ກອງປະຊຸມປະກາດລາຍງານ “ຫວຽດນາມ: ອຳນວຍຄວາມສະດວກໃຫ້ແກ່ການຄ້າ, ສ້າງຄຸນຄ່າແລະກຳລັງຄວາມສາມາດແກ່ງແຍ້ງ” ຮ່າໂນ້ຍ ວັນທີ 4 ກໍລະກົດ 2013 - ຮູບຂອງ: ມິງເຟືອງ
ສະພາບການສົ່ງອອກ ນຳເຂົ້າສິນຄ້າ ແລະ ດຸນການຄ້າຂອງຫວຽດນາມປີ 2012
ການສົ່ງອອກສິນຄ້າ
ຕາມຕົວເລກຂອງສະຫະກົມສະຖິຕິ, ມູນຄ່າສິນຄ້າຂາອອກຂອງຫວຽດນາມປີ 2012 ບັນລຸ 114,6 ຕື້ໂດລາສະຫະລັດ, ເພີ່ມ 18,3% ທຽບກັບປີ 2011, ໃນນັ້ນຂົງເຂດເສດຖະກິດໃນປະເທດ ບັນລຸ 42,3 ຕື້ໂດລາສະຫະລັດ, ເພີ່ມ 1,3%; ຂົງເຂດມີການລົງທຶນຂອງຕ່າງປະເທດ (ກວມທັງນ້ຳມັນດິບ) ບັນລຸ 72,3 ຕື້ໂດລາສະຫະລັດ, ເພີ່ມ 31,2%.
ກ່ຽວກັບໂຄງປະກອບສິນຄ້າສົ່ງອອກ, ຫຍ່ອມສິນຄ້າອຸດສາຫະກຳໜັກ ແລະ ແຮ່ທາດ ຄາດກະບັນລຸປະມານ 51,7 ຕື້ໂດລາສະຫະລັດ, ເພີ່ມ 49,9% ແລະ ກວມເອົາ 45,1%. ຫຍ່ອມສິນຄ້າອຸດສາຫະກຳເບົາ ແລະ ຫັດຖະກຳ ບັນລຸ 39 ຕື້ໂດລາສະຫະລັດ, ເທົ່າກັບປີ 2011, ແຕ່ອັດຕາສ່ວນພັດຫລຸດລົງ ຈາກ 40,3% (ປີ 2011) ລົງເປັນ 34,1% (ປີ 2012). ຫຍ່ອມສິນຄ້າກະສິກຳ ແລະ ເຄື່ອງປ່າຂອງດົງ ບັນລຸ 17,7 ຕື້ໂດລາສະຫະລັດ, ເພີ່ມ 18% ທຽບກັບປີກ່ອນ, ແຕ່ອັດຕາສ່ວນບໍ່ປ່ຽນແປງ ຄື 15,4%. ຫຍ່ອມສິນຄ້າສິນໃນນ້ຳ ບັນລຸ 6,2 ຕື້ໂດລາສະຫະລັດ, ເກືອບເທົ່າກັບປີ 2011 ແລະ ອັດຕາສ່ວນຫລຸດລົງ ຈາກ 6,3% (ປີ 2011) ລົງເປັນ 5,4% (ປີ 2012).
ກ່ຽວກັບຕະຫຼາດສິນຄ້າສົ່ງອອກ, ປີ 2012, ອີຢູ ເປັນຕະຫຼາດສິນຄ້າຂາເຂົ້າໃຫຍ່ກວ່າໝູ່ ຈາກຫວຽດນາມ ດ້ວຍມູນຄ່າ 20,3 ຕື້ໂດລາສະຫະລັດ, ເພີ່ມ 22,5% ທຽບກັບປີ 2011 ແລະ ກວມເອົາ 17,7% ລວມຍອດມູນຄ່າສິນຄ້າຂາອອກ; ຕໍ່ລົງມາແມ່ນ ອາເມລິກາ ອາຊຽນ ຍີ່ປຸ່ນ ຈີນ.
ການນຳເຂົ້າສິນຄ້າ
ມູນຄ່າສິນຄ້າຂາເຂົ້າປີ 2012 ຄາດກະບັນລຸ 114,3 ຕື້ໂດລາສະຫະລັດ, ເພີ່ມ 7,1% ທຽບກັບປີ 2011, ໃນນັ້ນ ຂົງເຂດເສດຖະກິດພາຍໃນປະເທດ ບັນລຸ 54 ຕື້ໂດລາສະຫະລັດ, ຫລຸດລົງ 6,7%; ຂົງເຂດມີການລົງທຶນຂອງຕ່າງປະເທດ ບັນລຸ 60,3 ຕື້ໂດລາສະຫະລັດ, ເພີ່ມ 23,5%. ລະດັບເພີ່ມມູນຄ່າຂາເຂົ້າປີ 2012 ບັນລຸລະດັບຕ່ຳທີ່ສຸດນັບແຕ່ປີ 2002 ມາເຖິງປັດຈຸບັນ (ບໍ່ນັບປີ 2009). ຖ້າຫາກຍົກເວັ້ນປັດໃຈລາຄາ, ມູນຄ່າສິນຄ້າຂາເຂົ້າປີ 2012 ເພີ່ນ 7,4% ທຽບກັບປີ 2011.
ພິຈາລະນາຕາມຫຍ່ອມສິນຄ້າຂາເຂົ້າ, ຫຍ່ອມວັດຖຸອຸປະກອນການຜະລິດ ຄາດກະບັນລຸ 106,5 ຕື້ໂດລາສະຫະລັດ, ກວມເອົາອັດຕາສ່ວນສູງທີ່ສຸດ ຄື 93,2%, ເພີ່ມຂຶ້ນທຽບກັບລະດັບ 90,6% ຂອງປີ 2011.
ກ່ຽວກັບສິນຄ້າຂາເຂົ້າ, ປະເພດສິນຄ້າທີ່ມີມູນຄ່າເພີ່ມຂຶ້ນຄື: ເຄື່ອງເອເລັກໂຕຣນິກ, ເຄື່ອງກອມປິວເຕີ ແລະ ສິ້ນສ່ວນປະກອບ ບັບລຸ 13,1 ຕື້ໂດລາສະຫະລັດ, ເພີ່ມ 66,8%; ແຜ່ນແພ ບັນລຸ 7 ຕື້ໂດລາສະຫະລັດ, ເພີ່ມ 4,7%... ປະເພດສິນຄ້າທີ່ມີມູນຄ່າຫລຸດລົງຄື: ນ້ຳມັນເຊື້ອໄຟ ບັນລຸ 8,9 ຕື້ໂດລາສະຫະລັດ, ຫລຸດລົງ 10%; ຝຸ່ນເຄມີ: 1,6 ຕື້ໂດລາສະຫະລັດ, ຫລຸດລົງ 7,9%; ເຫຼັກກ້າ: 6 ຕື້ໂດລາສະຫະລັດ, ຫລຸດລົງ 7%...
ກ່ຽວກັບຕະຫຼາດສິນຄ້າຂາເຂົ້າ, ຈີນເປັນຕະຫຼາດທີ່ສະໜອງສິນຄ້າຫຼາຍກວ່າໝູ່ໃຫ້ຫວຽດນາມ ດ້ວຍມູນຄ່າ 28,9 ຕື້ໂດລາສະຫະລັດ, ເພີ່ມ 17,6% ທຽບກັບປີ 2011, ກວມເອົາ 25,3% ລວມຍອດມູນຄ່າສິນຄ້າຂາເຂົ້າ; ຕໍ່ລົງມາແມ່ນ ອາຊຽນ ສ.ເກົາຫຼີ ຍີ່ປຸ່ນ ອີຢູ ອາເມລິກາ.
ລາຄາສິນຄ້າຂາອອກ ຂາເຂົ້າ
ປີ 2012, ຍ້ອນຜົນສະທ້ອນຂອງວິກິດການເສດຖະກິດໂລກ ດັ່ງນັ້ນຄວາມຕ້ອງການສິນຄ້າຂາເຂົ້າຖືກຝືດເຄືອງ, ລາຄາສິນຄ້າໂລກຖືກຕົກຕ່ຳ, ເປັນຕົ້ນແມ່ນສິນຄ້າພື້ນຖານ, ເພາະສະນັ້ນ ລາຄາສິນຄ້າຂາອອກ ຂາເຂົ້າຂອງຫວຽດນາມກໍ່ບໍ່ນອນຢູ່ນອກທ່າອຽງນີ້. ດັດຊະນີລາຄາສິນຄ້າຂາອອກຫລຸດລົງ 0,54% ແລະ ດັດຊະນີລາຄາສິນຄ້າຂາເຂົ້າຫລຸດລົງ 0,33% ທຽບກັບປີ 2011.
ດຸນການຄ້າ
ຕາມຕົວເລກຂອງສະຫະກົມສະຖິຕິ, ປີ 2012 ເປັນປີທຳອິດນັບແຕ່ປີ 1993 ທີ່ຫວຽດນາມໄດ້ບັນລຸການລື່ນເຫຼືອທາງດ້ານການຄ້າຂາອອກ ດ້ວຍການຂາອອກຫຼາຍກວ່າຂາເຂົ້າ 284 ລ້ານໂດລາສະຫະລັດ, ທັງນີ້ກໍ່ຍ້ອນການຂາອອກເພີ່ມຂຶ້ນຢ່າງແຂງແຮງ (18,3%) ແລະ ບັນລຸມູນຄ່າ 114,6 ຕື້ໂດລາສະຫະລັດ, ໃນເວລານັ້ນການຂາເຂົ້າເພີ່ມຂຶ້ນໜ້ອຍກວ່າ (7,1%) ແລະ ບັນລຸມູນຄ່າ 114,3 ຕື້ໂດລາສະຫະລັດ. ການຂາອອກລື່ນເຫຼືອນັ້ນ ຕົ້ນຕໍແມ່ນຂອງຂົງເຂດທີ່ມີການລົງທຶນຂອງຕ່າງປະເທດ.
ຂໍ້ສັງເກດຈຳນວນໜຶ່ງ
ອາດຈະເວົ້າໄດ້ວ່າ, ການຂາອອກລື່ນເຫຼືອ ແມ່ນຜົນສຳເລັດທີ່ໜ້າຊົມເຊີຍ, ແມ່ນຈຸດເຫຼືອງເຫຼື້ອມຂອງເສດຖະກິດຫວຽດນາມໃນປິ 2012. ບັນດາໝາກຜົນອັນຕັ້ງໜ້າຂອງການຄ້າຂາອອກ ຂາເຂົ້າໃນປີ 2012 ນັ້ນ ແມ່ນຕ້ອງເວົ້າເຖິງ: ຄວາມຂະຫຍັນຂັນເຄື່ອນຂອງການສົ່ງອອກສິນຄ້າ ດ້ວຍຄວາມໄວສູງ (18,3%), ໄວກວ່າການນຳເຂົ້າສິນຄ້າ ທົບ 2,57 ເທື່ອ; ໂຄງປະກອບສິນຄ້າຂາອອກໄດ້ຮັບການປົວແປງຢ່າງແຂງແຮງ; ສິນຄ້າຂາອອກຂອງຫວຽດນາມ ທີ່ສົ່ງໄປໃຫ້ບັນດາຕະຫຼາດ ອາເມລິກາ ຍີ່ປຸ່ນ ອີຢູ ໄດ້ເພີ່ມຂຶ້ນຫຼາຍ; ການນຳເຂົ້າສິນຄ້າກໍ່ມີຈຸດດີຫຼາຍຢ່າງ,...
ແຕ່ຫາກວ່າ, ການຂາອອກລື່ນເຫຼືອຂອງຫວຽດນາມກໍ່ບໍ່ມີລັກສະນະໝັ້ນທ່ຽງ.
ວິທີແກ້ຕົ້ນຕໍເພື່ອຍູ້ແຮງການຂາອອກ, ຮັກສາດຸນການຄ້າແບບຕັ້ງໜ້າ ໃນປີ 2013
ເພື່ອປະກອບສ່ວນປະຕິບັດຈຸດໝາຍສັງລວມກ່ຽວກັບເສດຖະກິດ - ສັງຄົມ ຂອງທົ່ວປະເທດໃນປີ 2013, ຈຸດໝາຍການຄ້າຂາອອກ ຂາເຂົ້າ ທີ່ຂະແໜງການອຸດສາຫະກຳການຄ້າສູ້ຊົນປະຕິບັດຄືດັ່ງນີ້:
- ລວມຍອດມູນຄ່າສິນຄ້າຂາອອກປີ 2013 ບັນລຸປະມານ 126,1 ຕື້ໂດລາສະຫະລັດ, ເພີ່ມ 10% ທຽບກັບປີ 2012; ລວມຍອດມູນຄ່າສິນຄ້າຂາເຂົ້າ ຄາດກະບັນລຸປະມານ 136 ຕື້ໂດລາສະຫະລັດ, ເພີ່ມ 19% ທຽບກັບປີ 2012.
- ອັດຕາສ່ວນການຂາເຂົ້າລື່ນເຫຼືອ ທຽບກັບລວມຍອດມູນຄ່າສິນຄ້າຂາອອກ ຢູ່ໃນລະດັບ 8%.
ວິທີແກ້ຕົ້ນຕໍເພື່ອຍູ້ແຮງການຄ້າຂາອອກ, ກວດກາການຄ້າຂາເຂົ້າ, ຮັບປະກັນໃຫ້ດຸນການຄ້າມີຄວາມໝັ້ນທ່ຽງ
- ຍູ້ແຮງການຜັນຂະຫຍາຍບັນດາວິທີແກ້ໄຂການພັດທະນາຕະຫຼາດ, ສ້າງເງື່ອນໄຂອຳນວຍຄວາມສະດວກໃຫ້ບັນດາວິສາຫະກິດເປີດກວ້າງການຂາອອກ; ເພີ່ມທະວີການເຄື່ອນໄຫວສົ່ງເສີມການຄ້າ, ມີວິທີແກ້ທີ່ຕັ້ງໜ້າເພື່ອຊ່ວຍໜູນບັນດາຂະແໜງສິນຄ້າຂາອອກທີ່ເປັນກຳລັງຫຼວງ ມີທ່າດີ ມີຕະຫຼາດ ແລະ ມີຄວາມສາມາດແກ່ງແຍ້ງ,...
- ເພີ່ມທະວີການສົມທົບລະຫວ່າງບັນດາກະຊວງ ຂະແໜງການ ເພື່ອສຸມໃສ່ຜັນຂະຫຍາຍບັນດາມາດຕະການແກ້ໄຂຄວາມຫຍຸ້ງຍາກໃຫ້ວິສາຫະກິດ ໃນການຜະລິດ ການທຸລະກິດ ການຂາອອກ, ໃຫ້ບຸລິມະສິດທຶນສິນເຊື່ອ ເພື່ອຮັບໃຊ້ໃຫ້ແກ່ການພັດທະນາ ການຜະລິດ ທຸລະກິດ ການກະສິກຳ ການຂາອອກ ອຸດສາຫະກຳສະໜັບສະໜູນ ວິສາຫະກິດຂະໜາດນ້ອຍແລະຂະໜາດກາງ; ຍູ້ແຮງການປະຕິຮູບລະບຽບການບໍລິຫານໃຫ້ງ່າຍດາຍລຸລ່ວງ...
- ເພີ່ມທະວີການເຈລະຈາກ່ຽວກັບຄວາມຕ້ອງການເປີດກວ້າງກວ່າອີກເງື່ອນໄຂເຂົ້າເຖິງຕະຫຼາດ ແລະ ສົມທົບກັບການຂາອອກຂາເຂົ້າ ກັບບັນດາຄູ່ຮ່ວມການຄ້າຕົ້ນຕໍຂອງຫວຽດນາມ...
- ເພີ່ມທະວີຄວາມສາມາດເຂົ້າຮ່ວມ ຂອງບັນດາວິສາຫະກິດ ແລະ ບັນດາຂະແໜງຜະລິດຕະພັນຂອງຫວຽດນາມ ໃນບັນດາເຄືອຂ່າຍການຜະລິດ/ພວງພະນັງຄຸນຄ່າຂອງພາກພື້ນ ແລະ ທົ່ວໂລກ; ດຶງດູດ ແລະ ສົ່ງເສີມບັນດາບໍລິສັດຂ້າມຊາດ ໃຫ້ລົງທຶນພັດທະນາບັນດາພື້ນຖານໂຮງງານຜະລິດອຸດສາຫະກຳສະໜັບສະໜູນ, ອຸດສາຫະກຳເຕັກໂນໂລຊີສູງ, ຜະລິດສີຂຽວ,...
- ເພີ່ມທະວີການສ້າງຕັ້ງມາດຕະການເຕັກນິກດ້ານຕ່າງໆທີ່ສອດຄ່ອງກັບບັນດາຄຳໝັ້ນສັນຍາສາກົນ ເພື່ອຈຳກັດການນຳເຂົ້າບັນດາປະເພດສິນຄ້າຄຸນນະພາບຕ່ຳ, ເປັນຜົນສະທ້ອນບໍ່ດີເຖິງສິ່ງແວດລ້ອມ ສຸຂະພາບຂອງປະຊາຊົນ, ສິນຄ້າທີ່ບໍ່ສົ່ງເສີມໃຫ້ນຳເຂົ້າໃນປະເທດ.
- ກວດກາຢ່າງແໜ້ນແຟ້ນບັນດາປະເພດສິນຄ້າຂາເຂົ້າທີ່ບໍ່ໄດ້ຮັບການສົ່ງເສີມ, ບັນດາປະເພດສິນຄ້າທີ່ໂຮງານໃນປະເທດຜະລິດໄດ້ແລ້ວ.
- ເພີ່ມທະວີປະຕິຮູບການບໍລິຫານ, ເດັດດ່ຽວປະຕິບັດການປ້ອງກັນແລະຕ້ານການສໍ້ລາດບັງຫຼວງ, ຍົກສູງຄວາມສັດສິດ ແລະ ປະສິດທິຜົນການຄຸ້ມຄອງລັດ ກ່ຽວກັບການຄ້າຂາອອກຂາເຂົ້າ./.
