ສະພາບການເສດຖະກິດ - ສັງຄົມຫວຽດນາມປີ 2012 ໂດຍສັງເຂບ
ວ.ກ.ອອນໄລ - ຕາມຕົວເລດ ທີ່ກົມໃຫຍ່ສະຖິຕິ ຫາກໍ່ປະກາດເປັນທາງການ ໃຫ້ຮູ້ວ່າ ປີ 2012 ເສດຖະກິດຫວຽດນາມ ໄດ້ເຕີບໂຕໄວພໍຄວນ, ບັນດາຂົງເຂດສັງຄົມກໍ່ໄດ້ພັດທະນາເປັນປົກກະຕິໂດຍພື້ນຖານ.
ລວມຍອດຜະລິດຕະພັນພາຍໃນປະເທດ (GDP) ປີ 2012 ຕາມລາຄາປຽບທຽບ 1994 ເພີ່ມຂຶ້ນປະມານ 5,03% ທຽບກັບປີ 2011, ໃນນັ້ນ ໄຕມາດທີ I ເພີ່ມຂຶ້ນ 4,64%;ໄຕມາດທີ II ເພີ່ມຂຶ້ນ 4,80%; ໄຕມາດທີ III ເພີ່ມຂຶ້ນ 5,05%; ໄຕມາດທີ IV ເພີ່ມຂຶ້ນ 5,44%. ໃນອັດຕາຄວາມເຕີບໂຕລວມ 5,03% ຂອງເສດຖະກິດທົ່ວປະເທດນັ້ນ, ຂົງເຂດກະສິກຳ, ປ່າໄມ້ ແລະ ສິນໃນນ້ຳ ເພີ່ມຂຶ້ນ 2,72%, ປະກອບສ່ວນ 0,44 ສ່ວນຮ້ອຍເຂົ້າໃສ່ອັດຕາຄວາມເຕີບໂຕລວມ; ຂົງເຂດອຸດສາຫະກຳ ແລະ ການກໍ່ສ້າງ ເພີ່ມຂຶ້ນ 4,52%, ປະກອບສ່ວນ 1,89 ສ່ວນຮ້ອຍ; ຂົງເຂດບໍລິການເພີ່ມຂຶ້ນ 6,42%, ປະກອບສ່ວນ 2,70 ສ່ວນຮ້ອຍ.
ມູນຄ່າການຜະລິດກະສິກຳ, ປ່າໄມ້ ແລະ ສິນໃນນ້ຳ ປີ 2012 ຕາມລາຄາປຽບທຽບ 1994 ເພີ່ມຂຶ້ນປະມານ 3,4% ທຽບກັບປີ 2011, ຊຶ່ງກວມດ້ວຍ: ການກະສິກຳ ເພີ່ມຂຶ້ນ 2,8%; ການປ່າໄມ້ ເພີ່ມຂຶ້ນ 6,4%; ສິນໃນນ້ຳ ເພີ່ມຂຶ້ນ 4,5%.
ດັດຊະນີການຜະລິດອຸດສາຫະກຳເດືອນທັນວາ 2012 ເພີ່ມຂຶ້ນປະມານ 5,0% ທຽບກັບເດືອນກ່ອນ ແລະ ເພີ່ມຂຶ້ນ 5,9% ທຽບກັບໄລຍະດຽວກັນຂອງປີກ່ອນ. ດັດຊະນີການຜະລິດອຸດສາຫະກຳຂອງທັງປີ 2012 ເພີ່ມຂຶ້ນ 4,8% ທຽບກັບປີ 2011, ຊຶ່ງໃນນັ້ນ ອຸດສາຫະກຳຂຸດຄົ້ນ ເພີ່ມຂຶ້ນ 3,5%; ອຸດສາຫະກຳປຸງແຕ່ງ ປະດິດ ເພີ່ມຂຶ້ນ 4,5%; ການຜະລິດ ແຈກຢາຍໄຟຟ້າ, ກາສ ເພີ່ມຂຶ້ນ 12,3%; ການສະໜອງນ້ຳປະປາ, ການຄຸ້ມຄອງ ແລະ ແກ້ໄຂລະບາຍນ້ຳເສຍ, ເພີ່ມຂຶ້ນ 8,4%.
ລວມຍອດມູນຄ່າສິນຄ້າຂາຍຍ່ອຍ ແລະ ລາຍຮັບຈາກການບໍລິການຊົມໃຊ້ປີ 2012 ເພີ່ມຂຶ້ນປະມານ 16% ທຽບກັບປີ 2011 (ຖ້າຍົກເວັ້ນປັດໃຈລາຄາແລ້ວ ກໍ່ເພີ່ມຂຶ້ນ 6,2%), ໃນນັ້ນ ຂົງເຂດເສດຖະກິດແຫ່ງລັດ ກວມເອົາ 12,3% ແລະ ຫລຸດລົງ 1,2%; ເສດຖະກິດທີ່ບໍ່ແມ່ນຂອງລັດ ກວມເອົາ 84,8% ແລະ ເພີ່ມຂຶ້ນ 18,4%; ຂົງເຂດທີ່ມີການລົງທຶນຈາກຕ່າງປະເທດກວມເອົາ 2,9% ແລະ ເພີ່ມຂຶ້ນ 34,7%. ພິຈາລະນາຕາມຂະແໜງການທຸລະກິດແລ້ວ ກໍ່ເຫັນວ່າ ການຄ້າກວມເອົາ 77,1% ຂອງລວມຍອດ ແລະ ເພີ່ມຂຶ້ນ 15,2%; ການທຸລະກິດໂຮງແຮມ ຮ້ານອາຫານ ກວມເອົາ 11,8% ແລະ ເພີ່ມຂຶ້ນ 17,2%; ການບໍລິການກວມເອົາ 10,1% ແລະ ເພີ່ມຂຶ້ນ 19,6%; ການທ່ອງທ່ຽວກວມເອົາ 1% ແລະ ເພີ່ມຂຶ້ນ 28,1%.
ດັດຊະນີລາຄາຕະຫລາດເດືອນທັນວາ 2012 ເພີ່ມຂຶ້ນ 0,27% ທຽບກັບເດືອນກ່ອນ ແລະ ເພີ່ມຂຶ້ນ 6,81% ທຽບກັບເດືອນທັນວາ 2011. ດັດຊະນີລາຄາຕະຫລາດສະເຫຼ່ຍປີ 2012 ເພີ່ມຂຶ້ນ 9,21% ທຽບກັບລະດັບສະເຫຼ່ຍປີ 2011.
ເງິນລົງທຶນຂອງທົ່ວສັງຄົມປະຕິບັດໃນປີ 2012 ຕາມລາຄາປັດຈຸບັນ ໄດ້ປະມານ 989,3 ພັນຕື້ໂດ່ງ, ເພີ່ມຂຶ້ນ 7% ທຽບກັບປີກ່ອນ ແລະ ເທົ່າກັບ 33,5% GDP, ຊຶ່ງໃນນັ້ນ ເງິນລົງທຶນຂອງພາກລັດໄດ້ 374,3 ພັນຕື້ໂດ່ງ, ເພີ່ມຂຶ້ນ 9,6%; ຂອງຂົງເຂດທີ່ບໍ່ແມ່ນພາກລັດ ໄດ້ 385 ພັນຕື້ໂດ່ງ, ເພີ່ມຂຶ້ນ 8,1%; ຂອງຂົງເຂດທີ່ມີການລົງທຶນຈາກຕ່າງປະເທດ ໄດ້ 230 ພັນຕື້ໂດ່ງ, ເພີ່ມຂຶ້ນ 1,4%. ໃນຈຳນວນເງິນລົງທຶນຂອງພາກລັດປີ 2012 ເງິນຈາກງົບປະມານປະຕິບັດໄດ້ 205 ພັນຕື້ໂດ່ງ, ເພີ່ມຂຶ້ນ 15% ທຽບກັບປີ 2011, ຊຶ່ງກວມດ້ວຍ ທຶນຂອງສູນກາງຄຸ້ມຄອງ 50,3 ພັນຕື້ໂດ່ງ, ເພີ່ມຂຶ້ນ 15,4%; ທຶນຂອງທ້ອງຖິ່ນຄຸ້ມຄອງ 154,7 ພັນຕື້ໂດ່ງ, ເພີ່ມຂຶ້ນ 14,9%.
ມູນຄ່າສິນຄ້າຂາອອກໃນເດືອນທັນວາ ໄດ້ປະມານ 10,4 ຕື້ ຫຼຽນສະຫະລັດ, ເພີ່ມຂຶ້ນ 0,5% ທຽບກັບເດືອນກ່ອນ ແລະ ເພີ່ມຂຶ້ນ 15% ທຽບກັບປີ 2011. ຄິດສະເຫຼ່ຍ ປີ 2012, ມູນຄ່າສິນຄ້າຂາອອກບັນລຸ 114,6 ຕື້ ຫຼຽນສະຫະລັດ, ເພີ່ມຂຶ້ນ 18,3% ທຽບກັບປີ 2011, ຊຶ່ງກວມດ້ວຍ: ຂົງເຂດເສດຖະກິດພາຍໃນປະເທດບັນລຸ 42,3 ຕື້ ຫຼຽນສະຫະລັດ, ເພີ່ມຂຶ້ນ 1,3%; ຂົງເຂດເສດຖະກິດມີການລົງທຶນຈາກຕ່າງປະເທດ (ກວມທັງນ້ຳມັນດິບ) ບັນລຸ 72,3 ຕື້ ຫຼຽນສະຫະລັດ, ເພີ່ມຂຶ້ນ 31,2%. ຖ້າບໍ່ຄິດໄລ່ນ້ຳມັນດິບແລ້ວ ມູນຄ່າຂາອອກຂອງຂົງເຂດເສດຖະກິດມີການລົງທຶນຈາກຕ່າງປະເທດໃນປີນີ້ກໍ່ບັນລຸ 63,9 ຕື້ ຫຼຽນສະຫະລັດ, ເພີ່ມຂຶ້ນ 33,5% ທຽບກັບປີກ່ອນ. ຖ້າຫາກຍົກເວັ້ນປັດໃຈລາຄາ, ມູນຄ່າສິນຄ້າຂາອອກປີ 2012 ໄດ້ເພີ່ມຂຶ້ນ 18,9%.
ມູນຄ່າສິນຄ້າຂາເຂົ້າເດືອນທັນວາ ບັນລຸປະມານ 10,6 ຕື້ ຫຼຽນສະຫະລັດ, ເພີ່ມຂຶ້ນ 6,5% ທຽບກັບເດືອນກ່ອນ ແລະ ເພີ່ມຂຶ້ນ 13% ທຽບກັບປີ 2011. ມູນຄ່າສິນຄ້າຂາເຂົ້າປີ 2012 ບັນລຸ 114,3 ຕື້ ຫຼຽນສະຫະລັດ, ເພີ່ມຂຶ້ນ 7,1% ທຽບກັບປີກ່ອນ, ຊຶ່ງກວມດ້ວຍ: ຂົງເຂດເສດຖະກິດພາຍໃນປະເທດ ບັນລຸ 54 ຕື້ ຫຼຽນສະຫະລັດ, ຫລຸດລົງ 6,7%; ຂົງເຂດເສດຖະກິດມີການລົງທຶນຈາກຕ່າງປະເທດບັນລຸ 60,3 ຕື້ ຫຼຽນສະຫະລັດ, ເພີ່ມຂຶ້ນ 23,5%. ລະດັບເພີ່ນມູນຄ່າຂາເຂົ້າໃນປີນີ້ແມ່ນຕ່ຳກວ່າທຸກປີ ນັບແຕ່ປີ 2002 ເປັນຕົ້ນມາ (ຍົກເວັ້ນປີ 2009). ຖ້າຫາກບໍ່ຄິດເຖິງປັດໃຈລາຄາ, ມູນຄ່າສິນຄ້າຂາເຂົ້າປີ 2012 ເພີ່ມຂຶ້ນ 7,4% ທຽບກັບປີ 2011.
ປີ 2012 ມູນຄ່າຂາອອກຫຼາຍກວ່າຂາເຂົ້າ 284 ລ້ານ ຫຼຽນສະຫະລັດ ຊຶ່ງເປັນປີທຳອິດທີ່ຫວຽດນາມໄດ້ຂາອອກສິນຄ້າຫຼາຍກວ່າຂາເຂົ້າ ນັບແຕ່ປີ 1993, ໃນນັ້ນ ຂົງເຂດມີການລົງທຶນຈາກຕ່າງປະເທດ ໄດ້ຂາອອກສິນຄ້າຫຼາຍກວ່າຂາເຂົ້າ ເກືອບ 12 ຕື້ ຫຼຽນສະຫະລັດ, ທີ່ລວມສູນຢູ່ໃນຫຍ່ອມສິນຄ້າຜະລິດຮັບຈ້າງປະກອບເຄື່ອງ. ກົງກັນຂ້າມ, ຂົງເຂດເສດຖະກິດພາຍໃນປະເທດມີມູນຄ່າສິນຄ້າຂາເຂົ້າຫຼາຍກວ່າຂາອອກ 11,7 ຕື້ ຫຼຽນສະຫະລັດ.
ຈຳນວນພົນລະເມືອງສະເຫຼ່ຍປີ 2012 ປະມານ 88,78 ລ້ານຄົນ, ເພີ່ມຂຶ້ນ 1,06% ທຽບກັບປີ 2011, ຊຶ່ງກວມດ້ວຍ: ຊາຍ 43,92 ລ້ານຄົນ, ເພີ່ມຂຶ້ນ 1,09%; ຍິງ 44,86 ລ້ານຄົນ, ເພີ່ມຂຶ້ນ 1,04%. ໃນຈຳນວນພົນລະເມືອງປີນີ້, ປະຊາກອນຢູ່ໃນຕົວເມືອງຕ່າງໆ ມີ 28,81 ລ້ານຄົນ, ເພີ່ມຂຶ້ນ 3,3% ທຽບກັບປີກ່ອນ; ປະຊາກອນຢູ່ເຂດຊົນນະບົດ ມີ 59,97 ລ້ານຄົນ, ເພີ່ມຂຶ້ນ 0,02%.
ອັດຕາສ່ວນຄົນວ່າງງານ ໃນຈຳນວນຜູ້ອອກແຮງງານທີ່ຢູ່ໃນໄວອາຍຸ ຂອງປີ 2012 ແມ່ນ 1,99%, ຊຶ່ງໃນນັ້ນ ຢູ່ໃນຕົວເມືອງຕ່າງໆ ແມ່ນ 3,25%, ຢູ່ເຂດຊົນນະບົດແມ່ນ 1,42%. ອັດຕາສ່ວນຜູ້ຂາດວຽກເຮັດງານທຳ ໃນຈຳນວນຜູ້ອອກແຮງງານທີ່ຢູ່ໃນໄວອາຍຸຂອງປີ 2012 ແມ່ນ 2,8%, ຊຶ່ງໃນນັ້ນ ຢູ່ໃນຕົວເມືອງຕ່າງໆ ແມ່ນ 1,58%, ຢູ່ເຂດຊົນນະບົດແມ່ນ 3,35%. ອັດຕາສ່ວນຜູ້ອອກແຮງງານທີ່ບໍ່ເປັນທາງການ ປີ 2012 ເພີ່ມຂຶ້ນຫຼາຍກວ່າທຽບກັບປີກ່ອນໆ, ຈາກ 34,6% ປີ 2010 ຂຶ້ນເປັນ 35,8% ປີ 2011 ແລະ 36,6% ປີ 2012.
ຄິດສະເຫຼ່ຍລວມ ປີ 2012, ຈຳນວນຄອບຄົວຖືກອຶດຫີວຍ້ອນຂາດອາຫານ ແມ່ນ 450,3 ພັນເທື່ອຄອບຄົວ, ຫລຸດລົງ 27,6% ທຽບກັບປີ 2011, ທຽບເທົ່າກັບ 1.911,8 ພັນເທື່ອຄົນຖືກອຶດຫີວຍ້ອນຂາດອາຫານ, ຫລຸດລົງ 26,9%. ອັດຕາສ່ວນຄອບຄົວທຸກຈົນໃນປີ 2012 ປະມານ 11,3 - 11,5%, ຫລຸດລົງ 1,1 - 1,3% ທຽບກັບປີ 2011, ຕ່ຳກວ່າລະດັບຫລຸດຜ່ອນ 1,6% ຂອງປີ 2011 ທຽບກັບປີ 2010./
ກົມໃຫຍ່ສະຖິຕິ