ລະດົມແຫຼ່ງກຳລັງ ຂອງວົງສາຄະນາຍາດຊາວຫວຽດນາມຢູ່ຕ່າງປະເທດ ຢ່າງມີປະສິທິຜົນ
ວ.ກ - ພັກກອມມູນິດຫວຽດນາມຍາມໃດກໍ່ຖືວ່າ ວົງສາຄະນະຍາດຊາວຫວຽດນາມຢູ່ຕ່າງປະເທດ ເປັນພາກສ່ວນໜຶ່ງທີ່ບໍ່ອາດຈະແຍກອອກໄດ້ ແລະ ເປັນແຫຼ່ງກຳລັງ ຂອງວົງສາຄະນາຍາດຊາດຫວຽດນາມ. ການດຶງດູດ ແລະ ເສີມຂະຫຍາຍ ແຫຼ່ງກຳລັງ ຂອງວົງສາຄະນາຍາດຊາວຫວຽດນາມຢູ່ຕ່າງປະເທດ ຢ່າງມີປະສິດທິຜົນ ຈະປະກອບສ່ວນອັນໃຫຍ່ຫຼວງ ເຂົ້າໃນພາລະກິດຍູ້ແຮງການຫັນປະເທດຊາດ ເປັນອຸດສາຫະກຳທັນສະໄໝ ແລະ ເຊື່ອມໂຍງເຂົ້າກັບສາກົນ.
.jpg)
ກອງປະຊຸມຊາວຫວຽດນາມຢູ່ຕ່າງປະເທດຄັ້ງທີ 2 ວາງທິດທາງຕ່າງໆອອກມາ ເພື່ອດຶງດູດແຫຼ່ງກຳລັງ ຂອງວົງສາຄະນາຍາດຊາວຫວຽດນາມຢູ່ຕ່າງປະເທດເວົ້າລວມ ແລະ ຂອງຖັນແຖວນັກທຸລະກິດຊາວຫວຽດນາມຢູ່ຕ່າງປະເທດເວົ້າສະເພາະ ຢ່າງມີປະສິດທິຜົນ - ແຫຼ່ງຂ່າວ: dangcongsan.vn
ປະກອບສ່ວນອັນປະເສີດທາງດ້ານສະຕິປັນຍາ
ວົງສາຄະນາຍາດຊາວຫວຽດນາມຢູ່ຕ່າງປະເທດ ມີທ່າແຮງທາງດ້ານແຫຼ່ງກຳລັງມັນສະໝອງ ສະຕິປັນຍາຂອງຜູ້ຊ່ຽວຊານ ປັນຍາຊົນເກືອບ 400.000 ຄົນ (ກວມເອົາປະມານ 10% - 15% ຂອງລວມຍອດຊາວຫວຽດນາມຢູ່ຕ່າງປະເທດ), ເຊິ່ງກວມດ້ວຍຜູ້ມີລະດັບຄວາມຮູ້ ແຕ່ມະຫາວິທະຍາໄລ ເໜືອມະຫາວິທະຍາໄລ ແລະ ບັນດາຜູ້ຊ່ຽວຊານທີ່ມີເຕັກນິກ ສີມືວິຊາຊີບສູງ ເຕົ້າໂຮມຕົ້ນຕໍຢູ່ບັນດາປະເທດຕາເວັນຕົກ. ປະກົດມີນັບມື້ນັບຫຼາຍ ຊາວຫວຽດນາມຢູ່ຕ່າງປະເທດທີ່ເປັນນັກວິທະຍາສາດ ພ້ອມກັນນັ້ນກໍເປັນທັງນັກທຸລະກິດ ທີ່ມີລະດັບຄວາມຮູ້ ມີບົດຮຽນປະສົບການໃນການຄຸ້ມຄອງ ຈັດຕັ້ງການຜະລິດ ທຸລະກິດ, ກຳແໜ້ນ ແລະ ສ້າງຕັ້ງໄດ້ການພົວພັນເປັນຢ່າງດີກັບຕະຫຼາດໂລກ, ມີຄວາມສາມາດປະກອບສ່ວນທາງດ້ານຕ່າງໆ ໃຫ້ປະເທດຊາດຫວຽດນາມ.
ໃນຫຼາຍປີທີ່ຜ່ານມາ, ຊາວຫວຽດນາມຢູ່ຕ່າງປະເທດໄດ້ຕັ້ງໜ້າມອບໂອນປັນຍາຄວາມຮູ້ ໂດຍຜ່ານການເຄື່ອນໄຫວທີ່ອຸດົມສົມບູນຫຼາຍຢ່າງເຊັ່ນ ເຂົ້າຮ່ວມໂດຍກົງໃນການສິດສອນ ຮຽບຮຽງຫຼັກສູດການສອນ; ສະໜອງຂໍ້ມູນຂ່າວສານ ເອກະສານ ບົດຮຽນປະສົບການ,… ໃນແຕ່ລະປີ ມີຜູ້ຊ່ຽວຊານປັນຍາຊົນຫຼາຍຄົນທີ່ເປັນຊາວຫວຽດນາມຢູ່ຕ່າງປະເທດ, ຕົ້ນຕໍແມ່ນຢູ່ບັນດາປະເທດຈະເລີນພັດທະນາເຊັ່ນ ອາເມລິກາ ຝຣັ່ງ ເຢຍລະມັນ ຍີ່ປຸ່ນ,... ກັບເມືອຫວຽດນາມເພື່ອສິດສອນ ຮ່ວມມືຄົ້ນຄວ້າ ຮ່ວມກອງປະຊຸມສຳມະນາ ເຂົ້າຮ່ວມບັນດາໂຄງການຮ່ວມມືສາກົນ ກັບບັນດາອົງການສະເພາະຂະແໜງການ ໂຮງຮຽນມະຫາວິທະຍາໄລ ບັນດາສະຖາບັນຄົ້ນຄວ້າ ໂຮງພະຍາບານຢູ່ຫວຽດນາມ. ໃນບັນດາຂົງເຂດເສດຖະກິດ ເຕັກໂນໂລຊີນິວເຄຼຍ ຄະນິດສາດ ການສຶກສາ ເຕັກໂນໂລຊີສື່ສານ ວາງແຜນສະຖາປັດຕະຍະກຳ ການກະສິກຳ ຊີວະວິທະຍາ ວັດຖຸອຸປະກອນໃໝ່,…ຂອງຫວຽດນາມ ລ້ວນແຕ່ມີການເຂົ້າຮ່ວມຂອງຜູ້ຊ່ຽວຊານ ປັນຍາຊົນຊາວຫວຽດຫວຽດນາມຢູ່ຕ່າງປະເທດ.
ບັນດາຕົວແບບການຄົ້ນຄວ້າ - ປະຢຸກໃຊ້, ມອບໂອນເຕັກໂນໂລຊີ, ກໍ່ສ້າງແຫຼ່ງກຳລັງຄົນຄຸນນະພາບສູງຂອງຫວຽດນາມ ທີ່ມີການເຂົ້າຮ່ວມໂດຍກົງຂອງນັກວິທະຍາສາດປັນຍາຊົນທີ່ລືຊື່ ກໍ່ໄດ້ປະກົດຂຶ້ນແລ້ວ ເຊັ່ນສູນສາກົນເພື່ອການພົບປະຂອງວິທະຍາສາດລະຫວ່າງຂະແໜງ ຢູ່ກູຍເຍິນ (ດ້ວຍການປະກອບສ່ວນຂອງ ສຈ. ເຈິ່ນແທງເວິນ - ຊາວຫວຽດນາມຢູ່ ຝຣັ່ງ); ສະຖາບັນຄົ້ນຄວ້າຊັ້ນສູງກ່ຽວກັບຄະນິດສາດ (ສຈ. ໂງບ໋າວເຈົາ); ສະຖາບັນວິທະຍາສາດ ແລະ ເຕັກໂນໂລຊີການຄຳນວນ (ສຈ. ເຈືອງຫງ້ວຽນແທ່ງ - ຊາວຫວຽດນາມຢູ່ອາເມລິກາ); ໂຮງຮຽນນັກທຸລະກິດການຄ້າ (ດຣ. ຫງວຽນຈີ໋ຢຸ໊ງ - ຊາວຫວຽດນາມຢູ່ຍີ່ປຸ່ນ);...
ນອກຈາກນັ້ນ, ຊາວຫວຽດນາມຢູ່ຕ່າງປະເທດຍັງເປັນກຳລັງໂຄສະນາເຜີຍແຜ່ວັດທະນະທຳ ຮູບພາບປະເທດ ແລະ ຄົນຫວຽດນາມ ໃຫ້ທົ່ວໂລກຮູ້ເຫັນ ຢ່າງໄວທີ່ສຸດ ມີປະສິດທິຜົນທີ່ສຸດ.
ປະກອບສ່ວນທາງດ້ານແຫຼ່ງກຳລັງເສດຖະກິດໄດ້ຫຼາຍພໍຄວນ
ໃນຊຸມປີມໍ່ໆມານີ້, ກຳລັງນັກທຸລະກິດຊາວຫວຽດນາມຢູ່ຕ່າງປະເທດ ໄດ້ຂະຫຍາຍຕົວທັງທາງດ້ານຈຳນວນ ພາກສ່ວນປະກອບ ບໍລິເວນອາໄສ ກຳລັງບົ່ມຊ້ອນແລະຖານະສັງຄົມ,... ນັກທຸລະກິດຊາວຫວຽດນາມປັດຈຸບັນພວມມີໜ້າຢູ່ເກືອບທົ່ວທຸກປະເທດ ແລະ ອານາເຂດ, ແຕ່ບັນດາປະເທດຈະເລີນພັດທະນາຄືອາເມລິກາ (ມີວິສາຫະກິດຂອງຊາວຫວຽດນາມປະມານ 170.000 ກວ່າແຫ່ງ) ຈົນເຖິງບັນດາໝູ່ເກາະ ຫຼືປະເທດຢູ່ອາເມລະກາໃຕ້ ຕາເວັນອອກກາງ ທະວີບອາຟຣິກກາ,... ພາກສ່ວນ ໂຄງປະກອບ ແລະ ການເຄື່ອນໄຫວນັບມື້ນັບມີຫຼາຍຮູບຫຼາຍແບບກວ່າເກົ່າ.
ໃນສະພາບການວິກິດການການເງິນ - ເສດຖະກິດໂລກປັດຈຸບັນ, ເບິ່ງລວມ, ນັກທຸລະກິດຊາວຫວຽດນາມຢູ່ຕ່າງປະເທດໄດ້ ແລະ ພວມພະຍາຍາມຜ່ານຜ່າຄວາມຫຍຸ້ງຍາກ, ຮັກສາການເຄື່ອນໄຫວຢ່າງເປັນປົກກະຕິຢູ່ໃນຕະຫຼາດທີ່ຕົນຕັ້ງຢູ່; ບາງວິສາຫະກິດມີທ່າອ່ຽງຍົກຍ້າຍການທຸລະກິດ ການລົງທຶນມາຢູ່ຫວຽດນາມ.
ດ້ວຍກຳລັງ ແລະ ຄວາມສາມາດບົ່ມຊ້ອນນັບມື້ນັບເຕີບໃຫຍ່ເຂັ້ມແຂງ, ຊາວຫວຽດນາມຢູ່ຕ່າງປະເທດ, ກ່ອນອື່ນແມ່ນກຳລັງປັນຍາຊົນ ແລະ ນັກທຸລະກິດ, ໄດ້ຕັ້ງໜ້າປະກອບສ່ວນເຂົ້າຮ່ວມກັບປະເທດຊາດໃນຫຼາຍຂົງເຂດ ເຊິ່ງຈະແຈ້ງທີ່ສຸດແມ່ນການປະກອບສ່ວນຕ່າງໆ ທາງດ້ານເສດຖະກິດ ໂດຍຜ່ານການໂອນເງິນ ແລະ ການລົງທຶນຂອງຊາວຫວຽດກ່ຽວ ເມືອໃນປະເທດ. ນີ້ແມ່ນແຫຼ່ງທຶນຫຼາຍພໍສົມຄວນທີ່ໄດ້ປະກອບສ່ວນໃນການລົບລ້າງຄວາມອຶດຫີວ ຫລຸດຜ່ອນຄວາມທຸກຈົນ ສ້າງວຽກເຮັດງານທຳ ຂະຫຍາຍຂະແໜງການອາຊີບ ຊຸກຍູ້ຄວາມເຕີບໂຕເສດຖະກິດຢູ່ຫຼາຍທ້ອງຖິ່ນ, ເພີ່ມເຕີມເງິນຕາຕ່າງປະເທດຈຳນວນໜຶ່ງໃຫ້ປະເທດ ແລະ ປະກອບພາສີອາກອນໃຫ້ງົບປະປະມານແຫ່ງລັດຫວຽດນາມ.
ມາເຖິງປັດຈຸບັນ ມີ 51 ໃນຈຳນວນ 63 ແຂວງ/ນະຄອນ ໃນທົ່ວປະເທດຫວຽດນາມໄດ້ດຶງດູດບັນດາໂຄງການລົງທຶນຂອງຊາວຫວຽດນາມຢູ່ຕ່າງປະເທດ, ດ້ວຍ 3.546 ວິສາຫະກິດ ທີ່ມີທຶນລົງທະບຽນທຸລະກິດ ແລະ ທຶນປະກອບຂອງຊາວຫວຽດກ່ຽວ ປະມານ 8,4 ຕື້ໂດລາສະຫະລັດ, ຕົ້ນຕໍແມ່ນມາຈາກອາເມລິກາ ການາດາ ໂອສະເຕີເລຍ ຣັດເຊຍ ຝຣັ່ງ ໂຮນແລນ ແຊັກ ຍີ່ປຸ່ນ,... ວິສາຫະກິດເຫຼົ່ານັ້ນເຕົ້າໂຮມໃນບັນດາຂົງເຂດເຊັ່ນ ບໍລິການ (ໂຮງແຮມ ຮ້າອາຫານ ທ່ອງທ່ຽວ), ອະສັງຫາລິມະຊັບ, ລ້ຽງປູກສິນໃນນ້ຳ, ປຸງແຕ່ງ ສົ່ງນອກເຄື່ອງທະເລ ສິນໃນນ້ຳ, ບໍລິການນ້ຳມັນແກັດ, ຜະລິດໄຟຟ້າ, ເຕັກໂນໂລຊີຊອບແວ... ດ້ວຍກຳລັງບົ່ມຊ້ອນດ້ານການເງິນຂອງຕົນ, ຫຼາຍວິສາຫະກິດ ນັກທຸລະກິດຊາວຫວຽດນາມຫຼາຍຄົນຢູ່ຕ່າງປະເທດ ໄດ້ນຳເອົາຫຼາຍໂຄງການລົງທຶນຂະໜາດໃຫຍ່ເມືອໃຫ້ປະເທດ.
ລະດົມການປະກອບສ່ວນຂອງຊາວຫວຽດນາມຢູ່ຕ່າງປະເທດ ໃຫ້ມີປະສິດທິຜົນຫຼາຍກວ່າອີກ
ເພື່ອຍູ້ແຮງການລະດົມກຳລັງບົ່ມຊ້ອນດ້ານເສດຖະກິດ ແລະ ສະຕິປັນຍາຂອງວົງສາຄະນາຍາດຊາວຫວຽດນາມຢູ່ຕ່າງປະເທດ, ໃນປີ 2013 ແລະ ຊຸມປີຕໍ່ໄປ ຕ້ອງຜັນຂະຫຍາຍຢ່າງຕັ້ງໜ້າບັນດາຫຍ່ອມນະໂຍບາຍລຸ່ມນີ້:
ທີໜຶ່ງ, ສືບຕໍ່ປັບປຸງບັນດາຂອບກົດໝາຍໃຫ້ສົມບູນແບບ, ກ່ອນອື່ນໝົດແມ່ນຫັນເປັນນິຕິກຳຕໍ່ມະຕິໝາຍເລກ 36-NQ/TW ຂອງກົມການເມືອງແຫ່ງປະເທດ ສສ ຫວຽດນາມ ວ່າດ້ວຍວຽກງານຕໍ່ກັບຊາວຫວຽດນາມຢູ່ຕ່າງປະເທດ ແນໃສ່ສ້າງໃຫ້ມີຄວາມຄົບຊຸດ ສະເໝີຕົ້ນສະເໝີປາຍໃນທົ່ວທັງລະບົບການເມືອງຕໍ່ກັບວຽກງານນີ້. ກົດໝາຍວ່າດ້ວຍການລົງທຶນ ກົດໝາຍທີ່ດິນສະບັບປັບປຸງທີ່ຈະມາເຖິງນີ້ ແລະ ບັນດານະໂຍບາຍຮັກສາສະຖຽນລະພາບເສດຖະກິດມະຫາພາກ ກໍ່ຄືຄວາມຕັດສິນໃຈປະຕິຮູບລະບຽບການບໍລິຫານຂອງລັດທະບານຫວຽດນາມ ຈະສ້າງສິ່ງແວດລ້ອມການລົງທຶນທີ່ສະດວກດີ ລຸລ່ວງກວ່າອີກ ໃຫ້ນັກລົງທຶນເວົ້າລວມ ແລະ ຊາວຫວຽດນາມຢູ່ຕ່າງປະເທດເວົ້າສະເພາະ, ພິເສດແມ່ນບັນດານັກລົງທຶນຊາວຫວຽດກ່ຽວ ສາມາດເລືອກເຝັ້ນເອົາເອງວ່າຈະເປັນນັກລົງທຶນຕ່າງປະເທດ ຫຼືເປັນນັກລົງທຶນພາຍໃນປະເທດ, ໄດ້ຮັບຄວາມງ່າຍດາຍດ້ານລະບຽບການລົງທຶນ, ບໍ່ຖືກຈຳກັດໃນບາງຂົງເຂດ ຂອບເຂດການລົງທຶນ.
ທີສອງ, ຄວນປະກາດໃຊ້ໂດຍໄວບັນດານະໂຍບາຍ ມາດຕະການດຶງດູດຜູ້ຊ່ຽວຊານ ປັນຍາຊົນຊາວຫວຽດກ່ຽວ ເຂົ້າໃນການສ້າງສາພັດທະນາປະເທດ ເຊິ່ງຈຸດໜັກແມ່ນສ້າງຕັ້ງຄະນະຊີ້ນຳແຫ່ງຊາດ, ສ້າງນະໂຍບາຍດຶງດູດຜູ້ຊ່ຽວຊານ ປັນຍາຊົນລະດັບສູງ ໃຫ້ເຂົ້າຮ່ວມການພັດທະນາເສດຖະກິດ - ສັງຄົມ, ແກ້ໄຂບັນດາບັນຫາສຳຄັນຂອງປະເທດ. ຂະຫຍາຍກວ້າງ ທະວີຄູນບັນດາຕົວແບບລົງທຶນ - ຄົ້ນຄວ້າ - ປະຢຸກໃຊ້ - ກໍ່ສ້າງ ມອບໂອນເຕັກໂນໂລຊີຂອງຊາວຫວຽດນາມຢູ່ຕ່າງປະເທດ.
ທີສາມ, ສືບຕໍ່ຄົ້ນຄວ້າ ແລະ ປັບປຸງບູລະນະຍິ່ງກວ່າອີກ ກ່ຽວກັບລະບົບນະໂຍບາຍ ແລະ ກົນໄກ ຮັບປະກັນສິດຜົນປະໂຫຍດອັນຊອບທຳ ຂອງນັກທຸລະກິດຊາວຫວຽດນາມຢູ່ຕ່າງປະເທດ, ສ້າງເງື່ອນໄຂອຳນວຍຄວາມສະດວກໃຫ້ພໍ່ແມ່ພີ່ນ້ອງໄດ້ເຂົ້າຮ່ວມການສ້າງສາພັດທະນາປະເທດ. ເພີ່ມທະວີການຕິດຕໍ່ກັບວົງສາຄະນາຍາດຊາວຫວຽດນາມຢູ່ຕ່າງປະເທດ, ຍູ້ແຮງວຽກງານກວດກາ ກວດການ, ວຽກງານຄຸ້ມຄອງ ສະຖິຕິ ເກັບກຳຂໍ້ມູນຂ່າວສານເປັນປະຈຳ, ແກ້ໄຂຄວາມຫຍຸ້ງຍາກ ສິ່ງຄົງຄ້າງຕ່າງໆຢ່າງທັນການ ເມື່ອຊາວຫວຽດນາມກັບເມືອປະເທດເຮັດວຽກ ລົງທຶນທຳການທຸລະກິດ.
ທີສີ່, ປະຕິບັດການປຸກລະດົມກຳລັງໃຈ ຍ້ອງຍໍໃຫ້ລາງວັນ ຍົກຍ້ອງກຽດສັກສີຢ່າງທັນການ ຕໍ່ປັນຍາຊົນ ວິສາຫະກິດ ແລະ ນັກທຸລະກິດຊາວຫວຽດນາມຢູ່ຕ່າງປະເທດ ທີ່ດີເດັ່ນ ມີການປະກອບສ່ວນຫຼາຍຢ່າງໃຫ້ແກ່ປະເທດຊາດ.
ທີຫ້າ, ວຽກງານຂົນຂວາຍຊາວຫວຽດນາມຢູ່ຕ່າງປະເທດ ຕ້ອງໄດ້ຍູ້ແຮງຢູ່ທຸກຂະແໜງການ ທຸກຂັ້ນ, ແຕ່ສູນກາງ ເຖິງທ້ອງຖິ່ນຕ່າງໆ, ທັງຢູ່ໃນປະເທດ ແລະ ຢູ່ຕ່າງປະເທດ; ພິເສດ, ຜ່ານບັນດາສາຍພົວພັນຍາດຕິພີ່ນ້ອງ, ບັນດາສະມາຄົມໄທບ້ານດຽວກັນ ສະມາຄົນພົວພັນຕິດຕໍ່, ບັນດາວົງການວິທະຍາສາດ ວົງການທຸລະກິດ ແນໃສ່ອຳນວຍຄວາມສະດວກເພື່ອໃຫ້ຊາວຫວຽດນາມຢູ່ຕ່າງປະເທດ ນັບມື້ນັບພົວພັນສະໜິດແໜ້ນກັບບ້ານເກີດເມືອງນອນ ປະເທດຊາດບ້ານເມືອງ. ລະອຽດຄື: ຈັດຕັ້ງການສື່ຂ່າວຢ່າງເປັນປະຈຳໃຫ້ຊາວຫວຽດນາມຢູ່ຕ່າງປະເທດຮັບຊາບ ກ່ຽວກັບການພັດທະນາເສດຖະກິດ - ສັງຄົມຂອງປະເທດ ແລະ ຂອງທ້ອງຖິ່ນຕ່າງໆ; ຊ່ວຍໜູນໃຫ້ນັກທຸລະກິດ ປັນຍາຊົນຊາວຫວຽດນາມຢູ່ຕ່າງປະເທດກັບເມືອປະເທດເຮັດວຽກ ຮ່ວມມືລົງທຶນ ຕິດຕໍ່ແລກປ່ຽນ ສ້າງສາຍພົວພັນກັບບັນດາອົງການສຳນັກງານໃນປະເທດ; ຕອບສະໜອງຄວາມຄິດຈິດໃຈ ຄວາມມຸ່ງມາດປາຖະໜາອັນຊອບທຳ ແລະ ຮັບປະກັນສິດຜົນປະໂຫຍດອັນຊອບທຳຂອງຊາວຫວຽດກ່ຽວ ຢູ່ຫວຽດນາມ...
ປະຕິບັດບັນດາມາດຕະການເທິງນີ້ໄດ້ດີ ຈະປະກອບສ່ວນປັບປຸງສັນທາຄະຕິຂອງຊາວຫວຽດນາມຢູ່ຕ່າງປະເທດ ຕໍ່ກັບປະເທດຊາດບ້ານເມືອງ, ດຶງດູດເອົາແຫຼ່ງມັນສະໝອງ ແຫຼ່ງກຳລັງເສດຖະກິດ ກໍ່ຄືທີ່ຕັ້ງ ຜົນສະທ້ອນຂອງວົງສາຄະນາຍາດຊາວຫວຽດນາມຢູ່ຕ່າງປະເທດ, ປະກອບສ່ວນເຂົ້າໃນພາລະກິດການພັດທະນາປະເທດ ແລະ ເຊື່ອມໂຍງເຂົ້າກັບສາກົນ, ຂະຫຍາຍສາຍພົວພັນມິດຕະພາບ ແລະ ການຮ່ວມມືລະຫວ່າງປະຊາຊົນຊາຫວຽດນາມ ກັບປະຊາຊົນບັນດາປະເທດ./.
