ຕ້ອງ​ຍົກ​ສູງ​ຄວາມ​ຮັບ​ຮູ້​ຂອງທົ່ວ​ສັງຄົມ​ ກ່ຽວ​ກັບ​ຄວາມ​ສະ​ເໝີ​ພາບທາງເພດ ​ແລະ ບົດບາດ​ຂອງ​ແມ່ຍິງ​ໃນ​ການ​ພັດທະນາ; ສືບ​ຕໍ່ປັບປຸງລະບົບ​ນະ​ໂຍບາຍ ​ແລະ ກົດໝາຍ​ວ່າ​ດ້ວຍ​ຄວາມ​ສະ​ເໝີ​ພາບ​ທາງ​ເພດ, ​ແມ່ຍິງ, ຄອບຄົວ ​ແລະ ​ເດັກນ້ອຍ ​ໃຫ້​ສົມບູນ​ແບບ; ເສີມຂະຫຍາຍບົດບາດຂອງບັນດາອົງການຈັດຕັ້ງການເມືອງ - ສັງຄົມ, ໂດຍສະເພາະສະຫະພັນແມ່ຍິງຫວຽດນາມ ເຊິ່ງເປັນຕົວແທນທີ່ປົກປ້ອງສິດແລະຜົນປະໂຫຍດທີ່ຊອບທຳ ຖືກກົດໝາຍຂອງແມ່ຍິງ, ປະຕິບັດພາລະກຳກໍ່ສ້າງແມ່ຍິງຫວຽດນາມໃນຍຸກໃໝ່, ປະກອບສ່ວນເຂົ້າໃນການພັດທະນາປະເທດຢ່າງຍືນຍົງ ແລະ ການເຊື່ອມໂຍງເຂົ້າກັບສາກົນຢ່າງກວ້າງຂວາງ./.

-------------

(1) ເບິ່ງ: “ຖະແຫຼງຂ່າວສະຖານະການແຮງງານແລະວຽກເຮັດງານທຳ ໄຕມາດທີ 4 ປີ 2021 ແລະ ດັດຊະນີການພັດທະນາມະນຸດຂອງຫວຽດນາມ ໄລຍະ 2016 - 2020”, ວັນທີ 6 ມັງກອນ 2022, https://www.gso.gov.vn/du-lieu-va-so-lieu-thong-ke/2022/01/thong-cao-bao-chi-tinh-hinh-lao-dong-viec-lam-quy-iv-nam-2021-va-chi-so-phat-trien-con-nguoi-viet-nam-2016-2020

(2) ຄະນະກຳມະການສູນກາງສະຫະພັນແມ່ຍິງຫວຽດນາມ: ຫົວຂໍ້ຄົ້ນຄວ້າລະດັບກະຊວງຍົກສູງຄວາມສາມາດປ່ຽນແປງໃໝ່ປະດິດສ້າງ ຂອງແມ່ຍິງຊາວກະສິກອນຫວຽດນາມປີ 2021.

(3) ເບິ່ງ: “ຄຳປາໄສຂອງນາຍົກລັດຖະມົນຕີ ຟ້າມ ມິງ ຈິ້ງ ຢູ່ທີ່ກອງປະຊຸມໃຫຍ່ຜູ້ແທນແມ່ຍິງທົ່ວປະເທດຄັ້ງທີ 13”, ວັນທີ 11 ມີນາ 2022, https://baochinhphu.vn/phat-bieu-cua-thu-tuong-pham-minh-chinh-tai-dai-hoi-dai-bieu-phu-nu-toan-quoc-lan-thu-xiii-102220311104849752.htm

(4), (5), (6) ເອກະສານກອງປະຊຸມໃຫຍ່ຜູ້ແທນທົ່ວປະເທດຄັ້ງທີ 13 ຂອງພັກກອມມູນິດຫວຽດນາມ, ສພຈ ການເມືອງແຫ່ງຊາດ ສື້ເຖິ້ດ, ຮ່າໂນ້ຍ, 2021, ເຫຼັ້ມ 1, ໜ້າ 215-216, 143, 169.

(7) ເຖິງທ້າຍວາລະ, ມີຫຼາຍກວ່າ 19.000 ບຸກຄົນແລະໝູ່ຄະນະທີ່ດີເດັ່ນ ໄດ້ຮັບການເຜີຍແຜ່ແລະສັນລະເສີນ ຍ້ອນມີຜົນງານໃນການຮ່ຳຮຽນ ແລະ ປະຕິບັດຕາມແນວຄິດ, ຄຸນສົມບັດສິນທຳ, ແບບແຜນໂຮ່ຈີມິນ ແລະ ຝຶກຝົນຫຼໍ່ຫຼອມຄຸນສົມບັດ ຄຸນນະທຳຂອງແມ່ຍິງຫວຽດນາມຕາມ “ຄວາມໝັ້ນໃຈ, ເຄົາລົບຕົນເອງ, ຈົງຮັກພັກດີ, ຮັບພາລະກ້າກັ່ນ”.

(8) ຜົນ​ການ​ເລືອກ​ຕັ້ງ​ສະ​ມາ​ຊິກ​ສະ​ພາ​ແຫ່ງ​ຊາດ​ຊຸດ​ທີ 15 ສະ​ໄໝ 2021 - 2026 ດ້ວຍ​ອັດ​ຕາ​ສ່ວນ​ສະມາຊິກເພດຍິງໃນສະ​ພາ​ແຫ່ງ​ຊາດ​ຊຸດ​ທີ 15 ແມ່ນ 30,26%. (ສູງກວ່າ 3,54% ທຽບກັບວາລະກ່ອນ ແລະ ລື່ນຄາດໝາຍ 30%); ຜູ້ແທນສະພາປະຊາຊົນລະດັບແຂວງໂດຍມີອັດຕາສ່ວນເພດຍິງ 29%, ໃນລະດັບເມືອງອັດຕາສ່ວນຜູ້ແທນເພດຍິງກວມເອົາ 29,2%, ໃນລະດັບຕາແສງອັດຕາສ່ວນຜູ້ແທນເພດຍິງກວມເອົາ 28,98%; ໃນ 35 ແຂວງ/ນະຄອນ ອັດຕາ​ສ່ວນ​ຜູ້​ແທນ​ເພດ​ຍິງ​ໃນ​ສະພາ​ແຫ່ງ​ຊາດ​ຊຸດ​ທີ 15 ມີຫຼາຍກວ່າ 30%.  

(9) ​ສະ​ມາ​ຄົມແມ່ຍິງ​ທຸກ​ຂັ້ນ​ໄດ້ໃຫ້ຄຳ​ປຶກສາ​​ຈັດ​ຕັ້ງ​ການ​ສົນທະນາ 700 ຄັ້ງ​ກັບ​ຄະນະ​ພັກ ​ແລະ ອຳນາດ​ການ​ປົກຄອງ​ທຸກ​ຂັ້ນ ​ເພື່ອ​ສະ​ເໜີ​ນະ​ໂຍບາຍຫຼາຍກວ່າ 600 ນະໂຍບາຍ; ຕິດຕາມກວດກາເກືອບ 6.000 ນະໂຍບາຍ; ປະກອບຄຳເຫັນແລະວິຈານສັງຄົມເຂົ້າໃນຮ່າງເອກະສານກວ່າ 33.000 ສະບັບ. ສະມາຄົມແມ່ຍິງໄດ້ສະໜັບສະໜູນຄອບຄົວແມ່ຍິງເກືອບ 13 ລ້ານຄອຍຄົວ ໃຫ້ບັນລຸມາດຕະຖານຄອຍຄົວ “5 ບໍ່, 3 ສະອາດ”. ສະມາຄົມແມ່ຍິງໄດ້ສະໜັບສະໜູນການສ້າງຕັ້ງຮູບແບບເສດຖະກິດລວມໝູ່ທີ່ຄຸ້ມຄອງໂດຍແມ່ຍິງໃນເກືອບ 12.000 ແຫ່ງ. ສະໜັບສະໜູນການສ້າງຕັ້ງສະຫະກອນໃໝ່ເກືອບ 800 ແຫ່ງ. ຈ່າຍເງິນເກືອບ 164.000 ຕື້ດົ່ງ ໜູນຊ່ວຍແມ່ຍິງເກືອບ 73.000 ຄົນ ເພື່ອເລີ່ມຕົ້ນທຸລະກິດ. ວິ​ສາ​ຫະ​ກິດ ສະ​ຫະ​ກອນ ​ຄົວເຮືອນ​ທຸ​ລະ​ກິດທີ່ແມ່ຍິງເປັນເຈົ້າຂອງ 87.000 ແຫ່ງໄດ້​ພັດທະນາຂີດ​ຄວາມ​ສາ​ມາດ​ດ້ານ​ການ​ຄ້າ​ເອ​ເລັກ​ໂຕຣ​ນິກ. ຈ່າຍເງິນ​ເກືອບ 482 ຕື້​ດົ່ງ​ເພື່ອຊ່ວຍເຫຼືອ​ພະນັກງານ, ສະມາຊິກສະມາຄົມ, ​ແມ່ຍິງ ​ແລະ ປະຊາຊົນ​ຜູ້​ທີ່ໄດ້ຮັບຜົນກະທົບຢ່າງຮຸນແຮງ​ ຈາກ​ການແຜ່ລະບາດຂອງໂຄ​ວິດ-19. 255 ຕາ​ແສງ​ໄດ້​ຮັບ​ການ​ໜູນ​ຊ່ວຍ​ຈາກ​ໂຄງການ “​ໄປ​ຄຽງ​ຄູ່​ກັບ​ແມ່​ຍິງ​ຊາຍ​ແດນດ້ວຍ​ຍອດ​ມູນ​ຄ່າ​ການ​ລະດົມ​ທຶນ​ເກືອບ 210 ຕື້​ດົ່ງ (ນັບ​ແຕ່​ປີ 2018 ຮອດ​ປະຈຸ​ບັນ). ມີຫຼາຍກວ່າ 118.000 ​ຮູບ​ແບບ​ການ​ຂົນຂວາຍ​ຊ່ວຍເຫຼືອແມ່ຍິງ​ເຂົ້າຮ່ວມການ​ແກ້​ໄຂ​ບັນຫາ​ສັງຄົມ​ຈຳນວນ​ໜຶ່ງ​ ໄດ້​ຮັບ​ການ​ກໍ່ສ້າງ ​ແລະ ພັດທະນາ. ມີຫຼາຍກວ່າ 25 ລ້ານຄົນ ທີ່ເປັນສະມາຊິກສະມາຄົມ, ແມ່ຍິງ, ພໍ່ແມ່ທີ່ມີເດັກນ້ອຍອາຍຸຕ່ຳກວ່າ 16 ປີ ໄດ້ຮັບການສະໜອງຂໍ້ມູນຂ່າວສານ ແລະ ຄວາມຮູ້ກ່ຽວກັບການຮັກສາ, ຝຶກຝົນຫຼໍ່ຫຼອມຄຸນສົມບັດສິນທຳ, ຈິດສຳນຶກໃນການປະຕິບັດກົດໝາຍ, ຝຶກອົບລົມການລ້ຽງດູລູກ, ຄວາມປອດໄພດ້ານສະບຽງອາຫານ ແລະ ​ການ​ປ້ອງ​ກັນ​ຄວາມ​ຮຸນ​ແຮງ​ທາງ​ເພດ. ​ໂຄງການ “​ແມ່​ອຸປະຖຳ ສະໜັບສະໜູນ​ການ​ດູ​ແລ ​ແລະ ລ້ຽງ​ດູ​ເດັກ​ກຳ​ພ້າ ທີ່ເປີດຕົວໂດຍ​ສະມາຄົມ​ແມ່ຍິງຫວຽດນາມ ​ແຕ່​ເດືອນພະຈິກ 2021 ​ໄດ້​ຂົນຂວາຍ, ເຊື່ອມຕໍ່, ໜູນ​ຊ່ວຍ ​ແລະ ອຸປະຖຳ​ເດັກ​ກຳພ້າທີ່ປະສົບກັບຄວາມຫຍຸ້ງຍາກ 11.052 ຄົນ​, ໃນນັ້ນມີເດັກກຳພ້າຫຼາຍກວ່າ 2.000 ຄົນທີ່ຖືກຜົນກະທົບຈາກໂຄວິດ-19; ​ຈຳນວນ​ເງິນ​ແລະຂອງຂວັນ​ທັງໝົດທີ່​ລະດົມ​ຜ່ານ​​ຊ່ອງ​ທາງຕ່າງໆ ​ໃນທົ່ວ​ປະ​ເທດ ​ບັນລຸ​ກວ່າ 43 ຕື້​ດົ່ງ. 

- ບົດນີ້ໄດ້ລົງພິມໃນວາລະສານກອມມູນິດ ສະບັບທີ 1000 (ເດືອນຕຸລາ 2022)