ສະຖານະການໂລກ ແລະ ການຜັນຂະຫຍາຍແນວທາງການຕ່າງປະເທດ ຂອງພັກກອມມູນິດຫວຽດນາມ
ວ.ກ. ອອນໄລ - ໃນປີ 2012, ການທູດຫວຽດນາມ ໄດ້ຜັນຂະຫຍາຍການເຄື່ອນໄຫວຢ່າງຕັ້ງໜ້າ, ຮອບດ້ານ ແລະ ບັນລຸໝາກຜົນອັນສຳຄັນຫຼາຍຢ່າງ, ປະກອບສ່ວນຍົກສູງບົດບາດຖານະ ແລະ ອິດທິພົນຂອງຫວຽດນາມ ໃນເວທີໂລກ.
ສະຫາຍຟ້າມບິ່ງມິງ, ກຳມະການສູນກາງພັກ, ລັດຖະມົນຕີວ່າການກະຊວງການຕ່າງປະເທດ - ແຫຼ່ງ: vnexpress.net
ໂດຍປະຕິບັດແນວທາງການຕ່າງປະເທດ ທີ່ກອງປະຊຸມໃຫຍ່ຄັ້ງທີ XI ຂອງພັກວາງອອກມາ, ວຽກງານການຕ່າງປະເທດຂອງພັກ ແລະ ລັດແຫ່ງ ສສ ຫວຽດນາມ ໄດ້ຜັນຂະຫຍາຍການເຄື່ອນໄຫວຢ່າງຮອບດ້ານ ແລະ ບັນລຸໝາກຜົນອັນສຳຄັນຫຼາຍຢ່າງ, ອິດທິພົນ ແລະ ບົດບາດຖານະຂອງປະເທດສືບຕໍ່ໄດ້ຍົກສູງຂຶ້ນ. ການພົວພັນລະຫວ່າງຫວຽດນາມກັບປະເທດຕ່າງໆ ໄດ້ຂະຫຍາຍຕົວຢ່າງແຂງແຮງ ທັງລວງກວ້າງ ແລະ ລວງເລິກ. ການພົວພັນລະຫວ່າງຫວຽດນາມກັບບັນດາປະເທດ, ເປັນຕົ້ນແມ່ນບັນດາປະເທດເພື່ອນບ້ານ, ບັນດາປະເທດອາຊຽນ, ບັນດາປະເທດອາຊີ - ປາຊີຟິກ ແລະ ບັນດາຄູ່ຮ່ວມມືໃຫຍ່, ໄດ້ຮັບການເພີ່ມທະວີໃຫ້ເລິກເຊິ່ງກວ່າ ແລະ ປັບປຸງໃຫ້ແໜ້ນແຟ້ນກວ່າເກົ່າ. ໃນສອງປີແຫ່ງການຜັນຂະຫຍາຍ ແນວທາງການຕ່າງປະເທດ ຂອງກອງປະຊຸມໃຫຍ່ຄັ້ງທີ XI, ບັນດາສະຫາຍຜູ້ນຳຂອງພັກ ລັດ ລັດຖະບານ ແລະ ສະພາແຫ່ງຊາດຫວຽດນາມ ໄດ້ຜັນຂະຫຍາຍຢ່າງຮອບດ້ານ ການໄປຢ້ຽນຢາມຂັ້ນສູງຢູ່ຕ່າງປະເທດ ນັບແຕ່ບັນດາປະເທດຢູ່ພາກພື້ນອາຊີ - ປາຊີພິກ, ເຊັ່ນ ຈີນ ລັດເຊຍ ບັນດາປະເທດອາຊຽນ ຍີ່ປຸ່ນ ສ.ເກົາຫຼີ ອີນເດຍ, ຈົນເຖິງບັນດາປະເທດເພື່ອນມິດ ປະເທດຄູ່ຮ່ວມມືຢູ່ເອີຣົບ ອາເມລິກາລາຕິນ.
ການເຄື່ອນໄຫວທາງການທູດຢ່າງຕັ້ງໜ້າໄດ້ນຳມາເຊິ່ງຜົນສຳເລັດອັນລະອຽດ ແທດເໝາະຕົວຈິງທີ່ສຸດ:
ໜຶ່ງ, ຫວຽດນາມໄດ້ຍົກລະດັບການພົວພັນກັບສະຫະພາບລັດເຊຍ ຂຶ້ນເປັນ “ຄູ່ຮ່ວມມືຍຸດທະສາດຮອບດ້ານ” (ເດືອນກໍລະກົດ 2012), ສ້າງຕັ້ງການພົວພັນຄູ່ຮ່ວມມືຍຸດທະສາດ ກັບເຢຍລະມັນ (ເດືອນຕຸລາ 2011), ລົງນາມຢ່າງເປັນທາງການໃນ ສັນຍາວ່າດ້ວຍຄູ່ຮ່ວມມື ແລະ ການຮ່ວມມືຮອບດ້ານ (PCA) ກັບ ອີຢູ (ເດືອນກໍລະກົດ 2012), ສ້າງຕັ້ງການພົວພັນຄູ່ຮ່ວມມືຍຸດທະສາດ ໃນຂົງເຂດການຜັນປ່ຽນດິນຟ້າອາກາດ ສິ່ງແວດລ້ອມ ພະລັງງານ ແລະ ການພັດທະນາເຕີບໂຕຂຽວ ກັບເດນມາກ (ເດືອນພະຈິກ 2011), ເຊິ່ງໄດ້ຍົກຈຳນວນປະເທດຄູ່ຮ່ວມມື ຂອງຫວຽດນາມ ຂຶ້ນເປັນ 10 ປະເທດ. ຫວຽດນາມກໍ່ພວມສືບຕໍ່ ຜັນຂະຫຍາຍການກະກຽມຍົກລະດັບການພົວພັນ ກັບບາງປະເທດຄູ່ຮ່ວມມືບຸລິມະສິດ ຄູ່ຮ່ວມມືສຳຄັນອື່ນອີກໃນປີ 2013 ແລະ ໃນບັນດາປີຕໍ່ໆໄປ.
ສອງ, ການທູດໄດ້ປະສານສົມທົບຢ່າງແໜ້ນແຟ້ນກັບບັນດາຂະແໜງການ ປ້ອງກັນປະເທດ-ປ້ອງກັນຄວາມສະຫງົບ, ໂຄສະນາອົບຮົມ ແລະ ບັນດາກຳລັງເຮັດໜ້າທີ່ການຕ່າງປະເທດອື່ນໆ ໃນການປົກປັກຮັກສາຄວາມສະຫງົບປອດໄພ ອຳນາດອະທິປະໄຕໃນຊາຍແດນແຜ່ນດິນ, ພິເສດແມ່ນ ປົກປັກຮັກສາອະທິປະໄຕໃນເຂດທະເລ ໝູ່ເກາະ ໄວ້ຢ່າງໝັ້ນແກ່ນ. ໃນປີ 2011 ແລະ 2012, ສະພາບການໃນເຂດທະເລຕາເວັນອອກ ມີການຜັນປ່ຽນສັບສົນຫລາຍຢ່າງ, ການຕ່າງປະເທດໄດ້ປະກອບສ່ວນປົກປັກຮັກສາຢ່າງໝັ້ນແກ່ນ ອຳນາດອະທິປະໄຕ, ຜືນແຜ່ນດິນອັນຄົບຖ້ວນ ແລະ ບັນດາຜົນປະໂຫຍດຄວາມສະຫງົບປອດໄພ ແລະ ການພັດທະນາຂອງປະເທດຊາດ. ຂໍ້ຕົກລົງກ່ຽວກັບບັນດາຫຼັກການພື້ນຖານ ຊີ້ນຳການແກ້ໄຂບັນດາບັນຫາເທິງທະເລກັບ ຈີນ ທີ່ໄດ້ລົງນາມໃນເດືອນຕຸລາ 2011 ໃນການໄປຢ້ຽມຢາມປະເທດຈີນ ຢ່າງເປັນທາງການ ຂອງທ່ານເລຂາທິການໃຫຍ່ ຫງວຽນຝູຈ້ອງ ເຊິ່ງໄດ້ສ້າງເປັນກອບຂອບອັນສຳຄັນຢ່າງທັນການ ໃຫ້ແກ່ການແກ້ໄຂການຜັນປ່ຽນຕ່າງໆທີ່ອາດຈະເກີດຂຶ້ນ. ເປັນພິເສດແມ່ນ, ພາຍຫຼັງ 10 ປີແຫ່ງການເຊັນ ຖະແຫຼງການກ່ຽວກັບວິທີການປະພຶດ ຂອງບັນດາຝ່າຍຢູ່ທະເລຕາເວັນອອກ (DOC), ດ້ວຍການປະກອບສ່ວນຢ່າງເປັນເຈົ້າການ ຕັ້ງໜ້າຂອງຫວຽດນາມ, ອາຊຽນ ໄດ້ບັນລຸຂໍ້ຕົກລົງກັບ ຈີນ ກ່ຽວກັບການແນະນຳປະຕິບັດ DOC, ເປັນເອກະພາບພາຍໃນອາຊຽນ ກ່ຽວກັບບັນດາພາກສ່ວນອັນພື້ນຖານຂອງ DOC, ສ້າງພື້ນຖານເພື່ອເຈລະຈາກັບ ຈີນ ພ້ອມກັນກັບບັນດາຝ່າຍທີ່ກ່ຽວຂ້ອງ ເພີ່ມທະວີການຮ່ວມມື ແນໃສ່ຮັກສາສັນຕິພາບ ສະຖຽນລະພາບຢູ່ທະເລຕາເວັນອອກ. ຫວຽດນາມກໍ່ໄດ້ມີການປະກອບສ່ວນອັນຕັ້ງໜ້າ ມີລັກສະນະກໍ່ສ້າງເພື່ອໃຫ້ອາຊຽນ ອອກຖະແຫຼງການ 6 ຂໍ້ ກ່ຽວກັບທະເລຕາເວັນອອກ ແລະ ຖະແຫຼງການຮ່ວມ ອາຊຽນ - ຈີນ ເນື່ອງໃນໂອກາດສະຫຼອງວັນເຊັນ DOC ຄົບຮອບ 10 ປີ.
ສາມ, ການທູດໄດ້ເສີມຂະຫຍາຍບັນດາການປະກອບສ່ວນອັນຕັ້ງໜ້າ ແລະ ເປັນເຈົ້າການຂອງຫວຽດນາມ ໃນການກໍ່ສ້າງປະຊາຄົມອາຊຽນ, ຊຸກຍູ້ຄວາມສາມັກຄີ ແລະ ການຮ່ວມມືພາຍໃນກູ່ມ, ເສີມຂະຫຍາຍບົດບາດເປັນໃຈກາງຂອງອາຊຽນ ໃນໂຄງປະກອບພາກພື້ນ ທີ່ກຳລັງເປັນຮູບເປັນຮ່າງຂຶ້ນ. ພາຍຫຼັງຜົນສຳເລັດໃນຖານະເປັນປະທານອາຊຽນ ປີ 2010, ຫວຽດນາມໄດ້ສືບຕໍ່ຮ່ວມມືຢ່າງຕັ້ງໜ້າ ກັບບັນດາປະເທດເປັນປະທານຕໍ່ຈາກນັ້ນຄື ອິນໂດເນເຊຍ (ປີ 2011) ແລະ ກຳປູເຈຍ (ປີ 2012) ເພື່ອກໍ່ສ້າງປະຊາຄົມອາຊຽນ, ຜັນຂະຫຍາຍແຜນການສັງລວມກ່ຽວກັບການເຊື່ອມໂຍງອາຊຽນ ແນໃສ່ຫຍໍ້ສັ້ນໄລຍະຫ່າງທາງດ້ານການພັດທະນາ ລະຫວ່າງບັນດາປະເທດໃນພາກພື້ນ, ເພີ່ມທະວີການຮ່ວມມືພາຍໃນກຸ່ມ. ບັນດາຂໍ້ຄິດປະດິດສ້າງອັນສຳຄັນ ທີ່ຫວຽດນາມສະເໜີອອກມາ ໃນປີເປັນປະທານອາຊຽນ 2010, ເປັນຕົ້ນແມ່ນຂໍ້ສະເໜີ ຈັດຕັ້ງກອງປະຊຸມລັດຖະມົນຕີປ້ອງກັນປະເທດອາຊຽນ ເປີດກວ້າງ (ADMM+) ສືບຕໍ່ຖືກອາຊຽນ ເຊີດຊູ ແລະ ຊຸກຍູ້ ໃນປີຕໍ່ໄປ. ພິເສດແມ່ນ, ເປັນຄັ້ງທຳອິດພາຍຫຼັງ 17 ປີແຫ່ງການເຂົ້າຮ່ວມໃນອາຊຽນ, ຫວຽດນາມໄດ້ດຳລົງຕຳແໜ່ງເລຂາທິການໃຫຍ່ອາຊຽນ ສະໄໝ 2013 - 2017.
ສີ່, ຫວຽດນາມໄດ້ ແລະ ພວມຜັນຂະຫຍາຍຢ່າງແຂງແຮງ ການຊາບຊືມຢ່າງເລິກເຊິ່ງ, ເປັນເອກະພາບທາງດ້ານຄວາມຮັບຮູ້ ແລະ ຫັນເປັນນິຕິກຳເປັນນະໂຍບາຍ ຕໍ່ແຜນນະໂຍບາຍອັນສຳຄັນຂອງກອງປະຊຸມໃຫຍ່ຄັ້ງທີ XI ຂອງພັກ ກ່ຽວກັບການເປັນເຈົ້າການ ຕັ້ງໜ້າເຊື່ອມໂຍງເຂົ້າກັບສາກົນ. ການທູດພະຫຸພາຄີຂອງຫວຽດນາມ ກໍ່ໄດ້ມີການຫັນປ່ຽນທາງດ້ານຄຸນນະພາບ ດ້ວຍບາດກ້າວໆໜ້າ ແຕ່ການປະກອບສ່ວນ ເຂົ້າຮ່ວມໃນການຈັດຕັ້ງ ຈົນເຖິງການຍູ້ແຮງ “ວັດທະນະທຳປະຕິບັດ”, ນັບມື້ນັບເປັນເຈົ້າການ ຕັ້ງໜ້າປະກອບສ່ວນຢ່າງແທ້ຈິງ ແລະ ນຳສະເໜີຂໍ້ຄິດປະດິດສ້າງຫຼາຍຢ່າງ ທີ່ໄດ້ຮັບການສະໜັບສະໜູນຢ່າງກວ້າງຂວາງ ຢູ່ໃນບັນດາເວທີປາໄສພະຫຸພາຄີ ແລະ ເວທີສາກົນ, ແລະ ກາຍເປັນລັກສະນະພາຍໃນໜຶ່ງທີ່ສຳຄັນທີ່ສຸດ ຂອງການເຊື່ອມໂຍງເຂົ້າກັບສາກົນ. ບັນດາຂໍ້ສະເໜີ ຂໍ້ຄິດປະດິດຂອງຫວຽດນາມ ໄດ້ປະກອບສ່ວນຢ່າງແທດຈິງໃຫ້ແກ່ການເຄື່ອນໄຫວຂອງ ອາເປັກ, ອາເຊັມ, ກອງປະຊຸມຄູ່ຮ່ວມສະພາແຫ່ງຊາດ ອາຊີ - ເອີຣົບ (ASEP) ແລະ ສະມັດຊາໃຫຍ່ບັນດາສະພາແຫ່ງຊາດອາຊຽນ (AIPA),... ຢູ່ທີ່ສະຫະປະຊາຊາດ, ຕໍ່ຈາກຜົນສຳເລັດໃນສະໄໝເປັນກຳມະການບໍ່ປະຈຳການ ຂອງຄະນະມົນຕີຄວາມໝັ້ນຄົງແຫ່ງສະຫະປະຊາຊາດ (2008 - 2009), ຫວຽດນາມໄດ້ອອກຮັບເລືອກຕັ້ງເປັນສະມາຊິກ ຂອງບາງອົງການສຳຄັນແຫ່ງສະຫະປະຊາຊາດ ເຊັ່ນ ຄະນະມົນຕີສິດທິມະນຸດ ສະໄໝປີ 2014 - 2016, ຄະນະມົນຕີເສດຖະກິດ ແລະ ສັງຄົມ (ECOSOC) ສະໄໝປີ 2016 - 2018 ແລະ ຄະນະມົນຕີຄວາມໝັ້ນຄົງສະໄໝປີ 2020 - 2021.
ຫ້າ, ການທູດເສດຖະກິດນັບມື້ນັບຢັ້ງຢືນບົດບາດເປັນເສົາຄ້ຳອັນສຳຄັນຂອງພື້ນຖານການທູດຮອບດ້ານ. ໃນເວລາຜ່ານມາ, ການທູດເສດຖະກິດໄດ້ຍົກສູງຄຸນນະພາບວຽກງານການສື່ຂ່າວ, ການຄາດຄະເນ ແລະ ເປັນເສນາທິການໃຫ້ລັດຖະບານ ໃນການຄຸ້ມຄອງເສດຖະກິດມະຫາພາກ, ຈຳກັດໄພເງິນເຟີ້, ຮັກສາສະຖຽນລະພາບ ແລະ ຮັບປະກັນຄວາມປອດໄພໃນຊີວິດສັງຄົມ, ຈັດວາງໂຄງປະກອບເສດຖະກິດຄືນໃໝ່ ໂດຍຕິດແໜ້ນກັບການປ່ຽນແປງໃໝ່ຕົວແບບເຕີບໂຕເສດຖະກິດ ແລະ ປະຕິບັດການບຸກທະລຸຍຸດທະສາດ 3 ຂອດ. ພ້ອມກັນນັ້ນ, ການທູດກໍ່ໄດ້ຍາດແຍ່ງເອົາການຮ່ວມມື ແລະ ບັນດາແຫຼ່ງພະລັງພາຍນອກ ໃຫ້ໄດ້ຫຼາຍທີ່ສຸດ ເພື່ອຮັບໃຊ້ໃຫ້ແກ່ການພັດທະນາ ແລະ ຜ່ານຜ່າຄວາມຫຍຸ້ງຍາກດ້ານເສດຖະກິດ - ສັງຄົມພາຍໃນປະເທດ; ຕັ້ງໜ້າຊ່ວຍໜູນບັນດາກະຊວງ ຂະແໜງການ ທ້ອງຖິ່ນ ວິສາຫະກິດ ໃນການຂາອອກ, ການລົງທຶນ, ການທ່ອງທ່ຽວ, ODA, ສົມທົບກັບຂະແໜງການຕ່າງໆ ໃນການແກ້ໄຂບັນດາກໍລະນີພິພາດແກ່ງແຍ້ງທາງດ້ານເສດຖະກິດ - ການຄ້າລະຫວ່າງປະເທດ. ເຖິງວ່າເສດຖະກິດໂລກມີການຜັນປ່ຽນສັບສົນກໍ່ຕາມ ແຕ່ການພົວພັນເສດ - ການຄ້າຂອງຫວຽດນາມ ກັບບັນດາຄູ່ຮ່ວມມືແຖວໜ້າເຊັ່ນ ຈີນ ອາເມລິກາ ຍີ່ປຸ່ນ ສ.ເກົາຫຼີ ອີຢູ ລັດເຊຍ… ກໍ່ລ້ວມແຕ່ເພີ່ມຂຶ້ນຫຼາຍກວ່າປີກ່ອນ. ລວມຍອດມູນຄ່າຂາອອກປີ 2012 ບັນລຸ 114,6 ຕື້ໂດລາສະຫະລັດ, ເພີ່ມຂຶ້ນ 18,3%; ລວມຍອດມູນຄ່າຂາເຂົ້າບັນລຸ 114,3 ຕື້ໂດລາສະຫະລັດ, ເພີ່ມຂຶ້ນ 7,1% ທຽບກັບປີ 2011, ພາໃຫ້ຫວຽດນາມກາຍເປັນປະເທດມີການຂາອອກລື່ນກາຍການຂາເຂົ້າໃນປີ 2012 (ນີ້ແມ່ນຄັ້ງທຳອິດນັບແຕ່ປີ 1993). ໃນປີ 2012, ຫວຽດນາມດຶງດູດເອົາທຶນຊ່ວຍເຫຼືອພັດທະນາເປັນທາງການ (ODA) ໄດ້ 7,4 ຕື້ໂດລາສະຫະລັດ; ທຶນລົງທຶນໂດຍກົງຈາກຕ່າງປະເທດ (FDI) ປະຕິບັດໃນ 11 ເດືອນຕົ້ນປີໄດ້ປະມານ 10 ຕື້ໂດລາສະຫະລັດ, ເທົ່າກັບ 99,5% ທຽບກັບໄລຍະດຽວກັນຂອງປີ 2011. ເບິ່ງລວມ, ພາຍຫຼັງກວ່າ 5 ປີເຂົ້າຮ່ວມໃນອົງການການຄ້າໂລກ (WTO), ລວມຍອດມູນຄ່າຂາອອກຂອງຫວຽດນາມໄດ້ເພີ່ມຂຶ້ນ 97,7%, ຄິດສະເລ່ຍເພີ່ມຂຶ້ນ 19,52% ຕໍ່ປີ. ພິເສດແມ່ນ, ໃນປີ 2012 ຫວຽດນາມໄດ້ຍູ້ແຮງທັງດ້ານລວງກວ້າງ ແລະ ລວງເລິກ ການເຂົ້າຮ່ວມເຊື່ອມໂຍງເສດຖະກິດພາກພື້ນ ດ້ວຍການເຂົ້າຮ່ວມຢ່າງຕັ້ງໜ້າໃນການເຈລະຈາທັງ 5 ຮອບກ່ຽວກັບສັນຍາຄູ່ຮ່ວມເສດຖະກິດຍຸດທະສາດຂ້າມມະຫາສະມຸດປາຊີຟິກ (TPP) ແລະ ລິເລິ່ມການເຈລະຈາກ່ຽວກັບສັນຍາການຄ້າເສລີ (FTA) ພ້ອມບາດດຽວກັບ 5 ຄູ່ຮ່ວມມືທີ່ສຳຄັນຄື ອີຢູ, ສ.ເກົາຫຼີ, ກຸ່ມການຄ້າເສລີເອີຣົບ (EFTA), ສຳພັນທະພາບສຸລະກາກອນ ລັດເຊຍ - ເບລາຣຸດ - ກາຊັກສະຖານ ແລະ ສັນຍາຄູ່ຮ່ວມມືຮອບດ້ານໃນພາກພື້ນ (RCEP) ລະຫວ່າງອາຊຽນ ກັບ 6 ປະເທດຄູ່ຮ່ວມມື. ການຂົນຂວາຍໃຫ້ບັນດາປະເທດຮັບຮອງລະບຽບເສດຖະກິດຕະຫຼາດຂອງຫວຽດນາມ ກໍ່ບັນລຸໝາກຜົນອັນດີງາມ (ມາຮອດປັດຈຸບັນ ມີ 36 ປະເທດໄດ້ຮັບຮອງລະບຽບເສດຖະກິດຕະຫຼາດຂອງຫວຽດນາມ, ໃນນັ້ນມີບັນດາປະເທດພັດທະນາເຊັ່ນ ຍີ່ປຸ່ນ, ອີຕາລີ ແລະ 4 ປະເທດໃນກຸ່ມການຄ້າເສລີເອີຣົບ).
ຫົກ, ການທູດວັດທະນະທຳໄດ້ປະກອບສ່ວນຍົກສູງບົດບາດຖານະຂອງຫວຽດນາມ, ເສີມຂະຫຍາຍ “ກຳລັງແຮງອ່ອນນວນ” ຂອງປະເທດ, ຜ່ານສິ່ງດັ່ງກ່າວນັ້ນກໍ່ໄດ້ຮັດແໜ້ນກວ່າອີກ ສາຍພົວພັນຂອງຫວຽດນາມກັບບັນດາຄູ່ຮ່ວມມື ແລະ ເພີ່ມທະວີຄວາມເຂົ້າໃຈຂອງບັນດາປະເທດໃນໂລກຕໍ່ກັບຫວຽດນາມ. ໃນສອງປີຜ່ານມາ, ການທູດວັດທະນະທຳຍາດໄດ້ຜົນງານຫຼາຍຢ່າງທີ່ໜ້າຊື່ນຊົມໃຈ. ມໍລະດົກວັດທະນະທຳຫຼາຍຢ່າງຂອງຫວຽດນາມ, ເຊັ່ນກຳແພງລາຊະວັງ ໂຮ່, ຂັບຊວານ, ແຜ່ນໄມ້ພິມ ພຸດທະປະຫວັດ ວັດຫວິງງຽມ, ຄວາມເຫຼື້ອມໃສໃນພິທີການບູຊາ ພະມະຫາກະສັດ ຮູ່ງເວືອງ,... ຖືກ UNESCO ຮັບຮອງວ່າເປັນມໍລະດົກວັດທະນະທຳໂລກ. ວຽກງານສື່ຂ່າວໂຄສະນາການຕ່າງປະເທດ ໄດ້ຮັບການຜັນຂະຫຍາຍຢ່າງແຂງແຮງ ດ້ວຍບັນດາຈຸດສຸມຄື ຕໍ່ສູ້ທາງຫາງສຽງເພື່ອປົກປັກຮັກສາອຳນາດອະທິປະໄຕໃນທະເລ ໝູ່ເກາະ, ຕໍ່ສູ້ບອກປັດບັນດາທັດສະນະ ຂ່າວສານທີ່ຜິດພາດກ່ຽວກັບຫວຽດນາມ ແລະ ໂຄສະນາເຜີຍແຜ່ຮູບພາບຫວຽດນາມໃນໂລກ. ມະຕິໝາຍເລກ 36 ຂອງກົມການເມືອງສູນກາງພັກ ສືບຕໍ່ໄດ້ຮັບການຫັນເປັນນິຕິກຳ, ອຳນວຍຄວາມສະດວກ ໃຫ້ຊາວຫວຽດນາມຢູ່ຕ່າງປະເທດ ສ້າງຊີວິດການເປັນຢູ່ເປັນປົກກະຕິ ຈະເລີນພັດທະນາ ແລະ ຫັນມາສູ່ປະເທດຊາດບ້ານເມືອງ.
ຕາມທ່ວງທ່າແຫ່ງຜົນສຳເລັດຕ່າງໆທີ່ບັນລຸໄດ້, ປີ 2013 ຂະແໜງການທູດຈະເຕົ້າໂຮມລວມສູນກຳລັງປະຕິບັດບັນດາໜ້າທີ່ຈຸດໜັກໃຈກາງລຸ່ມນີ້:
1- ສືບຕໍ່ຍູ້ແຮງການຜັນຂະຫຍາຍແຜນນະໂຍບາຍເປັນເຈົ້າການ ຕັ້ງໜ້າເຊື່ອມໂຍງເຂົ້າກັບສາກົນ ທີ່ກອງປະຊຸມໃຫຍ່ຄັ້ງທີ່ XI ຂອງພັກໄດ້ວາງອອກມາ; ສູ້ຊົນນຳເອົາການພົວພັນກັບບັນດາປະເທດເພື່ອນບ້ານໃກ້ຄຽງ, ປະເທດໃນພາກພື້ນ ແລະ ບັນດາຄູ່ຮ່ວມບຸລິມະສິດທີ່ສຳຄັນ ເຂົ້າສູ່ລວງເລິກ ມີເນື້ອແທ້ ມີປະສິດທິຜົນກວ່າເກົ່າ, ໃນນັ້ນມີການຜັນຂະຫຍາຍແຜນນະໂຍບາຍ ຍົກລະດັບການພົວພັນກັບບາງປະເທດຂຶ້ນເປັນຄູ່ຮ່ວມມືຍຸດທະສາດ.
2- ກ່ຽວກັບການທູດພະຫຸພາຄີ, ພ້ອມກັບອາຊຽນປັບປຸງຄວາມສາມັກຄີພາຍໃນກຸ່ມ, ສ້າງໃຫ້ມີການຜັນປ່ຽນຢ່າງແຂງແຮງ ມຸ່ງໄປສູ່ການກໍ່ສ້າງເປັນປະຊາຄົມອາຊຽນໃນປີ 2015, ເຂົ້າຮ່ວມຢ່ງຕັ້ງໜ້າ, ປະກອບສ່ວນຢ່າງມີປະສິດທິຜົນເຂົ້າໃນບັນດາເວທີປາໄສພະຫຸພາຄີ ພາກພື້ນ ແລະ ສາກົນ.
3- ປະສານສົມທົບຢ່າງແໜ້ນແຟ້ນລະຫວ່າງການຕ່າງປະເທດ ກັບການປ້ອງກັນປະເທດ, ປ້ອງກັນຄວາມສະຫງົບ, ການສື່ຂ່າວໂຄສະນາການ ກໍ່ຄືກັບທຸກໆກະຊວງ ຄະນະກຳມະການ ຂະແໜງການ ແລະ ທ້ອງຖິ່ນ ເພື່ອປະຕິບັດເປັນຢ່າງດີວຽກງານຊາຍແດນແຫ່ງຊາດ, ພິເສດແມ່ນ ປົກປັກຮັກສາຄວາມສະຫງົບປອດໄພ ອຳນາດອະທິປະໄຕຂອງປະເທດຊາດຢ່າງໝັ້ນຄົງ.
4- ສືບຕໍ່ຍູ້ແຮງວຽກງານການທູດເສດຖະກິດ ບົນພື້ນຖານກຳແໜ້ນຄວາມຮຽກຮ້ອງຕ້ອງການພັດທະນາປະເທດຊາດ; ຮັບໃຊ້ໃຫ້ວິທີແກ້ໄຂ 6 ປະການຂອງລັດຖະບານໃນປີ 2013 ແນໃສ່ເຮັດໃຫ້ເສດຖະກິດມະຫາພາກສະຖຽນໝັ້ນ, ຫັນປ່ຽນໂຄງປະກອບເສດຖະກິດ ແລະ 3 ຂອດບຸກທະລຸຍຸດທະສາດ.
5- ຕັ້ງໜ້າຜັນຂະຫຍາຍແຜນການການກະທຳປະຕິບັດຍຸດທະສາດການທູດວັດທະນະທຳເຖິງປີ 2020; ເພີ່ມທະວີການຂົນຂວາຍໃຫ້ UNESCO ຮັບຮອງບັນດາມໍລະດົກທີ່ມີຮູບ ແລະ ມໍລະດົກອະຮູບຂອງຫວຽດນາມ; ຍົກສູງຄວາມເຂັ້ມວັດທະນະທຳຢູ່ໃນບັນດາການເຄື່ອນໄຫວການຕ່າງປະເທດ; ສືບຕໍ່ເອົາໃຈໃສ່ເປັນສຳຄັນເຖິງວຽກງານຕໍ່ຊາວຫວຽດນາມຢູ່ຕ່າງປະເທດ ແລະ ປົກປ້ອງພົນລະເມືອງຕາມທິດນຳມີປະສິດທິຜົນ ທັນການ.
6- ຖືເປັນສຳຄັນຕໍ່ການກໍ່ສ້າງ ບຳລຸງສ້າງຖັນແຖວພະນັກງານເຮັດວຽກງານການຕ່າງປະເທດທີ່ເປັນອາຊີບຢ່າງແທ້ຈິງ, ໜັກແໜ້ນທາງດ້ານຄຸນສົມບັດຫຼັກໝັ້ນ, ເກັ່ງກ້າສາມາດທາງດ້ານວິຊາຊີບ, ທຽບເທົ່າກັບລະດັບພາກພື້ນ ແລະ ຄ່ອຍໆເຂົ້າເຖິງລະດັບໂລກ./.
ໂດຍ: ຟ້າມບິ່ງມິງ
ກຳມະການສູນກາງພັກ, ລັດຖະມົນຕີວ່າການກະຊວງການຕ່າງປະເທດ
