ວ.ກ. ອອນໄລ - ໃນຕອນເຊົ້າວັນທີ 20 ທັນວາ 2012, ກອງປະຊຸມໃຫຍ່ ຜູ້ແທນທົ່ວປະເທດ ສະມາຄົມນັກຮົບເກົ່າ ຫວຽດນາມ ຄັ້ງທີ V ໄດ້ດຳເນີນວາລະປິດການປະຊຸມ ແລະ ສະເໜີຕົວ ຄະນະບໍລິຫານງານສູນກາງສະມາຄົມ ສະໄໝປີ 2012 - 2017. ສະຫາຍພົນໂທ ຫງວຽນວັນເດືອກ - ວິລະຊົນກຳລັງປະກອບອາວຸດ ຫວຽດນາມ ຖືກເລືອກຕັ້ງເປັນປະທານ ສະມາຄົມນັກຮົບເກົ່າຫວຽດນາມ ສະໄໝປີ 2012 - 2017.
ຄະນະບໍລິຫານງານສູນກາງ ສະມາຄົນນັກຮົບເກົ່າ ຫວຽດນາມ ສະໄໝປີ 2012 - 2017 ອອກສະເໜີຕົວຕໍ່ກອງປະຊຸມໃຫຍ່ - ຮູບຂອງ ໜັງມືພິມນັກຮົບເກົ່າຫວຽດນາມ
ກອງປະຊຸມໃຫຍ່ຜູ້ແທນທົ່ວປະເທດ ສະມາຄົມນັກຮົບເກົ່າຫວຽດນາມ ຄັ້ງທີ V ໄດ້ເລືອກຕັ້ງ ຄະນະບໍລິຫານງານສູນກາງສະມາຄົມ ສະໄໝທີ V ປະກອບມີ 99 ສະຫາຍ ທີ່ມີຄຸມສົມບັດ ແລະ ຄວາມສາມາດພຽງພໍ ເພື່ອຕາງໜ້າໃຫ້ສະມາຊິກ 2,6 ລ້ານຄົນໃນທົ່ວປະເທດ. ຄະນະບໍລິຫານງານໄດ້ປະຊຸມວາລະປະຖົມມະລຶກ, ເລືອກຕັ້ງຄະນະປະຈຳການ ປະກອບມີ 23 ສະຫາຍ. ບັນດາສະຫາຍ: ຝຸ່ງຄັກດັງ, ເລແທ່ງເຕິມ, ຫງວຽນວັນດ້າວ, ຫງວຽນຊອງຟີ ຖືກເລືອກຕັ້ງເປັນຮອງປະທານ ສະມາຄົມນັກຮົບເກົ່າຫວຽດນາມ ສະໄໝປີ 2012 - 2017.
ກອງປະຊຸມໃຫຍ່ໄດ້ເຄົາລົບຍົກຍ້ອງ ສະຫາຍພົນເອກ ຫວໍ ງວຽນ ຢາບ ເປັນປະທານກິຕິມະສັກ ຂອງສະມາຄົມນັກຮົບເກົ່າຫວຽດນາມ; ໄດ້ປຶກສາສົນທະນາ ແລະ ເປັນເອກະພາບສູງ ຮັບຮອງຜ່ານບັນດາເອກະສານທີ່ສຳຄັນ: ລາຍງານສະຫລຸບວຽກງານໃນສະໄໝປີ 2007 - 2012 ແລະ ທິດທາງ ໜ້າທີ ໃນສະໄໝປີ 2012 - 2017; ກົດລະບຽບສະມາຄົມ (ສະບັບເພີ່ມເຕີມ ດັດແກ້); ມະຕິ ແລະ ຈົດໝາຍຝາກເຖິງ ຄະນະບໍລິຫານງານສູນກາງ ພັກກອມມູນິດຫວຽດນາມ ເພື່ອລາຍງານກ່ຽວກັບຜົມສຳເລັດ ຂອງກອງປະຊຸມໃຫຍ່ ແລະ ສະແດງຄວາມຕັດສິນໃຈຂອງສະມາຄົມທັງໝົດທີ່ຕັ້ງໝັ້ນຄວາມຈົງຮັກພັກດີຢ່າງບໍມີຂອບເຂດ ຕໍ່ພາລະກິດປະຕິວັດ ຂອງພັກກອມມູນິດຫວຽດນາມ, ຂອງຊາດຫວຽດນາມ; ຮັບຮອງຜ່ານຈົດໝາຍຝາກເຖິງອ້າຍນ້ອງນັກຮົບເກົ່າ, ອະດີດນາຍ ແລະ ພົນທະຫານຫວຽດນາມ.
ກອງປະຊຸມໃຫຍ່ ຜູ້ແທນທົ່ວປະເທດ ສະມາຄົມນັກຮົບເກົ່າຫວຽດນາມ ຄັ້ງທີ V ສະແດງໃຫ້ເຫັນເຖິງ ຄວາມຕັດສິນໃຈຢ່າງແຂງແຮງ ຂອງນັກຮົບເກົ່າຫວຽດນາມ ຈະປະຕິບັດຢ່າງສຳເລັດມີໄຊ ມະຕິກອງປະຊຸມໃຫຍ່ຄັ້ງທີ XI ຂອງພັກ, ເສີມຂະຫຍາຍມູນເຊື້ອ “ທະຫານຂອງ ລຸງໂຮ່”, ຮ່ຳຮຽນ ແລະ ປະຕິບັດຕາມ ແວ່ນແຍງຄຸນສົມບັດ ໂຮ່ຈີມິນ.
ມະຕິກອງປະຊຸມໃຫຍ່ ຜູ້ແທນທົ່ວປະເທດ ຄັ້ງທີ V ຂອງສະມາຄົມນັກຮົບເກົ່າຫວຽດນາມ ກຳນົດຢ່າງຈະແຈ້ງ ທິດທາງ ໜ້າທີ່ ຂອງສະມາຄົມໃນສະໄໝທີ V ນັ້ນຄື ສືບຕໍ່ຂົນຂວາຍບັນດາຮຸ້ນນັກຮົບເກົ່າ ເສີມຂະຫຍາຍທາດແທ້ອັນເປັນມູນເຊື້ອ “ທະຫານຂອງ ລຸງໂຮ່”, ຈົງຮັກພັກດີ - ສາມັກຄີ - ເປັນແບບຢ່າງ - ປ່ຽນແປງໃໝ່, ກໍ່ສ້າງອົງການຈັດຕັ້ງສະມາຄົມໃຫ້ ບໍລິສຸດປອດໃສ, ໝັ້ນຄົງເຂັ້ມແຂງ, ສົມກຽດເປັນບ່ອນອີງທີ່ໄວ້ເນື້ອເຊື່ອໃຈໄດ້ ຂອງຄະນະພັກ, ອຳນາດການປົກຄອງ ແລະ ຂອງປະຊາຊົນ.
ກອງປະຊຸມໃຫຍ່ ໄດ້ເປັນເອກະພາບສູງ ຮັບຮອງຜ່ານບັນດາເອກະສານ ແລະ ເປັນເອກະສັນກັນຕັດສິນໃຈປະຕິບັດ ລະດັບຄາດໝາຍ 8 ປະການຄື: ສູ້ຊົນຫລຸດຜ່ອນ ອັດຕາຄອບຄົວນັກຮົບເກົ່າທຸກຈົນ ລົງສະເຫຼ່ຍ 2 - 2,5% ຕໍ່ປີ ຕາມບັນທັດຖານໃໝ່, ຫລຸດຜ່ອນເຂດຫຍຸ້ງຍາດລົງ 3,5 - 4%; ສຳເລັດໂດຍພື້ນຖານການປ່ຽນແທນເຮືອນເພພັງ ດ້ວຍເຮືອນຢູ່ທີ່ດີ ໃຫ້ນັກຮົບເກົ່າ; ນັກຮົບເກົ່າໃນໄວອາຍຸອອກແຮງງານ ຍັງມີສຸຂະພາບ ສ່ວນຫຼາຍລ້ວນແຕ່ໄດ້ຮັບຄວາມປຶກສາ ແນະນຳ ບຳລຸງ ຫຼື ກໍ່ສ້າງວິຊາອາຊີບ ເພື່ອໃຫ້ມີໂອກາດເງື່ອນໄຂຫາວຽກເຮັດງານທຳ; ສະມາຊິກສະມາຄົມນັກຮົບເກົ່າ 100% ມີຄວາມຕັ້ງໜັ້ນ ໜັກແໜ້ນທາງດ້ານແນວຄິດການເມືອງ; ແຕ່ລະປີ ມີກວ່າ 90% ອົງການຈັດຕັ້ງຮາກຖານສະມາຄົມ ບັນລຸມາດຕະຖານບໍລິສຸດປອດໃສ ໝັ້ນຄົງເຂັ້ມແຂງ, ມີກວ່າ 95% ບັນລຸມາດຕະຖານ “ສະມາຊິກເປັນແບບຢ່າງ” ແລະ ມີກວ່າ 90% ຄອບຄົວນັກຮົບເກົ່າບັນລຸມາດຕະຖານ “ຄອບຄົວວັດທະນະທຳ”...
ໂດຍຕາງໜ້າຄະນະບໍລິຫານງານສູນກາງ ສະມາຄົມນັກຮົບເກົ່າຫວຽດນາມ ສະໄໝທີ V, ສະຫາຍປະທານ ສະມາຄົມນັກຮົບເກົ່າຫວຽດນາມ ຫງວຽນວັນເດືອກ ຢັ້ງຢືນວ່າ, ສະມາຄົມຈະຄົ້ນຄວ້າ ຮ່ຳຮຽນຢ່າງເປັນປະຈຳ ແລະ ຊາບຊຶມຢ່າງເລິກເຊິ່ງ ບັນດາແຜນນະໂຍບາຍ, ແນວທາງນະໂຍບາຍ ຂອງພັກ ແລະ ລັດ; ຊີ້ນຳ ຈັດຕັ້ງການເຄື່ອນໄຫວຂອງສະມາຄົມ ແນໃສ່ບັນລຸໝາກຜົນສູງທີ່ສຸດ; ຍົກສູງຄວາມຮັບຜິດຊອບ, ເສີມຂະຫຍາຍປະຊາທິປະໄຕ, ຮັກສາຄວາມສາມັກຄີ ໃນຄະນະປະຈຳການ, ໃນຄະນະບໍລິຫານງານ; ປຸກລະດົມກຳລັງໃຈສະມາຄົມຂັ້ນຕ່າງໆ ແລະ ສະມາຊິກສະມາຄົມນັກຮົບເກົ່າ ໃຫ້ເສີມຂະຫຍາຍມູນເຊື້ອ “ທະຫານຂອງ ລຸງໂຮ່”, ສຳເລັດຢ່າງດີເດັ່ນ ໜ້າທີ່ 7 ປະການ ຂອງສະມາຄົມ ທີ່ພັກ-ລັດໄດ້ມອບໝາຍໃຫ້, ໃນນັ້ນ ໜ້າທີ່ສຳຄັນອັນດັບໜຶ່ງແມ່ນ ຕັ້ງໜ້າເຂົ້າຮ່ວມໃນການກໍ່ສ້າງ, ປົກປັກຮັກສາພັກ ອຳນາດການປົກຄອງ ລະບອບສັງຄົມນິຍົມ ແລະ ປົກປ້ອງປະຊາຊົນ, ປະກອບສ່ວນກໍ່ສ້າງພັກ ແລະ ລັດ ແຫ່ງ ສສ ຫວຽດນາມ ໃຫ້ບໍລະສຸດປອດໃສ, ໝັ້ນຄົງເຂັ້ມແຂງ.
ພາຍຫຼັງກອງປະຊຸມໃຫຍ່ນີ້, ຄະນະບໍລິຫານງານ ສະມາຄົມນັກຮົບເກົ່າຫວຽດນາມ ຊຸດທີ V ສະໄໝປີ 2012 - 2017 ຈະສ້າງໂຄງການປະຕິບັດ ມະຕິກອງປະຊຸມໃຫຍ່ຄັ້ງທີ V, ສ້າງຂໍ້ກຳນົດລະບອບການເຮັດວຽກ ຂອງຄະນະບໍລິຫານງານ, ຄະນະປະຈຳການ ແລະ ປະຕິບັດແຜນການປີ 2013 ຢ່າງຮີບດ່ວນ ເພື່ອໃຫ້ການປະຕິບັດມະຕິກອງປະຊຸມໃຫຍ່ ໄດ້ຮັບປະສິດທິຜົນໂດຍໄວ; ກຳແໜ້ນສະພາບການປະຕິບັດໜ້າທີ່ ຂອງສະມາຄົມຂັ້ນຕ່າງໆ, ກໍ່ສ້າງຖັນແຖວພະນັກງານສະມາຄົມທີ່ສຸດອົກສຸດໃຈຕໍ່ວຽກງານ, ມີຄຸນສົມບັດ ຄວາມສາມາດ ແລະ ມີອິດທິພົນໄດ້ຮັບຄວາມນິຍົມເຊື່ອຖື ຕອບສະໜອງໄດ້ຄວາມຮຽກຮ້ອງຕ້ອງການ ໜ້າທີ່ທີ່ໄດ້ວາງອອກມາ…
ຢູ່ທີ່ກອງປະຊຸມໃຫຍ່, ສະຫາຍ ຫງວຽນວັນເດືອກ ໄດ້ສະແດງຄວາມຮັບຮູ້ຄຸນງາມຄວາມດີ ແລະ ມອບຂອງຂວັນ ໃຫ້ບັນດາສະຫາຍທີ່ມີຜົນງານດີເດັ່ນ ໃນວຽກງານສະມາຄົມ ສະໄໝທີ່ IV ທີ່ໄດ້ພັກເຊົາວຽກງານສະມາຄົມແລ້ວ. ເນື່ອງໃນໂອກາດນີ້, 2 ໝູ່ຄະນະ ເປັນກຽດໄດ້ຮັບ ຫຼຽນໄຊແຮງງານຊັ້ນສາມ ໂດຍສະຫາຍເຈືອງເຕິນຊາງ ປະທານປະເທດແຫ່ງ ສສ ຫວຽດນາມ ປະດັບໃຫ້ ແລະ 2 ຄົນ ໄດ້ຮັບຫຼຽນໄຊແຮງງານຊັ້ນໜຶ່ງ ແລະ ຊັ້ນສາມ. ສູນກາງສະມາຄົມນັກຮົບເກົ່າຫວຽດນາມ ໄດ້ມອບໃບຍ້ອງຍໍ 58 ສະຫາຍທີ່ມີຜົນງານດີເດັ່ນ ໃນສະໄໝປີ 2007 - 2012./.
