ວັນທີ 5 ທັນວາ 2012, ທີ່ແຂວງ ກອນຕຸມ ກອງປະຊຸມສົ່ງເສີມການລົງທຶນ - ການຄ້າ - ການທ່ອງທ່ຽວ ຢູ່ເຂດສາມຫລ່ຽມພັດທະນາ ກຳປູເຈຍ - ລາວ - ຫວຽດນາມ ຄັ້ງທີ 7 ໄດ້ໄຂຂຶ້ນຢ່າງສົມກຽດ. |
ກອງປະຊຸມໄດ້ມີການເຂົ້າຮ່ວມຂອງຜູ້ແທນ ແລະ ນັກທຸລະກິດກວ່າ 400 ຄົນທີ່ມາຈາກສາມປະເທດ. ເຖິງວ່າ ສະພາບການເສດຖະກິດໂລກພົບຄວາມຫຍຸ້ງຍາກ ແລະ ຊຸດໂຊມລົງກໍ່ຕາມ ແຕ່ການຮ່ວມມືດ້ານການລົງທຶນ ລະຫວ່າງສາມປະເທດ ກໍ່ຍັງຄົງໄດ້ດຳເນີນໄປຢ່າງຟົດຟື້ນ. ລວມຍອດມູນຄ່າການຄ້າສອງສົ້ນລະຫວ່າງຫວຽດນາມ ກັບສອງປະເທດ ໃນປີ 2012 ບັນລຸປະມານກວ່າ 4 ຕື້ USD. ລາວ ແລະ ກຳປູເຈຍ ເປັນສອງປະເທດທີ່ມີການລົງທຶນຫຼາຍທີ່ສຸດ ຂອງບັນດາວິສາຫະກິດຫວຽດນາມ, ປັດຈຸບັນກວມກວ່າ 50% ຍອດຈຳນວນໂຄງການລົງທຶນ ແລະ ເງິນລົງທຶນທັງໝົດຢູ່ຕ່າງປະເທດຂອງຫວຽດນາມ. ວິສາຫະກິດຫວຽດນາມລົງທຶນເຂົ້າລາວ ໃນ 50 ໂຄງການ ດ້ວຍຈຳນວນເງິນເກືອບ 1,7 ຕື້ USD; ລົງທຶນເຂົ້າກຳປູເຈຍ ໃນ 25 ໂຄງການ ດ້ວຍຈຳນວນເງິນເກືອບ 1,5 ຕື້ USD. ຢູ່ເຂດສາມຫຼ່ຽມພັດທະນາ ໄດ້ເປັນຮູບເປັນຮ່າງບັນດາເຂດປູກສະເພາະຕົ້ນໄມ້ອຸດສາຫະກຳໄລຍະຍາວນານເຊັ່ນ ກາເຟ, ຢາງພາລາ… ມີເນື້ອທີ່ເປັນໝື່ນເປັນແສນເຮັກຕາ, ແລະ ໄດ້ສ້າງໂສມໜ້າໃໝ່ໃຫ້ເຂດນີ້.
ເຖິງຢ່າງນັ້ນກໍ່ຕາມ, ປັດຈຸບັນກໍ່ຍັງມີຂໍ້ຫຍຸ້ງຍາກຄ້າງຄາຫຼາຍຢ່າງທີ່ກີດຂວາງການພັດທະນາຂອງທົ່ວທັງເຂດ. ທ່ານນາງ ຝ້າມທິໂຮ່ງແທງ, ຮອງຫົວໜ້າກົມທະວີບອາຊີ - ປາຊີຟິກ, ກະຊວງອຸດສາຫະກຳ ການຄ້າ ຫວຽດນາມ ໃຫ້ຮູ້ວ່າ: ມີຫຼາຍນະໂຍບາຍ ຂໍ້ກຳນົດທີ່ກໍ່ຄວາມຫຍຸ້ງຍາກໃຫ້ແກ່ວິສາຫະກິດເຊັ່ນ ກຳນົດກ່ຽວກັບລົດໂອໂຕບັນທຸກສິນຄ້າ, ເສັ້ນທາງໄປມາ, ກຳນົດກ່ຽວກັບທຶນໃຫ້ກູ້ຢືມ. ປັດຈຸບັນ, ການຂົນສົ່ງສິນຄ້າຍັງບໍ່ທັນໄປຊື່ໂດຍກົງໄດ້ (ຍ້ອນວ່າ ແຕ່ລະປະເທດໄດ້ກຳນົດນ້ຳໜັກຂົນສົ່ງສະເພາະຂອງຕົນ, ດັ່ງນັ້ນຈຶ່ງຕ້ອງຫລຸດຜ່ອນນ້ຳໜັກລົດລົງເມື່ອຜ່ານປະເທດເພື່ອນບ້ານ) ອັນໄດ້ເຮັດໃຫ້ຄ່າໃຊ້ຈ່າຍເພີ່ມຂຶ້ນ ແລະ ຫຍຸ້ງຍາກຕື່ມອີກໃຫ້ແກ່ການຂົນສົ່ງສິນຄ້າ, ເປັນຕົ້ນແມ່ນສິນຄ້າແຊ່ແຂງ, ໝາກໄມ້ສົດ. ນອກຈາກນັ້ນ, ຜະລິດຕະພັນຂອງເຂດນີ້ກໍ່ຍັງບໍ່ທັນອຸດົມສົມບູນ, ຄວາມຕ້ອງການຊົມໃຊ້ກໍ່ຍັງຕ່ຳ, ລັກສະນະຜະລິດກຸ້ມຕົນເອງກໍ່ສະແດງອອກແຈ້ງພໍຄວນ.
ທ່ານ ຢູນແຮງ - ເລຂາຊ່ວຍວຽກນາຍົກລັດຖະມົນຕີ, ຫົວໜ້າກົມສົ່ງເສີມແລະຕີລາຄາໂຄງການແຫ່ງສະພາພັດທະນາກຳປູເຈຍ ກໍ່ຮັບຮູ້ວ່າບັນຫາພະລັງງານໄຟຟ້າ ພວນເປັນຄວາມຫຍຸ້ງຍາກຂອງລັດຖະບານປະເທດນີ້, ກໍ່ຄືຂອງບັນດາວິສາຫະກິດເມື່ອລົງທຶນເຂົ້າໃນເຂດນີ້. ເຖິງຢ່າງນັ້ນກໍ່ຕາມ, ທ່ານກໍ່ຢັ້ງຢືນວ່າ ລັດຖະບານກຳປູເຈຍຈະເພີ່ມທະວີການລົງທຶນກໍ່ສ້າງໄຟຟ້ານ້ຳຕົກ, ໄຟຟ້າພະລັງຄວາມຮ້ອນ (ປະມານ 1.000 MWh), ກໍ່ຄືການລົງທຶນກໍ່ສ້າງລະບົບນຳສົ່ງໄຟຟ້າໃນອະນາຄົດ… ຄຽງຂ້າງນັ້ນ, ການລົງທຶນເຂົ້າລາວ ຂອງບັນດາວິສາຫະກິດກໍ່ພົບຄວາມຫຍຸ້ງຍາກບໍ່ໜ້ອຍ ໃນການຊອກຫາແຫຼ່ງກຳລັງແຮງງານເມື່ອເຖິງລະດູການເກັບກ່ຽວ. ການໄປມາຄ້າຂາຍລະຫວ່າງ ນະຄອນໂຮ່ຈີມິນ ແລະ ຈຳປາສັກ ປັດຈຸບັນຍັງມີອຸປະສັກຫຼາຍຢ່າງ ຍ້ອນເສັ້ນທາງໄກໂພດ (800 ກມ ຜ່ານດ່ານ ເບີອີ ແຂວງກອນຕູມ). ການແລກປ່ຽນການຄ້າລະຫວ່າງກຳປູເຈຍ ແລະ ລາວ ຍັງອ່ອນນ້ອຍ, ບໍ່ສົມຄູ່ກັບຄວາມສາມາດບົ່ມຊ້ອນຂອງແຕ່ລະຝ່າຍ. ຄຽງຂ້າງນັ້ນ, ໂຄງການເຊື່ອມໂຍງ ການຂົນສົ່ງສົ່ງຕໍ່ຜູ້ໂດຍສານ ແລະ ສິນຄ້າ ລະຫວ່າງປະເທດ ຜ່ານທາງເລກ 13 ຈາກພາກໄຕ້ຂອງລາວ ລົງໄປທາງພາກຕາເວັນອອກສຽງເໜືອກຳປູເຈຍ ແລະໄປສູ່ແຂວງຕ່າງໆຂອງຫວຽດນາມ ກໍ່ໄດ້ຜັນຂະຫຍາຍຊ້າ.
ເພື່ອຂຸດຄົ້ນຄວາມສາມາດຊ້ອນແຝງຢູ່ໃນເຂດນີ້, ທ່ານກາວວຽດຊິງ, ລັດຖະມົນຕີຊ່ວຍວ່າການກະຊວງແຜນການ ແລະ ການລົງທຶນຫວຽດນາມ, ໃຫ້ທັດສະນະວ່າ ບັນດາຝ່າຍທີ່ກ່ຽວຕ້ອງຍົກລະດັບ ແລະ ປັບປຸງບູລະນະພື້ນຖານໂຄງລ່າງ, ໃນນັ້ນມີນະໂຍບາຍໃຫ້ບຸລິມະສິດເປັນພິເສດການລົງທຶນ ເພື່ອສົ່ງເສີມບັນດາພາກສ່ວນເສດຖະກິດເຂົ້າຮ່ວມການລົງທຶນພັດທະນາພື້ນຖານໂຄງລ່າງທີ່ຈຳເປັນຕ້ອງການ. ບັນດາຝ່າຍທີ່ກ່ຽວຕ້ອງຊຸກຍູ້ ແລະ ຈັດຕັ້ງການປະຕິບັດຢ່າງຄົບຊຸດແຜນແມ່ບົດເຂດສາມຫຼ່ຽມພັດທະນາ ທີ່ລັດຖະບານສາມປະເທດໄດ້ຜ່ານອະນຸມັດ. ນອກຈາກນັ້ນ, ຕ້ອງຍູ້ແຮງການກໍ່ສ້າງ ແລະ ປັບປຸງບູລະນະລະບົດກົດໝາຍກ່ຽວກັບການລົງທຶນ, ການທຸລະກິດ; ບັນດານະໂຍບາຍທີ່ມີຄວາມກ່ຽວຂ້ອງກັບພາສີສຸນລະກາກອນ, ການກວດກາການຂາເຂົ້າຂາອອກ, ແຮງງານ, ກໍ່ຄືບັນດາລະບຽບການບໍລິຫານທີ່ມີຄວາມພົວພັນເຖິງການໃຫ້ໃບອະນຸຍາດລົງທຶນ, ທຸລະກິດ, ຮັບປະກັນລັກສະນະໂປ່ງໃສ, ຄົບຊຸດ, ເປັນເອກະພາບແຕ່ສູນກາງລົງເຖິງທ້ອງຖິ່ນ.
ເຂດສາມຫຼ່ຽມພັດທະນາກຳປູເຈຍ - ລາວ - ຫວຽດນາມ (ມີ 13 ແຂວງ) ເປັນເຂດສາມແຍກຊາຍແດນຂອງສາມປະເທດ. ຄວາມຄິດສ້າງເຂດສາມຫຼ່ຽມພັດທະນາ ໂດຍແມ່ນນາຍົກລັດຖະມົນຕີແຫ່ງລັດຖະບານລາດຊະອານາຈັກກຳປູເຈຍ ທ່ານຮູນແຊນ ສະເໜີອອກມາຢູ່ທີ່ການພົບປະຊັ້ນສູງລະຫວ່າງສາມນາຍົກລັດຖະມົນຕີ ທີ່ວຽງຈັນ ປີ 1999, ຊຶ່ງມີຈຸດໝາຍເພີ່ມທະວີຄວາມສາມັກຄີ ການຮ່ວມມືລະຫວ່າງສາມປະເທດ ແນໃສ່ພັດທະນາເສດຖະກິດ-ສັງຄົມ, ລົບລ້າງຄວາມທຸກຍາກ, ປະກອບສ່ວນຮັກສາຄວາມປອດໄພສະຖຽນລະພາບຂອງແຕ່ລະປະເທດໃຫ້ໝັ້ນຄົງ./.
ຕາມຂ່າວຂອງ: TTXVN