ຄຳແນະນຳຂອງກອງບັນນາທິການ: ໃນວັນທີ 3 ມິຖຸນາ 2018, ທີ່ນະຄອນຫຼວງຮ່າໂນ້ຍ, ຄະນະກຳມະການສູນກາງພັກ, ສະພາແຫ່ງຊາດ, ປະທານປະເທດ, ລັດຖະບານ, ຄະນະກຳມະການສູນກາງ ແນວໂຮມປະເທດຊາດຫວຽດນາມ ໄດ້ຈັດຕັ້ງພິທີສະເຫຼີມສະຫຼອງ ວັນປະທານໂຮ່ຈິມິນ ອອກຄຳຮຽກຮ້ອງແຂ່ງຂັນຮັກຊາດ ຄົບຮອບ 70 ປີ (ວັນທີ 11 ມິຖຸນາ 1948 - ວັນທີ 11 ມິຖຸນາ 2018) ແລະ ຊົມເຊີຍນັກຮົບວິລະຊົນຂອງກຳລັງປະກອບອາວຸດ, ນັກຮົບວິລະຊົນດ້ານອອກແຮງງານ, ຜູ້ທີ່ເປັນແບບຢ່າງກ້າວໜ້າ ໃນບັນດາໄລຍະທີ່ຜ່ານມາ ຢ່າງສົມກຽດ. ສະຫາຍ ຫງວຽນຝູຈ້ອງ ເລຂາທິການໃຫຍ່ຄະນະກຳມະການສູນກາງ ພັກກອມມູນິດຫວຽດນາມ ເປັນກຽດເຂົ້າຮ່ວມ ແລະ ມີບົດປາໄສທີ່ສຳຄັນໃນພິທີສະເຫຼີມສະຫຼອງ. ວາລະສານກອມມູນິດຂໍໄດ້ເປັນກຽດແນະນຳເນື້ອໃນບົດປາໄສຂອງສະຫາຍເລຂາທິການໃຫຍ່.
ສະຫາຍເລຂາທິການໃຫຍ່ ຫງວຽນຝູຈ້ອງ ກ່າວປາໄສຢູ່ທີ່ພິທີ. (ພາບ: TTXVN)
ຮຽນບັນດາທ່ານຜູ້ແທນ, ບັນດາແຂກທີ່ມີກຽດ,
ຮຽນບັນດາສະຫາຍ, ພໍ່ແມ່ປະຊາຊົນໝົດທຸກຄົນທີ່ນັບຖື ແລະ ຮັກແພງທັງຫຼາຍ.
ເນື່ອງໃນໂອກາດສະເຫຼີມສະຫຼອງວັນທີ່ປະທານໂຮ່ຈີມິນ ອອກຄຳຮຽກຮ້ອງແຂ່ງຂັນຮັກຊາດ ຄົບຮອບ 70 ປີ (ວັນທີ 11 ມິຖຸນາ 1948 - ວັນທີ 11 ມິຖຸນາ 2018), ມື້ນີ້ ພວກເຮົາພົບປະຢູ່ນີ້ເພື່ອລຶ້ມຄືນຄຳສັ່ງສອນຂອງ ປະທານໂຮ່ຈິມິນ, ທົບທວນຄືນບັນດາວຽກງານທີ່ພວກເຮົາໄດ້ປະຕິບັດໃນເວລາທີ່ຜ່ານມາ ແລະ ຍ້ອງຍໍຊົມເຊີຍບັນດາໝູ່ຄະນະ, ບຸກຄົນທີ່ມີຜົນງານອັນດີເດັ່ນໃນຂະບວນການແຂ່ງຂັນຮັກຊາດ, ແນໃສ່ຍູ້ແຮງ ແລະປະຕິບັດວຽກງານແຂ່ງຂັນ, ຍ້ອງຍໍຊົມເຊີຍໃຫ້ໄດ້ດີກວ່າອີກໃນເວລາຕໍ່ໄປ. ຕາງໜ້າໃຫ້ພັກແລະລັດ, ຂ້າພະເຈົ້າຂໍຊົມເຊີຍບັນດາທ່ານຜູ້ແທນ, ບັນດາແຂກທີ່ມີກຽດ, ບັນດານັກປະຕິວັດອາວຸໂສ, ບັນດາແມ່ຫວຽດນາມວິລະຊົນ, ແລະພິເສດ ຂໍຊົມເຊີຍ 700 ຄົນທີ່ເປັນຜູ້ແທນແບບຢ່າງກ້າວໜ້າ - ບັນດາດອກໄມ້ທີ່ສວຍງາມໃນຂະບວນການແຂ່ງຂັນຮັກຊາດ ທີ່ໄດ້ມາເຂົ້າຮ່ວມພິທີອັນສົມກຽດແຫ່ງນີ້. ຂ້າພະເຈົ້າຂໍຝາກຄວາມຢ້ຽມຢາມຖາມຂ່າວອັນອົບອຸ່ນ ແລະ ຄຳອວຍພອນໄຊອັນປະເສີດມາຍັງບັນດາສະຫາຍ, ພໍ່ແມ່ປະຊາຊົນ ແລະນັກຮົບທຸກຄົນໃນທົ່ວປະເທດທີ່ກຳລັງອອກແຮງງານ, ຜະລິດ, ສູ້ຮົບ, ເຮັດວຽກ, ຮ່ຳຮຽນ, ຄົ້ນຄວ້າວິທະຍາສາດໃນກາງເວັນທັງກາງຄືນ ເພື່ອປະກອບສ່ວນເຂົ້າໃນພາລະກິດແຫ່ງການກໍ່ສ້າງ ແລະປົກປັກຮັກສາປະເທດຊາດ.
ຮຽນບັນດາທ່ານຜູ້ແທນແລະບັນດາສະຫາຍທີ່ເຄົາລົບ ຮັກແພງທັງຫຼາຍ,
ຄືທີ່ພວກເຮົາໄດ້ຮູ້ແລ້ວວ່າ, ວຽກງານແຂ່ງຂັນ, ຍ້ອງຍໍຊົມເຊີຍມີບົດບາດສຳຄັນທີ່ສຸດໃນຊີວິດສັງຄົມ. ກ່ອນໜ້ານີ້ 170 ປີ, ນັກທິດສະດີທີ່ປີຊາສາມາດ, ນັກແນວຄິດຜູ້ຍິ່ງໃຫຍ່ຂອງຊົນຊັ້ນກຳມະຊີບ ກ.ມາກ ໄດ້ຊີ້ແຈ້ງວ່າ: ແຂ່ງຂັນເປັນປະກົດການສັງຄົມທີ່ຄົງຕົວແບບພາວະວິໄສ, ເປັນກົດເກັນພັດທະນາທີ່ຈຳເປັນແນ່ນອນຂອງຂະບວນວິວັດແຫ່ງການຮ່ວມມືແຮງງານຂອງມະນຸດ; ຢູ່ບ່ອນໃດມີການຮ່ວມມືແຮງງານ ຢູ່ນັ້ນຈະມີການແຂ່ງຂັນ. ວ.ອີ.ເລນິນ ກໍ່ເຄີຍເວົ້າວ່າ: ການປະຕິວັດເປັນວັນບຸນຂອງມະຫາຊົນ. ດ້ວຍຂະບວນການປະຕິວັດຂອງມະຫາຊົນຜູ້ເຂົ້າຮ່ວມດ້ວຍຄວາມຕື່ນຕົວ, ຕັ້ງໜ້າ ເປັນຫຼາຍລ້ານຄົນ ເຊິ່ງບໍ່ມີຄວາມຫຍຸ້ງຍາກໃດຈະບໍ່ຖືກຜ່ານຜ່າ, ບໍ່ມີສັດຕູໂຕໃດຈະບໍ່ຖືກຕີໃຫ້ປະຊະນະ, ບໍໍ່ມີໜ້າທີ່ປະຕິວັດໃດຈະບໍ່ໄດ້ຮັບການປະຕິບັດໃຫ້ສຳເລັດ.
ໝູນໃຊ້ແລະພັດທະນາທັດສະນະອັນພື້ນຖານຂອງລັດທິ ມາກ-ເລນິນ ກ່ຽວກັບການແຂ່ງຂັນ ຢ່າງປະດິດສ້າງເຂົ້າໃນຂະບວນການປະຕິວັດຂອງປະເທດເຮົາ, ປະທານ ໂຮ່ຈີມິນ ໄດ້ຍົກລະດັບຄວາມເຄົ້າໃຈກ່ຽວກັບການແຂ່ງຂັນຂຶ້ນເປັນແນວຄິດ ຖືການແຂ່ງຂັນເປັນຄຸນສົມບັດສິນທຳ, ສະແດງເຖິງນ້ຳໃຈຮັກຊາດຂອງຄົນຫວຽດນາມ. ເພິ່ນເນັ້ນວ່າ: "ແຂ່ງຂັນແມ່ນຮັກຊາດ, ຮັກຊາດຕ້ອງແຂ່ງຂັນ. ແລະຜູ້ທີ່ເຂົ້າຮ່ວມການແຂ່ງຂັນ ແມ່ນຜູ້ທີ່ຮັກຊາດທີ່ສຸດ" (1). ໃນວັນທີ 11 ມິຖຸນາ 1948, ທ່າມກາງສະພາບການທີ່ການຕໍ່ຕ້ານພວກລ່າເມືອງຂຶ້ນຝຣັ່ງ ກຳລັງຜັນແປຢ່າງດຸເດືອດຮຸນແຮງ, ທ່ານປະທານໂຮ່ຈີມິນໄດ້ອອກ ຄຳຮຽກຮ້ອງແຂ່ງຂັນຮັກຊາດ. ເພິ່ນໄດ້ຊີ້ແຈ້ງວ່າ: “ປະຊາຊົນຫວຽດນາມແຕ່ທຸກຄົນ, ບໍ່ວ່າເຖົ້າ ໜຸ່ມ ຍິງ ຊາຍ; ບໍ່ວ່າຄົນຮັ່ງມີ ຄົນທຸກຍາກ ຄົນໃຫຍ່ ຄົນນ້ອຍ, ລ້ວນແຕ່ຕ້ອງກາຍເປັນນັກຮົບຕໍ່ສູ້ໃນແນວຮົບ: ການທະຫານ, ເສດຖະກິດ, ການເມືອງ, ວັດທະນະທຳ”(2). ເພິ່ນກໍ່ໄດ້ຢືນຢັນວ່າ: “ດ້ວຍຈິດໃຈອົງອາດກ້າແກ່ນ ແລະກຳລັງອັນບໍ່ມີສິ້ນສຸດຂອງຊາດເຮົາ, ດ້ວຍນ້ຳໃຈຮັກຊາດ ແລະເຈດຈຳນົງເດັດດ່ຽວຂອງປະຊາຊົນ ແລະກອງທັບເຮົາ, ພວກເຮົາອາດຈະໄດ້ຮັບໄຊຊະນະ, ພວກເຮົາຈະໄດ້ຮັບໄຊຊະນະຢ່າງແນ່ນອນ”(3). ຄຳຮຽກຮ້ອງແຂ່ງຂັນຮັກຊາດ ຂອງປະທານໂຮ່ຈີມິນ ໄດ້ມີຄວາມດຶງດູດ, ປຸກລະດົມ, ຮຽກຮ້ອງໃຫ້ທົ່ວພັກ, ທົ່ວປະຊາຊົນ ແລະ ທົ່ວກອງທັບເຮົາເສີມຂະຫຍາຍຈິດໃຈສາມັດຄີ, ເຈດຈຳນົງເພິ່ງຕົນເອງສ້າງຕົນໃຫ້ເຂັ້ມແຂງ, ຜ່ານຜ່າຄວາມເສຍສະຫຼະ ຄວາມຫຍຸ້ງຍາກລຳບາກທຸກປະການ, ສ້າງຜົນງານການສູ້ຮົບອັນສະຫງ່າລາສີ ແລະຜົນງານອັນໃຫຍ່ຫຼວງໃນພາລະກິດແຫ່ງການປະຕິວັດຂອງປະເທດເຮົາ. ການແຂ່ງຂັນໄດ້ກາຍເປັນກຳລັງໜູນທີ່ແທ້ຈິງຂອງທົ່ວພັກ, ທົ່ວປວງຊົນ, ທົ່ວກອງທັບເຮົາ ແລະ ພາໃຫ້ການປະຕິວັດຫວຽດນາມ ໄດ້ຍາດເອົາໄຊຊະນະຢ່າງຕໍ່ເນື່ອງ ຈາກໄຊຊະນະນີ້ໄປສູ່ໄຊຊະນະອື່ນ.
ໃນການຕໍ່ຕ້ານຕ້ານພວກຮຸກຮານ, ພັກເຮົາແລະປະທານໂຮ່ຈີມິນ ໄດ້ເປີດຂະບວນການແຂ່ງຂັນຮັກຊາດຫຼາຍໆບັ້ນທີ່ບັນລຸປະສິດທິຜົນຕົວຈິງຈຳນວນຫຼາຍ. ໃນແນວໜ້າ, ບັນດານັກຮົບໄດ້ແຂ່ງຂັນສູ້ຮົບສ້າງຜົນງານ, ຢູ່ແນວຫຼັງ, ປະຊາຊົນໄດ້ແຂ່ງຂັນອອກແຮງເພີ່ມພູນຜະລິດຜົນເກັ່ງ ເພື່ອດັບສູນສັດຕູແຫ່ງຄວາມອຶດຫິວ, ດັບສູນສັດຕູແຫ່ງຄວາມໂງ່ຈ້າຫຼ້າຫຼັວ ພ້ອມທັງດັບສູນສັດຕູຜູ້ຮຸກຮານ. ບັນດາຂະບວນການ “ສາມກຽມພ້ອມ”, “ສາມຮັບພາລະ”, “ຫ້າຕະລຸມບອນ”, “ກຽມຄວາມພ້ອນໄປທຸກບ່ອນ, ເຮັດທຸກວຽກທີ່ປະເທດຊາດຕ້ອງການ”, “ແຕ່ລະຄົນເຮັດວຽກເທົ່າກັບສອງຄົນ, ເພື່ອພີ່ນ້ອງຮ່ວມຊາດພາກໃຕ້ທີ່ຮັກແພງ”…ໄດ້ກາຍເປັນກຳລັງໜູນທີ່ແຂງແຮງ ແລະເປັນການກະທຳປະຕິວັດທີ່ແທ້ຈິງ ເພື່ອປະກອບສ່ວນນຳເອົາການຕໍ່ຕ້ານທົ່ວປວງຊົນ, ຮອບດ້ານຕ້ານພວກຮຸກຮານ ໄປສູ່ໄຊຊະນະທີ່ສົມບຸນ ເຊິ່ງຍອດສູງແມ່ນ ໄຊຊະນະດ້ຽນບຽນຝູທີ່ເປັນປະຫວັດສາດ ປີ 1954 ແລະ ໄຊຊະນະທີ່ຍິ່ງໃຫຍ່ໃນລະດູບານໃໝ່ ປີ 1975.
ໃນພາລະກິດແຫ່ງການປ່ຽນແປງໃໝ່ ກໍ່ສ້າງແລະປົກປັກຮັກສາປະເທດຊາດ, ບັນດາຂະບວນການແຂ່ງຂັນໄດ້ຫັນເຂົ້າສູ່ການແກ້ໄຂບັນດາໜ້າທີ່ອັນຫຍຸ້ງຍາກທີ່ສຸດຂອງທົ່ວປະເທດ ແລະຂອງແຕ່ລະທ້ອງຖິ່ນ, ສຳນັກງານອົງການ, ກົມກອງ. ນັ້ນແມ່ນ, ຊຸກຍູ້ການພັດທະນາເສດຖະກິດ-ສັງຄົມ, ພາໃຫ້ປະເທດພົ້ນອອກຈາກການວິກິດທາງດ້ານເສດຖະກິດ-ສັງຄົມ ແລະ ສະຖານະການດ້ອຍພັດທະນາ, ກາຍເປັນປະເທດກຳລັງພັດທະນາ ທີ່ມີລາຍຮັບປານກາງ; ຮັບປະກັນສະຫວັດດີການສັງຄົມ, ປັບປຸງການປ້ອງຊາດ, ປ້ອງກັນຄວາມສະຫງົບ, ຮັກສາສິດອະທິປະໄຕແຫ່ງຊາດຢ່າງໝັ້ນຄົງ, ຕັ້ງໜ້າ ເປັນເຈົ້າການໃນການເຊື່ອມໂຍງສາກົນ. ໃນຊຸມປີທີ່ຜ່ານມາມໍ່ນີ້, ຫົວຂໍ້ “ສາມັກຄີກ, ມີຫົວຄິດປະດິດສ້າງ, ແຂ່ງຂັນກໍ່ສ້າງ ແລະ ປົກປັກຮັກສາປະເທດຊາດ” ທີ່ໄດ້ຖືກຂະແໜງການ ຂັ້ນຕ່າງໆ ສະໜັບສະໜູນຢ່າງຕັ້ງໜ້າ, ດ້ວຍຫຼາຍຂະບວນການແຂ່ງຂັນທີ່ລະອຽດ, ລຽນຕິດຕໍ່ເນື່ອງ, ແທ້ຈິງ, ມີຜົນສະທ້ອນແຜ່ລາມຢ່າງທົ່ວເຖິງໃນທຸກຂົງເຂດ, ປະກອນສ່ວນເຂົ້າໃນການລະດົມແຫຼ່ງພະລັງສັງຄົມເປັນຈຳນວນຫຼາຍ ໃຫ້ແກ່ການກໍ່ສ້າງແລະປົກປັກຮັກສາປະເທດຊາດ. ອັນທີ່ດີເດັ່ນແມ່ນ ບັນດາຂະບວນການ: “ອອກແຮງງານເກັ່ງ, ອອກແຮງງານແບບມີຫົວຄິດປະດິດສ້າງ”, “ແຂ່ງຂັນເພື່ອຍາດເອົາໄຊຊະນະຢ່າງເດັດຂາດ”, “ເພື່ອຄວາມສະຫງົບແຫ່ງຊາດ”, “ສອນດີແລະຮຽນດີ”, “ຂົນຂວາຍມາຫາຊົນຢ່າງສະຫຼາດຄ່ອງແຄ້ວ”; ພິເສດແມ່ນ 3 ຂະບວນການແຂ່ງຂັນທີ່ເປັນຈຸດໜັກໃຈກາງຄື: “ທົ່ວປະເທດຮ່ວມແຮງກໍ່ສ້າງຊົນນະບົດໃໝ່”, “ວິສາຫະກິດຫວຽດນາມເຊື່ອມໂຍງ ແລະພັດທະນາ”, “ທົ່ວປະເທດຮ່ວມມືເພື່ອຄົນທຸກຍາກ-ບໍ່ໃຫ້ໃຜຖືກປະໄວ້ຢູ່ເບື້ອງຫຼັງ”,…
ໃນຂະບວນການແຂ່ງຂັນໄດ້ປະກົດມີແບບຢ່າງທີ່ດີເດັ່ນແລະກ້າວໜ້າຫຼາຍແບບຢ່າງໃນບັນດາຂົງເຂດຂອງຊີວິດສັງຄົມ, ດ້ວຍຫຼາຍຫົວຂໍ້ຄົ້ນຄວ້າ, ຄວາມຄິດລິເລີ່ມ ແລະມາດຕະການທີ່ມີຜົນປະໂຫຍດ, ນຳເອົາຜົນປະໂຫຍດມາໃຫ້ລັດ ແລະ ສັງຄົມເປັນຫຼາຍພັນຕື້ດົ່ງ; ມີຫຼາຍຮູບແບບ, ມາດຕະການຖືກນຳໃຊ້ຢ່າງກວ້າງຂວາງ ມີຜົນສະທ້ອນແຜ່ລາມໃນທົ່ວປະເທດ, ເຖິງປະຊາຊົນທຸກຊັ້ນຄົນ. ພວກເຮົາຮູ້ສຶກປະທັບໃຈແລະພາກພູມໃຈຢ່າງແທ້ຈິງກ່ຽວກັບວຽກງານ ການກະທຳອັນສູງສົ່ງ ຂອງບັນດານັກຮົບວິລະຊົນ, ນັກຮົບແຂ່ງຂັນ, ຜູ້ເປັນແບບຢ່າງກ້າວໜ້າ ທີ່ໄດ້ກ່າວໃນບົດລາຍງານຂອງສະພາການແຂ່ງຂັນ-ຍ້ອງຍໍຊົມເຊີຍສູນກາງ ພ້ອມທັງໃນຟິມຮູບເງົາ ແລະເລື່ອງລາວອັນລະອຽດ ມີຊີວິດຊີວາ ກ່ຽວກັບບັນດາແບບຢ່າງກ້າວໜ້າ ທີ່ຫາກໍ່ໄດ້ແລກປ່ຽນ ຊົມເຊີຍໃນມື້ນີ້. ການກະທຳອັນສູງສົ່ງຂອງບັນດານັກຮົບວິລະຊົນ, ນັກຮົບແຂ່ງຂັນ, ຜູ້ເປັນແບບຢ່າງກ້າວໜ້າ ໄດ້ຕັກເຕືອນໃຫ້ທຸກຄົນ, ພິເສດແມ່ນພະນັກງານ, ລັດຖະກອນ ຕ້ອງຍົກສູງຄວາມຮັບຜິດຊອບ, ຕັ້ງອົກຕັ້ງໃຈໃນການປະຕິບັດວຽກງານ, ຍົກສູງປະສິດທິຜົນຂອງວຽກງານ, ຮັບໃຊ້ປະເທດຊາດ, ຮັບໃຊ້ປະຊາຊົນຢ່າງສຸດໃຈ, ຕໍ່ສູ້ຕ້ານການສໍ້ລາດບັງຫຼວງ, ການຟຸມເຟືອຍ, ພະຍາດອາດຍາສິດ, ຫ່າງເຫີນປະຊາຊົນ, ຕ້ານການລະເມີດສິດແລະຜົນປະໂຫຍດອັນຊອບທຳຂອງປະຊາຊົນ. ຂ້າພະເຈົາເຊື່ອໝັ້ນວ່າ, ຮ່ວມທາງພ້ອມກັບຜູ້ເປັນແບບຢ່າງກ້າວໜ້າ 700 ຄົນທີ່ມາຮ່ວມງານພົບປະໃນມື້ນີ້, ຍັງມີຜູ້ເປັນແບບຢ່າງທີ່ງຽບສະຫງົບຫຼາຍຄົນອີກ ທີ່ກຳລັງອຸທິດເຫື່ອແຮງສະຕິປັນຍາໃນທຸກຂົງເຂດ ທຸກແຫ່ງຫົນຂອງປະເທດຊາດ, ໃນປະຊາຊົນພົນລະເມືອງທຸກຊັ້ນວັນນະ, ນັບທັງຊາວຫວຽດນາມທີ່ກຳລັງດຳລົງຊີວິດ, ອອກແຮງງານ, ຮ່ຳຮຽນຢູ່ຕ່າງປະເທດ ທີ່ບໍ່ມີເງື່ອຍໄຂມາຮ່ວມໃນພິທີທີ່ຄຶກຄື້ນນີ້.
ຕາງໜ້າໃຫ້ການນຳພັກແລະລັດ, ຂ້າພະເຈົ້າຂໍອວຍພອນໄຊອັນອົບອຸ່ນ, ຂໍສະແດງຄວາມຄຳນັບ ການຕີລາຄາສູງ ແລະຊົມເຊີຍຢ່າງສຸດໃຈ ຕໍ່ບັນດານັກຮົບວິລະຊົນ, ນັກຮົບແຂ່ງຂັນ, ບັນດາແບບຢ່າງກ້າວໜ້າໃນທົ່ວປະເທດ. ຂ້າພະເຈົ້າກໍ່ສະແດງຄວາມຊົມເຊີຍ, ຂອບອົກຂອບໃຈຕໍ່ສະພາແຂ່ງຂັນ-ຍ້ອງຍໍຊົມເຊີຍສູນກາງ, ບັນດາກະຊວງ, ຂະແໜງການ, ທ້ອງຖິ່ນ ແລະປະຊາຊົນທົ່ວປະເທດ ທີ່ໄດ້ຕັ້ງໜ້າ, ເປັນເຈົ້າການ, ປະດິດສ້າງ ແລະມີສ່ວນປະກອບຫຼາຍຢ່າງ ເພື່ອຊຸກຍູ້ຂະບວນການແຂ່ງຂັນຮັກຊາດ, ສ້າງຜົນງານອັນໃຫຍ່ຫຼວງທາງດ້ານເສດຖະກິດ-ສັງຄົມ, ປັບປຸງການປ້ອງກັນຊາດ, ປ້ອງກັນຄວາມສະຫງົບ, ກໍ່ສ້າງລະບົບການເມືອງ ແລະປົກປັກຮັກສາສິດອະທິປະໄຕແຫ່ງຊາດຢ່າງໝັ້ນຄົງ ໃນຊຸມປີທີ່ຜ່ານມາ.
ຄຽງຄູ່ກັບບັນດາຜົນງານອັນໃຫຍ່ຫຼວງທີ່ບັນລຸໄດ້ນັ້ນ, ພວກເຮົາກໍ່ຕ້ອງຮັບຮູ້ຢ່າງກົງໄປກົງມາວ່າ, ຂະບວນການແຂ່ງຂັນ ແລະວຽກງານຍ້ອງຍໍຊົມເຊີຍຍັງມີຂໍ້ຈຳກັດ, ສິ່ງຄົງຄ້າງຫຼາຍຢ່າງ. ຂະບວນການແຂ່ງຂັນເຖິງວ່າໄດ້ຂະຫຍາຍຕົວຢ່າງເລິກເຊິ່ງກວ້າງຂວາງກໍ່ຕາມ ແຕ່ກໍ່ຍັງບໍ່ທັນຮອບດ້ານ; ຂະບວນການຢູ່ຫຼາຍບ່ອນຍັງມີລັກສະນະຮູບນອກ, ບໍ່ມີການຕິດພັນຢ່າງແໜ້ນແຟ້ນກັບໜ້າທີ່ການເມືອງ. ການຍົກຍ້ອງ ມອບນາມມະຍົດການແຂ່ງຂັນ ແລະ ຮູບການຍ້ອງໃຫ້ລາງວັນຍັງມີປະກົດການຈົ່ງຈຽມ ງ່າຍດາຍ, ຍັງມີສະພາບການ “ວິ້ງເຕັ້ນຫາຜົນງານ”, “ວິ້ງເຕັ້ນຫາການຍ້ອງຍໍຊົມເຊີຍ”, “ວິ້ງເຕັ້ນຫາຫຼຽນໄຊ” ຢູ່ຫຼາຍແຫ່ງ; ການຍ້ອງຍໍຊົມເຊີຍຜູ້ອອກແຮງງານທຳການຜະລິດໂດຍກົງ, ຊາວກະສິກອນ, ກຳມະກອນ ໄດ້ຮັບຄວາມເອົາໃຈໃສ່ກວ່າແຕ່ກ່ອນ ແຕ່ກໍ່ຍັງໜ້ອຍ. ການຄົ້ນເຜີຍ, ບຳລຸງສ້າງແບບຢ່າງ, ການສະຫຼຸບແລະແຜ່ຂະຫຍາຍແບບຢ່າງທີ່ກ້າວໜ້າ ມີປະສິດທິຜົນຕ່ຳ; ວຽກງານໂຄສະນາຍັງບໍ່ຄົບຊຸດ, ບໍ່ມີຊີວິດຊີວາ, ຂາດຄວາມຊວນເຊື່ອປະທັບໃຈ ເຊິ່ງເປັນການຈຳກັດກຳລັງໜູນທີ່ຊຸກຍູ້ການສູ້ຊົນຂອງໝູ່ຄະນະແລະບຸກຄົນ. ບັນດາຂໍ້ຈຳກັດ, ສິ່ງຄົງຄ້າງດັ່ງກ່າວຕ້ອງໄດ້ຮັບການທອດຖອນບົດຮຽນຢ່າງເຂັ້ນງວດ ແລະແກ້ໄຂຢ່າງທັນເວລາ.
ສະພາແຂ່ງຂັນ-ຍ້ອງຍໍຊົມເຊີນແຕ່ສູນກາງຈົນຮອດພື້ນຖານ, ຜູ້ເປັນຫົວໜ້າຄະນະພັກ, ອຳນາດການປົກຄອງ, ອົງການຈັດຕັ້ງແລະພະນັກງານທີ່ປະຕິບັດວຽກງານແຂ່ງຂັນ, ຍ້ອງຍໍຊົມເຊີຍ ຕ້ອງມີຄວາມຄິດຫງຳຢ່າງເລິກເຊິ່ງ, ຍົກສູງຄວາມຮັບຜິດຊອບ, ສືບຕໍ່ປ່ຽນແປງໃໝ່ໃນວຽກງານການຊີ້ນຳນຳພາ, ການໃຫ້ຄຳປຶກສາແລະຈັດຕັ້ງປະຕິບັດ ເພື່ອວຽກງານແຂ່ງຂັນ, ຍ້ອງຍໍຊົມເຊີຍເປັນວິທີການນຳພາຂອງພັກຢ່າງແທ້ຈິງ, ເປັນວິທີການຄຸ້ມຄອງໜຶ່ງຂອງອຳນາດການປົກຄອງ ແລະ ເປັນກຳລັງໜູນເພື່ອກໍ່ສ້າງຄົນຮຸ່ນໃໝ່, ກໍ່ສ້າງແລະປົກປັກຮັກສາປະເທດຊາດ.
ຮຽນບັນດາສະຫາຍ,
ປະເທດຫວຽດນາມກຳລັງຢືນຕໍ່ໜ້າຄວາມຮຽກຮ້ອງຕ້ອງການແລະໜ້າທີ່ໃໝ່ ດ້ວຍບັນດາໂອກາດ, ຄວາມສະດວກ ແລະ ຄວາມຫຍຸ້ງຍາກສິ່ງທ້າທາຍໃໝ່ທີ່ແຊກຊ້ອນກັນ. ພາລະກິດແຫ່ງການປ່ຽນແປງໃໝ່, ກໍ່ສ້າງແລະພັດທະນາປະເທດກຳລັງຫັນໄປສູ່ໄລຍະໃໝ່ທີ່ສູງກວ່າ, ນັບມື້ນັບເຂົ້າສູ່ລວງເລິກ, ມີແງ່ຫວັງດີງາມຫຼາຍຢ່າງ ແຕ່ກໍ່ມີຄວາມຫຍຸ້ງຍາກ ຄວາມສັບສົນຫຼາຍກວ່າທຽບກັບໄລຍະກ່ອນ. ເພື່ອເສີມຂະຫຍາຍຜົນສຳເລັດ, ຜົນງານທີ່ບັນລຸໄດ້, ຍູ້ແຮງແລະປະຕິບັດຂະບວນການແຂ່ງຂັນຮັກຊາດ ແລະ ວຽກງານຍ້ອງຍໍຊົມເຊີຍໃຫ້ດີກວ່າອີກ, ເພື່ອຕອບສະໜອງຄວາມຮຽກຮ້ອງຕ້ອງການແລະໜ້າທີ່ຂອງການປະຕິວັດໃນເວລາຕໍ່ໜ້າ, ຂ້າພະເຈົ້າຂໍສະເໜີໃຫ້ສະຫາຍ, ປະຊາຊົນ, ນັກຮົບທຸກໆຄົນໃນທົ່ວປະເທດ ຈົ່ງສືບຕໍ່ເຊື່ອມຊືມຢ່າງເລິກເຊິ່ງ ແລະປະຕິບັດແນວຄິດໂຮ່ຈີມິນກ່ຽວກັບການແຂ່ງຂັນຮັກຊາດໃຫ້ໄດ້ເປັນຢ່າງດີ, ເຮັດໃຫ້ວຽກງານແຂ່ງຂັນຕິດກັບວຽກງານໃນປະຈຳວັນຂອງແຕ່ລະຄົນ ຄືຄຳສັ່ງສອນຂອງລຸງ ໂຮ່. ລະອຽດຄື, ພວກເຮົາຕ້ອງສຸມໃສ່ເຮັດບາງວຽກທີ່ຈຳເປັນລຸ່ມນີ້ໃຫ້ໄດ້ເປັນຢ່າງດີ:
ທີໜຶ່ງ, ສືບຕໍ່ໂຄສະນາ, ເຊື່ອມຊືມແລະຈັດຕັ້ງປະຕິບັດໃຫ້ມີປະສິດທິຜົນ ບັນດາແນວນະໂຍບາຍຂອງພັກ, ນະໂຍບາຍ ກົດໝາຍຂອງລັດ ກ່ຽວກັບການແຂ່ງຂັນ, ຍ້ອງຍໍຊົມເຊີຍ. ບັນດາຄະນະພັກ, ອົງການຈັດຕັ້ງຂອງພັກ, ຜູ້ເປັນຫົວໜ້າຂອງອົງການ, ກົມກອງ ຕ້ອງມີການຊີ້ນຳໂດຍກົງ, ຈັດຕັ້ງຂະບວນການແຂ່ງຂັນ, ຮັບປະກັນຄວາມແທດຈິງ, ຫັນວຽກງານແຂ່ງຂັນສູ່ການປະຕິບັດບັນດາໜ້າທີ່ຈຸດສຸມໃຈກາງ, ບັນດາຂອດບຸກທະລຸ, ສຸມໃສ່ແກ້ໄຂບັນດາໜ້າທີ່ທີ່ຫຍຸ້ງຍາກ, ບັນດາບັນຫາເຄັ່ງຮ້ອນ ພົ້ນເດັ່ນ, ຈຸດສຸມແມ່ນການພັດທະນາເສດຖະກິດຢ່າງວ່ອງໄວ, ຍືນຍົງ; ກໍ່ສ້າງພັກ, ກໍ່ສ້າງລະບົບການເມືອງທີ່ສະອາດປອດໃສເຂັ້ມແຂງ ຕິດກັບການປະຕິບັດຄຳສັ່ງເລກທີ 05-CT/TW, ສະບັບລົງວັນທີ 15 ພຶດສະພາ 2016, ຂອງກົມການເມືອງສູນກາງພັກສະໄໝທີ XII ກ່ຽວກັບ ຍູ້ແຮງການຮ່ຳຮຽນ ແລະປະຕິບັດຕາມແນວຄິດ ແລະຄຸນສົມບັດ, ແບບແຜນໂຮ່ຈີມິນ. ສືບຕໍ່ແຜ່ຂະຫຍາຍບັນດາຂະບວນການແຂ່ງຂັນປະຕິບຮູບດ້ານບໍລິຫານ, ເພີ່ມທະວີລະບຽບວິໄນ ກົດໝາຍ; ຍູ້ແຮງການປ້ອງກັນແລະຕ້ານການສໍ້ລາດບັງຫຼວງ, ການຟຸມເຟືອຍ; ຍົກສູງປະສິດທິຜົນຂອງການເຄື່ອນໄຫວພົວພັນຕ່າງປະເທດ, ເຊື່ອມໂຍງສາກົນ; ກໍ່ສ້າງພື້ນຖານວັດທະນະທຳຫວຽດນາມທີ່ກ້າວໜ້າ, ເຕັມໄປດ້ວຍເອກະລັກປະຈຳຊາດ; ກໍ່ສ້າງຄົນຫວຽດນາມໃຫ້ເປັນຄົນທີ່ມີຄວາມຮັກຊາດ, ມີເມດຕາ, ມະນຸດສະທຳ, ພັດທະນາຢ່າງສົມບຸນ,... ພະນັກງານສະມາຊິກພັກແຕ່ລະຄົນ, ເປັນຕົ້ນແມ່ນຜູ້ທີ່ເປັນຫົວໜ້າຂອງບັນດາຂັ້ນ, ຂະແໜງການ, ອົງການຈັດຕັ້ງ, ກົມກອງ, ຕ້ອງເສີມຂະຫຍາຍໃຫ້ໄດ້ເປັນຢ່າງດີ ພາລະບົດບາດເປັນແບບຢ່າງ, ເປັນແກນນຳທີ່ແທ້ຈິງ, ເປັນຄັນທຸງທີ່ນຳໜ້າໃນບັນດາຂະບວນການແຂ່ງຂັນ.
ທີສອງ, ກໍ່ສ້າງແຜນການແລະມີມາດຕະການຢ່າງລະອຽດ ເພື່ອສ້າງບາດກ້າວຫັນປ່ຽນຢ່າງແຂງແຮງໃນວຽກງານແຂ່ງຂັນ, ຍ້ອງຍໍຊົມເຊີຍ. ຂະບວນການແຂ່ງຂັນຕ້ອງແທດຈິງ, ນຳເອົາຜົນປະໂຫຍດລະອຽດຕົວຈິງມາໃຫ້ປະເທດ ສັງຄົມແລະປະຊາຊົນ; ປຸກຕື່ນຈິດໃຈຕື່ນຕົວ, ສະຕິຮັບຜິດຊອບ, ລັກສະນະຕັ້ງໜ້າດ້ານການເມືອງ-ສັງຄົມຂອງປະຊາຊົນ, ຂອງບັນດາຂັ້ນ, ບັນດາຂະແໜງການ, ບັນດາພາກສ່ວນເສດຖະກິດ, ສ້າງກຳລັງໜູນດ້ານຈິດໃຈ, ວັດຖຸໃໝ່ໃຫ້ແກ່ພາລະກິດແຫ່ງການກໍ່ສ້າງ ແລະປົກປັກຮັກສາປະເທດຊາດ. ທຸກຄົນແຂ່ງຂັນ, ທຸກຂະແໜງການແຂ່ງຂັນ, ສູ້ຊົນເພື່ອໃຫ້ຫວຽດນາມເປັນປະເທດທີ່ປະຊາຊົນທີ່ຮັ່ງມີ, ປະເທດຊາດເຂັ້ມແຂງ ມີປະຊາທິປະໄຕ ຍຸຕິທຳ ສີວິໄລ, ເພື່ອຄວາມຜາສຸກຂອງປະຊາຊົນ ຊຶ່ງຕ້ອງກາຍເປັນເຈດຈຳນົງ, ຄວາມຕັດສິນໃຈ, ຄວາມຮັກແລະການກະທຳຂອງທຸກຄົນ.
ທີສາມ, ໃນການຈັດຕັ້ງຜັນຂະຫຍາຍບັນດາຂະບວນການ, ຕ້ອງເພີ່ມທະວີການກວດກາ, ຕີລາຄາ, ສະຫຼຸບເບື້ອງຕົ້ນ, ສະຫຼຸບສັງລວມ ແລະປ່ຽນແປງໃໝ່ ການຊົມເຊີຍ ຍ້ອງຍໍສັນລະຢ່າງແຂງແຮງ. ລຸງໂຮ່ ໄດ້ເວົ້າວ່າ: “ແຂ່ງຂັນແມ່ນການປູກຝັງ, ຍ້ອງຍໍໃຫ້ລາງວັນແມ່ນການເກັບກ່ຽວ”. ການຊົມເຊີຍ, ຍ້ອງຍໍໃຫ້ລາງວັນຕ້ອງທັນການ, ມີຈິດໃຈເຫັນແກ່ປະໂຫຍດສ່ວນລວມ, ພາວະວິໄສ, ຍຸດຕິທຳ, ໂປ່ງໃສ, ຖືກຄົນ, ຖືກວຽກ, ເອົາປະສິດທິຜົນດ້ານເສດຖະກິດ ຜົນສຳເລັດແຫ່ງການປະຕິບັດໜ້າທີ່ການເມືອງເປັນເຄື່ອງວັດແທກ; ເອົາໃຈໃສ່ການຍ້ອງຍໍໃຫ້ລາງວັນແກ່ກຳມະກອນ, ຊາວນາ, ຜູ້ອອກແຮງງານຜະລິດໂດຍກົງ, ຜູ້ເຮັດວຽກໂດຍກົງ.
ທີສີ່, ເພີ່ມທະວີວຽກງານຄົ້ນເຜີຍ, ບຳລຸງສ້າງ, ໂຄສະນາກ່ຽວກັບບັນດາແບບຢ່າງລວມໝູ່, ບຸກຄົນທີ່ດີເດັ່ນ, ພິເສດແມ່ນບັນດາປັດໄຈໃໝ່, ເພື່ອປຸກລະດົມ, ຍົກເປັນແບບຢ່າງ, ແຜ່ຂະຫຍາຍໃນທົ່ວສັງຄົມ, ສ້າງກຳລັງໜູນໃຫ້ແກ່ການພັດທະນາ ແລະເຜີຍແຜ່ຢ່າງເລິກເຊິ່ງກວ້າງຂວາງ ໃນແຕ່ລະກົມກອງ, ພື້ນຖານ. ແບບຢ່າງກ້າວໜ້າຕ້ອງມີຄວາມດຶງດູດຊວນເຊື່ອ, ໄດ້ຮັບຄວາມນິຍົມນັບຖືຢ່າງແຂງແຮງຄື ປະທານໂຮ່ຈີມິນ ໄດ້ສັ່ງສອນ: “...ແບບຢ່າງທີ່ມີຊີວິດໜຶ່ງ ມີຄຸນຄ່າກວ່າບົດປາໄສໂຄສະນາເປັນຮ້ອຍບົດ”(4). ບັນດາຂັ້ນ, ບັນດາຂະແໜງການ, ອົງການສື່ຂ່າວໜັງສືພິມຕ້ອງເອົາໃຈໃສ່, ອຳນວຍຄວາມສະດວກ ເພື່ອຈັດຕັ້ງວຽກງານຮ່ຳຮຽນ, ແຜ່ຂະຫຍາຍແບບຢ່າງກ້າວໜ້າໃຫ້ໄດ້ເປັນຢ່າງດີ. ຜ່ານນັ້ນ, ພັດທະນາ, ລະດົມສົ່ງເສີມບັນດາຂະບວນການແຂ່ງຂັນຢ່າງແຂງແຮງ.
ທີຫ້າ, ຍົກສູງຄວາມສາມາດ, ປະສິດທິພາບ, ປະສິດທິຜົນໃນການຄຸ້ມຄອງຂອງລັດຕໍ່ວຽກງານແຂ່ງຂັນ, ຍ້ອງຍໍໃຫ້ລາງວັນ. ສຸມໃສ່ການກວດຄືນ, ປັບປຸງ, ບູລະນະລະບົບນະໂຍບາຍ, ກົດໝາຍກ່ຽວກັບການແຂ່ງຂັນ, ຍ້ອງຍໍຊົມເຊີຍ, ຮັບປະກັນຄວາມຄົບຊຸດ, ເປັນເອກະພາບ. ຕໍ່ໜ້າ, ຕ້ອງສຸມໃສ່ປັບປຸງກົດໝາຍວ່າດ້ວຍການແຂ່ງຂັນ, ຍ້ອງຍໍຊົມເຊີຍໃຫ້ເໝາະສົມກັບສະພາບຕົວຈິງ ແລະລຳດັບການດຳເນີນການປ່ຽນແປງໃໝ່ ແລະ ເຊື່ອມໂຍງສາກົນຂອງປະເທດ. ພ້ອມທັງ, ຕ້ອງສືບຕໍ່ປັບປຸງອົງການຈັດຕັ້ງ, ກົງຈັກ ແລະ ພະນັກງານຕາມທິດກະທັດລັດ, ເຄື່ອນໄຫວມີປະສິດທິພາບ, ປະສິດທິຜົນ, ເປັນເອກະພາບແຕ່ສູນກາງຈົນຮອດທ້ອງຖິ່ນ. ເອົາໃຈໃສ່ເຖິງການກໍ່ສ້າງ, ບຳລຸງສ້າງວິຊາການ, ວິຊາສະເພາະ ເພື່ອກໍ່ສ້າງຖັນແຖວພະນັກງານປະຕິບັດວຽກງານແຂ່ງຂັນ, ຍ້ອງຍໍຊົມເຊີຍທີ່ມີຄຸນສົມບັດສິນທຳດີ, ມີຄວາມສາມາດຕົວຈິງ, ຊຳນີຊຳນານດ້ານວິຊາການ, ຮູ້ການຂົນຂວາຍປະຊາຊົນ ແລະ ອົງການຈັດນຕັ້ງໃນຂະບວນການແຂ່ງຂັນ, ຍ້ອງຍໍຊົມເຊີຍ, ເປັນທີ່ປຶກສາ, ສະເໜີໃຫ້ພັກແລະລັດ ກ່ຽວກັບແຜນນະໂຍບາຍ, ນະໂບາຍຕ່າງໆກ່ຽວກັບການແຂ່ງຂັນ, ຍ້ອງຍໍຊົມເຊີຍທີ່ເໝາະສົມກັບໄລຍະໃໝ່ ຢ່າງທັນການ, ເພື່ອປະກອບສ່ວນເພີມພູນຄຸນສ້າງ ແລະປັບປຸງກຸ່ມກ້ອນສາມັກຄີປວງຊົນທັງຊາດ, ເພີ່ມທະວີຄວາມສາມັກຄີ ມິດຕະພາບ ແລະຮ່ວມມືກັບບັນດາປະເທດໃນພາກພື້ນ ແລະ ໃນໂລກ.
ຮຽນບັນດາສະຫາຍ,
ການສະເຫຼີມສະຫຼອງວັນທີ່ປະທານໂຮ່ຈີມິນ ອອກຄຳຮຽກຮ້ອງແຂ່ງຂັນຮັກຊາດ ຄົບຮອບ 70 ປີໃນມື້ນີ້ເປັນໂອກາດດີເພື່ອໃຫ້ພວກເຮົາສະແດງຄວາມນັບຖື ແລະຄວາມຮູ້ບຸນຄຸນທີ່ບໍ່ມີຂອບເຂດຕໍ່ປະທານໂຮ່ຈີມິນ ຜູ້ຍິ່ງໃຫຍ່. ປະທານໂຮ່ຈີມິນ ບໍ່ພຽງແຕ່ເປັນຜູ້ລິເລີ່ມ ແລະປຸກຕື່ນບັນດາຂະບວນການແຂ່ງຂັນເທົ່ານັ້ນ ຫາກຍັງເປັນແບບຢ່າງ, ເປັນແຫຼ່ງປຸກລະດົມສົ່ງເສີມອັນຍິ່ງໃຫຍ່ ໃຫ້ແກ່ບັນດາຂະບວນການແຂ່ງຂັນ. ຄຳຮຽກຮ້ອງແຂ່ງຂັນຮັກຊາດ ເວົ້າສະເພາະ ແລະແນວຄິດໂຮ່ຈີມິນກ່ຽວກັບການແຂ່ງຂັນຮັກຊາດເວົ້າລວມ ມາຮອດປັດຈຸບັນຍັງຄົງມີຄວາມໝາຍປະຫວັດສາດຢູ່, ມີຄຸນຄ່າທິດສະດີ ແລະພຶດຕິກຳທີ່ເລິກເຊິ່ງ, ມີກຳລັງຊີວິດຢ່າງແຂງແຮງໃນພາລະກິດແຫ່ງການກໍ່ສ້າງ ແລະປົກປັກຮັກສາປະເທດຊາດຂອງພວກເຮົາ.
ບົນພື້ນຖານໝູນໃຊ້ຢ່າງປະດິດສ້າງ ບັນດາບົດຮຽນກ່ຽວກັບການແຂ່ງຂັນຮັກຊາດທີ່ຖອດຖອນມາໄດ້ໃນ 70 ປີທີ່ຜ່ານມາ, ພວກເຮົາເຊື່ອໝັ້ນວ່າ, ດ້ວຍການປະຕິບັດຢ່າງຕັ້ງໜ້າ, ເດັດດ່ຽວຂອງຄະນະພັກ, ອຳນາດການປົກຄອງ, ແນວໂຮມປະເທດຊາດຂັ້ນຕ່າງໆ, ບັນດາອົງການຈັດຕັ້ງການເມືອງ-ສັງຄົມ ແລະການສະໜັບສະໜູນຢ່າງກວ້າງຂວາງຂອງປະຊາຊົນ, ຂະບວນການແຂ່ງຂັນ ແລະວຽກງານຊົມເຊີຍຍ້ອງຍໍໃຫ້ລາງວັນໃນເວລາຕໍ່ໄປຈະມີການຫັນປປ່ຽນ ແລະປ່ຽນແປງໃໝ່ຢ່າງແຂງແຮງ ແລະແທ້ຈິງ.
ຂໍອວຍພອນຂະບວນການແຂ່ງຂັນຂອງທົ່ວປະເທດສືບຕໍ່ໄດ້ຮັບການພັດທະນາ ແລະບັນລຸຜົນງານອັນໃຫຍ່ຫຼວງກວ່າອີກ!
ຂໍອວຍພອນບັນດາສະຫາຍແລະຜູ້ແທນທຸກຄົນ ຈົ່ງມີສຸຂະພາບເຂັ້ມແຂງ, ມີຄວາມສຸກ ແລະປະສົບຜົນສຳເລັດໃນທຸກໜ້າທີ່ການງານ!
ໂດຍ ຫງວຽນຝູຈ້ອງ
ເລຂາທິການໃຫຍ່ຄະນະບໍລິຫານງານສູນກາງ ພັກກອມມູນິດຫວຽດນາມ
------------------
* ຫົວຂໍ້ໂດຍວາລະສານກອມມູນິດເປັນຜູ້ແຕ່ງ.
(1) ໂຮ່ຈີມິນ: ນິພົນຄົບຊຸດ, ສພຈ. ການເມືອງແຫ່ງຊາດ-ຊື້ເທີດ, ຮ່າໂນ້ຍ, 2011, ເຫຼັ້ມ 7, ໜ້າ 407.
(2), (3) ໂຮ່ຈີມິນ: ນິພົນຄົບຊຸດ, ປຶ້ມທີ່ໄດ້ແນະນຳ, ເຫຼັ້ມ 5, ໜ້າ 556, 558
(4) ໂຮ່ຈີມິນ: ນິພົນຄົບຊຸດ, ປຶ້ມທີ່ໄດ້ແນະນຳ, ເຫຼັ້ມ 1, ໜ້າ 284.
- ບົດນີ້ໄດ້ລົງພິມໃນວາລະສານກອມມູນິດ ສະບັບທີ 908 (ເດືອນມິຖຸນາ 2018).
