ສະຫາຍເລຂາທິການໃຫຍ່ພັກກອມມູນິດຫວຽດນາມ ຫງວຽນຝູຈ້ອງ ຢ້ຽມຢາມ ລາຊະອານາຈັກແບນຊິກ ແລະ ສະຫະພາບເອີຣົບ ຢ່າງເປັນທາງການ
ວ.ກ. ອອນໄລ - ຕອນເຊົ້າວັນທີ 17 ມັງກອນ 2013, ສະຫາຍເລຂາທິການໃຫຍ່ ຫງວຽນຝູຈ້ອງ ນຳໜ້າຄະນະຜູ້ແທນຂັ້ນສູງຫວຽດນາມ ໄດ້ອອກເດີນທາງຈາກຮ່າໂນ້ຍ ໄປຢ້ຽມຢາມລາຊະອານາຈັກ ແບນຊິກ ແລະ ສະຫະພາບເອີຣົບ ຢ່າງເປັນທາງການ; ຢ້ຽມຢາມຂັ້ນລັດ ທີ່ປະເທດ ສາທາລະນະລັດ ອີຕາລີ ແລະ ຢ້ຽມຢາມສະຫະລາຊະອານາຈັກອັງກິດ ແລະ ໄອແລນເໜືອ ຢ່າງເປັນທາງການ, ແຕ່ວັນທີ 17 ເຖິງວັນທີ 24 ມັງກອນ 2013.
ສົມເດັດມົງກຸດລາຊະກຸມານ ຟີລິບ ແຫ່ງລາຊະອານາຈັກແບນຊິກ ຕ້ອນຮັບທ່ານເລຂາທິການໃຫຍ່ ຫງວຽນຝູຈ້ອງ - ຮູບຂອງ: TTXVN
ການໄປຢ້ຽມຢາມສັນທະວະໄມຕີຕາມຄຳເຊີນຂອງນາຍົກລັດຖະມົນຕີແຫ່ງລາຊະອານາຈັກແບນຊິກ ແອລີໂອ ດີ ຣູໂປ, ປະທານສະພາເອີຣົບ ເຮີມານ ວານ ຣົມປູຍ, ປະທານາທິບໍດີສາທາລະນະລັດອີຕາລີ ຈີອໍກີໂອ ນາໂປລີຕາໂນ ແລະ ນາຍົກລັດຖະມົນຕີ ລາຊະອານາຈັກອັງກິດ ເດວິດ ກາເມຣອນ.
ນີ້ແມ່ນການໄປຢ້ຽມຢາມບັນດາປະເທດເອີຣົບຕາເວັນຕົກຄັ້ງທຳອິດຂອງສະຫາຍ ຫງວຽນຝູຈ້ອງ ໃນຖານະເປັນເລຂາທິການໃຫຍ່ ຄະນະບໍລິຫານງານສູນກາງ ພັກກອມມູນິດຫວຽດນາມ, ແມ່ນການມາຢ້ຽມຢາມຄັ້ງທຳອິດຂອງເລຂາທິການໃຫຍ່ ພັກກອມມູນິດຫວຽດນາມ ຢູ່ພາກພື້ນນີ້ໃນຫຼາຍປີທີ່ຜ່ານມາ.
ໄປພ້ອມກັນກັບສະຫາຍເລຂາທິການໃຫຍ່ ຫງວຽນຝູຈ້ອງ ໃນຄັ້ງນີ້ຍັງມີບັນດາສະຫາຍ: ຫງວຽນຊວັນຝຸກ ກຳມະການກົມການເມືອງ, ຮອງນາຍົກລັດຖະມົນຕີ; ຮ່ວາງບິ່ງກວັນ ກຳມະການສູນກາງພັກ, ຫົວໜ້າຄະນະພົວພັນຕ່າງປະເທດສູນກາງ; ເຈິ່ນກວັກເວື້ອງ ກຳມະການສູນກາງພັກ, ຫົວໜ້າຫ້ອງວ່າການສູນກາງ; ຟ້າມບິ່ງມິງ ກຳມະການສູນກາງພັກ, ລັດຖະມົນຕີກະຊວງກາງຕ່າງປະເທດ; ບູ່ຍກວາງວິງ ກຳມະການສູນກາງພັກ, ລັດຖະມົນຕີກະຊວງແຜນການ ແລະ ການລົງທຶນ; ໂຮ່ເໝົ້າງວາດ ກຳມະການສູນກາງພັກ, ຜູ້ຊ່ວຍວຽກເລຂາທິການໃຫຍ່ ຮັບຜິດຊອບຫ້ອງການເລຂາທິການໃຫຍ່; ພົນໂທ ຫງວຽນຈີ໋ວິ້ງ ກຳມະການສູນກາງພັກ, ລັດຖະມົນຕີຊ່ວຍວ່າການກະຊວງປ້ອງກັນປະເທດ; ພົນຕີ ໂຕເລິມ ກຳມະການສູນກາງພັກ, ລັດຖະມົນຕີຊ່ວຍວ່າການກະຊວງຕຳຫຼວດ.
ເຂົ້າຮ່ວມໃນຄະນະຜູ້ແທນຍັງມີບັນດາສະຫາຍ: ຟ້າມແຊງເຈົາ ເອກອັກຄະລັດຖະທູດຫວຽດນາມປະຈຳລາຊະອານາຈັກແບນຊິກ ແລະ ສະຫະພາບເອີຣົບ; ຫງວຽນຮ່ວາງລອງ ເອກອັກຄະລັດຖະທູດຫວຽດນາມປະຈຳ ສາທາລະນະລັດ ອີຕາລີ ແລະ ຫວູກວາງມິງ ເອກອັກຄະລັດຖະທູດຫວຽດນາມປະຈຳ ລາຊະອານາຈັກອັງກິດ.
ເວລາ 7 ໂມງ ເຊົ້າວັນທີ 17 ມັງກອນ, ຕາມເວລາ ບຣຸກແຊນ (13 ໂມງທ່ຽງວັນທີ 17 ມັງກອນ, ຕາມເວລາຮ່າໂນ້ຍ), ເຮືອບິນພິເສດບັນທຸກສະຫາຍເລຂາທິການໃຫຍ່ ຫງວຽນຝູຈ້ອງ ພ້ອມດ້ວຍຄະນະຜູ້ແທນຂັ້ນສູງຫວຽດນາມ ໄດ້ມາຮອດສະໜາມບິນການທະຫານ ບຣຸກແຊນ ຢູ່ນະຄອນຫຼວງແບນຊິກ. ອອກໄປຕ້ອນຮັບທ່ານເລຂາທິການໃຫຍ່ ຫງວຽນຝູຈ້ອງ ທີ່ສະໜາມບິນມີທ່ານ ເດີກ ອາກແຕນ, ຮອງລັດຖະມົນຕີຜູ້ປະຈຳການກະຊວງການຕ່າງປະເທດ ແບນຊິກ; ທ່ານຂຸນ ໂຈ ເດີ ແກຣນໄຣ, ກົງສູນກິຕິມະສັກ ຫວຽດນາມ ປະຈຳແຂວງ ອານເວີດ ແລະ ພັນລະຍາ; ເອກອັກຄະລັດຖະທູດຂອງບັນດາປະເທດ ແລະ ພະນະທ່ານບາງຄົນໃນ ຄະນະທູຕານຸທູດ; ພະນັກງານ ລັດຖະກອນສະຖານທູດຫວຽດນາມ ແລະ ຜູ້ຕາງໜ້າວົງຄະນາຍາດຊາວຫວຽດນາມຢູ່ແບນຊິກ.
ພິທີຕ້ອນຮັບທ່ານເລຂາທິການໃຫຍ່ ຫງວຽນຝູຈ້ອງ ຢ່າງເປັນທາງການ ໄດ້ຈັດຂຶ້ນຢ່າງສົມກຽດໃນຕອນບ່າຍວັນທີ 17 ມັງກອນ ພາຍໃຕ້ການເປັນເຈົ້າພາບຂອງທ່ານນາຍົກລັດຖະມົນຕີ ແອລີໂອ ດີ ຣູໂປ. ຕໍ່ຈາດນັ້ນ, ທ່ານນາຍົກລັດຖະມົນຕີ ແບນຊິກ ກໍ່ໄດ້ຮ່ວມການພົບປະເຈລະຈາກັບທ່ານເລຂາທິການໃຫຍ່ ຫງວຽນຝູຈ້ອງ.
ທັນທີ ພາຍຫຼັງມາຮອດບຣຸກແຊນ, ນະຄອນຫຼວງຂອງລາຊະອານາຈັກແບນຊິກ, ທ່ານເລຂາທິການໃຫຍ່ ຫງວຽນຝູຈ້ອງ ພ້ອມດ້ວຍຄະນະຜູ້ແທນຂັ້ນສູງຫວຽດນາມ ກໍ່ໄດ້ໄປວາງພວງມາລາທີ່ອະນຸສາວະລີນັກຮົບນິລະນາມ ແລະ ໄດ້ມີການພົບປະແລກປ່ຽນຄວາມເຫັນກັບ ສົມເດັດມົງກຸດລາຊະກຸມານ ຟີລິບ ແຫ່ງແບນຊິກທີ່ລາດຊະວັງ.
ເຂົ້າຮ່ວມການພົບປະແລກປ່ຽນຄວາມເຫັນ, ທາງຝ່າຍຫວຽດນາມຍັງມີ: ທ່ານຫງວຽນຊວັນຝຸກ ກຳມະການກົມການເມືອງ, ຮອງນາຍົກລັດຖະມົນຕີ; ທ່ານຮ່ວາງບິ່ງກວັນ ກຳມະການສູນກາງພັກ, ຫົວໜ້າຄະນະພົວພັນຕ່າງປະເທດສູນກາງ; ຟ້າມບິ່ງມິງ ກຳມະການສູນກາງພັກ, ລັດຖະມົນຕີກະຊວງກາງຕ່າງປະເທດ; ທ່ານຟ້າມແຊງເຈົາ ເອກອັກຄະລັດຖະທູດຫວຽດນາມປະຈຳລາຊະອານາຈັກແບນຊິກ ແລະ ສະຫະພາບເອີຣົບ.
ສົມເດັດມົງກຸດລາຊະກຸມານ ຟີລິບ ໄດ້ສະແດງຄວາມຂ່ຳນັບຮັບຕ້ອນຢ່າງສຸດອົກສຸດໃຈ ຕໍ່ທ່ານເລຂາທິການໃຫຍ່ ຫງວຽນຝູຈ້ອງ ແລະ ຄະນະຜູ້ແທນຂັ້ນສູງຫວຽດນາມ ທີ່ມາຢ້ຽມຢາມລາຊະອານາຈັກແບນຊິກ ຢ່າງເປັນທາງການ. ການມາຢ້ຽມຢາມຄັ້ງນີ້ ໄດ້ດຳເນີນໃນໂອກາດທີ່ສອງປະເທດສະເຫຼີມສະຫຼອງວັນສ້າງຕັ້ງສາຍພົວພັນທາງການທູດ ຄົບຮອບ 40 ປີ ເຊິ່ງເປັນເຫດການທີ່ສຳຄັນ ຂີດໝາຍບາດກ້າວຂະຫຍາຍຕົວໃໝ່ໃນການພົວພັນມິດຕະພາບ ການຮ່ວມືລະຫວ່າງສອງປະເທດ.
ສົມເດັດມົງກຸດລາຊະກຸມານ ໄດ້ແບ່ງປັນຄວາມຄິດເຫັນນຳທ່ານເລຂາທິການໃຫຍ່ ກ່ຽວກັບມິດຈິດມິດໃຈອັບດີງາມ ແລະ ຄວາມປະທັບໃຈຕໍ່ປະເທດຫວຽດນາມທີ່ສວຍງາມ, ຄົນຫວຽດນາມໃຈດີ ຮັກແພງຫວງແຫນເພື່ອນມິດ ແລະ ບັນດາຜົນສຳເລັດອັນສຳຄັນທາງດ້ານເສດຖະກິດ - ສັງຄົມ ທີ່ສົມເດັດໄດ້ຮູ້ເຫັນຜ່ານການໄປຢ້ຽມຢາມຫວຽດນາມ ຫຼາຍຄັ້ງກ່ອນນີ້.
ທ່ານເລຂາທິການໃຫຍ່ ຫງວຽນຝູຈ້ອງ ໄດ້ສະແດງຄວາມດີອົກດີໃຈທີ່ໄດ້ມາຢ້ຽມຢາມລາຊະອານາຈັກແບນຊິກ ຢ່າງເປັນທາງການ ແລະ ຂອບອົກຂອບໃຈ ສົມເດັດມົງກຸດລາຊະກຸມານ ທີ່ໄດ້ສະຫຼະເວລາຕ້ອນຮັບຄະນະ. ທ່ານເລຂາທິການໃຫຍ່ ຕີລາຄາສູງຕໍ່ບົດບາດຂອງພະລາຊະວົງ ໃນພື້ນຖານການເມືອງຂອງລາຊະອານາຈັກແບນຊິກ; ຂອບອົກຂອບໃຈສົມເດັດມົງກຸດລາຊະກຸມານ ທີ່ໄດ້ມີນ້ຳໃຈຮັກແພງ ແລະ ໃຫ້ການຮ່ວມມື ຊ່ວຍເຫຼືອຢ່າງມີປະສິດທິຜົນແກ່ປະຊາຊົນຫວຽດນາມ ໃນເວລາທີ່ຜ່ານມາ.
ພ້ອມກັນນັ້ນ ກໍ່ຢັ້ງຢືນວ່າ ຫວຽດນາມຍາມໃດກໍ່ຖືເປັນສຳຄັນ ແລະ ປະຕິບັບແຜນນະໂຍບາຍເພີ່ມທະວີການຮ່ວມມືຮອບດ້ານກັບແບນຊິກ ເຊິ່ງເປັນສະມາຊິກຜູ້ສ້າງຕັ້ງສະຫະພາບເອີຣົບ ແລະ ມີບົດບາດສຳຄັນໃນສະຫະພາບເອີຣົບ.
ໃນບັນຍາກາດຊື່ສັດສຸດຈະລິດ ແລະ ມິດຕະພາບ, ສອງຝ່າຍຮູ້ສຶກດີໃຈທີ່ເຫັນວ່າສາຍພົວພັນມິດຕະພາບ ແລະ ການຮ່ວມມືລະຫວ່າງສອງປະເທດ ຂະຫຍາຍຕົວຢ່າງຕັ້ງໜ້າ, ນັບມື້ນັບຫຼາຍຮູບຫຼາຍແບບ. ສອງຝ່າຍໄດ້ເປັນເອກະສັນກັນວ່າ ຄວນຕ້ອງສືບຕໍ່ຮັກສາການພົບປະຂັ້ນສູງ ແລະ ແລກປ່ຽນຄະນະຜູ້ແທນຂັ້ນຕ່າງໆ; ປະສາມສົມທົບກັນຈັດຕັ້ງການເຄື່ອນໄຫວຕ່າງໆ ໃນປີ 2013 ເພື່ອສະເຫຼີມສະຫຼອງວັນສ້າງຕັ້ງສາຍພົວພັນທາງການທູດ ລະຫວ່າງສອງປະເທດຄົບຮອບ 40 ປີ, ເພີ່ມທະວີການຮ່ວມມືແລກປ່ຽນການຄ້າ ແລະ ການລົງທຶນໃນຂົງເຂດຕ່າງໆ ທີ່ແບນຊິກມີທ່າແຮງເຊັ່ນ: ກໍ່ສ້າງພັດທະນາທ່າກ່ຳປັ່ນທະເລ ແລະ ການບໍລິການພາລາທິການ, ຄົມມະນາຄົມຂົນສົ່ງ, ເຕັກໂນໂລຊີຂຽວ, ເຕັກໂນໂລຊີສູງ, ເຕັກໂນໂລຊີການເດີນອາກາດ - ອາວະກາດ, ອຸດສາຫະກຳໜັກ, ສາທາລະນະສຸກ...
ສອງຝ່າຍໄດ້ເນັ້ນໜັກວ່າ ການຮ່ວມມືດ້ານການສຶກສາ - ບຳລຸງກໍ່ສ້າງ ແມ່ນຈຸດພົ້ນເດັ່ນໃນການພົວພັນທະວິພາຄີ ດ້ວຍການໃຫ້ບຸລິມະສິດການບຳລຸງກໍ່ສ້າງໃນບັນດາຂົງເຂດ ເຕັດໂນໂລຊີຂໍ້ມູນຂ່າວສາມ, ເຕັກໂນໂລຊີຊີວະວິທະຍາ, ທໍລະນີສາດ, ສິ່ງແວດລ້ອມ,.. ./.
ສັງລວມໂດຍນັກຂ່າວ
