ຫັນເປັນທັນສະໄໝ, ຍົກສູງຄຸນນະພາບແລະປະສິດທິຜົນ ຂອງການປະຕິບັດນະໂຍບາຍປະກັນສັງຄົມ
ວກ.ອອນໄລ - ການປະກັນສັງຄົມແລະປະກັນສຸຂະພາບແມ່ນໜຶ່ງໃນບັນດານະໂຍບາຍຫຼັກ ຂອງລະບົບຄວາມປອດໄພແຫ່ງຊາດ. ການປະຕິບັດນະໂຍບາຍປະກັນສັງຄົມ, ປະກັນສຸຂະພາບເປັນຢ່າງດີ ຈະປະກອບສ່ວນຮັບປະກັນສິດທິຄວາມປອດໄພສັງຄົມ ຂອງພົນລະເມືອງທຸກຄົນ, ເພື່ອເປົ້າໝາຍການພັດທະນາປະເທດແບບຍືນຍົງ. ການປະກັນສັງຄົມຫວຽດນາມແມ່ນຂະແໜງການທີ່ໄປກ່ອນໃນການຍູ້ແຮງການປະຕິຮູບການບໍລິຫານ, ຊຸກຍູ້ການຫັນເປັນທັນສະໄໝ, ຍົກສູງຄຸນນະພາບແລະປະສິດທິຜົນ ຂອງການປະຕິບັດນະໂຍບາຍປະກັນສັງຄົມ, ຕອບສະໜອງຄວາມຕ້ອງການທີ່ນັບມື້ນັບສູງ ຂອງປະຊາຊົນແລະຂອງວິສາຫະກິດ.
ສຳລັບປະເທດສ່ວນໃຫຍ່ໃນໂລກ, ຖານຂໍ້ມູນກ່ຽວກັບການປະກັນສັງຄົມ, ລວມມີປະກັນສັງຄົມ, ປະກັນສຸຂະພາບແລະປະກັນການວ່າງງານ, ຍາມໃດກໍ່ເປັນພາກສ່ວນໃຫຍ່ໃນຖານຂໍ້ມູນຄວາມປອດໄພທາງສັງຄົມ. ການຫັນເປັນທັນສະໄໝ ແລະ ການສະໜອງບໍລິການສາທາລະນະບົນພື້ນຖານເຕັກໂນໂລຊີຂໍ້ມູນຂ່າວສານ ເຊິ່ງລັດຖະບານບັນດາປະເທດໄດ້ສຸມໃສ່ປັບປຸງບູລະນະ ເພື່ອໃຫ້ມັນກາຍເປັນປັດໄຈທີ່ສຳຄັນທີ່ສຸດສຳລັບການພັດທະນາລັດຖະບານເອເລັກໂຕຣນິກ, ຫັນການຄຸ້ມຄອງເປັນທັນສະໄໝ-ແລະຮັບໃຊ້ຢ່າງດີໃຫ້ປະຊາຊົນແລະຜູ້ອອກແຮງງານ.
ການນຳໃຊ້ເຕັກໂນໂລຊີຂໍ້ມູນຂ່າວສານ, ການປະຕິຮູບຂັ້ນຕອນການບໍລິຫານ, ຍົກສູງຄຸນະພາບແລະປະສິດທິຜົນການເຄື່ອນໄຫວ ຂອງພະນັກງານລັດຖະກອນ, ພາລະກອນ,... ສ້າງເງື່ອນໄຂອຳນວຍຄວາມສະດວກໃຫ້ຜູ້ເຂົ້າຮ່ວມການປະກັນສັງຄົມ, ປະກັນສຸຂະພາບ ແມ່ນເປົ້າໝາຍ ທີ່ສອດຮ້ອຍຕະຫຼອດ ຂະບວນການປັບປຸງບູລະນະ, ພັດທະນາແລະປ່ຽນແປງໃໝ່ ຂອງລະບົບ ການປະກັນສັງຄົມຫວຽດນາມ. ໃນເວລາທີ່ຜ່ານມາ, ການປະກັນສັງຄົມຫວຽດນາມ ໄດ້ຜັນ ຂະຫຍາຍການນຳໃຊ້ເຕັກໂນໂລຊີຂໍ້ມູນຂ່າວສານຢ່າງແຂງແຮງ ເຂົ້າໃນກິດຈະກຳວິຊາຊີບ ສ່ວນໃຫຍ່ ເພື່ອຊ່ວຍເຫຼືອປະຊາຊົນແລະວິສາຫະກິດ ໃນການພົວພັນຕິດຕໍ່ກັບອົງການ ປະກັນສັງຄົມ ແລະ ຍົກສູງປະສິດທິພາບແລະປະສິດທິຜົນຂອງການຄຸ້ມຄອງ ໃຫ້ທ່ວງທັນກັບ ການປະຕິວັດອຸດສາຫະກຳຄັ້ງທີສີ່.
ບັນດາຜົນສຳເລັດທີ່ໄດ້ຮັບ
ກ່ອນປີ 2015, ການນຳໃຊ້ເຕັກໂນໂລຊີຂໍ້ມູນຂ່າວສານໃນຂະແໜງການປະກັນສັງຄົມ ບໍ່ໄດ້ຮັບການຍູ້ແຮງ, ລະບົບເຊີເວີ ຊອບແວ ຖານຂໍ້ມູນ ກະແຈກກະຈາຍຢູ່ບັນດາອົງການປະກັນສັງຄົມຂັ້ນເມືອງ, ບໍ່ມີລະບົບເຄືອຂ່າຍ WAN ທີ່ເຊື່ອມຕໍ່ລະບົບເຕັກໂນໂລຊີລະຫວ່າງໜ່ວຍງານ. ການພົວພັນຕິດຕໍ່ທັງໝົດກັບປະຊາຊົນແລະວິສາຫະກິດ ໄດ້ດຳເນີນການຕາມເອກະສານຜ່ານພາກສ່ວນ “ປະຕູດຽວ” ຫຼືໂດຍກົງກັບພະນັກງານໃນພະແນກວິຊາຊີບ. ສິ່ງນີ້ນຳໄປສູ່ຄວາມຫຍຸ້ງຍາກໃນການຄຸ້ມຄອງຜູ້ເຂົ້າຮ່ວມ, ໂດຍສະເພາະເມື່ອມີການປ່ຽນໜ່ວຍງານເຮັດວຽກ, ປ່ຽນທີ່ຢູ່ອາໄສ. ການກວດກາເອກະສານບັນທຶກຄ່າໃຊ້ຈ່າຍໃນການກວດແລະປິ່ນປົວພະຍາດທີ່ມີປະກັນສຸຂະພາບ ແມ່ນໄດ້ເຮັດດ້ວຍມືໃນເອກະສານເຈ້ຍດ້ວຍອັດຕາປະມານ 20% ຂອງເອກະສານບັນທຶກການໃຊ້ຈ່າຍທັງໝົດ. ການລະເມີດການຈ່າຍເງິນປະກັນສັງຄົມໄດ້ເກີດຂຶ້ນເປັນປະຈຳ. ດັ່ງນັ້ນຈຶ່ງນຳໄປສູ່ການລາຍງານການຊຳລະເງິນແລະການກວດສອບບັນຊີເງິນປະຈຳປີ ຕ້ອງເຮັດດ້ວຍມື.
ມະຕິເລກທີ່ 68/2013/QH13, ວັນທີ 29 ເດືອນພະຈິກ 2013, ຂອງສະພາແຫ່ງຊາດ, ວ່າດ້ວຍຍູ້ແຮງການປະຕິບັດນະໂຍບາຍກົດໝາຍປະກັນສຸຂະພາບ, ກ້າວໄປເຖິງການປະກັນສຸຂະພາບທົ່ວປວງຊົນ; ມະຕິເລກທີ່ 36a/NQ-CP, ວັນທີ 14 ເດືອນຕຸລາ 2015, ຂອງລັດຖະບານ, ວ່າດ້ວຍລັດຖະບານເອເລັກໂຕຣນິກ; ມະຕິເລກທີ່ 19-2017/NQ-CP, ວັນທີ 6 ເດືອນກຸມພາ 2017, ຂອງລັດຖະບານ, ວ່າດ້ວຍການສືບຕໍ່ປະຕິບັດບັນດາໜ້າທີ່, ວິທີແກ້ໄຂຕົ້ນຕໍ ເພື່ອປົວແປງສະພາບແວດລ້ອມການທຸລະກິດ, ຍົກສູງຄວາມສາມາດແຂ່ງຂັນແຫ່ງຊາດປີ 2017, ກຳນົດທິດເຖິງປີ 2020 ວາງເສັ້ນທາງເດີນ, ບາດກ້າວໃນການຫັນຂະແໜງການປະກັນສັງຄົມເປັນທັນສະໄໝ. ບັດນດາມະຕິດັ່ງກ່າວໄດ້ຮຽກຮ້ອງໃຫ້ໃຊ້ເອເລັກໂຕຣນິກໃນການແກ້ໄຂນະໂຍບາຍປະກັນສັງຄົມ, ປະກັນສຸຂະພາບ; ຫຼຸດຜ່ອນ 1/3 ຈຳນວນຄັ້ງແລະຫຼຸດຜ່ອນ 50% ຈຳນວນຊົ່ວໂມງການປະຕິບັດຂັ້ນຕອນການບໍລິຫານໃນຂົງເຂດຈັດເກັບຄ່າປະກັນສັງຄົມ, ປະກັນສຸຂະພາບ; ເຊື່ອມຕໍ່ລະບົບເຕັກໂນໂລຊີຂໍ້ມູນຂ່າວສານ ລະຫວ່າງປະກັນສັງຄົມກັບສະຖານທີ່ກວດແລະປິ່ນປົວພະຍາດ ເພື່ອດັດແປງຂັ້ນຕອນການບໍລິຫານໃນການກວດແລະປິ່ນປົວພະຍາດ; ຍົກສູງປະສິດທິຜົນຂອງການກວດພິສູດປະກັນສຸຂະພາບ; ສ້າງແລະນຳໃຊ້ສະຖາປັດຕະຍະກຳລັດຖະບານເອເລັກໂຕຣນິກ; ຄົ້ນຄວ້າແລະອອກບັດປະກັນສຸຂະພາບເອເລັກໂຕຣນິກ, ປະສົມປະສາມຂໍ້ມູນປະກັນສັງຄົມແລະປະກັນການວ່າງງານ; ສ້າງແລະດຳເນີນງານຖານຂໍ້ມູນເອເລັກໂຕຣນິດ ເພື່ອຄຸ້ມຄອງການປະກັນສັງຄົມຢ່າງລວມມູນແລະຄົບຊຸດໃນທົ່ວປະເທດ.
ວັນທີ 22 ເດືອນພຶດສະພາ 2015, ນາຍົກລັດຖະມົນຕີໄດ້ລົງນາມໃນມະຕິຕົກລົງເລກທີ 714/QĐ-TTg ອອກບັນຊີລາຍຊື່ຂອງ 6 ຖານຂໍ້ມູນແຫ່ງຊາດທີ່ຕ້ອງໄດ້ຮັບບຸລິມະສິດໃນການຜັນຂະຫຍາຍ ເພື່ອສ້າງພື້ນຖານໃຫ້ແກ່ການພັດທະນາລັດຖະບານເອເລັກໂຕຣນິກ, ໃນນັ້ນມີຖານຂໍ້ມູນແຫ່ງຊາດກ່ຽວກັບການປະກັນໄພ; ມະຕິທົກລົງເລກທີ 274/QĐ-TTg, ວັນທີ 12 ເດືອນມີນາ 2019, ຂອງນາຍົກລັດຖະມົນຕີ ອະນຸມັດໂຄງການປະຕູບໍລິການສາມາລະນະແຫ່ງຊາດ ເຊິ່ງໄດ້ກຳນົດຖານຂໍ້ມູນແຫ່ງຊາດກ່ຽວກັບການປະກັນໄພ ແມ່ນຖານຂໍ້ມູນທີ່ສຳຄັນ ເພື່ອສະໜອງໝາຍເລກປະຈຳຕົວໃຫ້ປະຕູບໍລິການສາທາລະນະແຫ່ງຊາດ.
ໃນປະຈຸບັນ, ມີຫຼາຍກວ່າ 89% ຂອງປະຊາຊົນທີ່ເຂົ້າຮ່ວມປະກັນສຸຂະພາບ, ເກືອບ 15 ລ້ານຄົນທີ່ເຂົ້າຮ່ວມປະກັນສັງຄົມ, ກ້າວເຖິງການປະກັນສັງຄົມທົ່ວປວງຊົນ ຕາມຈິດໃຈປະຕິຮູບນະໂຍບາຍປະກັນສັງຄົມ, ການຍູ້ແຮງການນຳໃຊ້ເຕັກໂນໂລຊີຂໍ້ມູນຂ່າວສານ, ຫັນການປະກັນສັງຄົມເປັນທັນສະໄໝ ເພື່ອຍົກສູງຄຸນນະພາບການຮັບໃຊ້ຜູ້ເຂົ້າຮ່ວມແລະຊົມໃຊ້ການປະກັນ ສັງຄົມ, ປະກັນສຸຂະພາບ ເຊິ່ງໄດ້ກາຍເປັນຄວາມຮຽກຮ້ອງຕ້ອງການທີ່ຮີບດ່ວນ.
ຕໍ່ໜ້າຄວາມຮຽກຮ້ອງຕ້ອງການຂອງສະພາແຫ່ງຊາດ, ລັດຖະບານ ແລະຄວາມຮຽກຮ້ອງຕ້ອງ ການຂອງຄວາມເປັນຈິງ, ຂະບວນການຈັດຕັ້ງປະຕິບັດນະໂຍບາຍປະກັນສັງຄົມ, ປະກັນ ສຸຂະພາບ - ເສົາຄ້ຳພື້ນຖານຂອງລະບົບຄວາມປອດໄພສັງຄົມ, ການປະຕິບັດເປົ້າໝາຍຫັນເປັນທັນສະໄໝ ເພື່ອຍົກສູງຄຸນນະພາບ, ປະສິດທິຜົນໃນການປະຕິບັດນະໂຍບາຍປະກັນສັງຄົມ ໄດ້ກາຍເປັນຄວາມຕັດສິນໃຈທາງການເມືອງຂອງທົ່ວທັງຂະແໜງການປະກັນສັງຄົມ ຫວຽດນາມ ດ້ວຍຄວາມປາຖະໜາປ່ຽນແປງໃໝ່, ພັດທະນາຢ່າງຮອບດ້ານ, ເປີດເຜີຍ, ໂປ່ງໄສ ແລະນຳເອົາຄວາມພຶງພໍໃຈມາໃຫ້ປະຊາຊົນ.
ດ້ວຍຄວາມຕ້ອງການແລະເປົ້າໝາຍທີ່ກຳນົດໄວ້, ການປະກັນສັງຄົມຫວຽດນາມ ໄດ້ຜັນຂະ ຫຍາຍການນຳໃຊ້ ເຕັດໂນໂລຊີຢ່າງແຂງແຮງ ເຂົ້າໃນກິດຈະກຳວິຊາຊີບສ່ວນຫຼາຍເຊັ່ນ: ການທຸລະກຳເອເລັກໂຕຣນິກໃນວຽກງານເກັບເງິນປະກັນສັງຄົມ, ປະກັນສຸຂະພາບ, ປະກັນການວ່າງງານ ແລະອອກໜັງສືປະກັນສັງຄົມ, ບັດປະກັນສຸຂະພາບ; ການກວດກາເອເລັກໂຕຣນິກຄ່າໃຊ້ຈ່າຍໃນການກວດແລະປິ່ນປົວພະຍາດທີ່ມີປະກັນສຸຂະພາບ ໂດຍຜ່ານລະບົບຂໍ້ມູນການວດກາການປະກັນສຸຂະພາບ; ການຈັດເກັບບັນທຶກແບບດິຈິຕອນ; ບັນດາຊອບແວຮັບໃຊ້ວຽກງານການເງິນ-ການບັນຊີ, ການຄຸ້ມຄອງເອກະສານ... ໂຄງສ້າງພື້ນຖານດ້ານເຕັກນິກ, ອຸປະກອນເຕັກໂນໂລຊີຂໍ້ມູນຂ່າວສານ ໄດ້ຮັບການປະກອບສ້າງຢ່າງຄົບຖ້ວນແລະດຳເນີນງານຢ່າງມີປະສິດທິຜົນ.
ລະບົບຊົບແວວິຊາອາຊີບທີ່ສຳຄັນໄດ້ຮັບການສ້າງຕັ້ງຕາມຮູບແບບລວມສູນຂໍ້ມູນຢູ່ສູນກາງ ເພື່ອ ຄຸ້ມຄອງບັນດາພາກສ່ວນວິຊາຊີບທີ່ສຳຄັນຂອງຂະແໜງການ; ລົງທຶນໂຄງສ້າງພື້ນຖານ, ຊອບແວແລະຖານຂໍ້ມູນຢ່າງຄົບຖ້ວນ ເພື່ອສະໜອງໝາຍເລກປະຈຳຕົວໜຶ່ງດຽວ ໃຫ້ຜູ້ເຂົ້າຮ່ວມ ປະກັນສັງຄົມ, ປະກັນສຸຂະພາບ, ປະກັນການວ່າງງານໃນລະບົບສະໜອງໝາຍເລກປະຈຳຕົວແລະຄຸ້ມຄອງການປະກັນສຸຂະພາບຄົວເຮືອນ ແລະ ການຈ້າງບໍລິການເຕັກໂນໂລຊີຂໍ້ມູນຂ່າວ ສານຖານຂໍ້ມູນຄອບຄົວທີ່ເຂົ້າຮ່ວມການປະກັນສຸຂະພາບ.
ກ່ຽວກັບການນຳໃຊ້ເຕັກໂນໂລຊີຮັບໃຊ້ປະຊາຊົນແລະວິສາຫະກິດ, ການປະກັນສັງຄົມ ຫວຽດນາມ ສືບຕໍ່ດຳເນີນລະບົບທຸລະກິດເອເລັກໂຕຣນິກລວມສູນ ເພື່ອຄຸ້ມຄອງ, ຕິດຕາມອອນໄລວຽກງານຮັບເອກະສານ, ແກ້ໄຂແລະສົ່ງຄືນຜົນຂອງຂັ້ນຕອນການບໍລິຫານໃນດ້ານການ ປະກັນສັງຄົມ, ປະກັນສຸຂະພາບ, ປະກັນການວ່າງງານ, ຮັບປະກັນການປະຕິບັດຂັ້ນຕອນການບໍລິຫານຢູ່ອົງການປະກັນສັງຄົມຂອງແຂວງ, ນະຄອນ ມີຄວາມເປີດເຜີຍ, ໂປ່ງໃສແລະເປັນມືອາຊີບ, ຕອບສະໜອງເປົ້າໝາຍການປະຕິຮູບຂັ້ນຕອນການບໍລິຫານທີ່ຂະແໜງການໄດ້ວາງອອກມາ.
ເຖິງທ້າຍປີ 2018, ຂະແໜງການປະກັນສັງຄົມທັງໝົດໄດ້ຫຼຸດຜ່ອນເວລາແກ້ໄຂຂັ້ນຕອນການບໍລິຫານຈາກ 115 ຂັ້ນຕອນລົງເປັນ 28 ຂັ້ນຕອນ. ວຽກງານການປະຕິຮູບການບໍລິຫານຂອງຂະແໜງການປະກັນສັງຄົມໄດ້ບັນລຸຜົນສຳເລັດທີ່ສຳຄັນຫຼາຍຢ່າງ, ໄດ້ເພີ່ມທະວີການປັບປຸງ, ຍົກລະດັບບັນດາຊອບແວສະໜັບສະໜູນສ້າງເງື່ອນໄຂອຳນວຍຄວາມສະດວກທີ່ດີກວ່າ ໃຫ້ປະຊາຊົນແລະວິສາຫະກິດ ໃນການເຂົ້າເຖິງການປະກັນສັງຄົມ, ຫຼຸດຜ່ອນເວລາໄລ່ລຽງ, ແກ້ໄຂຂັ້ນຕອານການປະກັນສັງຄົມ. ສິ່ງພົ້ນເດັ່ນທີ່ສຸດ ແມ່ນການປະສານສົມທົບກັບສະຫະບໍລິສັດໄປຊະນີຫວຽດນາມ ໃນການຜັນຂະຫຍາຍການນຳໃຊ້ເຕັກໂນໂລຊີຂໍ້ມູນຂ່າວສານເພື່ອຈ່າຍເງິນ ບຳນານ, ເງິນອຸດໜູນປະກັນສັງຄົມ ເຊິ່ງໄດ້ຮັບການຕີລາຄາສູງຈາກປະຊາຊົນ. ໂດຍລວມແລ້ວ ລະດັບການນຳໃຊ້ເຕັກໂນໂລຊີຂໍ້ມູນຂ່າວສານຂອງອົງການປະກັນສັງຄົມຫວຽດນາມ ສືບຕໍ່ຢູ່ໃນ ອັນດັບທີໜຶ່ງ ມນຕາຕະລາງຈັດອັນດັບປີ 2018 ຂອງ 7 ອົງການຂອງລັດຖະບານ(1).
ມາເຖິງດຽວນີ້ ອົງການປະກັນສັງຄົມຫວຽດນາມໄດ້ໃຫ້ບໍລິການສາທາລະນະ 20 ງານຈາກ 28 ງານອອນໄລລະດັບ 3, ລະດັບ 4; ຈຳນວນການບັນທຶກທຸລະກຳເອເລັກໂຕຣນິກອອນໄລ ແມ່ນເກືອບ 44 ລ້ານລາຍການ.
ການນຳໃຊ້ເຕັກໂນໂລຊີຂໍ້ມູນຂ່າວສານທັງໝົດຂອງຂະແໜງການປະກັນສັງຄົມ ໄດ້ຖືກຈັດຕັ້ງ ປະຕິບັດພາຍໃຕ້ ກອບງານສະຖາປັດຕະຍະກຳລັດຖະບານເອເລັກໂຕຣນິກ ທີ່ອອກໂດຍກະຊວງຖະແຫຼງຂ່າວແລະສື່ສານ. ສູນປະຕິບັດການລະບົບເຕັກໂນໂລຊີຂໍ້ມູນຂ່າວສານ ຂອງອົງການປະກັນສັງຄົມຫວຽດນາມ, ທີ່ໄດ້ຮັບການກໍ່ສ້າງແລະເລີ່ມດຳເນີນງານ ແມ່ນຜົນງານສັງລວມຈາກການພັດທະນາອັນຍາວນານ ຂອງລະບົບການປະກັນສັງຄົມ, ພ້ອມກັນນັ້ນ ກໍ່ໄດ້ພັດທະນາໂຄງສ້າງເຕັກນິກ, ບຸກຄະລາກອນ ແລະການຍູ້ແຮງການນຳໃຊ້ເຕັກໂນໂລຊີຂໍ້ມູນຂ່າວສານ...
ປີ 2018 ຖືກຖືວ່າປີບຸກທະລຸ, ກິດຈະກຳຮັບໃຊ້ຕາມແບບທັນສະໄໝຫຼາຍຢ່າງ ຂອງຂະແໜງການປະກັນສັງຄົມ ໄດ້ຮັບການຜັນຂະຫຍາຍຢ່າງຮີບຮ້ອນແລະມີປະສິດທິຜົນເຊັ່ນ ລະບົບ ເອເລັກໂຕຣນິກລວມສູນ"ປະຕູດຽວ" ບົນຖານຊອບແວ"ການຮັບແລະການຄຸ້ມຄອງບັນທຶກ"; ປະຕູເວັບໄຊຂອງການປະກັນສັງຄົມຫວຽດນາມ ແມ່ນຈຸດໃຊ້ງານດຽວ ຂອງການປະກັນສັງຄົມ ຫວຽດນາມ ໃນອິນເຕີເນັດ ທີ່ສະໜອງຂໍ້ມູນການເຄື່ອນໄຫວ, ແຜນນະໂຍບາຍ, ນະໂຍບາຍ, ກົດໝາຍ ກ່ຽວກັບການປະກັນສັງຄົມ, ປະກັນສຸຂະພາບ, ຮັບຄຳຮ້ອງຂໍເຮັດທຸລະກຳທາງເອເລັກໂຕຣນິກ, ຂຸດຄົ້ນຂໍ້ມູນກ່ຽວກັບການປະກັນສັງຄົມແລະປະກັນສຸຂະພາບຂອງອົງການຈັດຕັ້ງ ແລະບຸກຄົນ.
ພິເສດ, ລະບົບການປະເມີນການປະກັນສຸຂະພາບໄດ້ຖືກນຳໃຊ້ເຂົ້າໃນການດຳເນີນງານ, ເຊື່ອຕໍ່ເກືອບ 100% ຂອງສະຖານທີ່ກວດແລະປິ່ນປົວພະຍາດຕາມປະກັນສຸຂະພາບ ຕັ້ງແຕ່ຕາແສງ ຕະຫຼອດຮອດສູນກາງໃນທົ່ວປະເທດ ເພື່ອປະຕິບັດການຄຸ້ມຄອງການກວດແລະປິ່ນປົວພະຍາດ, ການປະເມີນຜົນ ແລະການຊຳລະຄ່າໃຊ້ຈ່າຍການປະກັນສຸຂະພາບ. ພ້ອມກັນນັ້ນ, ຂະແໜງການປະກັນສັງຄົມໄດ້ສ້າງສຳເລັດຖານຂໍ້ມູນສຳລັບຄົວເຮືອນທີ່ເຂົ້າຮ່ວມປະກັນສຸຂະພາບ ພ້ອມດ້ວຍຂໍ້ມູນຂອງປະຊາຊົນ 92,6 ລ້ານຄົນ, ເທົ່າກັບ 24,3 ລ້ານຄົວເຮືອນໃນທົ່ວປະເທດ.
ການອັບເດດ, ເຜີຍແຜ່, ປະກາດເປີດເຜີຍຂັ້ນຕອນການບໍລິຫານ ໄດ້ຮັບການປະຕິບັດຖືກຕາມ ລະບຽບຂໍ້ບັງຄັບ, ຂັ້ນຕອນການບໍລິຫານທັງໝົດຖືກຕິດກະດານຢ່າງເປີດເຜີຍທີ່ສຳນັກງານປະກັນສັງຄົມແຂວງ, ສຳນັກງານປະກັນສັງຄົມເມືອງ; ປະຕູເວັບໄຊຂອງອົງການປະກັນ ສັງຄົມຫວຽດນາມ, ເວັບໄຊຂອງອົງການປະກັນສັງຄົມແຂວງ ຈະປະກາດເປີດເຜີຍລາຍຊື່ຂອງຂັ້ນຕອນການບໍລິຫານ. ພ້ອມກັນນັ້ນ, ຂັ້ນຕອນການບໍລິຫານໄດ້ຮັບການອັບເດດໃນຖານຂໍມູນແຫ່ງຊາດ, ຮັບປະກັນໃຫ້ບັນດາອົງການແລະບຸກຄົນສາມາດເຂົ້າເຖິງຢ່າງງ່າຍດາຍແລະມີຄວາມ ສະດວກ ເມື່ອຕ້ອງການແກ້ໄຂວຽກງານ. ຄຽງຄູ່ກັນນັ້ນ, ຖານຂໍ້ມູນຂັ້ນຕອນການບໍລິຫານທັງໝົດ ຂອງອົງການປະກັນສັງຄົມຫວຽດນາມ ໃນຖານຂໍ້ມູນແຫ່ງຊາດກ່ຽວກັບຂັ້ນຕອນການ ບໍລິຫານ ໄດ້ຮັບການກວດຄືນເປັນປະຈຳ ເພື່ອອັບເດດຢ່າງທັນການ ແລະປັບປຸງຂັ້ນຕອນການ ບໍລິຫານທີ່ຍັງມີຜົນບັງຄັບໃຊ້, ຂັ້ນຕອນການບໍລິຫານທີ່ອອກໃໝ່ ແລະ ຍົກເລີກຂັ້ນຕອນການບໍລິຫານທີ່ໝົດອາຍຸຕາມທີ່ໄດ້ກຳນົດໄວ້.
ການຮັບແລະການສົ່ງຄືນຜົນຂອງການແກ້ໄຂຂັ້ນຕອນການບໍລິຫານ ໄດ້ຮັບການປະຕິບັດຢ່າງເຂັ້ມງວດແລະມີປະສິດທິຜົນ ໃນ 3 ຮູບແບບ: ຜ່ານພາກສ່ວນ”ປະຕູດຽວ" ຢູ່ສຳນັກງານ ອົງການປະກັນສັງຄົມ; ຜ່ານການທຸລະກຳທາງເອເລັກໂຕຣນິກ (ວິສາຫະກິດສາມາດຕິດຕໍ່ໄດ້ໃນ 24 ຂົ່ວໂມງ/ວັນ, 7 ວັນ/ສັບປະດາ) ແລະຜ່ານບໍລິຫານໄປຊະນີສາທາລະນະ (ວິສາຫະກິດບໍ່ຕ້ອງຈ່າຍຄ່າທຳນຽມ). ສິ່ງດັ່ງກ່າວໄດ້ຊ່ວຍປະຢັດເວລາແລະຄ່າໃຊ້ຈ່າຍໃນການເດີນທາງ, ສ້າງເງື່ອນໄຂອຳນວຍຄວາມສະດວກດີສຸດໃຫ້ວິສາຫະກິດແລະຜູ້ອອກແຮງງານ ເມື່ອເຂົ້າຮ່ວມການທຸລະກຳກັບອົງການປະກັນສັງຄົມ. ພ້ອມກັນນັ້ນ, ລະບົບເອເລັກໂຕຣນິກລວມສູນ“ປະຕູດຽວ” ຖືກນຳໃຊ້ ເພື່ອຄຸ້ມຄອງແລະຕິດຕາມຂະບວນການທຸລະກິດທົງໝົດທາງອິນເຕີເນັດ, ນັບແຕ່ການຮັບເອກະສານຈົນເຖິງການຈັດການແກ້ໄຂ, ການສົ່ງຄືນຜົນຂອງການແກ້ໄຂຂັ້ນຕອນການບໍລິຫານ, ການກ່າວເຕືອນສະຖານະພາບເອກະສານກຳລັງຈະໝົດອາຍຸ, ລ່າຊ້າ...ມາຮອດປະຈຸບັນ, ຫຼາຍກວ່າ 90% ຂອງຈຳນວນໜ່ວຍງານແລະວິສາຫະກິດ ໄດ້ດຳເນີນທຸລະກຳເອກະສານເອເລັກໂຕຣນິກ; ມີ 63/63 ແຂວງ, ນະຄອນໄດ້ປະຕິບັດການຍື່ນເອກະສານປະກັນໄພຜ່ານການບໍລິການໄປສະນີສາທາລະນະ. ພ້ອມກັນນັ້ນ, ອົງການປະກັນໄພສັງຄົມຫວຽດດນາມໄດ້ປະສານສົມທົບກັບສະຫະບໍລິສັດໄປສະນີ ເພື່ອທົດລອງການນຳໃຊ້ເຕັກໂນໂລຊີຂໍ້ມູນຂ່າວສານໃນການຈ່າຍເງິນບຳນານແລະເງິນອຸດໜູນປະກັນສັງຄົມລາຍເດືອນ ໃນບາງທ້ອງຖິ່ນເຊັ່ນ ຫາຍເຢືອງ, ຮ່າໂນ້ຍ ແລະຈະເປີດກວ້າງການນຳໃຊ້ນີ້ຕໍ່ໄປໃນທົ່ວປະເທດ.
ພ້ອມກັນນັ້ນ, ບົນພື້ນຖານການນຳໃຊ້ເຕັກໂນໂລຊີຂໍ້ມູນຂ່າວສານໃນຊຸມປີທີ່ຜ່ານມາ, ຂະແໜງການປະກັນສັງຄົມກຳລັງເລັ່ງລັດການກໍ່ສ້າງລະບົບນິເວດ 4.0 ເພື່ອຮັບໃຊ້ປະຊາຊົນແລະວິສາຫະກິດ ດ້ວຍການບໍລິການຕ່າງໆເຊັ່ນ: ບໍລິການສົ່ງຂໍ້ຄວາມ (SMS); ບໍລິການຊຳລະເງິນອອນໄລ; ການນຳໃຊ້ປະກັນສັງຄົມໃນອຸປະກອນມືຖື; ລະບົບ Chatbot ສະໜັບສະໜູນລູກຄ້າ (ຕອບຄຳຖາມກ່ຽວກັບນະໂຍບາຍປະກັນສັງຄົມ ແລະປະກັນສຸຂະພາບໂດຍອັດຕະໂນມັດດ້ວຍປັນຍາປະດິດ, ເພີ່ມຄວາມປະຕິສຳພັນກັບຜູ້ເຂົ້າຮ່ວມ, ສະໜອງຂໍ້ມູນກ່ຽວກັບການເສຍຄ່າປະກັນ, ການຊົມໃຊ້ປະກັນສັງຄົມ, ປະກັນສຸຂະພາບ ແລະຄາດກະລະດັບຊົມໃຊ້ ເພື່ອຮັບໃຊ້ປະຊາຊົນໄດ້ດີກວ່າອີກ); ໄຈ້ແຍກແລະຂຸດຄົ້ນຂໍ້ມູນຂອງຂະແໜງການໄດ້ຫຼາຍສຸດ ຈາກຖານຂໍ້ມູນຂະໜາດໃຫຍ່ (BIGDATA); ສ້າງຕັ້ງ Fanpage ການສື່ສານໃນເຄືອຂ່າຍສັງຄົມ; ໃຫ້ບໍລິການສາທາລະນະທັງໝົດທີ່ສາມາດເຂົ້າເຖິງລະດັບ 4.
ປີ 2018, ຄະນະປະຕິບັດງານຂອງນາຍົກລັດຖະມົນຕີໄດ້ຕີລາຄາສູງກ່ຽວກັບແນວຄິດປະຕິຮູບ, ມາດຕະການປະຕິຮູບ ແລະປະສິດທິຜົນຂອງການປະຕິຮູບ ຂອງຂະແໜງການປະກັນສັງຄົມ, ເຊິ່ງໄດ້ມີຜົນກະທົບຢ່າງຈະແຈ້ງເຖິງເສດຖະກິດ-ສັງຄົມຂອງປະເທດ, ສ້າງຄວາມເປີດເຜີຍ, ໂປ່ງໃສ, ຈະແຈ້ງລະຫວ່າງບັນດາອົງການຂອງລັດ, ອົງການປະກັນສັງຄົມແລະປະຊາຊົນຜູ້ຊົມໃຊ້ລະບອບປະກັນສັງຄົມ; ແລະຮັບຮູ້ວ່າອົງການປະກັນສັງຄົມຫວຽດນາມ ແມ່ນໜຶ່ງໃນບັນດາ ໜ່ວຍງານທີ່ປະຕິຮູບກ່ອນ, ໄດ້ຍູ້ແຮງການນຳໃຊ້ເຕັກໂນໂລຊີຂໍ້ມູນຂ່າວສານ, ສ້າງຖານຂໍ້ມູນແຫ່ງຊາດກ່ຽວກັບການປະກັນສັງຄົມ, ແບ່ງປັນຂໍ້ມູນ, ຕິດຕາມການຊຳລະເງິນ, ກາຍຈ່າຍ ເງິນປະກັນສັງຄົມ, ປະກັນສຸຂະພາບ. ຂະແໜງການປະກັນສັງຄົມໄດ້ສ້າງຖານຂໍ້ມູນແຫ່ງຊາດກ່ຽວກັບການປະກັນສັງຄົມ, ໃນຂະນະທີ່ຍັງບໍ່ທັນມີຖານຂໍ້ມູນກ່ຽວກັບປະຊາກອນທົ່ວໄປ. ສິ່ງສຳຄັນທີ່ສຸດແມ່ນ ຂະແໜງປະກັນສັງຄົມໄດ້ສ້າງຄວາມເປີດເຜີຍ, ໂປ່ງໃສ, ຈະແຈ້ງໃນການບໍລິຫານຈັດການວຽກງານ ແລະພິເສດແມ່ນ ມີຄວາມຮັບຜິດຊອບໃນການຮັບໃຊ້ປະຊາຊົນ, ຜູ້ເຂົ້າຮ່ວມໃນບັນດານະໂຍບາຍປະກັນສັງຄົມ, ກວດກາສະຖານທີ່ກວດແລະປິ່ນປົວພະຍາດ ເພື່ອແກ້ໄຂກຳຈັດຊ່ອງວ່າງທີ່ອາດຈະຖືກສວຍໃຊ້ໃນການຊຳລະຄ່າໃຊ້ຈ່າຍໃນການກວດແລະປິ່ນປົວພະຍາດຕາມປະກັນສຸຂະພາບ.
ຕາມການຕີລາຄາຂອງທະນາຄານໂລກ (WB), ໃນການຈັດອັນດັບສະພາບແວດລ້ອມແຫ່ງການດຳເນີນທຸລະກິດຂອງຫວຽດນາມ, ການປະກັນສັງຄົມແມ່ນຂົງເຂດທີ່ມີການເພີ່ມຂຶ້ນສູງສຸດ, ເຖິງ 81 ອັນດັບ, ເສດຖະກິດຢູ່ໃນອັນດັບທີ 86 ໃນຈຳນສນ 190 ປະເທດໃນໂລກໃນປີ 2018. ປະຈຸບັນ, ຖານຂໍ້ມູນແຫ່ງຊາດກ່ຽວກັບການປະກັນໄພ ພວມຄຸ້ມຄອງຂໍ້ມູນຂອງປະຊາຊົນຫຼາຍກວ່າ 94 ລ້ານຄົນພ້ອມຂໍ້ມູນພື້ນຖານ 6 ຂໍ້, ໃນນັ້ນຂໍ້ມູນຂອງຜູ້ເຂົ້າຮ່ວມການປະກັນສຸຂະພາບແມ່ນ 82 ລ້ານສະບັບ. ພິເສດ, ການປະກັນສັງຄົມຫວຽດນາມກໍ່ພ້ອມແລ້ວທີ່ຈະແບ່ງປັນ ຂໍ້ມູນນີ້ກັບອົງການອື່ນໆ, ກ້າວໄປເຖິງການເຊື່ອມໂຍງເຂົ້າກັບຖານຂໍ້ມູນປະຊາກອນແຫ່ງຊາດ. ການປະກັນສັງຄົມກຳລັງຮ່ວມມືແລກປ່ຽນຢ່າງເປັນປະຈຳ ກັບຂະແໜງການພາສີ.
ລາຍງານການປະເມີນແລະຈັດອັນດັບຄວາມປອດໄພດ້ານຂໍ້ມູນຂ່າວສານສຳລັບບັນດາເວັບໄຊ/ປະຕູຂໍ້ມູນເອເລັກໂຕຣນິກຕ່າງໆຂອງອົງການລັດໃນປີ 2019 - Portal Security Index (PSI) ທີ່ຫາກໍ່ໄດ້ເຜີຍແຜ່ໂດຍກະຊວງຖະແຫຼງຂ່າວແລະການສື່ສານ, ການປະກັນສັງຄົມ ຫວຽດນາມຢູ່ໃນອັນດັບທີ 3 ກ່ຽວກັບຄວາມປອດໄພດ້ານຂໍ້ມູນຂ່າວສານສຳລັບບັນດາເວັບໄຊ/ປະຕູຂໍ້ມູນເອເລັກໂຕຣນິກ.
ຜ່ານຂະບວນການນຳໃຊ້ເຕັກໂນໂລຊີຂໍ້ມູນຂ່າວສານ, ຫັນຂະແໜງການປະກັນສັງຄົມເປັນທັນສະໄໝສາມາດຖອດຖອນບົດຮຽນຈຳນວນໜຶ່ງດັ່ງນີ້:
ທີໜຶ່ງ, ການກໍ່ສ້າງສະຖາປັດຕະຍະກຳລັດຖະບານເອເລັກໂຕຣນິກ ແລະ ແຜນການດຳເນີນງານການປ່ຽນດິຈິຕອນ, ແຜນການກໍ່ສ້າງຖານຂໍ້ມູນແຫ່ງຊາດ ເພື່ອກຳນົດວຽກງານທີ່ຕ້ອງການບຸລິມະສິດໃນການປະຕິບັດ. ຂະບວນການປະຕິຮູບຂັ້ນຕອນການບໍລິຫານ ແລະການດຳເນີນວິຊາຊີບແບບງ່າຍດາຍຕ້ອງໄປຄຽງຄູ່ກັບການນຳໃຊ້ເຕັກໂນໂລຊີຂໍ້ມູນຂ່າວສານ.
ທີສອງ, ການປ່ຽນດິຈິຕອນຈະຕ້ອງດຳເນີນຕັ້ງແຕ່ຂອດການຮັບຂໍ້ມູນເຂົ້າສຳລັບທຸລະກິດ ແລະ ສົ່ງຄືນຂໍ້ມູນສົ້ນອອກໃຫ້ແກ່ຜູ້ໃຊ້, ວິສາຫະກິດ ດ້ວຍອຸປະກອນເຕັກໂນໂລຊີຂໍ້ມູນຂ່າວສານ; ໝາຍຄວາມວ່າຕ້ອງເລີ່ມຈາກຂອດການຮັບທຸລະກຳເອເລັກໂຕຣນິກ ແລະ ການສົ່ງຄືນຜົນການແກ້ໄຂດ້ວຍເຄື່ອງມືເອເລັກໂຕຣນິກ, ຕໍ່ຈາກຂະບວນການທາງທຸລະກິດທີ່ຕ້ອງດຳເນີນດ້ວຍເອເລັກໂຕຣນິກ. ພິເສດ, ການຫັນເປັນດິຈິຕອນ ແລະ ການນຳໃຊ້ຂໍ້ມູນເອເລັກໂຕຣນິກ, ນັບທັງຂໍ້ມູນເກົ່າ ເພື່ອຮັບປະກັນຂະບວນການປິດທີ່ຕ້ອງໄດ້ຮັບການຜັນຂະຫຍາຍປະຕິບັດຢ່າງເຖິງຖອງ.
ທີສາມ, ການປັບປຸງບູລະນະຖານຂໍ້ມູນຕ້ອງໄດ້ຮັບການປະຕິບັດຢ່າງຕໍ່ເນື່ອງ, ລຽນຕິດ; ຢາກ ຄຸ້ມຄອງດີດ້ວຍເຕັກໂນໂລຊີຂໍ້ມູນຂ່າວສານແມ່ນຕ້ອງມີຂໍ້ມູນດີ; ຕ້ອງມີພະນັກງານວິຊາຊີບທີ່ມີລະດັບເຕັກນິກເລິກເຊິ່ງແລະມີຄວາມຮູ້ດ້ານວິຊາຊີບ. ພິເສດ, ຕ້ອງມີຄວາມຕັດສິນໃຈຢ່າງແຂງແຮງຂອງຜູ້ນຳໜ້າ ແລະແລະການລົງມືຢ່າງແຂງແຮງຂອງລະບົບອົງການຈັດຕັ້ງທັງໝົດ.
ທີສີ່, ການລົງທຶນເຂົ້າໃນເຕັກໂນໂລຊີຂໍ້ມູນຂ່າວສານຂອງຂະແໜງການປະກັນສັງຄົມໃນໄລຍະທີ່ຜ່ານມາແມ່ນຫຼາຍທີ່ສຸດ ແລະໄດ້ຮັບປະສິດທິຜົນທີ່ແນ່ນອນ. ແຕ່ວ່າ, ໃນສະພາບການປະຈຸບັນ, ເພື່ອຄຸ້ມຄອງແລະຮັບໃຊ້ປະຊາຊົນຢ່າງມີປະສິດທິຜົນສູງ, ຕ້ອງການມີການພົວພັນເຊື່ອມ ຕໍ່ ແລະເພີ່ມເຕີມຂໍ້ມູນ ຂ່າວສານກ່ຽວກັບການຄຸ້ມຄອງຂອງບັນດາຂະແໜງການ, ບັນດາຂັ້ນອື່ນໆ ເພື່ອເປັນພື້ນຖານໃຫ້ແກ່ການຈັດການແກ້ໄຂ. ດັ່ງນັ້ນ, ເພື່ອປະຕິບັດແຜນການລົງທຶນ, ຍົກລະດັບໂຄງສ້າງພື້ນຖານເຕັກໂນໂລຊີຂໍ້ມູນຂ່າວສານຂອງຂະແໜງການປະກັນສັງຄົມ ຈະຕ້ອງໄດ້ດຳເນີນຢ່າງລະມັດລະວັງ, ສອດຄ່ອງກັບຄວາມໄວໃນການພັດທະນາໂຄງສ້າງພື້ນຖານເຕັກໂນໂລຊີຂໍ້ມູນຂ່າວສານຂອງຂະແໜງການອື່ນ, ຂັ້ນອື່ນເພື່ອຮັບປະກັນປະສິດທິຜົນ.
ຮັບຮູ້ສິ່ງທ້າທາຍ ແລະ ນຳໃຊ້ວິທີແກ້ໄຂໃນອະນາຄົດອັນໃກ້ນີ້
ຂະແໜງການປະກັນສັງຄົມໄດ້ກຳນົດຢ່າງຈະແຈ້ງສິ່ງທ້າທາຍ ຕ່າງໆດັ່ງນີ້:
ທີໜຶ່ງ, ຄວາມຈຳເປັນຕ້ອງຮັບປະກັນຄວາມປອດໄພຂອງຖານຂໍ້ມູນ, ເພາະວ່າແຫຼ່ງຂໍ້ມູນຂອງຂະແໜງປະກັນສັງຄົມແມ່ນໜຶ່ງໃນ 6 ຖານຂໍ້ມູນແຫ່ງຊາດ. ຄວາມສ່ຽງຈາກຄວາມບໍ່ໝັ້ນຄົງທາງດ້ານຂໍ້ມູນຂ່າວສານແມ່ນຄວາມສ່ຽງທີ່ມີຢູ່ແລະຍາວນານ, ບໍ່ສາມາດແກ້ໄຂຢ່າງໄວວາໄດ້.
ທີສອງ, ພະນັກງານນຳໃຊ້ເຕັກໂນໂລຊີຂໍ້ມູນຂ່າວສານທີ່ບໍ່ໄດ້ອັບເດດ, ບໍ່ມີສະຕິຮູ້ສຶກເຖິງຄວາມຈຳເປັນຕ້ອງຮຽນຮູ້ດ້ວຍຕົນເອງ ເພື່ອຍົກສູງລະດັບແລະຄວາມສາມາດຂອງຕົນ ໃນການນຳໃຊ້ເຕັກໂນໂລຊີ. ນີ້ແມ່ນບັນຫາທີ່ຜູ້ນຳຂອງຂະແໜງການປະກັນສັງຄົມໄດ້ເອົາໃຈໃສ່ ແຕ່ກໍ່ບໍ່ສາມາດຕອບສະໜອງຄວາມຕ້ອງການຂອງວຽກງານຕົວຈິງໄດ້.
ທີສາມ, ລະບົບຂໍ້ມູນຂ່າວສານການປະເມີນການປະກັນສຸຂະພາບໄດ້ດຳເນີນງານຢ່າງມີປະສິດທິຜົນແລະນຳມາເຊິ່ງຜົນປະໂຫຍດອັນໃຫຍ່ຫຼວງ ແຕ່ຕ້ອງການມີການສົມທົບແໜ້ນແຟ້ນກວ່າອີກຂອງຝ່າຍຮ່ວມງານ, ນັ້ນແມ່ນຂະແໜງການສາທາລະນະສຸກ, ບັນດາສະຖານທີ່ກວດແລະປິ່ນປົວພະຍາດ. ການພົວພັນເຊື່ອມຕໍ່ຂໍ້ມູນເຖິງສະຖານທີ່ກວດແລະປິ່ນປົວພະຍາດ ໄດ້ຮັບການຮັບປະກັນເກືອບ 100%, ແຕ່ບາງສະຖານທີ່ກວດແລະປິ່ນປົວພະຍາດຍັງບໍ່ໄດ້ສົ່ງຂໍ້ມູນເອເລັກໂຕຣນິກຖືກມາດຕະຖານຕາມກຳນົດມາໃຫ້ອົງການປະກັນສັງຄົມ, ບາງຂໍ້ມູນບໍ່ໄດ້ອັບເດດທັນເວລາທີ່ຄົນເຈັບອອກຈາກໂຮງໝໍ...
ເພື່ອຮັບໃຊ້ປະຊາຊົນໃຫ້ດີຂຶ້ນກວ່າເກົ່າ, ການປະກັນສັງຄົມໄດ້ວາງໜ້າທີ່ແລະວິທີແກ້ໄຂຈຳນວນໜຶ່ງດັ່ງນີ້:
ທີໜຶ່ງ, ມີມາດຕະການເພື່ອຄຸ້ມຄອງແລະຮັບປະກັນຄວາມໝັ້ນຄົງແລະຄວາມປອດໄພທາງດ້ານຂໍ້ມູນຂ່າວສານ. ພ້ອມກັນນັ້ນ, ເອົາໃຈໃສ່ເຖິງການຝຶກອົບຮົມແລະຍົກສູງລະດັບນຳໃຊ້ເຕັກໂນໂລຊີຂໍ້ມູນຂ່າວສານໃຫ້ພະນັກງານທຸກຄົນ, ໂດຍສະເພາະພະນັກງານທີ່ດຳເນີນລະບົບ, ເຮັກວຽກງານເຕັກໂນໂລຊີຂໍ້ມູນຂ່າວສານໂດຍກົງ, ພະນັກງານເຕັກໂນໂລຊີຂໍ້ມູນຂ່າວສານຢູ່ທ້ອງຖິ່ນ; ຍົກສູງຄວາມຮັບຮູ້ໃຫ້ຜູ້ຊົມໃຊ້ສຸດທ້າຍ, ຍ້ອນຄວາມສ່ຽງຕໍ່ຄວາມປອດໄພທາງດ້ານຂໍ້ມູນຂ່າວ ສານເຄີຍເກີດຂຶ້ນກັບຜູ້ຊົມໃຊ້ສຸດທ້າຍ.
ທີສອງ, ສືບຕໍ່ລົງທຶນພັດທະນາເຕັກໂນໂລຊີຕາມມາດຕະຖານ ເພື່ອຈະມີລະບົບຂໍ້ມູນຂ່າວສານ ທີ່ທັນສະໄໝແລະຮັບປະກັນຄວາມປອດໄພດ້ານຂໍ້ມູນຂ່າວສານ. ສ້າງຂໍ້ກຳນົດກ່ຽວກັບການປະສານສົມທົບໃນການກູ້ໄພແລະຕອບໂຕ້ເຫດການຄວາມປອດໄພດ້ານຂໍ້ມູນຂ່າວສານ, ມີລະບຽບການປະສານງານກັບອົງການ, ໜ່ວຍງານທີ່ກ່ຽວຂ້ອງເຊັ່ນ ໜ່ວຍງານຮັບມືສຸກເສີນທາງຄອມພິວເຕີ, ກົມຄວາມປອດໄພຂໍ້ມູນຂ່າວສານ ເພື່ອມີການປະສານງານຢ່າງກວ້າງຂວາງ. ຂະແໜງການປະກັນສັງຄົມຕ້ອງມີຄວາມເອົາໃຈໃສ່ຢ່າງຮອບດ້ານເພື່ອນຳໃຊ້ເຕັກໂນໂລຊີຂໍ້ມູນຂ່າວສານ, ຫັນຂະແໜງການປະກັນສັງຄົມເປັນສັງຄົມ ເພື່ອຍົກສູງຄຸນນະພາບແລະປະສິດທິຜົນໃນການປະຕິບັດປະກັນສັງຄົມ, ຕອບສະໜອງຄວາມຕ້ອງການຂອງປະຊາຊົນແລະວິສາຫະກີດ.
ທີສາມ, ສືບຕໍ່ປະຕິບັດເປົ້າໝາຍກໍ່ສ້າງຂະແໜງການປະກັນສັງຄົມໃຫ້ທັນສະໄໝແລະເປັນມືອາຊີບ, ຕອບສະໜອງຄວາມພຶງພໍໃຈຂອງປະຊາຊົນແລະວິສາຫະກິດ. ໃນປີ 2019 ແລະໃນຊຸມປີຕໍ່ໄປ, ການປະກັນສັງຄົມຫວຽດນາມຕ້ອງສືບຕໍ່ຜັນຂະຫຍາຍບັນດາວິທີແກ້ໄຂ ສຸມໃສ່ ບັນດາໜ້າທີ່ຄົ້ນຄວ້າ ແລະປັບປຸງຂັ້ນຕອນການທຸລະກິດ; ເພີ່ມທະວີວຽກງານກວດກາ, ກວດສອບສະເພາະ; ຄວບຄຸນຄ່າໃຊ້ຈ່າຍໃນການກວດແລະປິ່ນປົວພະຍາດຕາມປະກັນສຸຂະພາບ ຢູ່ບັນດາສະຖານທີ່ກວດແລະປິ່ນປົວພະຍາດທີ່ມີປະກົດການໜ້າສົງໄສ; ຈັດການແກ້ໄຂແລະສະເໜີໃຫ້ຈັດການແກ້ໄຂຢ່າງທັນການຕໍ່ການລະເມີດກົດໝາຍປະກັນສັງຄົມ, ປະກັນສຸຂະພາບ; ເພີ່ມທະວີການປ່ຽນແປງໃໝ່ວຽກງານໂຄສະນານັບທັງດ້ານເນື້ອໃນແລະຮູບການຕາມແບບເປັນມືອາຊີບ, ຖືກຕ້ອງຕາມຈຸດໜັກໃຈກາງ, ສອດຄ່ອງກັບແຕ່ລະກຸ່ມເປົ້າໝາຍປະກັນໄພ; ສືບຕໍ່ການກວດຄືນ, ສັບຊ້ອນ, ປັບປຸງແລະລົດຈຳນວນຫົວເງື່ອນ ຕິດກັບການລົດການບັນຈຸພະນັກງານ, ສັບຊ້ອນແລະຍົກສູງຄຸນນະພາບຂອງຖັນແຖວພະນັກງານ ລັດຖະກອນ ຕາມຈິດໃຈມະຕິຂອງກົມການເມືອງສະບັບທີ 39/NQ-TW, ວັນທີ 17 ເດືອນເມສາ 2015, ກ່ຽວກັບການຫຼຸດຜ່ອນການບັນຈຸບຸກຄະລາກອນ ແລະການປັບໂຄງສ້າງຖັນແຖວພະນັກງານ, ລັດຖະກອນ, ພາລະກອນ; ປະສານສົມທົບກັບບັນດາກະຊວງ, ຂະແໜງການທີ່ກ່ຽວຂ້ອງ ເພື່ອປັບປຸງໂຄງການ “ປ່ຽນແປງໃໝ່ແລະສັບຊ້ອນການຈັດຕັ້ງກົງຈັກຂອງການປະກັນສັງຄົມຫວຽດນາມ ຕາມທິດ ຍົກສູງຄຸນະພາບ, ເຄື່ອນໄຫວຢ່າງມີປະສິດທິພາບ ແລະປະສິດທິຜົນ” ເພື່ອຍື່ນຕໍ່ນາຍົກ ລັດຖະມົນຕີ. ປະຕິບັດຢ່າງມີປະສິດທິຜົນມະຕິເລກທີ 28-NQ/TW ຂອງກອງປະຊຸມຄັ້ງທີເຈັດ ຄະນະບໍລິຫານງານສູນກາງພັກສະໄໝທີ XII ກ່ຽວກັບການປະຕິຮູບນະໂຍບາຍປະກັນສັງຄົມ, ມຸ່ງໄປສູ່ການປະກັນສັງຄົມໃຫ້ທົ່ວປວງຊົນ ຕາມແຜນງານທີ່ເໝາະສົມກັບສະພາບການພັດທະນາເສດຖະກິດ-ສັງຄົມ; ການປະຕິຮູບໃນການກໍ່ສ້າງແລະຈັດຕັ້ງປະຕິບັດນະໂຍບາຍ ເພື່ອປັບປຸງຄວາມເຊື່ອຖືແລະເພີ່ມລະດັບຄວາມພຶງພໍໃຈ ຂອງຜູ້ເຂົ້າຮ່ວມການປະກັນສັງຄົມ. ເພີ່ມທະວີການປະສານສົມທົບ, ແບ່ງປັນແລະເຊື່ອມຕໍ່ຂໍ້ມູນຂ່າວສານ ລະຫວ່າງອົງການຄຸ້ມຄອງຂອງລັດກ່ຽວກັບການລົງທຶນ, ການເງິນ, ພາສີ, ແຮງງານ ເພື່ອຍົກສູງປະສິດທິຜົນໃນການຄຸ້ມຄອງເປົ້າໝາຍຜູ້ເຂົ້າຮ່ວມປະກັນສັງຄົມ ແລະຜູ້ປະຕິບັດນະໂຍບາຍປະກັນສັງຄົມ. ຍົກສູງຄວາມສາມາດແລະປະສິດທິຜົນ ຂອງວຽກງານຄົ້ນຄວ້າທິດສະດີແລະສະຫຼຸບສັງລວມພຶດຕິກຳ ກ່ຽວກັບການປະກັນສັງຄົມ. ຍູ້ແຮງການປະຕິຮູບຂັ້ນຕອນການບໍລິຫານ, ປະຕິບັດການບໍລິການສາທາລະນະອອນໄລລະດັບ 4 ໃນທຸກຂົງເຂດການປະກັນສັງຄົມ, ປະກັນການວ່າງງານ; ປັບປຸງບູລະນະ, ຍູ້ແຮງການເຊື່ອມຕໍ່ຖານຂໍ້ມູນແຫ່ງຊາດກ່ຽວກັບການປະກັນໄພ ກັບລະບົບຖານຂໍ້ມູນທີ່ກ່ຽວຂ້ອງ ເພື່ອຮັບໃຊ້ເປັນຢ່າງດີໃຫ້ການປະຕິບັດນະໂຍບາຍແລະວຽກງານຄົ້ນຄວ້າ, ວາງກຳນົດນະໂຍບາຍ. ສືບຕໍ່ການຫັນເປັນທັນສະໄໝການຄຸ້ມຄອງການປະກັນສັງຄົມ, ການລົງທຶນພັດທະນາເຕັກໂນໂລຊີ ແລະ ວິທີການຄຸ້ມຄອງທີ່ທັນສະໄໝ ໃນການຈັດຕັ້ງປະຕິບັດ ການປະກັນສັງຄົມ, ປະກັນການວ່າງງານ. ກີດກັ້ນຢ່າງທັນການຕໍ່ການສໍ້ໂກງ, ການສວຍໃຊ້ນະໂຍບາຍປະກັນສັງຄົມ, ປະກັນການວ່າງງານ; ສ້າງແລະຍົກສູງຄວາມເຊື່ອຖືຂອງປະຊາຊົນແລະວິສາຫະກິດກ່ຽກັບການເຄື່ອນໄຫວຂອງຂະແໜງການປະກັນສັງຄົມ, ກ່ຽວກັບລັກສະນະດີເລີດແລະມະນຸດສະທຳ ຂອງບັນດານະໂຍບາຍປະກັນສັງຄົມ, ປະກັນສຸຂະພາບຂອງພັກແລະລັດ ເພື່ອຈຸດປະສົງຮັບປະກັນຄວາມປອດໄພທາງສັງຄົມທີ່ຍືນຍົງຂອງປະຊາຊົນທຸກຄົນ./.
-----------------------
(1) ໃນ 5 ຕົວຊີ້ວັດຄື 1- ໂຄງສ້າງພື້ນຖານເຕັກນິກເຕັກໂນໂລຊີຂໍ້ມູນຂ່າວສານ; 2- ການນຳໃຊ້ເຕັກໂນໂລຊີຂໍ້ມູນຂ່າວສານໃນການເຄື່ອນໄຫວຂອງສຳນັກງານອົງການ; 3- ເວັບໄຊ/ປະຕູຂໍ້ມູນເອເລັກໂຕຣນິກ (ສະໜອງຂໍ້ມູນ, ອັດເດດຂໍ້ມູນ; ພາລະໜ້າທີ່ສະໜັບສະໜູນໃນເວັບໄຊ/ປະຕູຂໍ້ມູນເອເລັກໂຕຣນິກ); 4- ກົນໄກ, ນະໂຍບາຍແລະຂໍ້ກຳນົດການນຳໃຊ້ເຕັກໂນໂລຊີຂໍ້ມູນຂ່າວສານ; 5- ບຸກຄະລາກອນສຳລັບການນຳໃຊ້ເຕັກໂນໂລຊີຂໍ້ມູນຂ່າວສານ, ມີພຽງຕົວຊີ້ວັດທີ 4 ແມ່ນອົງການປະກັນສັງຄົມຫວຽດນາມຢູ່ໃນອັນດັບທີ 2, ຫຼັງຈາກສຳນັກຂ່າວສານຫວຽດນາມ.