ຮອງນາຍົກລັດຖະມົນຕີ ຫງວຽນຊວັນຝຸກ ມອບໃບຍ້ອງຍໍ ໃຫ້ບັນດາຜູ້ດີເດັ່ນ ໃນວຽກງານປ້ອງກັນ ແລະ ຕ້ານຢາເສບຕິດ ຕາມຊາຍແດນ ຫວຽດນາມ - ລາວ. ຮູບຂອງ: VGP
ລາຍງານຂອງຄະນະບັນຊາການທະຫານຊາຍແດນທີ່ກອງປະຊຸມໄດ້ໃຫ້ຮູ້ວ່າ ພາຍຫຼັງ 9 ເດືອນແຫ່ງການຜັນຂະຫຍາຍແຜນການ, ສະພາບການອາຊະຍາກຳ ແລະ ໄພຢາເສບຕິດໄດ້ຖືກສະກັດກັ້ນ ແລະ ຖືກຄອບງຳຈຳກັດ, ລະບຽບຄວາມສະຫງົບຢູ່ບໍລິເວນໄດ້ຮັກສາຢ່າງໝັ້ນຄົງ, ຂະບວນການປະຊາຊົນປ້ອງກັນຄວາມສະຫງົບແຫ່ງຊາດ, ປົກປັກຮັກສາອຳນາດອະທິປະໄຕໃນຜືນແຜ່ນດິນ ຊາຍແດນແຫ່ງຊາດ ໄດ້ຮັບການປັບປຸງ ແລະ ຂະຫຍາຍຕົວ.
ບັນດາກົມກອງຕຳຫຼວດ, ທະຫານຊາຍແດນ ປະສານສົມທົບກັບບັນດາສະຫາຍລາວ ຈັບໄດ້ 158 ຕະດີ ພ້ອມດ້ວຍອາຊະຍາກອນ 248 ຄົນ, ຢຶດຂອງກາງໄດ້: ເຮໂຣອິນແທ່ງ 310 ແທ່ງ, ເຮໂຣອິນຝຸ່ນ 116 ກິໂລ, ຢາບ້າ 15.930 ເມັດ, ຢາຝິ່ນ 5,2 ກິໂລ, ວັດຖຸດິບສຳຮອງຢາ 200 ກິໂລ, ເງິນສົດ 403.400 USD, 19 ລ້ານກີບ ແລະ ຂອງກາງອື່ນໆອີກຫຼາຍຢ່າງ.
ນອກຈາກນັ້ນ, ບັນດາກຳລັງທະຫານຕຳຫຼວດຍັງຈັບໄດ້ຫຼາຍຄະດີຄ້າຂາຍຍ່ອຍ, ລົບລ້າງຫຼາຍຈຸດສັກຢາເສບຕິດຢູ່ຕາມບ້ານຕ່າງໆ. ວຽກງານຂົນຂວາຍປະຊາຊົນ, ໂຄສະນາເຜີຍແຜ່ຍົກສູງຄວາມຮັບຮູ້ ຕື່ນຕົວໃຫ້ມະຫາຊົນ, ສຶກສາອົບຮົມເປົ້າໝາຍ ໄດ້ຮັບການເອົາໃຈໃສ່ເປັນສຳຄັນ. ການເຄື່ອນໄຫວວິຊາການສະເພາະໄດ້ຮັບການຊຸກຍູ້, ຕີຢ່າງຖືກໃສ່ເປົ້າໝາຍນຳໜ້າ, ເປົ້າໝາຍ “ຫົວໂປ່” ທີ່ດື້ດ້ານ, ລົບລ້າງບັນດາຈຸດຂາຍຍ່ອຍ ແລະ ຈັດຕັ້ງການໃຊ້ຢາເສບຕິດ, ສຸມໃສ່ການຂົນຂວາຍນຳເອົາເປົ້າໝາຍໃປສູນບຳບັດຜູ້ຕິດຢາເສບຕິດ ເພື່ອເຮັດໃຫ້ບໍລິເວນປອດໃສ.
ແຜນການ 1048 ໄດ້ຮັບການສະໜັບສະໜູນຢ່າງຕັ້ງໜ້າຂອງມະຫາຊົນ, ລະດົມໄດ້ການເຂົ້າຮ່ວມຢ່າງແຂງແຮງ, ເດັດດ່ຽວຂອງບັນດາຄະນະພັກ, ອຳນາດການປົກຄອງ, ອົງການຈັດຕັ້ງມະຫາຊົນ ແລະ ບັນດາກຳລັງຮັບຜິດຊອບສະເພາະ, ເຮັດໃຫ້ບໍລິເວນມີການຜັນປ່ຽນຢ່າງຕັ້ງໜ້າທັງດ້ານຄວາມຮັບຮູ້, ຄວາມຮັບຜິດຊອບ ແລະ ການກະທຳຕົວຈິງ.
ຜ່ານໄລຍະເວລາໜຶ່ງ, ມີຫຼາຍບໍລິເວນທີ່ຖືກຖືວ່າເປັນຖິ່ນຖານຢາເສບຕິດທີ່ບໍ່ອາດຈະລ່ວງລ້ຳໄດ້ເຊັ່ນ ຫລຸງສາ, ຕ່າເຢ ຕາແສງຫຼອງລວງ, ບ້ານໝວງ, ບ້ານຫ້ວຍຫຽງ ເມືອງສົບເບົາ, ລາວ ໄດ້ມີການຜັນປ່ຽນຢ່າງແຂງແຮງຕາມທິດຕັ້ງໜ້າ.
ກ່າວຄຳປາໄສທີ່ກອງປະຊຸມ, ຮອງນາຍົກລັດຖະມົນຕີ ຫງວຽນຊວັນຝຸກ ໄດ້ຕີລາຄາສູງຕໍ່ການສ້າງແຜນການທີ່ມີຈຸດໝາຍຮອບດ້ານ, ນີ້ແມ່ນຕົວແບບໃໝ່ ທີ່ປະກອບສ່ວນປະຕິບັດຢ່າງສຳເລັດມີໄຊຈຸດໝາຍແຫ່ງຊາດດ້ານການປ້ອງກັນ ແລະ ຕ້ານຢາເສບຕິດຢູ່ຫວຽດນາມ.
ຄຽງຂ້າງນັ້ນ, ສະຫາຍຮອງນາຍົກລັດຖະມົນຕີກໍ່ໄດ້ຕີລາຄາສູງກ່ຽວກັບການທີ່ ກຳລັງພາລະບົດບາດຂອງສອງປະເທດ ຫວຽດນາມ - ລາວ ໄດ້ຕັ້ງໜ້າປະສານສົມທົບກັນ ສ້າງໃຫ້ມີການປ່ຽນແປງໃຫຍ່ໃນວຽກງານປ້ອງກັນ, ຕ້ານອາຊະຍາກຳຢາເສບຕິດຢູ່ຕາມເຂດຊາຍແດນ, ພ້ອມກັນນັ້ນກໍ່ປະສານສົມທົບກັນໃຫ້ດີກວ່າອີກ ເພື່ອທະວີຄູນວິທີເຮັດນີ້ໃຫ້ກ້ວາງອອກໃນເວລາຕໍ່ໜ້າ./.
