ປ່ຽນແປງໃໝ່ແບບວິທີການນຳພາຂອງພັກ
ຜ່ານການເປັນແບບຢ່າງດ້ານຄຸນສົມບັດປະຕິວັດ
ຜ່ານການເປັນແບບຢ່າງດ້ານຄຸນສົມບັດປະຕິວັດ
ການເປັນແບບຢ່າງດ້ານຄຸນສົມບັດປະຕິວັດ ໃນແນວຄິດຂອງໂຮ່ຈີມິນ
ປະທານໂຮ່ຈີມິນ ໄດ້ເອົາໃຈໃສ່ເປັນພິເສດເຖິງການເປັນແບບຢ່າງດ້ານຄຸນສົມບັດສິນທຳປະຕິວັດຂອງພັກ ແລະ ຍົກສູງປະສິດທິຜົນແບບວິທີການນຳພາຂອງພັກ. ນີ້ແມ່ນບັນຫາສຳຄັນທີ່ສຸດ ສຳລັບວຽກງານກໍ່ສ້າງພັກ, ພິເສດແມ່ນໃນເງື່ອນໄຂພັກກຳອຳນາດ.
ປະທານໂຮ່ຈີມິນ ໄດ້ກ່າວຫຼາຍຄັ້ງເຖິງບັນຫາ “ການເປັນແບບຢ່າງ” ຂອງພະນັກງານ ສະມາຊິກພັກ ແລະ ປະຊາຊົນ. ທ່ານຊີ້ອອກວ່າ: “ສະມາຊິກພັກ, ບໍ່ວ່າຈະຢູ່ໃສ, ເຮັດວຽກງານໃດກໍຕາມ, ໃນສະຖານະການ ແລະ ສະພາບການໃດກໍ່ຕ້ອງ: - ຖືຜົນປະໂຫຍດຂອງຊາດ ແລະ ປະຊາຊົນເປັນອັນດັບໜຶ່ງ./ - ຕ້ອງພະຍາຍາມສຸດຂີດ ເພື່ອເຂົ້າຮ່ວມໃນວຽກງານການຕໍ່ຕ້ານ./ - ຕ້ອງໃກ້ຊິດປະຊາຊົນ, ຮັກແພງແລະຊ່ວຍເຫຼືອປະຊາຊົນ, ຈັດຕັ້ງແລະນໍາພາປະຊາຊົນ./ - ຕ້ອງຮັກສາຄຸນສົມບັດປະຕິວັດ, ເຫັນແກ່ສ່ວນລວມບໍ່ເຫັນແກ່ສ່ວນຕົວ”(1); “ຕັດສິນໃຈຕໍ່ສູ້ເພື່ອພັກ ແລະ ການປະຕິວັດຕະຫຼອດຊີວິດ. ນັ້ນແມ່ນສິ່ງສຳຄັນທີ່ສຸດ./ ອອກແຮງເຮັດວຽກໃຫ້ພັກ, ຮັກສາລະບຽບວິໄນຂອງພັກ, ປະຕິບັດແນວທາງ, ນະໂຍບາຍຂອງພັກໃຫ້ດີ/... ເພື່ອພັກແລະປະຊາຊົນ ຕໍ່ສູ້ຢ່າງບໍ່ເຫັນແກ່ຕົວ ແລະເປັນແບບຢ່າງໃນທຸກດ້ານທຸກວຽກງານ”(2). ນີ້ແມ່ນມາດຖານຄຸນສົມບັດປະຕິວັດທີ່ພະນັກງານ ສະມາຊິກພັກຕ້ອງມີ ເພື່ອໃຫ້ມະຫາຊົນຮັບຮູ້ ຮຽນຮູ້ ແລະ ປະຕິບັດຕາມ.
ປະທານໂຮ່ຈີມິນຍາມໃດກໍ່ຖືຄຸນສົມບັດສິນທຳແມ່ນຮາກຖານ ແລະ “ແກ່ນຫຼັກ” ຂອງວັດທະນະທຳສັງຄົມ. ເພິ່ນເຊື່ອວ່າ ຖ້າທ່ານມີຄຸນສົມບັດປະຕິວັດ, “ເມື່ອຕ້ອງປະເຊີນກັບຄວາມຫຍຸ້ງຍາກ, ຄວາມລໍາບາກ ຫຼືຄວາມລົ້ມເຫຼວ, ທ່ານຈະບໍ່ຢ້ານ, ບໍ່ຂີ້ອາຍ, ຫຼືຖອຍຫຼັງ... ເມື່ອຈໍາເປັນ ຈະເຕັມໃຈສະຫຼະຊີວິດໂດຍບໍ່ເສຍດາຍ”(3); “ເມື່ອປະເຊີນກັບເງື່ອນໄຂແລະຄວາມສຳເລັດທີ່ເອື້ອອຳນວຍ ຍັງຄົງຮັກສາຈິດໃຈແຫ່ງຄວາມອົດທົນ, ຄວາມລຽບງ່າຍ, ຄວາມຖ່ອມຕົວ, “ກັງວົນກ່ອນຄົນອື່ນ, ຊື່ນຊົມຍິນດີພາຍຫຼັງຜູ້ອື່ນ”; ກັງວົນກ່ຽວກັບການສໍາເລັດວຽກງານໄດ້ດີ, ບໍ່ຕ້ອງກັງວົນກ່ຽວກັບຄວາມສຸກ; ບໍ່ອວດອ້າງຄຸນງາມຄວາມດີ, ບໍ່ມີພະຍາດອາດຍາສິດ, ບໍ່ມີຄວາມຈອງຫອງ, ບໍ່ເສຍຄຸນປ່ຽນທາດ”(4). ຖັນແຖວພະນັກງານ ສະມາຊິກພັກຕ້ອງຝຶກຝົນຫຼໍ່ຫຼອມຄຸນສົມບັດປະຕິວັດ ຢ່າງສະໝ່ຳສະເໝີ ເພື່ອເປັນກຳລັງບຸກເບີກນຳໜ້າດ້ານສະຕິປັນຍາ, ຄຸນສົມບັດສິນທຳ ແລະເປັນ “ເມັດພັນ” ທີ່ດີ ເພື່ອເຜີຍແຜ່ສູ່ສັງຄົມ.
ພັກຂອງພວກເຮົາແມ່ນ “ພັກກຳອຳນາດ”, “ພັກຂອງທົ່ວປວງຊົນ”, “ພັກຂອງທົ່ວປະເທດ”, ແມ່ນກອງກຳລັງນຳໜ້າ, ເປັນຕົວແທນທີ່ຈົງຮັກພັກດີຂອງຊົນຊັ້ນກຳມະກອນ, ປະຊາຊົນຜູ້ອອກແຮງງານ ແລະ ຂອງປະເທດຊາດ. “ພັກເຮົາຍິ່ງໃຫຍ່, ເພາະນອກຈາກຜົນປະໂຫຍດຂອງຊົນຊັ້ນ ຂອງປະຊາຊົນ ຂອງປະເທດຊາດແລ້ວ, ພັກເຮົາບໍ່ມີຜົນປະໂຫຍດອື່ນໃດ”(5). ແຫຼ່ງກຳລັງແຮງຂອງພັກແມ່ນຢູ່ໃນການຕິດພັນກັບປະຊາຊົນ. ສະນັ້ນ, ເພື່ອສົມກຽດເປັນກຳລັງນຳພາການປະຕິວັດຂອງປະເທດຊາດ, ພັກຕ້ອງກໍ່ສ້າງ ປັບປຸງ ແລະ ປະດິດສ້າງຢ່າງບໍ່ຢຸດຢັ້ງ; ຖັນແຖວພະນັກງານ ສະມາຊິກພັກຕ້ອງສືບຕໍ່ປູກຝັງ ຝຶກຝົນຫຼໍ່ຫຼອມ ອຸທິດຕົນ ເພື່ອປະເທດຊາດ, ເພື່ອປະຊາຊົນ, ຮັກສາລັກສະນະຊົນຊັ້ນ, ຄວາມກ້າຫານທາງດ້ານການເມືອງ ປະຕິວັດ ນຳໜ້າປະຈັນບານ; ຕໍ່ສູ້ຕ້ານການລ່ວງອຳນາດແລະການສໍ້ລາດບັງຫຼວງ, ຄວາມຮັ່ງມີບໍ່ສາມາດຊັກຈູງໄດ້, ຄວາມທຸກຍາກບໍ່ສາມາດສັ່ນສະເທືອນໄດ້, ອຳນາດບໍ່ສາມາດເຮັດໃຫ້ອ່ອນຍອມໄດ້.
ທ່ານປະທານໂຮ່ຈີມິນ ຊີ້ແຈງວ່າ “ຄຸນສົມບັດປະຕິວັດ ຂອງສະມາຊິກພັກ ແມ່ນ ບໍ່ວ່າຈະຫຍຸ້ງຍາກປານໃດ ກໍ່ຕ້ອງປະຕິບັດຕາມນະໂຍບາຍ ແລະ ມະຕິຂອງພັກຢ່າງເດັດດ່ຽວ, ເປັນແບບຢ່າງໃຫ້ມະຫາຊົນປະຕິບັດຕາມ. ສະມາຊິກພັກທຸກຄົນ ຕ້ອງເສີມຂະຫຍາຍສະຕິຄວາມຮັບຜິດຊອບ ຕໍ່ໜ້າປະຊາຊົນ ແລະ ພັກ; ຕ້ອງປ້ອງກັນ ແລະ ຕ້ານລັດທິອັດຕະບຸກຄົນ ຢ່າງເດັດດ່ຽວ”(6). ເພື່ອປຸກລະດົມ ເຕົ້າໂຮມ ຊີ້ນຳແລະນຳພາມະຫາຊົນໄປຕາມພັກ, ພະນັກງານ ສະມາຊິກພັກທຸກຄົນຕ້ອງເປັນແບບຢ່າງທາງດ້ານຄຸນສົມບັດປະຕິວັດ. ພະນັກງານ ສະມາຊິກພັກຕ້ອງເປັນແບບຢ່າງໃຫ້ປະຊາຊົນເຊື່ອຟັງ ແລະ ປະຕິບັດຕາມ. ພະນັກງານ ສະມາຊິກພັກທີ່ມີຕຳແໜ່ງສູງເທົ່າໃດ ຕ້ອງມີຄວາມຮັບຜິດຊອບໃນການເປັນຕົວຢ່າງສູງເທົ່ານັ້ນ. ເຂົາຕ້ອງເປັນແບບຢ່າງໃນການບຳລຸງສ້າງອຸດົມການ ແລະ ຄຸນສົມບັດປະຕິວັດ, ໃນການຝຶກຝົນຫຼໍ່ຫຼອມ ແລະ ຮັກສາຄວາມຈົງຮັກພັກດີຕໍ່ພັກ, ກະຕັນຍູຕໍ່ປະຊາຊົນ; ເປັນແບບຢ່າງໃນການອຸທິດຕົນ ເປັນເຈົ້າການ ປະດິດສ້າງ ກ້າຄິດ ກ້າເວົ້າ ກ້າກະທຳ ກ້າຮັບຜິດຊອບ ໃນການປະຕິບັດງານຕາມຄວາມຮັບຜິດຊອບ ແລະ ໜ້າທີ່ທີ່ໄດ້ຮັບມອບໝາຍ; ເປັນແບບຢ່າງໃນການຕິຊົມຕົນເອງແລະຕິຊົມ, ໃນການຊາບຊຶມ ແລະປະຕິບັດຕາມແນວທາງ ທັດສະນະ ແຜນນະໂຍບາຍຂອງພັກ, ນະໂຍບາຍ ກົດໝາຍຂອງລັດ ຢ່າງເຂັ້ມງວດ. ບັນດາເນື້ອໃນນີ້ ມີຄວາມໝາຍສຳຄັນທີ່ສຸດ, ສ້າງປະສິດທິຜົນສູງສຸດ ໃນວຽກງານການນຳພາຂອງພັກ, ທະວີຄູນກຳລັງແຮງພາຍໃນອັນໃຫຍ່ຫຼວງ ຂອງປະເທດຊາດ ໃນທຸກສະຖານະການ.
ປະທານໂຮ່ຈີມິນເນັ້ນໜັກວ່າ ແບບຢ່າງທີ່ມີຊີວິດມີຄ່າຫຼາຍກວ່າສຸນທອນພົດໂຄສະນາຊວນເຊື່ອຫຼາຍຮ້ອຍລາຍການ; ການຍົກຕົວຢ່າງຄົນດີ ແລະ ເຮັດຄວາມດີ ໃນແຕ່ລະມື້ ເພື່ອສຶກສາອົບຮົມເຊິ່ງກັນແລະກັນ ແມ່ນໜຶ່ງໃນວິທີດີທີ່ສຸດ ໃນການກໍ່ສ້າງພັກ. ພະນັກງານ ສະມາຊິກພັກ ເຖິງວ່າຈະຢູ່ໃນຕໍາແໜ່ງໃດ, ຖ້າມີຫົວໃຈ ວິໄສທັດ ຄວາມສາມາດ ມີຄຸນສົມບັດສິນທຳ ແລະ “ຄຳເວົ້າໄປຄຽງຄູ່ກັບການກະທຳ” ກໍຈະແຜ່ກະຈາຍ ສ້າງຜົນກະທົບທາງບວກຕໍ່ຊຸມຊົນ, ຊ່ວຍໃຫ້ມວນຊົນທົບທວນຕົນເອງ, ແກ້ໄຂຕົນເອງ, ປັບປຸງຕົນເອງ. ຜ່ານການຍົກເປັນແບບຢ່າງຂອງພະນັກງານ ສະມາຊິກພັກ, ແບບວິທີການນຳພາຂອງພັກ ຈະໄດ້ຮັບການເສີມຂະຫຍາຍ, ທະວີຄູນກຳລັງແຮງ, ຍົກສູງຄວາມສາມາດນຳພາ ເພື່ອໃຫ້ພັກນຳພາມະຫາຊົນປະຕິບັດທຸກວຽກງານຂອງການປະຕິວັດ ຢ່າງສຳເລັດຜົນ.
ຕາມທ່ານປະທານໂຮ່ຈິມິນ, ການເປັນແບບຢ່າງທາງດ້ານຄຸນສົມບັດຕ້ອງໄດ້ປະຕິບັດໃນສາມສາຍພົວພັນຄື: ຕໍ່ຕົນເອງ, ຕ້ອງມີຄວາມຂະຫຍັນໝັ້ນພຽນ ປະຫຍັດ ຊື່ສັດ ແລະທ່ຽງທຳ; “ຄວາມເມດຕາ, ຄວາມຊອບທໍາ, ມີປັນຍາ ຄວາມກ້າຫານ ຄວາມຊື່ສັດ"; ເປັນແບບຢ່າງໃນການເຮັດວຽກ ຕັ້ງແຕ່ວຽກນ້ອຍ ຈົນເຖິງວຽກໃຫຍ່, ສຶກສາແລະຝຶກຝົນຢ່າງສະໝ່ຳສະເໝີ, ປັບປຸງຕົນເອງຢ່າງຕໍ່ເນື່ອງ. ຕໍ່ຜູ້ອື່ນ, ຕ້ອງມີຄວາມຊື່ສັດ ຈິງໃຈ ຖ່ອມຕົວ ສາມັກຄີ ຮັກແພງ ຊ່ວຍເຫຼືອເພື່ອນມິດ ແລະເພື່ອນຮ່ວມງານ, ຜູກພັນສະໜິດແໜ້ນກັບປະຊາຊົນ. ຕໍ່ວຽກງານ, ຕ້ອງອຸທິດຕົນ ສຸດອົກສຸດໃຈ, ເຫັນແກ່ສ່ວນລວມບໍ່ເຫັນແກ່ສ່ວນຕົວ ເປັນແບບຢ່າງ ເປັນຜູ້ນຳໜ້າ, ມີຄວາມຮັບຜິດຊອບ. ປະທານໂຮ່ຈິມິນຍັງໄດ້ຊີ້ໃຫ້ເຫັນ 3 ຫຼັກການ ໃນການສ້າງຄຸນສົມບັດໃໝ່ ໃຫ້ແກ່ພະນັກງານ ສະມາຊິກຂອງພັກ ນັ້ນຄື: 1- ເວົ້າໄປຄວບຄູ່ກັບການກະທຳ, ເປັນແບບຢ່າງທາງດ້ານຄຸນສົມບັດ; 2- ການສ້າງໄປຄຽງຄູ່ກັບການຕ້ານ. ການສ້າງຄຸນສົມບັດປະຕິວັດຕ້ອງຕິດພັນກັບການຕໍ່ສູ້ຕ້ານລັດທິອັດຕະບຸກຄົນ; 3- ຝຶກຝົນຫຼໍ່ຫຼອມຄຸນສົມບັດປະຕິວັດຕະຫຼອດຊີວິດ.
ເພື່ອໃຫ້ການເປັນແບບຢ່າງດ້ານຄຸນສົມບັດປະຕິວັດ ກາຍເປັນແບບວິທີ
ການນຳພາທີ່ມີປະສິດທິຜົນຂອງພັກ ໃນໄລຍະການພັດທະນາໃໝ່
ໃນຂະບວນການນຳພາການປະຕິວັດໃນຕະຫຼອດ 93 ປີຜ່ານມາ, ພັກກອມມູນິດຫວຽດນາມ ຍາມໃດກໍ່ເອົາໃຈໃສ່ປະຕິບັດວິທີການຍົກເປັນແບບຢ່າງດ້ານຄຸນສົມບັດປະຕິວັດຂອງພະນັກງານ, ສະມາຊິກພັກ; ເອົາໃຈໃສ່ເຖິງການສະຫຼຸບສັງລວມວຽກງານປະຕິບັດ ແລະ ພັດທະນາທິດສະດີກ່ຽວກັບການກໍ່ສ້າງພັກ ເພື່ອປ່ຽນແປງໃໝ່ ແລະ ຍົກສູງປະສິດທິຜົນຂອງແບບວິທີການນຳພາຢ່າງບໍ່ຢຸດຢັ້ງ, ປະຕິບັດບົດບາດ “ນຳພາປະເທດແລະສັງຄົມ”. ປະເທດຊາດມີພາລະໂອກາດ, ທ່າແຮງ, ທີ່ຕັ້ງ ແລະ ຊື່ສຽງສາກົນຄືທຸກວັນນີ້ ແມ່ນຍ້ອນການນຳພາອັນຖືກຕ້ອງຂອງພັກ, ການອຸທິດຕົນ ຄວາມສຸດອົກສຸດໃຈ ແລະ ການເສຍສະຫຼະ ຂອງພະນັກງານ ນັກຮົບ ສະມາຊິກພັກຫຼາຍລຸ້ນຄົນ, ການເປັນແບບຢ່າງທີ່ດີ, ຄວາມຈົງຮັກພັກດີຕໍ່ປະເທດຊາດ ຕໍ່ພັກ ແລະ ກະຕັນຍູຕໍ່ປະຊາຊົນ.
ເຖິງຢ່າງນັ້ນກໍ່ຕາມ, ດັ່ງທີ່ປະທານໂຮ່ຈີມິນຊີ້ອອກວ່າ “ໃນບັນດາພະນັກງານແລະສະມາຊິກພັກທີ່ມີຄ່າຄວນຫຼາຍໝື່ນຄົນ ຍັງມີຄົນອີກຈຳນວນໜຶ່ງທີ່ມີຈິດໃຈ ແລະຄຸນສົມບັດປະຕິວັດຕ່ຳ. ພວກເຂົາຍັງມີແນວຄິດລັດທິອັດຕະບຸກຄົນ ໃນຕົວຂອງເຂົາເຈົ້າເອງ”(7). ຖັນແຖວພະນັກງານ ສະມາຊິກພັກຕ້ອງຝຶກຝົນຫຼໍ່ຫຼອມ ແລະບຳລຸງສ້າງຕົນເອງເປັນປະຈຳ, ຕ້ອງຮັກສາຄຸນສົມບັດ ຄຸນທຳຂອງນັກປະຕິວັດ; ການຂາດການຝຶກຝົນຫຼໍ່ຫຼອມຄຸນສົມບັດສິນທຳ ຈະນຳໄປສູ່ການເສື່ອມໂຊມທາງດ້ານ ແນວຄິດການເມືອງ, ຄຸນສົມບັດສິນທຳ, ວິຖີຊີວິດ, “ການປ່ຽນແປງຕົນເອງ”, “ການຫັນປ່ຽນຕົນເອງ”, ຕິດພະຍາດອາດຍາສິດ, ສໍ້ລາດບັງຫຼວງ, ການໃຊ້ຈ່າຍຟຸມເຟືອຍ, ການລະເມີດວິໄນຂອງພັກ ແລະກົດໝາຍຂອງລັດ. ນັກປະຕິວັດຕ້ອງມີຄຸນສົມບັດປະຕິວັດ, ຖ້າບໍ່ມີຄຸນສົມບັດປະຕິວັດ “ບໍ່ວ່າເຈົ້າຈະມີຄວາມສາມາດປານໃດ, ເຈົ້າກໍ່ບໍ່ສາມາດນໍາພາປະຊາຊົນໄດ້”(8).
ໃນໂຄງການການເມືອງກໍ່ສ້າງປະເທດໃນສະໄໝຂ້າມຜ່ານຂຶ້ນສູ່ສັງຄົມນິຍົມ (ສະບັບເພີ່ມເຕີມ ແລະ ພັດທະນາປີ 2011) ພັກກອມມູນິດຫວຽດນາມ ໄດ້ຊີ້ແຈງທັດສະນະຂອງຕົນຢ່າງຈະແຈ້ງວ່າ: ໜຶ່ງໃນ 8 ທິດທາງເພື່ອໃຫ້ປະເທດເຮົາກາຍເປັນປະເທດອຸດສາຫະກຳທັນສະໄໝ ຕາມທິດທາງສັງຄົມນິຍົມ ໃນກາງສະຕະວັດທີ 21 ແມ່ນສ້າງພັກທີ່ສະອາດປອດໃສ ແລະ ໝັ້ນຄົງເຂັ້ມແຂງ. ພັກກອມມູນິດຫວຽດນາມແມ່ນພັກກຳອຳນາດ, ນຳພາລັດ ແລະ ສັງຄົມ. ເພື່ອຮັບປະກັນບົດບາດນຳພາຂອງພັກ, ຄຽງຄູ່ກັບຄວາມເຂັ້ມແຂງທາງການເມືອງ, ແນວຄິດ ແລະ ການຈັດຕັ້ງ, ພວກເຮົາຕ້ອງສຸມໃສ່ການກໍ່ສ້າງພັກທາງດ້ານຄຸນສົມບັດສິນທຳ, ຕໍ່ສູ້ຕ້ານລັດທິອັດຕະບຸກຄົນ, ລັດທິສວຍໂອກາດ, ພະຍາດອາດຍາສິດ, ການສໍ້ລາດບັງຫຼວງ ແລະການໃຊ້ຈ່າຍຟຸມເຟືອຍ. ຖ້າບໍ່ບັນລຸເປົ້າໝາຍນີ້, ພັກຈະອ່ອນເພຍ ແລະ ບໍ່ສາມາດຮັກສາບົດບາດຂອງຕົນ ໃນການກຳອຳນາດ ແລະ ນຳພາພາລະກິດການປ່ຽນແປງໃໝ່.
ມະຕິເລກທີ 15-NQ/TW, ລົງວັນທີ 30 ກໍລະກົດ 2007 ຂອງຄະນະບໍລິຫານງານສູນກາງພັກ “ວ່າດ້ວຍການສືບຕໍ່ປ່ຽນແປງໃໝ່ແບບວິທີການນຳພາຂອງພັກ ຕໍ່ການເຄື່ອນໄຫວຂອງລະບົບການເມືອງ” ແມ່ນບາດກ້າວທີ່ສຳຄັນ, ຕີລາຄາຂະບວນການ 20 ກວ່າປີແຫ່ງການປ່ຽນແປງໃໝ່ຈິຕະນາການ, ຄວາມຮັບຮູ້ ແລະ ແບບວິທີການນຳພາຂອງພັກ ຕິດກັບການປ່ຽນແປງໃໝ່ປະເທດຢ່າງຮອບດ້ານ ນັບແຕ່ກອງປະຊຸມໃຫຍ່ຄັ້ງທີ VI ຂອງພັກ (ປີ 1986); ກຳນົດທິດທາງ, ໜ້າທີ່ ແລະ ວິທີແກ້ໄຂສະເພາະ ເພື່ອສືບຕໍ່ປ່ຽນແປງໃໝ່ແບບວິທີການນຳພາຂອງພັກ ໃນລະບົບການເມືອງ. ບົນພື້ນຖານນັ້ນ, ວັນທີ 17 ພະຈິກ 2022, ທີ່ກອງປະຊຸມຄົບຄະນະຄັ້ງທີ 6 ຂອງຄະນະບໍລິຫານງານສູນກາງພັກ ຊຸດທີ XIII ໄດ້ອອກມະຕິເລກທີ 28-NQ/TW “ວ່າດ້ວຍການສືບຕໍ່ປ່ຽນແປງໃໝ່ ແບບວິທີການນຳພາ ແລະກຳອຳນາດຂອງພັກ ຕໍ່ລະບົບການເມືອງໃນໄລຍະໃໝ່”. ໜຶ່ງໃນ 6 ໜ້າທີ່ແລະວິທີແກ້ໄຂ ທີ່ໄດ້ຮັບການເນັ້ນໜັກ ໂດຍມະຕິເລກທີ 28-NQ/TW ຄື: ເສີມຂະຫຍາຍບົດບາດ ແລະ ຄວາມຮັບຜິດຊອບ ໃນການເປັນແບບຢ່າງຂອງພະນັກງານ ສະມາຊິກພັກ; ຈາກນັ້ນ ນຳໄປສູ່ການປ່ຽນແປງຢ່າງຕັ້ງໜ້າ ໃນວິທີການແລະແບບແຜນການເຮັດວຽກ, ວິທີການນຳພາ, ປະສິດທິຜົນການເຄື່ອນໄຫວຂອງທຸກຂັ້ນ, ຂະແໜງການ, ອົງການການເມືອງ-ສັງຄົມ ພາຍໃຕ້ການນຳພາຂອງພັກ, ໂດຍຜ່ານການຈັດຕັ້ງປະຕິບັດໂຄງການການເມືອງ, ຍຸດທະສາດ, ທິດທາງນະໂຍບາຍ ແລະແຜນນະໂຍບາຍໃຫຍ່; ໂດຍຜ່ານການໂຄສະນາເຜີຍແຜ່ ຊັກຊວນ ປຸກລະດົມ, ການຈັດຕັ້ງ, ການກວດກາ, ການຕິດຕາມກວດກາ ແລະ ດ້ວຍການກະທຳເປັນແບບຢ່າງ ຂອງພະນັກງານ ແລະ ສະມາຊິກພັກ.
ໃນໄລຍະຜ່ານມາ, ໃນທົ່ວປະເທດມີຫຼາຍແບບຢ່າງທີ່ດີເດັ່ນ ແລະ ຮູບແບບທີ່ພົ້ນເດັ່ນ(9) ໃນການຮ່ຳຮຽນ ແລະ ການປະຕິບັດຕາມແນວຄິດ ຄຸນສົມບັດ ແລະແບບແຜນຂອງໂຮ່ຈີມິນ. ຈາກການຮ່ຳຮຽນ ແລະ ການປະຕິບັດຕາມລຸງໂຮ່, ມີຫຼາຍວິທີການທີ່ດີ ແລະປະດິດສ້າງ ໃນການຝຶກຝົນຫຼໍ່ຫຼອມ ແລະການຍົກເປັນແບບຢ່າງ ທາງດ້ານຄຸນສົມບັດປະຕິວັດ ເຊິ່ງໄດ້ຮັບການເສີມຂະຫຍາຍ ແລະຂະຫຍາຍກວ້າງ, ປະກອບສ່ວນເຜີຍແຜ່ຢ່າງກ້ວາງຂວາງພາຍໃນພັກ ແລະ ທົ່ວປວງຊົນ(10).
ທີ່ກອງປະຊຸມຄົບຄະນະຄັ້ງທີ 8 ຂອງຄະນະບໍລິຫານງານສູນກາງພັກຊຸດທີ XII, ທ່ານເລຂາທິການໃຫຍ່ ຫງວຽນ ຝູ ຈ້ອງ ຢືນຢັນວ່າ: ຍ້ອນແຜນນະໂຍບາຍແລະຂໍ້ບັງຄັບທີ່ຖືກຕ້ອງ ແລະທັນການຂອງຄະນະບໍລິຫານງານສູນກາງ, ກົມການເມືອງສູນກາງ ແລະ ຄະນະເລຂາທິການສູນກາງ ກ່ຽວກັບຄວາມຮັບຜິດຊອບເປັນແບບຢ່າງ, ສະນັ້ນ, ຄວາມຮູ້ສຶກຮັບຜິດຊອບຂອງພະນັກງານ ສະມາຊິກພັກ ຈຶ່ງໄດ້ຮັບການຍົກສູງຂຶ້ນເທື່ອລະກ້າວ, ຈາກນັ້ນມີການປະຕິບັດຕົວຈິງ ໃນການເຮັດວຽກ ແລະ ຊີວິດການເປັນຢູ່, ສ້າງການປ່ຽນແປງທາງດ້ານແນວຄິດການເມືອງ, ຄຸນສົມບັດ ວິຖີຊີວິດ ແລະ ແບບແຜນເຮັດວຽກ; ມີສະຕິຕໍ່ລະລະບຽບວິໄນ ແລະຄວາມສາມັກຄີພາຍໃນ. ການປະຕິບັດແຜນນະໂຍບາຍ, ຂໍ້ບັງຄັບຂອງພັກກ່ຽວກັບການເປັນແບບຢ່າງໄດ້ປະກອບສ່ວນປັບປຸງລະບຽບວິໄນຂອງພັກ; ຍົກສູງຄວາມສາມາດນຳພາ ແລະ ກຳລັງແຮງສູ້ຮົບຂອງອົງການພັກ ແລະ ສະມາຊິກພັກ; ປະກອບສ່ວນສະກັດກັ້ນແລະຍູ້ຖອຍ ການເສື່ອມໂຊມ ການສໍ້ລາດບັງຫຼວງ ປະກົດການຫຍໍ້ທໍ້, ປັບປຸງຄວາມໄວ້ວາງໃຈຂອງພະນັກງານ, ສະມາຊິກພັກ ແລະ ປະຊາຊົນໃນການນຳພາຂອງພັກ.
ພາຍຫຼັງກວ່າ 35 ປີແຫ່ງການປ່ຽນແປງໃໝ່, ປະເທດບັນລຸໄດ້ບັນດາຜົນງານອັນໃຫຍ່ຫຼວງ ທີ່ມີຄວາມໝາຍປະຫວັດສາດ, ບົດບາດທີ່ຕັ້ງ ກຳລັງແຮງສັງລວມ ແລະ ກຽດສັກສີຂອງປະເທດໃນເວທີສາກົນ ໄດ້ຮັບການຍົກສູງຂຶ້ນ. ແຕ່ວ່າ, “ໄພອັນຕະລາຍ 4 ປະການທີ່ພັກໄດ້ຊີ້ອອກນັ້ນ ຍັງມີຢູ່, ບາງດ້ານຍັງຮ້າຍແຮງກວ່າແຕ່ກ່ອນ; ໄພຂົ່ມຂູ່ຕໍ່ເອກະລາດ, ອຳນາດອະທິປະໄຕ, ຜົນປະໂຫຍດຍຸດທະສາດຂອງປະເທດ... ພາວະການເສື່ອມໂຊມ, “ການຫັນປ່ຽນຕົນເອງ”, “ການປ່ຽນແປງຕົນເອງ” ຢູ່ພາຍໃນ; ການຕ້ານທານທໍາລາຍຢ່າງດຸເດືອດຂອງອິດທິກໍາລັງສັດຕູ ແລະ ພວກປະຕິການ”(11). ພະນັກງານ ສະມາຊິກພັກຈໍານວນໜຶ່ງ ຍັງບໍ່ທັນປະຈັນບານນຳໜ້າ ແລະ ເປັນແບບຢ່າງ, ຍັງບໍ່ທັນເສີມຂະຍາຍຄວາມຮັບຜິດຊອບຂອງຕົນຢ່າງເຕັມສ່ວນ, ຂາດຄວາມກ້າຫານ, ຍັງຢູ່ໃນທ່າຮັບ, ຫຼົບຫຼີກການເຮັດວຽກ, ເພິ່ງພາອາໃສຂັ້ນເທິງ; ການປະຕິບັດຄວາມຮັບຜິດຊອບໃນການເປັນແບບຢ່າງ, ໂດຍສະເພາະຄວາມເປັນແບບຢ່າງຂອງຫົວໜ້າ, ບໍ່ໄດ້ສ້າງຜົນກະທົບທາງບວກຢ່າງແທ້ຈິງ.
ຄວາມຮຽກຮ້ອງຕ້ອງການອັນຮີບດ່ວນຂອງພຶດຕິກຳໃຫ້ເຫັນວ່າ ຕ້ອງເອົາໃຈໃສ່ເປັນພິເສດ ແລະ ຊຸກຍູ້ວຽກງານກໍ່ສ້າງພັກ ແລະລະບອບການເມືອງ ໃຫ້ປອດໃສ ແລະເຂັ້ມແຂງ ຢ່າງແທ້ຈິງ; ກໍ່ສ້າງຖັນແຖວພະນັກງານ ສະມາຊິກພັກທີ່ເປັນແບບຢ່າງ, ມີຄຸນສົມບັດປະຕິວັດທີ່ບໍລິສຸດ, ມີຄວາມສາມາດພຽງພໍ, ປະກອບສ່ວນເພີ່ມທະວີ ແລະ ຍົກສູງປະສິດທິຜົນຂອງແບບວິທີການນຳພາຂອງພັກ ເພື່ອນຳພາປະເທດຊາດພັດທະນາຢ່າງວ່ອງໄວ ແລະ ຍືນຍົງໃນຊຸມປີຕໍ່ໜ້າ. ກອງປະຊຸມໃຫຍ່ຄັ້ງທີ XIII ຂອງພັກໄດ້ຢືນຢັນວ່າ: “ໃນຊຸມປີຈະມາເຖິງ, ຕ້ອງເອົາໃຈໃສ່ເປັນພິເສດເຖິງການກໍ່ສ້າງ ແລະ ປັບປຸງພັກຢ່າງຮອບດ້ານ ໃນດ້ານການເມືອງ ແນວຄິດ ຄຸນສົມບັດ, ການຈັດຕັ້ງ ແລະ ພະນັກງານ”(12). ສຸມໃສ່ການກໍ່ສ້າງພັກທາງດ້ານຄຸນສົມບັດ, ຕັ້ງໜ້າຕໍ່ສູ້ປ້ອງກັນ ແລະຕ້ານການສໍ້ລາດບັງຫຼວງ, ຕ້ານພະຍາດອາດຍາສິດ ການໃຊ້ຈ່າຍຟຸມເຟືອຍ ປະກົດການຫຍໍ້ທໍ້; ສະກັດກັ້ນ ແລະຍູ້ຖອຍພາວະການເສື່ອມໂຊມທາງດ້ານແນວຄິດການເມືອງ ຄຸນສົມບັດ ວິຖີຊີວິດ, ບັນດາປະກົດການ “ການປ່ຽນແປງຕົນເອງ” ແລະ “ການຫັນປ່ຽນຕົນເອງ” ພາຍໃນ ຢ່າງມີປະສິດທິຜົນ ໂດຍຕິດພັນກັບການຊຸກຍູ້ການຮ່ຳຮຽນ ແລະ ປະຕິບັດຕາມແນວຄິດ ຄຸນສົມບັດ ແລະ ແບບແຜນຂອງໂຮ່ຈີມິນ; ເສີມຂະຫຍາຍຄວາມຮັບຜິດຊອບໃນການເປັນແບບຢ່າງ ຂອງພະນັກງານ ສະມາຊິກພັກ. ທັດສະນະຂອງກອງປະຊຸມໃຫຍ່ຄັ້ງທີ XIII ຂອງພັກໄດ້ຍົກອອກມາຄື: ເສີມຂະຫຍາຍນ້ຳໃຈມີວິໄນ, ເປັນເຈົ້າຕົນເອງ ແລະ ບຳລຸງສ້າງຄຸນສົມບັດສິນທຳຂອງພະນັກງານ ສະມາຊິກພັກ. ຍົກສູງຈິດໃຈແຫ່ງຄວາມຕື່ນຕົວສະໝັກໃຈຝຶກຝົນຫຼໍ່ຫຼອມຄຸນສົມບັດ ຂອງພະນັກງານ ສະມາຊິກພັກ. ຍູ້ແຮງການສຶກສາອົບຮົມຄຸນສົມບັດປະຕິວັດ, ດຳເນີນການຮ່ຳຮຽນ ແລະປະຕິບັດຕາມແນວຄິດ ຄຸນສົມບັດ ແລະ ແບບແຜນຂອງໂຮ່ຈີມິນ ຢ່າງສະໝ່ຳສະເໝີ ກວ້າງຂວາງ ແລະມີປະສິດທິຜົນ ໂດຍຕິດພັນກັບການຈັດຕັ້ງປະຕິບັດວຽກງານການເມືອງ. ປະຕິບັດຂໍ້ບັງຄັບຂອງພັກ ກ່ຽວກັບຄວາມຮັບຜິດຊອບໃນການເປັນແບບຢ່າງ, ຜູ້ມີຕຳແໜ່ງສູງ ຍິ່ງຕ້ອງເປັນແບບຢ່າງຫຼາຍ, ກ່ອນອື່ນໝົດແມ່ນກຳມະການກົມການເມືອງສູນກາງ, ກຳມະການຄະນະເລຂາທິການສູນກາງ, ກຳມະການຄະນະບໍລິຫານງານສູນກາງພັກ. ສະມາຊິກພັກຕື່ນຕົວສະໝັກໃຈເປັນແບບຢ່າງ ເພື່ອຢືນຢັນຕຳແໜ່ງນຳພາ ແລະ ບົດບາດນຳໜ້າ ເປັນແບບຢ່າງ, ສ້າງການແຜ່ກະຈາຍ ແລະ ຊຸກຍູ້ບັນດາຂະບວນການປະຕິວັດ(13).
ຄຽງຄູ່ກັນນັ້ນ, ພັກຕ້ອງສຸມໃສ່ກໍ່ສ້າງຖັນແຖວພະນັກງານທຸກຂັ້ນ, ໂດຍສະເພາະ ພະນັກງານລະດັບຍຸດທະສາດ ໃຫ້ມີຄຸນສົມບັດ, ຄວາມສາມາດ ແລະ ກຽດສັກສີຢ່າງພຽງພໍ ທຽບເທົ່າກັບໜ້າທີ່ວຽກງານ... ກໍ່ສ້າງຖັນແຖວພະນັກງານ, ກ່ອນອື່ນໝົດແມ່ນຫົວໜ້າ ໃຫ້ມີຄວາມກ້າຫານທາງດ້ານການເມືອງ, ມີຄຸນສົມບັດທີ່ດີ, ມີຄວາມສາມາດໂດດເດັ່ນ, ກ້າຄິດ ກ້າເວົ້າ ກ້າເຮັດ ກ້າຮັບຜິດຊອບ ກ້າປ່ຽນແປງໃໝ່ປະດິດສ້າງ, ກ້າຮັບມືກັບຄວາມຫຍຸ້ງຍາກແລະສິ່ງທ້າທາຍ, ກ້າທີ່ຈະປະຕິບັດເພື່ອຜົນປະໂຫຍດລວມ, ມີຊື່ສຽງສູງ ແລະ ເປັນຜູ້ປະຈັນບານ ເປັນແບບຢ່າງຢ່າງແທ້ຈິງ ແລະ ເປັນແກນສານຂອງຄວາມສາມັກຄີ(14).
ເພື່ອໃຫ້ການເປັນແບບຢ່າງຄຸນສົມບັດປະຕິວັດ ກາຍເປັນແບບວິທີການນຳພາທີ່ມີປະສິດທິຜົນຂອງພັກ, ເສີມຂະຫຍາຍບົດບາດ ແລະ ຄວາມສາມາດຊີ້ນຳນຳພາຂອງພັກ, ຈຳເປັນຕ້ອງປະຕິບັດບັນດາມາດຕະການຕົ້ນຕໍດັ່ງນີ້:
ທີໜຶ່ງ, ຍົກສູງຄວາມຮັບຮູ້ ແລະ ຄວາມຮັບຜິດຊອບ ຂອງຄະນະພັກ, ອົງການຈັດຕັ້ງພັກທຸກຂັ້ນ, ຂອງຖັນແຖວພະນັກງານ ສະມາຊິກພັກ ກ່ຽວກັບການເປັນແບບຢ່າງ ແລະ “ສະໝັກໃຈເປັນແບບຢ່າງ” ຕາມທິດນຳທີ່ວ່າ “ຜູ້ມີຕຳແໜ່ງສູງ ຍິ່ງຕ້ອງເປັນແບບຢ່າງ”. ຕ້ອງຮັບຮູ້ຢ່າງເລິກເຊິ່ງວ່າ ການເປັນແບບຢ່າງແມ່ນຄວາມຮັບຜິດຊອບ ໜ້າທີ່ ແລະຄຸນສົມບັດສິນທຳຂອງພະນັກງານ ສະມາຊິກພັກຕໍ່ໜ້າພັກ ແລະປະຊາຊົນ. ຄວາມຮັບຜິດຊອບໃນການເປັນແບບຢ່າງຕ້ອງສະແດງອອກໃນແນວຄິດການເມືອງ ຄຸນສົມບັດ ວິຖີຊີວິດ, ການເຄື່ອນໄຫວຕິຊົມຕົນເອງ ແລະຕິຊົມ; ຈົນເຖິງການພົວພັນກັບປະຊາຊົນ, ໃນວຽກງານ, ຍົກສູງຈິດສຳນຶກກ່ຽວກັບລະບຽບວິໄນ, ຮັກສາຄວາມສາມັກຄີພາຍໃນ.
ພະນັກງານ ສະມາຊິກພັກມີຕຳແໜ່ງສູງ ຍິ່ງຕ້ອງຝຶກຝົນຫຼໍ່ຫຼອມ ປູກຝັງ ແລະ ເປັນແບບຢ່າງທາງດ້ານຄຸນສົມບັດປະຕິວັດ; ເດັດດ່ຽວຕໍ່ສູ້ກັບ “ຜົນປະໂຫຍດກຸ່ມ”, ກັບອົງການຈັດຕັ້ງພັກ ສະມາຊິກພັກ ທີ່ມີອາການເສື່ອມໂຊມທາງດ້ານຄຸນສົມບັດສິນທຳ, ມີປາກົດການຂອງ “ການປ່ຽນແປງຕົນເອງ” ແລະ “ການຫັນປ່ຽນຕົນເອງ”.
ທີສອງ, ປະຕິບັດຂໍ້ບັງຄັບຂອງພັກກ່ຽວກັບການເປັນແບບຢ່າງຢ່າງເຂັ້ມງວດ ຄົບຊຸດ ແລະ ມີປະສິດທິຜົນ(15) ສົມທົບກັບການປະຕິບັດມະຕິກ່ຽວກັບການກໍ່ສ້າງແລະປັບປຸງພັກ(16) ແລະ ລະບຽບການອື່ນຂອງສູນກາງພັກ, ເພື່ອເພີ່ມທະວີລະບຽບວິໄນຂອງພັກ, ຍົກສູງຄວາມສາມາດນຳພາ ແລະ ກຳລັງແຮງສູ້ຮົບ ຂອງອົງການຈັດຕັ້ງພັກ ແລະ ສະມາຊິກພັກ, ປະກອບສ່ວນປ້ອງກັນ ແລະ ຍູ້ຖອຍພາວະເສື່ອມໂຊມທາງດ້ານແນວຄິດການເມືອງ, ການສໍ້ລາດບັງຫຼວງ ແລະ ປະກົດການຫຍໍ້ທໍ້, ປັບປຸງຄວາມໄວ້ວາງໃຈຂອງປະຊາຊົນຕໍ່ການນຳພາຂອງພັກ.
ຊາບຊຶມທັດສະນະທີ່ຖືວ່າ ວຽກງານພະນັກງານແມ່ນວຽກງານ “ກະແຈ” ຂອງໜ້າທີ່ວຽກງານ “ຫຼັກ”, ແມ່ນຮາກຖານຂອງວຽກງານທັງໝົດ, ເປັນປັດໄຈຕັດສິນຊີ້ຂາດຄວາມສຳເລັດ ຫຼືຄວາມລົ້ມເຫຼວ ຂອງການປະຕິວັດ, ມີຄວາມກ່ຽວຂ້ອງກັບຄວາມຢູ່ລອດຂອງພັກ ແລະຊະຕາກຳຂອງລະບອບ, ພະນັກງານ ສະມາຊິກພັກທຸກຄົນ ຕ້ອງມີສະຕິ “ເປັນແບບຢ່າງໃນທຸກວຽກງານ, ພົວພັນຢ່າງໃກ້ຊິດກັບມະຫາຊົນ, ເປັນເອກະພາບພາຍໃນຢ່າງແທ້ຈິງ; ປະຕິບັດຕາມແນວທາງ ແລະນະໂຍບາຍຂອງພັກຢ່າງດີ, ນຳພາການຜະລິດແລະຕໍ່ສູ້ເປັນຢ່າງດີ; ຮັບໃຊ້ປະຊາຊົນຢ່າງສຸດຈິດສຸດໃຈ, ເບິ່ງແຍງດູແລຊີວິດທາງດ້ານວັດຖຸ ແລະ ຈິດວິນຍານຂອງປະຊາຊົນ”(17).
ທີສາມ, ຊຸກຍູ້ການຮ່ຳຮຽນ ແລະ ປະຕິບັດຕາມແນວຄິດ, ຄຸນສົມບັດ ແລະແບບແຜນຂອງໂຮ່ຈີມິນ ຕາມຂໍ້ສະຫຼຸບສະບັບເລກທີ 01-KL/TW, ລົງວັນທີ 18 ພຶດສະພາ 2021 ຂອງກົມການເມືອງສູນກາງພັກ “ວ່າດ້ວຍການສືບຕໍ່ປະຕິບັດຄຳສັ່ງເລກທີ 05-CT/TW ຂອງກົມການເມືອງສູນກາງພັກ “ວ່າດ້ວຍການຊຸກຍູ້ການຮ່ຳຮຽນ ແລະ ປະຕິບັດຕາມແນວຄິດ, ຄຸນສົມບັດ ແລະ ແບບແຜນຂອງໂຮ່ຈິມິນ”; ໃນນັ້ນ ສຸມໃສ່ເຮັດໃຫ້ດີ 3 ບັນຫາຄື: ສຶກສາຮ່ຳຮຽນ, ປະຕິບັດຕາມລຸງໂຮ່ ແລະ ການເປັນແບບຢ່າງ ຂອງພະນັກງານ ສະມາຊິກພັກ.
“ຍົກສູງຄຸນສົມບັດປະຕິວັດ, ລົບລ້າງລັດທິອັດຕະບຸກຄົນ”, ເດັດດ່ຽວ ໜຽວແໜ້ນ ແລະ ຕັ້ງໜ້າ ໃນການປ້ອງກັນ ກີດກັ້ນ ແລະ ຍູ້ຖອຍການສໍ້ລາດບັງຫຼວງ, ປະກົດການຫຍໍ້ທໍ້, ຄວາມຊຸດໂຊມທາງດ້ານແນວຄິດການເມືອງ, ຄຸນສົມບັດສິນທຳ ແລະ ວິຖີຊີວິດ ຂອງພະນັກງານ ສະມາຊິກພັກ, ສະພາບ “ການປ່ຽນແປງຕົນເອງ”, “ການຫັນປ່ຽນຕົນເອງ” ຢູ່ພາຍໃນ, ເຮັດໃຫ້ການຮ່ຳຮຽນ ແລະ ປະຕິບັດຕາມແນວຄິດ ຄຸນສົມບັດ ແລະແບບແຜນຂອງໂຮ່ຈີມິນ ເປັນວຽກປະຈຳ, ຄວາມຕ້ອງການທາງດ້ານວັດທະນະທຳຈິດໃຈຂອງພັກ, ສ້າງເຄື່ອງໝາຍອັນຈະແຈ້ງກ່ຽວກັບການກໍ່ສ້າງວັດທະນະທຳຂອງພັກ, ເພື່ອໃຫ້ພັກຂອງພວກເຮົາ “ແມ່ນຄຸນສົມບັດສິນທຳ ແມ່ນອາລະຍະທຳ” ທີ່ແທ້ຈິງ”(18).
ທີສີ່, ເອົາໃຈໃສ່ເຖິງວຽກງານກວດກາ, ຕິດຕາມກວດກາ, ສົມທົບກັບການເສີມຂະຫຍາຍບົດບາດຕິດຕາມກວດກາຂອງອົງການຂ່າວ, ສະຫະພັນ, ອົງການການເມືອງ-ສັງຄົມ ແລະ ປະຊາຊົນ ໃນການປະຕິບັດໜ້າທີ່ຮັບຜິດຊອບ, ການເປັນແບບຢ່າງດ້ານຄຸນສົມບັດປະຕິວັດຂອງພະນັກງານ ສະມາຊິກພັກ. ຍ້ອງຍໍຊົມເຊີຍແບບຢ່າງທີ່ກ້າວໜ້າ ແລະ ແບບຢ່າງຄຸນສົມບັດແລະວິຖີຊີວິດທີ່ສ່ອງປະກາຍຢ່າງທັນທີ; ຕໍ່ສູ້ແລະປ້ອງກັນຄວາມຜິດເຂວ ແລະການກະທຳຜິດ ຢ່າງເຂັ້ມແຂງແລະມີປະສິດທິພາບ, ຈັດການກັບການກະທຳທີ່ລະເມີດຄຸນສົມບັດ ແລະ ວິຖີຊີວິດຢ່າງເຂັ້ມງວດ.
ປະສານສົມທົບຢ່າງໃກ້ຊິດລະຫວ່າງ “ການກໍ່ສ້າງ” ແລະ “ການຕ້ານ”, ໃນນັ້ນ “ການກໍ່ສ້າງ” ແມ່ນພື້ນຖານແລະຍຸດທະສາດ; “ການຕ້ານ” ແມ່ນສໍາຄັນແລະຮີບດ່ວນ. ເຊີດຊູທິດນຳ “ເວົ້າໄປຄຽງຄູ່ກັບການກະທຳ”, “ຝຶກຝົນຫຼໍ່ຫຼອມຕະຫຼອດຊີວິດ”, ດຳເນີນການ “ທົບທວນຕົນເອງ”, “ແກ້ໄຂດ້ວຍຕົນເອງ” ຢ່າງສະໝ່ຳສະເໝີ ເພື່ອໃຫ້ການເປັນແບບຢ່າງດ້ານຄຸນສົມບັດປະຕິວັດ ນຳມາເຊິ່ງປະສິດທິຜົນອັນໃຫຍ່ຫຼວງ ໃນການປ່ຽນແປງໃໝ່ແບບວິທີການນຳພາຂອງພັກ ຢ່າງແທ້ຈິງ; ຜ່ານນັ້ນ, ຍົກສູງກຽດສັກສີ ແລະ ຄວາມສາມາດນຳພາ ຂອງຖັນແຖວພະນັກງານ ສະມາຊິກພັກ ກໍ່ຄືຂອງອົງການຈັດຕັ້ງພັກ ຕໍ່ໜ້າມະຫາຊົນ, ເຮັດໃຫ້ການເປັນແບບຢ່າງກາຍເປັນປົກກະຕິ, ເປັນສິນທຳທີ່ຊິນເຄີຍ ແລະ ວັດທະນາທຳອັນດີງາມຂອງພັກ ແລະ ທົ່ວສັງຄົມ./.
------------------------------
(1) ໂຮ່ຈີມິນ: ນິພົນຄົບຊຸດ, ສພຈ. ການເມືອງແຜ່ງຊາດ ສື້ເຖິ້ດ, ຮ່າໂນ້ຍ, 2011, ເຫຼັ້ມ 7, ໜ້າ 54
(2) ໂຮ່ຈີມິນ: ນິພົນຄົບຊຸດ, ປຶຶ້ມທີ່ໄດ້ແນະນຳ, ເຫຼັ້ມ 11, ໜ້າ 603
(3), (4) ໂຮ່ຈີມິນ: ນິພົນຄົບຊຸດ, ປຶຶ້ມທີ່ໄດ້ແນະນຳ, ເຫຼັ້ມ 11, ໜ້າ 602, 603
(5) ໂຮ່ຈີມິນ: ນິພົນຄົບຊຸດ, ປຶຶ້ມທີ່ໄດ້ແນະນຳ, ເຫຼັ້ມ 12, ໜ້າ 402
(6) ໂຮ່ຈີມິນ: ນິພົນຄົບຊຸດ, ປຶຶ້ມທີ່ໄດ້ແນະນຳ, ເຫຼັ້ມ 11, ໜ້າ 607
(7) ໂຮ່ຈີມິນ: ນິພົນຄົບຊຸດ, ປຶຶ້ມທີ່ໄດ້ແນະນຳ, ເຫຼັ້ມ 14, ໜ້າ 468
(8) ໂຮ່ຈີມິນ: ນິພົນຄົບຊຸດ, ປຶຶ້ມທີ່ໄດ້ແນະນຳ, ເຫຼັ້ມ 5, ໜ້າ 292
(9) ແຕ່ລະປີ, ເນື່ອງໃນໂອກາດວັນຄ້າຍວັນເກີດຂອງປະທານ ໂຮ່ຈີມິນ, ຄະນະໂຄສະນາອົບຮົມສູນກາງພັກ ສົມທົບກັບຫໍພິພິທະພັນໂຮ່ຈີມິນ ຈັດຕັ້ງງານວາງສະແດງ “ແບບຢ່າງທີ່ລຽບງ່າຍແຕ່ສະຫງ່າລາສີ”. ສະເພາະໃນ 5 ປີແຫ່ງການປະຕິບັດຄຳສັ່ງເລກທີ 05-CT/TW, ລົງວັນທີ 15 ພຶດສະພາ 2016 ຂອງກົມການເມືອງສູນກາງພັກ “ວ່າດ້ວຍການຊຸກຍູ້ການຮ່ຳຮຽນ ແລະ ປະຕິບັດຕາມແນວຄິດ ຄຸນສົມບັດ ແບບແຜນຂອງໂຮ່ຈີມິນ”, ຈໍານວນແບບຢ່າງທີ່ດີເດັ່ນ ທີ່ໄດ້ຮັບກຽດແມ່ນ 640 ກຸ່ມແລະບຸກຄົນ
(10) ແຂວງ ຮ່າຢາງ: ປະຕິບັດການເປັນແບບຢ່າງດ້ວຍຄຳຂວັນ “ຂັ້ນເທິງກ່ອນ, ຂັ້ນລຸ່ມຕາມຫຼັງ”, “ຜູ້ມີຕຳແໜ່ງສູງ, ຍິ່ງຕ້ອງເປັນແບບຢ່າງຫຼາຍກວ່າ”. ແຂວງລາຍເຈົາ: ລົງທະບຽນເພື່ອເປັນຕົວຢ່າງ 1 ເຖິງ 2 ສິ່ງທີ່ສະເພາະຄື: 1- ການແກ້ໄຂຜ່ານຜ່າຂໍ້ຈຳກັດ, ຄວາມຫຍຸ້ງຍາກ, ຂໍ້ຂາດຕົກບົກພ່ອງທີ່ແກ່ຍາວ; 2- ການບຸກທະລຸ, ການປ່ຽນແປງໃໝ່, ການປະດິດສ້າງ, ຄວາມຮີບດ່ວນ. ນະຄອນຮ່າໂນ້ຍ: ປະຕິບັດຕາມຫຼັກຄຸນສົມບັດຂອງພະນັກງານ ລັດຖະກອນ ພາລະກອນ ແລະຄົນງານໃນບັນດາອົງການຂອງນະຄອນຮ່າໂນ້ຍ. ແຂວງຊ໊ອກຈັງ: ດຳເນີນການ “ສ້າງ 8 ປະການ ແລະຕໍ່ຕ້າງ 8 ປະການ”. ແຂວງແຂັງຮ່ວາ: ປ່ຽນແປງໃໝ່ລະບຽບ ວິທີເຮັດວຽກ ດ້ວຍທິດນຳທີ່ວ່າ “ແຂວງໃກ້ຊິດຕາແສງ, ເມືອງໃກ້ຊິດບ້ານ, ຕາແສງໃກ້ຊິດກັບແຕ່ລະຄອບຄົວ”. ແຂວງຮວ່າບິ່ງ: ກໍ່ສ້າງມາດຕະຖານຄຸນສົມບັດຕາມຈິດໃຈ “ເຄົາລົບປະຊາຊົນ, ໃກ້ຊິດກັບປະຊາຊົນ, ເຂົ້າໃຈປະຊາຊົນ, ຮຽນຮູ້ຈາກປະຊາຊົນ ແລະມີຄວາມຮັບຜິດຊອບຕໍ່ປະຊາຊົນ”, “ຮັບຟັງປະຊາຊົນ, ເວົ້າໃຫ້ປະຊາຊົນເຂົ້າໃຈ, ເຮັດໃຫ້ປະຊາຊົນເຊື່ອຖື”. ແຂວງ ບັກຢາງ: ອອກຄຳສັ່ງກ່ຽວກັບການຍົກສູງຄຸນນະພາບການທົບທວນ, ການຕິຊົມຕົນເອງ ແລະຕິຊົມ ບັນດາປະກົດການເສື່ອມໂຊມທາງດ້ານແນວຄິດການເມືອງ, ຄຸນສົມບັດ, ວິຖີຊີວິດ, “ການປ່ຽນແປງຕົນເອງ”, “ການຫັນປ່ຽນຕົນເອງ” ໃນການດຳເນີນຊີວິດຂອງຄະນະພັກ, ໜ່ວຍພັກ.
(11) ເອກະສານກອງປະຊຸມຄັ້ງທີສີ່ ຄະນະບໍລິຫານງານສູນກາງພັກສະໄໝທີ XIII, ສພຈ. ການເມືອງແຫ່ງຊາດ ສື້ເຖິ້ດ, ຮ່າໂນ້ຍ, 2021, ເຫຼັ້ມ 2, ໜ້າ 228
(12) ເອກະສານກອງປະຊຸມໃຫຍ່ຜູ້ແທນທົ່ວປະເທດຄັ້ງທີ XIII, ສພຈ. ການເມືອງແຫ່ງຊາດ ສື້ເຖິ້ດ, ຮ່າໂນ້ຍ, 2021, ເຫຼັ້ມ 1, ໜ້າ 180
(13), (14) ເບິ່ງ: ເອກະສານກອງປະຊຸມໃຫຍ່ຜູ້ແທນທົ່ວປະເທດຄັ້ງທີ XIII, ປຶ້ມທີ່ໄດ້ແນະນຳ, ເຫຼັ້ມ 1, ໜ້າ 183-184, 187
(15) ກົດລະບຽບເລກທີ 101-QD/TW, ລົງວັນທີ 7 ມິຖຸນາ 2012, ຂອງຄະນະເລຂາທີການສູນກາງພັກ “ວ່າດ້ວຍຄວາມຮັບຜິດຊອບໃນການເປັນແບບຢ່າງຂອງພະນັກງານ ສະມາຊິກພັກ, ໂດຍສະເພາະແມ່ນ ພະນັກງານຫຼັກແຫຼ່ງທຸກຂັ້ນ”; ກົດລະບຽບສະບັບເລກທີ 55-QD/TW, ລົງວັນທີ 19 ທັນວາ 2016 ຂອງກົມການເມືອງສູນກາງພັກ, “ວ່າດ້ວຍບາງສິ່ງທີ່ຕ້ອງປະຕິບັດທັນທີ ເພື່ອເພີ່ມທະວີບົດບາດເປັນແບບຢ່າງຂອງພະນັກງານ ສະມາຊິກພັກ”; ກົດລະບຽບເລກທີ 08-QDi/TW, ລົງວັນທີ 25 ຕຸລາ 2018 ຂອງຄະນະບໍລິຫານງານສູນກາງພັກ, ວ່າດ້ວຍ “ຄວາມຮັບຜິດຊອບໃນການເປັນແບບຢ່າງຂອງພະນັກງານ ສະມາຊິກພັກ, ກ່ອນອື່ນໝົດແມ່ນ ກຳມະການກົມການເມືອງສູນກາງ, ກຳມະການຄະນະເລຂາທິການສູນກາງ, ກຳມະການຄະນະບໍລິຫານງານສູນກາງພັກ”,...
(16) ມະຕິກອງປະຊຸມຄົບຄະນະຄັ້ງທີ 4 ຂອງຄະນະບໍລິຫານງານສູນກາງພັກຊຸດທີ XI ແລະ XII ກ່ຽວກັບການກໍ່ສ້າງແລະປັບປຸງພັກ, ບົດສະຫຼຸບສະບັບເລກທີ 21-KL/TW, ລົງວັນທີ 25 ຕຸລາ 2021 ຂອງຄະນະບໍລິຫານງານສູນກາງພັກ “ວ່າດ້ວຍການຍູ້ແຮງການກໍ່ສ້າງ ແລະ ປັບປຸງພັກ ແລະ ລະບົບການເມືອງ; ເດັດດ່ຽວສະກັດກັ້ນ, ຍູ້ຖອຍ, ຈັດການແກ້ໄຂຢ່າງເຂັ້ມງວດຕໍ່ພະນັກງານ ແລະ ສະມາຊິກພັກທີ່ເສື່ອມໂຊມດ້ານແນວຄິດການເມືອງ ຄຸນສົມບັດ ວິຖີຊີວິດ, ມີປາກົດການ “ປ່ຽນແປງຕົນເອງ”, “ການຫັນປ່ຽນຕົນເອງ”” ແລະ ຂໍ້ຕົກລົງເລກທີ 37-QD/TW, ລົງວັນທີ 25 ຕຸລາ 2021 ຂອງຄະນະບໍລິຫານງານສູນກາງພັກ, “ກົດລະບຽບກ່ຽວກັບສິ່ງທີ່ສະມາຊິກພັກບໍ່ໄດ້ຮັບອະນຸຍາດໃຫ້ເຮັດ”,...
(17) ໂຮ່ຈີມິນ: ນິພົນຄົບຊຸດ, ປຶຶ້ມທີ່ໄດ້ແນະນຳ, ເຫຼັ້ມ 15, ໜ້າ 98
(18) ເບິ່ງ: ນັກຂ່າວ: “ເນື້ອໃນເຕັມຄຳປາໄສຂອງທ່ານເລຂາທິການໃຫຍ່ ຫງວຽນ ຝູ ຈ້ອງ ທີ່ກອງປະຊຸມສະຫຼຸບ 5 ປີແຫ່ງການປະຕິບັດຄຳສັ່ງເລກທີ 05”, ໜັງສືພິມເອເລັກໂຕຮນິກຄວາມສະຫງົບປະຊາຊົນ ວັນທີ 12 ມິຖຸນາ 2021, https://cand.com.vn/thoi-su/Toan-van-phat-bieu-cua-Tong-Bi-thu-Nguyen-Phu-Trong-tai-Hoi-nghi-so-ket-5-nam-thuc-hien-Chi-thi-so-05-i616597/
- ບົດນີ້ໄດ້ລົງພິມໃນວາລະສານກອມມູນິດ ສະບັບທີ 1016 (ເດືອນມິຖຸນາ 2023)