ວ.ກ. ອອນໄລ - ວັນທີ 12 ມັງກອນ 2013, ຄະນະພະນັກງານການນຳຂັ້ນສູງ ຂອງພັກປະຊາຊົນ ປະຕິວັດລາວ ນຳໂດຍສະຫາຍ ເຈືອງ ສົມບູນຂັນ, ເລຂາທິການສູນກາງພັກ, ຫົວໜ້າຄະນະໂຄສະນາອົບຮົມສູນກາງ, ປະທານ ສະພາວິທະຍາສາດສັງຄົມແຫ່ງຊາດລາວ, ໄດ້ໄປຢ້ຽມຢາມ ແລະ ເຮັດວຽກຢູ່ແຂວງບັກນິງ, ເນື່ອງໃນໂອກາດຄະນະມາເຮັດວຽກຢູ່ ສາທາລະນະລັດ ສັງຄົມນິຄົມ ຫວຽດນາມ.
ແບ່ງປັນບົດຮຽນປະສົບການໃນການພັດທະນາເສດຖະກິດ ແລະ ວຽກງານກໍ່ສ້າງພັກ, ສະຫາຍ ເຈິ່ນວັນຕູ໋ຍ ເລຂາຄະນະພັກແຂວງບັກນິງ ໄດ້ໃຫ້ຮູ້ວ່າ: ກ່ອນເມື່ອຍັງບໍ່ທັນແຍກອອກເປັນແຂວງໜຶ່ງສະເພາະນັ້ນ ບັກນິງເປັນແຂວງກະສິກຳ. ພາຍຫຼັງການສ້າງຕັ້ງແຂວງຄືນໃໝ່ເປັນເວລາ 15 ປີ, ມາເຖິງປັດຈຸບັນ ບັກນິງກຳລັງພັດທະນາເປັນແຂວງອຸດສາຫະກຳທີ່ຂະຫຍັນຂັນເຄື່ອນ. ບັນລຸຜົນສຳເລັດດັ່ງກ່າວນັ້ນ ກໍ່ຍ້ອນວ່າບັກນິງໄດ້ເອົາໃຈໃສ່ວຽກງານວາງແຜນກຳນົດທີ່ດິນ, ກໍ່ສ້າງບັນດາເຂດອຸດສາຫະກຳ, ຕົວເມືອງໃຫ້ຄ່ອຍໆປະກົດຕົວຂຶ້ນ; ເອົາໃຈໃສ່ພັດທະນາພື້ນຖານໂຄງລ່າງຢ່າງຄົບຊຸດເຊັ່ນ: ຄົມມະນາຄົມ, ໂທລະຄົມ, ໄຟຟ້າ, ເຊື່ອມຕໍ່ການຄົມມະນາຄົມລະຫວ່າງຕົວເມືອງ ແລະ ຊົນນະບົດ. ເພື່ອເຮັດວຽກງານເຫຼົ່ານີ້ໄດ້ດີ ແມ່ນຕ້ອງມີແຜນນະໂຍບາຍທີ່ຖືກຕ້ອງ, ພະນັກງານມີຄວາມສາມາດ ແລະ ຮັກສາລະບຽບວິໄນຢ່າງເຂັ້ມງວດ, ເອົາໃຈໃສ່ເຖິງຮາກຖານ; ບັກນິງໄດ້ເອົາໃຈໃສ່ດຶງດູດ ຄັດເລືອກບັນດານັກລົງທຶນເຂົ້າໃນຂົງເຂດເຕັກໂນໂລຊີສູງ, ເຕັກໂນໂລຊີສະອາດ. ເພື່ອພັດທະນາເສດຖະກິດຢ່າງຍືນຍົງ, ບັກນິງໄດ້ເອົາໃຈໃສ່ເປັນສຳຄັນເຖິງວຽກງານກໍ່ສ້າງ, ປັບປຸງພັກ, ຮັກສາຄວາມໝັ້ນຄົງຂອງລະບົບການເມືອງ, ຍົກສູງບົດບາດຂອງອົງການຈັດຕັ້ງພັກ ໃນການຊີ້ນຳປະຕິບັດບັນດາໜ້າທີ່ພັດທະນາເສດຖະກິດ - ສັງຄົມຢູ່ທ້ອງຖິ່ນ.
ສະຫາຍ ເຈືອງ ສົມບູນຂັນ, ຫົວໜ້າຄະນະໂຄສະນາອົບຮົມສູນກາງພັກ ປປ ລາວ ສະແດງຄວາມດີໃຈຕໍ່ການພັດທະນາເສດຖະກິດ - ສັງຄົມ ຢ່າງໄວວາ ຍືນຍົງ ຂອງແຂວງບັກນິງ. ໃນສະພາບການໂລກ ແລະ ພາຍໃນປະເທດມີຄວາມຫຍຸ້ງຍາກຫຼາຍ ແຕ່ແຂວງບັກນິງ ກໍ່ຍັງຄົງບັນລຸໄດ້ຄວາມຈະເລີນເຕີບໂຕເສດຖະກິດສູງ, ເປັນພິເສດແມ່ນວຽກງານດຶງດູດການລົງທຶນໂດຍກົງຈາກຕ່າງປະເທດ ຍັງໄດ້ຮັບການປະຕິບັດໃນລະດັບສູງ. ຜົນສຳເລັດຂອງແຂວງບັກນິງ ໄດ້ຢັ້ງຢືນຄວາມຖືກຕ້ອງໃນການນຳພາ ຊີ້ນຳຂອງຄະນະພັກຂັ້ນຕ່າງໆ ຢູ່ແຂວງບັກນິງ. ນີ້ແມ່ນບັນດາບົດຮຽນປະສົບການອັນລ້ຳຄ່າ ທີ່ບັນດາທ້ອງຖິ່ນຂອງລາວ ຫວັງວ່າຈະໄດ້ຮັບການແບ່ງປັນ ແລະ ຮ່ຳຮຽນ, ໝູນໃຊ້.
ບັກນິງ ເປັນແຂວງທີ່ມີສາຍພົວພັນສະໜິດແໜ້ນກັບບາງແຂວງຂອງລາວ. ໂດຍຕາງໜ້າໃຫ້ແຂວງເຫຼົ່ານີ້, ສະຫາຍ ເຈືອງ ສົມບູນຂັນ, ຫົວໜ້າຄະນະໂຄສະນາອົບຮົມສູນກາງພັກ, ສະແດງຄວາມຮູ້ບຸນຄຸນຕໍ່ການເອົາໃຈໃສ່ ຊ່ວຍເຫຼືອຂອງແຂວງບັກນິງໃນເວລາທີ່ຜ່ານມາ. ໃນວັນດຽວກັນນີ້, ຄະນະພະນັກງານການນຳຂັ້ນສູງ ຂອງພັກປະຊາຊົນ ປະຕິວັດລາວ ໄດ້ໄປຢາມບາງເຂດອຸດສາຫະກຳຂອງແຂວງບັກນິງ./.
ຕາມຂ່າວ: TTXVN