ສະເຫຼີມສະຫຼອງໄຊຊະນະ “ຮ່າໂນ້ຍ - ດຽນບຽນຝູ ເທິງອາກາດ” ຄົບຮອບ 40 ປີ
ວ.ກ. ອອນໄລ - ເຊົ້າວັນທີ 29 ທັນວາ 2012, ທີ່ນະຄອນຫຼວງຮ່າໂນ້ຍ, ຄະນະບໍລິຫານງານສູນກາງ ພັກກອມມູນິດຫວຽດນາມ, ສະພາແຫ່ງຊາດ, ລັດຖະບານ, ຄະນະກຳມະການສູນກາງ ແນວໂຮມແຫ່ງຊາດຫວຽດນາມ ໄດ້ຈັດຕັ້ງພິທີສະເຫຼີມສະຫຼອງ ໄຊຊະນະ “ຮ່າໂນ້ຍ-ດຽນບຽນຝູ ເທິງອາກາດ” ຄົບຮອບ 40 ປີ (12-1972 – 12-2012) ຢ່າງສົມກຽດ.
ໃຫ້ກຽດມາຮ່ວມພິທີສະເຫຼີມສະຫຼອງ ມີບັນດາສະຫາຍການນຳ, ອະດີດການນຳພັກ ແລະ ລັດ ແຫ່ງ ສສ ຫວຽດນາມ; ບັນດາແມ່ຫວຽດນາມວິລະຊົນ ແລະ ບັນດາວິລະຊົນ, ນັກຮົບເກົ່າ, ທະຫານລາດກອງຫຼອນທີ່ໄດ້ເຂົ້າຮ່ວມບັ້ນຮົບ “ຮ່າໂນ້ຍ-ດຽນບຽນຝູ ເທິງອາກາດ” ໃນ 12 ວັນຄືນປີນັ້ນ; ຜູ້ຕາງໜ້າການນຳ ກະຊວງປ້ອງກັນປະເທດ ແຫ່ງສະຫະພາບ ລັດເຊຍ, ສປ ຈີນ, ທູດການທະຫານຂອງບັນດາປະເທດ: ສປປ ລາວ, ກຳປູເຈຍ, ກູບາ, ເບລາຣຸດ, ເກົາຫຼີ ກໍ່ໄດ້ເຂົ້າຮ່ວມພິທີສະເຫຼີມສະຫຼອງ ຢ່າງສົມກຽດ.
ໃນທີ່ພິທີສະເຫຼີມສະຫຼອງ, ບັນດາຜູ້ແທນໄດ້ພ້ອມກັນລຶ້ມຄືນມູນເຊື້ອອັນສະຫງ່າງາມ ຂອງໄຊຊະນະທີ່ມີຄວາມໝາຍປະຫວັດສາດ ແລະ ຍຸກສະໄໝອັນເລິກເຊິ່ງ, ອັນໄດ້ປະກອບສ່ວນສຳຄັນທີ່ສຸດ ເຂົ້າໃນການນຳເອົາການຕໍ່ສູ້ກູ້ຊາດ ຕ້ານອາເມລິກາ ຂອງຊາດຫວຽດນາມໄປເຖິງໄຊຊະນະສົມບູນ.
ກ່າວຄຳປາໄສໃນພິທີສະເຫຼີມສະຫຼອງ ທ່ານ ເຈືອງເຕິນຊາງ ປະທານປະເທດ ສສ ຫວຽດນາມ ໄດ້ຢືນຢັນວ່າ: ໄຊຊະນະ “ຮ່າໂນ້ຍ-ດຽນບຽນຝູ ເທິງອາກາດ” ແມ່ນໜຶ່ງໃນບັນດາໄຊຊະນະປະຫວັດສາດອັນໃຫຍ່ໂຕ ໃນສະຕະວັດ ທີ XX, ຊຶ່ງໄດ້ຂຽນຕື່ມໃສ່ໜ້າປະຫວັດທອງຄຳອັນເຫຼືອງເຫຼື້ອມ ແຫ່ງໄຊຊະນະໃນປະຫວັດສາດຕ້ານການຮຸກຮານຈາກພາຍນອກ ເພື່ອປົກປັກຮັກສາປະເທດ ຂອງຊາດຫວຽດນາມ; ເປັນການຢັ້ງຢືນຢ່າງສະຫງ່າຜ່າເຜີຍ ໃຫ້ແກ່ສັດຈະທຳ “ບໍ່ມີສິ່ງໃດທີ່ຈະປະເສີດເລີດລ້ຳກວ່າເອກະລາດ, ອິດສະລະພາບ”; ເປັນໄຊຊະນະຂອງແນວທາງສົງຄາມປະຊາຊົນ, ທົ່ວປວງຊົນ, ຮອບດ້ານ; ໄຊຊະນະຂອງສິນລະປະຍຸດການທະຫານຫວຽດນາມ ທີ່ສະຫຼຽວສະຫຼາດ, ປະດິດສ້າງ, ເອົາໜ້ອຍສູ້ກັນຫຼາຍ, ເອົານ້ອຍຕີກັບໃຫຍ່, ອີງບົນພື້ນຖານເສີມຂະຫຍາຍກຳລັງແຮງສັງລວມ ຂອງທົ່ວທັງຊາດ; ໄຊຊະນະຂອງສິນລະປະການກໍ່ສ້າງທ່າສະໜາມຮົບການປ້ອງກັນອາກາດປະຊາຊົນ ທີ່ໝັ້ນຄົງເຂັ້ມແຂງ, ເສີມຂະຫຍາຍສຸດຂີດບົດບາບຂອງກຳລັງປ້ອງກັນອາກາດ ດ້ວຍສາມປະເພບທັບ; ເປັນໄຊຊະນະຂອງຈິດໃຈເອກະລາດ ເປັນເຈົ້າຕົນເອງ, ອີງໃສ່ກຳລັງຂອງຕົນເອງ ສ້າງຄວາມເຂັ້ມແຂງໃຫ້ແກ່ຕົນ, ສະຫຼຽວສະຫຼາດ, ປະດິດສ້າງ, ຂອງເຈດຈຳນົງຕັດສິນໃຈສູ້ຮົບ ແລະ ເດັດຂາດຍາດເອົາໄຊຊະນະ; ພ້ອມກັນນັ້ນ ກໍຍາດແຍ່ງເອົາຄວາມເຫັນດີເຫັນພ້ອມ ສະໜັບສະໜູນ ຊ່ວຍເຫຼືອ ຂອງບັນດາປະເທດສັງຄົມນິຍົມອ້າຍນ້ອງ, ຂອງບັນດາກຳລັງກ້າວໜ້າ ທີ່ຮັກຫອມສັນຕິພາບໃນໂລກ...
ທ່ານປະທານ ເຈືອງເຕິນຊາງ ຢັ້ງຢືນວ່າ: ວັນເວລາຈະຜ່ານພົ້ນໄປ, ແຕ່ໄຊຊະນະ “ຮ່າໂນ້ຍ-ດຽນບຽນຝູ ເທິງອາກາດ” ໄດ້ເປັນສັນຍາລັກຕະຫຼອດການ ຂອງເຈດຈຳນົງອົງອາດກ້າແກ່ນ, ບໍ່ອ່ອນຍອມເປັນອັນຂາດ, ຄວາມສະຫຼຽວສະຫຼາດ, ປະດິດສ້າງ, ເປັນຄວາມເອກອ້າງທະນົງໃຈ ຂອງຊາດຫວຽດນາມ, ປະຊາຊົນຫວຽດນາມ, ກອງທັບຫວຽດນາມ ຊຶ່ງເປັນໜຶ່ງໃນບັນດາຜົນງານການສູ້ຮົບອັນສະຫວ່າງສະໄຫວ ໃນປະຫວັດສາດຕ້ານການຮຸກຮານຈາກພາຍນອກ ຂອງຊາດຫວຽດນາມຜູ້ພິລະອາກຫານ; ເປັນການສະແດງອອກຢ່າງພົ້ນເດັ່ນ ຂອງການຕໍ່ສູ້ປະຕິວັດອັນພິລະອາດຫານ ຂອງປະຊາຊົນຫວຽດນາມໃນຍຸກສະໄໝ ໂຮ່ຈີມິນ.
ທ່ານປະທານປະເທດໃຫ້ທັດສະນະວ່າ ໃນປັດຈຸບັນນີ້ ປະເທດຫວຽດນາມສັນຕິພາບ ເອກະພາບ ພວມປະຕິບັດກິດຈະການປ່ຽນແປງໃໝ່, ຍູ້ແຮງການຫັນເປັນອຸດສາຫະກຳ ທັນສະໄໝ ແລະ ເຊື່ອມໂຍງເຂົ້າກັບສາກົນ ເພື່ອໃຫ້ປະຊາຊົນຮັ່ງມີ ປະເທດຊາດເຂັ້ມແຂງ ມີປະຊາທິປະໄຕ ສະເໝີພາບ ສີວິໄລ ກ້າວຂຶ້ນສູ່ສັງຄົມນິຍົມຢ່າງໜັກແໜ້ນ ແລະ ປົກປັກຮັກສາປະເທດຊາດສັງຄົມນິຍົມ ຢ່າງໝັ້ນຄົງ...
ເພື່ອປະຕິບັດບັນດາຈຸດໝາຍ ໜ້າທີ່ດັ່ງກ່າວນັ້ນໄດ້ຢ່າງສຳເລັດມີໄຊ ຮຽກຮ້ອງຕ້ອງການມີຄວາມຕັດສິນໃຈ, ຄວາມຕັ້ງໜ້າພະຍາຍາມຊູ້ຊົນສູງທີ່ສຸດ ຂອງທົ່ວພັກ ທົ່ວກອງທັບ ທົ່ວປວງຊົນຫວຽດນາມ.
ທ່ານປະທານປະເທດເນັ້ນໜັກວ່າ ພັກ ລັດ ແລະ ປະຊາຊົນຫວຽດນາມ ໄດ້ຈາລຶກໄວ້ໃນໃຈ ແລະ ສະແດງຄວາມຮູ້ບຸນຄຸນຕະຫຼອດການ ຕໍ່ຄວາມສະໜັບສະໜູນ ການຊ່ວຍເຫຼືອຢ່າງສຸດອົກສຸດໃຈ ຂອງບັນດາປະເທດສັງຄົມນິຍົມອ້າຍນ້ອງ, ຂອງເພື່ອນມິດສາກົນ ປະຊາຊົນຜູ້ຮັກຫອມສັນຕິພາບ ແລະ ຄວາມຍຸດຕິທຳ, ໃນນັ້ນມີປະຊາຊົນອາເມລິກາ, ທີ່ໄດ້ຊ່ວຍເຫຼືອປະຊາຊົນຫວຽດນາມ ໃນເວລາສົງຄາມທີ່ຫຍຸ້ງຍາກລຳບາກ ຮ້າຍແຮງດຸເດືອດ.
ທ່ານປະທານປະເທດປາຖະໜາວ່າ ດ້ວຍຄວາມເອກອ້າງທະນົງໃຈ ກ່ຽວກັບຜົນງານການສູ້ຮົບອັນພິລະອາດຫານ, ມູນເຊື້ອຮັກຊາດ, ສາມັກຄີ, ເຈດຈຳນົງອົງອາດກ້າແກ່ນ ບໍ່ອ່ອນຍອມເປັນອັນຂາດ ຂອງຊາດຫວຽດນາມ, ຄວາມເອກອ້າງທະນົງໃຈກ່ຽວກັບພັກກອມມູນິດຫວຽດນາມ, ເອກອ້າງທະນົງໃຈກ່ຽວກັບມູນເຊື້ອອັນສະຫງ່າງາມ ຂອງກອງທັບ ປະຊາຊົນຫວຽດນາມຜູ້ພິລະອາດຫານ, ທົ່ວພັກ ທົ່ວກອງທັບ ແລະ ທົ່ວປວງຊົນຫວຽດນາມ ຈະຕັດສິນໃຈພິທັກຮັກສາ ແລະ ເສີມຂະຫຍາຍເຖິງລະດັບສູງມູນເຊື້ອອັນສະຫງ່າງາມດັ່ງກ່າວນັ້ນ ໃນພາລະກິດສ້າງສາ ແລະ ປົກປັກຮັກສາປະເທດຊາດຫວຽດນາມໃນປັດຈຸບັນ.
ໃນພິທີສະເຫຼີມສະຫຼອງ, ທ່ານພົນຕີ ຫງວຽນວັນຟຽດ, ອະດີດເລຂາຄະນະພັກ, ຮອງຜູ້ບັນຊາການກອງທັບ ປ້ອງກັນອາກາດ-ທະຫານອາກາດຫວຽດນາມ - ຜູ້ຕາງໜ້ານັກຮົບເກົ່າທີ່ໄດ້ເຂົ້າຮ່ວມການສູ້ຮົບໂດຍກົງ ໃນບັ້ນຮົບ “ຮ່າໂນ້ຍ-ດຽນບຽນຝູ ເທິງອາກາດ” - ແລະ ທ່ານ ຫງວຽນງອກຕຸ່ງ - ນັກບິນຕົ້ນຕໍ, ຮອງຫົວໜ້າໜ່ວຍຊາວໜຸ່ມໜ່ວຍບິນ A320, ກອງບິນ 919 - ຕ່າງໜ້າໃຫ້ສະມາຊິກຊາວໜຸ່ມກວ່າ 23 ລ້ານຄົນໃນທົ່ວປະເທດ - ຢັ້ງຢືນຄວາມຕັດສິນໃຈ ສືບຕໍ່ພິທັກຮັກສາ ແລະ ເສີມຂະຫຍາຍມູນເຊື້ອພິລະອາດຫານ ຂອງທະຫານປ້ອງກັນອາກາດ-ທະຫານອາກາດ, ຄຸນສົມບັດອັນດີເດັ່ນສູງສົ່ງຂອງ “ທະຫານຂອງລຸງໂຮ່” ໃນພາລະກິດການສ້າງສາພັດທະນາປະເທດ ແລະ ປົກປັກຮັກສາປະເທດຊາດສັງຄົມນິຍົມ, ປະກອບສ່ວນພ້ອມກັບທົ່ວພັກ ທົ່ວປວງຊົນ ທົ່ວກອງທັບຫວຽດນາມ ເດັດດ່ຽວພິທັກຮັກສາຜືນແຜ່ນດິນອັນລ້ຳຄ່າຫວຽດນາມ ໃຫ້ໝັ້ນຄົງຂະໜົງແກ່ນ, ຍືນຍົງ ແລະ ຈະເລີນພັດທະນາຕະຫຼອດກາລະນານ./.
ບົດແລະຮູບພາບໂດຍ ຟ້າມທິເຫວ້