ຍົກສູງການພົວພັນຮ່ວມມືລະຫວ່າງຫວຽດນາມ - ສະຫະພາບເອີຣົບ ຂຶ້ນສູ່ລະດັບໃໝ່
ວ.ກ. ອອນໄລ - ຕອນເຊົ້າວັນທີ 18 ມັງກອນ 2013 (ຕາມເວລາ ຮ່າໂນ້ຍ), ພິທີຕ້ອນຮັບເປັນທາງການ ເພື່ອຕ້ອນຮັບທ່ານເລຂາທິການໃຫຍ່ ຫງວຽນຝູຈ້ອງ ທີ່ໄປຢ້ຽມຢາມລາຊະອານາຈັກ ແບນຊິກ, ຕາມຄຳເຊີນຂອງນາຍົກລັດຖະມົນຕີແບນຊິກ ແອລີໂອ ດີ ຣູໂປ ຢ່າງເປັນທາງການ, ໄດ້ຈັດຂຶ້ນຢ່າງສົມກຽດຢູ່ທີວັງ ແອດມົງ ນະຄອນຫຼວງບຣຸກແຊນ.
ປະທານສະພາເອີຣົບ ເຮີມານ ວານ ຣົມປູຍ ຕ້ອນຣັບທ່ານເລຂາທິການໃຫຍ່ ຫງວຽນຝູຈ້ອງ - ຮູບຂອງ: TTXVN
ພາຍຫຼັງພິທີຕ້ອນຮັບ, ທ່ານເລຂາທິການໃຫຍ່ ຫງວຽນຝູຈ້ອງ ໄດ້ພົບປະເຈລະຈາກັບທ່ານນາຍົກລັດຖະມົນຕີ ລາຊະອານາຈັກແບນຊິກ ແອລີໂອ ດີ ຣູໂປ.
ທ່ານນາຍົກລັດຖະມົນຕີ ແອລີໂອ ດີ ຣູໂປ ໄດ້ເນັ້ນວ່າ ແບນຊິກ ຖືເປັນສຳຄັນບົດບາດທີ່ຕັ້ງຂອງຫວຽດນາມໃນອາຊຽນ, ເປັນຕົ້ນແມ່ນບົດບາດຜູ້ປະສານງານການພົວພັນລະຫວ່າງອາຊຽນ - ອີຢູ ແລະ ຫວັງເປັນຢ່າງຍິ່ງວ່າ ຫວຽດນາມຈະກາຍເປັນປັດໃຈຊຸກຍູ້ການພົວພັນ ແບນຊິກ - ອາຊຽນ ເວົ້າໂດຍສະເພາະ ແລະ ອີຢູ - ອາຊຽນເວົ້າລວມ.
ທ່ານເລຂາທິການໃຫຍ່ ຫງວຽນຝູຈ້ອງ ຢັ້ງຢືນວ່າ ຫວຽດນາມຕີລາຄາສູງບົດບາດທີ່ຕັ້ງຂອງແບນຊິກ ຢູ່ທະວີບເອີຣົບ ແລະ ໃນໂລກ, ຖືວ່າ ແບນຊິກ ເປັນຄູ່ຮ່ວມມືສຳຄັນ, ເປັນຂົວຕໍ່ເພື່ອຄວາມພັດທະນາລະຫວ່າງຫວຽດນາມ ກັບອີຢູ ແລະ ກັບບັນດາປະເທດເອີຣົບອື່ນໆ.
ທ່ານຜູ້ນຳທັງສອງໄດ້ສະແດງຄວາມດີອົກດີໃຈກ່ຽວກັບການພັດທະນາຢ່າງຕັ້ງໜ້າ ຂອງສາຍພົວພັນມິດຕະພາບ ແລະ ການຮ່ວມມືລະຫວ່າງຫວຽດນາມ - ແບນຊິກ ໃນຊຸມປີມໍ່ໆມານີ້ ທາງດ້ານຕ່າງໆທຸກຂົງເຂດ ທີ່ນັບມື້ນັບສົມບູນດ້ວຍຫຼາຍຮູບຫຼາຍແບບ ແລະ ເຂົ້າສູ່ເນື້ອແທ້, ທັງຢູ່ຂັ້ນສະຫະລັດ ແລະ ຂັ້ນພູມພາກ, ປະຊາຄົມ, ກໍ່ຄືໃນເວທີສາກົນ ພະຫຸພາຄີ; ເປັນເອກະພາບກັນວາງທິດທາງ ແລະ ມາດຕະການແນໃສ່ເພີ່ມທະວີຍິ່ງກວ່າອີກສາຍພົວພັນມິດຕະພາບ ການຮ່ວມມືລະຫວ່າງສອງປະເທດໃນຂົງເນດຕ່າງໆ. ທ່ານຜູ້ນຳທັງສອງກໍໄດ້ແລກປ່ຽນຄວາມຄິດຄວາມເຫັນ ກ່ຽວກັບບັນດາບັນຫາສາກົນ ທີ່ທັງສອງຝ່າຍໄດ້ເອົາໃຈໃສ່...
ພາຍຫຼັງສຳເລັດການພົບປະເຈລະຈາ, ທ່ານຜູ້ນຳທັງສອງໄດ້ເປັນສັກຂີພະຍານພິທີລົງນາມໃນບັນດາເອກະສານກ່ຽວກັບການຮ່ວມມືລະຫວ່າງສອງປະເທດ: ບົດບັນທຶກຊ່ວຍຈຳ (MOU) ກ່ຽວກັບການຊ່ວຍໜູນງົບປະມານເພື່ອຮັບມືກັບການປ່ຽນແປງດິນຟ້າອາກາດ, ບົດບັນທຶກຊ່ວຍຈຳກ່ຽວກັບການກໍ່ສ້າງທ່າກຳປັນ ກິ່ງຫວູ, ຮາຍຟອງ.
* ວັນທີ 18 ມັງກອນ (ຕາມເວລາຮ່າໂນ້ຍ), ໃນກອບການຢ້ຽມຢາມລາຊະອານາຈັກແບນຊິກ ແລະ ສະຫະພາບເອີຣົບ ຢ່າງເປັນທາງການ, ຢູ່ທີ່ນະຄອນຫຼວງບຣຸກແຊນ, ທ່ານເລຂາທິການໃຫຍ່ ຫງວຽນຝູຈ້ອງ ໄດ້ພົບປະເຈລິຈາກັບທ່ານປະທານຄະນະກຳມາທິການເອີຣົບ ໂຈເຊ ມານູແອນ ບາໂຣໂຊ ແລະ ທ່ານປະທານສະພາເອີຣົບ ເຮີມານ ວານ ຣົມປູຍ.
ໃນການພົບປະເຈລະຈາລະຫວ່າງ ທ່ານເລຂາທິການໃຫຍ່ ຫງວຽນຝູຈ້ອງ ກັບ ທ່ານປະທານຄະນະກຳມາທິການເອີຣົບ ໂຈເຊ ມານູແອນ ບາໂຣໂຊ, ທ່ານປະທານຄະນະກຳມາທິການເອີຣົບ ເນັ້ນວ່າ ຄະນະກຳມາທິການເອີຣົບ ຖືເປັນສຳຄັນ ແລະ ຕີລາຄາສູງການພົວພັນຮ່ວມມືກັບຫວຽດນາມ ເຊິ່ງເປັນປະເທດທີ່ຂະຫຍາຍຕົວຢ່າງຂະຫຍັນຂັນເຄື່ອນ, ມີບົດນາດນັບມື້ນັບສຳຄັນໃນພາກພື້ນອາຊີອາຄະເນ.
ທ່ານເລຂາທິການໃຫຍ່ ຢັ້ງຢືນບັນດາຜົນສຳເລັດອັນດີງາມໃນການພົວພັນລະຫວ່າງຫວຽດນາມ ແລະ ອີຢູ, ສະແດງຄວາມຂອບອົກຂອບໃຈການຮ່ວມມື ແລະ ຊ່ວຍເຫຼືອຂອງອີຢູ ຕໍ່ກັບຫວຽດນາມ; ທ່ານໄດ້ເນັ້ນວ່າຫວຽດນາມຍາມໃດກໍ່ຖືເປັນສຳຄັນການຮ່ວມມືກັບອີຢູ ແລະ ປາຖະໜາຢາກພັດທະນາການຮ່ວມມືກັບອີຢູ; ຖືວ່າອີຢູເປັນຄູ່ຮ່ວມມືສຳຄັນອັນດັບໜຶ່ງ ມີທີ່ຕັ້ງບຸລິມະສິດໃນນະໂຍບາຍພົວພັນຕ່າງປະເທດຂອງຕົນ... ຫວຽດນາມຫວັງວ່າຈະສືບຕໍ່ໄດ້ຮັບການຮ່ວມມື, ຊ່ວຍໜູນຂອງອີຢູ.
ເພື່ອປັບປຸງ ແລະ ເຮັດໃຫ້ການພົວພັນລະຫວ່າງສອງຝ່າຍເລິກເຊິ່ງກວ່າອີກໃນເວລາຕໍ່ໄປ, ທ່ານຜູ້ນຳທັງສອງໄດ້ເປັນເອກະພາບກັນ ເພີ່ມທະວີການແລກປ່ຽນຄະນະຜູ້ແທນຂັ້ນສູງ, ຍົກສູງປະສິດທິຜົນຂອງບັນດາກົນໄກຮ່ວມມືທີ່ມີຢູ່, ເປັນຕົ້ນແມ່ນສັນຍາວ່າດ້ວຍຄູ່ຮ່ວມມື ແລະ ການຮ່ວມມືຮອບດ້ານ (PCA) ລະຫວ່າງຫວຽດນາມ - ອີຢູ, ຍູ້ແຮງການເຈລະຈາ, ເຊັນສັນຍາການຄ້າເສລີ (FTA) ລະຫວ່າງອີຢູ ແລະ ຫວຽດນາມ; ກຳນົດບັນດາກົນໄກກ່ຽວກັບການປະຊຸມ, ຄົ້ນຄວ້າທາບທາມ, ສົນທະນາການເມືອງ; ຊຸກຍູ້ຢ່າງແຂງແຮງການພົວພັນໃນຂົງເຂດຕ່າງໆ; ເພີ່ມທະວີການແລກປ່ຽນລະຫວ່າງປະຊາຊົນ; ຊຸກຍູ້ການລົງທຶນຂອງອີຢູ ຢູ່ຫວຽດນາມ. ອີຢູໃຫ້ຄຳໝັ້ນສັນຍາວ່າຈະເພີ່ມແຫຼ່ງຊ່ວຍເຫຼືອໃຫ້ແກ່ຫວຽດນາມ ໃນໄລຍະປີ 2014 - 2020, ເພີ່ມທະວີການຮ່ວມມືໃນຂົງເຂດການສຶກສາ - ບຳລຸງກໍ່ສ້າງ, ວັດທະນະທຳ, ເປີດກວ້າງການຮ່ວມືໃນບັນດາຂົງເຂດທີ່ມີກຳລັງບົ່ມຊ້ອນຫຼາຍ ເຊັ່ນກໍ່ສ້າງພື້ນຖານໂຄງລ່າງເສດຖະກິດ, ອຸດສາຫະກຳສະໜັບສະໜູນ, ເຕັກໂນໂລຊີສູງ, ການພັດທະນາແບບຂຽວສະອາດ...
ສອງຝ່າຍຜັນຂະຫຍາຍໂດຍໄວ ບັນດາເນື້ອໃນຮ່ວມມືກ່ຽວກັບການປ້ອງກັນ, ຕ້ານການກໍ່ການຮ້າຍ ແລະ ອາຊະຍາກຳທີ່ມີການຈັດຕັ້ງຂ້າມຊາດ ເຊິ່ງໄດ້ກຳນົດໃນສັນຍາ PCA ຫວຽດນາມ - ອີຢູ; ເພີ່ມທະວີຍິ່ງກວ່າອີກ ບັນດາການເຄື່ອນໄຫວແລກປ່ຽນວັດທະນະທຳ, ສິນລະປະວັນນະຄະດີ, ປະກອບສ່ວນເຂົ້າໃນການຍົກສູງຄວາມຮັບຮູ້, ມິດຈິດມິດໃຈ ຂອງປະຊາຊົນສອງຝ່າຍ. ອີຢູພ້ອມແລ້ວທີ່ຈະຊ່ວຍໜູນດ້ານເຕັກນິກ ໃຫ້ແກ່ການຫັນເປັນອຸດສາຫະກຳ - ທັນສະໄໝຂອງຫວຽດນາມ.
ທ່ານເລຂາທິການໃຫຍ່ ແລະ ທ່ານປະທານຄະນະກຳມາທິການເອີຣົບ ໄດ້ຢັ້ງຢືນຄວາມສຳຄັນຂອງສາຍພົວພັນອາຊຽນ - ອີຢູ. ທ່ານເລຂາທິການໃຫຍ່ ຫງວຽນຝູຈ້ອງ ຢັ້ງຢືນວ່າ ໃນຖານະຂອງປະເທດປະສານງານການພົວພັນອາຊຽນ - ອີຢູ, ຫວຽດນາມພ້ອມແລ້ວທີ່ຈະຮ່ວມມື ແລະ ສະໜັບສະໜູນອີຢູ ໃນການເພີ່ມທະວີຍົກສູງການພົວພັນກັບອາຊຽນ, ປະກອບສ່ວນຢ່າງຕັ້ງໜ້າເຂົ້າໃນການຮັກສາສັນຕິພາບ, ສະຖຽນລະພາບ ແລະ ຄວາມວັດທະນາຖາວອນຢູ່ໃນພາກພື້ນ.
ກ່ຽວກັບສະພາບການຢູ່ທະເລຕາເວັນອອກ, ຫວຽດນາມຕີລາຄາສູງຕໍ່ບັນດາການປະກອບສ່ວນທີ່ມີລັກສະນະສ້າງສາຂອງອີຢູ ແນໃສ່ຮັບປະກັນຄວາມສະຫງົບ, ຄວາມປອດໄພດ້ານການເດີນເຮືອທະເລ ແລະ ຮັກສາສັນຕິພາບ, ສະຖຽນລະພາບຢູ່ເຂດທະເລຕາເວັນອອກ.
ທ່ານປະທານຄະນະກຳມາທິການເອີຣົບ ໂຈເຊ ມານູແອນ ບາໂຣໂຊ ໄດ້ເນັ້ນເຖິງການສະໜັບສະໜູນການແກ້ໄຂການພິພາດແກ່ງແຍ້ງກັນດ້ວຍສັນຕິວິທີ, ບົນພື້ນຖານກົດໝາຍສາກົນ ແລະ ບັນລຸໄດ້ໂດຍໄວໃນ ປະມວນຂໍ້ກຳນົດກ່ຽວກັບການປະພຶດຂອງບັນດາຝ່າຍຢູ່ທະເລຕາເວັນອອກ (COC).
ໃນຕອນບ່າຍວັນດຽວກັນ (18 ມັງກອນ), ທ່ານເລຂາທິການໃຫຍ່ ຫງວຽນຝູຈ້ອງ ໄດ້ພົບປະເຈລິຈາກັບທ່ານປະທານສະພາເອີຣົບ ເຮີມານ ວານ ຣົມປູຍ ຢູ່ທີ່ສຳນັກງານຂອງຄະນະກຳມາທິການເອີຣົບ ທີ່ນະຄອນຫຼວງບຣຸກແຊນ./.
ສັງລວມໂດຍ: ຫງອກມາຍ
