ພິທີເປີດນຳໃຊ້ສະໜາມບິນສາກົນ ຝູ ກວັກ
ການສຳເລັດ ແລະ ເປີດນຳໃຊ້ ສະໜາມບິນສາກົນ ຝູ ກວັກ ຈະສ້າງເງື່ອນໄຂໃຫ້ເມືອງເກາະ ຝູ ກວັກ ແລະ ເຂດທົ່ງພຽງແມ່ນ້ຳຂອງ ມີຄວາມສະດວກດີກວ່າອີກ ໃນການພັດທະນາເສດຖະກິດ - ສັງຄົມ, ເຊື່ອມໂຍງເຂົ້າກັບສາກົນ, ການຕິດຕໍ່ແລກປ່ຽນ, ການລົງທຶນ, ພັດທະນາການຄ້າ, ການບໍລິການ, ວິທະຍາສາດ - ເຕັກນິກ…
ວັນທີ 15 ທັນວາ 2012, ສະຫາຍນາຍົກລັດຖະມົນຕີ ຫງວຽນເຕິນຢູ໊ງ ໄດ້ໃຫ້ກຽດມາຮ່ວມ ແລະ ຕັດແຖບຜ້າເປີດການນຳໃຊ້ ສະໜາມບິນສາກົນ ຝູ ກວັກ ຢູ່ຕາແສງ ເຢືອງເຕີ, ເມືອງ ຝູ ກວັກ, ແຂວງ ກຽນຢາງ.
ສະຫາຍອະດີດເລຂາທິການໃຫຍ່ ເລຂາຟຽວ, ສະຫາຍປະຈຳການຄະນະເລຂາທິການ ເລໂຮ່ງແອງ, ຮອງນາຍົກລັດຖະມົນຕີ ຫວູວັນນິງ, ອະດີດຮອງນາຍົກລັດຖະມົນຕີ ເຈືອງຫວິງຈ້ອງ ພ້ອມກັບການນຳຂອງກະຊວງ ຂະແໜງການອ້ອມຂ້າງສູນກາງຈຳນວນໜຶ່ງ ກໍ່ໄດ້ໃຫ້ກຽດມາຮ່ວມເຫດການອັນສຳຄັນນີ້.
ນີ້ແມ່ນໂຄງການສະໜາມບິນສາກົນທຳອິດທີ່ໄດ້ກໍ່ສ້າງຂຶ້ນຢູ່ຫວຽດນາມ ຕາມຮູບການການລົງທຶນດ້ວຍທຶນຂອງວິສາຫະກິດ 100% ໂດຍສະຫະບໍລິສັດທ່າອາກາດສະຍານຫວຽດນາມ ເປັນຜູ້ລົງທຶນດ້ວຍຈຳນວນເງິນ 3.000 ຕຶ້ດົ່ງ. ອອກແບບກໍ່ສ້າງສະໜາມບິນໂດຍ ບໍລິສັດທີ່ປຶກສາການອອກແບບ CPG-PAE (ສິງຄະໂປ-ສະຫະລັດອາເມລິກາ) ຊຶ່ງໄດ້ອອກແບບຕາມມາດຕະຖານສາກົນທັນສະໄໝ ແລະ ຄົບຊຸດ ອັນກວມມີ: ບໍລິເວນເດີນບິນມີ ທາງແລ່ນບິນຂຶ້ນລົງ, ທາງແລ່ນ 8 ສາຍ; ບໍລິເວນລານຈອດເຮືອບິນ ທີ່ມີລານຈອດ 8 ແຫ່ງ; ອາຄານຮັບຜູ້ໂດຍສານ ແລະ ຈັດການຂົນສົ່ງສິນຄ້າ, ລະບົບໄຟຟ້າສ່ອງແສງສະຫວ່າງ ແລະ ໄຟສັນຍານ ຕາມມາດຕະຖານຂອງອົງການການບິນພົນລະເຮືອນສາກົນ (International Civil Aviation Organization – ICAO)… ອາຄານຮັບຜູ້ໂດຍສານ ໄດ້ຈັດເປັນສອງພາກສ່ວນ ຜູ້ໂດຍສານຂາອອກ ແລະ ຜູ້ໂດຍສານຂາເຂົ້າ ເປັນຕ່າງຫາກ ທີ່ມີເນື້ອທີທັງໝົດ 24,3 ພັນຕາແມັດ ຊຶ່ງໄດ້ປະກອບດ້ວຍເຄື່ອງປະກອບທັນສະໄໝ ສາມາດຮັບໃຊ້ຜູ້ໂດຍສານໄດ້ 2,65 ລ້ານຄົນຕໍ່ປີ.
ສະໜາມບິນສາກົນ ຝູ ກວັກ ບັນລຸມາດຕະຖານຂັ້ນ 4E ຕາມມາດຕະຖານຂອງ ອົງການການບິນພົນລະເຮືອນສາກົນ, ຕອບສະໜອງໄດ້ການເຄື່ອນໄຫວຂອງເຮືອບິນທັນສະໄໝ ເຊັ່ນເຮືອບິນ Boeing 747-400 ແລະ ເຮືອບິນຂະໜາດເທົ່າທຽມ. ຂັ້ນຕອນການຂຸດຄົ້ນການບິນ ໄດ້ນຳໃຊ້ມາດຕະຖານການຄິດໄລ່ລະດັບ C ຕາມການແບ່ງລະດັບມາດຕະຖານການຮັບໃຊ້ຜູ້ໂດຍສານ ຂອງສະມາຄົມຂົນສົ່ງທາງອາກາດສາກົນ (International Air Transport Association – IATA) ຊ່ວຍໃຫ້ຮັບປະກັນປະຕິບັດຕາມບັນດາຂໍ້ກຳນົດສາກົນ ແຕ່ກໍ່ຍັງສ້າງເງື່ອນໄຂດີ ຄວາມສະດວກສະບາຍ ແລະ ສິ່ງອຳນວຍຄວາມສະດວກ ໃຫ້ແກ່ຜູ້ໂດຍສານ.
ກ່າວຄຳປາໄສໄຂພິທີ ສະຫາຍນາຍົກລັດຖະມົນຕີ ຫງວຽນເຕິນຢູ໊ງ ເນັ້ນວ່າ ການສຳເລັດ ແລະ ນຳເອົາ ສະໜາມບິນສາກົນ ຝູ ກວັກ ເຂົ້ານຳໃຊ້ເປັນທາງການ ເປັນເຫດການທີ່ມີຄວາມໝາຍທີ່ສຸດ ແລະ ຈະເປັນກຳລັງໝູນອັນສຳຄັນ ປະກອບສ່ວນພັດທະນາເມືອງເກາະ ຝູ ກວັກ ຢ່າງໄວ ແລະ ຍືນຍົງ, ພ້ອມກັນນັ້ນ ກໍ່ປະກອບສ່ວນເຂົ້າໃນການພັດທະນາເສດຖະກິດ - ສັງຄົມຂອງແຂວງ ກຽນຢາງ ແລະ ທົ່ວເຂດນີ້ເວົ້າລວມ. ສະຫາຍນາຍົກລັດຖະມົນຕີ ຫງວຽນເຕິນຢູ໊ງ ສະເໜີໃຫ້ຜູ້ເປັນເຈົ້າຂອງໂຄງການລົງທຶນ ສືບຕໍ່ສຳເລັດລາຍການກໍ່ສ້າງທີ່ຍັງເຫຼືອຂອງ ໂຄງການສະໜາມບິນສາກົນ ຝູ ກວັກ; ຮັບປະກັນໃຫ້ ສະໜາມບິນສາກົນ ຝູ ກວັກ ບັນລຸມາດຕະຖານສາກົນໄດ້ຢ່າງແທ້ຈິງ.
ພ້ອມກັນນັ້ນ ສະຫາຍນາຍົກລັດຖະມົນຕີ ຫງວຽນເຕິນຢູ໊ງ ເນັ້ນໜັກວ່າ ການນຳເມືອງ ຝູ ກວັກ, ແຂວງ ກຽນຢາງ ຕ້ອງເອົາໃຈໃສ່ທີ່ສຸດເຖິງການຊ່ວຍເຫຼືອບັນດາຄອບຄົວທີ່ຕ້ອງຍົກຍ້າຍໄປຢູ່ບ່ອນອື່ນ ສະຫຼະເນື້ອທີ່ໃຫ້ໂຄງການສະໜາມບິນສາກົນ ຝູ ກວັກ, ຮັບປະກັນໃຫ້ຄອບຄົວເຫຼົ່ານີ້ມີຊີວິດການເປັນຢູ່ປົກກະຕິ.
ສະຫາຍນາຍົກລັດຖະມົນຕີ ຫງວຽນເຕິນຢູ໊ງ ກໍ່ສະເໜີໃຫ້ບັນດາກະຊວງ ຂະແໜງການພາລະບົດາດ, ແຂວງ ກຽນຢາງ ເອົາໃຈໃສ່ເຖິງວຽກງານວາງແຜນກຳນົດເມືອງເກາະ ຝູ ກວັກ, ເປັນຕົ້ນແມ່ນແຜນກຳນົດກ່ຽວກັບພື້ນຖານໂຄງລ່າງ, ການທ່ອງທ່ຽວ; ຍູ້ແຮງການກໍ່ສ້າງບັນດາກິດຈະການກໍ່ສ້າງຈຸດໜັກຂອງເກາະ ຝູ ກວັກ, ພິເສດແມ່ນສາຍທາງຄົມມະນາຄົມ, ລະບົບໄຟຟ້າ, ນ້ຳປະປາ ໃຫ້ເກາະນີ້.
* ຕອນເຊົ້າວັນດຽວກັນ, ບໍລິສັດການບິນ VietJetAir ໄດ້ເປີດນຳໃຊ້ສາຍການບິນ ນະຄອນ ໂຮ່ຈີມິນ - ຝູ ກວັກ ເປັນທາງການ. ນີ້ແມ່ນສາຍການບິນທີ 9 ຂອງ VietJetAir. ສາຍການບິນ ນະຄອນ ໂຮ່ຈີມິນ - ຝູ ກວັກ ໃນເບື້ອງຕົ້ນຈະໄດ້ VietJetAir ຂຸດຄົ້ນວັນລະທ່ຽວ ດ້ວຍເຮືອບິນ Airbus A320 ໃໝ່, ບັນທຸກຜູ້ໂດຍສານໄດ້ 180 ຄົນ. ທ່ຽວການບິນຈະບິນຂຶ້ນຈາກນະຄອນ ໂຮ່ຈີມິນ ເວລາ 7 ໂມງ 15 ນາທີ ແລະ ເຖິງ ຝູ ກວັກ ເວລາ 8 ໂມງ 05 ນາທີໃນຕອນເຊົ້າວັນດຽວກັນ. ທ່ຽວການບິນກັບຈາກ ຝູ ກວັດ ມານະຄອນ ໂຮ່ຈີມິນ ຈະບິນຂຶ້ນເວລາ 8 ໂມງ 40 ນາທີ ໃນວັນດຽວກັນ./.