ກ່ອນໜ້ານີ້ 70 ປີ, ໃນວັນເດືອນຂອງລະດູຮ່ວງໂຮຍທີ່ເປັນປະຫວັດສາດ, ພາຍໃຕ້ການນຳພາຂອງພັກກອມມູນິດຫວຽດນາມ ແລະ ປະທານໂຮ່ຈີມິນ, ປະຊາຊົນຫວຽດນາມໄດ້ສ້າງຜົນງາການປະຕິວັດເດືອນສິງຫາທີ່ຍິ່ງໃຫຍ່. ວັນທີ 2 ກັນຍາ, ຢູ່ທີ່ສະໜາມຫຼວງບາດິ່ງ ຮ່າໂນ້ຍ, ໂດຍຕາງໜ້າລັດຖະບານຊົ່ວຄາວ, ທ່ານປະທານໂຮ່ຈີມິນໄດ້ອ່ານບົດປະກາດຖະແຫຼງເອກະລາດ ເຊິ່ງໄດ້ປະກາດຢ່າງສະຫງ່າຜ່າເຜີຍຕໍ່ປະຊາຊົນທັງຊາດ ແລະ ທົ່ວໂລກວ່າ: “ປະເທດຫວຽດນາມມີສິດໄດ້ຮັບອິດສະຫຼະພາບ ແລະ ເອກະລາດ, ແລະຄວາມຈິງໄດ້ກາຍເປັນປະເທດອິດສະຫຼະພາບ ແລະ ເອກະລາດແລ້ວ”(1), ເພື່ອແຈ້ງການກຳເນີດຂອງປະເທດ ສາທາລະນະລັດ ປະຊາທິປະໄຕ ຫວຽດນາມ, ເຊິ່ງເປັນປະເທດປະຊາທິປະໄຕປະຊາຊົນທຳອິດ ຢູ່ອາຊີຕະເວັນອອກສຽງໃຕ້, ປັດຈຸບັນເປັນປະເທດສາທາລະນະລັດ ສັງຄົມນິຍົມ ຫວຽດນາມ. ເຫດການອັນສຳຄັນນີ້ ເປັນຫຼັກໝາຍຄຳອັນຮຸ່ງເຮືອງເຫຼືອງເຫຼື້ອມໃນປະຫວັດສາດແຫ່ງການສ້າງຕັ້ງປະເທດ ແລະ ປົກປັກຮັກສາປະເທດອັນສະຫງ່າລາສີຂອງຊາດຫວຽດນາມ.
ການປະຕິວັດເດືອນສິງຫາສຳເລັດຜົນພາໄປເຖິງການກຳເນີດເກີດຂຶ້ນຂອງປະເທດ ສາທາລະນະລັດ ປະຊາທິປະໄຕ ຫວຽດນາມ, ແມ່ນໄຊຊະນະອັນຍິ່ງໃຫຍ່ຂອງປະຊາຊົນຫວຽດນາມ, ທັບມ້າງແອກປົກຄອງ ກົດຂີ່ ຂູດຮີດຂອງລະບອບລ່າເມືອງຂຶ້ນ ສັກດິນາ, ຍາດອຳນາດມາມືປະຊາຊົນ. ປະເທດຫວຽດນາມ ຈາກບ່ອນເປັນແຄວ້ນເມືອງຂຶ້ນ ເຄິ່ງສັກດິນາ ໄດ້ກາຍເປັນປະເທດເອກະລາດ ອິດສະລະພາບ. ປະຊາຊົນຫວຽດນາມ ຈາກຊາດຂ້ອຍຂ້າມ້າຕ່າງ ໄດ້ກາຍເປັນເຈົ້າຂອງປະເທດ ເປັນເຈົ້າສັງຄົມ ເປັນເຈົ້າຊາຕາກຳຂອງຕົນ. ປະເທດຫວຽດນາມ, ຊາດຫວຽດນາມ ກ້າວເຂົ້າສູ່ສັກກະຫຼາດໃໝ່, ສັກກະຫຼາດແຫ່ງເອກະລາດແຫ່ງຊາດ ແລະ ສັງຄົມນິຍົມ. ການປະຕິວັດເດືອນສິງຫາເປັນເຫດການທີ່ມີລະດັບຍຸກສະໄໝ ມີຄວາມໝາຍສາກົນທີ່ເລິກເຊິ່ງ; ເປັນແຫຼ່ງປຸກລະດົມກຳລັງໃຈອັນໃຫຍ່ຫຼວງຕໍ່ກັບບັນດາປະເທດເມືອງຂຶ້ນ, ປະຊາຊົນຜູ້ຖືກກົດຂີ່ຂູດຮີດໃນໂລກ ໃຫ້ລຸກຮືຂຶ້ນຕໍ່ສູ້ຍາດເອົາເອກະລາດແຫ່ງຊາດ ປະຊາທິປະໄຕ ແລະ ຄວາມກ້າວໜ້າທາງສັງຄົມ.
ການປະຕິວັດເດືອນສິງຫາແມ່ນໄຊຊະນະຂອງກຳລັງແຮງແຫ່ງຄວາມສາມັກຄີປວງຊົນທັງຊາດ, ມູນເຊື້ອຮັກຊາດອັນແຮງກ້າ, ຄຸນສົມບັດຫຼັກໝັ້ນ ສະຕິປັນຍາ ແລະ ເຈດຈຳນົງອົງອາດກ້າແກ່ນ ຂອງຊາດຫວຽດນາມ ເຊິ່ງໄດ້ສືບຕໍ່ ເສີມຂະຫຍາຍຂຶ້ນສູ່ຍອດສູງໃໝ່ໃນການຕໍ່ຕ້ານ ໂດຍແມ່ນພັກກອມມູນິດຫວຽດນາມເປັນຜູ້ຈັດຕັ້ງ ແລະ ນຳພາ; ແມ່ນໄຊຊະນະຂອງແນວທາງປະຕິວັດທີ່ຖືກຕ້ອງ, ການນຳພາທີ່ສະຫຼາດສ່ອງໃສ, ວິໄສທັດຍຸດທະສາດ, ຄວາມສຳພັດໄວໃນການສ້າງໂອກາດ ແລະ ຍາດເອົາໂອກາດພັນປີມີຄັ້ງໜຶ່ງ, ການສົມທົບກຳລັງແຮງຂອງຊາດ ກັບກຳລັງແຮງແຫ່ງຍຸກສະໄໝຂອງພັກກອມມູນິດຫວຽດນາມ ແລະ ປະທານໂຮ່ຈີມິນ. ແນວທາງດັ່ງກ່າວນັ້ນ ໄດ້ປະຕິບັດໂດຍຖັນແຖວສະມາຊິກພັກທີ່ຈົງຮັກພັກດີຢ່າງເດັດຂາດຕໍ່ອຸດົມການປະຕິວັດ, ບໍ່ຫວັ່ນໃຈຕໍ່ຄວາມຫຍຸ້ງຍາກລຳບາກ ຄວາມເສຍສະລະ, ໄດ້ມານະພະຍາຍາມໂຄສະນາ ປຸກລະດົມຂົນຂວາຍ ຈັດຕັ້ງປະຊາຊົນລຸກຮືຂຶ້ນຕໍ່ຕ້ານພ້ອມບາດດຽວ ຍາດເອົາອຳນາດການປົກຄອງໃນທົ່ວປະເທດ, ເປັນຜົນສຳເລັດຂອງສາມກະແສການປະຕິວັດສູງ ຂອງປະຊາຊົນຫວຽດນາມ ໃນຕະຫຼອດເວລາ 15 ປີ ນັບແຕ່ວັນສ້າງຕັ້ງພັກ.
ເຈັດສິບປີທີ່ຜ່ານມາ, ປະຕິບັດຄຳປະຕິຍານທີ່ສັກກາລະບູຊາ ຢູ່ທີ່ພິທີປະກາດຖະແຫຼງເອກະລາດ: “ປະຊາຊົນຫວຽດນາມທຸກຄົນ ຕັດສິນໃຈນຳໃຊ້ຈິດໃຈ ແລະ ກຳລັງວັງຊາ, ຊີວິດອິນຊີ ແລະ ຊັບສິນທັງໝົດຂອງຕົນ ເພື່ອຮັກສາສິດອິດສະຫຼະພາບ ແລະ ເອກະລາດນັ້ນ”(2), ປະຊາຊົນຫວຽດນາມໄດ້ນຳໃຊ້ກຳລັງວັງຊາ ສະຕິປັນຍາຂອງຕົນບໍ່ຈັກວ່າເທົ່າໃດ ແລະ ໄດ້ເສຍສະລະເລືອດເນື້ອບໍ່ຈັກວ່າເທົ່າໃດ ເພື່ອຮັກສາຜົນງານການປະຕິວັດ ແລະ ປະຕິບັດບັນດາເປົ້າໝາຍອັນສູງສົ່ງ ຂອງການປະຕິວັດເດືອນສິງຫາ ຄື: ຄວາມເປັນເອກະລາດແຫ່ງຊາດ, ເສລີພາບ ແລະ ຄວາມຜາສຸກຂອງປະຊາຊົນ. ພັກ ລັດ ປະຊາຊົນຫວຽດນາມ ໄດ້ທັບມ້າງທຸກກົນອຸບາຍຕ້ານຢັນທຳລາຍ ຂອງບັນດາອິດທິກຳລັງສັດຕູ, ປົກປັກຮັກສາອຳນາດການປົກຄອງປະຕິວັດທີ່ຍັງໜຸ່ມນ້ອຍ; ດຳເນີນການຕໍ່ຕ້ານຕະຫຼອດ 9 ປີ ທີ່ຍືດເຍື້ອຍາວນານ, ເຕັມໄປດ້ວຍຄວາມທຸກຍາກລຳບາກ ຄວາມເສຍສະລະ, ຍາດໄດ້ໄຊຊະນະ ດຽນບຽນຝູ ອັນເປັນປະວັດສາດທີ່ “ສະທ້ານຟ້າສະເທືອນດິນ”, ເລື່ອງຊື່ລືນາມທົ່ວໂລກ. ຕໍ່ຈາກນັ້ນ, ຜ່ານເວລາຊາວເອັດປີແຫ່ງການສູ້ຮົບຢ່າງອົງອາດກ້າຫານ ໄດ້ຜາບແພ້ບັນດາຍຸດທະສາດສົງຄາມຂອງສັດຕູ, ຍາດເອົາໄຊຊະນະສົມບູນໃນການບຸກໂຈມຕີທົ່ວທຸກສະໜາມຮົບ ແລະ ລຸກຮືຂຶ້ນທົ່ວພາກໃຕ້ ໃນລະດູບານໃໝ່ປີ 1975, ເຊິ່ງຍອດສູງແມ່ນ ຍຸດທະການໂຮ່ຈີມິນອັນເປັນປະຫວັດສາດ, ປົດປ່ອຍທົ່ວພາກໃຕ້, ໂຮມປະເທດຊາດເຂົ້າເປັນເອກະພາບ. ຫຼັງຈາກນັ້ນ, ປະຊາຊົນຫວຽດນາມ ຊ້ຳພັດຕ້ອງສືບຕໍ່ດຳເນີນການສູ້ຮົບຢູ່ຊາຍແດນຕາເວັນຕົກສຽງໃຕ້ ແລະ ຊາຍແດນທາງທິດເໜືອ ເພື່ອປົກປັກຮັກສາປະເທດຊາດ ແລະ ເຮັດພັນທະສາກົນອັນສູງສົ່ງ. ພຽງແຕ່ຮອດເວລານັ້ນ, ປະຊາຊົນຫວຽດນາມ ຈຶ່ງໄດ້ມີຊີວິດຢ່າງແທ້ຈິງຢູ່ໃນສັນຕິພາບ, ໄດ້ກໍ່ສ້າງປະເທດຊາດຄືນໃໝ່. ຈັ່ງແມ່ນຖືກຕາມຄຳຄົມຂອງທ່ານ ຫງວຽນຈ້າຍ ທີ່ຂຽນໃນ ດ້າຍ ກ໋າວ ບິ່ງ ໂງ: “ປະເທດຊາດແຕ່ນີ້ໄປຈະໄດ້ໝັ້ນຄົງຖາວອນ, ບ້ານເມືອງແຕ່ນີ້ໄປຈະໄດ້ປ່ຽນແປງໃໝ່” (3).
ແນວທາງການປ່ຽນແປງໃໝ່ທີ່ກອງປະຊຸມໃຫຍ່ຄັ້ງທີ VI ຂອງພັກກອມມູນິດຫວຽດນາມ ວາງອອກມາ ຕອບສະໜອງໄດ້ກັບຄວາມຮຽກຮ້ອງອັນຮີບດ່ວນຂອງສະພາບການຕົວຈິງ, ຖືກກັບແນວຄິດຈິດໃຈຂອງປະຊາຊົນ, ໄດ້ຮັບຄວາມເຫັນດີເຫັນພ້ອມ ສະໜັບສະໜູນຂອງປະຊາຊົນ ແລະ ປະຊາຊົນເຂົ້າຮ່ວມການປະຕິບັດຢ່າງຕັ້ງໜ້າ, ໄດ້ເປີດໄລຍະໃໝ່ແຫ່ງການພັດທະນາສ້າງສາປະເທດ. ຜ່ານຄວາມມານະພະຍາຍາມສູ້ຊົນໃນເວລາເກືອບ 30 ປີ, ປະເທດຫວຽດນາມຍາດໄດ້ຜົນສຳເລັດອັນໃຫຍ່ຫຼວງ ມີຄວາມໝາຍປະຫວັດສາດ. ຈາກປະເທດທຸກຍາກ ຫຼ້າຫຼັງ, ຫວຽດນາມໄດ້ບືນຕົວຂຶ້ນ, ພົ້ນອອກຈາກວິກິດການເສດຖະກິດ - ສັງຄົມ, ຜ່ານຂ້າມລະດັບປະເທດທຸກຈົນ ດ້ອຍພັດທະນາ, ກາຍເປັນປະເທດກຳລັງພັດທະນາທີ່ມີລາຍຮັບປານກາງ; ຊີວິດການເປັນຢູ່ຂອງປະຊາຊົນໄດ້ຮັບການປົວແປງໃຫ້ດີຂຶ້ນ; ການເມືອງ - ສັງຄົມສະຫງົບດີມີສະຖຽນລະພາບ; ເອກະລາດແຫ່ງຊາດ ອະທິປະໄຕ ເອກະພາບ ແລະ ຜືນແຜ່ນດິນອັນຄົບຖ້ວນຂອງປະເທດ ໄດ້ຮັບການຮັກສາຢ່າງໝັ້ນຄົງ; ການພົວພັນຕ່າງປະເທດນັບມື້ນັບໄດ້ຮັບການເປີດກວ້າງ, ອິດທິພົນ ຖານະບົດບາດຂອງຫວຽດນາມໃນເວທີໂລກ ໄດ້ຮັບການຍົກສູງຂຶ້ນ. ກຳລັງແຮງສັງລວມຂອງປະເທດໄດ້ເພີ່ມຂຶ້ນ, ສ້າງທ່າ ແລະ ກຳລັງໃໝ່ ໃຫ້ປະເທດສືບຕໍ່ຈະເລີນພັດທະນາຍິ່ງຂຶ້ນ. ໄຊຊະນະອັນຍິ່ງໃຫຍ່ ແລະ ບັນດາຜົນສຳເລັດອັນໃຫຍ່ຫຼວງ ຂອງປະຊາຊົນຫວຽດນາມໃນ 70 ປີທີ່ຜ່ານມາ ໄດ້ຮັບຄວາມນິຍົມຊົມຊອບ ຕີລາຄາສູງຈາກປະຊາຊົນໂລກແລະເພື່ອນມິດສາກົນ, ໄດ້ກາຍເປັນຊັບສົມບັດອັນລ້ຳຄ່າຂອງຊາດຫວຽດນາມ ໃນພາລະກິດຍູ້ແຮງການຫັນເປັນອຸດສາຫະກຳ ທັນສະໄໝ ແລະ ເຊື່ອມໂຍງເຂົ້າກັບສາກົນ.
ມື້ນີ້, ພັກ ລັດ ແນວໂຮມປະເທດຊາດຫວຽດນາມ ຈັດຕັ້ງພິທີສະເຫຼີມສະຫຼອງການປະຕິວັດເດືອນສິງຫາ ແລະ ວັນຊາດ ແຫ່ງປະເທດສາທາລະນະລັດ ສັງຄົມນິຍົມຫວຽດນາມ ຄົບຮອບ 70 ປີ ຢ່າງຄຶກຄຶ້ນ ສົມກຽດ. ດ້ວຍຄວາມເອກອ້າງທະນົງໃຈ ແລະ ຄວາມຮູ້ສຶກໃນສິ່ງສັກສິດ, ພວກເຮົາລະນຶກເຖິງທ່ານປະທານໂຮ່ຈີມິນ, ຜູ້ນຳທີ່ປີຊາສາມາດ, ວິລະຊົນປົດປ່ອຍຊາດ, ບູລຸດຜູ້ມີຊື່ສຽງທາງດ້ານວັດທະນະທຳຂອງໂລກ, ເພີ່ນໄດ້ອຸທິດຊີວິດຂອງຕົນໃຫ້ປະຊາຊົນ ປະເທດຊາດ, ນຳພາພັກກອມມູນິດຫວຽດນາມ ປະຊາຊົນຫວຽດນາມ ຍາດເອົາບັນດາໄຊຊະນະອັນສະຫງ່າລາສີ, ເຮັດໃຫ້ຊາດຫວຽດນາມ ປະເທດຊາດບ້ານເມືອງຫວຽດນາມ ມີຄວາມສະຫງ່າຜ່າເຜີຍ ມີຊື່ສຽງໂດ່ງດັງ. ແນວຄິດ ແລະ ພາລະກິດຂອງທ່ານປະທານໂຮ່ຈີມິນ ເປັນຊັບສົມບັດອັນລ້ຳຄ່າ ເປັນທວນໄຟເຍືອງທາງ ໃຫ້ຊາດຫວຽດນາມກ້າວຢ່າງໝັ້ນແກ່ນໄປສູ່ອະນາຄົດ. ພວກເຮົາຈາລຶກບຸນຄຸນອັນໃຫຍ່ຫຼວງ ຂອງວິລະຊົນ ນັກຮົບທີ່ເສຍຊີວິດ ລູກຫຼານທີ່ດີເດັ່ນຂອງຊາດຫຼາຍລ້ານຄົນ ທີ່ໄດ້ເສຍສະລະຊີວິດເພື່ອເອກະລາດ ອິດສະຫຼະພາບຂອງຊາດ, ເພື່ອອຳນາດອະທິປະໄຕ ເອກະພາບ ແລະ ຜືນແຜ່ນດິນອັນຄົບຖ້ວນ ຂອງປະເທດຊາດຫວຽດນາມ, ເພື່ອສັງຄົມນິຍົມ, ເພື່ອພັນທະສາກົນອັນສູງສົ່ງ. ພວກເຮົາຂໍສະແດງຄວາມຮູ້ບຸນຄຸນຢ່າງເລິກເຊິ່ງ ຕໍ່ບັນດານັກປະຕິວັດອະວຸໂສ, ບັນດາແມ່ຫວຽດນາມວິລະຊົນ, ບັນດາສະຫາຍນັກຮົບຜູ້ເສຍອົງຄະ ນັກຮົບທີ່ເຈັບໄຂ້, ບັນດາຄອບຄົວທີ່ມີຄຸນງາມຄວາມດີຕໍ່ຊາດ ພ້ອມດ້ວຍພໍ່ແມ່ພີ່ນ້ອງປະຊາຊົນ ແລະ ນັກຮົບໃນທົ່ວປະເທດທີ່ໄດ້ສູ້ຮົບ ເສຍສະລະຢ່າງພິລະອາດຫານ, ປະກອບສ່ວນຢ່າງໃຫຍ່ຫຼວງໃຫ້ແກ່ພາລະກິດການປະຕິວັດອັນສະຫງ່າລາສີຂອງຊາດເຮົາ. ພວກເຮົາຈົດຈຳໄວ້ຕະຫຼອດ ແລະ ສະແດງຄວາມຮູ້ບຸນຄຸນຢ່າງເລິກເຊິ່ງຕໍ່ການຊ່ວຍເຫຼືອອັນປະເສີດ ຂອງປະຊາຊົນບັນດາປະເທດອ້າຍນ້ອງ, ຂອງບັນດາກຳລັງທີ່ກ້າວໜ້າ ພ້ອມດ້ວຍເພື່ອນມິດໃນທົ່ວທັງຫ້າທະວີບ ທີ່ໄດ້ຊ່ວຍເຫຼືອພາລະກິດການຕໍ່ສູ້ປົດປ່ອຍຊາດ ໂຮມປະເທດຊາດເຂົ້າເປັນເອກະພາບກ່ອນໜ້ານີ້ ກໍ່ຄືພາລະກິດສ້າງສາ ແລະ ປົກປັກຮັກສາປະເທດຊາດໃນປັດຈຸບັນ ຂອງຫວຽດນາມ.
ມື້ນີ້, ປະເທດເຮົາພວມຢືນຢູ່ຕໍ່ໜ້າໂອກາດດີ ກາລະອັນສະດວກທີ່ໃຫຍ່ໂຕ, ພ້ອມກັນນັ້ນກໍ່ຕ້ອງປະເຊີນໜ້າກັບຄວາມຫຍຸ້ງຍາກ ສິ່ງທ້າທາຍຕ່າງໆ ຫຼາຍຢ່າງ. ສະພາບການໂລກ ແລະ ພາກພື້ນປ່ຽນແປງຢ່າງເລິກເຊິ່ງ ໄວວາ, ຫັນປ່ຽນຢ່າງສັບສົນ ຄາດຄະເນໄດ້ຍາກ. ສົງຄາມ, ການປະທະກັນທາງດ້ານຊົນເຜົ່າ ສາສະໜາ, ການກໍ່ການຮ້າຍ, ການຈະລາຈົນ, ການພິພາດຊ່ວງຊິງກັນດ້ານອະທິປະໄຕ ເຂດແດນ ເກີດຂຶ້ນຢູ່ຫຼາຍແຫ່ງ; ພິເສດແມ່ນ ການພິພາດກັນດ້ານອະທິປະໄຕໃນເຂດທະເລ ໝູ່ເກາະຢູ່ເຂດທະເລຕາເວັນອອກ ທີ່ນັບມື້ນັບເພີ່ມຄວາມເຄັ່ງຮ້ອນ ແລະ ກົນອຸບາຍ ການເຄື່ອນໄຫວຂອງບັນດາອິດທິກຳລັງສັດຕູ ທີ່ຕ້ານລັດເຮົາ ລະບອບຂອງເຮົາ ເຊິ່ງເປັນການນາບຂູ່ໂດຍກົງເຖິງສັນຕິພາບ ສະຖຽນລະພາຍ ອະທິປະໄຕ ແລະ ຜືນແຜ່ນດິນອັນຄົບຖ້ວນ ຂອງປະເທດເຮົາ. ຢູ່ໃນປະເທດ, ບັນດາຜົນສຳເລັດທີ່ຍາດມາໄດ້ໃນຊຸມປີທີ່ຜ່ານມາແມ່ນສຳຄັນທີ່ສຸດ ແຕ່ກໍ່ຍັງບໍ່ທັນສົມຄູ່ກັບຄວາມສາມາດບົ່ມຊ້ອນ, ຍັງບໍ່ທັນໝັ້ນຄົງນັບທັງດ້ານເສດຖະກິດ ວັດທະນະທຳ ສັງຄົມ ແລະ ສິ່ງແວດລ້ອມ. ໄພອັນຕະລາຍ 4 ປະການທີ່ພັກກອມມູນິດຫວຽດນາມໄດ້ຊີ້ໃຫ້ເຫັນນັ້ນ ຍັງຄົງຕົວຢູ່, ມີດ້ານພັດຮ້າຍແຮງກວ່າ ສະແດງອອກຢ່າງສັບສົນກວ່າແຕ່ກ່ອນ, ເປັນຕົ້ນແມ່ນ ໄພອັນຕະລາຍແຫ່ງການຖອຍຫຼັງທາງດ້ານເສດຖະກິດ ແລະ ຄວາມຊຸດໂຊມທາງດ້ານແນວຄິດການເມືອງ ຄຸນສົມບັດສິນທຳ ແບບວິທີດຳລົງຊີວິດ, ອຸດົມການຖືກຈາງຫາຍໄປ, ເຈດຈຳນົງສູ້ຮົບຫລຸດຜ່ອນລົງ; ພະຍາດອາດຍາສິດ, ສໍ້ລາດບັງຫຼວງ, ຄວາມຟຸມເຟືອຍ ໃນພະນັກງານສະມາຊິກພັກພາກສ່ວນໜຶ່ງ ຍັງບໍ່ທັນຖືກສະກັດກັ້ນ ຍູ້ຖອຍ ເຊິ່ງໄດ້ພາໃຫ້ສັງຄົມເດືອດຮ້ອນ ປະຊາຊົນຂັດຂ້ອງບໍ່ພໍໃຈ, ຄວາມໄວ້ວາງໃຈຂອງປະຊາຊົນຕໍ່ກັບ ພັກແລະລັດ ກໍ່ຖືກຫລຸດລົງ.
ສະເຫຼີມສະຫຼອງການປະຕິວັດເດືອນສິງຫາ ແລະ ວັນຊາດ, ທົ່ວພັກ ທົ່ວປວງຊົນ ທົ່ວກອງທັບເຮົາ ສາມັກຄີເປັນນ້ຳໜຶ່ງໃຈດຽວກັນ, ຕັ້ງໜ້າພະຍາຍາມສູ້ຊົນ, ສວຍໃຊ້ໂອກາດດີ, ຜ່ານຜ່າສິ່ງທ້າທາຍ, ສຸດອົກສຸດໃຈຍົກສູງມານະຈິດ ຄວາມຕັດສິນໃຈຮັກສາຜົນງານແຫ່ງການປະຕິວັດ, ສືບຕໍ່ປະຕິບັດບັນດາເປົ້າໝາຍອັນສູງສົ່ງ ຂອງການປະຕິວັດເດືອນສິງຫາ ແລະ ຄຳສາບານເອກະລາດ ທີ່ໄດ້ຝັງເລິກໃນໝາກຫົວໃຈຂອງຊາວຫວຽດນາມແຕ່ລະຄົນ; ປະຕິບັດສອງໜ້າທີ່ຍຸດທະສາດ ສ້າງສາ ແລະ ປົກປັກຮັກສາປະເທດຊາດຢ່າງສຳເລັດມີໄຊ; ຫຍໍ້ສັ້ນຊ່ອງວ່າງແຫ່ງການພັດທະນາ ກັບບັນດາປະເທດໃນໂລກ; ສູ້ຊົນສ້າງປະເທດຫວຽດນາມໃຫ້ກາຍເປັນປະເທດອຸດສາຫະກຳຕາມທິດທັນສະໄໝໂດຍໄວ; ປົກປັກຮັກສາເອກະລາດ ອຳນາດອະທິປະໄຕ ເອກະພາບ ແລະ ຜືນແຜ່ນດິນອັນຄົບຖ້ວນ, ປົກປັກຮັກສາຜົນປະໂຫຍດຂອງຊາດ, ປົກປັກຮັກສາພັກ ລັດ ປະຊາຊົນ ແລະ ລະບອບສັງຄົມນິຍົມ; ຮັກສາສິ່ງແວດລ້ອມສັນຕິພາບ ຄວາມສະຫງົບ ເພື່ອສ້າງສາພັດທະນາປະເທດ; ຍົກສູງຖານະບົດບາດຂອງປະເທດໃນເວທີໂລກ; ນຳເອົາຊີວິດຄວາມເປັນຢູ່ອິ່ມໜຳສຳລານ ສົມບູນພູມສຸດມາໃຫ້ປະຊາຊົນ ຕາມຄຳສັ່ງສອນຂອງລຸງໂຮ່ ທີ່ວ່າ: “ຖ້າຫາກປະເທດເປັນເອກະລາດ ແຕ່ປະຊາຊົນບໍ່ມີຄວາມສຸກ ບໍ່ມີອິດສະຫຼະເສລີ, ຄວາມເປັນເອກະລາດນັ້ນກໍ່ບໍ່ມີຄວາມໝາຍຫຍັງໝົດ”(4).
ເພື່ອປະຕິບັດບັນດາເປົ້າໝາຍທີ່ສູງສົ່ງນັ້ນໃຫ້ສຳເລັດມີໄຊ, ພັກ ລັດ ແລະ ປະຊາຊົນຫວຽດນາມຕ້ອງເສີມຂະຫຍາຍກຳລັງແຮງແຫ່ງຄວາມສາມັກຄີຂອງຊາດ ສົມທົບກັບກຳລັງແຮງຂອງຍຸກສະໄໝ ຢ່າງສຸດຂີດ; ສືບຕໍ່ຍູ້ແຮງການປ່ຽນແປງໃໝ່ຢ່າງຮອບດ້ານ ພັດທະນາເສດຖະກິດຕະຫຼາດຕາມທິດສັງຄົມນິຍົມ; ຍູ້ແຮງການຫັນເປັນອຸສາຫະກຳ ທັນສະໄໝ, ຈັດວາງໂຄງປະກອບເສດຖະກິດຄືນໃໝ່ ຕິດກັບປ່ຽນແປງໃໝ່ຕົວແບບເຕີບໂຕເສດຖະກິດ ເພື່ອພັດທະນາປະເທດຢ່າງໄວ ແລະ ໝັ້ນທ່ຽງ. ພັດທະນາບັນດາຂົງເຂດວັດທະນະທຳ ສັງຄົມຢ່າງຮອບດ້ານ; ປະຕິບັດຄວາມກ້າວໜ້າ ແລະ ຄວາມຍຸດຕິທຳທາງສັງຄົມ. ຖືເອົາເປົ້າໝາຍກໍ່ສ້າງປະເທດຫວຽດນາມສັນຕິພາບ ເອກະລາດ ເອກະພາບ ຜືນແຜ່ນດິນອັນຄົບຖ້ວນ, ປະຊາຊົນຮັ່ງມີ ປະເທດຊາດເຂັ້ມແຂງ ມີປະຊາທິປະໄຕ ຍຸດຕິທຳ ສີວິໄລ ເປັນຈຸດລວມພ້ອມກັນ, ລົບລ້າງຄວາມອະຄະຕິ ແລະຄວາມຄິດຫຍໍ້ທໍ້ນ້ອຍໃຈກ່ຽວກັບອະດີດຕະການທັງໝົດ, ຍອມຮັບຈຸດຄວາມເຫັນແຕກຕ່າງກັນຕ່າງໆ ທີ່ບໍ່ຜືນຕໍ່ຜົນປະໂຫຍດລວມຂອງຊາດ ເພື່ອສາມັກຄີຊາວຫວຽດນາມຮັກຊາດທຸກຄົນ.
ເພີ່ມທະວີກຳລັງປ້ອງກັນປະເທດ ແລະ ປ້ອງກັນຄວາມສະຫງົບ, ກໍ່ສ້າງທ່າສະໜາມປ້ອງກັນປະເທດທົ່ວປວງຊົນ, ທ່າສະໜາມປ້ອງກັບຄວາມສະຫງົບປະຊາຊົນໃຫ້ໝັ້ນຄົງ, ພິເສດແມ່ນກຳລັງແຮງ ແລະ ທ່າສະໜາມໃນຈິດໃຈປະຊາຊົນ. ກໍ່ສ້າງກອງທັບປະຊາຊົນ ແລະ ກອງກຳລັງຕຳຫຼວດປະຊາຊົນ ທີ່ປະຕິວັດ ລະບຽບຫຼວງ ຍອດຍ້ຽມ ທັນສະໄໝເທື່ອລະກ້າວ, ມີຄຸນນະພາບສັງລວມ ແລະ ກຳລັງສູ້ຮົບສູງ; ຈົງຮັກພັກດີຢ່າງເດັດຖານ ຕໍ່ກັນປະເທດຊາດແລະປະຊາຊົນ, ຕໍ່ກັບພັກແລະລັດ, ຍົກສູງສະຕິລະວັງຕົວຢ່າງເປັນປະຈຳ, ທັບມ້າງທຸກກົນອຸບາຍ ທຸກການເຄື່ອນໄຫວມ້າງເພທຳລາຍ ຂອງບັນດາອິດທິກຳລັງສັດຕູ, ຮັກສາຄວາມສະຫງົບດ້ານການເມືອງ ແລະ ຄວາມປອດໄພເປັນລະບຽບຮຽບຮ້ອຍຂອງສັງຄົມ, ປົກປັກຮັກສາຊີວິດການເປັນຢູ່ສະຫງົບສຸກຂອງປະຊາຊົນ, ປົກປັກຮັກສາເອກະລາດ ອະທິປະໄຕ ຜືນແຜ່ນດິນອັນຄົບຖ້ວນ ຂອງປະເທດຊາດ ໄວ້ຢ່າງໝັ້ນຄົງ, ບໍ່ໃຫ້ຕົກໃນທ່າຮັບ ບໍ່ຖືກບັງເອີນໃນທຸກກໍລະນີ. ປະຕິບັດແນວທາງການຕ່າງປະເທດທີ່ເປັນເອກະລາດ ເປັນເຈົ້າຕົນເອງ ສັນຕິພາບ ການຮ່ວມມື ແລະ ພັດທະນາ, ການພົວພັນຫຼາຍຮູບ ຫຼາຍແບບ, ຫວຽດນາມເປັນເພື່ອນ ເປັນຄູ່ຮ່ວມທີ່ໄວ້ວາງໃຈໄດ້, ເປັນສະມາຊິກທີ່ມີຄວາມຮັບຜິດຊອບ ຂອງວົງຄະນາຍາດສາກົນ. ບໍ່ຍຸດຢັ້ງໃນການຍົກສູງປະສິດທິຜົນ ຂອງການເຄື່ອນໄຫວການຕ່າງປະເທດ, ຍົກສູງອິດທິພົນ ແລະ ບົດບາດຖານະ ຂອງປະເທດຢູ່ໃນພາກພື້ນ ແລະ ໃນໂລກ, ຍາດແຍ່ງເອົາຄວາມສະໜັບສະໜູນຂອງເພື່ອນມິດໃນໂລກ; ປະກອບສ່ວນອັນຕັ້ງໜ້າເຂົ້າໃນການຮັກສາສັນຕິພາບ ສະຖຽນລະພາບ ຄວາມພັດທະນະໃນພາກພື້ນ, ເຂົ້າໃນການຕໍ່ສູ້ເພື່ອຄວາມເປັນເອກະລາດແຫ່ງຊາດ ປະຊາທິປະໄຕ ແລະ ຄວາມກ້າວໜ້າທາງສັງຄົມ ຂອງປະຊາຊົນໂລກ.
ໜ້າທີ່ສຳຄັນທີ່ມີຄວາມໝາຍຕັດສິນແມ່ນ ກໍ່ສ້າງໃຫ້ພັກກອມມູນິດຫວຽດນາມ ປອດໃສຂາວສະອາດ ໝັ້ນຄົງເຂັ້ມແຂງຢ່າງແທ້ຈິງ, ມີຄວາມສາມາດນຳພາ ແລະ ກຳລັງສູ້ຮົບສູງ; ມີແນວທາງທີ່ຖືກຕ້ອງ ສອດຄ່ອງກັບກົດເກນພາວະວິໄສ ແລະ ສະພາບຕົວຈິງຂອງປະເທດ, ບໍ່ຄຳພີຕາຍຕົວ ບໍ່ຮັກສາເດີມຈາຮີດນິຍົມ ອັດຕະວິໄສ ອະຄະຕິ. ກໍ່ສ້າງຖັນແຖວສະມາຊິກພັກ ທີ່ເປັນແບບຢ່າງ ນຳໜ້າຢ່າງແທ້ຈິງ, ມີຄວາມສະໝັກໃຈຕັ້ງຜົນປະໂຫຍດຂອງປະຊາຊົນ ຜົນປະໂຫຍດຂອງປະເທດຂຶ້ນເໜືອສຸດ ຂຶ້ນກ່ອນອື່ນໝົດ, ທີ່ໄດ້ຮັບຄວາມຮັກແພງ ເຊື່ອຖືຈາກປະຊາຊົນ. ເດັດດ່ຽວກີດກັ້ນ ແລະ ຍູ້ຖອຍສະພາບຄວາມເຊື່ອມໂຊມດ້ານແນວຄິດການເມືອງ, ຄຸນສົມບັດສິນທຳ, ແບບແຜນດຳລົງຊີວິດ, ບັນດາປະກົດການ “ຫັນປ່ຽນດ້ວຍຕົນເອງ” “ຜັນປ່ຽນດ້ວຍຕົນເອງ” ຢູ່ພາຍໃນ, ເປັນຕົ້ນແມ່ນການສໍ້ລາດບັງຫຼວງ ຟຸ່ມເຟືອຍ ອາດຍາສິດ. ມີແຕ່ເຮັດຄືແນວນັ້ນ, ຈຶ່ງປັບປຸງ ເພີ່ມທະວີຄວາມໄວ້ວາງໃຈຂອງປະຊາຊົນຕໍ່ກັບພັກ ແລະ ລັດ. ສືບຕໍ່ປ່ຽນແປງໃໝ່ແບບວິທີການນຳພາຂອງພັກ ໃນເງື່ອນໄຂພັກກຳອຳນາດ ຢູ່ລັດແຫ່ງອຳນາດກົດໝາຍສັງຄົມນິຍົມ ແລະ ເຊື່ອມໂຍງເຂົ້າກັບສາກົນ. ຈັດຕັ້ງກອງປະຊຸມໃຫຍ່ອົງຄະນະພັກຂັ້ນຕ່າງໆຢ່າງສຳເລັດຜົນ ກ້າວໄປເຖິງກອງປະຊຸມໃຫຍ່ຜູ້ແທນທົ່ວປະເທດຄັ້ງທີ XII ຂອງພັກ. ສືບຕໍ່ກໍ່ສ້າງ ປັບປຸງບູລະນະລັດແຫ່ງອຳນາດກົດໝາຍສັງຄົມນິຍົມ ຂອງປະຊາຊົນ ໂດຍປະຊາຊົນ ເພື່ອປະຊາຊົນ; ອຳນາດແຫ່ງລັດທັງໝົດລ້ວນແຕ່ຂຶ້ນກັບປະຊາຊົນ; ທຸກອົງການລັດ, ພະນັກງານ ຂ້າລັດຖະການທັງໝົດ ລ້ວນແຕ່ຕ້ອງຍອມຮັບການຕິດຕາມກວດກາຂອງປະຊາຊົນ. ປ່ຽນແປງໃໝ່ການຄຸ້ມຄອງບໍລິຫານລັດ ສອດຄ່ອງກັບຄວາມຕ້ອງການພັດທະນາເສດຖະກິດຕະຫຼາດຕາມທິດສັງຄົມນິຍົມ; ເສີມຂະຫຍາຍປະຊາທິປະໄຕ ພ້ອມກັນນັ້ນກໍ່ເຊີດຊູຍົກສູງລະບຽບວິໄນ, ຍົກສູງປະສິດທິຜົນ ຄວາມສັກສິດຂອງການຄຸ້ມຄອງບໍລິຫານລັດ ໃນທຸກຂົງເຂດຂອງຊີວິດສັງຄົມ. ຍິ່ງກວ່າເວລາໃດໝົດ, ພວກເຮົາຍິ່ງຕ້ອງຊາບຊືມຄຳສັ່ງສອນຂອງ ລຸງໂຮ່ ທີ່ວ່າ: “ຊາດໜຶ່ງ ພັກໜຶ່ງ ແລະ ມະນຸດແຕ່ລະຄົນ, ມື້ວານນີ້ແມ່ນຍິ່ງໃຫຍ່ ມີຄວາມດຶງດູດໃຈຢ່າງແຮງ, ບໍ່ແມ່ນອນວ່າມື້ນີ້ ແລະ ມື້ອື່ນຍັງໄດ້ຮັບຄວາມຮັກແພງ ແລະ ຍ້ອງຍໍຈາກປະຊາຊົນທຸກຄົນ, ຖ້າຫາກຈິດໃຈບໍ່ບໍລິສຸດຜຸດຜ່ອງອີກ, ຖ້າຫາກຕົກໃສ່ລັດທິອັດຕະບຸກຄົນ”(5).
ສະເຫຼີມສະຫຼອງການປະຕິວັດເດືອນສິງຫາ ແລະ ວັນຊາດ 2 ກັນຍາ ຄົບຮອບ 70 ປີ, ຮັບຮູ້ຢ່າງເລິກເຊິ່ງກ່ຽວກັບຂະໜາດອັນໃຫຍ່ໂຕ ຄວາມໝາຍປະຫວັດສາດອັນສຳຄັນ ແລະ ບັນດາບົດຮຽນແຫ່ງໄຊຊະນະ ຂອງການປະຕິວັດເດືອນສິງຫາ, ພວກເຮົາຍິ່ງມີຄວາມເອກອ້າງທະນົງໃຈກ່ຽວກັບບັນດາຜົນສຳເລັດອັນໃຫຍ່ຫຼວງ, ບັນດາໄຊຊະນະອັນສະຫງ່າອົງອາດ ຂອງປະຊາຊົນເຮົາໃນຕະຫຼອດ 70 ມີ່ຜ່ານມາພາຍໃຕ້ການນຳພາຂອງພັກກອມມູນິດຫວຽດນາມ ແລະ ປະທານໂຮ່ຈີມິນຜູ້ຍິ່ງໃຫຍ່, ເອກອ້າງທະນົງໃຈກ່ຽວກັບປະເທດ ແລະ ຊາດຫວຽດນາມຜູ້ພິລະອາດຫານ ກໍ່ຍິ່ງມີມານະຈິດແລະມີຄວາມເຊື່ອໝັ້ນ ເພື່ອປະຕິບັດຢ່າງສຳເລັດມີໄຊ ທຸກໜ້າທີ່ອັນໜັກໜ່ວງ ແຕ່ກໍ່ເປັນກຽດອັນສະຫງ່າທີ່ສຸດ ໃນໄລຍະການປະຕິວັດໃໝ່. ກາລະອັນສະດວກ ໂອການດີ ອະນາຄົມອັນສົດໃສ ກຳລັງລໍຄອຍຕ້ອນຮັບຊາດຫວຽດນາມ! ເສີມຂະຫຍາຍຈິດໃຈອະມະຕະຂອງການປະຕິວັດເດືອນສິງຫາ ແລະ ວັນຊາດ 2 ກັນຍາ, ຂ້າພະເຈົ້າຮຽກຮ້ອງພີ່ນ້ອງຮ່ວມຊາດ ສະຫາຍ ແລະ ນັກຮົບໃນທົ່ວປະເທດ, ຊາວຫວຽດນາມຢູ່ຕ່າງປະເທດ ຈົ່ງສືບຕໍ່ເພີ່ມພູນຍົກສູງນ້ຳໃຈຮັກຊາດ, ຮ່ວມແຮງຮ່ວມໃຈ ສາມັກຄີກັນເຂົ້າເປັນກຸ່ມກ້ອນໜຶ່ງທີ່ໝັ້ນແກ່ນ, ສວຍໃຊ້ໂອກາດ ຜ່ານຜ່າສິ່ງທ້າທາຍທຸກຢ່າງ, ມານະພະຍາຍາມພ້ອມກັນສູ້ຊົນ ພາໃຫ້ຫວຽດນາມຂະຫຍາຍຕົວທຽບບ່າຄຽງໄຫຼ່ກັບເພື່ອນມິດໃນທົ່ວທັງຫ້າທະວີບ; ປົກປັກຮັກສາຜືນແຜ່ນດິນອັນຄົບຖ້ວນແສນຮັກ ທີ່ປູ່ຍ່າຕາຍາຍໄດ້ປະໄວ້ໃຫ້ພວກເຮົາ. ພວກເຮົາເຊື່ອໝັ້ນຢ່າງຕາຍໃຈວ່າ, ຊາດເຮົາ ເຊິ່ງເປັນຊາດທີ່ມີຄວາມສີວິໄລອັນເກົ່າແກ່, ມີສະຕິປັນຍາ ມີຫຼັກໝັ້ນອັນກ້າແກ່ນ, ມີມູນເຊື້ອອັນເດັດດ່ຽວໜຽວແໜ້ນ, ບໍ່ເຄີຍອ່ອນຍອມຈັກເທື່ອ, ມີຄວາມຂະຫຍັນໝັ່ນພຽນ ສະຫຼຽວສະຫຼາດ ປະດິດສ້າງ ແລະ ເຄີຍໄດ້ຮັບບັນດາໄຊຊະນະອັນໃຫຍ່ຫຼວງສະຫງ່າອົງອາດ, ແນ່ນອນວ່າ ຊາດຫວຽດນາມຈະສ້າງຜົນງານອັນມະຫັດສະຈັນໃໝ່ ໃນພາລະກິດສ້າງສາພັດທະນາປະເທດໃຫ້ປະຊາຊົນຮັ່ງມີ ປະເທດຊາດເຂັ້ມແຂງ ມີປະຊາທິປະໄຕ ຍຸດຕິທຳ ສີວິໄລ ແລະ ປົກປັກຮັກສາປະເທດຊາດຫວຽດນາມທີ່ແສນຮັກຂອງພວກເຮົາໃຫ້ໝັ້ນຄົງຖາວອນ!
ນ້ຳໃຈການປະຕິວັດເດືອນສິງຫາ ແລະ ວັນຊາດ 2 ກັນຍາ ໝັ້ນຍືນ!
ປະເທດສາທາລະນະລັດ ສັງຄົມນິຍົມຫວຽດນາມ ໝັ້ນຍືນ!
ພັກກອມມູນິດຫວຽດນາມທີ່ສະຫງ່າລາສີ ໝັ້ນຍືນ!
ທ່ານປະທານໂຮ່ຈີມິນ ມີຊີວິດຢູ່ຕະຫຼອດໄປໃນພາລະກິດຂອງພວກເຮົາ!
ຂຽນໂດຍ ເຈືອງເຕິນຊາງ
ກຳມະການກົມການເມືອງສູນກາງພັກ,
ປະທານປະເທດ ສາທາລະນະລັດ ສັງຄົມນິຍົມຫວຽດນາມ
-------------------------------- |
* ພາດຫົວເລື່ອງໂດຍແມ່ນວາລະສານກອມມູນິດເປັນຜູ້ແຕ່ງ. ບົດນີ້ໄດ້ລົງພິມໃນວາລະສານກອມມູນິດ ສະບັບທີ 875 (ເດືອກັນຍາ 2015).
(1) (2) ໂຮ່ຈີມິນ: ນິພົນຄົບຊຸດ, ສຳນັກພິມຈຳໜ່າຍການເມືອງແຫ່ງຊາດ - ຊື້ເຖິດ, ຮ່າໂນ້ຍ, 2011, ເຫຼັ້ມທີ 4, ໜ້າ 3.
(3) ດ້າຍ ກ໋າວ ບິ່ງ ໂງ ເປັນຄຳປະກາດຖະແຫຼງ ເຊິ່ງເຈົ້າຊີວິດ ເລເລີ້ຍ ສັ່ງໃຫ້ ຫງວຽນຈ້າຍ ຂຽນໃນລະດູບານໃໝ່ ປີ 1428 ເພື່ອປະກາດສຳເລັດສິ້ນສຸດການຕໍ່ສູ້ຕ້ານການຮຸກຮານ ປົກຄອງຂອງລາຊະວົງໝິງ, ຍາດເອົາເອກະລາດ ອິດສະລະພາບມາໃຫ້ປະເທດຊາດ ດ້າຍຫວຽດ (ຊື່ຂອງປະເທດຫວຽດນາມໃນສະໄໝນັ້ນ).
(4) ໂຮ່ຈີມິນ: ປຶ້ມທີ່ໄດ້ແນະນຳ, ເຫຼັ້ມທີ 4, ໜ້າ 64.
(5) ໂຮ່ຈີມິນ: ນິພົນຄົບຊຸດ, ສຳນັກພິມຈຳໜ່າຍການເມືອງແຫ່ງຊາດ, ຮ່າໂນ້ຍ, 1996, ເຫຼັ້ມທີ 12, ໜ້າ 557 – 558.