ກອງປະຊຸມໃຫຍ່ຜູ້ແທນທົ່ວປະເທດຄັ້ງທີ X ຂອງຄະນະຊາວໜຸ່ມກອມມູນິດ ໂຮ່ຈີມິນ
ວ.ກ. ອອນໄລ - ແຕ່ວັນທີ 12 ເຖິງວັນທີ 14 ທັນວາ 2012, ຢູ່ທີ່ຮ່າໂນ້ຍ, ກອງປະຊຸມໃຫຍ່ຜູ້ແທນທົ່ວປະເທດຄັ້ງທີ X ຂອງຄະນະຊາວໜຸ່ມກອມມູນິດ ໂຮ່ຈີມິນ ໄດ້ຈັດຂຶ້ນຢ່າງສົມກຽດ. ນີ້ແມ່ນເຫດການການເມືອງທີ່ສຳຄັນ, ເປັນງານມະໂຫລານຂອງຊາວໜຸ່ມຫວຽດນາມ, ເປັນບ່ອນທີ່ແຜນນະໂຍບາຍ ໂຄງການສຳຄັນຕ່າງໆ ກ່ຽວກັບວຽກງານຄະນະຊາວໜຸ່ມ ແລະ ຂະບວນການຊາວໜຸ່ມ ເຍົາວະຊົນ ອະນຸຊົນ ໃນໄລຍະເວລາ 5 ປີສະເພາະໜ້າ ຈະໄດ້ຮັບການຕົກລົງຮັບຮອງ.
ສະຫາຍເລຂາທິການໃຫຍ່ ຫງວຽນຝູຈ້ອງ, ອະດີດເລຂາທິການໃຫຍ່ ນົງດຶກແມ້ງ, ປະທານປະເທດ ເຈືອງເຕິນຊາງ, ອະດີດປະທານປະເທດ ເຈິ່ນດຶກເລືອງ, ນາຍົກລັດຖະມົນຕີ ຫງວຽນເຕິນຢູ໊ງ, ປະທານສະພາແຫ່ງຊາດ ຫງວຽນຊິງຮຸ່ງ, ອະດີດປະທານສະພາແຫ່ງຊາດ ຫງວຽນວັນອານ, ປະທານຄະນະກຳມະການສູນກາງ ແນວໂຮມແຫ່ງຊາດຫວຽດນາມ ຮວິ່ງດ໋າມ; ບັນດາສະຫາຍ ກຳມະການກົມການເມືອງ, ເລຂາທິການສູນກາງພັກ, ຮອງປະທານປະເທດ, ຮອງປະທານສະພາແຫ່ງຊາດ, ຮອງນາຍົກລັດຖະມົນຕີ, ບັນດານັກປະຕິວັດຜູ້ອາວຸໂສ, ອະດີດການນຳ ພັກ-ລັດ, ຜູ້ຕາງໜ້າບັນດາ ແມ່ຫວຽດນາມວິລະຊົນ, ວິລະຊົນກຳລັງປະກອບອາວຸດ, ວິລະຊົນແຮງງານ, ບັນດາສະຫາຍກຳມະການສູນກາງພັກ, ການນຳບັນດາກະຊວງ ຂະແໜງການ, ແນວໂຮມແຫ່ງຊາດຫວຽດນາມ ແລະ ບັນດາອົງການຈັດຕັ້ງມະຫາຊົນຢູ່ສູນກາງ... ໄດ້ໃຫ້ກຽດມາຮ່ວມກອງປະຊຸມໃຫຍ່.
ຜູ້ແທນ 1.000 ຄົນ ຊຶ່ງເປັນພະນັກງານ, ສະມາຊິກຊາວໜຸ່ມທີ່ດີເດັ່ນ, ຕາງໜ້າໃຫ້ສະມາຊິກຊາວໜຸ່ມກວ່າ 7 ລ້ານ 3 ໝື່ນຄົນ, ທີ່ມາຈາກເຂດແຄວ້ນທ້ອງຖິ່ນຕ່າງໆໃນທົ່ວປະເທດ ໄດ້ເຂົ້າຮ່ວມກອງປະຊຸມໃຫຍ່ ຢ່າງຄຶກຄື້ນ.
ຜ່ານ 5 ປີແຫ່ງການປະຕິບັດມະຕິກອງປະຊຸມໃຫຍ່ຄະນະຊາວໜຸ່ມທົ່ວປະເທດຄັ້ງທີ IX, ວຽກງານຄະນະຊາວໜຸ່ມ ແລະ ຂະບວນການຊາວໜຸ່ມ ເຍົາວະຊົນ ອະນຸຊົນ ໄດ້ມີບາດກ້າວຫັນປ່ຽນຢ່າງຕັ້ງໜ້າ, ຈະແຈ້ງໃນຫຼາຍດ້ານ.
ສອງຂະບວນການເຄື່ອນໄຫວປະຕິວັດໃຫຍ່ ຂອງສະໄໝກອງປະຊຸມໃຫຍ່ຄັ້ງທີ IX ແມ່ນ “5 ຕະລຸມບອນ ພັດທະນາເສດຖະກິດ - ສັງຄົມ, ປົກປັກຮັກສາປະເທດຊາດ” ແລະ “4 ການເດີນຮ່ວມທາງກັບຊາວໜູ່ມກໍ່ສ້າງຕົວ, ສ້າງຕັ້ງວິຊາອາຊີບຊີບ” ໄດ້ເຂົ້າສູ່ຊີວິດການເປັນຢູ່; ເສີມຂະຫຍາຍໄດ້ບົດບາດປະຈັນບານ ອາສາສະໝັກຂອງໄວໜຸ່ມໃນການພັດທະນາເສດຖະກິດ - ສັງຄົມ, ປົກປັກຮັກສາຄວາມສະຫງົບ, ປ້ອງກັນປະເທດ, ຮັບປະກັນສະຫວັດດິການສັງຄົມ; ຊ່ວຍເຫຼືອແກ້ໄຂບັນດາຄວາມຕ້ອງການ ຄວາມປາຖະໜາອັນຊອບທຳ ຖືກກົດໝາຍຂອງຊາວໜຸ່ມ, ຊ່ວຍໃຫ້ຄະນະຊາວໜຸ່ມໃກ້ຊິດຕິດແທດກັບຊາວໜຸ່ມ, ເປັນເພື່ອນຜູ້ສະໜິດແໜ້ນທີ່ແທ້ຈິງຂອງຊາວໜຸ່ມ ບົນເສັ້ນທາງແຫ່ງການກໍ່ສ້າງຕົວ, ສ້າງຕັ້ງວິຊາອາຊີບຊີບ.
ບັ້ນຂົນຂວາຍ “ໄວນຸ່ມຫວຽດນາມຮ່ຳຮຽນ ແລະ ປະຕິບັດຕາມ ຄຳສັ່ງສອນຂອງ ລຸງໂຮ່” ແລະໂຄງການ “ປຸກລຸກຄວາມມຸ່ງມາດປາຖະໜາຂອງໄວໜຸ່ມຫວຽດນາມໃຫ້ແຈ້ງສະຫວ່າງຂຶ້ນ ເພື່ອໃຫ້ປະຊາຊົນຮັ່ງມີ, ປະເທດຊາດເຂັ້ມແຂງ, ປະຊາທິປະໄຕ, ສະເໝີພາບ, ສີວິໄລ" ໂດຍແມ່ນຄະນະຊາວໜຸ່ມປຸກລະດົມຂົນຂວາຍ ແລະ ຈັດຕັ້ງການປະຕິບັດ ໄດ້ຄົ້ນເຜີຍ, ຍ້ອງຍໍສັນລະເສີນ ແລະ ທະວີຄູນເປັນພັນໆ ແວ່ນແຍງແບບຢ່າງທີ່ດີເດັ່ນ ໃນບັນດາຂົງເຂດຂອງຊີວິດສັງຄົມ, ເຮັດໃຫ້ມີການຜັນປ່ຽນເທື່ອລະກ້າວໃນຄວາມຮັບຮູ້ການເມືອງ, ປັບປຸງຄວາມເຊື່ອຖື, ເພີ່ມທະວີສະຕິຄວາມຮັບຜິດຊອບຂອງຊາວໜຸ່ມຕໍ່ປະເທດຊາດ.
ການຈັດຕັ້ງຄະນະຊາວໜູ່ມນັບມື້ນັບໄດ້ຮັບການປັບປຸງ, ເປັນແນວໂຮມສາມັກຄີ ເຕົ້າໂຮມຊາວໜຸ່ມ ເຍົາວະຊົນ ອະນຸຊົນເຂົ້າ, ປະກອບສ່ວນກໍ່ສ້າງ ໃຫ້ເປັນຮູບເປັນຮ່າງຊັ້ນຄົນຊາວໜຸ່ມໃໝ່ຂຶ້ນ ທີ່ມີນ້ຳໃຈຮັກຊາດອັນດູດດື່ມ, ມີປັນຍາຄວາມຮູ້, ມີສຸຂະພາບເຂັ້ມແຂງ, ມີມານະຈິດສູ້ຊົນບືນຕົວຂຶ້ນໃນຊີວິດການເປັນຢູ່, ເປັນເຈົ້າການ ເຊື່ອໝັ້ນຕົນເອງໃນການເຊື່ອມໂຍງເຂົ້າກັບສາກົນ.
ສະພາບການໃໝ່, ໂອກາດໃໝ່, ສິ່ງທ້າທາຍໃໝ່ ພວມວາງຄວາມຮຽກຮ້ອງຕ້ອງການ ແລະ ໜ້າທີ່ໃໝ່ອອກມາໃຫ້ຄະນະຊາວໜຸ່ມ. ກອງປະຊຸມໃຫຍ່ຄັ້ງນີ້ແນໃສ່ປະເມີນຄ່າຢ່າງພາວະວິໄສ ຮອບດ້ານ ຕໍ່ບັນດາຜົນສຳເລັດທີ່ໄດ້ບັນລຸ ກໍ່ຄືຄວາມບົກພ່ອງຈຸດອ່ອນຍັງຄົງຄ້າງ, ຖອດຖອນເອົາບົດຮຽນຕ່າງໆ ໂດຍຜ່ານການປະຕິບັດມະຕິກອງປະຊຸມໃຫຍ່ຄະນະຊາວໜຸ່ມທົ່ວປະເທດ ຄັ້ງທີ IX, ຈາກນັ້ນ ກຳນົດຈຸດໝາຍ ທິດທາງ ໜ້າທີ່ວຽກງານຄະນະຊາວໜຸ່ມ ແລະ ຂະບວນການຊາວໜຸ່ມ ເຍົາວະຊົນ ອະນຸຊົນ ສະໄໝ 2012 – 2017; ເພີ່ມເຕີມ ດັດແປງກົດລະບຽບຂອງຄະນະຊາວໜຸ່ມ; ເລືອກຕັ້ງຄະນະບໍລິຫານງານສູນກາງ ຄະນະຊາວໜຸ່ມສະໄໝທີ X.
ຜ່ານການເຮັດວຽກໃນ 2 ວັນ, ກອງປະຊຸມໃຫຍ່ໄດ້ສຳເລັດຢ່າງສະຫງ່າລາສີ, ປະຕິບັດໜ້າທີ່ຕ່າງໆໄດ້ເປັນຢ່າງດີ ແລະ ເລືອກຕັ້ງຄະນະບໍລິຫານງານສູນກາງ ຄະນະຊາວໜຸ່ມສະໄໝທີ X (ໄລຍະປີ 2012 - 2017) ປະກອບມີ 151 ສະຫາຍ. ສະຫາຍ ຫງວຽນດັກວິງ ໄດ້ຖືກເລືອກຕັ້ງຄືນໃໝ່ເປັນ ເລຂາທີການທີໝຶ່ງ ສູນກາງຄະນະຊາວໜຸ່ມກອມມູນິດ ໂຮ່ຈີມິນ.