ຍົກສູງຄຸນນະພາບ, ປະສິດທິຜົນ ແລະ ສ້າງອິດທິພົນທີ່ກ້ວາງຂວາງ
ຂອງຂະບວນການ “ທົ່ວປວງຊົນສາມັກຄີກັນກໍ່ສ້າງຊີວິດວັດທະນະທຳ”
ຂອງຂະບວນການ “ທົ່ວປວງຊົນສາມັກຄີກັນກໍ່ສ້າງຊີວິດວັດທະນະທຳ”
ວກ. - ພາຍຫຼັງເກືອບ 20 ປີແຫ່ງການປະຕິບັດ, ຂະບວນການ “ທົ່ວປວງຊົນສາມັກຄີກັນກໍ່ສ້າງຊີວິດວັດທະນະທຳ” ໄດ້ກາຍເປັນຂະບວນການວັດທະນະທຳແທ້ຈິງ ທີ່ມີແຮງແຜ່ກະຈາຍຢ່າງກວ້າງຂວາງ, ມີຜົນກະທົບຢ່າງແຂງແຮງ ແລະ ນຳມາເຊິ່ງປະສິດທິຜົນແທດຈິງ ດ້ວຍມາດຕະຖານທີ່ໄດ້ປ່ຽນແປງໃໝ່ ແລະ ເໝາະສົມກັບຊີວິດຈິງ.
ພິທີແຕ່ງດອງລວມໝູ່ ຕາມແບບແຜນດຳລົງຊີວິດທີ່ສີວິໄລ, ປະຢັດ ຈັດໂດຍສູນສະໜັບສະໜູນຊາວໜຸ່ມກຳມະກອນນະຄອນໂຮ່ຈີມິນ ປິ 2015, ສ້າງຜົນກະທົບທີ່ດີໃນຊີວິດ _ພາບ: ຂໍ້ມູນ
ການປ່ຽນແປງໃນທາງບວກ
ເມື່ອຫວນຄືນເບິ່ງເສັ້ນທາງ 20 ປີທີ່ຜ່ານມາ, ຂະບວນການ “ທົ່ວປວງຊົນສາມັກຄີກັນກໍ່ສ້າງຊີວິດວັດທະນະທຳ” ໄດ້ມີຜົນກະທົບທີ່ຕັ້ງໜ້າ ຕໍ່ການພັດທະນາເສດຖະກິດ-ສັງຄົມ, ຮັບປະກັນການປ້ອງກັນປະເທດ, ປ້ອງກັນຄວາມໝັ້ນຄົນ, ຄວາມເປັນລະບຽບລຽບລ້ອຍ ແລະຄວາມປອດໄພທາງສັງຄົມ ຂອງປະເທດ. ຜ່ານບັນດາເນື້ອໃນຂອງຂະບວນການ, ມີຫຼາຍວິທີທີ່ດີແລະຮູບແບບໃໝ່ ທີ່ໄດ້ຮັບການປະຕິບັດຢ່າງມີປະສິດທິຜົນ ໂດຍປະຊາຊົນ. ມາເຖິງປະຈຸບັນ, ຫຼາຍເນື້ອໃນໄດ້ເຂົ້າສູ່ ຊີວິດຢ່າງແທ້ຈິງ, ກາຍເປັນວຽກງານປະຈຳວັນຂອງປະຊາຊົນ. ນັບແຕ່ເມື່ອປຸກລະດົມ, ຂະບວນການ “ທົ່ວປວງຊົນສາມັກຄີກັນກໍ່ສ້າງຊີວິດວັດທະນະທຳ” ໄດ້ຮັບຄວາເຫັນດີສະໜັບສະໜູນຈາກບັນດາຂັ້ນ, ບັນດາຂະແໜງການ ແລະ ປະຊາຊົນ, ມັນໄດ້ກາຍເປັນສາຍເຊື່ອມຕໍ່ບັນດາຂະບວນການແຂ່ງຂັນກັນຮັກຊາດໃນທົ່ວປະເທດ.
ບັນດາເນື້ອໃນແລະມາດຕະຖານໃນຂະບວນການດັ່ງກ່າວ ລ້ວນແຕ່ຕິດກັບຊີວິດການເປັນຢູ່ປະຈຳວັນ ຂອງປະຊາຊົນ, ດັ່ງນັ້ນ ການປະຕິບັດກາຍເປັນທ່າອຽງຫຼັກ ເພື່ອກໍ່ສ້າງຊີວິດວັດທະນະທຳ, ສິ່ງແວດລ້ອມວັດທະນະທຳທີ່ອຸດົມສົມບູນແລະສົດໃສ. ຕັ້ງແຕ່ບຸກຄົນ, ຄອບຄົວ, ສາຍຕະກຸນ, ກຸ່ມທີ່ຢູ່ອາໄສ, ສຳນັກງານ, ກົມກອງ, ວິສາຫະກິດ ລ້ວນແຕ່ມຸ່ງໄປສູ່ເປົ້າໝາຍ ການກໍ່ສ້າງຜູ້ຄົນວັດທະນະທຳ, ສິ່ງແວດລ້ອມວັດທະນະທຳ, ຖືເອົານັ້ນເປັນສິ່ງຊຸກຍູ້ ບັນດາໜ້າທີ່ການເມືອງ, ເສດຖະກິດ - ສັງຄົມ. ໂສມໜ້າໃໝ່ຂອງຊີວິດວັດທະນະທຳ ໄດ້ຮັບການສ້າງຕັ້ງຂຶ້ນ ເທື່ອລະກ້າວ. ພິເສດແມ່ນ, ການປ່ຽນແປງທີ່ຈະແຈ້ງທີ່ພວກເຮົາສັງເກດເຫັນໄດ້ຢ່າງງ່າຍດາຍແມ່ນ ການກໍ່ສ້າງບັນດາຄອບຄົວວັດທະນະທຳ - ຈຸລັງຂອງສັງຄົມ, ດ້ວຍບັນດາປະເພນີອັນດີງາມ, ປູ່ຍ່າຕາຍາຍ ພໍ່ແມ່ເປັນແບບຢ່າງ, ລູກຫຼານທີ່ຄຳຮູ້ກະຕັນຍູ... ນັບມື້ນັບໄດ້ຮັບການເສີມຂະຫຍາຍ, ທະວີຄູນ. ບັນດາສຳນັກງານອົງການ ໄດ້ເຊື່ອມຕິດການປະຕິບັດໜ້າທີ່ວິຊາຊີບ, ໜ້າທີ່ການເມືອງ, ຍູ້ແຮງຂະບວນການກໍ່ສ້າງຄຸນສົມບັດສິນທຳ, ວິຖີຊີວິດທີ່ອຸດົມສົມບູນແລະສົດໃສ. ຂະບວນການສ້າງຄົນດີ, ວຽກດີ, ຕົວຢ່າງທີ່ກ້າວໜ້າ ໄດ້ກາຍເປັນເປົ້າໝາຍໃນສຳນັກງານອົງການ, ວິສາຫະກິດ, ໃນແຕ່ລະສາຍຕະກຸນ, ແຕ່ລະຄອບຄົວ. ອີງຕາມການສັງເຄາະຈາກບັນດາທ້ອງຖິ່ນ, ໃນ 18 ປີແຫ່ງການປະຕິບັດຂະບວນການ “ທົ່ວປວງຊົນສາມັກຄີກັນກໍ່ສ້າງຊີວິດວັດທະນະທຳ”, ໄດ້ມີຫຼາຍແບບຢ່າງທີ່ດີເດັ່ນ, ວິທີເຮັດທີ່ມີປະສິດທິຜົນ ໄດ້ຮັບການເຜີຍແຜ່, ຄົ້ນຄວ້າ, ຮ່ຳຮຽນ, ຂະຫຍາຍກວ້າງ. ຜ່ານບັນດາໄລຍະການສະຫຼຸບເບື້ອງຕົ້ນ, ການສະຫຼຸບສັງລວມ ຂະບວນການໄດ້ມີຄົນດີ ຫຼາຍກວ່າ 1.200.000 ຄົນ; ມີ 18.651.317 ຄອບຄົວໃນຈຳນວນ 21.771.790 ຄອບຄົວທັງໝົດ ໄດ້ຮັບການຍອມຮັບວ່າເປັນ “ຄອບຄົວວັດທະນະທຳ”; ມີ 73.984 ບ້ານ, ໝູ່ບ້ານ ໃນຈຳນວນ 104.609 ບ້ານ, ໝູ່ບ້ານທັງໝົດ ໄດ້ຮັບການຍອມຮັບວ່າເປັນບ້ານວັດທະນະທຳ; ມີ 84.785 ສຳນັກງານອົງການ ວິສາຫະກິດ ໃນຈຳນວນ 114.972 ແຫ່ງທັງໝົດ ໄດ້ຖືກຮັບຮູ້ວ່າ ເປັນສຳນັກງານ ວິສາຫະກິດວັດທະນະທຳ. ຫຼາຍບຸກຄົນແລະໝູ່ຄະນະຫຼາຍແຫ່ງມີຜົນງານທີ່ດີເດັ່ນ ໄດ້ຮັບການຍ້ອງຍໍຊົມເຊີຍ ແລະລະດົມກຳລັງໃຈຢ່າງທັນການ ຈາກພັກ, ລັດ. ຫຼາຍຄອບຄົວໄດ້ມອບທີ່ດິນ, ປະກອບສ່ວນເງິນແລະເຫື່ອແຮງ ເພື່ອກໍ່ສ້າງເຮືອນວັດທະນະທຳ, ກໍ່ສ້າງເສັ້ນທາງ, ກໍ່ສ້າງໂຮງຮຽນ, ກໍ່ສ້າງຊົນນະບົດໃໝ່. ເຫດການທີ່ເດັ່ນຄື ບັນດາຄອບຄົວຢູ່ແຂວງດັກນົງເຊັ່ນ ຄອບຄົວຂອງທ່ານ ຫຼີຢ່າວໄຫຼ ຢູ່ຕາແສງຖ້ວນຮ່າ, ເມືອງດັກຊອງ ໄດ້ມອບທີ່ດິນ 400m² ເພື່ອກໍ່ສ້າງສະໂມສອນຂອງໝູ່ບ້ານ ເດິ່ມຢໍ໋; ຜູ້ໃຫຍ່ບ້ານມາຣິນ, ລຸງ ບອນບູ ເປິໄຣ, ຕາແສງ ດັກ ເນິຢຣູງ, ເມືອງ ດັກຊອງ; ຄອບຄົວທ່ານ ດ໋ຽວ ເນິອຽນ, ບ້ານຊາປາ, ຕາແສງ ຖ້ວນອານ, ເມືອງ ດັກມິນ ໄດ້ມອບທີ່ດິນ 600m² ເພື່ອສ້າງຫຼັກໝາຍຊາຍແດນ... ບັນດາແບບຢ່າງກ້າຫານຂອງພະນັກງານ, ທະຫານ ແລະປະຊາຊົນ ທີ່ເຂົ້າຮ່ວມໃນການຈັບກຸມ ແລະປາບປາມ ອາດຊະຍາກອນ; ບັນດາຜູ້ອາສາສະໝັກຈາກຕາແສງຕ່າງໆ ໄດ້ຕັ້ງໜ້າໃນການເຂົ້າຮ່ວມການປ້ອງກັນຄວາມສະຫງົບ, ຄວາມປອດໄພຂອງຖະໜົນ, ປົກປ້ອງຄວາມສະຫງົບສຸກຂອງປະຊາຊົນ ໄດ້ຍົກສູງເປົ້າໝາຍແລະຄວາມໝາຍຂອງຂະບວນການ “ທົ່ວປວງຊົນສາມັກຄີກັນກໍ່ສ້າງຊີວິດວັດທະນະທຳ” ໃນການກໍ່ສ້າງພັດທະນາເສດຖະກິດ, ສັງຄົມ. ທ່ານ ຫງວຽນເຈືອງມິງຕ້ຽນ ຢູ່ເມືອງເຕິນຝູ, ນະຄອນໂຮ່ຈີມິນ ໄດ້ຮັບການຂະໜານນາມວ່າ “ອັດສະວິນ” ແຫ່ງທ້ອງຖະໜົນ ໄດ້ໄລ່ຈັບໂຈນຢ່າງກ້າຫານກວ່າ 600 ຄັ້ງ ແລະ ເປັນຕົວແທນດີເດັ່ນທີ່ເຂົ້າຮ່ວມ ກອງປະຊຸມສັນລະເສີນ ຂະບວນການແຂ່ງຂັນກັນຮັກຊາດທົ່ວປະເທດ. ທ້ອງຖິ່ນຕ່າງໆໄດ້ເອົາໃຈໃສ່ເປັນປະຈຳ ເຖິງການຍູ້ແຮງຂະບວນການ “ທົ່ວປວງຊົນສາມັກຄີກັນກໍ່ສ້າງຊີວິດວັດທະນະທຳ”; ຂະບວນການກໍ່ສ້າງຊົນນະບົດໃໝ່; ບັນດາວັນບຸນວັດທະນະທຳ, ກິລາພື້ນເມືອງຂອງທ້ອງຖິ່ນຕ່າງໆ ໄດ້ເຮັດໃຫ້ຊີວິດວັດທະນະທຳຈິດໃຈອຸດົມສົມບູນຂຶ້ນຕື່ມ, ວາງທິດທາງຄວາມງາມທີ່ດີສຳລັບຜູ້ຄົນ. ສູນວັດທະນະທຳ-ກິລາຂັ້ນຕ່າງໆ ໄດ້ພະຍາຍາມຊອກຫາບັນດາປະເພດຮູບແບບສິລະປະ ທີ່ສອດຄ່ອງກັບລະດັບຄວາມເພີດເພີນຂອງປະຊາຊົນ, ຈັດເທດສະການສິລະປະມະຫາຊົນ, ງານປະກວດ, ການສະແດງ, ການໂຄສະນາເກັ່ງເປັນປະຈຳ. ໂຄງການສິລະປະສະໝັກເຫຼັ້ນຫຼາຍໂຄງການ ໄດ້ດຶງດູດນັກສະແດງສະໝັກເຫຼັ້ນເປັນຈຳນວນຫຼາຍ ເຊິ່ງເປັນແກ່ນສານຂອງຂະບວນການສິລະປະ ວັດທະນະທຳຢູ່ຮາກຖານ; ບັນດາສະໂມສອນໄດ້ຮັບການຈັດຕັ້ງຂຶ້ນຕາມຄວາມມັກທີ່ຫຼາກຫຼາຍແລະອຸດົມສົມບຸນເຊັ່ນ ສະໂມສອນນັກກະວິ, ວັນນະຄະດີ, ມວຍ, ເຕັ້ນລຳ, ຖ່າຍພາບ, ບັນດາຊຸດຮຽນຕາມພອນສະຫວັນເຊັ່ນ ດົນຕີ, ຮ້ອງເພງ, ຟ້ອນ, ກາຍະກຳ, ກິລາ, ບັນດາກອງສິລະປະພື້ນເມືອງ ໄດ້ຮັບການສະໜັບສະໜູນເຂົ້າຮ່ວມຢ່າງຕັ້ງໜ້າ ຂອງປະຊາຊົນ ເຮັດໃຫ້ຂະບວນການມີເນື້ອໃນອຸດົມສົມບູນຂຶ້ນຕື່ມ.
ຜ່ານ 18 ປີແຫ່ງການຜັນຂະຫຍາຍປະຕິບັດ, ໃນທົ່ວປະເທດມີ 70 ສະຖາບັນວັດທະນະທຳລະດັບແຂວງ (ສູນວັດທະນະທຳ, ໂຮງວາງສະແດງ...); ໃນ 589 ເມືອງຂອງ 707 ຈຳນວນເມືອງທັງໝົດ ມີສູນວັດທະນະທຳ-ກິລາ ຫຼືໂຮງວັດທະນະທຳເມືອງ, ບັນລຸອັດຕາສ່ວນ 83,3%; ໃນ 6.102 ຕາແສງ, ຕົວເມືອງນ້ອຍຂອງ 11.027 ຈຳນວນຕາແສງ, ຕົວເມືອງນ້ອຍທັງໝົດ ມີສູນວັດທະນະທຳ-ກິລາ, ບັນລຸອັດຕາສ່ວນ 55,3% (ໃນສູນວັດທະນະທຳ-ກິລາ 6.102 ແຫ່ງທີ່ມີຢູ່ນັ້ນ, ມີ 30% ບັນລຸມາດຕະຖານຕາມການກຳນົດຂອງກະຊວງວັດທະນະທຳ, ກິລາແລະການທ່ອງທ່ຽວ); ໃນ 68.222 ບ້ານຂອງ 113.607 ຈຳນວນບ້ານທັງໝົດ ມີເຮືອນວັດທະນະທຳ, ບັນລຸອັດຕາສ່ວນ 60% (ໃນເຮືອນວັດທະນະທຳ 68.222 ແຫ່ງທີ່ມີຢູ່, ມີ 47% ບັນລຸມາດຕະຖານ ຕາມການກຳນົດຂອງກະຊວງວັດທະນະທຳ, ກິລາແລະການທ່ອງທ່ຽວ); ບັນດາສະຖາບັນວັດທະນະທຳພາຍໃຕ້ກະຊວງ, ຂະແໜງການ, ອົງຄະນະມະຫາຊົນລວມມີ: ໂຮງວັດທະນະທຳແຮງງານລະດັບແຂວງ 28 ແຫ່ງ, ໂຮງວັດທະນະທຳແຮງງານລະດັບເມືອງ 17 ແຫ່ງ ແລະ ໂຮງວັດທະນະທຳແຮງງານໃນວິສາຫະກິດຫຼາບກວ່າ 100 ແຫ່ງ; ຫໍ, ໂຮງເຍົາວະຊົນລະດັບແຂວງ 80 ແຫ່ງ, ຫໍ, ໂຮງເຍົາວະຊົນລະດັບເມືອງ, ໂຮງເຍົາວະຊົນຂອງຂະແໜງການ ແລະໂຮງເຍົາວະຊົນຂອງກອງທັບ, ຕຳຫຼວດປະຊາຊົນ 189 ແຫ່ງ.
ປັດໄຈທີ່ສຳຄັນໜຶ່ງທີ່ໄດ້ນຳມາເຊິ່ງກຳລັງແຮງຊີວິດ ແລະການພັດທະນາທີ່ແທ້ຈິງ ໃຫ້ແກ່ຂະບວນການແມ່ນ ບັນດາປັດໄຈແກນກາງ, ບັນດາປັດໃຈທີ່ກະຕືລືລົ້ນ ໄດ້ພະຍາຍາມຄົ້ນຫາ, ປະດິດສ້າງ ແລະເຕັມໃຈໃຫ້ແກ່ຊຸມຊົນ. ສິ່ງທີ່ດີໃຈແມ່ນ ບັນດາປັດໄຈດີເດັ່ນນີ້ ປະກົດຕົວນັບມື້ນັບຫຼາຍ ດ້ວຍຈິນຕະນາການປ່ຽນແປງໃໝ່, ປະດິດສ້າງ. ພວກເຂົາແມ່ນນິວເກຼຍທີ່ດີ ໃນການກໍ່ສ້າງຮູບແບບຕ່າງໆເຊັ່ນ ເຂດທີ່ຢູ່ອາໄສຄຸ້ມຄອງຕົນເອງ ກ່ຽວກັບຄວາມເປັນ ລະບຽບຮຽບຮ້ອຍ ໃນຕົວເມືອງແລະສຸຂະອະນາໄມ, ປະຊາຊົນທຸກຄົນສາມັກຄີກັນກໍ່ສ້າງຊົນນະບົດໃໝ່, ຕົວເມືອງສີວິໄລ, ກຸ່ມທີ່ຢູ່ອາໄສ “5 ບໍ່” (ບໍ່ມີຂີ້ເຫຍື້ອ, ບໍ່ມີຄວາມຊົ່ວຮ້າຍ, ບໍ່ມີຄອບຄົວທຸກຍາກ, ບໍ່ລຸກລ້ຳທາງເດີນ, ບໍ່ລະເມີດລະບຽບ), ຮູບແບບການຈັດຕັ້ງພື້ນທີ່ວັດທະນະທໍາທີ່ສ້າງສັນໃຫມ່ ຕິດກັບການອະນຸລັກ ແລະເສີມຂະຫຍາຍບັນດາມໍລະດົກວັດທະນະທຳ, ຮູບແບບການຕົກແຕ່ງທີ່ຢູ່ອາໄສທີ່ມີຊື່ “ປ່ຽນຫຼຸມຂີ້ເຫຍື້ອເປັນສວນດອກໄມ້”, ຮູບແບບພິທີແຕ່ງດອງບໍ່ເຊີນແຂກຫຼາຍກວ່າ 300 ຄົນ, ພິທີແຕ່ງດອງບໍ່ໃຊ້ຢາສູບ, ຂະບວນການດຳລົງຊີວິດສີຂຽວ... ຈາກຜົນສຳເລັດຂອງບັນດາຂະບວນການ, ປະຊາຊົນຢູ່ຫຼາຍທ້ອງຖິ່ນຍັງຢາກຈະສືບຕໍ່ຜັນຂະຫຍາຍຮູບແບບ “6 ບໍ່”, “7 ບໍ່”, ເພີ່ມເຕີມບັນດາມາດຕະຖານໃໝ່ ເພື່ອຍົກສູງຄຸນນະພາບຊີວິດ.
ເພື່ອໃຫ້ມີຜົນງານທີ່ດີໃນຂະບວນການ “ທົ່ວປວງຊົນສາມັກຄີກັນກໍ່ສ້າງຊີວິດວັດທະນະທຳ”, ວຽກງານໂຄສະນາຂົນຂວາຍໃຫ້ ປະຊາຊົນຂຶ້ນທະບຽນນາມມະຍົດວັດທະນະທຳ ໄດ້ຮັບການຍູ້ແຮງໃນເວລາທີ່ຜ່ານມາ. ດ້ວຍຄວາມຮັກແພງແລະຜູກພັນສະໜິດແໜ້ນກັບບ່ອນທີ່ຕົນຢູ່ອາໄສ, ເລຂາໜ່ວຍພັກ, ຫົວໜ້າຄະນະປະຕິບັກງານແນວໂຮມ, ຫົວໜ້າຄຸ້ມຖະໜົນ ຫຼືຕົວແທນຂອງຄອບຄົວວັດທະນະທຳທີ່ດີເດັ່ນ ໄດ້ຕັ້ງໜ້າເປັນແບບຢ່າງ, ຂົນຂວາຍປະຊາຊົນ ພ້ອມກັນເຂົ້າຮ່ວມຂະບວນການກໍ່ສ້າງຊີວິດວັດທະນະທຳ. ເພາະສະນັ້ນ, ໃນວິວັດການຊີ້ນຳຍົກສູງຄຸນະພາບ, ປະສິດທິຜົນຂອງຂະບວນການ, ຄະນະຊີ້ນຳສູງກາງຂະບວນການ “ທົ່ວປວງຊົນສາມັກຄີກັນກໍ່ສ້າງຊີວິດວັດທະນະທຳ” ໄດ້ເນັ້ນໜັກເຖິງທິດທາງທີ່ວ່າ ບັນດາຮູບແບບທີ່ດີ, ບັນດາປັດໄຈທີ່ໂດດເດັ່ນ ຕ້ອງໄດ້ຮັບການຂະຫຍາຍກວ້າງ.
ໃນເວລາທີ່ຜ່ານມາ, ຫຼາຍທ້ອງຖິ່ນໃນທົ່ວປະເທດໄດ້ຕັ້ງໜ້າ, ເປັນເຈົ້າການໃນການຜັນຂະຫຍາຍປະຕິບັດ ບັນດາເນື້ອໃນໃໝ່ຂອງຂະບວນການ ທີ່ໄດ້ກຳນົດໄວ້ໃນດຳລັດເລກທີ 122/2018/NĐ-CP, ລົງວັນທີ 17 ກັນຍາ 2018, ຂອງລັດຖະບານ, ກຳນົດກ່ຽວກັບການພິຈາລະນາມອບນາມມະຍົດ “ຄອບຄົວວັດທະນະທຳ”; “ບ້ານວັດທະນະທຳ”, “ໝູ້ບ້ານວັດທະນະທຳ”, “ຄຸ້ມຖະໜົນວັດທະນະທຳ” ໃຫ້ມັນເຂົ້າສູ່ຊີວິດໂດຍໄວ. ຄະນະຊີ້ນຳຂະບວນການ “ທົ່ວປວງຊົນສາມັກຄີກັນກໍ່ສ້າງຊີວິດວັດທະນະທຳ” ຂອງແຂວງ ໄດ້ຜັນຂະຫຍາຍປະຕິບັດຢ່າງມີປະສິດທິຜົນ ກ່ຽວກັບບັນດາເອກະສານຊີ້ນຳ, ແນະນະຂອງຄະນະຊີ້ນຳສູນກາງ, ໂດຍສະເພາະແມ່ນ ພາຍຫຼັງທີ່ລັດຖະບານປະກາດໃຊ້ດຳລັດເລກທີ 122/2018/NĐ-CP ແລະບັນດາເອກະສານຊີ້ນຳການຜັນຂະຫຍາຍປະຕິບັດ ຂອງກະຊວງວັດທະນະທຳ, ກິລາແລະການທ່ອງທ່ຽວ. ຄະນະຊີ້ນຳຂອງແຂວງໄດ້ອອກເອກະສານແນະນຳການປະຕິບັດ ການພິຈາລະນາມອບ ນາມມະຍົດວັດທະນະທຳແຕ່ປີ 2019 ຕາມດຳລັດສະບັບໃໝ່. ແຂວງຮຶງອຽນ ແມ່ນແຂວງທຳອິດທີ່ໄດ້ວາງແຜນການຝຶກອົບຮົມການຜັນຂະຫຍາຍດຳລັດຈົນເຖິງບ້ານ; ຈັດພິມໃບປິວ, ປຶ້ມພັບກ່ຽວກັບມາດຕະຖານການຮັບຮູ້ນາມມະຍົດຄອບຄົວວັດທະນະທຳ ແລະ ແຈກຈ່າຍໃຫ້ຄອບຄົວໃນທົ່ວແຂວງ; ກ່ຽວກັບລະບຽບການ ໃນການຈັດຕັ້ງປະຕິບັດວິຖີຊີວິດທີ່ມີຄວາມສີວິໄລ ໃນງານແຕ່ງດອງ, ງານສົບ, ງານບຸນຕ່າງໆ. ຢູ່ທ້ອງຖິ່ນຕ່າງໆ, ຜົນງານທີ່ໂດດເດັ່ນໃນການຍົກສູງຄຸນນະພາບ ຂອງຂະບວນການແມ່ນ ການກວດກາແລະປະເມີນຜົນ ຂອງກິດຈະກຳການເຄື່ອນໄຫວ ຂອງຂະບວນການ ຢ່າງສະໝ່ຳສະເໝີແລະເປັນໄລຍະ, ຈາກນັ້ນ ໄດ້ຄົ້ນເຜີຍຂໍ້ຈຳກັດຢ່າງທັນການ ແລະວາງມາດຕະການແກ້ໄຂ, ພ້ອມກັນນັ້ນກໍຄົ້ນເຜີຍປັດໄຈໃໝ່, ແບບຢ່າງດີເດັ່ນ ເພື່ອສັນລະເສີນ ແລະຂະຫຍາຍກວ້າງ.
ສິ່ງທີ່ດີໃຈແມ່ນ ຂະບວນການ “ທົ່ວປວງຊົນສາມັກຄີກັນກໍ່ສ້າງຊີວິດວັດທະນະທຳ” ບໍ່ພຽງແຕ່ໄດ້ສ້າງການປ່ຽນແປງທີ່ຕັ້ງໜ້າ ໃນຊີວິດວັດທະນະທຳຢູ່ເຂດທີ່ຢູ່ອາໄສ, ໃນສຳນັກງານອົງການເທົ່ານັ້ນ ແຕ່ຍັງເປັນເນື້ອໃນທີ່ໄດ້ຮັບຄວາມເອົາໃຈໃສ່ ຂອງຫຼາຍຂະແໜງການອື່ນອີກ, ໂດຍສະເພາະແມ່ນໃນກອງທັບ. ໃນຫຼາຍປີທີ່ຜ່ານມາ, ກົດໃຫຍ່ການເມືອງກອງທັບປະຊາຊົນຫວຽດນາມ, ສະມາຊິດຄະນະຊີ້ນຳສູນກາງຂະບວນການ “ທົ່ວປວງຊົນສາມັກຄີກັນກໍ່ສ້າງຊີວິດວັດທະນະທຳ” ໄດ້ມີຫຼາຍມາດຕະການຊີ້ນຳ, ແນະນຳກອງທັບທັງໝົດ ປະຕິບັດການກໍ່ສ້າງສິ່ງແວດລ້ອມວັດທະນະທຳທີ່ດີງາມ, ສົດໃສ, ອຸດົມສົມບູນໃນກອງທັບ, ປະກອບສ່ວນປະຕິບັດຂະບວນການ “ທົ່ວປວງຊົນສາມັກຄີກັນກໍ່ສ້າງຊີວິດວັດທະນະທຳ” ດ້ວຍທິດນຳ “ສະຖານທີ່ຕັ້ງທັບແຕ່ລະແຫ່ງເປັນຈຸດສະຫວ່າງທາງວັດທະນະທຳ”. ຊາບຊຶມເນື້ອໃນນີ້, ຫຼາຍກົມກອງທະຫານໃນທ້ອງຖິ່ນຕ່າງໆ ໄດ້ມີຮູບແບບທີ່ດີ, ມີວິທີປະດິດສ້າງສະເພາະ, ສອດຄ່ອງກັບເງື່ອນໄຂພິເສດຂອງທ້ອງຖິ່ນ ເພື່ອຜັນຂະຫຍາຍຂະບວນການຢ່າງມີປະສິດທິຜົນ, ຕົວຢ່າງເຊັ່ນ ກຳລັງປະກອບອາວຸດແຂວງ ບ່າເຣ້ຍ-ຫວຸງເຕົ່າ ໄດ້ຜັນຂະຫຍາຍການເຄື່ອນໄຫວທີ່ແທດຈິງ ແນໃສ່ຍົກສູງຄຸນນະພາບການໂຄສະນາ, ເຜີຍແຜ່ວ, ຊາບຊຶມແນວທາງ, ແຜນນະໂຍບາຍຂອງພັກ, ນະໂຍບາຍ ກົດໝາຍຂອງລັດ ກ່ຽວກັບສາສະໜາ ໃຫ້ພະນັກງານ ນັກຮົບ; ຂົນຂວາຍພີ່ນ້ອງຮ່ວມຊາດທີ່ຖືສາສະໜາ ໃຫ້ປະຕິບັດຂະບວນ ການແຂ່ງຂັນກັນຮັກຊາດ, ມີຊີວິດທີ່ດີຕາມສາສະໜາທີ່ດີງາມ, ກໍ່ສ້າງກຸ່ມມະຫາສາມັກຄີປວງຊົນທັງຊາດ, ກໍ່ສ້າງວິຖີຊີວິດໃໝ່ໃນເຂດທີ່ຢູ່ອາໄສ...ຮູບແບບການເຜີຍແຜ່ຄວາມຮູ້ກ່ຽວກັບການປ້ອງກັນຊາດ ປ້ອງກັນຄວາມສະຫງົບ ໃຫ້ແກ່ພະສົງແລະຈົວທີ່ວັດຕ່າງໆໃນແຂວງ ບ່າເຣ້ຍ-ຫວູງເຕົ່າ ເຊິ່ງໄດ້ປະເມີນວ່າ ເປັນວິທີທີ່ປະດິດສ້າງ ມີປະສິດທິຜົນ, ເພື່ອແນໃສ່ປະກອບສ່ວນແທ້ຈິງ ເຂົ້າໃນການກໍ່ສ້າງຊີວິດວັດທະນະທຳ ໃນເຂດທີ່ຢູ່ອາໄສ. ວຽກງານເຫຼົ່ານີ້ໄດ້ສ້າງຄວາມເຊື່ອໝັ້ນ, ບ່ອນອີງທີ່ໄວ້ວາງໃຈໄດ້ ໃນພີ່ນ້ອງຮ່ວມຊາດຊາວສາສະໜາ ຢູ່ທ້ອງຖິ່ນ, ປະກອບສ່ວນກໍ່ສ້າງແລະປັບປຸງພື້ນຖານການປ້ອງກັນປະເທດທົ່ວປວງຊົນ, ຮັກສາຄວາມໝັ້ນຄົງທາງການເມືອງຢູ່ທ້ອງຖິ່ນ.
ສືບຕໍ່ຍົກສູງຄຸນນະພາບ, ປະສິດທິຜົນຂອງຂະບວນການ ສອດຄ່ອງກັບສະພາບການໃໝ່
ຄຽງຄູ່ກັບການປ່ຽນແປງໃໝ່ໃນທາງບວກ, ໃນພາກປະຕິບັດຕົວຈິງ, ຍັງມີບັນຫາທີ່ເກີດຂຶ້ນ, ຕ້ອງມີວິທີແກ້ຢ່າງທັນການ ເພື່ອໃຫ້ຂະບວນການເປັນພື້ນຖານ, ກຳລັງໜູນທີ່ຊຸກຍູ້ການພັດທະນາເສດຖະກິດ-ສັງຄົມ ຂອງປະເທດຊາດ ໃນສະພາບການປະຈຸບັນ.
ສະພາບຄວາມເປັນຈິງໃນໄລຍະທີ່ຜ່ານມາໃຫ້ເຫັນວ່າ ນາມມະຍົດວັດທະນະທຳຫຼາຍປະເພດໄດ້ຖືກມອບຢ່າງຫຼວງຫຼາຍ, ຢູ່ບາງແຫ່ງ ຄຸນນະພາບຂອງຂະບວນການບໍ່ສູງ ໜັກໄປທາງຮູບນອກ, ຂາດລວງເລິກ; ການປະຕິບັດຂໍ້ກຳນົດກ່ຽວກັບວິຖີຊີວິດທີ່ມີຄວາມສີວິໄລໃນງານແຕ່ງດອງ, ງານສົບ, ງານບຸນ ຢູ່ບາງແຫ່ງ ບໍ່ບັນລຸປະສິດທິຜົນຕາມຄວາມຫວັງ. ເພື່ອຍົກສູງຄຸນນະພາບຂອງຂະບວນການຍິ່ງກວ່າອີກ, ຄະນະຊີ້ນຳສູນການຂະບວນການ “ທົ່ວປວງຊົນສາມັກຄີກັນກໍ່ສ້າງຊີວິດວັດທະນະທຳ” ໄດ້ຊາບຊຶມແລະຮຽກຮ້ອງ ໃຫ້ບັນດາທ້ອງຖິ່ນ ຕ້ອງປະຕິບັດການພິຈາລະນາຄັດເລືອກແລະມອບນາມມະຍົດວັດທະນະທຳ ຢ່າງເຂັ້ມງວດ ຕາມຈິດໃຈຂອງດຳລັດເລກທີ 122/2018/NĐ-CP, ລົງວັນທີ 17 ກັນຍາ 2018, ຂອງລັດຖະບານ, ກຳນົດກ່ຽວກັບການພິຈາລະນາມອບນາມມະຍົດ “ຄອບຄົວວັດທະນະທຳ”, “ບ້ານວັດທະນະທຳ”, “ໝູ່ບ້ານວັດທະນະທຳ”, “ຄຸ້ມຖະໜົນວັດທະນະທຳ”. ໃນບັນດາໂຄງການກວດກາການປະຕິບັດຂະບວນການຢູ່ທ້ອງຖິ່ນຕ່າງໆ, ຄະນະຊີ້ນຳສູນກາງຂະບວນການ “ທົ່ວປວງຊົນສາມັກຄີກັນກໍ່ສ້າງຊີວິດວັດທະນະທຳ” ໄດ້ໃຫ້ຄວາມສົນໃຈວ່າ ຕ້ອງນຳເອົາເນື້ອໃນ ຄວາມຕ້ອງການໃໝ່ ຂອງຂະບວນການ ເຂົ້າສູ່ຊີວິດໂດຍໄວ, ໃນນັ້ນ ເອົາໃຈໃສ່ເປັນພິເສດເຖິງການຍົກສູງຄຸນນະພາບ ຂອງບັນດານາມະຍົດເວົ້າລວມ, ນາມະຍົດຄອບຄົວວັດທະນະທຳ ເວົ້າສະເພາະ. ການພິຈາລະນາຄັດເລືອກ ຕ້ອງໄດ້ປະຕິບັດອີງບົນພື້ນຖານຄວາມສະໝັກໃຈ ແລະພຽງແຕ່ພິຈາລະນາມອບໃຫ້ເມື່ອຄອບຄົວ, ເຂດທີ່ຢູ່ອາໄສຊຸມຊົນ ມີການຈົດທະບຽນເຂົ້າຮ່ວມ; ຜ່ານນັ້ນ, ຢຸດຕິການພິຈາລະນະຄັດເລືອກ ມອບນາມະຍົດຢ່າງຫຼວງຫຼາຍ. ພຽງແຕ່ເມື່ອຮູ້ຢ່າງຖືກຕ້ອງ ກ່ຽວກັບເນື້ອແທ້ຂອງນາມມະຍົດວັດທະນະທຳເທົ່ານັ້ນ ປະຊາຊົນຈຶ່ງເຂົ້າໃຈຄວາມໝາຍທີ່ແທ້ຈິງ ເຊິ່ງບັນດາຂະບວນການວັດທະນະທຳ ນຳມາໃຫ້ຊີວິດຂອງຕົນ.
ຄວາມຫຍຸ້ງຍາກ, ສິ່ງທ້າທາຍທີ່ເຫັນແຈ້ງຕໍ່ການພັດທະນຂອງຂະບວນການໃນໄລຍະປະຈຸບັນແມ່ນ ດ້ານລັບຂອງເສດຖະກິດຕະຫຼາດທີ່ພວມກະທົບໃສ່ຄຸນສົມບັດ, ແບບແຜນດຳລົງຊີວິດ; ປະຊາຊົນສ່ວນໜຶ່ງ, ໂດຍສະເພາະແມ່ນ ຜູ້ໜຸ່ມນ້ອຍເມີນເສີຍ, ບໍ່ສົນໃສຕໍ່ຄວາມເຈັບປວດ, ການສູນເສຍ, ຕໍ່ສະພາບຄວາມຫຍຸ້ງຍາກຂອງຜູ້ອື່ນ ເຊິ່ງເຮັດໃຫ້ສັງຄົມແຄ້ນເຄືອງ... ບັນຫາການກໍ່ສ້າງຊີວິດວັດທະນະທຳ, ສິ່ງແວດລ້ມວັດທະນະທຳໃນສະພາບການໃໝ່, ຮັບປະກັນຄວາມກົມກຽວກັບການພັດທະນາເສດຖະກິດ-ສັງຄົມ ພວມໄດ້ວາງອອກຢ່າງຮີບດ່ວນ. ສຳລັບການກໍ່ສ້າງຜູ້ຄົນ, ໜ້າທີ່ທີ່ສຳຄັນແມ່ນ ສ້າງໃຫ້ມີສິ່ງແວດລ້ອມວັດທະນະທຳທີ່ສົດໃສ. ອັນນັ້ນຈະເປັນປັດໄຈສຳຄັນ ໃນການສ້າງຜູ້ຄົນທີ່ມີຄວາມກ້າຫານ, ມີຄຸນສົມບັດຄົບຖ້ວນ ສຳລັບການພັດທະນາປະເທດຢ່າງຍືນຍົງ. ໃນຊຸມປີທີ່ຜ່ານມາມໍ່ນີ້, ຂະບວນການມີປະກົດການບາງຢ່າງ ທີ່ເຮັດໃຫ້ເກີດຄວາມກັງວົນທາງສັງຄົມ. ເຖິງວ່າຕົວເລກສະຖິຕິໃຫ້ເຫັນວ່າ ຫຼາຍກວ່າ 90%, ຊ້ຳບໍ່ໜຳເກືອບ 100% ຈຳນວນຄອບຄົບ, ຄຸ້ມຖະໜົນ ໄດ້ຮັບນາມມະຍົດວັດທະນະທຳ ແຕ່ຄວາມເປັນຈິງທາງສັງຄົມພັດບໍ່ໃຫ້ເຫັນແຜ່ນພາບທີ່ສົດໃສຄືແນວນັ້ນ. ຜົນທີ່ຕາມມາຍັງຈະອັນຕະລາຍກວ່ານັ້ນເມື່ອນາມມະຍົດກາຍເປັນ “ຜົນທາງລົບ” ຍ້ອນຜູ້ໄດ້ຮັບນາມມະຍົດບໍ່ສົມທີ່ຈະໄດ້ຮັບ, ຈາກນັ້ນ, ມັນເປັນຜົນກະທົບເຖິງຄວາມເຊື່ອໝັ້ນລວມ ຂອງສັງຄົມຕໍ່ຂະບວນການ. ດ້ວຍບັນດາເນື້ອໃນທີ່ກຳນົດຢ່າງແໜ້ນແຟ້ນໃນດຳລັດເລກທີ 122/2018/NĐ-CP, ການພິຈາລະນາມອບນາມມະຍົດວັດທະນະທຳ ຈະຮັບປະກັນຄຸນນະພາບ, ສ້າງກຳລັງໜູນໃໝ່ ເພື່ອໃຫ້ປະຊາຊົນຮ່ວມແຮງກັນ ກໍ່ສ້າງສິ່ງແວດລ້ອມວັດທະນະທຳ, ຈາກນັ້ນ ສ້າງເງື່ອນໄຂພັດທະນາຜູ້ຄົນຫວຽດນາມ, ຕອບສະໜອງຄວາມຕ້ອງການພັດທະນາປະເທດຢ່າງຍືນຍົງໃນໄລຍະໃໝ່.
ໃນກອງປະຊຸມສະຫຼຸບຂະບວນການ “ທົ່ວປວງຊົນສາມັກຄີກັນກໍ່ສ້າງຊີວິດວັດທະນະທຳ” ໄລຍະປີ 2000-2018, ນາຍົກລັດຖະມົນຕີ ຫງວຽນຊວັນຝຸກ ຊີ້ນຳ, ຕ້ອງຄົ້ນຄວ້າປ່ຽນແປງໃໝ່ເນື້ອໃນ, ແບບວິທີການເຄື່ອນໄຫວ ຕາມທິດແທ້ຈິງ, ມີປະສິດທິຜົນ, ໃກ້ກັບຄວາມເປັນຈິງ, ມີຈຸກໜັກໃຈກາງ ເພື່ອສືບຕໍ່ພັດທະນາຂະບວນການເຂົ້າສູ່ລວງເລິກ, ຍົກສູງຄຸນນະພາບ, ປະສິດທິຜົນຂອງຂະບສນການ “ທົ່ວປວງຊົນສາມັກຄີກັນກໍ່ສ້າງຊີວິດວັດທະນະທຳ” ໃນສະພາບການໃໝ່ປະຈຸບັນ.
ມະຕິສະບັບທີ 33/NQ-TW, ລົງວັນທີ 9 ມິຖຸນາ 2014, ຂອງກອງປະຊຸມສູນກາງພັກຄັ້ງທີ 9 ສະໄໝທີ XI, ກ່ຽວກັບ “ການກໍ່ສ້າງແລະພັດທະນາວັດທະນະທຳ, ຜູ້ຄົນຫວຽດນາມ ຕອບສະໜອງຄວາມຕ້ອງການ ຂອງການພັດທະນາປະເທດຢ່າງຍືນຍົງ” ໄດ້ວາງໜ້າທີ່ກໍ່ສ້າງຊີວິດວັດທະນະທຳໃນເຂດທີ່ຢູ່ອາໄສ, ສຳນັກງານອົງການ, ວິສາຫະກິດໃຫ້ມີຄວາມສາມັກຄີ, ປະຊາທິປະໄຕ, ສີວິໄລ, ບັນລຸມາດຕະຖານທີ່ແທ້ຈິງທາງດ້ານວັດທະນະທຳ, ປະຕິບັດກົດລະບຽບປະຊາທິປະໄຕຢູ່ຮາກຖານຢ່າງດີ, ກໍ່ສ້າງແບບຊີວິດວັດທະນະທຳທີ່ກ້າວໜ້າແລະສີວິໄລ, ໂດຍສະເພາະແມ່ນ ໃນງານແຕ່ງດອງ, ງານສົບ, ງານບຸນ; ຍົກສູງຄຸນນະພາບແລະປະສິດທິຜົນ ຂອງການຂົນຂວາຍວັດທະນະທຳ, ຂະບວນການ “ທົ່ວປວງຊົນສາມັກຄີກັນກໍ່ສ້າງຊີວິດວັດທະນະທຳ”.
ສະພາບການໃໝ່, ໂດຍສະເພາະແມ່ນການກະທົບຈາກບັນດາຄຸນຄ່າໃໝ່ ທັນສະໄໝຂອງການປະຕິວັດອຸດສາຫະກຳຄັ້ງທີສີ່ ຮຽກຮ້ອງໃຫ້ການປະຕິບັດຂະບວນການຕ້ອງມີການຄົ້ນຄວ້າ, ຕີລາຄາສະພາບການ ເພື່ອວາງມາດຕະການແກ້ໄຂ.
ທີໜຶ່ງ, ລະດົມບັນດາກຳລັງ ແລະລະບົບການເມືອງທັງໝົດ ໃຫ້ເຂົ້າຮ່ວມຂະບວນການ “ທົ່ວປວງຊົນສາມັກຄີກັນກໍ່ສ້າງຊີວິດວັດທະນະທຳ” ຢ່າງຕັ້ງໜ້າ. ເພີ່ມທະວີການປ່ຽນແປງໃໝ່ ວຽກງານການໂຄສະນາ ເພື່ອແນໃສ່ສ້າງຄວານປ່ຽນແປງຄວາມຮັບຮູ້ຢູ່ໃນຄະນະພັກ, ອຳນາດການປົກຄອງ ແລະຂະແໜງການທຸກຂັ້ນ, ຢູ່ໃນສຳນັກງານອົງການຂອງລັດຈົນເຖິງໃນສັງຄົມ, ໃນພະນັກງານສະມາຊິກພັກ ຈົນເຖິງປະຊາຊົນທຸກຊັ້ນວັນນະ, ກ່ຽວກັບບົດບາດ ທີ່ຕັ້ງຂອງວັດທະນະທຳ ແລະ ປັດໄຈມະນຸດ ສຳລັບພາລະກິດການຫັນເປັນອຸດສາຫະກຳ ທັນສະໄໝ, ກໍ່ສ້າງແລະປົກປັກຮັກສາປະເທດຊາດ ກໍ່ຄືການຍົກສູງຄວາມຮັບຮູ້ ແລະຄວາມຕື່ນຕົວສະໝັກໃຈ ຂອງຊຸມຊົນ, ການເສີມຂະຫຍາຍ ບົດບາດເປັນເຈົ້າການ ຕັ້ງໜ້າ ປະດິດສ້າງຂອງປະຊາຊົນ ໃນການກໍ່ສ້າງຊີວິດວັດທະນະທຳ ຢູ່ຮາກຖານ.
ທີສອງ, ສືບຕໍ່ປັບປຸງລະບົບກົດໝາຍກ່ຽວກັບວັດທະນະທຳ ແລະການກໍ່ສ້າງຊີວິດວັດທະນະທຳ; ສືບຕໍ່ຍູ້ແຮງການຜັນຂະຫຍາຍປະຕິບັດ ດຳລັດເລກທີ 122/2018/NĐ-CP, ລົງວັນທີ 17 ກັນຍາ 2018, ຊອງລັດຖະບານ ເຊິ່ງເປັນແລວທາງກົດໝາຍທີ່ສຳຄັນ ເພື່ອຍົກສູງຄຸນນະພາບ ຂອງການກໍ່ສ້າງບັນດານາມມະຍົດວັດທະນະທຳ. ຈັດຕັ້ງຢ່າງດີ ການພິຈາລະນາໃຫ້ຄວາມເຫັນ, ການຮັບຮູ້, ການຍ້ອງຍໍ, ການໃຫ້ລາງວັນ ກ່ຽວກັບຄອບຄົວວັດທະນະທຳ ຮັບປະກັນຄວາມເປີດເຜີຍ, ປະຊາທິປະໄຕ ບັນລຸປະສິດທິຜົນແທ້ຈິງ, ຜ່ານຜ່າ “ພະຍາດຮູບນອກ” ຂາດຄວາມເລິກເຊິ່ງ. ສືບຕໍ່ຍູ້ແຮງການກໍ່ສ້າງບ້ານ (ບ້ານ, ໝູ່ບ້ານ, ຄຸ້ມຖະໜົນ) ວັດທະນະທຳ; ກໍ່ສ້າງຕາແສງບັນລຸມາດຕະຖານວັດທະນະທຳຊົນນະບົດໃໝ່; ກໍ່ສ້າງຄຸ້ມເມືອງ, ຕົວເມືອງນ້ອຍ ບັນລຸມມາດຕະຖານຕົວເມືອງສີວິໄລ. ຍົກສູງຄວາມສາມາດຄຸ້ມຄອງຕົນເອງ ແລະສະຕິຮັບຜິດຊອບຊຸມຊົນ ໃນການຮັກສານາມມະຍົດວັດທະນະທຳໄວ້ໃຫ້ໝັ້ນຄົງ.
ທີສາມ, ສືບຕໍ່ເລືອກເອົາບາງວຽກງານລະອຽດ ເພື່ອສຸມໃສ່ເຮັດໃຫ້ມີການປ່ຽນແປງ ແລະມີແຮງແຜ່ກະຈາຍໃນຊີວິດວັດທະນະທຳຊຸມຊົນ. ປ່ຽນແປງໃໝ່ ວຽກງານປະເມີນຂະບວນການ “ທົ່ວປວງຊົນສາມັກຄີກັນກໍ່ສ້າງຊີວິດວັດທະນະທຳ”, ບໍ່ພຽງແຕ່ອີງໃສ່ຕົວເລກ, ອັດຕາສ່ວນເທົ່ານັ້ນ ແຕ່ຍັງຕ້ອງອີງໃສ່ການປະເມີນຄ່າສະເພາະ... ເປັນເຈົ້າການໃນການຊຸກຍູ້, ກວດກາ, ຄົ້ນເຜີຍ ແລະແກ້ໄຂ ຂໍ້ຈຳກັດຢ່າງທັນການ... ຄຽງຂ້າງນັ້ນ, ຄະນະຊີ້ນຳສູນກາງຂະບວນການ “ທົ່ວປວງຊົນສາມັກຄີກັນກໍ່ສ້າງຊີວິດວັດທະນະທຳ” ສ້າງແຜນການປະສານງານກັບບັນດາກະຊວງ, ຂະແໜງການສູນກາງ ແລະທ້ອງຖິ່ນ ເພື່ອຜັນຂະຫຍາຍວຽກງານ; ປ່ຽນແປງໃໝ່ເນື້ອໃນ, ແບບວິທີການເຄື່ອນໄຫວວັດທະນະທຳ ຕາມທິດທາງແທດກັບຄວາມຈິງ, ມີປະສິດທິຜົນ, ມີຈຸດໜັກໃຈກາງ. ຈັດຕັ້ງການກວດກາ, ປະເມີນການເຄື່ອນໄຫວຂອງຄະນະຊີ້ນຳຂັ້ນຕ່າງໆ ແລະ ປະເມີນວຽກງານການຜັນຂະຫຍາຍປະຕິບັດຢູ່ທ້ອງຖິ່ນແລະຮາກຖານ, ຈັດການສະຫຼຸບຂະບວນການເປັນໄລຍະ ຈາກນັ້ນຖອດຖອນບົດຮຽນປະສົບການ; ສ້າງກົນໄກ, ນະໂຍບາຍທີ່ເໝາະສົມ; ວາງກຳນົດເປົ້າໝາຍ, ມາດຕະການ ເພື່ອພັດທະນາຂະບວນການໃນໄລຍະຕໍ່ໄປ.
ທີສີ່, ຍົກສູງປະສິດທິຜົນຂອງຂະບວນການ “ທົ່ວປວງຊົນສາມັກຄີກັນກໍ່ສ້າງຊີວິດວັດທະນະທຳ” ດ້ວຍການສ້າງແຮງແຜ່ກະຈາຍ ຈາກບັນດາຮູບແບບທີ່ດີເດັ່ນ, ດ້ວຍບັນດາຄຸນຄ່າມະນຸດອະລິຍະທຳຫຼັກເຊັ່ນ ແບບຢ່າງຂອງເລຂາໜ່ວຍພັກ, ຫົວໜ້າຄະນະປະຕິບັດງານແນວໂຮມ, ຫົວໜ້າຄຸ້ມຖະໜົນ ຫຼືຕົວແທນຄອບຄົວວັດທະນະທຳ; ມີລະບອບຄ່າຕອບແທນທີ່ເໝາະສົມ ເພື່ອສ້າງກຳລັງໜູນ ຊຸກຍູ້ບຸກຄົນທີ່ດີເດັ່ນເຫຼົ່ານັ້ນ ສືບຕໍ່ປະກອບສ່ວນໃຫ້ຊຸມຊົນ. ເອົາບັນດາໜ້າທີ່ຂອງຂະບວນການແຊກຊ້ອນເຂົ້າໃນບັນດາຂະບວນການແຂ່ງຂັນກັນຮັກຊາດອື່ນ ຂອງບັນດາຄະນະ, ຂະແໜງການ, ອົງຄະນະມະຫາຊົນ; ເຊື່ອມຕິດຢ່າງແໜ້ນແຟ້ນກັບການກໍ່ສ້າງຊົນນະບົດໃໝ່, ລະດົມທຸກແຫຼ່ງກຳລັງ ແລະສຸມໃສ່ລົງທຶນໃນວັດທະນະທຳ ໃຫ້ທຽບເທົ່າກັບການລົງທຶນໃນຂົງເຂດອື່ນ, ສ້າງທ່ວງທ່າໃຫ້ແກ່ການພັດທະນາວັດທະນະທຳ.
ທີຫ້າ, ຍົກສູງຄຸນນະພາບຂອງຖັນແຖວພະນັກງານທີ່ເຮັດວຽກງານວັດທະນະທຳຢູ່ຮາກຖານ. ຍົກສູງປະສິດທິຜົນ ຂອງການປະສານງານ ລະຫວ່າງຂະແໜງການ ໃນການຜັນຂະຫຍາຍ, ປະຕິບັດຂະບວນການ “ທົ່ວປວງຊົນສາມັກຄີກັນກໍ່ສ້າງຊີວິດວັດທະນະທຳ”; ສະມາຊິກແຕ່ລະຄົນຂອງຄະນະຊີ້ນຳທີ່ຮັບຜິດຊອບພື້ນທີ່ ຈະຕ້ອງເພີ່ມທະວີການຕິດຕາມກວດກາ ແລະ ຊຸກຍູ້ການປະຕິບັດຂະບວນການ.
ທີຫົກ, ຍູ້ແຮງວຽກງານສຶກສາອົບຮົມຄຸນສົມບັດ, ແບບແຜນດຳລົງຊີວິດໃນຄອບຄົວ ແລະ ການກໍ່ສ້າງວັດທະນະທຳໃນສຳນັກງານ. ຈັດຕັ້ງການປະຕິບັດຢ່າງມີປະສິດທິຜົນ ວຽກງານຄອບຄົວແລະສຶກສາອົບຮົມຄຸນສົມບັດ, ແບບແຜນດຳລົງຊີວິດຄອບຄົວ, ມຸ່ງໄປສູ່ການສ້າງວັດທະນະທຳການປະພຶດແລະການສື່ສານທີ່ມີອາລະຍະທຳ ໃນແຕ່ລະຄອບຄົວ, ສາຍຕະກຸນ, ຊຸມຊົນທີ່ຢູ່ອາໄສ ແລະ ໃນສຳນັກງານ, ສ້າງການປ່ຽນແປງທີ່ດີໃນວັດທະນະທຳ, ປະກອບສ່ວນທີ່ສຳຄັນເຂົ້າໃນການພັດທະນາຂອງສັງຄົມ./.
---------------------------
ບົດນີ້ໄດ້ລົງພິມໃນວາລະສານກອມມູນິດ ສະບັບທີ 939 (ເດື່ອນເມສາ 2020)
