ບັນດາຈຸດພົ້ນເດັ່ນໃນວຽກງານ ການຕ່າງປະເທດຂອງຫວຽດນາມ ປີ 2012
ວ.ກ. ອອນໄລ - ວຽກງານການຕ່າງປະເທດຂອງ ຫວຽດນາມ ໃນປີ 2012 ສືບຕໍ່ໄດ້ປະຕິບັດຢ່າງແຂງແຮງ ແນໃສ່ເພີ່ມທະວີຖານະບົດບາດ ແລະ ທີ່ຕັ້ງ ຂອງຫວຽດນາມໃນພາກພື້ນ ແລະ ໃນໂລກ.
ການພົວພັນທາງການທູດຂອງຫວຽດນາມ ປີ 2012 ມີສີສັນສົດໄສ
ການພົວພັນກັບບັນດາຄຸ່ຮ່ວມມື ໄດ້ຮັບການປະຕິບັດຢ່າງເລິກເຊິ່ງກວ່າແຕ່ກ່ອນ
ໃນປີ 2012, ຫວຽດນາມ ໄດ້ສົ່ງຫຼາຍຄະນະຜູ້ແທນໄປຢ້ຽມຢາມ, ພົວພັນພົບປະຂັ້ນຕ່າງໆ ກັບບັນດາປະເທດເພື່ອນບ້ານໃກ້ຄຽງໃນພາກພື້ນ, ຄູ່ຮ່ວມມືໃຫຍ່, ປະເທດເພື່ອນມິດທີ່ເປັນມູນເຊື້ອ ແລະ ກັບບັນດາຄູ່ຮ່ວມມືທີ່ມີຄວາມສາມາດບົ່ມຊ້ອນ. ຈຸດພົ້ນເດັ່ນໃນປີທີ່ຜ່ານມາແມ່ນ ຈຳນວນຄະນະຜູ້ແທນຂັ້ນສູງ ຂອງບັນດາປະເທດມາຢາມຫວຽດນາມ ໄດ້ເພີ່ມຂຶ້ນຢ່າງໄວ, ທົບ 4 - 5 ເທົ່າ ທຽບກັບປີ 2011. ຜ່ານບັນດາການຢ້ຽມຢານ, ການພົບປະເຮັດວຽກເຫຼົ່ານັ້ນ ໄດ້ເຮັດໃຫ້ການພົວພັນຮ່ວມື ລະຫວ່າງຫວຽດນາມ ກັບບັນດາປະເທດມີຄວາມເລິກເຊິ່ງກວ່າເກົ່າ.
ໃນການຢ້ຽມຢາມເປັນທາງການ ປະເທດສາທາລະນະລັດ ສິງຄະໂປ ກາງເດືອນກັນຍາ 2012, ສະຫາຍ ເລຂາທິການໃຫຍ່ ຫງວຽນຝູຈ້ອງ ໄດ້ກ່າວຄຳປາໄສ “ເພື່ອໃຫ້ອາຊີອາຄະເນ ເປັນພາກພື້ນແຫ່ງສັນຕິພາບ, ສະຖຽນລະພາບ, ການຮ່ວມມື ແລະ ພັດທະນາ” ເຊິ່ງໃນນັ້ນ ມີຫຼາຍເນື້ອໃນສຳຄັນ ກ່ຽວກັບນະໂຍບາຍການຕ່າງປະເທດຂອງຫວຽດນາມ ກໍ່ຄືສາຍພົວພັນຫວຽດນາມ - ສິງຄະໂປ.
ໃນການຢ້ຽມຢາມເປັນທາງການ ສະຫະພາບລັດເຊຍ ໃນເດືອນກໍລະກົດ 2012, ສະຫາຍປະທານປະເທດ ເຈືອງເຕິນຊາງ ແລະ ການນຳລັດເຊຍ ໄດ້ເປັນເອກະພາບກັນຍົກລະດັບການພົວພັນ ຫວຽດນາມ - ລັດເຊຍ ຂຶ້ນເປັນ “ຄູ່ຮ່ວມມືຍຸດທະສາດຮອບດ້ານ”. ທັນທີທັນໃດ ພາຍຫຼັງກັບຄືນສູ່ຕຳແໜ່ງທີ່ຕັ້ງຜູ້ນຳໜ້າປະເທດລັດເຊຍ ພະນະທ່ານປະທານາທິບໍດີ ປູຕີນ ໄດ້ອອກລັດຖະດຳລັດ “ວ່າດ້ວຍບັນດາມາດຕະການປະຕິບັດ ນະໂຍບາຍການຕ່າງປະເທດ", ໃນນັ້ນຢັ້ງຢືນວ່າ ຫວຽດນາມ ເປັນໜຶ່ງໃນສາມຄູ່ຮ່ວມມືຍຸດທະສາດສຳຄັນທີ່ສຸດ ຂອງລັດເຊຍ ຢູ່ທະວີບອາຊີ - ປາຊິຟິກ.
ໃນການປະຊຸມຄະນະລັດຖະມົນຕີຮ່ວມ ຄັ້ງທີສອງ ທີ່ນະຄອນຮ່າໂນ້ຍ ທ້າຍເດືອນຕຸລາ 2012, ນາຍົກລັດຖະມົນຕີ ຫງວຽນເຕິນຢູ໊ງ ແລະ ນາຍົກລັດຖະມົນຕີໄທ ຢິ່ງລັກ ຊິນນະວັດ ໄດ້ເປັນເອກະພາບກັນ ສູ້ຊົນຍົກລະດັບ ການພົວພັນລະຫວ່າງສອງປະເທດ ຂຶ້ນເປັນຄູ່ຮ່ວມມືຍຸດທະສາດ. ສອງຝ່າຍໄດ້ລົງນາມໃນ 3 ເອກະສາທີ່ສຳຄັນ: ຖະແຫຼງການຮ່ວມ ກ່ຽວກັບກອງປະຊຸມຄະນະລັດຖະມົນຕີຮ່ວມ ຫວຽດນາມ - ໄທ ຄັ້ງທີສອງ; ຖະແຫຼງການຮ່ວມ ກ່ຽວກັບວິໄສທັດປ້ອງກັນຄວາມສະຫງົບ ໄທ - ຫວຽດນາມ ໄລຍະປີ 2012 - 2016 ແລະ ຂໍ້ຕົກລົງສ້າງຕັ້ງສະພາວິສາຫະກິດ ໄທ - ຫວຽດນາມ ແລະ ຫວຽດນາມ - ໄທ.
ຫວຽດນາມປະສານສົມທົບກັບບັນດາປະເທດເພື່ອນບ້ານໃກ້ຄຽງ ໃນການຍູ້ແຮງ ແລະ ຍົກສູງປະສິດທິຜົນ ຂອງບັນດາກົນໄກຮ່ວມື ທີ່ມີຢູ່ໃນປັດຈຸບັນ, ຊຸກຍູ້ວຽກງານແບ່ງເສັ້ນຊາຍແດນ ປັກຫຼັກໝາຍຊາຍແດນກັບລາວ; ຈັກຕັ້ງປີສາມັກຄີມິດຕະພາບພິເສດ ຫວຽດນາມ - ລາວ, ລາວ - ຫວຽດນາມ 2012 ຢ່າງສຳເລັດຜົນ; ເພີ່ມທະວີການຮ່ວມມືລະຫວ່າງກະຊວງ ຂະແໜງການ ແລະ ທ້ອງຖິ່ນ ກັບກຳປູເຈຍ ເນື່ອງໃນໂອກາດ ສະເຫຼິມສະຫຼອງວັນສ້າງຕັ້ງສາຍພົວພັນການທູດ ລະຫວ່າງສອງປະເທດຄົບຮອບ 45 ປີ; ສືບຕໍ່ຮ່ວມມືດ້ານການຄ້າ ການລົງທຶນ ແລະ ທ່ອງທ່ຽວກັບຈີນ.
ການພົວພັນລະຫວ່າງຫວຽດນາມ ກັບບັນດາຄູ່ຮ່ວມມືຍຸດທະສາດຕົ້ນຕໍ ສືບຕໍ່ໄດ້ຮັບການຊຸກຍູ້ຕາມທິດມີເນື້ອແທ້ ເຂົ້າສູ່ລວງເລິກ ໜັ້ນຄົງຖາວອນ.
ກັບຍີ່ປຸ່ນ, ສອງຝ່າຍໄດ້ແລກປ່ຽນຄະນະຜູ້ແທນຂັ້ນຕ່າງໆ ຫຼາຍຄະນະ, ສຸມໃສ່ການເຄື່ອນໄຫວກະກຽມໃຫ້ແກ່ການສະເຫຼິມສະຫຼອງ ວັນສ້າງຕັ້ງສາຍພົວພັນການທູດ ລະຫວ່າງສອງປະເທດຄົບຮອບ 40 ປີ ແລະ ປີມິດຕະພາບຫວຽດນາມ - ຍີ່ປຸ່ນ 2013. ການຮ່ວມມືດ້ານເສດຖະກິດ ການຄ້າ ການລົງທຶນ,… ສືບຕໍ່ເປັນບັນດາຂົງເຂດຮ່ວມືທີ່ພົ້ນເດັ່ນ ໃນການພົວພັນລະຫວ່າງສອງປະເທດ. ຍີ່ປຸ່ນ ຍັງຄົງເປັນປະເທດທີ່ໃຫ້ການຊ່ວຍເຫຼືອ ODA ທີ່ໃຫຍ່ກວ່າໝູ່ໃຫ້ຫວຽດນາມ ແລະ ເປັນໜຶ່ງໃນບັນດາປະເທດເສດຖະກິດພັດທະນາ ທີ່ໄດ້ຮັບຮອງລະບຽບເສດຖະກິດຕະຫຼາດຂອງຫວຽດນາມ.
ການພົວພັນຫວຽດນາມ - ສະຫະພາບເອີຣົບ (EU) ສືບຕໍ່ໄດ້ຮັບການຊຸກຍູ້. ສອງຝ່າຍໄດ້ເຊັນເປັນທາງການ ສັນຍາຄູ່ຮ່ວມມື ແລະ ຮ່ວມືຮອບດ້ານ (PCA) ແລະ ເລິ່ມຕົ້ນການເຈລະຈາເປັນທາງການ ກ່ຽວກັບສັນຍາການຄ້າເສລີ ຫວຽດນາ - ສະຫະພາບເອີຣົບ ໃນເດືອນມິຖຸນາ. ການພົວພັນຮ່ວມມືໃນຫຼາຍດ້ານລະຫວ່າງຫວຽດນາມ ກັບບັນດາຄູ່ຮ່ວມມືແຖວໜ້າໃນສະຫະພາບເອີຣົບ ເຊັ່ນ ອັງກິດ ຝຣັ່ງ ເຢຍລະມັນ ພິເສດແມ່ນອີຕາລີ ລ້ວນແຕ່ໄດ້ຮັບການຊຸກຍູ້ຢ່າງແຂງແຮງ. ນອກຈາກນັ້ນ, ຫວຽດນາມກໍ່ໄດ້ຊຸກຍູ້ການພົວພັນ ກັບບັນດາປະເທດເພື່ອນມິດທີ່ເປັນມູນເຊື້ອຢູ່ອາຊີ, ຕາເວນອອກເອີຣົບ, ຕາເວນອອກກາງ, ອາຟຣິກກາ ແລະ ອາເມລິກາລາຕີນ ໂດຍຜ່ານການແລກປ່ຽນຄະນະຜູ້ແທນຂັ້ນສູງຫຼາຍຄະນະ ແລະ ສະເໜີຫຼາຍເນື້ອໃນຮ່ວມມື ທີ່ແທດເໝາະຕົວຈິງ. ຫວຽດນາມໄດ້ເປັນເຈົ້າພາບຈັດຕັ້ງຢ່າງສຳເລັດຜົນ ເວທີປາຖະກະຖາຫວຽດນາມ - ອາເມລິກາລາຕີນ ກ່ຽວກັບການຄ້າ - ການລົງທຶນ ໃນຕົ້ນເດືອນກໍລະກົດ, ສ້າງກຳລັງໜູນໃຫ້ແກ່ການຮ່ວມມື ລະຫວ່າງຫວຽດນາມ ກັບບັນດາປະເທດໃນພາກພື້ນນີ້.
ເສີມຂະຫຍາຍບົດບາດເປັນເຈົ້າການ, ຕັ້ງໜ້າ ແລະ ມີຄວາມຮັບຜິດຊອບໃນ ອາຊຽນ
ໃນປີ 2012, ຫວຽດນາມໄດ້ຜັນຂະຫຍາຍການທູດພະຫຸພາຄີຢ່າງແຂງແຮງ, ມີປະສິດທິຜົນ, ພິເສດແມ່ນໃນກອບ ອາຊຽນ.
ຢູ່ໃນບັນດາກອງປະຊຸມຂັ້ນສູງ ແລະ ຂັ້ນລັດຖະມົນຕີ ໃນກອບອາຊຽນ, ຫວຽດນາມໄດ້ຕັ້ງໜ້າປະກອບສ່ວນ ເສີມຂະຫຍາຍບົດບາດຂອງອາຊຽນ ແລະ ຊຸກຍູ້ການພົວພັນລະຫວ່າງອາຊຽນ ກັບບັນດາຄູ່ຮ່ມມື.
ຫວຽດນາມໄດ້ສຳເລັດເປັນຢ່າງດີ ບົດບາດຂອງປະເທດປະສານງານການພົວພັນສົນທະນາ ອາຊຽນ - ຈີນ ໃນສະໄໝ 2009 - 2012, ປະກອຍສ່ວນຢ່າງແທດຈິງເຂົ້າໃນການເພີ່ມທະວີການພົວພັນຄູ່ຮ່ວມມືຍຸດທະສາດ ອາຊຽນ - ຈີນ. ກ່ອນເມື່ອມອບບົດບາດປະສານງານນີ້ຄືນໃຫ້ ໄທ, ຫວຽດນາມໄດ້ເປັນເຈົ້າການ ພ້ອມກັນກັບບັນດາສະມາຊິກໃນກຸ່ມ ຕັ້ງໜ້າຊຸກຍູ້ ສຳເລັດການຮຽບຮຽງ ເອກະສານທັດສະນະຂອງອາຊຽນ ກ່ຽວກັບບັນດາພາກສ່ວນຂອງ ປະມວນຂໍ້ກຳນົດກ່ຽວກັບການປະພຶດ ຂອງບັນດາຝ່າຍ ຢູ່ທະເລຕາເວັນອອກ (The Code of Conduct of Parties in East Sea - COC), ເປັນເອກະພາບກັນກ່ຽວກັບແບບວິທີນຳໃຊ້ເອກະສານນີ້ ເປັນພື້ນຖານເພື່ອໃຫ້ອາຊຽນ ແລກປ່ຽນກັບຈີນ ກ່ຽວກັບເນື້ອໃນ COC.
ພາຍຫຼັງສະໄໝເປັນຜູ້ປະສານງານການພົວພັນອາຊຽນ - ຈີນ, ຫວຽດນາມ ໄດ້ຫັນມາຮັບເອົາບົດບາດປະສານງານການພົວພັນອາຊຽນ - ສະຫະພາບເອີຣົບ ໃນໄລຍະ 2012 - 2015. ໃນມໍ່ໆມານີ້, ສະຫະພາບເອີຣົບ ໄດ້ເປັນເຈົ້າການສະເໜີໃຫ້ຫວຽດນາມ ສະໜັບສະໜູນການສ້າງຕັ້ງ ສາຍພົວພັນຄູ່ຮ່ວມມືຍຸດທະສາດລະຫວ່າງ ສະຫະພາບເອີຣົບ - ອາຊຽນ.
ເປັນພິສດ, ເປັນຄັ້ງທຳອິດໃນປະຫວັດສາດແຫ່ງການເຂົ້າຮ່ວມໃນອາຊຽນ, ຜູ້ຮັບສະໝັກເລືອກຕັ້ງ ໂດຍຫວຽດນາມແນະນຳ ຈະໄດ້ຮັບບົດບາດເປັນເລຂາທິການໃຫຍ່ ອາຊຽນ. ໃນການປະຊຸມຂັ້ນສຸດຍອດອາຊຽນ ຄັ້ງທີ 21, ການນຳບັນດາປະເທດອາຊຽນ ໄດ້ອະນຸມັດຜ່ານ ແລະ ແຕ່ງຕັ້ງເປັນທາງການ ໃຫ້ທ່ານເລເລືອງມິງ, ລັດຖະມົນຕີຊ່ວຍວ່າການກະຊວງການຕ່າງປະເທດຫວຽດນາມ, ເປັນເລຂາທິການໃຫຍ່ ອາຊຽນ ໃນສະໄໝ 2013 - 2017.
ຫວຽດນາມໄດ້ພະຍາຍາມ ພ້ອມກັບບັນດາສະມາຊິກອາຊຽນ ໃນການສ້າງເອກະສານລວມຫຼາຍສະບັບ ທີ່ມີລັກສະນະກໍ່ສ້າງ, ຮັບປະກັນຜົນປະໂຫຍດຂອງອາຊຽນ, ສອດຄ່ອງກັບທັດສະນະ ແລະ ຜົນປະໂຫຍດແຫ່ງຊາດຂອງຫວຽດນາມ ເຊັ່ນ: ຖະແຫຼງການອາຊຽນ ກ່ຽວກັບສິດທິມະນຸດ (AHRD); ແຜນການກະທຳຜັນຂະຫຍາຍ ຖະແຫຼງການປອງດອງບາລີ ກ່ຽວກັບວົງຄະນາຍາດອາຊຽນ ໃນວົງຄະນາຍາດບັນດາປະເທດໃນໂລກ; ຖະແຫຼງການ ກ່ຽວກັບການເລິ່ມຕົ້ນເຈລະຈາ ຄູ່ຮ່ວມເສດຖະກິດຮອບດ້ານພາກພື້ນ (RCEP); ຖະແຫຼງການຮ່ວມອາຊຽນ - ຈີນ ເນື່ອງໃນໂອກາດສະເຫຼິມສະຫຼອງ 10 ປີ ແຫ່ງການເຊັນ DOC.
ປະສິດທິຜົນຂອງການຕໍ່ສູ້ປົດປັກຮັກສາ ອຳນາດອະທິປະໄຕຕໍ່ເຂດທະເລ ໝູ່ເກາະ
ວຽກງານຊາຍແດນອານາເຂດ ຍາມໃດກໍ່ໄດ້ຮັບການເອົາໃຈໃສ່ເປັນສຳຄັນ, ແກ້ໄຂຢ່າງທັນການ, ເປັນຕົ້ນແມ່ນ ບັນຫາອຳນາດອະທິປະໄຕຕໍ່ທະເລຕະເວນອອກ. ໃນປີ 2012, ຫວຽດນາມໄດ້ຕໍ່ສູ້ດ້ານການຕ່າງປະເທດຢ່າງເດັດດ່ຽວ ແນໃສ່ປົກປັກຮັກສາ ອະທິປະໄຕ, ສິດອະທິປະໄຕ ແລະ ສິດພິພາກສາຕັດສິນ ຂອງຕົນໃນທະເລຕາເວນອອກ.
ພິເສດ, ສະພາແຫ່ງຊາດຫວຽດນາມໄດ້ອະນຸມັດຜ່ານ ກົດໝາຍທະເລ ໃນເດືອນມິຖຸນາ, ສ້າງພື້ນຖານນິຕິກຳອັນສຳຄັນ ໃຫ້ແກ່ການປົກປັກຮັກສາຄວາມໝັ້ນຄົງ ອຳນາດອະທິປະໄຕໃນເຂດທະເລ ໝູ່ເກາະ ແລະ ບັນດາຜົນປະໂຫຍດຍຸດທະສາດຂອງປະເທດ.
ຕໍ່ກັບບັນດາປະເທດອາຊຽນ, ຫວຽດນາມໄດ້ຜັນຂະຫຍາຍການຮ່ວມມືຕາມທິດຕົ້ນຕໍຕ່າງໆ ເຊັ່ນ: ເປັນເຈົ້າການພ້ອມກັນກັບບາງປະເທດ ຕັ້ງບັນຫາທະເລຕາເວນອອກ/DOC ຂຶ້ນທີ່ບັນດາເວທີປາຖະກະຖາພະຫຸພາຄີ ຂອງພາກພື້ນ; ເພີ່ມທະວີການປະສານສົມທົບ ແລະ ຕັ້ງໝັ້ນຂົນຂວາຍຊວນເຊື່ອໃຫ້ອາຊຽນ ເປັນເອກະພາບໃນຫຼັກການລວມ ກ່ຽວກັບທະເລຕາເວນອອກ ແລະ ຮັບປະກັນໃຫ້ຫຼັກການລວມນັ້ນ ໄດ້ຮັບການສ່ອງແສງໃນລະດັບທີ່ຕ່າງກັນ ເຂົ້າໃນບັນດາຖະແຫຼງການ, ເອກະສານຂອງອາຊຽນ ກໍ່ຄືລະຫວ່າງອາຊຽນ ແລະ ບັນດາຄູ່ຮ່ວມມື; ເພີ່ມທະວີການເຈລະຈາ ກ່ຽວກັບເຂດສັບໄຂວ່ກັນໃນໄຫຼ່ທະວີບ ແລະ ເຂດເສດຖະກິດທະເລພິເສດ.
ຄຽງຂ້າງບັນດາຈຸດພົ້ນເດັ່ນເທິງນີ້, ຈຸດສຳຄັນໜຶ່ງອີກໃນວຽກງານການທູດປີ 2012 ແມ່ນການທູດວັດທະນະທຳໄດ້ຮັບການຊຸກຍູ້, ສຸມໃສ່ການຜັນຂະຫຍາຍຍຸດທະສາດການທູດວັດທະນະທຳຮອດປີ 2020.
ຫວຽດນາມ ໄດ້ຮັບຜົນສຳເລັດໃນການຂົນຂວາຍໃຫ້ UNESCO ຮັບຮອງເອົາມໍລະດົກໂລກບາງແຫ່ງ ເຊັ່ນ ກຳແພງລາຊະວັງ ໂຮ່; ແຜ່ນໄມ້ພິມ ພຸດທະປະຫວັດ ວັດຫວິງງຽມ; ພິທີການເຊື່ອຖືບູຊາ ພະເຈົ້າຜູ້ສ້າງຊາດ ຮູ່ງເວືອງ, ແລະ ພວມສືບຕໍ່ຂົນຂວາຍໃຫ້ UNESCO ຮັບຮອງເອົາມໍລະດົກໂລກຕໍ່ ເຂດທັດສະນິຍະພາບ ຈ່າງອານ./.
ຕາມເວບໄຊ: chinhphu.vn
