ກຳແໜ້ນໂອກາດ, ເສີມຂະຫຍາຍກຳລັງແຮງຂອງປວງປະຊາຊົນ, ປົກປັກຮັກສາຜົນປະໂຫຍດຂອງຊາດ, ນຳເອົາປະເທດຊາດກ້າວຂຶ້ນເລື້ອຍໆ
ວ.ກ.ອອນໄລ - ເນື່ອງໃນໂອການສະເຫຼີມສະຫຼອງປີໃໝ່ 2015, ວາລະສານກອມມູນິດຂໍເປັນກຽດແນະນຳ ບົດຂຽນຂອງສະຫາຍ ເຈືອງເຕີນຊາງ, ກຳມະການກົມການເມືອງສູນກາງພັກ, ປະທານປະເທດແຫ່ງ ສສ.ຫວຽດນາມ, ທີ່ຂຽນໃຫ້ສະເພາະວາລະສານ ພາຍໃຕ້ຫົວຂໍ້ “ກຳແໜ້ນໂອການ, ເສີມຂະຫຍາຍກຳລັງແຮງ ຂອງປວງປະຊາຊົນ, ປົກປັກຮັກສາ ຜົນປະໂຫຍດຂອງຊາດ, ນຳເອົາປະເທດຊາດ ກ້າວຂຶ້ນເລື້ອຍໆ"
ທ່ານປະທານປະເທດ ເຈືອງເຕິນຊາງ (ພາບ: badanang.vn)
ພ້ອມກັນກັບມະນຸດຊາດພວກເຮົາອຳລາປີ 2014, ປີ ມະເມຍ. ສຳລັບພວກເຮົາ, ປີ 2014 ແມ່ນປີທີ່ເຕັມໄປດ້ວຍຄວາມຫຍຸ້ງຍາກ ເຄັ່ງຮ້ອນ ສັບສົນ ແລະ ສິ່ງທ້າທາຍ ລົມແຮງຟອງຈັດບໍ່ຈັກວ່າເທົ່າໃດ, ແຕ່ພວກເຮົາກໍ່ຜ່ານຜ່າໄດ້. ເຖິງວ່າຫັນເບິ່ງຄືນຫຼັງ, ຍັງມີຄວາມຮູ້ສຶກອົບອຸ່ນແລະໜາວເຢັນ ຄວາມມ່ວນຊື່ນທຸກເສົ້າແຊກຊ້ອນກັນຢູ່, ຍັງມີສິ່ງຄົງຄ້າງຂ້ອງໃຈຕ່າງໆຫຼາຍຢ່າງ ຊຶ່ງຜູ້ໃດກໍ່ເຫັນ ແລະ ພວມຮ່ວມແຮງຮວມໃຈກັນເພື່ອແກ້ໄຂ ຜ່ານຜ່າ. ເມື່ອລະດູບານໃໝ່ຂອງປີໃໝ່ 2015 ພວມກ້າວກ່າຍມາເຖິງຊານເຮືອນ, ປະຊາຊົນທັງຊາດຫວຽດນາມເຮົາກໍ່ເບີກບານມ່ວນຊື່ນ, ມີກຳລັງຊີວິດໃໝ່ ມີຄວາມຕັດສີນໃຈໃໝ່, ສືບຕໍ່ມານະພະຍາຍາມເພື່ອຍາດເອົາຜົນສຳເລັດອັນໃຫຍ່ຫຼວງກວ່າອີກ ໃນປີແຫ່ງບັນດາເຫດການອັນຍິ່ງໃຫຍ່: 85 ລະດູບານໃໝ່ແຫ່ງການກຳເນີດເກີດຂຶ້ນຂອງພັກເຮົາ, 70 ລະດູຮ່ວງໂຮຍແຫ່ງການປະຕິວັດ ແລະ ວັນຊາດຂອງປະເທດ ສສ.ຫວຽດນາມ, 40 ປີແຫ່ງການປົດປ່ອຍພາກໃຕ້ແລະໂຮມປະເທດຊາດເປັນເອກະພາບ, 125 ປີແຫ່ງວັນຄ້າຍວັນເກີດຂອງທ່ານປະທານໂຮ່ຈີມິນທີ່ເຄົາລົບຮັກ, 30 ປີແຫ່ງການປ່ຽນແປງໃໝ່ຂອງປະເທດຊາດບົນເສັ້ນທາງສັງຄົມນິຍົມ, ກ້າວໄປສູ່ກອງປະຊຸມໃຫຍ່ຄັ້ງທີ XII ຂອງພັກ... ດ້ວຍວິໄສທັດໃໝ່, ພາລະໜ້າທີ່ໃໝ່, ກຳລັງຕົວຈິງໃໝ່, ແບບວິທີການເຄື່ອນໄຫວໃໝ່ ແລະ ຄວາມເຊື່ອໝັ້ນຕໍ່ບັນດາຜົນສຳເລັດໃໝ່.
ຕໍ່ໜ້າກາລະເຂົ້າສູ່ລະດູບານໃໝ່, ຫັນເບິ່ງຄືນເສັ້ນທາງທີ່ໄດ້ເດີນຜ່ານ, ພວກເຮົາທົບທວນກວດຄືນຕົນເອງ, ຄິດຫງຳສະຖານະການໃຫຍ່, ເປີດກວ້າງສາຍຕາ, ກຽມພ້ອມທຸກຢ່າງ, ສືບຕໍ່ເປັນເຈົ້າການ ແລະ ຕັ້ງໝັ້ນຈຸດປະສົງກ້າວຄືບໜ້າເລື້ອຍໆ.
ພັດທະນາແບບຍືນຍົງ - ການເລືອກເຟັ້ນທີ່ມີລະດັບຍຸດທະສາດ
ພວກເຮົາພວມມີຊີວິດຢູ່ໃນສັກກະລາດແຫ່ງໂລກາພິວັດ ດ້ວຍຄວາມສັບສົນທຸດຢ່າງແຫ່ງໂອກາດດີແລະໄພອັນຕະລາຍ, ໂຊກດີແລະເຄາະຮ້າຍ, ເງື່ອນໄຂອຳນວຍແລະສິ່ງທ້າທາຍ ທີ່ແຊກຊ້ອນກັນ ເຄື່ອນວຽນປ່ຽນທີ່ກັນ ຊຶ່ງຄາດຄະເນຍາກທີ່ສຸດ; ຫຼືວ່າຖອຍຫຼັງ, ໝາຍຄວາມວ່າຖືກປະຂ້າມ ຫຼືວ່າບຸກໜ້າບືນຕົວຂຶ້ນ ເພື່ອເຂົ້າກັບຈັງຫວະຍຸກສະໄໝ, ເປັນເຈົ້າຊາຕາກຳຂອງຕົນ, ຖ້າຫາກຢຸດຢູ່ກັບບ່ອນແມ່ນໝາຍຄວາມວ່າຖອຍຫຼັງນັ້ນເອງ. ຄວາມຖອຍຫຼັງ, ເປັນຕົ້ນແມ່ນທາງດ້ານເສດຖະກິດ, ແມ່ນໄພອັນຕະລາຍໜຶ່ງ ຊຶ່ງກ່ອນໜ້ານີ້ 20 ປີເຕັມໆ, ຄືເດືອນມັງກອນປີ 1994, ພັກເຮົາໄດ້ກ່າວເຕື່ອນ ແລະ ທົ່ວທັງຊາດເຮົາໄດ້ມານະພະຍາຍາມຢ່າງບໍ່ຢຸດຢັ້ງໃນຕະຫຼອດສອງທົດສະວັດເພື່ອຜ່ານຜ່າ.
ດັ່ງນັ້ນ, ຍິ່ງກວ່າເວລາໃດໝົດ, ເສັ້ນທາງໜຶ່ງດຽວທີ່ຖືກຕ້ອງຄືພວກເຮົາຕ້ອງບືນຕົວຂຶ້ນ ພາໃຫ້ປະເທດຊາດພັດທະນາຢ່າງໝັ້ນທ່ຽງຍືນຍົງ, ໃນເມື່ອທີ່ບາດກ້າວເດີນຂອງມະນຸດຊາດບໍ່ລໍຖ້າຜູ້ໃດເລີຍ, ການແຂ່ງຂັນທົ່ວໂລກຍາມໃດກໍ່ເຊື່ອງຊ້ອນໄພອັນຕະລາຍແຫ່ງ “ຄວາມເປັນຕາຍ”, ບໍ່ມີປະເທດໃດ ຊາດໃດໄດ້ຍົກເວັ້ນ, ເຮັດໃຫ້ການຊັ່ງຊາກຳລັງລະຫວ່າງບັນດາປະເທດ ບັນດາພາກພື້ນໃນໂລກມີການປ່ຽນແປງຢ່າງເນືອງນິດ. ຖອຍຫຼັງແມ່ນຖືກການໂລກາພິວັດຜ່ານຂ້າມ ດັນໃຫ້ລົ້ມຈົມລົງ, ບໍ່ອາດຈະຫຼີກລ່ຽງຈາກການຖືກຂຶ້ນກັບ, ກາຍເປັນ “ເດີນຫຼັງບ້ານ” ຂອງຜູ້ອື່ນ, ບໍ່ສາມາດປົວແປງ ຍົກສູງຊີວິດການເປັນຢູ່ຂອງປະຊາຊົນຂຶ້ນໄດ້. “ມີອາຫານການກິນພຽງພໍ, ກຳລັງທະຫານຈະເຂັ້ມແຂງ”, ຖ້າຫາກຖອຍຫຼັງແມ່ນຍາກທີ່ຈະປົກປັກຮັກສາເອກະລາດ ອຳນາດອະທິປະໄຕຂອງຊາດໄວ້ໄດ້, ແລະການຊອກຫາທີ່ຕັ້ງເໝາະສົມໃນເວທີສາກົນກໍ່ເປັນການຍາກ, ເວົ້າຫຍັງເຖິງ “ການທຽບບ່າຮຽງໄຫຼ່ຢ່າງສະຫງ່າຜ່າເຜີຍກັບບັນດາປະເທດມະຫາອຳນາດໃນຫ້າທະວີບ”.
ພັດທະນາແບບໝັ້ນຄົງຍືນຍົງ, ຮັດແຄບຄວາມແຕກໂຕນກັນດ້ານລະດັບການພັດທະນາເສດຖະກິດ ກັບບັນດາປະເທດຈະເລີນກ້າວໜ້າໃນພາກພື້ນ ແລະ ໃນໂລກ, ເພື່ອຈຸດປະສົງປະຊາຊົນຮັ່ງມີ ປະເທດຊາດເຂັ້ມແຂງ ແມ່ນຄວາມຮັບຜິດຊອບທີ່ບໍອາດປະຕິເສດໄດ້, ແມ່ນພາລະໜ້າທີ່ອັນສັກກະລະບູຊາ, ແມ່ນກຽດສັກສີຂອງພວກເຮົາທຸກຄົນ ຊຶ່ງແມ່ນລູກຫຼານຂອງຫລາກໂຮ່ງໃນທຸກວັນນີ້. ເພາະສະນັ້ນ, ໃນປີ 2015 ແລະຊຸມປີຕໍ່ໄປ, ດ້ວຍຄຸນສົມບັດຫຼັກ ສະຕິປັນຍາ ກຳລັງບົ່ມຊ້ອນຂອງປະເທດ ແລະ ຂອງປະຊາຊົນຫວຽດນາມ, ພວກເຮົາຕ້ອງສຸມໃສ່ແກ້ໄຂ ຖອນມ້າງສິ່ງກີດຂວາງກັ້ນບັງຕ່າງໆນາໆ, ຜ່ານຜ່າຈຸດອ່ອນຂໍ້ຈຳກັດຕ່າງໆ, ນຳເອົາເສດຖະກິດອອກຈາກສະພາບການຢຸດສະງັກຊັກຊ້າໂດຍໄວ, ຟື້ນຟູທ່ວງທ່າເຕີບໂຕເສດຖະກິດຄືນໃໝ່; ສືບຕໍ່ຍູ້ແຮງການປ່ຽນແປງໃໝ່, ຫັນເປັນອຸດສາຫະກຳ ທັນສະໄໝ, ເຊື່ອມໂຍງສາກົນຢ່າປະດິດສ້າງ ແລະມີປະສິດທິຜົນ; ສຳເລັດໜ້າທີ່ປ່ຽນແປງໃໝ່ຕົວແບບການເຕີບໂຕ ເພື່ອສ້າງໃຫ້ມີຄຸນນະພາບໃໝ່ ລະດັບໃໝ່ທີ່ສູງກວ່າຂອງເສດຖະກິດແຫ່ງຊາດ, ເທົ່າທຽມກັບລະດັບຂອງບັນດາປະເທດຈະເລີນກ້າວໜ້າໃນພາກພື້ນ. ພັດທະນາແບບໝັ້ນຄົງຍືນຍົງແມ່ນການເລືອກເຟັ້ນທີ່ມີຄວາມໝາຍຍຸດທະສາດຂອງປະເທດເຮົາໃນປັດຈຸບັນ. ພັດທະນາແມ່ນໄມ້ຫຼາວັດແທກຄຸນສົມບັດຫຼັກ ແລະສະຕິປັນຍາຫວຽດນາມ ໃນການແກ່ງແຍ້ງແຂ່ງຂັນທົ່ວໂລກ ເພື່ອຈຸດໝາຍສ້າງສາພັດທະນາປະເທດ. ການພັດທະນາຈະຕັດສີນຮູບພາບອະນາຄົດຂອງປະເທດ, ຈະກຳນົດແຈ້ງບົດບາດທີ່ຕັ້ງຂອງຫວຽດນາມໃນໂລກໃນຊຸມປີຕໍ່ໜ້າ.
ປົກປັກຮັກສາຜົນປະໂຫຍດແຫ່ງຊາດ ຂອງປະເທດ ແມ່ນຈຸດໝາຍສູງສຸດ
ໃນຫຼາຍພັນປີທີ່ຜ່ານມາ, ບັນພະບຸລຸດຂອງພວກເຮົາ, ເຖິງວ່າຕ້ອງປະເຊີນໜ້າຕໍ່ສັດຕູຜູ້ຮ້າຍກາດໂຕໃດ ໃນສະພາບການສັບສົນເຖິງປານໃດກໍ່ຕາມ, ແຕ່ຍາມໃດກໍ່ຕັດສີນໃຈເອົາຜົນປະໂຫຍດຂອງຊາດ ຂອງປະເທດເປັນຈຸດໝາຍສູງສຸດຂອງຕົນເພື່ອຕໍ່ສູ້ ດັ່ງນັ້ນຈຶ່ງສ້າງຕັ້ງຖິ່ນຖານຊັບສົມບັດອັນໝັ້ນຄົງຖາວອນຂຶ້ນມາໄດ້ ແລະ ຈົ່ງໄວ້ໃຫ້ເຊັ່ນລູກຫຼານໃນປັດຈຸບັນ. ປະຫວັດສາດເຄີຍໃຫ້ເຫັນວ່າ, ເຮັດຜິດກັບສິ່ງດັ່ງກ່າວກໍ່ຈະກໍ່ໄພພິບັດໃຫ້ແກ່ຕົນເອງ, ບໍ່ເສຍປະເທດ ກາຍເປັນຂ້ອຍຂ້າມ້າຕ່າງຂອງພວກຕ່າງດ້າວ ກໍ່ຈະຍູ້ປະເທດ ຍູ້ປະຊາຊົນໃຫ້ຕົກໃສ່ສະພາບທຸກຍາກ ລຳບາກກາກກຳ.
ໃນຍຸກສະໄໝປັດຈຸບັນ, ທ່າມກາງມະຫາສະໝຸດແຫ່ງໂລກາພິວັດທີ່ມີການແກ່ງແຍ້ງແຂ່ງຂັນໂສໄດ້ໂສເສຍນັ້ນ, ສັດຈະທຳ “ບໍ່ມີສິ່ງໃດປະເສີດເລີດລ້ຳກວ່າເອກະລາດ, ອິດສະຫຼະພາບ” ໄດ້ແຜ່ລັດສະໝີແຈ້ງສະຫວ່າງກວ່າເວລາໃດໝົດ. ປະເທດເຮົາເຊື່ອມໂຍງເຂົ້າກັບສາກົນ, ກັບເພື່ອນມິດໃນສີ່ມະຫາສະໝຸດຫ້າທະວີບ ແມ່ນເພື່ອຮ່ຳຮຽນ, ຮັບເອົາສິ່ງປະເສີດເລີດລ້ຳຂອງມະນຸດຊາດ ຂອງຍຸກສະໄໝ, ເຮັດໃຫ້ວັດທະນະທຳສີສັນຊາດຫວຽດນາມມີຄວາມຮັ່ງມີ ອຸດົມສົມບູນຂຶ້ນຕື່ມ; ເພື່ອຍາດແຍ່ງເອົາກຳລັງພາຍນອກ ປຸກຕື່ນກຳລັງພາຍໃນ, ຫັນປ່ຽນກຳລັງພາຍນອກເປັນກຳລັງພາຍໃນ, ກໍ່ສ້າງປະເທດເຮົາຮັ່ງມີ ເຂັ້ມແຂງ, ທຽບບ່າຮຽງໄຫຼ່ກັບບັນດາປະເທດມະຫາອຳນາດໃນຫ້າທະວີບ, ປະຊາຊົນເຮົາມີຊີວິດການເປັນຢູ່ອິ່ມໜຳສຳລາມ ເສລີພາບຜາສຸກ, ເດັດຂາດບໍ່ຍອມເສຍເອກະລາດເສລີ, ບໍ່ໃຫ້ຕົກໃສ່ຄວາມຫຼ້າຫຼັງ ຖືກຂຶ້ນກັບຕ່າງປະເທດ.
ປະເທດຊາດບ້ານເມືອງທີ່ບັນພະບຸລຸດຂອງພວກເຮົາສ້າງຂຶ້ນມາ ແລະສືບທອດໃຫ້ໃນຫຼາຍພັນປີນັ້ນ, ເຊັ່ນລູກເຊັ່ນຫຼານພວກເຮົາໃນປັດຈຸບັນ ແລະຕະຫຼອດໄປໃນພາຍໜ້າ ຕ້ອງມີພັນທະແລະຄວາມຮັບຜິດຊອບປົກປັກຮັກສາໄວ້ຢ່າງໝັ້ນຄົງ, ເດັດຂາດບໍ່ໃຫ້ເສຍຫາຍພຽງມີລີແມັດດຽວ. ຊາດເຮົາໄດ້ສືບສາຍກັນເປັນຫຼາຍພັນປີເພື່ອສ້າງສາປະເທດແລະປົກປັກຮັກສາປະເທດ, ໄດ້ຜ່ານການລຸກຮືຂຶ້ນ ຕໍ່ສູ້ຕ້ານການຮຸກຮານຈາກພາຍນອກນັບເປັນຮ້ອຍຄັ້ງ, ດ້ວຍທຸກຂະໜາດໃຫຍ່ນ້ອຍ ແລະໄດ້ເສຍສະຫຼະຊີວິດ ເລືອດເນື້ອເຫື່ອໄຄບໍ່ຈັກວ່າເທົ່າໃດ; ໃນກາລະເວລາຫຍຸ້ງຍາກອັດຕະຄັດ ປະຊາຊົນເຮົາໄດ້ເຊີດຊູເຈດຈຳນົງ “ເຖິງວ່າຕ້ອງສະນ້ຳທະເລຕາເວັນອອກໃຫ້ໝົດກ້ຽງ”, “ເຖິງວ່າຕ້ອງຈູດພູຫຼວງໃຫ້ໄໝ້ທັງສາຍ” ກໍ່ຕ້ອງເດັດດ່ຽວຍາດເອົາເອກະລາດ ແລະ ປົກປັກຮັກສາເອກະລາດ ອິດສະຫຼະພາບ ອຳນາດອະທິປະໄຕ ຜືນແຜ່ນດິນອັນຄົບຖ້ວນຂອງປະເທດຊາດ ໄວ້ຢ່າງໝັ້ນຄົງ. ໃນທຸກວັນນີ້, ປະຊາຊົນຫວຽດນາມພວກເຮົາ 90 ລ້ານກວ່າຄົນ ຕັ້ງໜ້າພະຍາຍາມເຮັດຈົນສຸດກຳລັງຄວາມສາມາດຂອງຕົນ, ຕັດສີນໃຈນຳເອົາຈິດໃຈແລະກຳລັງ, ຊີວິດແລະຊັບສິນທັງໝົດມາຮັບໃຊ້ຊາດ, ກຽມພ້ອມເສຍສະຫຼະຢາດເລືອດສຸດທ້າຍເພື່ອຄວາມສັກກະລະບູຊາອັນລ້ຳຄ່ານັ້ນ.
ຜົນປະໂຫຍດແຫ່ງຊາດ-ປະເທດ ຂອງພວກເຮົາແມ່ນລະອຽດ: ເອກະລາດ ອຳນາດອະທິປະໄຕ ເອກະພາບ ຜືນແຜ່ນດິນອັນຄົບຖ້ວນ ອັນສັກກະລະບູຊາຂອງປະເທດຊາດ; ລະບອບສັງຄົມນິຍົມ, ຄວາມຮັ່ງມີເຂັ້ມແຂງ ຄວາມເຂັ້ມແຂງແຮງກ້າຂອງປະເທດ, ຄວາມອິ່ມໜຳສຳລານ ເສລີຜາສຸກຂອງປະຊາຊົນ. ນີ້ແມ່ນຈຸດໝາຍ ຊຶ່ງພວກເຮົາຕັດສີນໃຈຜ່ານຜ່າຄວາມຫຍຸ້ງຍາກລຳບາກທຸກຢ່າງເພື່ອປະຕິບັດໃຫ້ຈົນໄດ້, ແລະມັນກໍ່ແມ່ນພື້ນຖານເພື່ອໃຫ້ພວກເຮົາຈຳແນກລະຫວ່າງສິ່ງທີ່ຕ້ອງເຮັດ ແລະ ສິ່ງທີ່ຕ້ອງຫຼີກລ່ຽງ, ຄືດັ່ງຄຳສັ່ງສອນຂອງລຸງໂຮ່ທີ່ວ່າ: ສິ່ງໃດທີ່ມີປະໂຫຍດໃຫ້ແກ່ປະຊາຊົນ ໃຫ້ແກ່ປະເທດຊາດ ແມ່ນຕ້ອງເຮັດຈົນສຸດກຳລັງຄວາມສາມາດ, ສິ່ງໃດທີ່ເປັນຜົນຮ້າຍໃກ້ແກ່ປະຊາຊົນ ໃຫ້ແກ່ປະເທດ ແມ່ນຕ້ອງຫຼີກລ່ຽງ; ແມ່ນມາດຕະຖານເພື່ອໃຫ້ພວກເຮົາຮັບຮູ້ວ່າໃຜເປັນມິດ ໃຜເປັນສັດຕູ, ຜູ້ໃດເປັນຄູ່ຮ່ວມ ຜູ້ໃດເປັນເປົ້າໝາຍ ໃນແຕ່ລະຂົງເຂດ, ແຕ່ລະກໍລະນີ ສະພາບອັນລະອຽດ; ທັດສະນະຂອງພັກເຮົາ: ຜູ້ໃດເຄົາລົບເອກະລາດ ອຳນາດອະທິປະໄຕ, ສ້າງຕັ້ງສາຍພົວພັນມິດຕິພາບ ແລະ ເປີດກວ້າງສາຍພົວພັນມິດຕະພາບ, ຮ່ວມມືສະເໝີພາບ ຕ່າງຝ່າຍຕ່າງມີຜົນປະໂຫຍດກັບຫວຽດນາມ ລ້ວນແຕ່ແມ່ນຄູ່ຮ່ວມຂອງພວກເຮົາ; ບໍ່ວ່າອິດທິກຳລັງໃດທີ່ມີກົນອຸບາຍ, ການກະທຳມ້າງເພທຳລາຍຈຸດໝາຍຂອງປະເທດເຮົາໃນພາລະກິດການສ້າງສາ ແລະ ປົກປັກຮັກສາປະເທດຊາດ ລ້ວນແຕ່ແມ່ນເປົ້າໝາຍຕໍ່ສູ້. ເຮັດຜິດກັບສິ່ງດັ່ງກ່າວ, ລະເມີດຜົນປະໂຫຍດຂອງຊາດ ຂອງປະເທດ ແມ່ນເສຍຕົວ ທຳຮ້າຍປະເທດຊາດ, ແມ່ນຕ້ອງໂທດຕໍ່ກັບບັນພະບຸລຸດ ຕໍ່ປູ່ຍ່າຕາຍາຍຂອງຕົນ, ແມ່ນເນລະຄູນຕໍ່ຄວາມໄວ້ວາງໃຈ ແລະ ການມອບໝາຍຂອງພີ່ນ້ອງຮ່ວມຊາດ 90 ລ້ານກວ່າຄົນ!
ເສິມຂະຫຍາຍຈິດໃຈປະຊາຊົນ - ສົມບັດອັນປະເສີດຂອງຊາດ ແມ່ນບົດຮຽນອັນເປັນກົກຮາກ
ປະຫວັດສາດຫຼາຍພັນປີແຫ່ງການສ້າງສາ ແລະ ປົກປັກຮັກສາປະເທດຊາດຂອງຊາດເຮົາ, ກໍ່ຄືປະຫວັດສາດຂອງບັນດາປະຊາຊາດໃນໂລກ ແຕ່ບູຮານນະການມາເຖິງປັດຈຸບັນ, ລ້ວນແຕ່ຮັບຮອງ ແລະ ຢືນຢັນສັດຈະທຳ: ປະຊາຊົນເປັນຜູ້ສ້າງປະຫວັດສາດຂຶ້ນມາ, ກຳລັງຂອງປະຊາຊົນແມ່ນຊະນະເລີດ. ແມ່ນກະໂຕປະຊາຊົນຜູ້ອອກແຮງງານ ທີ່ຂະຫຍັນໝັ່ນພຽນ ແຂ່ງແດດແຂ່ງຝົນໝົດມື້ໝົດວັນ ໝົດເຊັ່ນພໍ່ຕໍ່ເຊັ່ນລູດນັ້ນເອງ ທີ່ໄດ້ຖາກຖາງປ່າເຮື້ອ ບຸກເບີກບຶງບວກ ປ້ານຄັນນາສ້າງຄັນຄູ ຂຸດພູຖົມທະເລ ສ້າງເປັນຮູບຊົງປະເທດຊາດ ແລະ ຫຼາຍຕໍ່ຫຼາຍເທື່ອໄດ້ເອົາຮ່າງຄີງຂອງຕົນສ້າງເປັນກຳແພງທີ່ໝັ້ນແກ່ນ ເພື່ອປົກປັກຮັກສາປະເທດຊາດບ້ານເມືອງ, ປົກປັກຮັກສາໝາກຜົນທີ່ຕົນສ້າງຂຶ້ນມາ. ບັນພະບຸລຸດຂອງພວກເຮົາ, ຈາກການຈະເລີນຮຸ່ງເຮືອງແລະການເສື່ອມໂຊມຂອງບັນດາລາຊະວົງ, ຈາກບັນດາການຕໍ່ສູ້ອັນພິລະອາດຫານຕ້ານການຮຸກຮານຈາກພາຍນອກ ໄດ້ສະຫລຸບຖອດຖອນບົດຮຽນ, ຢືນຢັນ ຕັກເຕືອນລູກຫຼານແລະເຊັ່ນຄົນລຸນຫຼັງວ່າ: ຜູ້ພາຍເຮືອແມ່ນປະຊາຊົນ ແລະ ຜູ້ເຮັດໃຫ້ເຮືອຂວ້ຳລົງກໍ່ແມ່ນປະຊາຊນ; ເອົາການເບິ່ງແຍງດູແລບຳລຸງກຳລັງຂອງປະຊາຊົນເປັນພື້ນຖານກົກຮາກ ແມ່ນນະໂຍບາຍທີ່ດີເລີດເພື່ອຮັກສາປະເທດ; ປະເທດຕ້ອງເອົາປະຊາຊົນເປັນກົກຮາກ, ກົກຮາກໝັ້ນແກ່ນຕົ້ນໄມ້ຈຶ່ງງອກງາມຍືນຍົງ. ມີປະຊາຊົນແມ່ນມີທຸກສິ່ງທຸກຢ່າງ, ເສຍປະຊາຊົນແມ່ນເສຍໝົດທຸກຢ່າງ.
ແລະ, ມື້ນີ້ ມັນຍັງຄົບຖ້ວນດັ່ງເດີມຢູ່, ໃນຍຸກສະໄໝໂຮ່ຈີມິນ, ແນວຄິດປະຊາຊົນເປັນກົກຮາກ, ກຳລັງປະຊາຊົນແມ່ນຊະນະເລີດ, ວຽກງ່າຍສະບາຍແຕ່ບໍ່ມີປະຊາຊົນກໍ່ຕ້ອງຍອມ ວຽກງານຫຍຸ້ງຍາກສັບສົນເຖິງປານໃດຫາກປະຊາຊົນພ້ອມກັນແກ້ກໍ່ສຳເລັດຮຽບຮ້ອຍ ນັ້ນ ໄດ້ຮັບການເຊື່ອມຊືມ ໝູນໃຊ້ຢ່າງຄ່ອງແຄ່ວ ແລະ ເສີມຂະຫຍາຍສຸດຂີດ ສ້າງເປັນກຳລັງແຮງຍາດເອົາໄຊຊະນະອັນຍິ່ງໃຫຍ່ຕ່າງໆ ຂອງການປະຕິວັດຫວຽດນາມໃນເກືອບ 85 ປີທີ່ຜ່ານມາ. ການປະຕິວັດລະດູຮ່ວງໂຮຍປີ 1945 ແມ່ນການລຸກຮືຂຶ້ນຢຶດອຳນາດໃນທົ່ວປະເທດຂອງປວງປະຊາຊົນ. ບັນດາການຕໍ່ຕ້ານອັນສັກກະລະບູຊາຂອງພວກເຮົາ, ຄ້າຍຄືວ່າ “ຕັກແຕນເຕະຊ້າງ”, ແຕ່ກໍ່ໄດ້ຜາບແພ້ບັນກອງທະຫານຮຸກຮານທີ່ໂຫດຮ້າຍສາມານ ເຂັ້ມແຂງແຮງກ້າກວ່າໝູ່ໃນໂລກ. ນັ້ນແມ່ນບັນດາການສົງຄາມປະຊາຊົນ, ປວງຊົນທັງຊາດເຂົ້າຮ່ວມ, ປວງຊົນຕີສັດຕູ ຊຶ່ງກຳລັງຫຼວງ ກຳລັງແກນກາງ ແມ່ນກອງທັບທີ່ເກີດມາຈາກປະຊາຊົນ, ສູ້ຮົບເພື່ອປະຊາຊົນ. ບັນດາຜົນສຳເລັດອັນໃຫຍ່ຫຼວງທີ່ປະເທດເຮົາຍາດມາໄດ້ໃນ 30 ປີແຫ່ງການປ່ຽນແປງໃໝ່ທີ່ຜ່ານມາ ແມ່ນຍ້ອນຄຸນງານຄວາມດີ ສ່ວນປະກອບຂອງປວງປະຊາຊົນ ພາຍໃຕ້ການນຳພາຂອງພັກ.
ກຳປັ່ນໃຫຍ່ອອກສູ່ທະເລກວ້າງໄກແນ່ນອນຈະຕ້ອງພົບລົມແຮງຟອງໃຫຍ່. ປັດຈຸບັນນີ້, ພາລະກິດປ່ຽນແປງໃໝ່ສືບຕໍ່ກໍ່ສ້າງປະເທດເຮົາໃຫ້ “ປະຊາຊົນຮັ່ງມີ, ປະເທດຊາດເຂັ້ມແຂງ ມີປະຊາທີປະໄຕ ຍຸດຕິທຳ ສີວິໄລ” ແລະ ປົກປັກຮັກສາດິນແດນ ເຂດຟ້າ ເຂດທະເລ ຊາຍແດນ ໝູ່ເກາະທີ່ບັນພະບຸລຸດໄດ້ສ້າງໄວ້ໃຫ້ພວກເຮົາ, ປົກປັກຮັກສາໝາກຜົນການປະຕິວັດ ແລະ ຊີວິດການເປັນຢູ່ສັນຕິສຸກຂອງປະຊາຊົນ. ໃນເວລາຕໍ່ໜ້າ, ມີຄວາມສະດວກດີ ມີໂອກາດອັນໃຫຍ່ຫຼວງຫຼາຍຢ່າງ, ແຕ່ກໍ່ມີຄວາມຫຍຸ້ງຍາກ ສິ່ງທ້າທາຍທີ່ເຄັ່ງຮ້ອນ ດຸເດືອດທີ່ສຸດ. ຍັງມີພວກທີ່ຢາກກີດກັ້ນ ທຳລາຍ ເຮັດໃຫ້ເຮົາອ່ອນເພຍລົງເພື່ອແຊກຄຸມເຮົາໄດ້ງ່າຍ; ມີຜູ້ຈ້ອງມອງຈະລົງມືບຽດຢຶດຊາຍແດນ ເຂດທະເລ, ຢຶດເອົາເກາະທະເລຂອງເຮົາ. ມີພຽງຄວາມເຫັນດີຮ່ວມຈິດຮ່ວມໃຈ ເປັນເອກະພາບຂອງປວງປະຊາຊົນ, ກຸ່ມກ້ອນມະຫາສາມັກຄີປວງຊົນທັງຊາດເທົ່ານັ້ນ ຈຶ່ງເປັນກຳລັງແຮງອັນຊະນະເລີດເພື່ອໃຫ້ພວກເຮົາຜ່ານຜ່າລົມແຮງ ຟອງໃຫຍ່ທຸກກະແສໃນຍຸກສະໄໝ.
ຮັບໃຊ້ປະຊາຊົນ, ເບິ່ງແຍງດູແລ ຍົກສູງຊີວິດການເປັນຢູ່ດ້ານວັດຖຸ ຈິດໃຈຂອງປະຊາຊົນ, ປົກປັກຮັກສາຊີວິດສັນຕິສຸກຂອງປະຊາຊົນ ຢ່າງສຸດອົກສຸດໃຈ ສຸດຄວາມສາມາດນັ້ນ ແມ່ນພັນທະ ຄວາມຮັບຜິດຊອບຂອງພັກແລະລັດເຮົາ, ແມ່ນໜ້າທີ່ຂອງພະນັກງານ ສະມາຊິກພັກ ຂ້າລັດຖະການພວກເຮົາທຸກຄົນ, ຄືດັ່ງຄຳສັ່ງສອນຂອງລຸງໂຮ່: “ປະຊາຊົນຂາດເກືອ, ພັກຕ້ອງເອົາໃຈໃສ່ແກ້ໄຂ. ປະຊາຊົນມີເຂົ້າບໍ່ພໍກິນອີ່ມ, ປະຊາຊົນມີແຜ່ນແພບໍ່ພໍນຸ່ງອຸ່ນ, ພັກຕ້ອງເອົາໃຈໃສ່ແກ້ໄຂ. ພວກນ້ອງນ້ອຍບໍ່ມີໂຮງຮຽນ, ພັກຕ້ອງເອົາໃຈໃສ່ແກ້ໄຂ”(1); “ລະບອບຂອງເຮົາແມ່ນລະບອບປະຊາທິປະໄຕ, ແມ່ນປະຊາຊົນເປັນເຈົ້າຂອງ. ລັດຖະບານເປັນຜູ້ຮັບໃຊ້ຂອງປະຊາຊົນ”(2), “ຖ້າຫາກປະຊາຊົນຖືກອຶດຫີວ, ພັກແລະລັດຖະບານມີໂທດ; ຖ້າຫາກປະຊາຊົນຖືກໜາວ ແມ່ນພັກແລະລັດຖະບານມີໂທດ; ຖ້າຫາກປະຊາຊົນໂງ່ຈ້າ ແມ່ນພັກແລະລັດຖະບານມີໂທດ; ຖ້າຫາກປະຊາຊົນເຈັບເປັນ ແມ່ນພັກແລະລັດຖະບານມີໂທດ”(3).
ແຕ່ລະອົງການຈັດຕັ້ງພັກ, ແຕ່ລະອົງການລັດ, ພະນັກງານ ສະມາຊິກພັກແຕ່ລະຄົນລ້ວນແຕ່ຕ້ອງຈາລຶກຄຳສັ່ງສອນຂອງລຸງໂຮ່ ແລະປະຕິບັດຄຳສັ່ງສອນນັ້ນໃຫ້ໄດ້ດີ; ສະກັດກັ້ນ, ຍູ້ຖອຍພະຍາດອາດຍາສິດ, ການສໍ້ລາດບັງຫຼວງ, ຄວາມຫຍໍ້ທໍ້, ການຂົ່ມເຫັງປະຊາຊົນ, ຄວາມເມີນເສີຍຕໍ່ຄວາມຮ້ອນເຄືອງຂອງປະຊາຊົນ… ເຮັດໄດ້ຄືແນວນັ້ນຈະໄດ້ຮັບຄວາມຮັກແພງສະໜັບສະໜູນຂອງປະຊາຊົນ, ກຸ່ມກ້ອນມະຫາສາມັກຄີປວງຊົນທັງຊາດຈະໄດ້ຮັບການປັບປຸງ ເພີ່ມທະວີ. ພວກເຮົາບໍ່ຢ້ານສັດຕູໂຕໃດເລີຍເຖິງວ່າມັນຈະຮ້າຍກາດປານໃດກໍ່ຕາມ, ພວກເຮົາພຽງແຕ່ຢ້ານເສຍຄວາມເຊື່ອຖືຂອງປະຊາຊົນເທົ່ານັ້ນ. ຈິດໃຈປະຊາຊົນ, ນັ້ນແມ່ນສົມບັດອັນປະເສີດຂອງຊາດໃນການສ້າງຕັ້ງປະເທດ ແລະ ປົກປັກຮັກສາປະເທດຊາດຫວຽດນາມ!
ມີຄວາມປະພຶດຢ່າງຊື່ສັດສຸດຈະລິດ, ຮັກສາແລະທະນຸຖະໜອມສັນຕິພາບ ມິດຕະພາບ ນັ້ນຄືຫຼັກສິນທຳຫວຽດນາມ
ຊາດເຮົາຮັກສັນຕິຍາບ, ຍາມໃດກໍ່ຢາກມີຊີວິດໃນສັນຕິພາບເພື່ອສ້າງສາ ພັດທະນາປະເທດ; ຍາມໃດກໍ່ຢາກຜູກສຳພັນທະໄມຕີ ມິດຕະພາບ ຮ່ວມມືກັບບັນດາປະເທດບ້ານໃກ້ເຮືອນຄຽງ ແລະ ກັບທຸກປະເທດໃນໂລກ. ຊາດເຮົາພຽງແຕ່ຈຳເປັນຕ້ອງກຳອາວຸດເພື່ອຕ້ານພວກສັດຕູຜູ້ຮຸກຮານ, ປົກປັກຮັກສາອິດສະຫຼະພາບ ເອກະລາດ ອຳນາດອະທິປະໄຕຂອງຕົນ. ບັນດາຜົນງານການສູ້ຮົບອັນສະຫງ່າອົງອາດຂອງຊາດເຮົາ ທີ່ໄດ້ຮັບຄວາມນິຍົມຊົມຊອບຈາກໂລກ, ລ້ວນແຕ່ແມ່ນຜົນງານການສູ້ຮົບຕ້ານການຮຸກຮານຈາກພາຍນອກ. ປະຊາຊົນເຮົາເຄີຍຖືກເຄາະຮ້າຍຍ້ອນການສົງຄາມຮຸກຮານຫຼາຍຕໍ່ຫຼາຍຄັ້ງ, ຖືກບາດເຈັບແສນສາຫັດ, ຕ້ອງເສຍສະຫຼະເລືອດເນື້ອເຫື່ອໄຄບໍ່ຈັກວ່າເທົ່າໃດ, ດັ່ງນັ້ນ ພວກເຮົາຈຶ່ງມຸ່ງຫວັງທີ່ສຸດວ່າ ຈະດັບມອດທຸກແປວໄຟສົງຄາມ ເພື່ອໃຫ້ສັນຕິພາບກັບຕ່າວຄືນມາສູ່ທຸກຊາດ ທຸກປະເທດໃນໂລກ. “ຮັກແພງເພິ່ນຄືກັນກັບຮັກແພງຕົນເອງ”, ສິ່ງບໍ່ດີທີ່ພວກເຮົາຫຼີກລ່ຽງ ກໍ່ບໍ່ຢາກໃຫ້ມັນເກີດຂຶ້ນກັບຜູ້ອື່ນ ແລະ ຍິ່ງກວ່ານັ້ນພວກເຮົາກໍ່ບໍ່ເຮັດຕໍ່ຜູ້ອື່ນ. ນັ້ນແມ່ນຫຼັກສິນທຳຫວຽດນາມ, ມະນຸດສະທຳຫວຽດນາມ. ຕໍ່ກັບກະໂຕສັດຕູຜູ້ຮຸກຮານທີ່ຖືກປະລາໄຊ, ບັນພະບຸລຸດຂອງພວກເຮົາກໍ່ໄດ້ລຳລຽງອາຫານການກິນ, ພາຫະນະມ້າ ເຮືອແພ ໃຫ້ກັບເມືອປະເທດ. ຕໍ່ກັບອັດຖິຂອງພວກທະຫານຕ່າງດ້າວທີ່ເສຍຊີວິດຢູ່ໃນດິນແດນຫວຽດນາມ, ພວກເຮົາກໍ່ສ້າງເງື່ອນໂຂ ແລະ ເຂົ້າຮ່ວມການຄົ້ນຫາ ເກັບໂຮມໃນຕະຫຼອດຫຼາຍສິບປີທີ່ຜ່ານມາ ເພື່ອສົ່ງຄືນໃຫ້ຍາດຕິພີ່ນ້ອງຂອງເຂົາທີ່ “ບ້ານເກີດເມືອງນອນ”. ຂໍຖາມເບິ່ງວ່າ ຢູ່ບ່ອນໃດ ແລະ ມີໃຜແດ່ທີ່ເຮັດໄດ້ຄືແນວນັ້ນ ຖ້າຫາກບໍ່ປະພຶດຢ່າງຖືກສິນທຳ, ເຫັນແກ່ຄົນອື່ນ, ມີຄວາມເມຕາກະລຸນາຄືຊາດເຮົາ? ນ້ຳໄຈເມດຕາກະລຸນາ ໄມຕີມິດຕະພາບຮັກຄວາມສະຫງົບນັ້ນ ໄດ້ຫວ່ານກ້າ “ໝາກຜົນອັນຈົບງາມ” ໃຫ້ຄວາມເປັນເອກະລາດ ອິດສະຫຼະພາບຂອງຊາດ, ໃຫ້ປະເທດຊາດເຮົາ "ໝັ້ນຄົງຂະໜົງແກ່ນຕະຫຼອດການ”.
ໃນປັດຈຸບັນນີ້, ສືບທອດແລະເສີມຂະຫຍາຍບັນດາຄຸນຄ່າມູນເຊື້ອອັນຈົບງາມແລະຄວາມເມດຕາກະລຸນາຂອງຊາດ, ສອດຄ່ອງກັບລັກສະນະຂອງຍຸກສະໄໝ, ປະເທດເຮົາ ປະຊາຊົນເຮົາເຊື່ອມໂຍງເຂົ້າກັບສາກົນ, ຍາມໃດກໍ່ມຸ່ງຫວັງມີການພົວພັນມິດຕະພາບ ຮ່ວມມືກັບທຸກປະເທດໃນໂລກ, ບົນພື້ນຖານສະເໝີພາບ ເຄົາລົບນັບຖືເອກະລາດ ອຳນາດອະທິປະໄຕ ເອກະພາບ ຜືນແຜ່ນດິນອັນຄົບຖ້ວນ ລະບອບການເມືອງຂອງກັນແລະກັນ, ສົມດູນຜົນປະໂຫຍດ, ຕ່າງຝ່າຍຕ່າງມີຜົນປະໂຫຍດ, ເພື່ອສັນຕິພາບ ສະຖຽນລະພາບ ແລະ ຄວາມພັດທະນາຂອງຫວຽດນາມ, ຂອງພາກພື້ນ ແລະ ຂອງໂລກ. ຫວຽດນາມກຽມຄວາມພ້ອມເພື່ອເປັນເພື່ອນມິດ ເປັນຄູ່ຮ່ວມທີ່ໄວ້ວາງໃຈໄດ້, ເປັນສະມາຊິກທີ່ມີຄວາມຮັບຜິດຊອບຂອງປະຊາຄົມໂລກ. ໃນສະພາບການໂລກທີ່ຜັນປ່ຽນຢ່າງສັບສົນທີ່ສຸດໃນປັດຈຸບັນ, ພວກເຮົາກ່າວປະນາມທຸກການສົງຄາມຮຸກຮານ, ການເຄື່ອນໄຫວກໍ່ການຮ້າຍ ກໍ່ການຈະລາຈົນ ໂຄ່ນລົ້ມ, ການແຊກແຊງເຂົ້າວຽກງານພາຍໃນຂອງປະເທດທີ່ມີອະທິປະໄຕ; ສະໜັບສະໜູນການຕໍ່ສູ້ເພື່ອສັນຕິພາບ ເອກະລາດແຫ່ງຊາດ ປະຊາທິປະໄຕ ແລະ ຄວາມກ້າວໜ້າສັງຄົມ.
ພິເສດແມ່ນ, ຕໍ່ໜ້າການຜັນປ່ຽນສັບສົນໃນພາກພື້ນ, ບັນດາກົນອຸບາຍ ແລະ ການກະທຳບຽດຢຶດ, ກໍ່ການຊ່ວງຊິງໃນທະເລຕາເວັນອອກ, ນາບຂູ່ອຳນາດອະທິປະໄຕໃນເຂດທະເລ ໝູ່ເກາະຂອງປະເທດເຮົາ, ພວກເຮົາຕັດສີນໃຈຕໍ່ສູ້ ເດັດດ່ຽວຄັດຄ້ານ. ສຳລັບພວກເຮົາ, ອຳນາດອະທິປະໄນໃນເຂດທະເລ ໝູ່ເກາະຂອງປະເທດຊາດເປັນອັນສັກກະລະບູຊາ ບໍ່ອາດຈະລ່ວງລ້ຳໄດ້, ເປັນຊັບສົມບັດອັນປະເສີດເລີດລ້ຳທີ່ບັນພະບຸລຸດສ້າງໄວ້ໃຫ້ພວກເຮົາ, ເຊັ່ນຄົນພວກເຮົາປັດຈຸບັນມີພາລະໜ້າທີ່ປົກປັກຮັກສາໄວ້ ແລະ ມອບໂອນໃຫ້ເຊັ່ນລູກເຊັ່ນຫຼານຕໍ່ໆໄປ. ສືບທອດມູນເຊື້ອຮັກຊາດ, ໄມຕີຈິດມິດຕະພາບ ແລະນ້ຳໄຈເມດຕາກະລຸນາຂອງຊາດ, ພວກເຮົາຕັ້ງໝັ້ນແກ້ໄຂຄວາມພິພາດແກ່ງແຍ້ງຕ່າງໆດ້ວຍສັນຕິວິທີ, ບົນພື້ນຖານກົດໝາຍສາກົນ, ບັນດາຄຳໝັ້ນສັນຍາລະຫວ່າງອາຊຽນ ກັບຈີນ ແລະ ບັນດາຂໍ້ຕົກລົງລະຫວ່າງການນຳຂັ້ນສູງຂອງສອງປະເທດຫວຽດນາມ - ຈີນ, ເພື່ອປົກປັກຮັກສາອຳນາດອະທິປະໄຕໃນເຂດທະເລ ໝູ່ເກາະຂອງປະເທດຊາດ; ພ້ອມກັນນັ້ນກໍ່ປົກປັກຮັກສາສິ່ງແວດລ້ອມສັນຕິພາບ ສະຖຽນລະພາບໃຫ້ແກ່ການສ້າງສາພັດທະນາປະເທດ, ເພື່ອສັນຕິພາບ ສະຖຽນລະພາບໃນພາກພື້ນ; ຮັບປະກັນເສລີພາບ ຄວາມສະຫງົບ ຄວາມປອດໄພໃນສາຍທາງເດີນທະເລທີ່ສຳຄັນອັນດັບໜຶ່ງໃນໂລກນີ້. ຄວາມເປັນທຳ ຄວາມຖືກຕ້ອງແມ່ນຂຶ້ນກັບຊາດເຮົາ. ພວກເຮົາຍົກສູງຄວາມເປັນທຳອັນສະຫວ່າງສະໄຫວເພື່ອສາມັກຄີ, ເສີມຂະຫຍາຍກຳລັງແຮງຂອງປວງຊົນທັງຊາດ, ຂອງພີ່ນ້ອງຮ່ວມຊາດໃນປະເທດ ແລະ ຊາວຫວຽດນາມຢູ່ຕ່າງປະເທດ; ເພື່ອຍາດແຍ່ງ, ດຶງດູດເອົາຄວາມສະໜັບສະໜູນອັນກວ້າງຂວາງ ແຂງແຮງຂອງບັນດາປະເທດ, ຂອງປະຊາຄົມໂລກ ຕໍ່ກັບການຕໍ່ສູ້ຂອງປະຊາຊົນເຮົາ. ພ້ອມກັນນັ້ນ ພວກເຮົາກໍ່ຕັ້ງໜ້າກະກຽມບັນດາວິທີແກ້ອື່ນທີ່ສອດຄ່ອງ, ກຽມຄວາມພ້ອມຮັບມືກັບທຸກກໍລະນີສະພາບການ ເພື່ອປົກປັກຮັກສາອຳນາດອະທິປະໄຕ ເຂດທະເລ ໝູ່ເກາະອັນສັກກະລະບູຊາຂອງປະເທດຊາດໄວ້ຢ່າງໝັ້ນຄົງ.
ດ້ວຍກຳລັງແຮງຝູ່ໂດ໋ງ, ດ້ວຍບັນຍາກາດໂດງອາ ແລະ ຈິດໃຈແບັກດັ່ງ ດົງດາ ທີ່ຊະນະເລີດ, ດ້ວຍຄວາມພິລະອາດຫານຂອງການປະຕິວັດເດືອນສິງຫາ, ຂອງໄຊຊະນະດ້ຽນບຽນຝູ ອັນເປັນປະຫວັດສາດທີ່ສັ່ນສະເທືອນທົ່ວໂລກ ແລະ ດ້ວຍບັນຍາກາດບຸກໂຈມຕີຢ່າງມະຫັດສະຈັນຂອງຍຸດທະການໂຮ່ຈີມິນ ອັນເປັນປະຫວັດສາດ, ຊາດຫວຽດນາມໄດ້ຕັ້ງໝັ້ນ, ເຊື່ອໝັ້ນຕົນເອງ ແລະ ກ້າວຂຶ້ນຢ່າງເຂັ້ມແຂງໜັກແໜ້ນບົນເສັ້ນທາງຂຶ້ນສູ່ສັງຄົມນິຍົມ, ສືບຕໍ່ນຳເອົາການປ່ຽນແປງໃໝ່ຂອງພວກເຮົາໄປເຖິງຈຸດໝາຍອັນສະຫງ່າງາມ, ເຂົ້າຈອດຝັ່ງແຫ່ງຄວາມສົມບູນພູມສຸກ, ພ້ອມກັນກັບມະນຸດຊາດຜູ້ກ້າວໜ້າກໍ່ສ້າງໃຫ້ໂລກມີສັນຕິພາບ ສະຖຽນລະພາບ ມິດຕະພາບ ການຮ່ວມມື ແລະ ຈະເລີນວັດທະນະຖາວອນ./.
ໂດຍ: ເຈືອງເຕິນຊາງ,
ກຳມະການກົມການເມືອງສູນກາງພັກ, ປະທານປະເທດແຫ່ງ ສສ.ຫວຽດນາມ
-------------------
(1) ໂຮ່ຈີມິນ: ນິພົນຄົບຊຸດ, ສຳນັກພິມຈຳໜ່າຍການເມືອງແຫ່ງຊາດ, ຮ່າໂນ້ຍ, 1996, ເຫຼັ້ມທີ 10, ໜ້າທີ 463 – 464.
(2), (3) ໂຮ່ຈີມິນ: ນິພົນຄົບຊຸດ,… ເຫຼັ້ມທີ 7, ໜ້າ 368, 572.
