9 ຫຍ່ອມວິທີແກ້ຕົ້ນຕໍ ເພື່ອປະຕິບັດແຜນການພັດທະນາ ເສດຖະກິດ - ສັງຄົມ ປີ 2013
ວ.ກ. ອອນໄລ - ລັດຖະບານຫວຽດນາມຫາກໍ່ປະກາດໃຊ້ ມະຕິຕົກລົງໝາຍເລກ 01/NQ-CP ວ່າດ້ວຍບັນດາວິທີແກ້ຕົ້ນຕໍ ຊີ້ນຳນຳພາການປະຕິບັດແຜນການພັດທະນາ ເສດຖະກິດ - ສັງຄົມ ແລະ ວາງງົບປະມານແຫ່ງລັດ ປີ 2013.
ຈຸດໝາຍສັງລວມຂອງ ແຜນການພັດທະນາເສດຖະກິດ - ສັງຄົມ ປີ 2013 ທີ່ສະພາແຫ່ງຊາດໄດ້ຮັບຮອງແມ່ນ: ເພີ່ມທະວີການຮັກສາເສດຖະກິດມະຫາພາບໃຫ້ໝັ້ນຄົງ; ເງິນເຟີ້ຕ່ຳກວ່າ, ຄວາມເຕີບໂຕເສດຖະກິດສູງກວ່າ ປີ 2012. ຊຸກຍູ້ການປະຕິບັດ 3 ບຸກທະລຸຍຸດທະສາດ ຕິດແໜ້ນກັບການຈັດວາງສັບຊ້ອນໂຄງປະກອບເສດຖະກິດຄືນໃໝ່, ຫັນປ່ຽນຕົວແບບເຕີບໂຕເສດຖະກິດ. ຮັບປະກັນຄວາມປອດໄພສັງຄົມ ແລະ ສະຫວັດດິການສັງຄົງ. ຍົກສູງປະສິດທິຜົນວຽກງານການຕ່າງປະເທດ ແລະ ເຊື່ອມໂຍງເຂົ້າກັບສາກົນ. ເພີ່ມທະວີການປ້ອງກັບປະເທດ, ປ້ອງກັນຄວາມສະຫງົບ ແລະ ຮັບປະກັນສະຖຽນລະພາບທາງການເມືອງ - ສັງຄົມ.
ບັນດາຕົວເລກຄາດໝາຍຕົ້ນຕໍ ຂອງປີ 2013 ເຊັ່ນ: ຍອດຜະລິດຕະພັນພາຍໃນປະເທດ (GDP) ເພີ່ມຂຶ້ນປະມານ 5,5%; ຍອດມູນຄ່າຂາອອກເພີ່ມຂຶ້ນປະມານ 10%; ອັດຕາມູນຄ່າຂາເຂົ້າຫຼາຍກວ່າ ທຽບກັບມູນຄ່າຂາອອກ ປະມານ 8%; ລະດັບຄວາມໄວຂອງການເພີ່ມລາຄາຄ່າຄອງຊີບ (CPI) ປະມານ 6-6,5%; ອັດຕາຄອບຄົວທຸກຈົນຫລຸດລົງ 2%, ສະເພາະ ເມືອງທຸກຈົນຫລຸດລົງ 4%;...
ທີ່ໜຶ່ງ, ເພີ່ມທະວີການຮັກສາເສດຖະກິດມະຫາພາບໃຫ້ໄດ້ຢ່າງໝັ້ນຄົງ, ຈຳກັດຄວບຄຸມເງິນເຟີ້.
ທີ່ສອງ, ສຸມໃສ່ແກ້ໄຂຄວາມຫຍຸ້ງຍາກ, ຊຸກຍູ້ຂະຫຍາຍການຜະລິດ ທຸລະກິດ.
ທີ່ສາມ, ຍູ້ແຮງການປະຕິບັດບັນດາການບຸກທະລຸຍຸດທະສາດ ຕິດແໜ້ນກັບການຈັດວາງສັບຊ້ອນໂຄງປະກອບເສດຖະກິດຄືນໃໝ່, ຫັນປ່ຽນຕົວແບບເຕີບໂຕເສດຖະກິດ.
ທີ່ສີ່, ຮັບປະກັນຄວາມປອດໄພສັງຄົມ, ສະຫວັດດິການສັງຄົມ ແລະ ປົວແປງຊີວິດການເປັນຢູ່ຂອງປະຊາຊົນໃຫ້ດີຂຶ້ນກວ່າເກົ່າ.
ທີ່ຫ້າ, ພັດທະນາການສຶກສາ ບຳລຸງກໍ່ສ້າງ, ວິທະຍາສາດ ເຕັກໂນໂລຊີ ແລະ ເບິ່ງແຍງດູແລສຸຂະພາບຂອງປະຊາຊົນ.
ທີ່ຫົກ, ເພີ່ມທະວີການຄຸ້ມຄອງລັດກ່ຽວກັບດິນດອນ, ຊັບພະຍາກອນ, ປົກປັກຮັກສາສິ່ງແວດລ້ອມ, ປ້ອງກັນ ແລະ ຕ້ານໄພທຳມະຊາດ, ແລະ ປະເຊີນໜ້າກັບການປ່ຽນແປງດິນຟ້າອາກາດ.
ທີ່ເຈັດ, ສືບຕໍ່ຍູ້ແຮງການປະຕິຮູບລະບຽບການບໍລິຫານ, ເສີມຂະຫຍາຍສິດເປັນເຈົ້າຂອງປະຊາຊົນ, ປ້ອງກັນ ແລະ ຕ້ານໄພສໍ້ຫຼາດບັງຫຼວງ, ຟຸ່ມເຟືອ, ຮັບປະກັນລະບຽບສະຫງົບ ຄວາມປອດໄພສັງຄົມ ແລະ ກໍ່ສ້າງຊີວິດວັດທະນະທຳໃໝ່.
ທີ່ແປດ, ຮັບປະກັນການປ້ອງກັນປະເທດ ປ້ອງກັນຄວາມສະຫງົບ ແລະ ສະຖຽນລະພາບທາງການເມືອງ, ສັງຄົມ; ຍົກສູງປະສິທິຜົນວຽກງານການຕ່າງປະເທດ.
ທີ່ເກົ້າ, ເພີ່ມທະວີວຽກງານການໂຄສະນາ ໂທລະຄົມສື່ຂ່າວ, ສ້າງຄວາມເຫັນດີເປັນນ້ຳໜຶ່ງໃຈດຽວທາງສັງຄົມ.
ກະຊວງແຜນການ ແລະ ການລົງທຶນ ຈະສັງລວມ, ປະເມີນຄ່າຜົນງານການປະຕິບັດມະຕິຕົກລົງນີ້ ຂອງແຕ່ລະກະຊວງ, ອົງການ, ທ້ອງຖິ່ນ ແລະ ລາຍງານໃຫ້ລັດຖະບານ ໃນວາລະປະຊຸມສາມັນ ເດືອນທັນວາ 2013./. ຕາມເວບໄຊ: chinhphu.vn