ເພື່ອໃຫ້ປະຊາຊົນເຂົ້າຮ່ວມໄດ້ດີກວ່າອີກ ໃນວຽກງານກໍ່ສ້າງພັກກອມມູນິດຫວຽດນາມ, ກໍ່ສ້າງອຳນາດການປົກຄອງ
ວ.ກ - ກໍ່ສ້າງ, ປັບປຸງພັກກອມມູນິດຫວຽດນາມ, ສ້າງເງື່ອນໄຂເພື່ອໃຫ້ປະຊາຊົນເຂົ້າຮ່ວມໄດ້ດີກວ່າອີກ ໃນການກໍ່ສ້າງພັກ ກໍ່ສ້າງອຳນາດການປົກຄອງໃຫ້ນັບມື້ນັບໃສສະອາດ ໝັ້ນຄົງເຂັ້ມແຂງ ແມ່ນວຽກງານຍາວນານ, ມັນຮຽກຮ້ອງຄວາມມານະພະຍາຍາມຂອງທົ່ວພັກ ທົ່ວປວງຊົນຫວຽດນາມ.
ໃນປີຜ່ານມາ, ພັກກອມມູນິດຫວຽດນາມ ໄດ້ສຸມໃສ່ແກ້ໄຂສາມບັນຫາຮີບດ່ວນໃນວຽກງານກໍ່ສ້າງພັກ ຕາມຈິດໃຈຂອງມະຕິກອງປະຊຸມສູນກາງຄັ້ງທີ 4 ສະໄໝທີ XI. ອາດຈະເວົ້າໄດ້ວ່າ ມະຕິກອງປະຊຸມສູນກາງຄັ້ງທີ 4 ໄດ້ແລະພວມໄດ້ຮັບການຜັນຂະຫຍາຍຢ່າງຮີບດ່ວນ ແລະ ເຂັ້ມງວດທີ່ສຸດ. ກົມການເມືອງ, ຄະນະບໍລິຫານງານສູນກາງພັກກອມມູນິດຫວຽດນາມ ໄດ້ປະກາດໃຊ້ຫຼາຍໆ ມະຕິ ຂໍ້ສະຫລຸບ ຂໍ້ກຳນົດທີ່ສຳຄັນ.
ມະຕິກໍ່ໄດ້ແຜ່ລາມຢ່າງກວ້າງຂວາງເລິກເຊິ່ງ ໃນການເຄື່ອນໄຫວຂອງລະບົບການເມືອງທັງໝົດ, ໃນທົ່ວສັງຄົມ, ໃນການເຄື່ອນໄຫວຂອງບັນດາສຳນັກງານອົງການ ກົງຈັກແຫ່ງລັດຫວຽດນາມ. ແຜນນະໂຍບາຍຈຳນວນໜຶ່ງຂອງພັກກອມມູນິດຫວຽດນາມ ໄດ້ຮັບການຫັນເປັນນິຕິກຳເປັນກົດໝາຍ ນະໂຍບາຍ ເປັນບັນດາໂຄງການເຄື່ອນໄຫວລະອຽດ. ສະພາແຫ່ງຊາດຫວຽດນາມໄດ້ຮັບຮອງຜ່ານຫຼາຍກົດໝາຍ ມະຕິທີ່ສຳຄັນ, ເປັນຕົ້ນແມ່ນ ກົດໝາຍວ່າດ້ວຍການປ້ອງກັນ ແລະ ຕ້ານການສໍ້ລາດບັງຫຼວງ (ສະບັບປັບປຸງ), ມະຕິວ່າດ້ວຍການເອົາຄະແນນສຽງໄວ້ວາງໃຈ ລົງຕະແນນສຽງໄວ້ວາງໃຈ ຕໍ່ກັບຜູ້ດຳລົງຕຳແໜ່ງ ໂດຍແມ່ນສະພາແຫ່ງຊາດ ສະພາປະຊາຊົນເລືອກຕັ້ງ ຫຼືໃຫ້ສັດຕະຍາບັນ. ລັດຖະບານຫວຽດນາມໄດ້ປະກາດໃຊ້ ໂຄງການດຳເນີນງານເພື່ອແນໃສ່ເພີ່ມທະວີການປ້ອງກັນ ຕ້ານການສໍ້ລາດບັງຫຼວງ ການຟຸມເຟືອຍ ເຊິ່ງໃນນັ້ນກຳນົດບັນດາໜ້າທີ່ຕົ້ນຕໍຄື ປະຕິບັດການເປີດເຜີຍ ໂປ່ງໃສ ໃນການເຄື່ອນໄຫວຂອງບັນດາສຳນັກງານອົງການ ການຈັດຕັ້ງ ຫົວໜ່ວຍກົມກອງ; ປັບປຸງບູລະນະລະບອບການງານຫຼວງ ລະບອບຂ້າລັດຖະການ, ປະຕິບັດຢ່າງເຂັ້ມງວດກົນໄກ ນະໂຍບາຍກ່ຽວກັບວຽກງານການຈັດຕັ້ງ ພະນັກງານ, ຍົກສູງຄຸນນະພາບການປະຕິບັດວຽກງານຫຼວງ; ເຊີດຊູ ແລະ ເສີມຂະຫຍາຍບົດບາດ ຄວາມຮັບຜິດຊອບຂອງສັງຄົມໃນການປ້ອງກັນ ແລະ ຕ້ານການສໍ້ລາດບັງຫຼວງ ການຟຸມເຟືອຍ… ບັນດາອົງການກວດກາ ກວດການ ກວດສອບບັນຊີ ສືບສວນ ຂອງຫວຽດນາມລ້ວນແຕ່ພວມຕັ້ງໜ້າພະຍາຍາມເຂົ້າປະຕິບັດງານ. ຫຼາຍທ້ອງຖິ່ນໄດ້ມີໂຄງການ ແຜນການດັດແປງແກ້ໄຂບາງຂໍ້ຂາດຕົກບົກພ່ອງໃນທັນທີ, ຜ່ານພົ້ນຈຸດອ່ອນຈຳນວນໜຶ່ງໃນທັນທີ, ຈຳກັດຄວາມຫຍຸ້ງຍາກເຄັ່ງຮ້ອນຕ່າງໆ. ແຕ່ວ່າ, ຜົນງານທີ່ບັນລຸໄດ້ໃນການປະຕິບັດມະຕິກອງປະຊຸມສູນກາງຄັ້ງທີ 4 ສະໄໝທີ XI ໃນປີຜ່ານມາຢູ່ຫວຽດນາມ ກໍ່ເປັນພຽງຜົນງານເບື້ອງຕົ້ນເທົ່ານັ້ນ.
ແຕ່ວ່າ, ການທີ່ຍັງບໍ່ທັນວາງຂໍ້ກຳນົດກົດລະບຽບ ກົນໄກອອກມາໄດ້ ເພື່ອໃຫ້ແນວໂຮມແຫ່ງຊາດຫວຽດນາມ ບັນດາອົງຄະນະການເມືອງ-ສັງຄົມ ປະຕິບັດການຕິດຕາມກວດກາ ຕິຊົມສັງຄົມ ແລະ ໃຫ້ປະຊາຊົນປະກອບຄວາມຄິດຄວາມເຫັນກໍ່ສ້າງພັກ ກໍ່ສ້າງອຳນາດການປົກຄອງ ຄືດັ່ງທີ່ມະຕິວາງອອກມານັ້ນ ແມ່ນການຊັກຊ້າ ຍັງບໍ່ທັນຕອບສະໜອງໄດ້ຢ່າງທັນການກັບຄວາມຄອງຄອຍ ຄວາມມຸ່ງມາດປາຖະໜາອັນຊອບທຳຊອງປະຊາຊົນຫວຽດນາມ.
ການທີ່ມະຕິຖືກປະກາດໃຊ້ນັ້ນ ມັນໄດ້ສ້າງໃຫ້ມີຜົນກະທົບສັງຄົມຢ່າງຕັ້ງໜ້າທີ່ສຸດ. ບາງໜັງສືພິມ ວາລະສານ ອົງການຂຶ້ນກັບຄະນະກຳມະການສູນກາງ ແນວໂຮມແຫ່ງຊາດຫວຽດນາມ ໄດ້ພິມສະບັບພິເສດສະເພາະ ຈັດຕັ້ງການສຳມະນາ ລົງພິມບົດນຳ ບົດວິຈານ ສະແດງຄວາມຄິດເຫັນກ່ຽວກັບເນື້ອໃນນີ້ ເຊິ່ງໄດ້ດຶງດູດຄວາມສົນໃຈ ຄວາມຫວັງດີຂອງປະຊາຊົນ ຕໍ່ກັບບັນດາອົງການຈັດຕັ້ງການເມືອງ-ສັງຄົມ. ຄັ້ງນີ້, ຫວັງວ່າໃນເວລາສະເພາະໜ້າ, ຄວາມຊັກຊ້ານີ້ຈະຖືກແກ້ໄຂ, ສ້າງເງື່ອນໄຂອຳນວຍຄວາມສະດວກ ໃຫ້ປະຊາຊົນຫວຽດນາມເຂົ້າຮ່ວມໄດ້ດີກວ່າອີກ ໃນວຽກງານກໍ່ສ້າງພັກ ກໍ່ສ້າງອຳນາດການປົກຄອງແຫ່ງລັດຫວຽດນາມ ໃຫ້ນັບມື້ນັບໃສສະອາດ ໝັ້ນຄົງເຂັ້ມແຂງ.
ກ່ອນອື່ນໝົດ, ອາດຈະຢັ້ງຢືນໄດ້ວ່າ, ບັນຫາການຕິດຕາມກວດກາ ການຕິຊົມສັງຄົມ ກໍ່ຄືການທີ່ປະຊາຊົນປະກອບຄວາມຄິດຄວາມເຫັນກໍ່ສ້າງພັກ ກໍ່ສ້າງອຳນາດການປົກຄອງ, ຕຳນິຕິຊົມພະນັກງານ ສະມາຊິກພັກນັ້ນ ບໍ່ແມ່ນບັນຫາໃໝ່ ແລະ ກໍ່ບໍ່ແມ່ນບັນຫາທີ່ພັກ ອຳນາດການປົກຄອງຂັ້ນຕ່າງໆ ຍັງບໍ່ໄດ້ເຮັດຢູ່ຫວຽດນາມຈັກເທື່ອ. ແຕ່ກົງກັນຂ້າມ, ມີເວລາ ວຽກນີ້ຖືກປະຕິບັດຢູ່ບ່ອນນີ້ຫຼືບ່ອນນັ້ນຢ່າງຟົດຟື້ນ ມີປະສິດທິຜົນພໍຄວນ (ຕາມທຳມະດາແມ່ນພາຍໃຕ້ຮູບການປະຊາທິປະໄຕແບບຕາງໜ້າ) ປະກອບສ່ວນປັບປຸງ ກໍ່ສ້າງການຈັດຕັ້ງພັກ ອຳນາດການປົກຄອງ ໃນ 83 ປີນັບແຕ່ເມື່ອພັກກອມມູນິດຫວຽດນາມໄດ້ຮັບການສ້າງຕັ້ງ ແລະ 68 ປີນັບແຕ່ເມື່ອປະເທດຫວຽດນາມຍາດໄດ້ເອກະລາດ ອິດສະຫຼະພາບ.
ແຕ່ວ່າ, ຍ້ອນຫຼາຍສາເຫດ, ການປະຕິບັດວຽກງານນີ້ບໍ່ເປັນເອກະພາບ ຄົບຊຸດ ມີລະບຽບຢ່າງແທ້ຈິງ. ມາເຖິງປັດຈຸບັນ, ໃນສະພາບແວດລ້ອມ ເງື່ອນໄຂໃໝ່, ເປັນຕົ້ນແມ່ນລະດັບປັນຍາຄວາມຮູ້ຂອງປະຊາຊົນຫວຽດນາມນັບມື້ໄດ້ຮັບການຍົກສູງຂຶ້ນ, ໃນເງື່ອນໄຂພັກກອມມູນິດຫວຽດນາມກຳອຳນາດ, ດ້ວຍຫຼາຍບັນຫາຮີບດ່ວນວາງອອກມາ ໃນວິວັດການກໍ່ສ້າງລັດແຫ່ງອຳນາດກົດໝາຍຂອງປະຊາຊົນ ໂດຍປະຊາຊົນ ແລະ ເພື່ອປະຊາຊົນ, ດັ່ງນັ້ນຫວຽດນາມຕ້ອງມີກົນໄກ ຂໍ້ກຳນົກ ກົດລະບຽບຕົວຈິງ ທີ່ເປັນເອກະພາບ ຄົບຊຸດ ເປັນແບບແຜນ ລະອຽດກວ່າ ໃນວຽກງານນີ້. ເພາະສະນັ້ນ ບັນດາອົງການພາລະບົດບາດຈຶ່ງໄດ້ຮຽບຮຽງ ນຳສະເໜີໃຫ້ກົນການເມືອງສູນກາງພັກປະກາດໃຊ້ຂໍ້ກຳນົດ ກົດລະບຽບກ່ຽວກັບການຕິດຕາມກວດກາ ການຕິຊົມສັງຄົມ ການປະກອບຄວາມຄິດເຫັນ ຂອງແນວໂຮມແຫ່ງຊາດຫວຽດນາມ ບັນດາອົງຄະນະການເມືອງ-ສັງຄົມ ແລະ ປະຊາຊົນຫວຽດນາມ, ເປັນຕົ້ນແມ່ນ ເປີດກວ້າງຮູບບການປະຊາທິປະໄຕໂດຍກົງ, ນັ້ນແມ່ນວຽກງານສຳຄັນ ແລະ ຮີບດ່ວນທີ່ສຸດ, ມີຄວາມໝາຍຕັດສິນເຖິງຜົນສຳເລັດຂອງວຽກງານກໍ່ສ້າງ ປັບປຸງພັກກອມມູນິດຫວຽດນາມໃນປັດຈຸບັນ.
ຈຸດປະສົງຂອງການຕິດຕາມກວດກາ ການຕິຊົມສັງຄົມ ກໍ່ຄືຂອງການປະກອບຄວາມຄິດເຫັນນັ້ນ ແມ່ນເພື່ອປະກອບສ່ວນກໍ່ສ້າງ ປະຕິບັດຢ່າງມີປະສິດທິຜົນ ບັນດາແຜນນະໂຍບາຍ ແນວທາງຂອງພັກ, ນະໂຍບາຍ ກົດໝາຍຂອງລັດຫວຽດນາມ; ຄົ້ນເຜີຍ, ສະເໜີແນະມາດຕະການ ແນໃສ່ແກ້ໄຂຜ່ານຜ່າຈຸດອ່ອນ ຂໍ້ຂາດຕົກບົກພ່ອງ; ດັດແປງຂໍ້ກຳນົດທີ່ບໍ່ສອດຄ່ອງ, ເນື້ອໃນທີ່ບໍ່ແທດເໝາະ ບໍ່ຖືກຕ້ອງ ໃນບັນດາຮ່າງເອກະສານຂອງພັກ-ລັດຫວຽດນາມ; ປະກອບສ່ວນຮັບປະກັນລັກສະນະຖືກຕ້ອງ ສອດຄ່ອງເໝາະສົມກັບພຶດຕິກຳແຫ່ງຊີວິດສັງຄົມ ໃນການວາງກຳນົດແຜນນະໂຍບານ ແນວທາງ ນະໂຍບາຍ ກົດໝາຍ, ບັນດາມະຕິຕົກລົງທີ່ສຳຄັນຂອງພັກ-ລັດ, ບັນດາໂຄງການ ແຜນການທີ່ສຳຄັນ; ເສີມຂະຫຍາຍປະຊາທິປະໄຕ, ເພີ່ມທະວີຄວາມເຫັນດີເຫັນພ້ອມສັງຄົມ, ຮັບປະກັນຜົນປະໂຫຍດອັນສົມເຫດສົມຜົນ ຖືກຕ້ອງຕາມກົດໝາຍຂອງປະຊາຊົນ; ປະກອບສ່ວນກໍ່ສ້າງການຈັດຕັ້ງພັກ ອຳນາດການປົກຄອງ ຖັນແຖວພະນັກງານ ສະມາຊິກພັກ ໃຫ້ປອດໃສ ໝັ້ນຄົງເຂັ້ມແຂງ; ຍົກສູງຄວາມສາມາດນຳພາ ກຳລັງສູ້ຮົບຂອງການຈັດຕັ້ງພັກ, ຍົກສູງຄວາມສັກສິດ ປະສິດທິຜົນການຄຸ້ມຄອງຂອງລັດ ຂອງອຳນາດການປົກຄອງຂັ້ນຕ່າງໆ; ປັດປຸງກຸ່ມກ້ອນມະຫາສາມັກຄີປວງຊົນທັງຊາດ, ເພີ່ມທະວີສາຍພົວພັນສະໜິດແໜ້ນລະຫວ່າງພັກ ລັດ ກັບປະຊາຊົນ; ຫັນເປັນລະອຽດຕື່ມອີກບາດກ້າວໜຶ່ງກ່ຽວກັບທິດນຳ “ພັກນຳພາ ລັດຄຸ້ມຄອງ ປະຊາຊົນເປັນເຈົ້າ” ໃນເງື່ອນໄຂ ສະພາບການໃໝ່.
ທີສອງ, ກ່ຽວກັບລະບຽບແບບແຜນເອກະສານກໍ່ຕ້ອງຊັ່ງຊາ ເລືອກເຝັ້ນເພື່ອກຳນົດຂອບເຂດ ເປົ້າໝາຍ ຮູບການຕິດຕາມກວດກາ ຕິຊົມສັງຄົມ ປະກອບຄວາມຄິດເຫັນ ຄືແນວໃດໃຫ້ມີປະສິດທິຜົນ ແທດເໝາະຕົວຈິງ, ຫຼີດລ່ຽງການເຮັດແບບຮູບການ ສັບໃຂວ່ກັນທາງດ້ານພາລະບົກບາດ ໜ້າທີ່, ຈັດຕັ້ງກົງຈັກຢ່າງພະລຸງພະລັງ ຟຸມເຟືອຍ ຄວາມຮັບຜິດຊອບບໍ່ຈະແຈ້ງ. ອີງໃສ່ເນື້ອໃນໜ້າທີ່ ເຊິ່ງມະຕິກອງປະຊຸມສູນກາງຄັ້ງທີ 4 ສະໄໝທີ XI ຮຽກຮ້ອງຕ້ອງການນັ້ນ ອາດຈະຄິດເຖິງໜັງສືນິຕິກຳ 3 ປະເພດທີ່ຕ້ອງກະກຽມ ປະກາດໃຊ້. ໜຶ່ງ, ຂໍ້ກຳນົດກ່ຽວກັບການຕິດຕາມກວດກາ ຂອງແນວໂຮມແຫ່ງຊາດດວຽດນາມ ແລະ ບັນດາອົງຄະນະການເມືອງ-ສັງຄົມ. ສອງ, ຂໍ້ກຳນົດກ່ຽວກັບການຕິຊົມສັງຄົມ ຂອງແນວໂຮມແຫ່ງຊາດດວຽດນາມ ແລະ ບັນດາອົງຄະນະການເມືອງ-ສັງຄົມ. ສາມ, ກົນໄກເພື່ອໃຫ້ແນວໂຮມແຫ່ງຊາດດວຽດນາມ ບັນດາອົງຄະນະການເມືອງ-ສັງຄົມ ແລະ ປະຊາຊົນ ເຂົ້າຮ່ວມການປະກອບຄວາມເຫັນກໍ່ສ້າງພັກ ກໍ່ສ້າງອຳນາດການປົກຄອງ. ແຕ່ວ່າ, ໃນມະຕິຄັ້ງນີ້ ຍັງບໍ່ທັນເວົ້າຢ່າງຈະແຈ້ງເຖິງບັນຫາຕ່າງໆເຊັ່ນ: ຕິດຕາມກວດກາຫຍັງແດ່, ຕິດຕາມກວດກາໃຜ; ຕິຊົມຕໍ່ເນື້ອໃນຫຍັງແດ່, ຕິຊົມຕໍ່ການຈັດຕັ້ງ ອົງການໃດແດ່; ປະກອບຄວາມເຫັນໃຫ້ໃຜ, ຮູບການປະກອບຄວາມເຫັນ ກໍ່ຄືການຮັບເອົາ ການຕອບຂອງສຳນັກງານ ອົງການຈັດຕັ້ງ ບຸກຄົນ ທີ່ຖືກຕິດຕາມກວດກາ ຕິຊົມ ປະກອບຄວາມເຫັນ.
ທີສາມ, ມີຫຼາຍໆບັນຫາສຳຄັນ ຈຳເປັນຕ້ອງການ ເຊິ່ງຕ້ອງໄດ້ກຳນົດຢ່າງລະອຽດໃນຂໍ້ກຳນົດການຕິດຕາມກວດກາ, ການຕິຊົມສັງຄົມ, ການປະກອບຄວາມຄິດເຫັນຂອງບັນດາອົງການການຈັດຕັ້ງ ບຸກຄົນຕໍ່ກັບການເຄື່ອນໄຫວຂອງບັນດາການຈັດຕັ້ງພັກ ອຳນາດການປົກຄອງຂັ້ນຕ່າງໆ ອົງການລັດ, ເຊັ່ນເປົ້າໝາຍ ເນື້ອໃນ ຂອບເຂດ ຮູບການ ວິທີການ ສິດຂອບເຂດ ຄວາມຮັບຜິດຊອບຂອງການຈັດຕັ້ງ ບຸກຄົນທີ່ຕິດຕາມກວດກາ ຕິຊົມ ກໍ່ຄືຂອງເປົ້າໝາຍທີ່ຖືກຕິດຕາມກວດກາ, ຮູບການຕິຊົມ ປະກອບຄວາມຄິດເຫັນ.
ເວົ້າຢ່າງຫຍໍ້ສັ້ນກໍ່ຄື ຂໍ້ກຳນົດກ່ຽວກັບການຕິດຕາມກວດກາ, ຂໍ້ກຳນົດກ່ຽວກັບການຕິຊົມສັງຄົມ, ຂໍ້ກຳນົດກ່ຽວກັບການປະກອບຄວາມຄິດເຫັນ ຂອງແນວໂຮມແຫ່ງຊາດຫວຽດນາມ ບັນດາອົງຄະນະການເມືອງ-ສັງຄົນ ລ້ວນແຕ່ແນໃສ່ຈຸດປະສົງເກັບກຳເອົາຄວາມຄິດເຫັນຂອງປະຊາຊົນ ໂດຍຜ່ານວຽກງານຕິດຕາມກວດກາ ຕິຊົມ ປະກອບຄວາມເຫັນ ເພື່ອກໍ່ສ້າງພັກ. ບັນດາຂໍ້ກຳນົດກົດລະບຽບນີ້ຈະເຂົ້າສູ່ຊີວິດການເປັນຢູ່ຢ່າງມີປະສິດທິຜົນຫຼືບໍ່ນັ້ນ ມັນຂຶ້ນຕໍ່ກັບປັດໃຈທີ່ມີລັກສະນະຕັດສິນ ຄືມະຫາຊົນ-ປະຊາຊົນ. ເລື່ອງນີ້ທ່ານປະທານໂຮ່ຈີມິນ ໄດ້ຂຽນໃນນິພົນ “ດັດແປງວິທີເຮັດວຽກ” ປີ 1947 ເຊິ່ງຍັງຄົງມີຄຸນຄ່າຢູ່ໃນພຶດຕິກຳປັດຈຸບັນ: “ເຊື່ອໝັ້ນປະຊາຊົນ. ນຳເອົາບັນຫາຕ່າງໆທຸກບັນຫາໃຫ້ປະຊາຊົນປຶກສາສົນທະນາ ແລະ ຊອກຫາວິທີແກ້ໄຂ. ພວກເຮົາມີຄວາມບົກພ່ອງ ກໍຕ້ອງຍອມຮັບຕໍ່ໜ້າປະຊາຊົນ. ມະຕິໃດທີ່ປະຊາຊົນເຫັນວ່າບໍ່ເໝາະ ກໍໃຫ້ເຂົາເຈົ້າສະເໜີເພື່ອແກ້ໄຂ. ອີງໃສ່ຄວາມເຫັນຂອງປະຊາຊົນເພື່ອປັບປຸງພະນັກງານ ແລະ ການຈັດຕັ້ງຂອງເຮົາ”./.
ໂດຍ ຫວູເລິນ