ສະຫາຍເລຂາທິການໃຫຍ່ ຫງວຽນຝູຈ້ອງ ໃຫ້ການຕ້ອນຮັບຄະນະຜູ້ແທນຂັ້ນສູງ ພັກປະຊາຊົນປະຕິວັດລາວ ຢ່າງສົມກຽດ
ວ.ກ. ອອນໄລ - ຕອນບ່າຍວັນທີ 11 ມັງກອນ 2013, ຢູ່ທີ່ສຳນັກງານສູນກາງ ພັກກອມມູນິດຫວຽດນາມ, ສະຫາຍເລຂາທິການໃຫຍ່ ຫງວຽນຝູຈ້ອງ ໄດ້ໃຫ້ການຕ້ອນຮັບຢ່າງອົບອຸ່ນ ຕໍ່ຄະນະຜູ້ແທນຂັ້ນສູງ ພັກປະຊາຊົນປະຕິວັດລາວ ນຳໂດຍສະຫາຍ ເຈືອງ ສົມບູນຂັນ, ເລຂາທິການສູນກາງພັກ, ຫົວໜ້າຄະນະ ໂຄສະນາອົບຮົມສູນກາງ, ປະທານສະພາວິທະຍາສາດສັງຄົມ ແຫ່ງຊາດລາວ, ເປັນຫົວໜ້າຄະນະ.
ຄະນະຜູ້ແທນພັກປະຊາຊົນ ປະຕິວັດລາວ ມາຢ້ຽມຢາມ ແລະ ເຂົ້າຮ່ວມກອງປະຊຸມສຳມະນາວິທະຍາສາດ ດ້ານທິດສະດີຄັ້ງທີໜຶ່ງ ລະຫວ່າງສອງພັກ ໃນຫົວຂໍ້ “ບາງບັນຫາດ້ານທິດສະດີ - ພຶດຕິກຳຕົ້ນຕໍ ໃນຂະບວນວິວັດແຫ່ງ ການຍູ້ແຮງພາລະກິດປ່ຽນແປງໃໝ່ ຢູ່ຫວຽດນາມ ແລະ ລາວ”.
ສະຫາຍ ເຈືອງ ສົມບູນຂັນ ໄດ້ລາຍງານຕໍ່ສະຫາຍເລຂາທິການໃຫຍ່ ກ່ຽວກັບຜົນສຳເລັດຂອງການສຳມະນາວິທະຍາສາດຄັ້ງທີໜຶ່ງ ລະຫວ່າງສອງພັກ ແລະ ຕີລາຄາສູງຄວາມໝາຍ, ຄຸນປະໂຫຍດຕົວຈິງຂອງການສຳມະນາ, ປະກອບສ່ວນເຮັດໃຫ້ເຫັນແຈ້ງບັນຫາທິດສະດິຈຳນວນໜຶ່ງ ເຊິ່ງພຶດຕິກຳແຫ່ງການປ່ຽນແປງໃໝ່ຂອງສອງປະເທດພວມວາງອອກມາ. ຜົນສຳເລັດຂອງການສຳມະນາ ຈະຊ່ວຍໃຫ້ລາວມີບົດຮຽນປະສົບການຕື່ມອີກ ທັງດ້ານທິດສະດີ ແລະ ພຶດຕິກຳ ໃນວຽກງານການນຳພາ, ການກໍ່ສ້າງພັກ, ຄຸ້ມຄອງລັດ, ຄຸ້ມຄອງສັງຄົມ, ພັດທະນາເສດຖະກິດ ໃນຂະບວນວິວັດການຍູ້ແຮງພາລະກິດປ່ຽນແປງໃໝ່ ຕາມທິດສັງຄົມນິຍົມຢູ່ລາວ. ສະຫາຍໄດ້ເນັ້ນໜັກວ່າ ສະພາທິດສະດີສູນກາງ ພັກກອມມູນິດຫວຽດນາມ ແລະ ສະພາວິທະຍາສາດສັງຄົມແຫ່ງຊາດລາວ ຫາກໍ່ເຊັນຂໍ້ຕົກລົງການຮ່ວມມື ສ້າງເປັນພື້ນຖານ ເພື່ອໃຫ້ສອງພັກຊຸກຍູ້ການຮ່ວມມືກັນ ໃນຂົງເຂດຄົ້ນຄວ້າທິດສະດີ; ຢັ້ງຢືນວ່າ ພັກ, ລັດ ແລະ ປະຊາຊົນລາວ ຕັດສິນໃຈປົກປັກຮັກສາ, ເສີມຂະຫຍາຍສາຍພົວພັນອັນເປັນມູນເຊື້ອ ສາມັກຄີພິເສດ ແລະ ຮ່ວມມືຮອບດ້ານ ລາວ - ຫວຽດນາມ ຢ່າງຕະຫຼອດການ.
ສະຫາຍເລຂາທິການໃຫຍ່ ຫງວຽນຝູຈ້ອງ ໄດ້ຊົມເຊີຍຢ່າງສຸດອົກສຸດໃຈ ຕໍ່ຄະນະຜູ້ແທນພັກປະຊາຊົນປະຕິວັດລາວ ນຳໂດຍສະຫາຍ ເຈືອງ ສົມບູນຂັນ ມາຢ້ຽມຢາມ ແລະ ເຂົ້າຮ່ວມການສຳມະນາວິທະຍາສາດ ລະຫວ່າງສອງພັກ, ຖືວ່າການເຄື່ອນໄຫວນີ້ເປັນເຫດການສຳຄັນທີ່ສຸດ ເຊິ່ງໄດ້ສະແດງອອກໃນຊ່ວງເວລາທີ່ ສອງພັກ, ສອງລັດ ແລະ ປະຊາຊົນສອງປະເທດ ຫາກໍ່ຈັດຕັ້ງສຳເລັດຜົນຢ່າງສະຫງ່າງາມ ປີສາມັກຄີມິດຕະພາບຫວຽດນາມ - ລາວ. ສະຫາຍເລຂາທິການໃຫຍ່ຢັ້ງຢືນວ່າ ວຽກງານທິດສະດີມີບົດບາດສຳຄັນທີ່ສຸດຕໍ່ກັບສອງພັກ. ການຈັດຕັ້ງປະຊຸມສຳມະນາວິທະຍາສາດ ລະຫວ່າງສອງພັກ ເປັນວຽກງານທີ່ມີຜົນປະໄຫຍດ ແລະ ແທດເໝາະຕົວຈິງທີ່ສຸດ, ເປັນໂອກາດເພື່ອໃຫ້ສອງຝ່າຍຮ່ຳຮຽນເຊິ່ງກັນແລະກັນ, ພ້ອມກັນລົງເລິກແລກປ່ຽນ ວິເຄາະໄຈ້ແຍກບັນດາບັນຫາຮີບດ່ວນ ເຊິ່ງການປ່ຽນແປງໃໝ່ຂອງສອງປະເທດວາງອອກມາ, ແບ່ງປັນບັນດາບົດຮຽນປະສົບການໃນການນຳພາ, ໃນວຽກງານການກໍ່ສ້າງພັກ ຄຸ້ມຄອງສັງຄົມ ພັດທະນາເສດຖະກິດ. ຜ່ານນັ້ນ ເພື່ອຈະເພີ່ມທະວີວຽກງານທິດສະດີ ປະກອບສ່ວນປະຕິບັດຢ່າງສຳເລັດມີໄຊ ມະຕິຕົກລົງຂອງແຕ່ລະພັກ, ປັບປຸງ ແລະ ເພີ່ມທະວີຍິ່ງກວ່າອີກ ສາຍພົວພັນສາມັກຄີພິເສດ ຫວຽດນາມ - ລາວ. ສະຫາຍເລຂາທິການໃຫຍ່ຫວັງວ່າ ໃນເວລາສະເພາະໜ້າ ສະພາທິດສະດີສູນກາງ ພັກກອມມູນິດຫວຽດນາມ ແລະ ສະພາວິທະຍາສາດສັງຄົມແຫ່ງຊາດລາວ ຈະສືບຕໍ່ປະສາມສົມທົບກັນຢ່າງແໜ້ນແຟ້ນ, ເພີ່ມທະວີການແລກປ່ຽນຂໍ້ມູນຂ່າວສານ, ໂຄງການຄົ້ນຄວ້າ ແລະ ຫົວຂໍ້ຄົ້ນຄວ້າ ທີ່ທັງສອງຝ່າຍລ້ວນແຕ່ເອົາໃຈໃສ່ ແລະ ກະກຽມເປັນຢ່າງດີໃຫ້ແກ່ການປະຊຸມສຳມະນາວິທະຍາສາດຄັ້ງຕໍ່ໄປ./.
ໂດຍ: ນັກຂ່າວ PV