ໄຂກອງປະຊຸມສຳມະນາວິທະຍາສາດ ດ້ານທິດສະດີຄັ້ງທີໜຶ່ງ ລະຫວ່າງ ພັກກອມມູນິດຫວຽດນາມ ແລະ ພັກປະຊາຊົນປະຕິວັດລາວ
ວ.ກ. ອອນໄລ - ຕອນເຊົ້າວັນທີ 10 ມັງກອນ 2013, ຢູ່ທີ່ຮ່າໂນ້ຍ ກອງປະຊຸມສຳມະນາວິທະຍາສາດ ດ້ານທິດສະດີຄັ້ງທີໜຶ່ງ ລະຫວ່າງ ພັກກອມມູນິດຫວຽດນາມ ແລະ ພັກປະຊາຊົນ ປະຕິວັດລາວ ໃນຫົວຂໍ້ “ບາງບັນຫາ ດ້ານທິດສະດີ - ພຶດຕິກຳຕົ້ນຕໍ ໃນຂະບວນວິວັດແຫ່ງການຍູ້ແຮງ ພາລະກິດປ່ຽນແປງໃໝ່ ຢູ່ຫວຽດນາມ ແລະ ລາວ” ໄດ້ໄຂຂຶ້ນຢ່າງສົມກຽດ.
ຄະນະຜູ້ແທນພັກກອມມູນິດຫວຽດນາມ ເຂົ້າຮ່ວມກອງປະຊຸມສຳມະນາ ນຳໂດຍສະຫາຍ ດິງເຖຮວິງ, ກຳມະການກົມການເມືອງ, ເລຂາທິການສູນກາງພັກ, ຫົວໜ້າຄະນະໂຄສະນາອົບຮົມສູນກາງ, ເປັນຫົວໜ້າຄະນະ ແລະ ຄະນະຜູ້ແທນພັກປະຊາຊົນ ປະຕິວັດລາວ ນຳໂດຍສະຫາຍ ເຈືອງ ສົມບູນຂັນ, ເລຂາທິການສູນກາງພັກ, ຫົວໜ້າຄະນະ ໂຄສະນາອົບຮົມສູນກາງ, ປະທານສະພາວິທະຍາສາດສັງຄົມແຫ່ງຊາດ, ເປັນຫົວໜ້າຄະນະ.
ກ່າວຄຳປາໄສໄຂກອງປະຊຸມສຳມະນາ ສະຫາຍ ຮວ່າງບິ່ງກວັນ, ກຳມະການສູນກາງພັກ, ຫົວໜ້າຄະນະພົວພັນຕ່າງປະເທດ ໄດ້ເນັ້ນວ່າ ຜ່ານການປ່ຽນແປງໃໝ່ໃນ 25 ກວ່າປີທີ່ຜ່ານມາ ຫວຽດນາມ ແລະ ລາວ ໄດ້ບັນລຸຜົນສຳເລັດທີ່ສຳຄັນຕ່າງໆ ຫຼາຍຢ່າງ. ແຕ່ວ່າ, ສະພາບການໃນແຕ່ລະປະເທດ ກໍ່ຄືໃນພາກພື້ນ ແລະ ສາກົນ ກໍ່ໄດ້ມີການຜັນປ່ຽນຢ່າງສັບສົນ, ມັນຮຽກຮ້ອງໃຫ້ຕ້ອງສືບຕໍ່ຍົກສູງ ກຳລັງຄວາມສາມາດນຳພາຂອງແຕ່ລະພັກ ຕໍ່ການພັດທະນາເສດຖະກິດ - ສັງຄົມຂອງແຕ່ລະປະເທດ. ເພາະສະນັ້ນ, ການສຳມະນາວິທະຍາສາດດ້ານທິດສະດີ ແນໃສ່ຄົ້ນຄວ້າ ແລກປ່ຽນ ທຳຄວາມກະຈ່າງແຈ້ງ ບັນດາບັນຫາທິດສະດີ ແລະ ພຶດຕິກຳ ກ່ຽວກັບການນຳພາຂອງພັກ ໃນຂະບວນວິວັດການພັດທະນາເສດຖະກິດຕະຫຼາດ, ການຄຸ້ມຄອງລັດ ຄຸ້ມຄອງສັງຄົມ,... ແມ່ນມີຄວາມຈຳເປັນ ແລະ ຮີບດ່ວນທີ່ສຸດ.
ຕາງໜ້າຄະນະພັກ ອຳນາດການປົກຄອງ ແລະ ປະຊາຊົນນະຄອນຫຼວງຮ່າໂນ້ຍ, ສະຫາຍ ຫງວຽນເຖຖາວ, ກຳມະການສູນກາງພັກ, ປະທານຄະນະກຳມະການປະຊາຊົນນະຄອນຮ່າໂນ້ຍ ກ່າວຄຳປາໄສຂ່ຳນັບຊົມເຊີຍ ແລະ ຢັ້ງຢືນວ່າ ຄະນະພັກ ອຳນາດການປົກຄອງ ແລະ ປະຊາຊົນຮ່າໂນ້ຍ ຈະສືບຕໍ່ເອົາໃຈໃສ່ກໍ່ສ້າງ ແລະ ບຳລຸງຄູນສ້າງສາຍພົວພັນມິດຕະພາບພິເສດຫວຽດນາມ - ລາວ ໃຫ້ສວຍສົດງົດງາມ.
ກ່າວຄຳປາໄສໃນວາລະເປີດກອງປະຊຸມສຳມະນາ, ສະຫາຍ ດິງເຖຮວິງ ໄດ້ຕີລາຄາສູງຄວາມໝາຍຂອງການຈັດຕັ້ງການສຳມະນາວິທະຍາສາດ ດ້ານທິດສະດີຄັ້ງທຳອິດ ລະຫວ່າງສອງພັກ. ສະຫາຍເນັ້ນວ່າ ການສຳມະນາວິທະຍາສາດ ຍິ່ງມີຄວາມໝາຍສຳຄັນກວ່າອີກ ເມື່ອມັນຖືກຈັດຕັ້ງຂຶ້ນມາພາຍຫຼັງທີ່ສອງປະເທດໄດ້ສົ່ງທ້າຍປີເກົ່າ 2012: “ປີສາມັກຄີມິດຕະພາບ ຫວຽດນາມ - ລາວ, ລາວ - ຫວຽດນາມ” ທີ່ເຕັມໄປດ້ວຍການເຄື່ອນໄຫວຟົດຟື້ນ, ແທດເໝາະຕົວຈິງ, ມີປະສິດທິຜົນ ເພື່ອຂ່ຳນັບຮັບຕ້ອນສອງເຫດການອັນມະໂຫລານ: 50 ປີສ້າງຕັ້ງສາຍພົວພັນການທູດ ແລະ 35 ປີເຊັນສົນທິສັນຍາມິດຕະພາບ ການຮ່ວມມື ຫວຽດນາມ - ລາວ, ແລະ ພາຍຫຼັງການມາຢ້ຽມຢາມສັນທະວະໄມຕີປະເທດຫວຽດນາມ ຢ່າງເປັນທາງການ ຂອງສະຫາຍ ຈູມມາລີ ໄຊຍະສອນ ເລຂາທິການໃຫຍ່ ຄະນະບໍລິຫານງານສູນກາງພັກ ປປ ລາວ, ປະທານປະເທດ ແຫ່ງ ສປປ ລາວ.
ສະຫາຍ ເຈືອງ ສົມບູນຂັນ ສະແດງຄວາມດີໃຈຊົມເຊີຍຕໍ່ການທີ່ສອງພັກ ສອງລັດ ແລະ ປະຊາຊົນສອງປະເທດ ລາວ ແລະ ຫວຽດນາມ ໄດ້ຈັດຕັ້ງຢ່າງສຳເລັດຜົນ ການເຄື່ອນໄຫວທີ່ມີຄວາມໝາຍເລິກເຊິ່ງຫຼາຍຢ່າງ ເພື່ອຂ່ຳນັບຮັບຕ້ອນປີສາມັກຄີມິດຕະພາບຫວຽດນາມ - ລາວ, ລາວ - ຫວຽດນາມ 2012; ສະຫາຍໄດ້ເນັ້ນວ່າ ການຈັດຕັ້ງສຳມະນາວິທະຍາສາດດ້ານທິດສະດີຄັ້ງທຳອິດ ລະຫວ່າງສອງພັກ ມີຄວາມໝາຍສຳຄັນທີ່ສຸດ ຕໍ່ກັບພາລະກິດການປ່ຽນແປງໃໝ່, ກໍ່ສ້າງ ແລະ ການພັດທະນາຂອງແຕ່ລະປະເທດ.
ໃນສອງວັນ ຄືວັນທີ 10 ແລະ 11 ມັງກອນ 2013, ບັນດາຜູ້ແທນສືບຕໍ່ໄດ້ຮັບຟັງ ຄຳປະກອບຄວາມເຫັນຂອງບັນດາຜູ້ຕາງໜ້າ ພັກກອມມູນິດຫວຽດນາມ ແລະ ພັກປະຊາຊົນປະຕິວັດລາວ; ພ້ອມກັນນັ້ນກໍ່ປຶກສາສົນທະນາ, ແລກປ່ຽນ, ໄຈ້ແຍກຢ່າງເລິກເຊິ່ງກວ່າອີກ ບັນດາບັນຫາທີ່ທັງສອງຝ່າຍຕ່າງກໍເອົາໃຈໃສ່./.
ໂດຍ: ຫງວຽນດຶກ