ສາທາລະນະລັດ ປະຊາທິປະໄຕ ປະຊາຊົນລາວ ປະດັບຫຼຽນໄຊ ຫຼຽນກາ ໃຫ້ແກ່ຫ້ອງວ່າການ ປະທານປະເທດ ສາທາລະນະລັດ ສັງຄົມນິຍົມ ຫວຽດນາມ
ຕອນບ່າຍວັນທີ 23 ມັງກອນ 2013, ຢູ່ທຳນຽບປະທານປະເທດ ທີ່ນະຄອນຫຼວງຮ່າໂນ້ຍ, ໄດ້ມີການຈັດພິທີປະດັບຫຼຽນໄຊ ອິດສະຫຼະ, ຫຼຽນໄຊ ແລະ ຫຼຽນກາມິດຕະພາບ ຂອງລັດແຫ່ງ ສປປ ລາວ ໃຫ້ແກ່ໝູ່ຄະນະ, ການນຳ ແລະ ອະດີດການນຳຫ້ອງວ່າການປະທານປະເທດແຫ່ງ ສສ ຫວຽດນາມ.
ໂດຍຕາງໜ້າປະທານປະເທດແຫ່ງ ສປປ ລາວ, ທ່ານພົງສະຫວັດ ບຸບຜາ, ລັດຖະມົນຕີ, ຫົວໜ້າຫ້ອງວ່າການປະທານປະເທດລາວ ໄດ້ປະດັບຫຼຽນໄຊອິດສະຫຼະ ຊັ້ນໜຶ່ງ ໃຫ້ແກ່ໝູ່ຄະນະຫ້ອງວ່າການປະທານປະເທດຫວຽດນາມ; ຫຼຽນໄຊອິດສະຫຼະຊັ້ນສອງ ໃຫ້ແກ່ທ່ານ ດ່າວຫວຽດຈຸງ ຫົວໜ້າຫ້ອງວ່າການປະທານປະເທດຫວຽດນາມ, ປະດັບຫຼຽນໄຊມິດຕະພາບໃຫ້ 5 ສະຫາຍສັງກັດຫ້ອງວ່າການປະທານປະເທດຫວຽດນາມ.
ເນື່ອງໃນໂອກາດນີ້, ໂດຍຕາງໜ້ານາຍົກລັດຖະມົນຕີແຫ່ງ ສປປ ລາວ, ທ່ານພົງສະຫວັດ ບຸບຜາ, ລັດຖະມົນຕີ, ຫົວໜ້າຫ້ອງວ່າການປະທານປະເທດລາວ ໄດ້ປະດັບຫຼຽນກາມິດຕະພາບ ໃຫ້ 2 ສະຫາຍພະນັກງານຫ້ອງວ່າການປະທານປະເທດຫວຽດນາມ… ຜູ້ທີ່ມີຄຸນງາມຄວາມດີໃນການຮ່ວມມືຮອບດ້ານລະຫວ່າງສອງຫ້ອງການປະທານປະເທດ.
ໃນພິທີປະດັບຫຼຽນໄຊ, ທ່ານດ່າວຫວຽດຈຸງ, ກຳມະການສູນກາງພັກ, ຫົວໜ້າຫ້ອງວ່າການປະທານປະເທດຫວຽດນາມ ໄດ້ກ່າວຄຳປາໄສສະແດງຄວາມດີອົກດີໃຈ ແລະ ຮູ້ສຶກມີກຽດຢ່າງສູງຂອງໝູ່ຄະນະ ແລະ ຂອງຕົນເອງ ທີ່ໄດ້ຮັບຫຼຽນໄຊ ເຊິ່ງເປັນລາງວັນອັນປະເສີດຂອງລັດ ແຫ່ງ ສປປ ລາວ ປະດັບໃຫ້.
ທ່ານດ່າວຫວຽດຈຸງ ເນັ້ນວ່າ: ໃນຕະຫຼອດທົດສະວັດທີ່ຜ່ານມາ, ສາຍພົວພັນມິດຕະພາບອັນເປັນມູນເຊື້ອ, ຄວາມສາມັກຄີພິເສດ ແລະ ການຮ່ວມມືຮອບດ້ານລະຫວ່າງສອງປະເທດ ຫວຽດນາມ - ລາວ ໂດຍທ່ານປະທານໂຮ່ຈີມິນ ແລະ ທ່ານປະທານໄກສອນ ພົມວິຫານ, ປະທານສຸພານຸວົງ ກໍ່ຕັ້ງຂຶ້ນ ແລະ ໄດ້ຮັບການປົກປັກຮັກສາ, ເພີ່ມພູນຄູນສ້າງດ້ວຍຄວາມມານະພະຍາຍາມຢ່າງສຸດຂີດຂອງບັນດາຜູ້ນຳຂອງສອງປະເທດນັ້ນ ໄດ້ກາຍເປັນຊັບສົມບັດອັນລ້ຳຄ່າ, ເປັນປັດໃຈຕັດສິນໄຊຊະນະຂອງການປະຕິວັດໃນແຕ່ລະປະເທດ, ເປັນກົດເກນແຫ່ງການຄົງຕົວ ແລະ ຂະຫຍາຍຕົວ ຂອງສອງປະເທດ.
ທ່ານພົງສະຫວັດ ບຸບຜາ, ລັດຖະມົນຕີ, ຫົວໜ້າຫ້ອງວ່າການປະທານປະເທດລາວ ກ່າວວ່າ: ໃນເວລາທີ່ຜ່ານມາ ຫ້ອງວ່າການປະທານປະເທດຫວຽດນາມ ໄດ້ປະກອບສ່ວນອັນສຳຄັນເຂົ້າໃນການເພີ່ມພູນຄູນສ້າງ, ເພີ່ມທະວີສາຍພົວພັນມິດຕະພາບ, ຄວາມສາມັກຄີພິເສດ, ການຮ່ວມມືຮອບດ້ານລະຫວ່າງສອງຫ້ອງວ່າການ.ພິທີປະດັບຫຼຽນໄຊອິດສະຫຼະ, ຫຼຽນໄຊ ຫຼຽນກາມິດຕະພາບ ຂອງລັດແຫ່ງ ສປປ ລາວ ໃຫ້ແກ່ໝູ່ຄະນະ, ການນຳ ແລະ ອະດີດການນຳ ຫ້ອງວ່າການປະທານປະເທດແຫ່ງ ສສ ຫວຽດນາມ ຄັ້ງນີ້ແມ່ນເພື່ອແນໃສ່ຈົດຈຳ ແລະ ສະແດງຄວາມຮູ້ບຸນຄຸນຕໍ່ຄຸນງາມຄວາມດີຕ່າງໆ ໃນການຊ່ວຍເຫຼືອ ຮ່ວມມືລະຫວ່າງສອງພັກ ສອງລັດ ປະຊາຊົນສອງປະເທດເວົ້າລວມ ແລະ ລະຫວ່າງສອງຫ້ອງວ່າການປະທານປະເທດເວົ້າສະເພາະ.
ກ່ອນນັ້ນ, ທ່ານພົງສະຫວັດ ບຸບຜາ, ລັດຖະມົນຕີ, ຫົວໜ້າຫ້ອງວ່າການປະທານປະເທດລາວ ໄດ້ພົບປະແລກປ່ຽນຄວາມເຫັນ ກັບທ່ານດ່າວຫວຽດຈຸງ, ກຳມະການສູນກາງພັກ, ຫົວໜ້າຫ້ອງວ່າການປະທານປະເທດຫວຽດນາມ. ສອງຝ່າຍໄດ້ລື້ມຄືນປະຫວັດມູນເຊື້ອສາຍພົວພັນ ແລະ ເນັ້ນໜັກວ່າຕ້ອງສືບຕໍ່ຊຸກຍູ້ ເພີ່ມທະວີການພົວພັນຮ່ວມມືລະຫວ່າງສອງປະເທດໃນທຸກໆຂົງເຂດ ໃນເວລາຕໍ່ໄປ./.
ຕາມຂ່າວ: TTXVN