ແນວໂຮມປະເທດຊາດຫວຽດນາມທຸກຂັ້ນ ເພີ່ມທະວີປະຕິບັດການຕິດຕາມກວດກາ, ການວິຈານສັງຄົມ ເພື່ອຕອບສະໜອງຄວາມຕ້ອງການ ແລະຄວາມປາຖະໜາຂອງປະຊາຊົນທຸກຊັ້ນວັນນະ
ປະທານຄະນະກຳມະການສູນກາງ ແນວໂຮມປະເທດຊາດຫວຽດນາມ ເຈິ່ນແທັງເໝິນ. (ພາບ: TTXVN)
ປັບປຸງບູລະນະກົນໄກກ່ຽວກັບການເຄື່ອນໄຫວຕິດຕາມກວດກາ, ການວິຈານສັງຄົມຂອງແນວໂຮມປະເທດຊາດຫວຽດນາມ
ປະຕິບັດ “ກົດລະບຽບກ່ຽວກັບການຕິດຕາມກວດກາ ແລະວິຈານສັງຄົມຂອງແນວໂຮມປະເທດຊາດຫວຽດນາມ ແລະບັນດາອົງຄະນະການເມືອງ-ສັງຄົມ” ແລະ “ຂໍ້ກຳນົດກ່ຽວກັບແນວໂຮມປະເທດຊາດຫວຽດນາມ, ບັນດາອົງຄະນະການເມືອງ-ສັງຄົມ ແລະປະຊາຊົນ ເຂົ້າຮ່ວມໃນການປະກອບຄວາມເຫັນກໍ່ສ້າງພັກ, ກໍ່ສ້າງອຳນາດການປົກຄອງ” ທີ່ປະກາດໃຊ້ພ້ອມກັບມະຕິຕົກລົງເລກທີ 217-QĐ/TW, ມະຕິຕົກລົງເລກທີ 218-QĐ/TW, ລົງວັນທີ 12 ທັນວາ 2013 ຂອງກົມການເມືອງສູນກາງພັກສະໄໝທີ XI, ຄະນະປະຈຳຄະນະກຳມະການສູນກາງແນວໂຮມປະເທດຊາດຫວຽດນາມ ແລະ ສູນກາງຂອງບັນດາອົງການຈັດຕັ້ງການເມືອງ-ສັງຄົມ ໄດ້ຈັດຕັ້ງກອງປະຊຸມຫຼາຍຄັ້ງເພື່ອເຜີຍແຜ່, ຊາບຊືມ ແລະ ຝຶກອົບຮົມກ່ຽວກັບວຽກງານຕິດຕາມກວດກາ, ວິຈານສັງຄົມ, ການເຂົ້າຮ່ວມປະກອບຄວາມເຫັນກໍ່ສ້າງພັກ, ອຳນາດການປົກຄອງ ໃຫ້ຖັນແຖວພະນັກງານແນວໂຮມປະເທດຊາດຫວຽດນາມ, ພະນັກງານອົງຄະນະມະຫາຊົນແຕ່ສູນກາງຈົນຮອດແຂວງ-ກຳແພງນະຄອນ.
ຄະນະປະຈຳຄະນະກຳມະການສູນກາງແນວໂຮມປະເທດຊາດຫວຽດນາມ ເປັນຜູ້ນຳໃນການກໍ່ສ້າງໂຄງການກົດໝາຍວ່າດ້ວຍແນວໂຮມປະເທດຊາດຫວຽດນາມ (ສະບັບປັບປຸງ) ຊຶ່ງໄດ້ຍື່ນຕໍ່ສະພາແຫ່ງຊາດພິຈາລະນາ ປະກາດໃຊ້ໃນປີ 2015, ໃນນັ້ນໄດ້ເພີ່ມເຕີມ 2 ໝວດກ່ຽວກັບການຕິດຕາມກວດກາ ແລະການວິຈານສັງຄົມ ເພື່ອປະກອບສ່ວນຫັນມະຕິຕົກລົງເລກທີ 217-QĐ/TW ແລະມະຕິຕົກລົງເລກທີ 218-QĐ/TW ຂອງກົມການເມືອງເປັນນິຕິກຳ; ເປັນປະທານໃນການສົມທົບກັບບັນດາອົງການ, ການຈັດຕັ້ງທີ່ກ່ຽວຂ້ອງ ກໍ່ສ້າງຮ່າງມະຕິຮ່ວມ ລະຫວ່າງຄະນະກຳມະການປະຈຳສະພາແຫ່ງບາດ, ລັດຖະບານ ແລະ ຄະນະປະທານຄະນະກຳມະການສູນກາງແນວໂຮມປະເທດຊາດຫວຽດນາມ ທີ່ກຳນົດຢ່າງລະອຽດ ມາດຕາ 27, ມາດຕາ 34 ຂອງກົດໝາຍວ່າດ້ວຍບັນດາຮູບການຕິດຕາມກວດກາ, ວິຈານສັງຄົມຂອງແນວໂຮມປະເທດຊາດຫວຽດນາມ, ແລະໄດ້ຖືກຮັບຮອງຜ່ານໃນກອງປະຊຸມຄັ້ງທີ 9 ຂອງຄະນະກຳມະການປະຈຳສະພາແຫ່ງບາດຊຸດທີ XIV, ວັນທີ 22 ເມສາ 2017; ປະສານສົມທົບກັບອົງການກວດກາລັດຖະບານ, ສະຫະສະມາພັນແຮງງານຫວຽດນາມ ໃນການກໍ່ສ້າງແລະຍື່ນຕໍ່ລັດຖະບານເພື່ອປະກາດໃຊ້ ດຳລັດສະບັບທີ 159/2016/NĐ-CP, ທີ່ກຳນົດຢ່າງລະອຽດ ແລະແນະນຳການປະຕິບັດກົດໝາຍວ່າດ້ວຍການກວດກາ (ກ່ຽວກັບການຈັດຕັ້ງແລະເຄື່ອນໄຫວຂອງຄະນະກວດກາປະຊາຊົນ); ເຂົ້າຮ່ວມກັບກະຊວງແຜນການແລະການລົງທຶນ ໃນການກໍ່ສ້າງແລະຍື່ນຕໍ່ລັດຖະບານເພື່ອປະກາດໃຊ້ ດຳລັດສະບັບທີ 84/2015/NĐ-CP, ກ່ຽວກັບການຕິດຕາມກວດກາແລະປະເມີນຄ່າການລົງທຶນ, ໃນນັ້ນມີຂໍ້ກຳນົດກ່ຽວກັບສິດທິຕິດຕາມກວດກາການລົງທຶນສາທາລະນະຂອງປະຊາຊົນ, ບັນດາຄະນະຕິດຕາມກວດກາການລົງທຶນຂອງຊຸມຊົນ; ເຂົ້າຮ່ວມກັບກະຊວງການເງິນ ໃນການກໍ່ສ້າງແລະປະກາດໃຊ້ໜັງສືວຽນສະບັບທີ 337/2016/TT-BTC, ກຳນົດກ່ຽວກັບການວາງງົບປະມານ, ຄຸ້ມຄອງນຳໃຊ້ງົບປະມານ ແລະການຊຳລະບັນຊີ ທີ່ຮັບປະກັນໃຫ້ແກ່ການເຄື່ອນໄຫວຕິດຕາມກວດກາ, ວິຈານສັງຄົມຂອງແນວໂຮມປະເທດຊາດຫວຽດນາມ ແລະຂອງບັນດາອົງການຈັດຕັ້ງການເມືອງ-ສັງຄົມ.
ຄຽງຂ້າງນັ້ນ, ຄະນະປະຈຳຄະນະກຳມະການສູນກາງແນວໂຮມປະເທດຊາດຫວຽດນາມ ໄດ້ອອກແຈ້ງການສະບັບທີ 23/TTr-MTTW-BTT, ລົງວັນທີ 20 ກໍລະກົດ 2017, ແນະນຳກ່ຽວກັບຂະບວນການຕິດຕາມກວດກາ ແລະຂະບວນການວິຈານສັງຄົມ ຂອງແນວໂຮມປະເທດຊາດຫວຽດນາມ, ແຈ້ງການສະບັບທີ 25/TTr-MTTW-BTT, ລົງວັນທີ 9 ສິງຫາ 2017, ແນະນຳກ່ຽວກັບການຈັດຕັ້ງແລະເຄື່ອນໄຫວຂອງຄະນະກວດກາປະຊາຊົນ, ຄະນະຕິດຕາມກວດກາການລົງທຶນຂອງຊຸມຊົນຢູ່ຕາແສງ, ຕົວເມືອງນ້ອຍ; ຈັດພິມເຜີຍແຜ່ປຶ້ມ ຄູ່ມືວຽກງານຕິດຕາມກວດກາ ແລະວິຈານສັງຄົມ ຂອງແນວໂຮມປະເທດຊາດຫວຽດນາມ ແນໃສ່ປະກອບສ່ວນແກ້ໄຂຜ່ານຜ່າຂໍ້ຈຳກັດ, ຄວາມຫຍຸ້ງຍາກ, ສິ່ງຄົງຄ້າງໃນປະຈຸບັນ, ຊ່ວຍໃຫ້ພະນັກງານການນຳຂັ້ນຕ່າງໆມີຄວາມເຂົ້າໃຈແຈ້ງກວ່າອີກ ກ່ຽວກັບວຽກງານຕິດຕາມກວດກາ, ວິຈານສັງຄົມ, ເພື່ອໃຫ້ພະນັກງານແນວໂຮມປະເທດຊາດ ແລະພະນັກງານຂອງອົງຄະນະມະຫາຊົນຂັ້ນຕ່າງໆ ກຳແໜ້ນກ່ຽວກັບຂະບວນການ, ວິທີການຕິດຕາມກວດກາ, ວິຈານສັງຄົມ.
ຜົນໄດ້ຮັບຂອງການເຄື່ອນໄຫວຕິດຕາມກວດກາ, ວິຈານສັງຄົມ ຂອງແນວໂຮມປະເທດຊາດຫວຽດນາມ
1- ກ່ຽວກັບການເຄື່ອນໄຫວຕິດຕາມກວດກາ
ໃນຊຸມປີທີ່ຜ່ານມາມໍ່ນີ້, ການເຄື່ອນໄຫວຕິດຕາມກວດກາຂອງແນວໂຮມປະເທດຊາດຫວຽດນາມ ແລະຂອງບັນດາການຈັດຕັ້ງການເມືອງ-ສັງຄົມຂັ້ນຕ່າງໆ ໄດ້ຮັບການຜັນຂະຫຍາຍຢ່າງຄົບຊຸດ, ໃນຂັ້ນຕົ້ນມີປະສິດທິຜົນຢ່າງຈະແຈ້ງ. ຂໍ້ສະເໜີຫຼາຍຂໍ້ພາຍຫຼັງການຕິດຕາມກວດກາຂອງແນວໂຮມປະເທດຊາດຫວຽດນາມ ໄດ້ຮັບການຕອບສະໜອງ ຊຶ່ງຫົວໜ້າຂອງອົງການລັດຢູ່ສູນກາງ, ທ້ອງຖິ່ນ ໄດ້ຊີ້ນຳຢ່າງທັນການໃຫ້ຄະນະທີ່ປຶກສາຂອງຕົນຂຽນຄຳຕອບເປັນລາຍລັດອັກສອນ; ເອົາໃຈໃສ່ຊ່ວຍເຫຼືອຄ່າໃຊ້ຈ່າຍເພື່ອຮັບປະກັນການເຄື່ອນໄຫວ.
ການປະຕິບັດບັນດາໂຄງການຕິດຕາມກວດກາໄດ້ດຳເນີນຖືກຕ້ອງຕາມການແນະນຳກ່ຽວກັບຂະບວນການຕິດຕາມກວດກາ, ມີຄວາມເປັນເອກະພາບລະຫວ່າງບັນດາສະມາຊິກ ແລະແບ່ງງານກຳນົດໜ້າວຽກສຳລັບບັນດາເນື້ອໃນຕິດຕາມກວດກາ, ໃນຂັ້ນຕົ້ນໄດ້ເສີມຂະຫຍາຍບົດບາດປະທານຂອງແນວໂຮມປະເທດຊາດຫວຽດນາມ; ພິເສດແມ່ນໄດ້ສະແດງໃຫ້ເຫັນເຖິງບົດບາດ, ຄວາມຮັບຜິດຊອບຂອງແນວໂຮມປະເທດຊາດຫວຽດນາມ ໃນການປະຕິບັດລັດຖະທຳມະນູນ ແລະກົດໝາຍ, ເປັນຕົວແທນ, ປົກປ້ອງສິດແລະຜົນປະໂຫຍດທີ່ຖືກກົດໝາຍ, ຊອບທຳຂອງປະຊາຊົນ, ເຂົ້າຮ່ວມໃນການກໍ່ສ້າງພັກ ລັດ. ຜົນຂອງການຕິດຕາມກວດກາວຽກງານ, ກໍລະນີຕ່າງໆ ໄດ້ຮັບຄວາມເອົາໃຈໃສ່ແລະຕີລາຄາດີ ຈາກປະຊາຊົນແລະຫາງສຽງສັງຄົມ. ນີ້ແມ່ນສັນຍານດີໃນການປ່ຽນແປງໃໝ່ວຽກງານແນວໂຮມ.
ວຽກງານຕິດຕາມກວດກາຂອງລະບົບແນວໂຮມປະເທດຊາດຫວຽດນາມໄດ້ດຳເນີນເປັນແຕ່ລະກ້າວ, ມີລະບຽບ, ເປັນແບບສະບັບ, ມີການກະກຽມຢ່າງຮອບຄອບ ຕາມແຜນການ ແລະຄວາມຮຽກຮ້ອງຕ້ອງການກ່ຽວກັບເນື້ອໃນຕິດຕາມກວດກາ; ເປັນເຈົ້າການຍົກໃຫ້ເຫັນຄວາມສະດວກ, ຄວາມຫຍຸ້ງຍາກ ແລະຜົນຂອງການເຄື່ອນໄຫວ, ພ້ອມກັນນັ້ນກໍ່ນຳສະເໜີຂໍ້ສະເໜີແນະທີ່ລະອຽດຕ່າງໆກ່ຽວກັບກົນໄກ, ນະໂຍບາຍ. ເມື່ອສິ້ນສຸດການຕິດຕາມກວດກາ, ບັນດາຄະນະຕິດຕາມກວດກາລ້ວນແຕ່ມີບົດລາຍງານສັງລວມ, ແຈ້ງຂ່າວຜົນສຳເລັດ ແລະສະເໜີຂໍ້ສະເໜີແນະທີ່ລະອຽດ ຝາກໃຫ້ອົງການ, ການຈັດຕັ້ງ, ບຸກຄົນທີ່ມີອຳນາດ ເພື່ອສະເໜີໃຫ້ດັດແປງ, ເພີ່ມເຕີມນະໂຍບາຍ, ຂໍ້ກຳນົດ ຫຼືຊີ້ນຳໃຫ້ອົງການ ການຈັດຕັ້ງ ປະຕິບັດຂໍ້ສະເໜີແນະຂອງແນວໂຮມປະເທດຊາດຫວຽດນາມ .
ນັບແຕ່ເມື່ອກົດໝາຍວ່າດ້ວຍແນວໂຮມປະເທດຊາດຫວຽດນາມມີຜົນບັງຄັບໃຊ້ ແລະປະຕິບັດມະຕິຮ່ວມສະບັບທີ 403/2017/NQLT-UBTVQH14-CP-ĐCTUBTWMTTQVN, ລົງວັນທີ 15 ມິຖຸນາ 2017, ລະຫວ່າງຄະນະກຳມະການປະຈຳສະພາແຫ່ງຊາດ, ລັດຖະບານ ແລະ ຄະນະປະທານຄະນະກຳມະການສູນກາງແນວໂຮມປະເທດຊາດຫວຽດນາມ, ກຳນົດຢ່າງລະອຽດກ່ຽວກັບບັນດາຮູບການຕິດຕາມກວດກາ, ວິຈານສັງຄົມຂອງແນວໂຮມປະເທດຊາດຫວຽດນາມ, ຄະນະກຳມະການສູນກາງແນວໂຮມປະເທດຊາດຫວຽດນາມ ໄດ້ຜັນຂະຫຍາຍ 4 ຮູບການຕິດຕາມກວດກາ, ໃນນັ້ນມີການປະສານສົມທົບການຕິດຕາມກວດກາ ກັບບັນດາອົງການ, ການຈັດຕັ້ງທີ່ມີອຳນາດຕັດສິນ, ຄືສະພາແຫ່ງຊາດ, ສະພາປະຊາຊົນ, ອົງການໄອຍະການປະຊາຊົນຂັ້ນຕ່າງໆ; ຈັດການຝຶກອົບຮົມຍົກສູງປະສິດທິຜົນການຕິດຕາມກວດກາ ຂອງຄະນະກວດກາປະຊາຊົນ, ຄະນະຕິດຕາມກວດກາການລົງທຶນຂອງຊຸມຊົນ; ຖອດຖອນບົດຮຽນກ່ຽວກັບຮູບການຈັດຕັ້ງຄະນະຕິດຕາມກວດກາ; ຜັນຂະຫຍາຍຢ່າງມີປະສິດທິຜົນຮູບການຕິດຕາມກວດກາການຄົ້ນຄວ້າ, ພິຈາລະນາເອກະສານຂອງອົງການທີ່ມີອຳນາດກ່ຽວພັນເຖິງສິດທິແລະຜົນປະໂຫຍດທີ່ຖືກກົດໝາຍຊອບທຳ ຂອງປະຊາຊົນ. ຄະນະກຳມະການສູນກາງແນວໂຮມປະເທດຊາດຫວຽດນາມ ໄດ້ຜັນຂະຫຍາຍພ້ອມໆກັນ 10 ໂຄງການສົມທົບການຕິດຕາມກວດກາ ຊຶ່ງເນື້ອໃນຕົ້ນຕໍແນໃສ່ບັນດາບັນຫາທີ່ສັງຄົມແລະປະຊາຊົນມີຄວາມສົນໃຈ, ນັ້ນແມ່ນ ໂຄງການສົມທົບຕິດຕາມກວດກາ ແລະຍົກສູງປະສິດທິຜົນການແກ້ໄຂການຮ້ອງທຸກ ແລະການກ່າວຫາຢູ່ຮາກຖານ; ໂຄງການສົມທົບຕິດຕາມກວດກາ ການເປີດເຜີຍບົດສະຫຼຸບການກວດກາ; ໂຄງການສົມທົບຕິດຕາມກວດກາການປະຕິບັດມະຕິກອງປະຊຸມສູນກາງພັກຄັ້ງທີ 6 ສະໄໝທີ XI ກ່ຽວກັບການພັດທະນາວິທະຍາສາດ, ເຕັກໂນໂລຊີ ແລະກົດໝາຍວ່າດ້ວຍວິທະຍາສາດແລະເຕັກໂນໂລຊີ; ໂຄງການສົມທົບເລກທີ 90 ຂອງລັດຖະບານ ແລະຄະນະປະທານຄະນະກຳມະການສູນກາງແນວໂຮມປະເທດຊາດຫວຽດນາມ ກ່ຽວກັບການຂົນຂວາຍ ແລະຕິດຕາມກວດກາ ການຮັບປະກັນຄວາມປອດໄພດ້ານສະບຽງອາຫານໄລຍະ 2016 - 2020; ໂຄງການສົມທົບຕິດຕາມກວດກາການປະຕິບັດກົດໝາຍຂອງບັນດາພື້ນຖານສາທາລະນະສຸກ; ໂຄງການສົມທົບຕິດຕາມກວດກາການປະຕິບັດບັນດາໜ້າທີ່, ວິທີແກ້ຕົ້ນຕໍແນໃສ່ປົວແປງສະພາບແວດລ້ອມການທຸລະກິດ, ຍົກສູງຄວາມສາມາດແຂ່ງຂັນຂອງຊາດໃນຂົງເຂດພາສີອາກອນ ແລະສຸລະກາກອນ; ທົດລອງຕິດຕາມກວດກາການ “ເປີດເຜີຍ, ໂປ່ງໃສ ແລະຄວາມຮັບຜິດຊອບຂອງຫົວໜ້າຂັ້ນເມືອງ, ຫົວໜ້າຂັ້ນຕາແສງໃນການນຳພາ, ຊີ້ນຳວຽກງານປ້ອງກັນແລະຕ້ານການສໍ້ລາດບັງຫຼວງຢູ່ໃນບາງໂຄງການເສດຖະກິດ, ສັງຄົມ ຢູ່ແຂວງ ດົ່ງນາຍ ແລະແຂວງ ບິ່ງເຝື້ອກ”; ຕິດຕາມກວດກາຢ່າງເປັນປະຈຳຕໍ່ກໍລະນີ, ເຫດການຕາມການສ່ອງແສງຂອງໜັງສືພິມ, ຫາງສຽງ ແລະບັນດາເອກະສານຂອງອົງການທີ່ມີອຳນາດ ທີ່ກ່ຽວຂ້ອງເຖິງສິດທິແລະຜົນປະໂຫຍດທີ່ຊອບທຳ, ຖືກກົດໝາຍຂອງປະຊາຊົນ.
ຄະນະປະຈຳຄະນະກຳມະການສູນກາງແນວໂຮມປະເທດຊາດຫວຽດນາມ ໄດ້ເຂົ້າຮ່ວມປະສານສົມທົບກັບບັນດາອົງການທີ່ກ່ຽວຂ້ອງໃນການປະຕິບັດ ໂຄງການສົມທົບຜັນຂະຫຍາຍການກຳນົດດັດຊະນີຄວາມພໍໃຈຂອງປະຊາຊົນ, ອົງການຈັດຕັ້ງ ຕໍ່ການຮັບໃຊ້ຂອງໜ່ວຍງານບໍລິຫານແຫ່ງລັດ; ສົມທົບປະຕິບັດການເຄື່ອນໄຫວຕິດຕາມກວດກາ ຕາມກົດລະບຽບການສົມທົບກັບບັນດາອົງການທີ່ກ່ຽວໃນການຜັນຂະຫຍາຍປະຕິບັດການຕິດຕາມກວດກາຕ່າງໆ ຫຼາຍຢ່າງ (ລະອຽດຄື, ຕິດຕາມກວດກາ, ສຳຫຼວດການປະຕິບັດມະຕິຂອງລັດຖະບານ ກ່ຽວກັບການເຜີຍແຜ່ການສຶກສາທົ່ວໄປ, ລົບລ້າງໄພກືກໜັງສືໃນປະຊາຊົນຊົນເຜົ່າສ່ວນນ້ອຍ; ສຳຫຼວດກ່ຽວກັບການສອນພາສາແລະໜັງສືຂອງຊົນເຜົ່າສ່ວນນ້ອຍ ໃນບັນດາພື້ນຖານການສຶກສາສາມັນ ແລະສູນການສຶກສາປົກກະຕິ; ຕິດຕາມກວດກາ, ສຳຫຼວດການສ້າງເງື່ອນໄຂອຳນວຍຄວາມສະດວກໃຫ້ບັນດາສາສະໜາເຂົ້າຮ່ວມໃນການກວດແລະປົວພະຍາດ; ການເຄື່ອນໄຫວຄວາມປອດໄພສັງຄົມ ຂອງບັນດາສາສະໜາ...). ເບິ່ງລວມ, ການເຄື່ອນໄຫວຕິດຕາມກວດກາ ໄດ້ຮັບການຜັນຂະຫຍາຍປະຕິບັດຖືກຕ້ອງຕາມແຜນການ; ຜົນຂອງການຕິດຕາມກວດກາໄດ້ຖືກລາຍງານລວມ ແລະມີຂໍ້ສະເໜີແນະທີ່ລະອຽດຝາກເຖິງອົງການ, ການຈັດຕັ້ງທີ່ກ່ຽວຂ້ອງ...
ບັນດາອົງການສະມາຊິກຂອງແນວໂຮມປະເທດຊາດຫວຽດນາມ, ພິເສດແມ່ນບັນດາອົງການຈັດຕັ້ງການເມືອງ-ສັງຄົມ ໄດ້ເສີມຂະຫຍາຍບົດບາດເປັນເຈົ້າການ, ນຳໜ້າໃນການເປັນຕົວແທນ, ປົກປ້ອງສິດທິແລະຜົນປະໂຫຍດທີ່ຖືກກົດໝາຍ, ຊອບທຳຂອງສະມາຊິກໃນອົງການຂອງຕົນ ໃນການເຄື່ອນໄຫວຕິດຕາມກວດກາ; ໃນຂັ້ນຕົ້ນໄດ້ເສີມຂະຫຍາຍບົດບາດຂອງຜູ້ຊ່ຽວຊານ, ນັກວິທະຍາສາດ, ຜູ້ມີອິດທິພົນ, ມີບົດຮຽນ, ປະກອບສ່ວນຍົກສູງຄຸນະພາບການຕິດຕາມກວດກາຂອງແນວໂຮມປະເທດຊາດຫວຽດນາມໃນຊຸມປີທີ່ຜ່ານມາ.
ຄະນະກຳມະການແນວໂຮມປະເທດຊາດຫວຽດນາມທ້ອງຖິ່ນຕ່າງໆ ໄດ້ເປັນເຈົ້າການຜັນຂະຫຍາຍການເຄື່ອນໄຫວຕິດຕາມກວດກາ, ໄດ້ລະດົມບັນດາແຫຼ່ງພະລັງຂອງທ້ອງຖິ່ນເຂົ້າໃນການຜັນຂະຫຍາຍການເຄື່ອນໄຫວຕິດຕາມກວດກາ. ຄະນະກຳມະການແນວໂຮມປະເທດຊາດຫວຽດນາມຢູ່ຫຼາຍແຂວງ-ກຳແພງນະຄອນທີ່ຂຶ້ນກັບສູນກາງ ໄດ້ອີງໃສ່ແຜນການຕິດຕາມກວດກາຂອງຄະນະປະຈຳຄະນະກຳມະການສູນກາງແນວໂຮມປະເທດຊາດຫວຽດນາມ ແລະເປັນເຈົ້າການສົມທົບກັບບັນດາອົງການຈັດຕັ້ງການເມືອງ-ສັງຄົມ, ບັນດາອົງການທີ່ກ່ຽວຂ້ອງຂອງແຂວງ ເພື່ອຄັດເລືອກແລະຜັນຂະຫຍາຍບັນດາໂຄງການຕິດຕາມກວດກາທີ່ສອດຄ່ອງກັບເງື່ອນໄຂຕົວຈິງຂອງທ້ອງຖິ່ນ.
ກ່ຽວກັບເນື້ອໃນຕິດຕາມກວດກາ, ແນວໂຮມປະເທດຊາດຫວຽດນາມຂັ້ນຕ່າງໆໄດ້ລວມສູນການຕິດຕາມກວດກາໃສ່ເນື້ອໃນຈຳນວນໜຶ່ງຕາມບັນດາໂຄງການຕິດຕາມກວດກາຂອງສູນກາງ ແລະບາງເນື້ອໃນຕິດຕາມກວດກາຕາມຄວາມຕ້ອງການຕົວຈິງຂອງທ້ອງຖິ່ນ, ເຊັ່ນ ກ່ຽວກັບວຽກງານເລືອກຕັ້ງ, ກ່ຽວກັບວຽກງານຄັດເລືອກພົນລະເມືອງໄປປະຕິບັດພັນທະໄປເປັນທະຫານ; ກ່ຽວກັບການປະຕິບັດນະໂຍບາຍເບິ່ງແຍງດູແລຄອບຄົວທຸກຍາກ ແລະວຽກງານພິຈາລະນາຮັບຮູ້ຄອບຄົວທຸກຍາກ, ການຫຼຸດຜ່ອນຄວາມທຸກຍາກແບບຍືນຍົງ; ການສະໜັບສະໜູນຕົ້ນທຶນການດຳເນີນງານໃຫ້ແນວໂຮມປະເທດຊາດຫວຽດນາມ ແລະບັນດາອົງຄະນະການເມືອງ-ສັງຄົມຕາມທີ່ກຳນົດໄວ້; ນະໂຍບາຍຊ່ວຍໜູນໃຫ້ບັນດາເປົ້າໝາຍນະໂຍບາຍ, ພີ່ນ້ອງຮ່ວມຊາດຊົນເຜົ່າສ່ວນນ້ອຍ; ການຊົດເຊີຍໃຫ້ແກ່ການຈັດສັນພື້ນທີ່ດິນ, ການຊົດເຊີຍຄວາມເສຍຫາຍ; ການເກັບ, ຄຸ້ມຄອງ ແລະນຳໃຊ້ລາຍຮັບຕ່າງໆຈາກແຫຼ່ງທີ່ພໍ່ແມ່ນັກຮຽນບໍລິຈາກ ແລະແຫຼ່ງທຶນຫັນການສຶກສາໃນໂຮງຮຽນເປັນສັງຄົມ... ພາຍຫຼັງ 3 ປີແຫ່ງການປະຕິບັດມະຕິຕົກລົງສະບັບທີ 217-QĐ/TW ແລະມະຕິຕົກລົງສະບັບທີ 218-QĐ/TW ຂອງກົມການເມືອງ, ຢູ່ 63 ແຂວງ-ກຳແພງນະຄອນ, ຢູ່ເກືອບທຸກເມືອງແລະຕາແສງ ໄດ້ມີການຜັນຂະຫຍາຍການເຄື່ອນໄຫວຕິດຕາມກວດກາຕາມຄວາມຕ້ອງການຂອງທ້ອງຖິ່ນ, ມີການສົມທົບຢ່າງແໜ້ນແຟ້ນກັບຄະນະພັກ ແລະອຳນາດການປົກຄອງຂັ້ນຕ່າງໆ; ຂັ້ນແຂວງ-ກຳແພງນະຄອນ ໄດ້ຈັດຕັ້ງການຕິດຕາມກວດກາ 721 ຄັ້ງ; ຂັ້ນເມືອງຈັດຕັ້ງ 6.404 ຄັ້ງ; ຂັ້ນຕາແສງຈັດຕັ້ງ 49.564 ຄັ້ງ.
2- ກ່ຽວກັບການເຄື່ອນໄຫວວິຈານສັງຄົມ, ປະກອບຄວາມເຫັນກໍ່ສ້າງພັກ, ອຳນາດການປົກຄອງ
ຜ່ານ 3 ປີແຫ່ງການປະຕິບັດມະຕິຕົກລົງສະບັບທີ 217-QĐ/TW ແລະມະຕິຕົກລົງສະບັບທີ 218-QĐ/TW, ຄະນະກຳມະການສູນກາງແນວໂຮມປະເທດຊາດຫວຽດນາມ ໄດ້ຈັດຕັ້ງການປະກອບຄວາມເຫັນ, ວິຈານສັງຄົມ ຕໍ່ຮ່າງເອກະສານທີ່ສຳຄັນຫຼາຍສິບສະບັບຂອງພັກ, ສະພາແຫ່ງຊາດ, ລັດຖະບານ ແລະຂອງອົງການທີ່ມີສິດອຳນາດອື່ນ. ຄະນະປະຈຳຄະນະກຳມະການສູນກາງແນວໂຮມປະເທດຊາດຫວຽດນາມ ໄດ້ຈັດຕັ້ງກອງປະຊຸມວິຈານສັງຄົມຈຳນວນໜຶ່ງຕໍ່ໂຄງການກົດໝາຍວ່າດ້ວຍຄວາມເຊື່ອຖື, ສາສະໜາ; ໂຄງການກົດໝາຍວ່າດ້ວຍສະມາຄົມ; ຮ່າງກົເໝາຍວ່າດ້ວຍການປັບປຸງເພີ່ມເຕີມບາງມາດຕາຂອງປະມວນກົດໝາຍອາຍາ ສະບັບທີ 100/2015/QH13, ຮ່າງກົດໝາຍວ່າດ້ວຍການປ້ອງກັນແລະຕ້ານການສໍ້ລາດບັງຫຼວງ (ສະບັບປັບປຸງ)... ດ້ວຍຈຳນວນຜູ້ແທນມາຮ່ວມຫຼາຍພໍຄວນ ແລະການປະກອບສ່ວນມີຄວາມເລິກເຊິ່ງ. ບັນດາຄວາມເຫັນວິຈານສັງຄົມຂອງແນວໂຮມປະເທດຊາດຫວຽດນາມໄດ້ຮັບການຕີລາຄາສູງຂອງຫາງສຽງສັງຄົມ, ຫຼາຍເນື້ອໃນວິຈານຖືກອົງການຮັບຜິດຊອບການຮ່າງເອກະສານຮັບເອົາ ແລະຊົມເຊີຍ.
ແຕ່ລະປີ, ຄະນະປະຈຳຄະນະກຳມະການສູນກາງແນວໂຮມປະເທດຊາດຫວຽດນາມ ໄດ້ປະກອບຄວາມເຫັນເຂົ້າໃນຮ່າງເອກະສານທາງກົດໝາຍ, ຮ່າງໂຄງການ ແຜນການ ແຜນງານ ນັບເປັນຫຼາຍສິບສະບັບ. ຄຽງຂ້າງນັ້ນ, ບັນດາອົງການສະມາຊິກກໍ່ໄດ້ຈັດຕັ້ງການວິຈານຕໍ່ເອກະສານທາງກົດໝາຍຫຼາຍສະບັບ ທີ່ພົວພັນໂດຍກົງເຖິງສິດທິແລະພັນທະຂອງສະມາຊິກໃນອົງການຈັດຕັ້ງຂອງຕົນ.
ບົນພື້ນຖານບັນດາຂ່າວສານ, ຄວາມເຫັນທີ່ເກັບກຳມາໄດ້ຈາກບັນດາກອງປະຊຸມວິຈານສັງຄົມ ແລະການ ສົມທຽບກັບແນວທາງ ແຜນນະໂຍບາຍຂອງພັກ, ນະໂຍບາຍ ກົດໝາຍຂອງລັດ ທີ່ກ່ຽວຂ້ອງກັບບັນຫາປະກອບຄວາມເຫັນ ວິຈານສັງຄົມ, ຄະນະກຳມະການສູນກາງແນວໂຮມປະເທດຊາດຫວຽດນາມ ແລະບັນດາອົງການສະມາຊິກໄດ້ຄັດເລືອກສະເໜີບັນດາເນື້ອໃນປັບປຸງ ເພີ່ມເຕີມທີ່ເໝາະສົມເຂົ້າໃນຮ່າງກົດໝາຍ, ຮ່າງໂຄງການ. ຫຼາຍຄວາມຄິດເຫັນຖືກຄະນະຮຽບຮຽງຮັບຮູ້ເອົາເຂົ້າໃນກົດໝາຍ ແລະ ໄດ້ຮັບການຮັບຮອງໂດຍສະພາແຫ່ງຊາດ, ຊຶ່ງໄດ້ແລະພວມກາຍເປັນຊ່ອງທາງຂໍ້ມູນໜຶ່ງທີ່ສຳຄັນ ຈຳເປັນ ຊ່ວຍໃຫ້ພັກແລະລັດໃນເມື່ອພິຈາລະນາ, ຕັດສິນຕົກລົງບັນຫາຕ່າງໆໃນວຽກງານນຳພາ, ຄຸ້ມຄອງ, ກຳກັບຂັບເຄື່ອນປະເທດຊາດ.
ຄະນະປະຈຳຄະນະກຳມະການສູນກາງແນວໂຮມປະເທດຊາດຫວຽດນາມ, ສູນກາງບັນດາອົງການຈັດຕັ້ງການເມືອງ-ສັງຄົມ ໄດ້ແຕ່ງຕັ້ງຜູ້ຕາງໜ້າຂອງຕົນເຂົ້າຮ່ວມຄະນະຮຽບຮຽງ, ທິມງານບັນນາທິການໂຄງຮາງກົດໝາຍ, ກົດດຳລັດ, ລັດຖະດຳລັດ ເພື່ອປະກອບຄຳເຫັນຄຳເວົ້າໂດຍກົງຂອງແນວໂຮມປະເທດຊາດຫວຽດນາມ ແລະບັນດາອົງການສະມາຊິກ ເຂົ້າໃນບັນດາເນື້ອໃນ, ຂົງເຂດທີ່ພົວພັນເຖິງແນວໂຮມປະເທດຊາດຫວຽດນາມ ແລະບັນດາອົງການສະມາຊິກ, ກ່ຽວກັບການຈັດຕັ້ງກົງຈັກແຫ່ງລັດ, ກ່ຽວກັບສິດທິແລະພັນທະພື້ນຖານຂອງພົນລະເມືອງ.
ຄະນະແນວໂຮມປະເທດຊາດຫວຽດນາມຂັ້ນຕ່າງໆຢູ່ທ້ອງຖິ່ນໄດ້ຈັດຕັ້ງຫຼາຍກອງປະຊຸມວິຈານສັງຄົມ ແລະປະກອບຄວາມເຫັນເຂົ້າໃນບັນດາຮ່າງເອກະສານທາງກົດໝາຍ ຕາມການສະເໜີຂອງອົງການຮຽບຮຽງເອກະສານຢູ່ສູນກາງ, ໃນນັ້ນມີບັນດາໂຄງການກົດໝາຍທີ່ສຳຄັນ, ເຊັ່ນ ຮ່າງປະມວນກົດໝາຍແພ່ງ (ສະບັບປັບປຸງ); ຮ່າງກົດໝາຍວ່າດ້ວຍການຈັດຕັ້ງອຳນາດການປົກຄອງທ້ອງຖິ່ນ, ຮ່າງກົດໝາຍວ່າດ້ວຍການເລືອກຕັ້ງສະມາຊິກສະພາແຫ່ງຊາດ, ສະມາຊິກສະພາປະຊາຊົນ; ຮ່າງກົດໝາຍວ່າດ້ວຍການເຄື່ອນໄຫວຕິດຕາມກວດກາຂອງສະພາແຫ່ງຊາດ, ຮ່າງກົດໝາຍວ່າດ້ວຍການປະກາດໃຊ້ເອກະສານກຳນົດກົດໝາຍ... ໃນສາມປີທີ່ຜ່ານມາ, ນັບແຕ່ເມື່ອປະຕິບັດມະຕິຕົກລົງສະບັບທີ 217-QĐ/TW ແລະມະຕິຕົກລົງສະບັບທີ 218-QĐ/TW ຂອງກົມການເມືອງ, ແນວໂຮມປະເທດຊາດຫວຽດນາມຂັ້ນຕ່າງໆຢູ່ທ້ອງຖິ່ນ ໄດ້ຈັດຕັ້ງການວິຈານສັງຄົມ 30.661 ຄັ້ງ, ໃນນັ້ນຂັ້ນແຂວງຈັດຕັ້ງ 784 ຄັ້ງ, ຂັ້ນເມືອງ 4.043 ຄັ້ງ, ຂັ້ນຕາແສງ 25.834 ຄັ້ງ.
ແນວໂຮມປະເທດຊາດຫວຽດນາມຂັ້ນຕ່າງໆໄດ້ລວມສູນການເຄື່ອນໄຫວເຂົ້າໃນການເຕົ້າໂຮມ, ເກັບກຳຄວາມເຫັນຂອງປະຊາຊົນ, ປະກອບຄວາເຫັນ, ວິຈານສັງຄົມ; ຈັດຕັ້ງກອງປະຊຸມ, ສຳມະນາ, ສົນທະນາບັນຫາສະເພາະ ເພື່ອປະກອບຄວາມເຫັນ, ວິຈານສັງຄົມ ຕໍ່ເອກະສານຂອງກອງປະຊຸມໃຫຍ່ຄັ້ງທີ XII ຂອງພັກ, ຫຼາຍຄວາມເຫັນປະກອບສ່ວນ, ວິຈານຢ່າງເລິກເຊິ່ງ, ສະແດງໃຫ້ເຫັນເຖິງແນວຄິດຈິດໃຈ, ຄວາມຮັບຜິດຊອບ, ເປັນຕົວແທນໃຫ້ແກ່ເຈດຈຳນົງ, ຄວາມມຸ່ງມາດປາຖະໜາຂອງປະຊາຊົນທຸກຊັ້ນວັນນະ, ປະກອບສ່ວນເຂົ້າໃນຜົນສຳເລັດຂອງກອງປະຊຸມໃຫຍ່ຄັ້ງທີ XII ຂອງພັກ.
ການສົມທົບໃຫ້ຄຳປຶກສາ ຈັດຕັ້ງກອງປະຊຸມສົນທະນາຂັ້ນຕ່າງໆ ໂດຍແນວໂຮມປະເທດຊາດຫວຽດນາມເປັນຜູ້ປະຕິບັດ ໄດ້ຈັດຂຶ້ນຢ່າງເປັນປະຈຳ, ເປັນແບບສະບັບກວ່າເກົ່າ ຊຶ່ງສຸມໃສ່ເນື້ອໃນ, ຂົງເຂດທີ່ປະຊາຊົນ, ທ້ອງຖິ່ນມີຄວາມສົນໃຈແລະມີຄວາມຮ້ອນເຄືອງ; ຜູ້ເປັນຫົວໜ້າໄດ້ມີຄວາມຮັບຜິດຊອບສູງໃນການຮັບເອົາຄວາມເຫັນຄຳອະທິບາຍ, ຄວາມຄິດເຫັນສ່ວນໃຫຍ່ໄດ້ຮັບການແກ້ໄຂໃນກອງປະຊຸມປຶກສາຫາລື ຊຶ່ງໄດ້ປະກອບສ່ວນທີ່ສຳຄັນ ສ້າງສະພາບແວດລ້ອມປະຊາທິປະໄຕ ໃນຊີວິດການເມືອງ-ສັງຄົມຂອງທົ່ວປະເທດ. ປະຊາຊົນໄດ້ສະແດງຄວາມຄິດແລະຄວາມປາຖະໜາຂອງຕົນໂດຍກົງກັບຜູ້ນຳຂອງທ້ອງຖິ່ນ, ມີຄວາມອຸ່ນໃຈໃນການຜະລິດ, ຕັ້ງໜ້າເຂົ້າຮ່ວມການພັດທະນາເສດຖະກິດ-ສັງຄົມຂອງທ້ອງຖິ່ນ ຂອງປະເທດ. ຜ່ານ 3 ປີແຫ່ງການຜັນຂະຫຍາຍມະຕິຕົກລົງສະບັບທີ 217-QĐ/TW ແລະມະຕິຕົກລົງສະບັບທີ 218-QĐ/TW ຂອງກົມການເມືອງ, ແນວໂຮມປະເທດຊາດຫວຽດນາມຂັ້ນຕ່າງໆຢູ່ທ້ອງຖິ່ນໄດ້ສົມທົບຈັດຕັ້ງກອງປະຊຸມສົນທະນາ 90.841 ຄັ້ງ.
ຮອດເວລານີ້, ອາດຈະເຫັນໄດ້ວ່າ ການຜັນຂະຫຍາຍປະຕິບັດການຕິດຕາມກວດກາ, ວິຈານສັງຄົມ ໄດ້ກາຍເປັນການເຄື່ອນໄຫວເປັນປະຈຳ, ຈຸດໜັກໃຈກາງ ແລະມີຜົນກະທົບຕົວຈິງ, ມີບາງແຫ່ງໄດ້ຖືການຕິດຕາມກວດກາເປັນການເຄື່ອນໄຫວບຸກທະລຸຂອງແນວໂຮມປະເທດຊາດຫວຽດນາມ ແລະບັນດາການຈັດຕັ້ງການເມືອງ-ສັງຄົມ ເພື່ອປະຕິບັດໜ້າທີ່ເຂົ້າຮ່ວມການກໍ່ສ້າງພັກແລະລັດ, ເຮັດໃຫ້ບົດບາດຕິດຕາມກວດກາ, ວິຈານສັງຄົມຂອງແນວໂຮມປະເທດຊາດຫວຽດນາມ ແລະບັນດາການຈັດຕັ້ງການເມືອງ-ສັງຄົມ ກາຍເປັນຈິງຢ່າງມີເນື້ອແທ້, ກວ້າງຂວາງເລິກເຊິ່ງ ແລະມີປະສິດທິຜົນຍິ່ງຂຶ້ນ. ບັນດາການເຄື່ອນໄຫວຕິດຕາມກວດກາ, ວິຈານສັງຄົມ ແລະ ເຂົ້າຮ່ວມກາມປະກອບຄວາມເຫັນກໍ່ສ້າງພັກແລະອຳນາດການປົກຄອງ ຂອງແນວໂຮມປະເທດຊາດຫວຽດນາມ ໄດ້ປະກອບສ່ວນທຳຄວາມກະຈ່າງແຈ້ງກ່ຽວກັບຜົນສຳເລັດແລະຂໍ້ຈຳກັດໃນການປະຕິບັດນະໂຍບາຍ, ກົດໝາຍຂອງລັດຖະບານແລະອຳນາດການປົກຄອງທ້ອງຖິ່ນ, ຂອງບັນດາອົງການຈັດຕັ້ງ...; ສະເໜີແນະບັນດາວິທີແກ້ເພື່ອແນໃສ່ປະຕິບັດນະໂຍບາຍ, ກົດໝາຍຢ່າງຖືກຕ້ອງແລະມີປະສິດທິຜົນຍິ່ງກວ່າອີກ; ປະກອບສ່ວນປົກປ້ອງສິດແລະຜົນປະໂຫຍດທີ່ຖືກກົດໝາຍ, ຊອບທຳຂອງພົນລະເມືອງ, ຂອງການຈັດຕັ້ງ, ປົກປັກຮັກສາຜົນປະໂຫຍດຂອງລັດ, ຈຳກັດການລະເມີດກົດໝາຍ. ຂໍ້ສະເໜີແນະພາຍຫຼັງການຕິດຕາດກວດກາຫຼາຍຂໍ້ ຖືກອົງການ, ການຈັດຕັ້ງ, ບຸກຄົນຜູ້ມີໜ້າທີ່ຮັບຜິດຊອບ ຮັບຮູ້ແລະປະຕິບັດຢ່າງເຂັ້ມງວດ.
ຜົນສຳເລັດດັ່ງກ່າວເທິງນີ້ໄດ້ປະກອບສ່ວນເພີ່ມທະວີຈິດໃຈຮັກແພງຊ່ວຍເຫຼືອເຊິ່ງກັນແລະກັນ, ເສີມຂະຫຍາຍປະຊາທິປະໄຕ ແລະສ້າງຄວາມເປັນໃຈທາງສັງຄົມ, ເປັນຕົ້ນແມ່ນຢູ່ຮາກຖານ. ຜ່ານນັ້ນ, ປະກອບສ່ວນຮັບປະກັນ ແລະເພີ່ມທະວີຄວາມໝັ້ນຄົງ ລະບຽບຄວາມສະຫງົບສັງຄົມ, ສ້າງເງື່ອນໄຂພັດທະນາເສດຖະກິດ-ສັງຄົມຂອງທ້ອງຖິ່ນ ແລະປະເທດ, ປະກອບສ່ວນສ້າງໂອກາດໃຫ້ປະຊາຊົນທຸກຊັ້ນຄົນ, ລົດຊ່ອງວ່າງລະຫວ່າງບັນດາເປົ້າໝາຍໃນສັງຄົມ.
3- ກ່ຽວກັບການເປັນຕົວແທນໃຫ້ແກ່ສິດແລະຜົນປະໂຫຍດຂອງປະຊາຊົນ
ແນວໂຮມປະເທດຊາດຫວຽດນາມແມ່ນການຈັດຕັ້ງພັນທະພາບທາງການເມືອງ, ການສະຫະພັນແບບສະໝັກໃຈຂອງການຈັດຕັ້ງການເມືອງ, ບັນດາການຈັດຕັ້ງການເມືອງ-ສັງຄົມ, ອົງການຈັດຕັ້ງສັງຄົມ ແລະບັນດາບຸກຄົນທີ່ດີເດັ່ນໃນບັນດາຊົນຊັ້ນ, ຊັ້ນຄົນ, ຊົນເຜົ່າ, ສາສະໜາ ແລະຊາວຫວຽດນາມອາໄສຢູ່ຕ່າງປະເທດ. ເກືອບທຸກຊັ້ນຄົນປະຊາຊົນລ້ວນແຕ່ມີຕົວແທນເຂົ້າຮ່ວມເປັນສະມາຊິກຂອງບັນດາອົງການຈັດຕັ້ງໃນແນວໂຮມປະເທດຊາດຫວຽດນາມ. ສິ່ງດັ່ງກ່າວໄດ້ສ້າງເປັນຄຸນລັກສະນະພິເສດຂອງແນວໂຮມປະເທດຊາດຫວຽດນາມ ແມ່ນອົງການທີ່ເປັນຕົວແທນຢ່າງກວ້າງຂວາງໃຫ້ແກ່ປະຊາຊົນ. ດັ່ງນັ້ນ ການເຕົ້າໂຮມ, ເກັບກຳສັງລວມຄວາມເຫັນ, ຂໍ້ສະເໜີແນະຂອງຜູ້ມີສິດເລືອກຕັ້ງແລະປະຊາຊົນ ເພື່ອສ່ອງແສງກັບພັກ-ລັດ ເປັນຊ່ອງທາງທີ່ເໝາະສົມທີ່ສຸດ ຊຶ່ງແນວໂຮມປະເທດຊາດຫວຽດນາມອາດຈະເປັນຕົວແທນ, ປົດປ້ອງສິດແລະຜົນປະໂຫຍດທີ່ຖືກກົດໝາຍ, ຊອບທຳຂອງປະຊາຊົນ.
ບົນພື້ນຖານກຳໄດ້ຄວາມຕ້ອງການຂອງສັງຄົມ, ຄວາມຮ້ອນເຄືອງແລະບັນດາບັນຫາທີ່ຜູ້ມີສິດເລືອກຕັ້ງແລະປະຊາຊົນສ່ວນຫຼາຍສົນໃຈ, ແນວໂຮມປະເທດຊາດຫວຽດນາມຂັ້ນຕ່າງໆໄດ້ມີຂໍ້ສະເໜີ, ຄຳສະເໜີແນະທີ່ສຳຄັນຫຼາຍຢ່າງໃຫ້ພັກ, ລັດ ແລະອົງການພາລະບົດບາດຢູ່ຂັ້ນຕ່າງໆ ເພື່ອປັບປຸງບູລະນະນະໂຍບາຍ, ກົດໝາຍແລະຈັດຕັ້ງປະຕິບັດ; ປະຕິບັດເປັນຢ່າງດີໜ້າທີ່ເຕົ້າໂຮມ, ເກັບກຳສັງລວມຄວາມເຫັນ, ຂໍ້ສະເໜີແນະຂອງຜູ້ມີສິດເລືອກຕັ້ງແລະປະຊາຊົນ ເພື່ອສະເໜີໃນວາລະເປີດກອງປະຊຸມສະພາແຫ່ງຊາດແຕ່ລະຄັ້ງ. ປີ 2017, ທີ່ກອງປະຊຸມສະໄໝສາມັນເທື່ອທີສາມແລະທີສີ່ ສະພາແຫ່ງຊາດຊຸດທີ XIV, ແນວໂຮມປະເທດຊາດຫວຽດນາມໄດ້ເຕົ້າໂຮມ, ສັງລວມຄວາມເຫັນ, ຂໍ້ສະເໜີແນະຂອງຜູ້ມີສິດເລືອກຕັ້ງແລະປະຊາຊົນ 8.806 ຂໍ້. ເບິ່ງລວມ, ບັນດາຄວາມເຫັນ, ຂໍ້ສະເໜີແນະຂອງຄະນະກຳມະການສູນກາງແນວໂຮມປະເທດຊາດຫວຽດນາມໄດ້ຮັບການຂານຕອບເທື່ອລະກ້າວຈາກບັນດາກະຊວງ, ຂະແໜງການທີ່ໄດ້ຮັບການປະກອບຄວາມເຫັນ, ໄດ້ຮັບການຊົມເຊີຍແລະຕີລາຄາສູງຈາກປະຊາຊົນ.
ນອກຈາກນັ້ນ, ແນວໂຮມປະເທດຊາດຫວຽດນາມຂັ້ນຕ່າງໆ ໄດ້ຮັບຟັງຢ່າງເປັນປົກກະຕິ ແລະເຕົ້າໂຮມຄວາມຄິດເຫັນ, ຄຳສະເໜີແນະຂອງຜູ້ມີສິດເລືອກຕັ້ງແລະປະຊາຊົນ ໂດຍຜ່ານຄະນະປະຕິບັດງານແນວໂຮມຢູ່ເຂດຊຸມຊົນ, ຄະນະກຳມະການແນວໂຮມປະເທດຊາດຫວຽດນາມ ແລະບັນດາອົງການສະມາຊິກຢູ່ແຕ່ລະຂັ້ນ. ໄຕມາດທີ I ແລະໄຕມາດທີ III ທຸກປີ, ຄະນະປະຈຳຄະນະກຳມະການສູນກາງແນວໂຮມປະເທດຊາດຫວຽດນາມ ໄດ້ມີລາຍງານກ່ຽວກັບສະພາບການ ແລະຄວາມເຫັນຂອງປະຊາຊົນ ຝາກເຖິງລັດຖະບານ, ສະພາແຫ່ງຊາດ, ປະທານປະເທດ ແລະ ຄະນະເລຂາທິການສູນກາງພັກ. ທຸກໆຫົກເດືອນ (ຄືເດືອນພຶດສະພາ ແລະ ຕຸລາທຸກປີ), ຄະນະປະທານຄະນະກຳມະການສູນກາງແນວໂຮມປະເທດຊາດຫວຽດນາມ ມີລາຍງານກ່ຽວກັບຄວາມເຫັນ, ຄຳສະເໜີແນະຂອງຜູ້ມີສິດເລືອກຕັ້ງແລະປະຊາຊົນ ຝາກເຖິງສະພາແຫ່ງຊາດ.
ຂໍ້ຈຳກັດ ແລະສາເຫດຈຳນວນໜຶ່ງ
ຄຽງຂ້າງຜົນສຳເລັດທີ່ບັນລຸໄດ້, ການປະຕິບັດການຕິດຕາມກວດກາແລະວິຈານສັງຄົມຍັງມີຂໍ້ຈຳກັດຕ່າງໆເຊັ່ນ: ການເຄື່ອນໄຫວຕິດຕາມກວດກາ, ວິຈານສັງຄົມ ແລະເຂົ້າຮ່ວມການປະກອບຄວາມເຫັນກໍ່ສ້າງພັກ, ອຳນາດການປົກຄອງ ຂອງແນວໂຮມປະເທດຊາດຫວຽດນາມ ແລະບັນດາອົງການສະມາຊິກ ໃນພາກຕົວຈິງເບິ່ງລວມຍັງບໍ່ເປັນແບບແຜນແທ້ເທື່ອ, ວຽກງານປະສານສົທທົບຍັງບໍ່ທັນຄົບຊຸດ; ຄຳສະເໜີ, ຂໍ້ສະເໜີແນະຫຼາຍຂໍ້ຂອງແນວໂຮມປະເທດຊາດຫວຽດນາມ ແລະບັນດາອົງຄະນະການເມືອງ-ສັງຄົມ ໃນຂະບວນວິວັດການຕິດຕາມກວດກາ, ວິຈານສັງຄົມ ແລະເຂົ້າຮ່ວມການປະກອບຄວາມເຫັນ ຢູ່ຫຼາຍແຫ່ງ ບໍ່ໄດ້ອຳນາດການປົກຄອງເອົາໃຈໃສ່ພິຈາລະນາ, ແກ້ໄຂແລະຕອບສະໜອງຢ່າງເໝາະສົມເທື່ອ; ກຳລັງແຜ່ລາມ, ຄວາມເລິກ, ປະສິດທິຜົນຂອງການຕິດຕາມກວດກາແລະວິຈານສັງຄົມ ຍັງບໍ່ທັນໄດ້ຕາມຄວາມປະສົງ. ການປະກອບຄວາມເຫັນກ່ຽວກັບວຽກງານນຳພາ, ຊີ້ນຳຂອງຄະນະພັກ, ອົງການຈັດຕັ້ງພັກ, ອຳນາດການປົກຄອງ ແລະການປະກອບຄວາມເຫັນໃຫ້ພະນັກງານ, ສະມາຊິກພັກ, ລັດຖະກອນ, ເປັນຕົ້ນແມ່ນຜູ້ນຳໜ້າຄະນະພັກ, ການຈັດຕັ້ງພັກ, ອຳນາດການປົກຄອງ ກໍ່ຍັງຖືກຈຳກັດ.
ຄະນະກຳມະການແນວໂຮມປະເທດຊາດຫວຽດນາມ ແລະບັນດາອົງຄະນະການເມືອງ-ສັງຄົມ ຕົ້ນຕໍຈັດຕັ້ງການຕິດຕາມກວດກາການເຄື່ອນໄຫວຂອງອົງການຈັດຕັ້ງເສດຖະກິດ ແລະອົງການຈັດຕັ້ງພາລະກິດບໍລິຫານ. ສຳລັບການເຄື່ອນໄຫວຂອງບັນດາອົງການບໍລິຫານງານຂອງລັດ, ອົງການໂດຍປະຊາຊົນເລືອກຕັ້ງ ແລະອົງການຍຸດຕິທຳນັ້ນ, ແນວໂຮມປະເທດຊາດຫວຽດນາມ ແລະບັນດາອົງຄະນະການເມືອງ-ສັງຄົມຂັ້ນຕ່າງໆ ຕົ້ນຕໍ່ແມ່ນໄດ້ແຕ່ງຕັ້ງຜູ້ຕາງໜ້າໃຫ້ເຂົ້າຮ່ວມຄະນະຕິດຕາມກວດກາໂດຍອົງການຂອງລັດເປັນຜູ້ຈັດຕັ້ງ, ສ່ວນການຈັດຕັ້ງການເຄື່ອນໄຫວຕິດຕາມກວດກາເປັນເອກະລາດ ແມ່ນຍັງບໍ່ທັນຫຼາຍ.
ວຽກງານວິຈານສັງຄົມຂອງຫຼາຍທ້ອງຖິ່ນໄດ້ຮັບການຜັນຂະຫຍາຍຊ້າ, ຫຼາຍທ້ອງຖິ່ນພຽງແຕ່ສຸມໃສ່ຜັນຂະຫຍາຍວຽກງານນີ້ຢູ່ຂັ້ນແຂວງເປັນຕົ້ນຕໍ, ສ່ວນຢູ່ຂັ້ນເມືອງແລະຂັ້ນຕາແສງແມ່ນຍັງບໍ່ທັນຫຼາຍ. ຫຼາຍກອງປະຊຸມວິຈານສັງຄົມຍັງມີລັກສະນະປະກອບຄວາມເຫັນກໍ່ສ້າງເອກະສານ, ສ່ວນວິທີການປະຕິບັດເພື່ອສ້າງໃຫ້ມີປະສິດທິຜົນ ແມ່ນຍັງບໍ່ທັນຈະແຈ້ງ.
ຖັນແຖວພະນັກງານທີ່ໃຫ້ຄຳປຶກສາການຜັນຂະຫຍາຍບັນດາເນື້ອໃນຂອງວຽກງານຕິດຕາມກວດກາ ແມ່ນຍັງບໍ່ທັນຕອບສະໜອງໄດ້ກັບຄວາມຕ້ອງການ ຍ້ອນຄວາມຈຳກັດທາງດ້ານຄວາມສາມາດ, ລະດັບຄວາມຮູ້, ບົດຮຽນ ແລະ ຕ້ອງຄວບໜ້າທີ່, ຜັນຂະຫຍາຍຫຼາຍໜ້າທີ່ການງານໃນເວລາດຽວ. ພະນັກງານພາກສ່ວນໜຶ່ງທີ່ເຮັດວຽກງານຕິດຕາມກວດກາ, ວິຈານສັງຄົມ ຍັງມີຄວາມຄິດຢ້ານຕຳກັນ, ບໍ່ກ້າເວົ້າແຈ້ງຄວາມຄິດເຫັນຂອງຕົນ.
ສາເຫັດຂອງຂໍ້ຈຳກັດຕ່າງໆເທິງນີ້ຕົ້ນຕໍແມ່ນຍ້ອນ: ການຫັນເປັນນິຕິກຳຕໍ່ບັນດາແຜນນະໂຍບາຍ ທັດສະນະຂອງພັກ ແລະລັດຖະທຳມະນູນ ກ່ຽວກັບສິດທິແລະຄວາມຮັບຜິດຊອບຕິດຕາມກວດກາ, ວິຈານສັງຄົມຂອງແນວໂຮມປະເທດຊາດຫວຽດນາມ ແລະຂອງບັນດາການຈັດຕັ້ງການເມືອງ-ສັງຄົມ ທວງໃຫ້ຕ້ອງມີການຕີລາຄາ ຖອດຖອນບົດຮຽນຜ່ານພຶດຕິກຳແຫ່ງການຜັນຂະຫຍາຍໃນໄລຍະເວລາທີ່ແນ່ນອນ, ດັ່ງນັ້ນ ໃນ 3 ປີທີ່ຜ່ານມາ ການຜັນຂະຫຍາຍຍັງບໍ່ທັນພຽງພໍ, ຄົບຊຸດທາງດ້ານລະບຽບກົດໝາຍ. ຄຽງຂ້າງນັ້ນ, ຄວາມຮັບຮູ້ຂອງບາງຄະນະພັກກ່ຽວກັບທີ່ຕັ້ງ, ຖານະບົດບາດຂອງການເຄື່ອນໄຫວຕິດຕາມກວດກາ, ວິຈານສັງຄົມ, ກ່ຽວກັບສິດທິແລະຄວາມຮັບຜິດຊອບຂອງແນວໂຮມປະເທດຊາດຫວຽດນາມ ແມ່ນຍັງບໍ່ທັນຄົບຖ້ວນແລະຮອບດ້ານ.
ຄວາມຮັບຮູ້ກ່ຽວກັບວຽກງານຕິດຕາມກວດກາຂອງແນວໂຮມປະເທດຊາດຫວຽດນາມ, ບັນດາອົງຄະນະການເມືອງ-ສັງຄົມ ໃນບັນດາຂັ້ນ, ຂະແໜງການຕ່າງໆ ແລະໃນປະຊາຊົນ ຍັງມີຄວາມແຕກຕ່າງກັນ; ການປະສານສົມທົບກັບບັນດາອົງການທີ່ກ່ຽວຂ້ອງໃນການຜັນຂະຫຍາຍບາງໂຄງການຕິດຕາມກວດກາ ຍັງພົບຄວາມຫຍຸ້ງຍາກ, ປະສິດທິຜົນບໍ່ສູງ; ການຕິດຕາມ, ປະຕິບັດຄຳສະເໜີແນະພາຍຫຼັງການຕິດຕາມກວດກາ ບໍ່ຕອບສະໜອງໄດ້ກັບຄວາມຫວັງ, ຄວາມຕ້ອງການ. ການເສີມຂະຫຍາຍກຳລັງແຮງຂອງບັນດາອົງການສະມາຊິກໃນວຽກງານວິຈາສັງຄົມ ຍັງບໍ່ມີປະສິດທິຜົນຫຼາຍສຸດ; ການປະຕິບັດໜ້າທີ່ຢູ່ບາງແຫ່ງຍັງມີລັກສະນະຮູບການ, ຄຸນນະພາບວຽກງານບໍ່ສູງ.
ວຽກງານຕິດຕາມກວດກາ, ວິຈານສັງຄົມ, ເຂົ້າຮ່ວມການປະກອບຄວາມເຫັນກໍ່ສ້າງພັກແລະອຳນາດການປົກຄອງ ຮຽກຮ້ອງໃຫ້ມີລະດັບການເມືອງ, ວິຊາສະເພາະ, ບົດຮຽນພຶດຕິກຳນັບມື້ນັບສູງ ແຕ່ຈຳນວນແລະຄຸນນະພາບຂອງຖັນແຖວພະນັກງານເຮັດວຽກງານແນວໂຮມ ແລະບັນດາການຈັດຕັ້ງການເມືອງ-ສັງຄົມ ຍັງຕ່ຳ, ບໍ່ທຽບເທົ່າກັບໜ້າທີ່, ບໍ່ມີບົດຮຽນໃນການຕິດຕາມກວດກາສັງຄົມ.
ບັນດາເງື່ອນໄຂທາງດ້ານເງິນທຶນສຳລັບການເຄື່ອນໄຫວຕິດຕາມກວດກາ, ວິຈານສັງຄົມຂອງແນວໂຮມປະເທດຊາດຫວຽດນາມແລະບັນດາການຈັດຕັ້ງການເມືອງ-ສັງຄົມ ແມ່ນຍັງຂາດເຂີນຫຼາຍ; ການເຄື່ອນໄຫວຂອງຄະນະກວດກາປະຊາຊົນ, ຄະນະຕິດຕາມກວດກາການລົງທຶນຊຸມຊົນຢູ່ຫຼາຍທ້ອງຖິ່ນພົບຄວາມຫຍຸ້ງຍາກ ຍ້ອນງົບປະມານຂອງຕາແສງບໍ່ສາມາດຕອບສະໜອງໄດ້.
ບາງໜ້າທີ່ຈຸດໜັກໃຈກາງໃນເວລາທີ່ຈະເຖິງ
ເພື່ອໃຫ້ແນວໂຮມປະເທດຊາດຫວຽດນາມປະຕິບັດເປັນຢ່າງດີບົດບາດຕິດຕາມກວດກາ, ວິຈານສັງຄົມ, ໃນເວລາຕໍ່ໜ້າຕ້ອງສຸມໃສ່ໜ້າທີ່ຈຳນວນໜຶ່ງດັ່ງນີ້:
ທີໜຶ່ງ, ສືບຕໍ່ປັບປຸງບູລະນະຂໍ້ກຳນົດກົດໝາຍຕ່າງໆທີ່ກ່ຽວຂ້ອງ
ຄະນະປະຈຳຄະນະກຳມະການສູນກາງແນວໂຮມປະເທດຊາດຫວຽດນາມ ປະສານງານຢ່າງຕັ້ງໜ້າໃຫ້ຄຳປຶກສາ, ສະເໜີແນະການຫັນເປັນນິຕິກຳຕໍ່ບັນດາທັດສະນະແຜນນະໂຍບາຍຂອງພັກ ກ່ຽວກັບຄວາມສາມັກຄີປວງຊົນທັງຊາດ; ທິດນຳ “ປະຊາຊົນຮູ້, ປະຊາຊົນປຶກສາຫາລື, ປະຊາຊົນເຮັດ, ປະຊາຊົນກວດກາ”, ສາຍພົວພັນ “ພັກນຳພາ, ລັດຄຸ້ມຄອງ, ປະຊາຊົນເປັນເຈົ້າຂອງ”; ປັບປຸງບູລະນະກົນໄກ, ນະໂຍບາຍເສີມຂະຫຍາຍບົດບາດຂອງປະຊາຊົນໃນການຕັດສິນຕົງລົງບັນດາບັນຫາທີ່ສຳຄັນຂອງປະເທດ; ຮັບປະກັນອຳນາດລັດທັງໝົດຂຶ້ນກັບປະຊາຊົນ, ຍົກສູງປະສິດທິຜົນແລະລັກສະນະແທດຈິງໃນການເຄື່ອນໄຫວຕິດຕາມກວດກາ, ວິຈານສັງຄົມ ຂອງແນວໂຮມປະເທດຊາດຫວຽດນາມ ແລະບັນດາອົງຄະນະການເມືອງ-ສັງຄົມ. ພ້ອມກັນນັ້ນ, ສະເໜີໃຫ້ປະກາດໃຊ້ໃນໄວໆນີ້ ກົດລະບຽບກ່ຽວກັບການຮັບເອົາຄວາມເຫັນຂອງແນວໂຮມປະເທດຊາດຫວຽດນາມ, ບັນດາອົງຄະນະການເມືອງ-ສັງຄົມ; ກົດລະບຽບກ່ຽວກັບການຕິດຕໍ່, ປຶກສາສົນທະນາຂອງຜູ້ນຳໜ້າຄະນະພັກ, ອຳນາດການປົກຄອງຂັ້ນຕ່າງໆ; ຂໍ້ກຳນົດກ່ຽວກັບການຕິດຕາມກວດກາຂອງບັນດາອົງການຈັດຕັ້ງການເມືອງ-ສັງຄົມ ແລະປະຊາຊົນ ຕໍ່ກັບການຝຶກຝົນຫຼໍ່ຫຼອມຄຸນສົມບັດສິນທຳຂອງຫົວໜ້າ, ພະນັກງານຫຼັກແຫຼ່ງ ແລະພະນັກງານສະມາຊິກພັກ ໂດຍຄະນະຂົນຂວາຍປະຊາຊົນສູງກາງເປັນເຈົ້າພາບສົມທົບກັບແນວໂຮມປະເທດຊາດຫວຽດນາມກະກຽມຮຽບຮຽງຂໍ້ກຳນົດກົດລະບຽບເຫຼົ່ານັ້ນ.
ທີສອງ, ເສີມຂະຫຍາຍຍິ່ງກວ່າອີກຄວາມຮັບຜິດຊອບຂອງອົງການຈັດຕັ້ງພັກຂັ້ນຕ່າງໆ ໃນການຍົກສູງບົດບາດຂອງຄະນະກຳມະການແນວໂຮມປະເທດຊາດຂັ້ນຕ່າງໆ
ຄະນະພັກຢູ່ຄະນະກຳມະການສູນກາງແນວໂຮມປະເທດຊາດຫວຽດນາມ ແລະຄະນະຂົນຂວາຍປະຊາຊົນສູນກາງ ລາຍງານຕໍ່ຄະນະເລຂາທິການສູນກາງພັກ ກ່ຽວກັບສະພາບການ ແລະຜົນການຜັນຂະຫຍາຍວຽກງານຕິດຕາມກວດກາ, ວິຈານສັງຄົມໃນທົ່ວລະບົບການເມືອງ ເພື່ອໃຫ້ຄະນະເລຂາທິການຊີ້ນຳການຜັນຂະຫຍາຍຕໍ່ໄປຢ່າງທັນການແລະມີປະສິດທິຜົນສູງ, ໂດຍຜ່ານບົດບາດສຳຄັນຂອງການຈັດຕັ້ງພັກຂັ້ນຕ່າງໆ.
ຄະນະປະຈຳຄະນະກຳມະການສູນກາງແນວໂຮມປະເທດຊາດຫວຽດນາມ ແລະຄະນະຂົນຂວາຍປະຊາຊົນສູນກາງ ມີການແນະນຳວຽກງານຕິດຕາມກວດກາ, ວິຈານສັງຄົມໄລຍະ 2017 - 2020 ໃນລະບົບແນວໂຮມປະເທດຊາດຫວຽດນາມ ແລະອົງການຈັດຕັ້ງພັກຂັ້ນຕ່າງໆ. ທຸກປີ, ສອງຝ່າຍສົມທົບກັນສະຫຼຸບວຽກງານຕິດຕາມກວດກາ, ວິຈານສັງຄົມ ເພື່ອໃຫ້ການເຄື່ອນໄຫວເຫຼົ່ານີ້ມີລະບຽບແບບແຜນ, ມີພື້ນຖານກົດໝາຍຄົບຖ້ວນ ແລະສົ່ງເສີມຜົນກະທົບທາງສັງຄົມໃຫ້ນັບມື້ນັບມີປະສິດທິຜົນ.
ທີສາມ, ຍົກສູງຄວາມສາມາດ, ຄວາມຮັບຜິດຊອບຂອງແນວໂຮມປະເທດຊາດທຸກຂັ້ນ, ຫັນການເຄື່ອນໄຫວລົງສູ່ຮາກຖານຢ່າງແຂງແຮງ
ແນວໂຮມປະເທດຊາດຫວຽດນາມທຸກຂັ້ນຕ້ອງມີຄວາມມານະພະຍາຍາມກວ່າອີກໃນການສົມທົບກັນຈັດຕັ້ງກອງປະຊຸມສົນທະນາລະຫວ່າງຜູ້ນຳໜ້າຄະນະພັກ, ອຳນາດການປົກຄອງ ກັບປະຊາຊົນ; ປະກອບຄວາມເຫັນເຂົ້າໃນການນຳພາ, ຊີ້ນຳຂອງຄະນະພັກ, ອຳນາດການປົກຄອງ ໃນການປະຕິບັດໜ້າທີ່ພັດທະນາເສດຖະກິດ-ສັງຄົມ, ກໍ່ສ້າງຊົນນະບົດໃໝ່, ຄຸ້ມຄອງບໍລິຫານຕົວເມືອງ, ສະພາບແວດລ້ອມ, ສຸຂະອານາໄມແລະຄວາມປອດໄພຂອງອາຫານ, ບັນດາບັນຫາ “ເຄັ່ງຮ້ອນ” ທີ່ປະຊາຊົນທ້ອງຖິ່ນສົນໃຈ; ປະກອບຄວາມເຫັນໃຫ້ພະນັກງານ ສະມາຊິກພັກ ລັດຖະກອນ ໃນການປະຕິບັດໜ້າທີ່ການເມືອງທີ່ໄດ້ຮັບມອບໝາຍ, ປະຕິບັດແຜນນະໂຍບາຍ ແນວທາງຂອງພັກ, ນະໂຍບາຍ ກົດໝາຍຂອງລັດ ແລະໜ້າທີ່ຂອງທ້ອງຖິ່ນ ໂດຍຕິດກັບການປະຕິບັດມະຕິຂອງກອງປະຊຸມສູນກາງພັກຄັ້ງທີ 4 ສະໄໝ XI “ບາງບັນຫາທີ່ຮີບດ່ວນກ່ຽວກັບການກໍ່ສ້າງພັກໃນປະຈຸບັນ”, ມະຕິຂອງກອງປະຊຸມສູນກາງພັກຄັ້ງທີ 4 ສະໄໝ XII “ກ່ຽວກັບການເພີ່ມທະວີການກໍ່ສ້າງ, ປັບປຸງພັກ; ກີດກັ້ນແລະຍູ້ຖອຍຄວາມເສື່ອມໂຊມທາງດ້ານແນວຄິດການເມືອງ, ຄຸນສົມບັດສິນທຳ, ແບບແຜນດຳລົງຊີວິດ, ບັນດາປະກົດການ "ຫັນປ່ຽນດ້ວຍຕົນເອງ", "ປ່ຽນແປງດ້ວຍຕົນເອງ" ຢູ່ພາຍໃນ". ພ້ອມກັນນັ້ນ, ເປັນເຈົ້າການສະເໜີໃຫ້ສູນກາງພັກປະກາດໃຊ້ກົດລະບຽບກ່ຽວກັບການຮັບເອົາຄວາມເຫັນຂອງແນວໂຮມປະເທດຊາດຫວຽດນາມ, ຂອງບັນດາອົງຄະນະການເມືອງ-ສັງຄົມ; ກົດລະບຽບກ່ຽວກັບການຕິດຕໍ່, ປຶກສາສົມທະນາຂອງຜູ້ນຳໜ້າຄະນະພັກ, ອຳນາດການປົກຄອງຂັ້ນຕ່າງໆ.
ແນວໂຮມປະເທດຊາດຫວຽດນາມແລະບັນດາການຈັດຕັ້ງການເມືອງ-ສັງຄົມ ຕ້ອງເສີມຂະຫຍາຍບົດບາດ ແລະລະດົມສະຕິປັນຍາຂອງບັນດາກຳມະການຄະນະກຳມະການສູນກາງແນວໂຮມປະເທດຊາດຫວຽດນາມ, ບັນດາຜູ້ຊົງຄຸນວຸດທິ, ປັນຍາຊົນ, ບັນດາວົງການ, ຊົນເຜົ່າ, ສາສະໜາ, ບັນດານັກວິທະຍາສາດ, ຜູ້ຊ່ຽວຊານ, ສະມາຊິກສະມາຄົມຕ່າງໆ ແລະການສະໜັບສະໜູນຂອງປະຊາຊົນ; ລະດົມການເຂົ້າຮ່ວມ, ການສະໜັບສະໜູນ ການໂຄສະນາຂອງບັນດາອົງການສື່ຂ່າວ ຕໍ່ການເຄື່ອນໄຫວ ຕິດຕາມກວດກາ, ວິຈານສັງຄົມ, ປະກອບສ່ວນກໍ່ສ້າງພັກ, ອຳນາດການປົກຄອງ. ທຸກປີ, ເປັນເຈົ້າການ ກໍ່ສ້າງແຜນການ ຕິດຕາມກວດກາ, ວິຈານສັງຄົມ, ພາບຫຼັງເປັນເອກະພາບກັບອົງການ, ການຈັດຕັ້ງທີ່ກ່ຽວຂ້ອງ ແລ້ວລາຍງານໃຫ້ ຄະນະພັດຂັ້ນດຽວກັນ. ພາຍຫຼັງການຕິດຕາມກວດກາ, ວິຈານສັງຄົມ, ແນວໂຮມປະເທດຊາດຫວຽດນາມແລະບັນດາການຈັດຕັ້ງການເມືອງ-ສັງຄົມ ຕ້ອງມີບົດສະຫຼຸບລາຍລະອຽດແລະຂໍ້ສະເໜີແນະກ່ຽວກັບກາຕິດຕາມກວດກາ, ວິຈານສັງຄົມ ຝາກເຖິງອົງການ, ການຈັດຕັ້ງ, ບຸກຄົນທີ່ມີຄວາມຮັບຜິດຊອບ ແລະຕິດຕາມ, ຊຸກຍູ້ການແກ້ໄຂ, ຕອບຄວາມຂອງບັນດາອົງການ, ການຈັດຕັ້ງ, ບຸກຄົນທີ່ກ່ຽວ. ຕໍ່ກັບອົງການ, ການຈັດຕັ້ງ ແລະບຸກຄົນທີ່ມີຄວາມຮັບຜິດຊອບ ທີ່ບໍ່ປະຕິບັດການພິຈາລະນາແກ້ໄຂ ແລະຕອບຄຳສະເໜີແນະ, ຕ້ອງລາຍງານໃຫ້ອົງການທີ່ມີອຳນາດເພື່ອແກ້ໄຂ./.
ໂດຍ ທ່ານ ປອ. ເຈິ່ນແທັງເໝິນ,
ເລຂາທິການສູກາງພັກກອມມູນິດຫວຽດນາມ,
ປະທານຄະນະກຳມະການສູນກາງແນວໂຮມປະເທດຊາດຫວຽດນາມ
---------------------
ບົດນີ້ໄດ້ລົງພິມໃນວາລະສານກອມມູນິດສະບັບທີ 906 (ເດືອນເມສາ 2018)
