ເສີມຂະຫຍາຍບົດບາດຂອງແນວໂຮມປະເທດຊາດຫວຽດນາມ
ແລະບັນດາອົງການການເມືອງ-ສັງຄົມ ໃນການຕິດຕາມກວດກາ
ວຽກງານການຈັດຕັ້ງແລະພະນັກງານ
ແລະບັນດາອົງການການເມືອງ-ສັງຄົມ ໃນການຕິດຕາມກວດກາ
ວຽກງານການຈັດຕັ້ງແລະພະນັກງານ
ວກ. - ການຕິດຕາມກວດກາວຽກງານການຈັດຕັ້ງແລະພະນັກງານ ແມ່ນການເຄື່ອນໄຫວທີ່ສຳຄັນທີ່ສຸດ ເຊິ່ງໄດ້ຮັບການປະຕິບັດຢ່າງຕັ້ງໜ້າ ໂດຍແນວໂຮມປະເທດຊາດຫວຽດນາມ ແລະ ບັນດາອົງການການເມືອງ-ສັງຄົມ ເພື່ອປະກອບສ່ວນກໍ່ສ້າງພັກ ແລະ ລະບົບການເມືອງ ໃຫ້ສະອາດປອດໃສ ແລະໝັ້ນຄົງເຂັ້ມແຂງ. ໃນເວລາທີ່ຈະມາເຖິງ, ແນວໂຮມປະເທດຊາດຫວຽດນາມ ແລະ ບັນດາອົງການການເມືອງ-ສັງຄົມ ຈະສືບຕໍ່ປະຕິບັດ ແລະ ພະຍາຍາມຍົກສູງປະສິດທິຜົນ ຂອງການເຄື່ອນໄຫວທີ່ສຳຄັນນີ້ ເພື່ອໃຫ້ສົມກຽດກັບທີ່ຕັ້ງ ແລະ ບົດບາດໃນພາລະກິດການປະຕິວັດຂອງຊາດ.
ສະຫາຍນາງ ເຈືອງ ທິ ມາຍ, ກຳມະການກົມການເມືອງ, ເລຂາທິການສູນກາງພັກ, ຫົວໜ້າຄະນະຈັດຕັ້ງສູນກາງ ແລກປ່ຽນຄວາມຄິດເຫັນກັບສະຫາຍ ໂດ້ ວັນ ຈ້ຽນ, ເລຂາທິການສູນກາງພັກ, ປະທານຄະນະກຳມະການສູນກາງ ແນວໂຮມປະເທດຊາດຫວຽດນາມ ແລະ ບັນດາຜູ້ແທນ ໃນການເຮັດວຽກກັບຄະນະກຳມະການພັັກແນວໂຮມປະເທດຊາດຫວຽດນາມ _ພາບ: vietnamnet.vn
ເນື້ອໃນຕິດຕາມກວດກາວຽກງານການຈັດຕັ້ງແລະພະນັກງານ
ຂອງແນວໂຮມປະເທດຊາດຫວຽດນາມ ແລະ ບັນດາອົງການການເມືອງ-ສັງຄົມ
ແນວໂຮມປະເທດຊາດຫວຽດນາມແມ່ນພາກສ່ວນໜຶ່ງຂອງລະບົບການເມືອງ, ມີໜ້າທີ່ເຕົ້າໂຮມ, ກໍ່ສ້າງ ແລະ ເສີມຂະຫຍາຍກຳລັງແຮງມະຫາສາມັກຄີປວງຊົນຊາດ; ປະຕິບັດປະຊາທິປະໄຕ ແລະ ເພີ່ມທະວີຄວາມເຫັນດີເຫັນພ້ອມທາງສັງຄົມ; ເປັນຕົວແທນທີ່ປົກປ້ອງສິດແລະຜົນປະໂຫຍດອັນຊອບທໍາ ຖືກກົດໝາຍຂອງປະຊາຊົນ; ຕິດຕາມກວດກາແລະວິພາກວິຈານສັງຄົມ; ເຂົ້າຮ່ວມການກໍ່ສ້າງພັກ, ລັດ ແລະ ການເຄື່ອນໄຫວພົວພັນຕ່າງປະເທດປະຊາຊົນ ປະກອບສ່ວນກໍ່ສ້າງ ແລະ ປົກປັກຮັກສາປະເທດຊາດ; ປະກອບສ່ວນສ້າງຄວາມເຫັນດີເຫັນພ້ອມທາງສັງຄົມ ແລະ ເຊື່ອມໂຍງລະຫວ່າງພັກ, ລັດກັບປະຊາຊົນ.
ໂດຍຊາບຊຶມຄຳສັ່ງສອນຂອງປະທານໂຮ່ຈີມິນທີ່ວ່າ: ພະນັກງານແມ່ນກົກຮາກຂອງວຽກງານທັງໝົດ ດັ່ງນັ້ນ ພັກກອມມູນິດຫວຽດນາມ ຈຶ່ງໄດ້ອອກເອກະສານການນຳແລະຊີ້ນຳຫຼາຍສະບັບ ກ່ຽວກັບວຽກງານພະນັກງານ; ໃນນັ້ນ, ມີເອກະສານຫຼາຍສະບັບມອບໃຫ້ແນວໂຮມປະເທດຊາດຫວຽດນາມ ແລະ ບັນດາອົງການການເມືອງ-ສັງຄົມ ເຂົ້າຮ່ວມການຕິດຕາມກວດກາວຽກງານພະນັກງານ. ຈຸດທີ່ໜ້າສັງເກດແມ່ນ ໃນເອກະສານເຫຼົ່ານີ້ ຄະນະບໍລິຫານງານສູນກາງ, ກົມການເມືອງສູນກາງ, ຄະນະເລຂາທິການສູນກາງ ໄດ້ກຳນົດບົດບາດສຳຄັນຂອງແນວໂຮມປະເທດຊາດຫວຽດນາມ ແລະ ບັນດາອົງການການເມືອງ-ສັງຄົມ ໃນການຕິດຕາມກວດກາວຽກງານພະນັກງານ. ຄະນະປະຈຳຄະນະກຳມະການສູນກາງແນວໂຮມປະເທດຊາດຫວຽດນາມ (ຄະນະປະຈຳ) ໄດ້ປະສານສົມທົບກັບບັນດາອົງການການເມືອງ-ສັງຄົມ ເພື່ອອອກໂຄງການປະສານງານເລກທີ 30/CTPH-MTTW-TCTV, ລົງວັນທີ່ 30 ຕຸລາ 2018, “ກ່ຽວກັບການປະສານງານການຕິດຕາມກວດກາ ແລະ ການວິຈານສັງຄົມ ຂອງແນວໂຮມປະເທດຊາດຫວຽດນາມ, ບັນດາອົງການການເມືອງ-ສັງຄົມ ແລະ ປະຊາຊົນ ຕາມມະຕິກອງປະຊຸມຄັ້ງທີ 7 ຄະນະບໍລິຫານງານສູນກາງພັກ ຊຸດທີ XII”.
ໂຄງການປະສານງານໄດ້ກຳນົດຢ່າງຈະແຈ້ງເຖິງ ບັນດາບັນຫາທີ່ແນວໂຮມປະເທດຊາດຫວຽດນາມ ແລະ ບັນດາອົງການການເມືອງ-ສັງຄົມ ຈະສຸມໃສ່ຕິດຕາມກວດກາເຊັ່ນ: ຕິດຕາມກວດກາການຜັນຂະຫຍາຍປະຕິບັດກົດລະບຽບຂອງພັກ ແລະ ກົດໝາຍຂອງລັດກ່ຽວກັບວຽກງານພະນັກງານ; ຕິດຕາມກວດກາການປ່ຽນແປງໃໝ່, ກາຍົກສູງຄຸນນະພາບແລະປະສິດທິຜົນວຽກງານພະນັກງານ; ຕິດຕາມກວດກາການຜັນຂະຫຍາຍການກໍ່ສ້າງຖັນແຖວພະນັກງານທຸກຂັ້ນ ທີ່ມີຄຸນສົມບັດ, ຄວາມສາມາດ, ຊື່ສຽງພຽງພໍ ແລະ ຕອບສະໜອງຄວາມຕ້ອງການໃນໄລຍະໃໝ່; ການປະຕິບັດມາດຕະຖານ, ຂະບວນການ, ຂັ້ນຕອນແລະບັນທຶກບຸກຄະລາກອນ ຢ່າງເປີດເຜີຍແລະໂປ່ງໃສ; ສະໜອງຂໍ້ມູນ, ແລກປ່ຽນຂໍ້ມູນ ແລະ ອະທິບາຍງາຍງານເມື່ອຈຳເປັນ; ຕິດຕາມກວດກາ, ກວດສອບ, ແນະນຳໃຫ້ຈັດການແກ້ໄຂຂໍ້ສະເໜີແນະຈາກບັນດາອົງການ, ບຸກຄົນ ແລະ ສື່ມວນຊົນ ກ່ຽວກັບເນື້ອໃນທີ່ກ່ຽວຂ້ອງກັບຖັນແຖວພະນັກງານ ແລະວຽກງານພະນັກງານ ຢ່າງທັນທ່ວງທີ; ຕິດຕາມກວດກາປະກົດການຊຸດໂຊມດ້ານຈັນຍາບັນ ແລະ ວິຖີຊີວິດຂອງພະນັກງານ ທີ່ໄດ້ລະບຸໄວ້ໃນມະຕິກອງປະຊຸມສູນກາງພັກຄັ້ງທີ 4 ສະໄໝທີ XII ກ່ຽວກັບການເພີ່ມທະວີການກໍ່ສ້າງ ແລະ ປັບປຸງພັກ; ຕິດຕາມກວດກາການປະຕິບັດຈັນຍາບັນການບໍລິການສາທາລະນະ ແລະ ມາດຕະຖານຈັນຍາບັນວິຊາຊີບ ຂອງຜູ້ນຳ, ພະນັກງານຫຼັກແຫຼ່ງ, ພະນັກງານ ແລະ ສະມາຊິກພັກ.
ສາມເນື້ອໃນທີ່ຕ້ອງສຸມໃສ່ຕິດຕາມກວດກາຄື:
ທີໜຶ່ງ, ຕິດຕາມກວດກາການປະຕິບັດກົດລະບຽບກ່ຽວກັບວຽກງານພະນັກງານ; ໃນນັ້ນ, ສຸມໃສ່ການຕິດຕາມກວດກາວຽກງານນຳພາ ແລະ ຊີ້ນຳປະຕິບັດລະບຽບການກໍ່ສ້າງຖັນແຖວພະນັກງານ. ຕິດຕາມກວດກາການເຜີຍແຜ່ ແລະ ຈັດຕັ້ງປະຕິບັດຂະບວນການທຸກຂັ້ນຕອນ ໃນການຄຸ້ມຄອງພະນັກງານເຊັ່ນ ການຄັດເລືອກ, ການຈັດວາງ, ການມອບໝາຍ, ການຍົກຍ້າຍ, ການໝູນວຽນພະນັກງານ ແລະ ການແບ່ງຂັ້ນຄຸ້ມຄອງພະນັກງານ; ການປະເມີນພະນັກງານ; ການວາງແຜນ, ການຝຶກອົບຮົມ ແລະ ການບຳລຸງສ້າງພະນັກງານ; ການແຕ່ງຕັ້ງ, ການແນະນຳພະນັກງານສະໝັກຮັບເລືອກຕັ້ງ; ການຍົກເລີກຕຳແໜ່ງພະນັກງານ; ການຍ້ອງຍໍໃຫ້ລາງວັນ, ການປະຕິບັດວິໄນຕໍ່ພະນັກງານ; ການປະຕິບັດລະບອບ ແລະ ນະໂຍບາຍພະນັກງານ; ການກວດກາ, ຕິດຕາມກວດກາວຽກງານພະນັກງານ; ການແກ້ໄຂຄຳຮ້ອງຮຽນ ແລະ ການປະນາມກ່ຽວກັບວຽກງານພະນັກງານ ແລະ ພະນັກງານ.
ການຕິດຕາມກວດກາການປະຕິບັດຕາມມາດຕະຖານ, ຂະບວນການ, ຂັ້ນຕອນແລະບັນທຶກບຸກຄະລາກອນຜູ້ນຳໃນແຕ່ລະຂັ້ນ ຢ່າງເປີດເຜີຍແລະໂປ່ງໃສ ຕາມລະບຽບ; ການສະໜອງຂໍ້ມູນ, ການແລກປ່ຽນຂໍ້ມູນ ແລະ ການອະທິບາຍລາຍງານເມື່ອຈຳເປັນ; ຄວາມຮັບຜິດຊອບຂອງໝູ່ຄະນະ, ບຸກຄົນ, ໂດຍສະເພາະ ຄວາມຮັບຜິດຊອບຂອງຜູ້ນຳໃນວຽກງານພະນັກງານ.
ອີງຕາມສະພາບການແລະຄວາມຕ້ອງການຕົວຈິງ, ຄະນະກຳມະການແນວໂຮມປະເທດຊາດຫວຽດນາມທຸກຂັ້ນ ຈະເປັນເຈົ້າການໃນການຄັດເລືອກເນື້ອໃນຕິດຕາມກວດກາ ໃຫ້ສອດຄ່ອງກັບແຕ່ລະໄລຍະເວລາສະເພາະ; ສັງເຄາະແລະສະທ້ອນຄວາມຄິດເຫັນຂອງປະຊາຊົນ ແລະຜູ້ມີຊື່ສຽງ ກ່ຽວກັບວຽກງານພະນັກງານ ໄປໃຫ້ຄະນະພັກແລະໜ່ວຍງານລັດຖະການ ຢ່າງສະໝ່ຳສະເໝີ, ເປັນໄລຍະໆ ຫຼືບໍ່ເປັນປົກກະຕິ, ໂດຍສະເພາະ ການສ້າງຖັນແຖວພະນັກງານຫຼັກແຫຼ່ງທຸກຂັ້ນ (ຫົວໜ້າແລະຮອງຫົວໜ້າຄະນະພັກ, ອຳນາດການປົກຄອງ).
ທີສອງ, ຕິດຕາມກວດກາການຈັດຕັ້ງປະຕິບັດກົດລະບຽບວ່າດ້ວຍການຄວບຄຸມອຳນາດໃນວຽກງານພະນັກງານ ແລະ ຕ້ານການວິ້ງເຕັ້ນຫາຕຳແໜ່ງ ການວິ້ງເຕັ້ນຫາອຳນາດ ຕາມກົດລະບຽບເລກທີ 205-QD/TW, ລົງວັນທີ 23 ກັນຍາ 2019 ຂອງກົມການເມືອງສູນກາງພັກ. ຕາມນັ້ນ, ໜັງສືວຽນໝາຍເລກ 10/TT-MTTW-BTT ລະບຸທິດທາງຢ່າງຊັດເຈນ ໃຫ້ຄະນະກຳມະການແນວໂຮມປະເທດຊາດຫວຽດນາມ ແລະ ບັນດາອົງການການເມືອງ-ສັງຄົມທຸກຂັ້ນ ເປັນເຈົ້າການໃນການຕິດຕາມກວດກາ ແລະ ກຳແໜ້ນສະພາບການປະຕິບັດລະບຽບດັ່ງກ່າວ. ການເຄື່ອນໄຫວຕົ້ນຕໍແມ່ນ ຮັບຟັງຄວາມເຫັນຂອງປະຊາຊົນ; ສ່ອງແສນແລະສະໜອງຂໍ້ມູນແກ່ຄະນະພັກ ແລະໜ່ວຍງານລັດຖະການ ໃນກໍລະນີທີ່ພະນັກງານຂາດມາດຕະຖານ, ເງື່ອນໄຂ ແລະ ບໍ່ສັດຊື່; ມີສັນຍານຂອງການສວຍໃຊ້ຕຳແໜ່ງ ແລະ ອຳນາດທີ່ລະເມີດຫຼັກການ ແລະ ລະບຽບການ ໃນວຽກງານພະນັກງານ; ມີປະກົດການທາງລົບ, ມີພຶດຕິກຳວິ້ງເຕັ້ນຫາຕຳແໜ່ງ ຫາອຳນາດ, ປົກປິດ ສະໜັບສະໜຸນການວິ້ງເຕັ້ນຫາຕຳແໜ່ງ ຫາອຳນາດ. ຕິດຕາມກວດກາການຈັດຕັ້ງປະຕິບັດຂໍ້ສະຫຼຸບການກວດກາ ກວດສອບ ຂອງໜ່ວຍງານທີ່ມີອຳນາດກ່ຽວກັບພະນັກງານ, ສະມາຊິກພັກ ແລະ ວຽກງານພະນັກງານ; ຕິດຕາມກວດກາການປະຕິບັດໜ້າທີ່ ຄວາມຮັບຜິດຊອບ ແລະ ຂອບເຂດອຳນາດທີ່ໄດ້ຮັບມອບໝາຍ ສຳລັບພະນັກງານ ແລະສະມາຊິກພັກ ໃນວຽກງານກໍ່ສ້າງຖັນແຖວພະນັກງານ.
ທີສາມ, ຕິດຕາມກວດກາການປະຕິບັດຄວາມຮັບຜິດຊອບຂອງຄະນະພັກ ແລະ ອຳນາດການປົກຄອງ ໃນການນຳພາ ສ້າງເງື່ອນໄຂໃຫ້ແນວໂຮມປະເທດຊາດຫວຽດນາມ, ບັນດາອົງການການເມືອງ-ສັງຄົມ ແລະ ປະຊາຊົນ ດຳເນີນການປະກອບຄວາມເຫັນ, ຕິດຕາມພະນັກງານ ສະມາຊິກພັກ ແລະ ວຽກງານພະນັກງານ. ໜັງສືວຽນໝາຍເລກ 10/TT-MTTW-BTT ສຸມໃສ່ການຕິດຕາມກວດກາວຽກງານການນຳພາ ຊີ້ນຳການຈັດຕັ້ງປະຕິບັດຂໍ້ກຳນົດຈຳນວນໜຶ່ງ ຂອງກົມການເມືອງສູນການ, ຄະນະເລຂາທິການສູນກາງພັກ(1) ແລະ ກົດລະບຽບທີ່ກ່ຽວຂ້ອງກັບການປະຕິບັດຕາມຄວາມຄິດເຫັນ, ຕິດຕາມກວດກາຖັນແຖວພະນັກງານ ສະມາຊິກພັກ ແລະ ວຽກງານພະນັກງານຂອງແນວໂຮມປະເທດຊາດຫວຽດນາມ, ບັນດາອົງການການເມືອງ-ສັງຄົມ ແລະປະຊາຊົນໃນທ້ອງຖິ່ນ.
ຜົນໄດ້ຮັບທີ່ໂດດເດັ່ນ ແລະ ຂໍ້ຈໍາກັດບາງຢ່າງ ໃນການຕິດຕາມກວດກາ
ວຽກງານການຈັດຕັ້ງແລະພະນັກງານ ໃນເວລາທີ່ຜ່ານມາ
ທີໜຶ່ງ, ໃນການຕິດຕາມກວດກາການຜັນຂະຫຍາຍ, ການແນະນຳ, ການຈັດຕັ້ງປະຕິບັດກົດລະບຽບຂອງພັກກ່ຽວກັບວຽກງານພະນັກງານ: ອອກເອກະສານແນະນຳການປະຕິບັດວຽກງານພະນັກງານໂດຍທັນທີ ເພື່ອນຳພາການຊາບຊຶມ ແລະຈັດຕັ້ງປະຕິບັດຢ່າງເຄັ່ງຄັດ ໃນທ້ອງຖິ່ນແລະຮາກຖານ. ລະບົບເອກະສານແນະນຳມີຄວາມເຂັ້ມງວດ ແລະຄົບຊຸດພໍຄວນ; ມີວິທີການໃໝ່ໆທີ່ສອດຄ່ອງກັບພຶດຕິກຳຕົວຈິງ ເຊິ່ງຕິດພັນກັບຂະບວນການຈັດຫາພະນັກງານທີ່ເປັນປະຊາທິປະໄຕ, ເປີດເຜີຍ ແລະ ໂປ່ງໃສ. ພະນັກງານທີ່ໄດ້ຮັບການແຕ່ງຕັ້ງ ຫຼືເລື່ອນຊັ້ນ ລ້ວນແຕ່ສໍາເລັດໜ້າທີ່ທີ່ໄດ້ຮັບມອບໝາຍເປັນຢ່າງດີ, ໄດ້ຮັບຄວາມເຫັນດີເຫັນພ້ອມ ແລະການສະໜັບສະໜູນຈາກພະນັກງານ, ສະມາຊິກພັກ ແລະ ປະຊາຊົນ. ຄຽງຄູ່ກັບການປະຕິບັດລະບຽບການຂອງສູນກາງວ່າດ້ວຍວຽກງານການຈັດຕັ້ງແລະພະນັກງານ, ບັນດາທ້ອງຖິ່ນໄດ້ພັດທະນາໂຄງການສ້າງຖັນແຖວພະນັກງານ ໃຫ້ໄດ້ຕາມເງື່ອນໄຂ, ມາດຕະຖານ, ຄຸນນະພາບ, ຄວາມສາມາດ ແລະ ກຽດສັກສີ, ທຽບເທົ່າກັບໜ້າທີ່ຮອດປີ 2030 ແລະຊຸມປີຕໍ່ໆໄປ. ໃນສ່ວນຂອງການຈັດຕັ້ງປະຕິບັດກົດລະບຽບຂອງສູນກາງກ່ຽວກັບພະນັກງານ, ສະມາຊິກພັກ ແລະ ວຽກງານພະນັກງານທີ່ກ່ຽວຂ້ອງກັບບົດບາດຂອງແນວໂຮມປະເທດຊາດຫວຽດນາມ, ຄະນະພັກທຸກຂັ້ນກໍ່ໄດ້ອອກຄຳສັ່ງ, ຂໍ້ກຳນົດ ແລະ ແຜນການປະຈຳປີ ເພື່ອຊີ້ນຳໃຫ້ບັນດາໜ່ວຍງານປະຕິບັດຢ່າງຄົບຖ້ວນ ແລະ ທັນການ(2).
ທີສອງ, ຜ່ານການຕິດຕາມກວດກາການປະຕິບັດກົດລະບຽບວ່າດ້ວຍການຮັບສະໝັກລັດຖະກອນ, ພະນັກງານຂອງລັດແລະແຮງງານ ຕາມລັດຖະດຳລັດເລກທີ 68/2000/ND-CP ສະແດງໃຫ້ເຫັນວ່າ ການຮັບສະໝັກໂດຍພື້ນຖານຕາມຂະບວນການ,ຕາມຂໍ້ກຳນົດຂອງກົດໝາຍວ່າດ້ວຍພະນັກງານ ລັດຖະກອນ ປີ 2008, ກົດໝາຍວ່າດ້ວຍລັດຖະກອນປີ 2010; ບັນດາດຳລັດຂອງລັດຖະບານຄວບຄຸມການຮັບສະໝັກ ການບັນຈຸ, ນຳໃຊ້ ແລະ ຄຸ້ມຄອງລັດຖະກອນແລະພາລະກອນ; ກ່ຽວກັບນະໂຍບາຍການດຶງດູດພະນັກງານ, ການສ້າງແຫຼ່ງພະນັກງານຈາກຜູ້ສຳເລັດການສຶກສາທີ່ດີເລີດ, ພະນັກງານວິທະຍາສາດໜູ່ມນ້ອຍ ແລະອື່ນໆ. ການຈັດຕັ້ງປະຕິບັດຂັ້ນຕອນການຮັບສະໝັກລັດຖະກອນ ແລະ ພາລະກອນ ຜ່ານການສອບເສັງແລະການກວດຮັບ ໂດຍພື້ນຖານແມ່ນຕາມມາດຕະຖານແລະລະບຽບການ. ການກວດຮັບສະໝັກພະນັກງານ ລັດຖະກອນໄດ້ດຳເນີນການຢ່າງເຂັ້ມງວດ, ຮັບປະກັນຂັ້ນຕອນ ແລະ ມາດຕະຖານ, ໃຫ້ຄວາມສຳຄັນກັບຜູ້ໄດ້ຮັບບຸລິມະສິດເຊັ່ນ: ຄອບຄົວນະໂຍບາຍ, ຄອບຄົວທຸກຍາກ, ພະນັກງານຍິງ, ພະນັກງານໜຸ່ມ ທີ່ມີຜົນການຮຽນດີເດັ່ນ ແລະອື່ນໆ; ການຮັບສະໝັກຖືກຕ້ອງຕາມຕຳແໜ່ງງານ ແລະ ຖືກຕາມວິຊາຊີບທີ່ໄດ້ຮັບການຝຶກອົບຮົມ ກໍຄືຄວາມຕ້ອງການຂອງວຽກງານ, ແນໃສ່ສ້າງຖັນແຖວພະນັກງານ-ລັດຖະກອນໜຸ່ມທີ່ນັບມື້ນັບມີຄຸນນະພາບ ແລະ ຄວາມສາມາດ, ຕອບສະໜອງຄວາມຮຽກຮ້ອງຕ້ອງການຂອງສະພາບການໃໝ່. ມຸ່ງເປົ້າໝາຍສ້າງຖັນແຖວລັດຖະກອນ ພາລະກອນໜຸ່ມນ້ອຍ ທີ່ມີຄຸນນະພາບ ແລະ ຄວາມສາມາດເພີ່ມຂຶ້ນ, ຕອບສະໜອງຄວາມຮຽກຮ້ອງຕ້ອງການຂອງສະພາບການໃໝ່.
ທີສາມ, ໃນການຕິດຕາມກວດກາລະບຽບການແຕ່ງຕັ້ງພະນັກງານ: ຜົນການຕິດຕາມກວດກາໃນປີ 2020 ໃຫ້ເຫັນວ່າ, ອົງການຂັ້ນແຂວງໄດ້ແຕ່ງຕັ້ງບຸກຄະລະກອນເຂົ້າດຳລົງຕຳແໜ່ງບໍລິຫານແລ້ວ 4.581 ຄົນ, ລວມມີຜູ້ໄດ້ຮັບການແຕ່ງຕັ້ງຄັ້ງທຳອິດ 3.086 ຄົນ ແລະແຕ່ງຕັ້ງຄືນໃໝ່ 1.495 ຄົນ. ອົງການຂັ້ນເມືອງໄດ້ແຕ່ງຕັ້ງຕຳແໜ່ງຜູ້ບໍລິຫານ ແລະ ແຕ່ງຕັ້ງຄືນໃໝ່ໃຫ້ 13.381 ຄົນ. ອົງການຂັ້ນເມືອງໄດ້ແຕ່ງຕັ້ງພະນັກງານ 6.797 ຄົນ. ວຽກງານການແຕ່ງຕັ້ງພະນັກງານຂອງທ້ອງຖິ່ນ ໂດຍພື້ນຖານແມ່ນດຳເນີນໄປຕາມຂັ້ນຕອນ ແລະ ລະບຽບການ, ຮັບປະກັນປະຊາທິປະໄຕ, ເປີດເຜີຍ, ໂປ່ງໃສ, ເຂັ້ມງວດ, ຮອບຄອບ, ຈຳກັດສຸດຂີດສະພາບການວິ້ງເຕັ້ນຫາຕຳແໜ່ງ ຫາອຳນາດ, ສ້າງສະພາບແວດລ້ອມໃຫ້ພະນັກງານໄດ້ຝຶກຝົນ, ປະກອບສ່ວນ ແລະ ເຕີບໂຕ. ຂະບວນການແຕ່ງຕັ້ງພະນັກງານໄດ້ປະຕິບັດຕາມຂໍ້ກຳນົດຂອງກົມການເມືອງສູນກາງພັກວ່າດ້ວຍການແບ່ງຂັ້ນຄຸ້ມຄອງພະນັກງານ ແລະ ການແຕ່ງຕັ້ງ ແນະນຳພະນັກງານໃຫ້ດຳລົງຕຳແໜ່ງ, ຮັບປະກັນມາດຕະຖານ ແລະເງື່ອນໄຂທີ່ຖືກຕ້ອງຂອງພະນັກງານ ທັງໃນດ້ານມາດຕະຖານຕຳແໜ່ງ ແລະ ມາດຕະຖານການປະເມີນພະນັກງານ; ຖັນແຖວພະນັກງານທີ່ໄດ້ຮັບການແຕ່ງຕັ້ງ, ເລື່ອນຊັ້ນ ແລະ ສະເໜີຊື່ຜູ້ສະໝັກນັ້ນ ໂດຍພື້ນຖານແລ້ວມີຄຸນສົມບັດຕາມຄວາມຕ້ອງການວຽກງານ. ສິ່ງສຳຄັນຄື, ບັນດາຂະບວນການນັ້ນຮັບປະກັນຄວາມຕ້ອງການຂອງການແບ່ງຂັ້ນແລະກະຈາຍອຳນາດ, ໄດ້ຮັບການປະຕິບັດຢ່າງເຂັ້ມງວດ ແລະ ກວດສອບຢ່າງຮອບຄອບໃນແຕ່ລະກໍລະນີ.
ໃນຂະບວນການຕິດຕາມກວດກາ, ເມື່ອພົບເຫັນຂໍ້ບົກຜ່ອງ, ບັນຫາທີ່ບໍ່ຊັດເຈນ, ບັນດາໜ່ວຍງານສະເພາະ ຂອງອົງການແນວໂຮມປະເທດຊາດຫວຽດນາມທຸກຂັ້ນ ໄດ້ປຶກສາຫາລືຢ່າງທັນການກັບຄະນະພັກ, ອຳນາດການປົກຄອງທ້ອງຖິ່ນ ເພື່ອຂໍຂໍ້ມູນເພີ່ມເຕີມ(3), ສະເໜີໃຫ້ອະທິບາຍລາຍງານແຕ່ລະກໍລະນີ ແລະ ຖອດຖອນບົດຮຽນໃນອະນາຄົດ. ໃນກໍລະນີທີ່ພະນັກງານສະແດງອາການຝ່າຝືນເງື່ອນໄຂ, ມາດຕະຖານ ແລະ ຂັ້ນຕອນການແຕ່ງຕັ້ງ, ຄະນະປະຈຳຄະນະກຳມະການແນວໂຮມປະເທດຊາດຫວຽດນາມ ທຸກຂັ້ນ ໄດ້ອອກຈົດໝາຍທາງການໂດຍທັນທີ ເພື່ອຮຽກຮ້ອງໃຫ້ຄະນະພັກທ້ອງຖິ່ນກວດສອບ ແລະຈັດການຕາມລະບຽບການ(4).
ທີສີ່, ກ່ຽວກັບການປ່ຽນຕໍາແໜ່ງງານ: ໂດຍທົ່ວໄປ, ການປ່ຽນຕຳແໜ່ງງານແມ່ນຮັບປະກັນການປະຕິບັດຕາມຂະບວນການ ແລະຂັ້ນຕອນທີ່ວາງໄວ້, ປະກອບສ່ວນປະຕິບັດກົດໝາຍວ່າດ້ວຍການປ້ອງກັນແລະຕ້ານການສໍ້ລາດບັງຫຼວງ. ດ້ານຕັ້ງໜ້າຂອງການປ່ຽນຕຳແໜ່ງງານ ແມ່ນຊ່ວຍໃຫ້ລັດຖະກອນ ພາລະກອນຫຼາຍຄົນມີເງື່ອນໄຂຝຶກຝົນຄວາມກ້າຫານ, ເພີ່ມຄວາມຮູ້ສຶກຮັບຜິດຊອບ, ຍົກສູງຂີດຄວາມສາມາດ, ປັບປຸງຄວາມສາມາດປັບຕົວ ແລະ ເຂົ້າໃຈພື້ນທີ່ແລະເປົ້າໝາຍຂອງການຄຸ້ມຄອງ; ຈາກນັ້ນ, ໃຫ້ແນະນຳກ່ຽວກັບວິທີແກ້ໄຂໃນການຈັດຕັ້ງຜັນຂະຫຍາຍ ແລະ ປະຕິບັດວຽກງານວິຊາຊີບໃຫ້ມີປະສິດທິຜົນດີ. ພະນັກງານລັດຖະກອນຫຼາຍຄົນສະແດງຄວາມເຕັມໃຈທີ່ຈະຮັບງານໃໝ່ ແລະ ເຊື່ອຟັງຄຳສັ່ງຂອງອົງການຢ່າງເຕັມທີ່. ການປ່ຽນຕໍາແໜ່ງງານປະກອບສ່ວນຈໍາກັດສະຖານະການປິດ, ພາກສ່ວນນິຍົມ ແລະ ຄວາມຫຍໍ້ທໍ້ ໃນການປະຕິບັດຫນ້າທີ່ສາທາລະນະ.
ທີຫ້າ, ຜົນການຕິດຕາມກວດກາການປະກາດ ແລະ ການເປີດເຜີຍຊັບສິນຂອງພະນັກງານ, ລັດຖະກອນ ຂອງຄະນະພັກ, ອົງການຈັດຕັ້ງຮາກຖານຂອງພັກແລະລັດແລະ ອົງການບໍລິຫານລັດທຸກຂັ້ນ ສະແດງໃຫ້ເຫັນວ່າ ໃນປີ 2020, ຢູ່ຂັ້ນແຂວງ, ຈຳນວນຜູ້ມີໜ້າທີ່ຕ້ອງແຈ້ງຊັບສິນ ແລະ ລາຍໄດ້ຄັ້ງທໍາອິດ ມີ 447.910 ຄົນ, ໂດຍຈໍານວນຜູ້ເຂົ້າແຈ້ງຊັບສິນຄັ້ງທໍາອິດ ມີ 447.579 ຄົນ (ບັນລຸ 99.9%). ຢູ່ຂັ້ນເມືອງ, ຈຳນວນຜູ້ມີໜ້າທີ່ຕ້ອງແຈ້ງຊັບສິນ ແລະ ລາຍໄດ້ຄັ້ງທໍາອິດ ມີ 182.795 ຄົນ, ໂດຍຈໍານວນຜູ້ເຂົ້າແຈ້ງຊັບສິນຄັ້ງທໍາອິດ ມີ 181.478 ຄົນ (ບັນລຸ 99,3%).
ການປະກາດເປີດເຜີຍຊັບສິນຂອງພະນັກງານດ້ວຍຮູບແບບຕິດປະກາດຢູ່ບ່ອນເຮັດວຽກຂອງພະນັກງານ ຫລືເຜີຍແຜ່ໃບປະກາດຊັບສິນໃນທີ່ປະຊຸມ ໄດ້ປະຕິບັດຕາມລະບຽບການ. ບັນທຶກທີ່ເກັບຖາວອນໄດ້ຮັບການຈັດຂຶ້ນຕາມຂໍ້ບັງຄັບ; ບັນຊີລາຍຊື່ຂອງຜູ້ມີໜ້າທີ່ຕ້ອງແຈ້ງຊັບສິນ ແລະ ລາຍຮັບຄັ້ງທໍາອິດ, ການກະກຽມຢ່າງເຕັມສ່ວນການປະກາດຊັບສິນຂອງຜູ້ປະກາດ; ໃບປະກາດຊັບສິນຂອງຜູ້ມີໜ້າທີ່ຕ້ອງແຈ້ງນັ້ນ ໄດ້ຈັດກຽມໄວ້ຢ່າງຄົບຖ້ວນ; ການສົ່ງມອບແລະຮັບໃບປະກາດຊັບສິນ ໄດ້ປະຕິບັດຢ່າງຈິງຈັງ; ບົດບັນທຶກການຕິດໃບປະກາດຊັບສິນແລະລາຍໄດ້ຂອງພະນັກງານ ຂອງແຕ່ລະອົງການ, ໜ່ວຍງານ ໄດ້ປະຕິບັດຢ່າງເຂັ້ມງວດ. ຜົນຂອງການປະຕິບັດການຄວບຄຸມຊັບສິນ ແລະ ລາຍໄດ້ ຖືກລາຍງານຕໍ່ອົງການທີ່ມີອຳນາດຕາມກົດລະບຽບ.
ທີຫົກ, ໃນການເລືອກຕັ້ງຜູ້ແທນສະພາແຫ່ງຊາດ ແລະ ຜູ້ແທນສະພາປະຊາຊົນທຸກຂັ້ນ, ມາດຕະຖານໜຶ່ງທີ່ໄດ້ເນັ້ນໜັກ ປຶກສາຫາລື ແລະ ພິຈາລະນາຢ່າງຮອບຄອບຄື: ຜູ້ສະໝັກຮັບເລືອກຕັ້ງຕ້ອງເປັນແບບຢ່າງໃນການປະຕິບັດກົດໝາຍ, ເດັດດ່ຽວຕໍ່ສູ້ຕ້ານກັບທຸກປະກົດການຫຍໍ້ທໍ້ອາດຍາສິດ, ຄວາມຈອງຫອງ, ການລ່ວງອຳນາດ, ການສໍ້ລາດບັງຫຼວງ ແລະ ການລະເມີດກົດໝາຍ. ຂະບວນການປຶກສາຫາລືເພື່ອຄັດເລືອກ ແລະ ແນະນຳຜູ້ສະໝັກຮັບເລືອກຕັ້ງ ໄດ້ຮັບການປະຕິບັດຕາມຢ່າງຖີ່ຖ້ວນ ໂດຍຄະນະກຳມະການແນວໂຮມປະເທດຊາດຫວຽດນາມທຸກຂັ້ນ. ອົງການແນວໂຮມປະເທດຊາດໄດ້ຄັດເລືອກແລະແນະນຳຜູ້ສະໝັກຮັບເລືອກ ຖືກຕາມໂຄງສ້າງ, ອົງປະກອບ ແລະ ປະລິມານ, ບໍ່ບັນຈຸຢູ່ໃນບັນຊີລາຍຊື່ຜູ້ສະໝັກທີ່ມີສັນຍານສໍ້ລາດບັງຫຼວງ, ບໍ່ຊື່ສັດໃນການປະກາດຊັບສິນ ຫຼື ລະເມີດກົດໝາຍການເລືອກຕັ້ງ. ສຳລັບຜູ້ສະໝັກຮັບເລືອກຕັ້ງສະມາຊິກສະພາແຫ່ງຊາດ ຫຼືຜູ້ແທນສະພາປະຊາຊົນ, ພາຍຫຼັງທີ່ແນວໂຮມປະເທດຊາດຫວຽດນາມໄດ້ຈັດການສຳຫຼວດຜູ້ມີສິດເລືອກຕັ້ງໃນສະຖານທີ່ຢູ່ອາໄສຂອງຕົນ ແລະ ມີຄະແນນໄວ້ວາງໃຈຈຳນວນນ້ອຍ ພວກເຂົາຈະບໍ່ໄດ້ລວມຢູ່ໃນລາຍຊື່ການປຶກສາຫາລືຢ່າງເປັນທາງການ ຂອງອົງການແນວໂຮມປະເທດຊາດທຸກຂັ້ນ (ລົບອອກຈາກລາຍຊື່ຜູ້ສະໝັກ ສ.ສ. , ຜູ້ແທນສະພາປະຊາຊົນ)(5). ແນວໂຮມປະເທດຊາດຫວຽດນາມໄດ້ປະຕິບັດໜ້າທີ່ຕິດຕາມກວດກາການເລືອກຕັ້ງຢ່າງເຂັ້ມງວດ, ປະກອບສ່ວນຮັບປະກັນການເລືອກຕັ້ງຕາມລະບອບປະຊາທິປະໄຕ ແລະ ຄັດເລືອກຜູ້ສະໝັກທີ່ສົມຄວນຈະດຳລົງຕຳແໜ່ງສຳຄັນໃນອົງການຕ່າງໆຂອງລັດ.
ທີເຈັດ, ການຕິດຕາມກວດກາວຽກງານຄັດເລືອກແລະແຕ່ງຕັ້ງຜູ້ພິພາກສາ ແລະ ໄອຍະການ ກໍ່ໄດ້ຮັບຄວາມເອົາໃຈໃສ່ຢ່າງສະໝ່ຳສະເໝີ. ທຸກໆປີ, ຜູ້ແທນຄະນະປະຈຳທີ່ເປັນສະມາຊິກຂອງສະພາຄັດເລືອກໄອຍະການ ຂອງອົງການໄອຍະການປະຊາຊົນສູງສຸດ ລ້ວນແຕ່ໄດ້ດຳເນີນການຕີລາຄາ, ປະເມີນ ແລະ ໃຫ້ຄວາມເຫັນກ່ຽວກັບເອກະສານຂອງບຸກຄົນທີ່ສະເໜີໃຫ້ແຕ່ງຕັ້ງເປັນໄອຍະການ ຂອງອົງການໄອຍະການປະຊາຊົນສູງສຸດ(6); ເປັນສະມາຊິກສະພາສອບຄັດເລືອກໄອຍະການລະດັບສູງ ລະດັບກາງ ແລະ ປະຖົມ, ປະກອບຄຳຄິດຄຳເຫັນໃສ່ລາຍຊື່ຜູ້ສະໝັກສອບຄັດເລືອກໄອຍະການ ແລະ ລາຍຊື່ຜູ້ທີ່ສະເໜີໃຫ້ແຕ່ງຕັ້ງເປັນໄອຍະການທຸກຂັ້ນ ຕາມລະບຽບການ.
ການເຂົ້າຮ່ວມຂອງແນວໂຮມປະເທດຊາດຫວຽດນາມໃນວຽກງານຄັດເລືອກຜູ້ພິພາກສາ ແລະ ໄອຍະການ ໄດ້ປະກອບສ່ວນຊ່ວຍເຫຼືອບັນດາອົງການທີ່ມີອຳນາດຂອງລັດ ແຕ່ງຕັ້ງຖັນແຖວຜູ້ພິພາກສາ ແລະ ໄອຍະການທີ່ມີຄວາມສາມາດ ແລະ ຄຸນນະພາບ ພຽງພໍທີ່ຈະຕອບສະໜອງຄວາມຕ້ອງການ ແລະ ຄຸນນະພາບຂອງຖັນແຖວພະນັກງານຂອງອົງການຕຸລາການໃນໄລຍະໃໝ່(7).
ການເຄື່ອນໄຫວຕິດຕາມກວດກາວຽກງານການຈັດຕັ້ງແລະພະນັກງານຂອງແນວໂຮມປະເທດຊາດຫວຽດນາມ ແລະ ບັນດາອົງການການເມືອງ-ສັງຄົມ ໃນເວລາທີ່ຜ່ານມາ, ໂດຍສະເພາ ນັບແຕ່ເມື່ອມີກົດລະບຽບຂອງກົມການເມືອງສູນກາງພັກວ່າດ້ວຍການຕິດຕາມກວດກາ ແລະ ວິຈານສັງຄົມ, ໄດ້ຮັບໝາກຜົນທີ່ມີຄວາມໝາຍໃນຫຼາຍດ້ານ. ສິ່ງນີ້ໄດ້ປະກອບສ່ວນສ້າງການປ່ຽນແປງທີ່ຕັ້ງໜ້າ ທາງດ້ານຄວາມຮັບຮູ້ກ່ຽວກັບບົດບາດຕິດຕາມກວດກາຂອງແນວໂຮມປະເທດຊາດຫວຽດນາມ. ການເຄື່ອນໄຫວຕິດຕາມກວດກາວຽກງານການຈັດຕັ້ງແລະພະນັກງານ ໄດ້ຮັບຄວາມເອົາໃຈໃສ່ ແລະສະໜັບສະໜູນໂດຍປະຊາຊົນຈຳນວນຫຼວງຫຼາຍຈາກທຸກຊັ້ນຄົນ, ບັນດາອົງການສື່ມວນຊົນກໍ່ຕອບສະໜອງ ແລະ ໂຄສະນາເຜີຍແຜ່ກິດຈະກຳເຫຼົ່ານີ້ຢ່າງຕັ້ງໜ້າ.
ວິທີການເສີມຂະຫຍາຍບົດບາດຕິດຕາມກວດກາວຽງານການຈັດຕັ້ງ
ແລະພະນັກງານ ຂອງແນວໂຮມປະເທດຊາດຫວຽດນາມ
ແລະ ບັນດາອົງກາການເມືອງ-ສັງຄົມ ໃນໄລຍະຈະມາເຖິງ
ທີໜຶ່ງ, ເພີ່ມທະວີການນຳພາຂອງຄະນະພັກເພື່ອເສີມຂະຫຍາຍບົດບາດຕິດຕາມກວດກາຂອງແນວໂຮມປະເທດຊາດຫວຽດນາມ ແລະ ບັນດາອົງການການເມືອງ-ສັງຄົມ. ໃນນັ້ນ, ແນວໂຮມປະເທດຊາດຫວຽດນາມຈະສຳເລັດໂຄງການໃນໄວໆນີ້ ແລະ ຍື່ນສະເໜີຕໍ່ຄະນະເລຂາທິການສູນກາງ ເພື່ອປະກາດໃຊ້ຄໍາສັ່ງກ່ຽວກັບການເພີ່ມທະວີການນໍາພາຂອງພັກ ຕໍ່ວຽກງານການຕິດຕາມກວດກາແລະວິຈານສັງຄົມ ຂອງແນວໂຮມປະເທດຊາດຫວຽດນາມ ແລະ ບັນດາອົງການການເມືອງ-ສັງຄົມ ໃນໄລຍະຈະມາເຖິງ. ນີ້ແມ່ນເອກະສານສຳຄັນ ເພື່ອຊີ້ນຳ ນຳພາຄະນະພັກທຸກຂັ້ນ ໃຫ້ເພີ່ມທະວີການເຄື່ອນໄຫວຕິດຕາມກວດກາໂດຍລວມ ແລະ ຕິດຕາມກວດກາວຽກງານການຈັດຕັ້ງແລະພະນັກງານໂດຍສະເພາະ ຂອງແນວໂຮມປະເທດຊາດຫວຽດນາມ ແລະ ບັນດາອົງການການເມືອງ-ສັງຄົມ ໃຫ້ມີປະສິດທິຜົນຢ່າງແທດຈິງ.
ທີສອງ, ແນວໂຮມປະເທດຊາດຫວຽດນາມ ແລະ ບັນດາອົງການການເມືອງ-ສັງຄົມ ຕ້ອງເປັນເຈົ້າການໃນການຄົ້ນຄວ້າເອກະສານຂອງພັກ ແລະ ຂໍ້ບັງຄັບຂອງລັດຢ່າງລະອຽດຖີ່ຖ້ວນ ເພື່ອສະເໜີ ແລະ ແນະນຳການແກ້ໄຂ ແລະ ປັບປຸງເພີ່ມເຕີມກົນໄກຕິດຕາມກວດກາ ຂອງແນວໂຮມປະເທດຊາດຫວຽດນາມ ແລະ ບັນດາອົງການການເມືອງ-ສັງຄົມ ໃນສະພາບການໃໝ່. ການຕິດຕາມກວດກາວຽກງານການຈັດຕັ້ງແລະພະນັກງານແມ່ນວຽກງານທີ່ຫຍຸ້ງຍາກ; ດັ່ງນັ້ນ, ມັນຈຶ່ງຮຽກຮ້ອງລະບົບກົດໝາຍຕ້ອງມີການກຳນົດບັນດາບັນຫາທີ່ກ່ຽວຂ້ອງຢ່າງຮອບດ້ານ, ຄົບຖ້ວນ, ລະອຽດຖີ່ຖ້ວນ ແລະ ຈະແຈ້ງ. ຄວາມຮຽກຮ້ອງຕ້ອງການນີ້ ສ້າງພື້ນຖານກົດໝາຍບໍ່ພຽງແຕ່ໃຫ້ການເຄື່ອນໄຫວຕິດຕາມກວດກາຂອງແນວໂຮມປະເທດຊາດຫວຽດນາມ ແລະ ບັນດາອົງການການເມືອງ-ສັງຄົມເທົ່ານັ້ນ, ຫາກຍັງແມ່ນພື້ນຖານໃຫ້ບັນດາອົງການ ການຈັດຕັ້ງ, ໂດຍສະເພາະ ບັນດາເປົ້າໝາຍທີ່ຢູ່ພາຍໃຕ້ການຕິດຕາມກວດກາ ຕ້ອງປະຕິບັດຢ່າງເຂັ້ມງວດ.
ທີສາມ, ເພີ່ມທະວີການປະສານງານລະຫວ່າງແນວໂຮມປະເທດຊາດຫວຽດນາມ ແລະ ບັນດາອົງກາສະມາຊິກ, ບັນດາອົງການແລະການຈັດຕັ້ງອື່ນໆ ໃນການປະຕິບັດການຕິດຕາມກວດກາວຽກງານການຈັດຕັ້ງແລະພະນັກງານ. ການເຄື່ອນໄຫວຕິດຕາມກວດກາຂອງແນວໂຮມປະເທດຊາດຫວຽດນາມ ຈະມີປະສິດທິຜົນກໍ່ຕໍ່ເມື່ອມີການປະສານງານ ແລະ ການດຳເນີນງານ ຄວບຄູ່ກັບການເຄື່ອນໄຫວຕິດຕາມກວດກາ, ກວດກາ, ກວດສອບ ຂອງບັນດາອົງການ, ອົງການຈັດຕັ້ງອື່ນໆ ໃນລະບົບການເມືອງ.
ທີສີ່, ການຕິດຕາມກວດກາວຽກງານການຈັດຕັ້ງ-ພະນັກງານ ແລະ ການຕິດຕາມກວດກາພະນັກງານ ສະມາຊິກພັກ ຕ້ອງເຮັດເປັນປົກກະຕິ; ຕ້ອງສະຫຼຸບ, ສະຫຼຸບສັງລວມ ແລະຖອດຖອນບົດຮຽນກ່ຽວກັບການຜັນຂະຫຍາຍ ການເຄື່ອນໄຫວຕິດຕາມກວດກາວຽກງານການຈັດຕັ້ງແລະພະນັກງານ ໃນເວລາຜ່ານມາ ເພື່ອເລືອກເນື້ອໃນການຕິດຕາມກວດກາໃຫ້ຖືກຕ້ອງ, ຊັດເຈນ ແລະ ແທດເໝາະກັບສະພາບຕົວຈິງຂອງແນວໂຮມປະເທດຊາດຫວຽດນາມ ແລະ ບັນດາອົງການການເມືອງ-ສັງຄົມ.
ທີຫ້າ, ເພື່ອດຳເນີນການຕິດຕາມກວດກາວຽກງານພະນັກງານຢ່າງມີປະສິດທິຜົນ, ແນວໂຮມປະເທດຊາດຫວຽດນາມ ແລະ ບັນດາອົງການການເມືອງ-ສັງຄົມ ຈຳເປັນຕ້ອງດຶງດູດ ແລະ ນຳໃຊ້ພະນັກງານທີ່ມີຄຸນສົມບັດສິນທຳ, ມີຄວາມສາມາດ, ກ້າຫານ, ກ້າເວົ້າ, ກ້າເຮັດ, ກ້າຮັບຜິດຊອບ ໃນການເຄື່ອນໄຫວຕິດຕາມກວດກາ. ເພີ່ມທະວີບັນດາມາດຕະການຍົກລະດັບຄຸນນະພາບຂອງພະນັກງານຊັ້ນນຳ ຂອງແນວໂຮມທຸກຂັ້ນ, ມີນະໂຍບາຍວາງແຜນ, ກໍ່ສ້າງ ຝຶກອົບຮົມ ແລະ ດຶງດູດພະນັກງານທີ່ມີຄວາມສາມາດ ຄຸນສົມບັດ ຄຸນນະພາບ ແລະ ຈັນຍາບັນ ເພື່ອປະຕິບັດການຕິດຕາມກວດກາ. ເຕົ້າໂຮມແລະເສີມຂະຫຍາຍ ຄວາມສາມາດບົ່ມຊ້ອນອັນໃຫຍ່ຫຼວງ ຂອງບັນດາອົງການສະມາຊິກ ແລະ ບຸກຄົນທີ່ມີຊື່ສຽງ, ນັກວິຊາການ, ປັນຍາຊົນ, ນັກວິທະຍາສາດ ແລະ ສະພາທີ່ປຶກສາ ເພື່ອໃຫ້ສາມາດຮ່ວມການເຄື່ອນໄຫວຕິດຕາມກວດກາ, ຊ່ວຍຍົກສູງຄຸນນະພາບການຕິດຕາມກວດກາໂດຍລວມ ແລະ ການຕິດຕາມກວດກາວຽກງານການຈັດຕັ້ງແລະພະນັກງງານໂດຍສະເພາະ ຂອງແນວໂຮມປະເທດຊາດຫວຽດນາມ ແລະ ບັນດາອົງການການເມືອງ-ສັງຄົມ. ສຳລັບທ້ອງຖິ່ນ, ຕ້ອງເອົາໃຈໃສ່ຊຸກຍູ້ການຝຶກອົບຮົມ, ແລກປ່ຽນບົດຮຽນກ່ຽວກັບວິທີການ ແລະ ການປະຕິບັດທີ່ມີປະສິດທິຜົນ, ເພີ່ມທະວີການໂຄສະນາເຜີຍແຜ່, ຊາບຊຶມຂໍ້ກຳນົດກົດລະບຽບຂອງພັກ, ກົດໝາຍຂອງລັດ ກ່ຽວກັບການຕິດຕາມກວດກາຂອງແນວໂຮມປະເທດຊາດຫວຽດນາມ ແລະ ບັນດາອົງການການເມືອງ-ສັງຄົມ; ພະນັກງານທີ່ເຮັດວຽກງານແນວໂຮມຢູ່ຮາກຖານ ຕ້ອງມີຄວາມຮູ້ກ່ຽວກັບນະໂຍບາຍ ແລະ ກົດໝາຍ ເພື່ອດຳເນີນການຕິດຕາມກວດກາຢ່າງມີປະສິດທິຜົນ./.
-----------------
(1) ເຊັ່ນ: ກົດລະບຽບກ່ຽວກັບການຕິດຕາມກວດກາ ແລະ ວິຈານສັງຄົມຂອງແນວໂຮມປະເທດຊາດຫວຽດນາມ ແລະ ບັນດາອົງການການເມືອງ-ສັງຄົມ (ອອກພ້ອມກັບມະຕິຕົກລົງໝາຍເລກ 217-QĐ/TW, ລົງວັນທີ 12 ທັນວາ 2013 ຂອງກົມການເມືອງສູນກາງພັກ) ແລະ ລະບຽບການວ່າດ້ວຍການມີສ່ວນຮ່ວມຂອງແນວໂຮມປະເທດຊາດຫວຽດນາມ, ບັນດາອົງຄະນະການເມືອງ-ສັງຄົມ ແລະ ປະຊາຊົນ ໃນການກໍ່ສ້າງພັກ, ກໍ່ສ້າງອຳນາດການປົກຄອງ (ອອກພ້ອມກັບມະຕິຕົກລົງໝາຍເລກ 218-QĐ/TW, ລົງວັນທີ 12 ທັນວາ 2013 ຂອງກົມການເມືອງສູນກາງພັກ); ຕິດຕາມກວດກາການປະຕິບັດມະຕິຕົກລົງໝາຍເລກ 99-QĐ/TW, ລົງວັນທີ 3 ຕຸລາ 2017, ຂອງຄະນະເລຂາທິການສູນກາງພັກ ວ່າດ້ວຍການ “ປະກາດໃຊ້ບົດແນະນຳຂອບໃຫ້ຄະນະພັກ ອົງການຈັດຕັ້ງພັກຂຶ້ນສັງກັບສູນກາງ ສືບຕໍ່ເສີມຂະຫຍາຍບົດບາດຂອງປະຊາຊົນ ໃນການຕໍ່ສູ້ເພື່ອສະກັດກັ້ນແລະຍູ້ຖອຍຄວາມເສື່ອມໂຊມ, “ການຫັນປ່ຽນຕົນເອງ”, “ການປ່ຽນແປງຕົນເອງ” ຢູ່ພາຍໃນ”; ຕິດຕາມກວດກາການປະຕິບັດກົດລະບຽບເລກທີ 124-QD/TW, ລົງວັນທີ 2 ກຸມພາ 2018, ຂອງຄະນະເລຂາທິການສູນກາງພັກ, ວ່າດ້ວຍ “ການຕິດຕາມກວດກາຂອງແນວໂຮມປະເທດຊາດຫວຽດນາມ, ບັນດາອົງການການເມືອງ-ສັງຄົມ ແລະ ປະຊາຊົນ ຕໍ່ການປູກຝັງ ແລະ ການຝຶກອົບຮົມຄຸນສົມບັດສິນທຳ, ວິຖີຊີວິດຂອງຜູ້ນຳ, ພະນັກງານຫຼັກແຫຼ່ງ ແລະ ພະນັກງານ ສະມາຊິກພັກ".
(2) ມະຕິຕົກລົງໝາຍເລກ 99-QĐ/TW, ລົງວັນທີ ຕຸລາ 2017, ຂອງຄະນະເລຂາທິການສູນກາງພັກ ວ່າດ້ວຍ “ການປະກາດໃຊ້ບົດແນະນຳຂອບໃຫ້ຄະນະພັກ ອົງການຈັດຕັ້ງພັກຂຶ້ນສັງກັບສູນກາງ ສືບຕໍ່ເສີມຂະຫຍາຍບົດບາດຂອງປະຊາຊົນໃນການຕໍ່ສູ້ເພື່ອສະກັດກັ້ນ ແລະ ຍູ້ຖອຍຄວາມເສື່ອມໂຊມ, “ການຫັນປ່ຽນຕົນເອງ”, “ການປ່ຽນແປງຕົນເອງ” ຢູ່ພາຍໃນ”; ກົດລະບຽບເລກທີ 101-QĐ/TW, ລົງວັນທີ 7 ມິຖຸນາ 2012, ຂອງຄະນະເລຂາທິການສູນກາງພັກ “ວ່າດ້ວຍຄວາມຮັບຜິດຊອບໃນການເປັນແບບຢ່າງຂອງພະນັກງານ, ສະມາຊິກພັກ, ໂດຍສະເພາະ ພະນັກງານນຳພາຫຼັກແຫຼ່ງທຸກຂັ້ນ”; ກົດລະບຽບເລກທີ 124-QĐ/TW, ລົງວັນທີ 2 ກຸທພາ 2018, ຂອງຄະນະເລຂາທິການສູນກາງ, “ວ່າດ້ວຍການຕິດຕາມກວດກາຂອງແນວໂຮມປະເທດຊາດຫວຽດນາມ, ບັນດາອົງການການເມືອງ-ສັງຄົມ ແລະ ປະຊາຊົນ ຕໍ່ການປູກຝັງ ແລະ ການຝຶກອົບຮົມຄຸນສົມບັດສິນທຳ, ວິຖີຊີວິດຂອງຜູ້ນຳ, ພະນັກງານຫຼັກແຫຼ່ງ ແລະ ພະນັກງານ ສະມາຊິກພັກ”; ກົດລະບຽບເລກທີ 205-QĐ/TW, ລົງວັນທີ 23 ກັນຍາ 2019, ຂອງກົມການເມືອງສູນກາງ “ວ່າດ້ວຍການຄວບຄຸມອຳນາດໃນວຽກງານພະນັກງານ ແລະ ຕໍ່ສູ້ຕ້ານການວິ້ງເຕັ້ນຫາຕຳແໜ່ງ, ຫາອຳນາດ”; ກົດລະບຽບເລກທີ 213-QĐ/TW, ລົງວັນທີ 2 ມັງກອນ 2020, ຂອງກົມການເມືອງສູນກາງ “ວ່າດ້ວຍຄວາມຮັບຜິດຊອບຂອງສະມາຊິກພັກກຳລັງເຮັດວຽກ ຕ້ອງຮັກສາການຕິດຕໍ່ພົວພັນເປັນປະຈຳ ກັບອົງການຈັດຕັ້ງພັກແລະປະຊາຊົນໃນເຂດທີ່ຢູ່ອາໄສ”.
(3) ຂໍໃຫ້ຄະນະປະຈຳພັກແຂວງຂອງບັນດາແຂວງຄື: ອຽນບ໋າຍ, ລ້າງເຊີນ, ເງ້ອານ, ກວ໋າງຈີ້, ກວ໋າງຫງາຍ, ບິ່ງທ້ວນ, ບັກກ້ານ ເພີ່ມເຕີມຂໍ້ມູນກ່ຽວກັບຄຸນວຸດທິວິຊາຊີບ, ຄຸນສົມບັດທາງທິດສະດີການເມືອງ, ບັນຊີລາຍຊື່ຮັບສະໝັກລັດຖະກອນ, ບັນຊີລາຍຊື່ການແຕ່ງຕັ້ງ ແລະອື່ນໆ.
(4) ຄະນະປະຈຳຄະນະກຳມະການສູນກາງແນວໂຮມປະເທດຊາດຫວຽດນາມອອກເອກະສານສະບັບເລກທີ 3237/MTTW-BTT, ສະເໜີໃຫ້ມີການລາຍງານກ່ຽວກັບການປະຕິບັດຂັ້ນຕອນການແຕ່ງຕັ້ງພະນັກງານ ໂດຍຂໍໃຫ້ ຄະນະພັກແຂວງລາວກາຍລາຍງານສະເພາະ ກ່ຽວກັບການຈັດຕັ້ງປະຕິບັດຂະບວນການ ແລະ ເງື່ອນໄຂ ໃນການແຕ່ງຕັ້ງພະນັກງານ ໃຫ້ສະຫາຍ ດ່າມ ກວາງ ວີງ ແລະ ຜົນການກວດກາ, ກວດສອບ ແລະປະມວນຜົນຂໍ້ມູນທີ່ໜັງສືພິມແຮງງານລະບຸ. ວັນທີ 7 ທັນວາ 2021, ຄະນະປະຈຳຄະນະກຳມະການສູນກາງແນວໂຮມປະເທດຊາດຫວຽດນາມ ໄດ້ຮັບລາຍງານສະບັບເລກທີ 195-BC/TU, ລົງວັນທີ 2 ທັນວາ 2021, ຂອງຄະນະພັກແຂວງລາວກາຍ, “ກ່ຽວກັບການປະຕິບັດຂະບວນການ ແລະ ເງື່ອນໄຂໃນການແຕ່ງຕັ້ງສະຫາຍ ດ່າມ ກວາງ ວີງ ໃຫ້ດຳລົງຕຳແໜ່ງ ຫົວໜ້າກວດກາແຂວງລາວກາຍ ແລະ ຢືນຢັນຂໍ້ມູນຂ່າວສານ”, ຂໍໃຫ້ຄະນະເລຂາທິການສູນກາງພັກ ປະຕິບັດວິໄນຕໍ່ສະຫາຍ ດ່າມ ກວາງ ວີງ; ວັນທີ 25 ພະຈິກ 2021, ຄະນະກຳມະການປະຊາຊົນແຂວງລາວກາຍ ໄດ້ອອກມະຕິໝາຍເລກ 4135/QD-UBND ປະຕິບັດວິໄນ ພະນັກງານລັດຖະກອນ ດ້ວຍຮູບການ ບັງຄັບໃຫ້ເລີກຈ້າງ ສະຫາຍ ດ່າມ ກວາງ ວິງ, ຫົວໜ້າກວດກາແຂວງລາວກາຍ.
(5) ໃນການເລືອກຕັ້ງຜູ້ແທນສະພາແຫ່ງຊາດ ແລະ ຜູ້ແທນສະພາປະຊາຊົນທຸກຂັ້ນສຳລັບວາລະປີ 2016-2021, ທຽບກັບລາຍຊື່ທີ່ນຳສະເໜີໃນກອງປະຊຸມປຶກສາຫາລືຄັ້ງທຳອິດ, ຜ່ານການປຶກສາຫາລືຫຼາຍຄັ້ງ, ຄະນະກຳມະການແນວໂຮມປະເທດຊາດຫວຽດນາມທຸກຂັ້ນ ໄດ້ຕັດລາຍຊື່ຜູ້ສະໝັກຮັບຕຳແໜ່ງຜູ້ແທນສະພາແຫ່ງຊາດຈຳນວນ 150 ຄົນ ແລະຜູ້ສະໝັກຮັບຕຳແໜ່ງຜູ້ແທນສະພາປະຊາຊົນທຸກຂັ້ນຈຳນວນ 63.607 ຄົນ ເນື່ອງຈາກໃນປະຈຸບັນມີການລະເມີດນະໂຍບາຍ, ກົດໝາຍ, ສໍ້ລາດບັງຫຼວງ, ມີຄວາມຫຍໍ້ທໍ້, ລະເມີດຈະລິຍະທຳ ແລະວິຖີຊີວິດ, ແລະ ບໍ່ໄດ້ຮັບຄວາມໄວ້ວາງໃຈຈາກຜູ້ລົງຄະແນນສຽງໃນສະຖານທີ່ເຮັດວຽກ ຫຼືທີ່ຢູ່ອາໄສ (ລາຍງານສະບັບໝາຍເລກ 259/BC-MTTW, ລົງວັນທີ 8 ກໍລະກົດ 2016, ຂອງຄະນະປະຈຳຄະນະກຳມະການສູນກາງແນວໂຮມປະເທດຊາດຫວຽດນາມ ກ່ຽວກັບການສະຫຼຸບຜົນງານຂອງແນວໂຮມເຂົ້າຮ່ວມການເລືອກຕັ້ງ).
ໃນການເລືອກຕັ້ງຜູ້ແທນສະພາແຫ່ງຊາດ ແລະ ຜູ້ແທນສະພາປະຊາຊົນທຸກຂັ້ນສຳລັບວາລະປີ 2021-2026, ຄະນະປະຈຳຄະນະກຳມະການສູນກາງແນວໂຮມປະເທດຊາດຫວຽດນາມ ໄດ້ຈັດຕັ້ງຄະນະເຮັດວຽກ 9 ຄະນະ ເພື່ອກວດກາ ແລະ ຕີດຕາມກວດກາວຽກງານເລືອກຕັ້ງ, ໃນນັ້ນ ຈັດຕັ້ງການກວດກາແລະຕິດຕາມກວດກາໂດຍກົງໃນ 22 ແຂວງແລະນະຄອນທີ່ຂຶ້ນກັບສູນກາງ; ຄະນະກຳມະການແນວໂຮມປະເທດຊາດຫວຽດນາມປະຈຳແຂວງ ເປັນປະທານໃນການຈັດຄະນະກວດກາ ແລະຕິດຕາມກວດກາການເລືອກຕັ້ງຈຳນວນ 480 ຄະນະ, ປະສານງານແລະປະກອບສ່ວນໃນການກວດກາແລະຕິດຕາມກວດກາໃນ 845 ຄະນະ; ຄະນະກຳມະການແນວໂຮມປະເທດຊາດຫວຽດນາມປະຈຳເມືອງ ເປັນປະທານໃນການຈັດຄະນະກວດກາ ແລະຕິດຕາມກວດກາການເລືອກຕັ້ງຈຳນວນ 2.764 ຄະນະ, ປະສານງານແລະປະກອບສ່ວນໃນການກວດກາແລະຕິດຕາມກວດກາໃນ 4.269 ຄະນະ; ຄະນະກຳມະການແນວໂຮມປະເທດຊາດຫວຽດນາມປະຈຳຕາແສງ ເປັນປະທານໃນການຈັດຄະນະກວດກາ ແລະຕິດຕາມກວດກາການເລືອກຕັ້ງຈຳນວນ 18.490 ຄະນະ, ປະສານງານແລະປະກອບສ່ວນໃນການກວດກາແລະຕິດຕາມກວດກາໃນ 23.696 ຄະນະ.
(6) ປີ 2020, ຜູ້ຕາງໜ້າຄະນະປະຈຳ ຄະນະກຳມະການສູນກາງແນວໂຮມປະເທດຊາດຫວຽດນາມ ເປັນສະມາຊິກສະພາຄັດເລືອກໄອຍະການ, ອົງການໄອຍະການປະຊາຊົນສູງສຸດ ໄດ້ປະກອບຄຳເຫັນໃສ່ 8 ເອກະສານແຕ່ງຕັ້ງໄອຍະການ, ອົງການໄອຍະການປະຊາຊົນສູງສຸດ; ໃຫ້ຄວາມຄິດເຫັນກ່ຽວກັບເອກະສານສະໝັກສອບໄອຍະການ ອົງການໄອຍະການປະຊາຊົນທຸກຂັ້ນ ຈຳນວນ 1.561 ລາຍການ.
(7) ປີ 2020, ຜູ້ຕາງໜ້າຄະນະປະຈຳ ຄະນະກຳມະການສູນກາງແນວໂຮມປະເທດຊາດຫວຽດນາມ ເປັນສະມາຊິກສະພາຄັດເລືອກແລະຕິດຕາມກວດກາຜູ້ພິພາກສາແຫ່ງຊາດ ໄດ້ປະສານໃຫ້ຄວາມເຫັນກ່ຽວກັບເອກະສານການແຕ່ງຕັ້ງ, ການແຕ່ງຕັ້ງຄືນໃໝ່, ຍົກເລີກ, ປົດຕຳແໜ່ງຜູ້ພິພາກສາສານປະຊາຊົນທຸກຂັ້ນ ຈຳນວນ 729 ລາຍການ.
- ບົດນີ້ໄດ້ລົງພິມໃນວາລະສານກອມມູນິດ ສະບັບທີ 1011 (ເດືອນເມສາ 2023)
