ກໍ່ສ້າງພັກທາງດ້ານຄຸນສົມບັດ ໃນໄລຍະປະຈຸບັນ
ວກ. - ກອງປະຊຸມໃຫຍ່ຄັ້ງທີ XII ຂອງພັກກອມມູນິດຫວຽດນາມ ໄດ້ວາງໜ້າທີ່ກໍ່ສ້າງ ປັບປຸງພັກຂຶ້ນໃນແຖວໜ້າ ດ້ວຍເປົ້າໝາຍຮອບດ້ານຄື “ກໍ່ສ້າງພັກໃຫ້ມີຄວາມສະອາດປອດໃສ ໝັ້ນຄົງເຂັ້ມແຂງທາງດ້ານການເມືອງ, ແນວຄິດ, ການຈັດຕັ້ງ ແລະ ຄຸນສົມບັດ”. ເປັນຄັ້ງທຳອິດທີ່ “ການກໍ່ສ້າງພັກທາງດ້ານຄຸນສົມບັດ” ຖືກເອົາເຂົ້າໃນເອກະສານກອງປະຊຸມໃຫຍ່ ພ້ອມກັນກັບກໍ່ສ້າງພັກທາງດ້ານການເມືອງ, ແນວຄິດ, ການຈັດຕັ້ງ.
ກໍ່ສ້າງພັກທາງດ້ານຄຸນສົມບັດ ກັບການຮັກສາແລະເພີ່ມທະວີບົດບາດນຳພາຂອງພັກ ໃນໄລຍະປະຈຸບັນ
ປະທານ ໂຮ່ຈີມິນ, ຜູ້ກໍ່ຕັ້ງ ນຳພາ ແລະຝຶກຝົນຫຼໍ່ຫຼອມພັກກອມມູນິດຫວຽດນາມ ບໍ່ພຽງແຕ່ເປັນແວ່ນແຍງທີ່ໃສແຈ້ງກ່ຽວກັບການປະຕິບັດຄຸນສົມບັດປະຕິວັດເທົ່ານັ້ນ, ຫາກຍັງໄດ້ເອົາໃຈໃສ່ຢ່າງເປັນປະຈຳເຖິງການກໍ່ສ້າງ ສຶກສາອົບຮົມ ຝຶກຝົນຫຼໍ່ຫຼອມຄຸນສົມບັດປະຕິວັດ ໃຫ້ພະນັກງານ, ສະມາຊິກພັກ.
ພັກກອມມູນິດຫວຽດນາມສາມາດນຳພາການປະຕິວັດໄດ້ ກໍ່ຍ້ອນວ່າພັກເປັນພັກປະຕິວັດແລະວິທະຍາສາດທີ່ແທ້ຈິງ, ພັກເປັນກອງກຳລັງນຳໜ້າຂອງຊົນຊັ້ນກຳມະກອນ, ເປັນຕົວແທນແຫ່ງຜົນປະໂຫຍດຂອງຊົນຊັ້ນກຳມະກອນ, ປະຊາຊົນຜູ້ອອກແຮງງານ ແລະ ຂອງຊາດຫວຽດນາມ. ພັກເປັນ “ຕົວແທນແຫ່ງສະຕິປັນຍາ, ມະໂນທຳແລະກຽດສັກສີ ຂອງຊາດ”. ປະທານ ໂຮ່ຈີມິນ ເນັ້ນວ່າ: “ພັກບໍ່ແມ່ນອົງການຈັດຕັ້ງເພື່ອເປັນເຈົ້ານາຍຫາຄວາມລ້ຳລວຍ”, “ພັກກອມມູນິດຫວຽດນາມ ເປັນພັກປະຕິວັດ, ເປັນພັກເພື່ອປະຊາຊົນ, ເພື່ອປະເທດຊາດ”(1), “ຜູ້ເຂົ້າພັກ, ເຂົ້າຄະນະຊາວໜຸ່ມບໍ່ແມ່ນເພື່ອຈະເປັນເຈົ້ານາຍ, ຫາຄວາມລ້ຳລວຍ, ແຕ່ແມ່ນເພື່ອຮັບໃຊ້ປະຊາຊົນ”(2). ຢາກນຳພາການປະຕິວັດບັນລຸຄວາມສຳເລັດ, ພະນັກງານ, ສະມາຊິກພັກຕ້ອງອອກແຮງຝຶກຝົນຫຼໍ່ຫຼອມຄຸນສົມບົດປະຕິວັດ. “ມີຄຸນສົມບົດປະຕິວັດຈຶ່ງເສຍສະຫຼະ ສຸດອົກສຸດໃຈກັບການປະຕິວັດ, ຈຶ່ງນຳພາມະຫາຊົນນຳເອົາການປະຕິວັດໄປສູ່ໄຊຊະນະສົມບູນ”(3). ປະທານ ໂຮ່ຈີມິນ ຖືວ່າ ຄຸນສົມບັດເປັນຮາກຖານຂອງຜູ້ເຄື່ອນໄຫວປະຕິວັດ. ເພິ່ນຂຽນວ່າ: “ເຊັ່ນດຽວກັບແມ່ນ້ຳທີ່ມີແຫຼ່ງນ້ຳ, ບໍ່ມີແຫຼ່ງນ້ຳແມ່ນ້ຳຈະຖືກບົກແຫ້ງ. ຕົ້ນໄມ້ຕ້ອງມີກົກຮາກ, ບໍ່ມີຮາກຕົ້ນໄມ້ຈະຖືກຫ່ຽວແຫ້ງ. ຜູ້ເຄື່ອນໄຫວປະຕິວັດຕ້ອງມີຄຸນສົມບັດ, ຫາກບໍ່ມີຄຸນສົມບັດ ເຖິງວ່າຈະມີຄວາມເກັ່ງກ້າກໍ່ບໍ່ສາມາດນຳພາປະຊາຊົນໄດ້”(4).
ເປັນອັນວ່າ ຄຸນສົມບັດປະຕິວັດແມ່ນລັກສະນະປະຈຳຕົວທີ່ເປັນທາດແທ້ຂອງພັກກອມມູນິດຫວຽດນາມ, ເປັນເງື່ອນໄຂເພື່ອໃຫ້ພັກແລະສະມາຊິກພັກແຕ່ລະຄົນ ປະຕິບັດ ເສີມຂະຫຍາຍບົດບາດນຳພາຂອງຕົນຕໍ່ມະຫາຊົນ. ໃນກວ່າ 87 ປີທີ່ຜ່ານມາ, ເຖິງວ່າຕ້ອງຜ່ານຫຼາຍໄລຍະທີ່ມີຄວາມຫຍຸ້ງຍາກລຳບາກຮ້າຍແຮງກໍ່ຕາມ, ແຕ່ພັກກອມມູນິດຫວຽດນາມຍັງຄົງຮັກສາໄດ້ທາດແທ້ຂອງພັກປະຕິວັດທີ່ແທ້ຈິງ, ພະສັກງານ ສະມາຊິກພັກສ່ວນຫຼາຍຍັງຮັກສາໄດ້ຄຸນສົມບັດ ຈະລິຍະທຳປະຕິວັດ. “ສະມາຊິກພັກໄປກ່ອນ, ປະຊາຊົນໄທບ້ານໄປຕາມຫຼັງ”, ຄຳເວົ້າດັ່ງກ່າວສະແດງໃຫ້ເຫັນວ່າ ປະຊາຊົນນັບຖືພັກເປັນຜູ້ນຳຂອງຕົນ, ພັກເປັນແວ່ນແຍງ ເປັນແບບຢ່າງໃຫ້ປະຊາຊົນເຮັດຕາມ. ໃນອາຍຸປະຈຳການ 5 ປີ (2011 - 2015) ວຽກງານກໍ່ສ້າງພັກໄດ້ບັນລຸຜົນສຳເລັດທີ່ສຳຄັນຕ່າງໆ, ຄືດັ່ງທີ່ເອກະສານຂອງກອງປະຊຸມໃຫຍ່ຄັ້ງທີ XII ຂອງພັກໄດ້ລະບຸ, “ພັກກອມມູນິດຫວຽດນາມໄດ້ຮັກສາຫຼັກໝັ້ນການເມືອງ, ທາດແທ້ປະຕິວັດແລະວິທະຍາສາດ, ຕັ້ງໝັ້ນໃນຈຸດປະສົງ, ອຸດົມການເອກະລາດແຫ່ງຊາດ ແລະ ສັງຄົມນິຍົມ, ຕັ້ງໝັ້ນໃນແນວທາງປ່ຽນແປງໃໝ່. ພັກກອມມູນິດຫວຽດນາມ ສົມກຽດເປັນກຳລັງນຳພາລັດ ແລະ ສັງຄົມ”(5).
ແຕ່ວ່າ, ຄຽງຂ້າງຜົນສຳເລັດທີ່ໄດ້ຮັບນັ້ນ, ເອກະສານກອງປະຊຸມໃຫຍ່ຄັ້ງທີ XII ຂອງພັກ ກໍ່ຊີ້ໃຫ້ເຫັນບັນດາຈຸດອ່ອນແລະຂໍ້ຂາດຕົກບົກພ່ອງກ່ຽວກັບການກໍ່ສ້າງພັກ, ໃນນັ້ນມີຂົງເຂດກໍ່ສ້າງພັກທາງດ້ານຄຸນສົມບັດ. ນັ້ນແມ່ນ: “ສະພາບສໍ້ລາດບັງຫຼວງ, ຟຸມເຟືອຍຍັງໜັກໜ່ວງຫຼາຍ ທີ່ມີປະກົດການນັບມື້ນັບເລິກແລບແຍບຍົນ, ສັບສົນ, ສ້າງຄວາມຮ້ອນເຄືອງໃນຫາງສຽງສັງຄົມ, ເປັນຜົນສະທ້ອນເຖິງຄວາມເຊື່ອຖືຂອງປະຊາຊົນຕໍ່ກັບພັກແລະລັດ. ສະພາບຄວາມເສື່ອມໂຊມທາງດ້ານແນວຄິດການເມືອງ, ຄຸນສົມບັດ, ແບບແຜນດຳລົງຊີວິດ ຂອງພະນັກງານ ສະມາຊິກພັກພາກສ່ວນໜຶ່ງທີ່ບໍ່ໜ້ອຍ ຍັງບໍ່ຖືກຍູ້ຖອຍ; ມີດ້ານ, ມີພາກສ່ວນໜຶ່ງຍັງຜັນປ່ຽນສັບສົນກວ່າເກົ່າ”(6); ບັນດາປະກົດການ “ຫັນປ່ຽນດ້ວຍຕົນເອງ”, “ປ່ຽນແປງດ້ວຍຕົນເອງ” ມີທ່າອຽງຜັນປ່ຽນສັບສົນຢູ່ໃນພັກ, ໃນລະບົບການເມືອງ ແລະ ໃນສັງຄົມ.
ບັນດາຂໍ້ຈຳກັດ, ຂາດຕົກບົກພ່ອງເທິງນີ້ຢູ່ໃນພັກ ແລະ ໃນວຽກງານກໍ່ສ້າງພັກ ເຮັດໃຫ້ພັກກອມມູນິດຫວຽດນາມຍັງບໍ່ທັນສະອາດປອດໃສ ໝັ້ນຄົງເຂັ້ມແຂງແທ້ເທື່ອ, ສ້າງຄວາມເສຍຫາຍແລະຫຼຸດຜ່ອນຄວາມເຊື່ອຖືຂອງພະນັກງານ ສະມາຊິກພັກ ແລະ ປະຊາຊົນພາກສ່ວນໜຶ່ງ ຕໍ່ກັບພັກ ລັດ ແລະ ລະບອບການເມືອງ, ເປັນສິ່ງທ້າທາຍທີ່ຮ້າຍແຮງ ຕໍ່ກັບບົດບາດນຳພາຂອງພັກ ແລະ ຄວາມສັກສິດໃນການຄຸ້ມຄອງບໍລິຫານຂອງລັດ, ມັນນາບຂູ່ໂດຍກົງຕໍ່ການດຳລົງຄົງຕົວຂອງລະບອບສັງຄົມນິຍົມ.
ປະຈຸບັນ, ຄວາມເສື່ອມໂຊມທາງດ້ານແນວຄິດການເມືອງ, ຄຸນສົມບັດ, ແບບແຜນດຳລົງຊີວິດ, “ການຫັນປ່ຽນດ້ວຍຕົນເອງ”, “ປ່ຽນແປງດ້ວຍຕົນເອງ” ຢູ່ພາຍໃນກຳລັງເຄັ່ງຮ້ອນແທ້ໆ. ຄວາມເສື່ອມໂຊມທາງດ້ານຄຸນສົມບັດ, ແບບແຜນດຳລົງຊີວິດ, ພະຍາດອາດຍາສິດ, ສໍ້ລາດບັງຫຼວງ, ຟຸມເຟືອຍ ຍັງບໍ່ທັນຖືກຍູ້ຖອຍ. ອາຊະຍາກຳແລະໄພສັງຄົມຍັງເກີດຂຶ້ນຢ່າງສັບສົນ, ຄຸນສົມບັດສັງຄົມບາງດ້ານຖືກຕົກຕ່ຳຢ່າງຮ້າຍແຮງ, ສ້າງຄວາມຮ້ອນເຄືອງເຈັບປວດໃນສັງຄົມ. ດັ່ງນັ້ນ, ຖ້າຫາກບໍ່ກີດກັ້ນ ຍູ້ຖອຍຄວາມເສື່ອມໂຊມທາງດ້ານແນວຄິດການເມືອງ ແລະ ຄຸນສົມບັດ ແບບແຜນດຳລົງຊີວິດນີ້ (ຄວາມເສື່ອມໂຊມສອງປະເພດນີ້ມີການພົວພັນແໜ້ນແຟ້ນນຳກັນ) ກໍ່ຈະບໍ່ພຽງແຕ່ບໍ່ຮັກສາການດຳລົງຄົງຕົວຂອງພັກໄດ້ເທົ່ານັ້ນ ແຕ່ນັບທັງລະບອບສັງຄົມນິຍົມກໍ່ບໍ່ຮັກສາໄວ້ໄດ້. ບົດຮຽນກ່ຽວກັບການພັງທະລາຍລົງຂອງພັກກອມມູນິດສະຫະພາບໂຊວຽດ ກ່ອນໜ້ານີ້ 25 ປີ ຍັງມີຄວາມໝາຍສົດໆຮ້ອນໆຈົນເຖິງດຽວນີ້ສຳລັບຫວຽດນາມ.
ກ່ອນໜ້ານີ້, ໃນບາງເອກະສານກອງປະຊຸມໃຫຍ່ຂອງພັກ (ເອກະສານກອງປະຊຸມໃຫຍ່ຄັ້ງທີ XI) ພວກເຮົາພຽງແຕ່ເວົ້າເຖິງການກໍ່ສ້າງພັກກ່ຽວກັບສາມດ້ານຄື ການເມືອງ, ແນວຄິດ ແລະ ການຈັດຕັ້ງ. ເວລານັ້ນ, ການກໍ່ສ້າງພັກທາງດ້ານຄຸນສົມບັດ ຖືກຖືວ່າໄດ້ນອນຢູ່ໃນການກໍ່ສ້າງພັກທາງດ້ານແນວຄິດແລ້ວ. ວິທີເຂົ້າໃຈຄືແນວນັ້ນແມ່ນຍັງບໍ່ທັນຄົບຖ້ວນ ຍ້ອນວ່າ ຄຸນສົມບັດທີ່ຢູ່ໃນແນວຄິດນັ້ນເປັນພຽງຄວາມຮູ້ສຶກຄຸນສົມບັດ, ຄຸນສົມບັດຍັງກວມດ້ວຍກິລິຍາຄຸນສົມບັດ, ປະຕິບັດຄຸນສົມບັດ, ພຶດຕິກຳຄຸນສົມບັດ. ການທີ່ກອງປະຊຸມໃຫຍ່ຄັ້ງທີ XII ແຍກການກໍ່ສ້າງພັກທາງດ້ານຄຸນສົມບັດອອກເປັນເນື້ອໃນໜຶ່ງທີ່ເປັນເອກະລາດພໍຄວນ ໃນຄວາມພົວພັນກັບບັນດາຂົງເຂດອື່ນຂອງການກໍ່ສ້າງພັກ (ທາງດ້ານການເມືອງ, ແນວຄິດ, ການຈັດຕັ້ງ) ນັ້ນ, ແມ່ນການຮັບຮູ້ທີ່ຄົບຖ້ວນ, ຮອບດ້ານກວ່າເກົ່າກ່ຽວກັບການກໍ່ສ້າງພັກ, ແມ່ນບາດກ້າວໜຶ່ງຂອງພັກໃນຄວາມຮັບຮູ້ກ່ຽວກັບວຽກງານກໍ່ສ້າງພັກ.
ບັນດາດ້ານໃນເນື້ອໃນຂອງວຽກງານກໍ່ສ້າງພັກ ມີຄວາມພົວພັນສັດຈະວິພາກນຳກັນ, ສ້າງເງື່ອນໄຂ, ປະຖົມປັດໄຈໃຫ້ແກ່ກັນ. ກໍ່ສ້າງພັກທາງດ້ານການເມືອງ, ແນວຄິດ, ການຈັດຕັ້ງ ຊຸກຍູ້ການກໍ່ສ້າງພັກທາງດ້ານຄຸນສົມບັດ, ເປັນຕົ້ນແມ່ນກໍ່ສ້າງຄວາມຮູ້ສຶກຄຸນສົມບັດ, ອຸດົມການຄຸນສົມບັດ. ຄວາມເສື່ອມໂຊມທາງດ້ານແນວຄິດ ການເມືອງ ແນ່ນອນຈະພາໄປເຖິງຄວາມເສື່ອມໂຊມທາງດ້ານຄຸນສົມບັດ ແບບແຜນດຳລົງຊີວິດ.
ດ້ານອື່ນ, ກໍ່ສ້າງພັກທາງດ້ານຄຸນສົມບັດຈະຊຸກຍູ້ການກໍ່ສ້າງພັກທາງດ້ານການເມືອງ, ແນວຄິດ, ການຈັດຕັ້ງ, ສ້າງພື້ນຖານຄຸນສົມບັດໃຫ້ແກ່ການກໍ່ສ້າງພັກ; ຖ້າເບິ່ງເບົາຄຸນສົມບັດ - ພາກສ່ວນປະກອບທີ່ສຳຄັນຂອງວັດທະນະທຳ ກໍ່ຈະບໍ່ສາມາດຫຼີກລ່ຽງຈາກການຕົກໃສ່ສະພາບການເສື່ອມໂຊມໃນພັກເວົ້າລວມໄດ້. ກໍ່ສ້າງພັກທາງດ້ານຄຸນສົມບັດໃນສະພາບການປະຈຸບັນ ແມ່ນຂໍ້ຫຼັກແຫຼ່ງໜຶ່ງໃນການກໍ່ສ້າງພັກ, ເຮັດໃຫ້ພັກສະອາດປອດໃສ ໝັ້ນຄົງເຂັ້ມແຂງ, ຖືກຕ້ອງກັບສິ່ງທີ່ປະທານ ໂຮ່ຈີມິນ ໄດ້ສັງລວມ: “ພັກກອມມູນິດຫວຽດນາມແມ່ນຄຸນສົມບັດ, ແມ່ນອະລິຍະທຳ”. ຄວາມເສື່ອມໂຊມທາງດ້ານຄຸນສົມບັດ, ແບບແຜນດຳລົງຊີວິດດ້ວຍບັນດາປະກົດການຄື ພະຍາດອາດຍາສິດ, ສໍ້ລາດບັງຫຼວງ, ຫຍໍ້ທໍ້, ຟຸມເຟືອຍ, “ແລ່ນຫາຍົດສັກ”, “ແລ່ນຫາສິດອຳນາດ”, ລັດທິເອກະຊົນ, “ຜົນປະໂຫຍດໝູ່ພວກ”, ມີຊີວິດຢູ່ຢ່າງຂີ້ຄ້ານຂີ້ຖີ່, ເຫັນແຕ່ຜົນປະໂຫຍດສ່ວນຕົວ, ຕິດພະຍາດ “ຜົນງານ”... ແມ່ນບັນດາປະກົດການທີ່ເຮັດໃຫ້ຫາງສຽງສັງຄົມເຄັ່ງຮ້ອນທີ່ສຸດ ເຊິ່ງຈະຊຸກຍູ້ຄວາມເສື່ອມໂຊມທາງດ້ານແນວຄິດການເມືອງ, ຊຸກຍູ້ “ການຫັນປ່ຽນດ້ວຍຕົນເອງ”, “ປ່ຽນແປງດ້ວຍຕົນເອງ” ຢູ່ພາຍໃນ.
ຄວາມເສື່ອມໂຊມໃນພັກມີຫຼາຍສາເຫດ ຄືດັ່ງມະຕິກອງປະຊຸມສູນກາງພັກຄັ້ງທີ 4 ສະໄໝທີ XII ວ່າດ້ວຍການເພີ່ມທະວີການກໍ່ສ້າງ ປັບປຸງພັກ ໄດ້ຊີ້ອອກມາ, ມີທັງສາເຫດພາວະວິໄສແລະອັດຕະວິໄສ, ແຕ່ສາເຫດອັດຕະວິໄສເປັນຕົ້ນຕໍ. ການກະທົບຈາກດ້ານລົບຂອງເສດຖະກິດຕະຫຼາດ ແລະ ການເຊື່ອມໂຍງສາກົນ, ການກະທົບຈາກການພັງທະລາຍລົງຂອງລະບອບສັງຄົມນິຍົມຢູ່ສະຫະພາບໂຊວຽດ ແລະ ເອີຣົບຕາເວັນອອກ, ການເພີ່ມຂຶ້ນຂອງລັດທິເອກະຊົນ, ລັດທິເຫັນແຕ່ຜົນປະໂຫຍດຕົວຈິງ, ເຫັນແກ່ຕົວເອງ... ໃນຊີວິດສັງຄົມ ທີ່ກະທົບໃສ່ຖັນແຖວພະນັກງານ, ສະມາຊິກພັກ. “ສາເຫດທີ່ເລິກເຊິ່ງ, ຕົ້ນຕໍຂອງສະພາບການເສື່ອມໂຊມຢູ່ໃນພະນັກງານ ສະມາຊິກພັກພາກສ່ວນໜຶ່ງ ກ່ອນອື່ນໝົດແມ່ນຍ້ອນພະນັກງານ ສະມາຊິກພັກນັ້ນ ບໍ່ຝຶກຝົນຫຼໍ່ຫຼອມຕົນເອງ; ຫຼັກໝັ້ນແນວຄິດບໍ່ໝັ້ນຄົງ, ອົນລະເວງຫວາດຫວັ່ນຕໍ່ໜ້າການກະທົບຈາກພາຍນອກ; ຕົກໃສ່ລັດທິເອກະຊົນ ຄັບແຄບ ເຫັນແກ່ຜົນປະໂຫຍດສ່ວນຕົວ, ຖືກຈອບອອຍຍ້ອນຜົນປະໂຫຍດວັດຖຸ, ບໍ່ເຮັດຫຼ້ອນໜ້າທີ່ ຄວາມຮັບຜິດຊອບຂອງຕົນຕໍ່ພັກ, ຕໍ່ປະຊາຊົນ”(7). ຖືກຕ້ອງຄືທີ່ທ່ານປະທານ ໂຮ່ຈີມິນ ໄດ້ຊີ້ແຈງກ່ອນໜ້ານີ້: “ຄຸນສົມບັດປະຕິວັດບໍ່ຫຼົ່ນລົງມາຈາກຟ້າ. ມັນຕ້ອງຜ່ານການຕໍ່ສູ້, ຝຶກຝົນຫຼໍ່ຫຼອມປະຈຳວັນຢ່າງທົນທານໝັ້ນໜຽວຈຶ່ງຂະຫຍາຍຕົວແລະໄດ້ປັບປຸງ. ເຊັ່ນດຽວກັນກັບເພັດທີ່ຍິ່ງໄດ້ຂັດຖູກໍ່ຍິ່ງສົກໃສ, ຄຳທີ່ຍິ່ງໄດ້ຫຼໍ່ຫຼອມກໍ່ຍິ່ງເຫຼື້ອມ”(8).
ເພາະສະນັ້ນ, ຍູ້ແຮງການກໍ່ສ້າງ ປັບປຸງພັກ, ກີດກັ້ນແລະຍູ້ຖອຍຄວາມເສື່ອມໂຊມທາງດ້ານແນວຄິດການເມືອງ, ຄຸນສົມບັດ, ແບບແຜນດຳລົງຊີວິດ, “ການຫັນປ່ຽນດ້ວຍຕົນເອງ”, “ປ່ຽນແປງດ້ວຍຕົນເອງ” ຢູ່ພາຍໃນແມ່ນໜ້າທີ່ທີ່ສຳຄັນຍິ່ງສຳລັບພັກກອມມູນິດຫວຽດນາມໃນປະຈຸບັນ.
ບາງເນື້ອໃນຂອງການກໍ່ສ້າງພັກທາງດ້ານຄຸນສົມບັດ ໃນສະພາບການປະຈຸບັນ
ກອງປະຊຸມໃຫຍ່ຄັ້ງທີ XII ຂອງພັກສືບຕໍ່ຢືນຢັນການກໍ່ສ້າງພັກແມ່ນໜ້າທີ່ຫຼັກແຫຼ່ງ. ເພື່ອປະຕິບັດມະຕິກອງປະຊຸມໃຫຍ່ຄັ້ງທີ XII, ຄະນະບໍລິຫານງານສູນກາງພັກສະໄໝທີ XII ໄດ້ປະກາດໃຊ້ມະຕິສະບັບທີ 04-NQ/TW “ກ່ຽວກັບເພີ່ມທະວີການກໍ່ສ້າງ ປັບປຸງພັກ; ກີດກັ້ນ, ຍູ້ຖອຍຄວາມເສື່ອມໂຊມທາງດ້ານແນວຄິດການເມືອງ, ຄຸນສົມບັດ, ແບບແຜນດຳລົງຊີວິດ, ບັນດາປະກົດການ “ຫັນປ່ຽນດ້ວຍຕົນເອງ”, “ປ່ຽນແປງດ້ວຍຕົນເອງ” ຢູ່ພາຍໃນ”. ນີ້ແມ່ນສະແດງໃຫ້ເຫັນເຖິງຄວາມຕັດສິນໃຈການເມືອງຂອງພັກໃນການກໍ່ສ້າງພັກ.
ປະຕິບັດມະຕິກອງປະຊຸມໃຫຍ່ຄັ້ງທີ XII ຂອງພັກ, ມະຕິກອງປະຊຸມສູນກາງພັກຄັ້ງທີ 4 ສະໄໝທີ XI ແລະ ມະຕິກອງປະຊຸມສູນກາງພັກຄັ້ງທີ 4 ສະໄໝທີ XII, ຕ້ອງຍູ້ແຮງ, ເດັດດ່ຽວປະຕິບັດໜ້າທີ່ກໍ່ສ້າງພັກທາງດ້ານຄຸນສົມບັດ ໃນຄວາມຕິດພັນແໜ້ນແຟ້ນ ຄົບຊຸດກັບການກໍ່ສ້າງພັກທາງດ້ານການເມືອງ, ແນວຄິດ, ການຈັດຕັ້ງ ກໍ່ຄືກັບໜ້າທີ່ພັດທະນາເສດຖະກິດ, ວັດທະນະທຳ, ສັງຄົມ... ເວົ້າລວມຂອງປະເທດຊາດ ເພື່ອສ້າງຮາກຖານໃຫ້ແກ່ການກໍ່ສ້າງຄຸນສົມບັດປະຕິວັດ.
ອາດຈະສັງລວມເປັນ 4 ເນື້ອໃນທີ່ພື້ນຖານ ໃນການກໍ່ສ້າງພັກທາງດ້ານຄຸນສົມບັດ ດັ່ງລຸ່ມນີ້:
ທີໜຶ່ງ, ຮັບຮູ້ຢ່າງເລິກເຊິ່ງ, ລະອຽດຕົວຈິງ ກ່ຽວກັບບັນດາປະກົດການຂອງການເສື່ອມໂຊມທາງດ້ານຄຸນສົມບັດ, ແບບແຜນດຳລົງຊີວິດ ທີ່ໄດ້ລະບຸໃນມະຕິກອງປະຊຸມສູນກາງພັກຄັ້ງທີ 4 ສະໄໝທີ XII, ສາຍພົວພັນລະຫວ່າງບັນດາປະກົດການເສື່ອມໂຊມນັ້ນ, ໄຈ້ແຍກຢ່າງເລິກເຊິ່ງສາເຫດຂອງແຕ່ລະປະກົດການ ເພື່ອຈະມີທິດທາງແກ້ໄຂຜ່ານຜ່າ.
ທີສອງ, ສືບຕໍ່ອົບຮົມສຶກສາອຸດົມຄະຕິ ຄຸນສົມບັດປະຕິວັດໃນສະພາບການໃໝ່. ເອກະລາດແຫ່ງຊາດຕິດແໜ້ນກັບສັງຄົມນິຍົມ ແມ່ນຈຸດປະສົງ ອຸດົມການຂອງພັກກອມມູນິດຫວຽດນາມ, ນັ້ນກໍ່ແມ່ນອຸດົມຄະຕິ ຄຸນສົມບັດປະຕິວັດ. ໜ້າທີ່ຮັບຜິດຊອບແລະກໍ່ແມ່ນມະໂນທຳ, ກຽດສັກສີຂອງສະມາຊິກພັກ, ພະນັກງານປະຕິວັດ ແມ່ນຕະຫຼອດຊີວິດຮັບໃຊ້ປະເທດຊາດ ຮັບໃຊ້ປະຊາຊົນຢ່າງສຸດອົກສຸດໃຈ, ສູ້ຊົນເພື່ອປະເທດຊາດ ເພື່ອປະຊາຊົນ, ປະຕິບັດການປະຢັດ ດຸໝັ່ນ ຊື່ສັດ ທ່ຽງທຳ, ເຫັດແກ່ສ່ວນລວມບໍ່ເຫັນແກ່ສ່ວນຕົວ ຄືທີ່ລຸງໂຮ່ໄດ້ຕັກເຕືອນສັ່ງສອນ. ສະມາຊິກພັກຕ້ອງກ້າເສຍສະຫຼະຜົນປະໂຫຍດສ່ວນຕົວ ເພື່ອຜົນປະໂຫຍດຂອງປະເທດຊາດ, ຂອງພັກ, ຂອງສ່ວນລວມ.
ທີສາມ, ເພີ່ມທະວີການຝຶກຝົນຫຼໍ່ຫຼອມຄຸນສົມບັດສິນທຳປະຕິວັດ, ຕ້ານລັດທິເອກະຊົນ, ຕ້ານການສວຍໂອກາດເຫັນແຕ່ຜົນປະໂຫຍດວັດຖຸ. ຄືທີ່ໄດ້ເວົ້າມາຂ້າງເທິງ, ປະທານ ໂຮ່ຈີມິນ ໄດ້ໃຫ້ທັດສະນະວ່າ ຄຸນສົມບັດປະຕິວັດບໍ່ເກີດຂຶ້ນໂດຍບັງເອີນ, ມັນຕ້ອງຜ່ານການອົບຮົມສຶກສາ ຝຶກຝົນຫຼໍ່ຫຼອນຈຶ່ງເປັນຮູບເປັນຮ່າງແລະຂະຫຍາຍຕົວ. ເພາະສະນັ້ນ, ແຕ່ລະອົງການຈັດຕັ້ງພັກ, ອົງການອຳນາດການປົກຄອງ ແລະ ພະນັກງານ ສະມາຊິກພັກແຕ່ລະຄົນ ຕ້ອງເອົາໃຈໃສ່ເປັນສຳຄັນເຖິງການສຶກສາອົບຮົມ, ຝຶກຝົນຫຼໍ່ຫຼອມຄຸນສົມບັດ, ນັບແຕ່ຄຸນສົມບັດຄອບຄົວ, ຄຸນສົມບັດວິຊາຊີບ ຈົນເຖິງຈັນຍາບັນການງານ, ຈັນຍາບັນຫ້ອງການ. ຈາກຈັນຍາບັນຄຸນສົມບັດປະຕິວັດຂອງພະນັກງານ ສະມາຊິກພັກ ທີ່ທ່ານປະທານ ໂຮ່ຈີມິນ ໄດ້ເວົ້າມາ “ດຸໝັ່ນ, ປະຢັດ, ຊື່ສັດ, ທ່ຽງທຳ, ເຫັນແກ່ສ່ວນລວມ, ບໍ່ເຫັນແກ່ສ່ວນຕົວ”, “ເມດຕາກະລຸນາ, ຄະຕິທຳ, ສະຕິປັນຍາ, ກ້າຫານ, ຊື່ສັດ” ນັ້ນ ຕ້ອງຫັນເປັນລະອຽດ ເປັນລະບົບມາດຕະຖານບັນດາສາຍພົວພັນລະຫວ່າງພະນັກງານ ສະມາຊິກພັກ ກັບການຈັດຕັ້ງພັກແລະປະຊາຊົນ ທີ່ສອດຄ່ອງກັບພາລະໜ້າທີ່ ຄວາມຮັບຜິດຊອບຂອງແຕ່ລະຄົນ. ບົນພື້ນຖານນັ້ນ, ໃນແຕ່ລະປີ ຜູ້ເປັນຫົວໜ້າແລະພະນັກງານສະມາຊິກພັກແຕ່ລະຄົນ ຈະມີຂໍ້ຜູກພັນກ່ຽວກັບການຝຶກຝົນຫຼໍ່ຫຼອມ, ຮັກສາຄຸນສົມບັດສິນທຳ, ແບບແຜນດຳລົງຊີວິດ, ບໍ່ໃຫ້ຕົກໃສ່ສະພາບເສື່ອມໂຊມ, ບໍ່ຖືກ “ຫັນປ່ຽນດ້ວຍຕົນເອງ”, “ປ່ຽນແປງດ້ວຍຕົນເອງ”; ຄະນະພັກ, ອົງການຈັດຕັ້ງພັກດຳເນີການກວດກາ, ຕິດຕາມກວດກາການປະຕິບັດຂໍ້ຜູກພັນໝັ້ນໝາຍຂອງພະນັກງານ, ສະມາຊິກພັກທີ່ຂຶ້ນກັບສຳນັກງານອົງການ, ກົມກອງຂອງຕັນ.
ໃນເງື່ອນໄຂປະຈຸບັນ, ຍ້ອນການກະທົບຢ່າງແຂງແຮງຈາກດ້ານລົບຂອງເສດຖະກິດຕະຫຼາດ, ການເຊື່ອມໂຍງສາກົນ, ການພົ້ນເດັ່ນຂຶ້ນຂອງຜົນປະໂຫຍດເສດຖະກິດ... ດັ່ງນັ້ນ ລັດທິເອກະຊົນກໍ່ມີເງື່ອນໄຂຟື້ນຕົວຂຶ້ນ. ຕ້ອງຕ້ານລັດທິເອກະຊົນພາຍໃຕ້ທຸກຮູບແບບແລະເລ່ຫຼ່ຽມຂອງມັນ ເພາະວ່າ, ຄືທີ່ທ່ານປະທານ ໂຮ່ຈີມິນ ໄດ້ຊີ້ແຈງນັ້ນ, ລັດທິເອກະຊົນແມ່ນປະເພດ “ການຮຸກຮານຂອງສັດຕູພາຍໃນ”, ເປັນຕົ້ນກຳເນີດຂອງພະຍາດຕ່າງໆເຊັ່ນ ອາດຍາສິດ, ສໍ້ລາດບັງຫຼວງ, ຄຳສັ່ງບົງການຊີ້ຂາດ, ອວດອົ່ງຈອງຫອງ, ເອກອ້າງນຖານະຕຳແໜ່ງ... ປະທານ ໂຮ່ຈີມິນ ເຫັນແຈ້ງການກະທົບທີ່ເປັນອັນຕະລາຍຂອງລັດທິເອກະຊົນ ແລະ ໃນຊີວິດແຫ່ງການເຄື່ອນໄຫວປະຕິວັດຂອງຕົນ, ເພິ່ນໄດ້ຕໍ່ສູ້ຢ່າງເດັດດ່ຽວຕ້ານລັດທິເອກະຊົນ. ກ່ອນໜ້ານີ້ 90 ປີ, ເມື່ອພັກຍັງບໍ່ທັນກຳເນີດ, ໃນນິພົນ ເສັ້ນທາງປະຕິວັດ (ປີ 1927) - ນິພົນທີ່ຖືກຖືວ່າເປັນ “ສົມບັດຂອງຊາດ”, ປະທານ ໂຮ່ຈີມິນ ໄດ້ຕຳໜິວິຈານລັດທິເອກະຊົນ ແລະ ເພິ່ນກໍ່ໄດ້ຕັກເຕືອນວ່າ ຕ້ອງ “ຮັກສາລັດທິໃຫ້ໝັ້ນຄົງ”, ຕ້ອງ “ຫຼຸດຜ່ອນຄວາມກະຫາຍຢາກວັດຖຸ”. ຮອກປີ 1969, ກ່ອນທີ່ຈະລ່ວງລັບໄປ, ປະທານ ໂຮ່ຈີມິນ ໄດ້ຂຽນນິພົນ “ຍົກສູງຄຸນສົມບັດປະຕິວັດ, ກຳຈັດລັດທິເອກະຊົນ”. ເພິ່ນໄດ້ກ່າວເຕື່ອນພວກເຮົາວ່າ: “ຊາດໜຶ່ງ, ພັກໜຶ່ງ ແລະ ແຕ່ລະຄົນ, ມື້ວານນີ້ແມ່ນຍິ່ງໃຫຍ່, ມີແຮງດຶງດູດການຊົນເຊີຍຫຼາຍ, ແຕ່ບໍ່ແນ່ນອນວ່າ ມື້ນີ້ແລະມື້ອື່ນຍັງໄດ້ຮັບຄວາມຮັກແພງແລະຊົມເຊີຍຈາກມະຫາຊົນ, ຖ້າຫາກຈິດໃຈຂອງເຂົາບໍ່ສາອາດປອດໃສອີກຕໍ່ໄປ, ຖ້າຫາກເຂົາຕົກໃສ່ລັດທິເອກະຊົນ”(9). ອາດຈະເວົ້າໄດ້ວ່າ ໃນຕະຫຼອດຊີວິດການເຄື່ອນໄຫວປະຕິວັດຂອງຕົນ, ປະທານ ໂຮ່ຈີມິນ ຍາມໃດກໍ່ເອົາໃຈໃສ່ເຖິງບັນຫາຕໍ່ສູ້ຕ້ານລັດທິເອກະຊົນ, ຍົກສູງຄຸນສົມບັດປະຕິວັດໃຫ້ພະນັກງານ ສະມາຊິດພັກ, ໂດຍສະເພາະຢ່າງຍິ່ງແມ່ນ ໃນເມື່ອພັກໄດ້ກາຍເປັນພັກກຳອຳນາດການປົກຄອງ. ໃນເມື່ອພັກກຳອຳນາດການປົກຄອງ ກໍ່ອາດຈະເກີດຄວາມສ່ຽງຍ້ອນອາດຍາສິດ, ສໍ້ລາດບັງຫຼວງ, ການເສື່ອມໂຊມທາງດ້ານຄຸນສົມບັດຫຼາຍກວ່າ. ນັ້ນແມ່ນຄວາມເປັນຫ່ວງເປັນໄຍໃນຕະຫຼອດເວລານຳພາການປະຕິວັດຂອງປະທານ ໂຮ່ຈີມິນ.
ໃນສະພາບການປະຈຸບັນ, ລັດທິເອກະຊົນມີເງື່ອນໄຂຂະຫຍາຍຕົວ. ເພາະສະນັ້ນ, ຕ້ອງຕໍ່ສູ້ຢ່າງເດັດດ່ຽວຕ້ານລັດທິເອກະຊົນ, ການດຳລົງຊີວິດແບບສວຍໂອກາດ ສວຍໃຊ້ແຕ່ຜົນປະໂຫຍດຕົວຈິງ, ສໍ້ລາດບັງຫຼວງ, ໂລບມາກໂລພາ, ພັກພວກ, “ຜົນປະໂຫຍດໝູ່ພວກ”. ການຕໍ່ສູ້ນີ້ບໍ່ພຽງແຕ່ດ້ວຍວິທີສຶກສາອົບຮົມຄຸນສົມບັດສິນທຳ ແຕ່ຍັງຕ້ອງໃຊ້ການຈັດຕັ້ງ, ກວດກາ, ຕິດຕາມກວດກາ, ກົດວິໄນກົນໄກ ນະໂຍບາຍ ກົດໝາຍ ແລະ ຕ້ອງໄດ້ດຳເນີນຢ່າງເດັດດ່ຽວ ໜຽວແໜ້ນ, ມີມາດຕະການແຂງແຮງ ຄົບຊຸດ. ພ້ອມກັນນັ້ນ ກໍ່ຕ້ອງປະຕິບັດຢ່າງເຂັ້ມງວດ ມີປະສິດທິຜົນ ການຮ່ຳຮຽນແລະປະຕິບັດຕາມແນວຄິດ, ຄຸນສົມບັດ ແລະ ແບບແຜນໂຮ່ຈີມິນ ຕາມຄຳສັ່ງສະບັບທີ 05-CT/TW ຂອງກົມການເມືອງສູນກາງພັກສະໄໝທີ XII. ຕ້ອງປະຕິບັດຄຳສັ່ງສະບັບທີ 05 ຢ່າງມີປະສິດທິຜົນ, ເຂົ້າສູ່ລວງເລິກ ເຂົ້າໃນເນື້ອແທ້, ຖືວ່າມັນແມ່ນວຽກງານທີ່ເປັນປະຈຳຂອງບັນດາອົງການຈັດຕັ້ງພັກ, ອຳນາດການປົກຄອງຂັ້ນຕ່າງໆ, ຂອງບັນດາອົງການຈັດຕັ້ງການເມືອງ-ສັງຄົມ, ຕິດກັບການປ້ອງກັນແລະຕ້ານການເສື່ອມໂຊມທາງດ້ານແນວຄິດການເມືອງ, ຄຸນສົມບັດ, ແບບແຜນດຳລົງຊີວິດ, “ການຫັນປ່ຽນດ້ວຍຕົນເອງ”, “ປ່ຽນແປງດ້ວຍຕົນເອງ” ຢູ່ພາຍໃນ. ເອົາໃຈໃສ່ເປັນພິເສດເຖິງການຮ່ຳຮຽນແບບແຜນຂອງໂຮ່ຈີມິນ - ນັບແຕ່ແບບແຜນຈິນຕະນາການ ເຖິງແບບແຜນພົວພັນກັບມະຫາຊົນ, ແບບແຜນປະຊາທິປະໄຕ, ແບບແຜນປະພຶດຕົນເປັນແບບຢ່າງ, ແບບແຜນເວົ້າໄປຄຽງຄູ່ກັບເຮັດ... ຕ້ອງເປັນເຈົ້າການໃນການກໍ່ສ້າງບັນດາແບບຢ່າງທີ່ດີເດັ່ນ ໃນການຮ່ຳຮຽນແລະປະຕິບັດຕາມແວ່ນແຍງຄຸນສົມບັດໂຮ່ຈີມິນ.
ທີສີ່, ປັບປຸງບູລະນະແລະປະຕິບັດຢ່າງເຂັ້ມງວດ, ກົນໄກກວດກາ, ຕິດຕາມກວດກາການປະຕິບັດຂໍ້ກຳນົດສະບັບທີ 101-QĐ/TW, ວັນທີ 07 ພຶດສະພາ 2012, ຂອງຄະນະເລຂາທິການສູນກາງພັກ, ກ່ຽວກັບຄວາມຮັບຜິດຊອບເປັນແບບຢ່າງຂອງພະນັກງານ ສະມາຊິກພັກ, ເປັນຕົ້ນແມ່ນພະນັກງານການນຳຫຼັກແຫຼ່ງຂັ້ນຕ່າງໆ, ພະນັກງານມີຕຳແໜ່ງຍິ່ງສູງແມ່ນຍິ່ງຕ້ອງເປັນແບບຢ່າງ ເພາະວ່າ “ແບບຢ່າງທີ່ມີຊີວິດໜຶ່ງ ມີຄຸນປະໂຫຍດກວ່າຄຳປາໄສຮ້ອຍບົດ”. ໜຶ່ງໃນບັນດາເນື້ອໃນທີ່ຕ້ອງເປັນແບບຢ່າງ ນັ້ນແມ່ນແບບແຜນດຳລົງຊີວິດຕ້ອງສະອາດປອດໃສ, ແບບແຜນໃກ້ຊິດຕິດແທດກັບພາກຕົວຈິງ ກັບມະຫາຊົນ, ເຂົ້າໃຈຄວາມຄິດຈິດໃຈ ຄວາມມຸ່ງມາດປາຖະໜາອັນຊອບທຳຂອງມະຫາຊົນ. ຍົກສູງສະຕິຮັບໃຊ້ປະຊາຊົນ, ວຽກໃດທີ່ມີຜົນປະໂຫຍດໃຫ້ແກ່ປະຊາຊົນແມ່ນຕ້ອງເຮັດຈົນສຸດຄວາມສາມາດ, ສິ່ງໃດທີ່ບໍ່ດີສຳລັບປະຊາຊົນແມ່ນຕ້ອງລະເວັ້ນ. ຕໍ່ສູ້ຢ່າງເດັດດ່ຽວກັບບັນດາປະກົດການອາດຍາສິດ, ອວດອົ່ງທະນົງຕົວ, ລ່ວງເກີນອຳນາດ, ລົບກວນ ກໍ່ຄວາມລຳຄານໃຫ້ປະຊາຊົນ, ບໍ່ມີຄວາມຮັບຜິດຊອບຕໍ່ປະຊາຊົນ. ກະໂຕຄວາມເສື່ອມໂຊມທາງດ້ານແນວຄິດການເມືອງ, ຄຸນສົມບັດສິນທຳ, ແບບແຜນດຳລົງຊີວິດຂອງພະນັກງານ ສະມາຊິກພັກ, ສະພາບການສໍ້ລາດບັງຫຼວງ, ອາດຍາສິດ, ຄວາມຫຍໍ້ທໍ້, ລັດທິເອກະຊົນ, ເຫັນແກ່ສ່ວນຕົວຕ່າງໆເຫຼົ່ານັ້ນ ແມ່ນບັນດາ “ແວ່ນແຍງ” ທີ່ບໍ່ດີສຳລັບປະຊາຊົນ, ຫຼຸດຜ່ອນຄວາມເຊື່ອຖືຂອງປະຊາຊົນຕໍ່ພັກ ລັດ ແລະ ລະບອບສັງຄົມນິຍົມ. ປະທານ ໂຮ່ຈີມິນ ເຄີຍສັ່ງສອນວ່າ: “... ສະມາຊິກພັກ - ເຖິງຈະເຮັດວຽກໃຫຍ່ຫຼືນ້ອຍ, ມີຖານະຕຳແໜ່ງສູງຫຼືຕ່ຳ - ຢູ່ບ່ອນໃດກໍ່ຕ້ອງເປັນແບບຢ່າງໃຫ້ມະຫາຊົນ”(10).
ເພື່ອເສີມຂະຫຍາຍບົດບາດເປັນແບບຢ່າງຂອງພະນັກງານ ສະມາຊິກພັກ ແມ່ນຕ້ອງປັບປຸງ, ເຊີດຊູ ແລະ ປະຕິບັດຢ່າງເຂັ້ມງວດ ຫຼັກການຕິຊົມຕົນເອງແລະຕິຊົມໝູ່ຄູ່. ໃນເວລາທີ່ຜ່ານມາ, ໃນການປະຕິບັດມະຕິກອງປະຊຸມສູນກາງພັກຄັ້ງທີ 4 ສະໄໝທີ XI, ພວກເຮົາປະຕິບັດຫຼັກການນີ້ຍັງບໍ່ດີ, ປະສິດທິຜົນຕ່ຳ, “ສະພາບການຈົ່ງຈຽມ ຫຼົບຫຼີກກັນ, ຢ້ານແຕະຕ້ອງກັນ ຍັງແຜ່ຫຼາຍ, ພະນັກງານ ສະມາຊິກພັກຈຳນວນໜຶ່ງບໍ່ຕື່ນຕົວສະໝັກໃຈຮັບຮູ້ຂໍ້ບົກພ່ອງແລະຄວາມຮັບຜິດຊອບຂອງຕົນ ໃນວຽກງານທີ່ໄດ້ຮັບມອບໝາຍ”. ເພາະສະນັ້ນ, ເພື່ອເສີມຂະຫຍາຍປະສິດທິຜົນຂອງການຕິຊົມຕົນເອງແລະຕິຊົມໝູ່ຄູ່, ຕ້ອງມີກົນໄກກວດກາ, ຕິດຕາມກວດກາພະນັກງານ ສະມາຊິກພັກ ຈາກພາຍໃນພັກ ແລະ ການຕິດຕາມກວດກາຈາກມະຫາຊົນແລະຫາງສຽງສາທາລະນະ./.
ໂດຍ ສຈ. ປອ. ເລຫຶວເຫງັ້ຍ
ອະດີດອຳນວຍການສະຖາບັນການເມືອງແຫ່ງຊາດ ໂຮ່ຈີມິນ
-------------------------
ບົດນີ້ໄດ້ລົງພິມໃນວາລະສານກອມມູນິດ ສະບັບທີ 897 (ເດືອນກໍລະກົດ 2017)
(1) ໂຮ່ຈີມິນ, ນິພົນຄົບຊຸດ, ສພຈ. ການເມືອງແຫ່ງຊາດ, ຮ່າໂນ້ຍ, 2000, ເຫຼັ້ມທີ 5, ໜ້າ 249, 254.
(2) ໂຮ່ຈີມິນ, ນິພົນຄົບຊຸດ, ປຶ້ມທີ່ໄດ້ແນະນຳ, ເຫຼັ້ມທີ 12, ໜ້າ 420 - 421.
(3) ໂຮ່ຈີມິນ, ນິພົນຄົບຊຸດ, ປຶ້ມທີ່ໄດ້ແນະນຳ, ເຫຼັ້ມທີ 6, ໜ້າ 50.
(4) ໂຮ່ຈີມິນ, ນິພົນຄົບຊຸດ, ປຶ້ມທີ່ໄດ້ແນະນຳ, ເຫຼັ້ມທີ 5, ໜ້າ 252 - 253.
(5), (6) ເອກະສານກອງປະຊຸມໃຫຍ່ຜູ້ແທນທົ່ວປະເທດຄັ້ງທີ XII, ຫ້ອງການສູນກາງພັກ, ຮ່າໂນ້ຍ, 2016, ໜ້າ 191, 185.
(7) ເອກະສານກອງປະຊຸມຄັ້ງທີສີ່ ຄະນະບໍລິຫານງານສູນກາງສະໄໝທີ XII, ຫ້ອງການສູນກາງພັກ, ຮ່າໂນ້ຍ, 2017, ໜ້າ 24 - 25.
(8) ໂຮ່ຈີມິນ, ນິພົນຄົບຊຸດ, ປຶ້ມທີ່ໄດ້ແນະນຳ, ເຫຼັ້ມທີ 9, ໜ້າ 293.
(9) ໂຮ່ຈີມິນ, ນິພົນຄົບຊຸດ, ປຶ້ມທີ່ໄດ້ແນະນຳ, ເຫຼັ້ມທີ 12, ໜ້າ 557 - 558.
(10) ໂຮ່ຈີມິນ, ນິພົນຄົບຊຸດ, ປຶ້ມທີ່ໄດ້ແນະນຳ, ເຫຼັ້ມທີ 6, ໜ້າ 189.