ສັນຍາປາຣີ ກ່ຽວກັບຫວຽດນາມ ປີ 1973 - ຫຼັກໝາຍອັນຮຸ່ງເຮືອງເຫຼືອງເຫຼື້ອມ ໃນປະຫວັດສາດການທູດຫວຽດນາມ
ວ.ກ. ອອນໄລ - ຕອນເຊົ້າວັນທີ 25 ມັງກອນ 2013, ຢູ່ທີ່ນະຄອນຫຼວງຮ່າໂນ້ຍ, ຄະນະບໍລິຫານງານສູນກາງພັກກອມມູນິດຫວຽດນາມ, ສະພາແຫ່ງຊາດ, ປະທານປະເທດ, ລັດຖະບານ ປະເທດສາທາລະນະລັດ ສັງຄົມນີຍົມຫວຽດນາມ ແລະ ກະຊວງການຕ່າງປະເທດຫວຽດນາມ ໄດ້ຈັດຕັ້ງພິທີການຂັ້ນລັດຢ່າງສົມກຽດ ເພື່ອສະເຫຼີມສະຫຼອງວັນເຊັນສັນຍາປາຣີ ກ່ຽວກັບການຢຸດຕິສົງຄາມ, ຟື້ນຟູສັນຕິພາບຄືນໃໝ່ຢູ່ຫວຽດນາມ ຄົບຮອບ 40 ປີ (27-01-1973 – 27-01-2013).
ໃນພິທີສະເຫຼີມສະຫຼອງອັນຄຶກຄື້ນນີ້, ສະຫາຍເຈືອງເຕິນຊາງ ປະທານປະເທດ ສສ ຫວຽດນາມ ໄດ້ປະດັບນາມມະຍົດວິລະຊົນກຳລັງປະກອບອາວຸດ ໃຫ້ແກ່ສອງຄະນະເຈລະຈາ. ສະຫາຍປະທານປະເທດ ເຈືອງເຕິນຊາງ ເນັ້ນວ່າ: ການຕໍ່ສູ້ອັນລຳບາກຍາວນານຂອງກອງທັບແລະປະຊາຊົນເຮົາຢູ່ທີ່ສະໜາມຮົບ ແລະ ການຕໍ່ສູ້ທາງການທູດຢູ່ທີ່ກອງປະຊຸມປາຣີ ລ້ວນແຕ່ແນໃສ່ຈຸດໝາຍບັງຄັບໃຫ້ອາເມລິກາ ຕ້ອງຢຸດຕິສົງຄາມ ຕ້ອງໃຫ້ຄຳໝັ້ນສັນຢາເຄົາລົບນັບຖືຄວາມເປັນເອກະລາດ ອຳນາດອະທິປະໄຕ ເອກະພາບ ແລະ ຜືນແຜ່ນດິນອັນຄົບຖ້ວນຂອງຫວຽດນາມ. ພີ່ນ້ອງຮ່ວມຊາດ ສະຫາຍພະນັກງານ ນັກຮົບຜູ້ທີ່ເປັນລູກຮັກຫຼານແພງດີເດັ່ນ ຂອງປະເທດຊາດຫວຽດນາມ ບໍ່ຈັກວ່າເທົ່າໃດຄົນ ໄດ້ເສຍສະຫຼະຊີວິດ ເພື່ອປະຕິບັດຈຸດໝາຍອັນສັກກາລະບູຊານັ້ນ.
ເຊັນສັນຍາປາຣີ ອາເມລິກາຕ້ອງຍອມຮັບຮູ້ຄວາມເປັນເອກະລາດ ເອກະພາບ ແລະ ຜືນແຜ່ນດິນອັນຄົບຖ້ວນຂອງຫວຽດນາມ, ຕ້ອງຢຸດຕິການຖິ້ມລະເບີດທຳລາຍພາກເໜືອ, ຖອນທະຫານອາເມລິກາ ແລະ ບໍລິວານທັງໝົດອອກຈາກຫວຽດນາມ. ສັນຍາປາຣີ ໄດ້ໄຂສະຖານະການໃໝ່ ດ້ວຍທ່າແຮງຂາດຂັ້ນຂອງຫວຽດນາມໃນສະໜາມຮົບ, ສ້າງປະຖົມປັດໃຈອັນໜັກແໜ້ນເພື່ອໃຫ້ກອງທັບ ແລະ ປະຊາຊົນຫວຽດນາມກ້າວຂຶ້ນ “ຕີໃຫ້ພວກຫຸ່ນລົ້ມລົງ” ເຊິ່ງຍອດສູງແມ່ນບັ້ນຮົບໂຮ່ຈີມິນອັນເປັນປະຫວັດສາດ ປົດປ່ອຍພາກໃຕ້ທັງໝົດ ໂຮມປະເທດຊາດເປັນເອກະພາບ.
ສະຫາຍເຈືອງເຕິນຊາງ ປະທານປະເທດ ຢັ້ງຢືນວ່າ: ສັນຍາປາຣີ ແມ່ນຍອດສູງແຫ່ງໄຊຊະນະໃນແນວຮົບການຕ່າງປະເທດ ຂອງປະເທດເຮົາໃນສະໄໝການຕໍ່ສູ້ກູ້ຊາດຕ້ານອາເມລິກາ, ເປັນໜ້າປະຫວັດສາດທອງຄຳອັນເຫຼືອງເຫຼື້ອມຂອງພື້ນຖານການທູດປະຕິວັດຫວຽດນາມ. ສະຫາຍປະທານປະເທດ ເນັ້ນວ່າ: “ພັກ ລັດ ແລະ ປະຊາຊົນຫວຽດນາມຍາມໃດກໍເຊື່ອໝັ້ນ ແລະ ປາຖະໜາວ່າ ເສີມຂະຫຍາຍຈິດໃຈກອງປະຊຸມປາຣີ ວຽກງານການຕ່າງປະເທດຂອງຫວຽດນາມ ແນ່ນອນຈະສືບຕໍ່ໄດ້ຮັບຜົນສຳເລັດອັນໃຫຍ່ຫຼວງກວ່າອີກ; ສືບຕໍ່ສ້າງຫຼັກໝາຍອັນຮຸ່ງເຮືອງເຫຼືອງເຫຼື້ອມໃໝ່ ໃນພາລະກິດການກໍ່ສ້າງລັດທິສັງຄົມນິຍົມຢ່າງສຳເລັດຜົນ ແລະ ປົກປັກຮັກສາປະເທດຊາດຫວຽດນາມສັງຄົມນິຍົມທີ່ຮັກແພງຢ່າງໝັ້ນຄົງຂະໜົງແກ່ນ”.
ກ່າວຄຳປາໄສທີ່ພິທີສະເຫຼີມສະຫຼອງ, ທ່ານນາງ ຫງວຽນທີ້ບິ່ງ, ອະດີດຮອງປະທານປະເທດ, ອະດີດລັດຖະມົນຕີກະຊວງການຕ່າງປະເທດ ລັດຖະບານຊົ່ວຄາວແຫ່ງສາທາລະນະລັດ ພາກໃຕ້ຫວຽດນາມ, ອະດີດຫົວໜ້າຄະນະເຈລະຈາ ຂອງລັດຖະບານຊົ່ວຄາວ ແຫ່ງສາທາລະນະລັດພາກໃຕ້ຫວຽດນາມ ທີ່ກອງປະຊຸມປາຣີ ໃຫ້ຮູ້ວ່າ: ສັນຍາປາຣີ ກ່ຽວກັບການຢຸດຕິສົງຄາມ ຟື້ນຟູສັນຕິພາບຄືນໃໝ່ຢູ່ຫວຽດນາມ ທີ່ໄດ້ເຊັນກັນໃນວັນທີ 27 ມັງກອນ 1973 ແມ່ນໄຊຊະນະທີ່ມີຄວາມໝາຍຍຸດທະສາດ, ພາໄປເຖິງມະຫາໄຊຊະນະໃນລະດູບານໃໝ່ປີ 1975, ປົດປ່ອຍພາກໃຕ້ ໂຮມປະເທດຊາດເປັນເອກະພາບ, ແມ່ນເປັນໝາກຜົນຂອງການຕໍ່ສູ້ກູ້ຊາດ ຕ້ານການຮຸກຮານຈາກພາຍນອກ ອັນຍືດເຍືອຍາວນານ ທຸກຍາກລຳບາກທີ່ສຸດ ແລະ ເຕັມໄປດ້ວຍຄວາມເສຍສະຫຼະ ສິ່ງທ້າທາຍ ຂອງປະຊາຊົນຫວຽດນາມ ເຊິ່ງໄດ້ດຳເນີນໃນສາມແນວຮົບ: ການທະຫານ, ການເມືອງ, ການທູດ; ແມ່ນເປັນໝາກຜົນຂອງແນວທາງເປັນເອກະລາດ ເປັນເຈົ້າຕົນເອງ ພ້ອມກັບການຍາດແຍ່ງເອົາຄວາມສາມັກຄີສາກົນຢ່າງກວ້າງຂວາງ... ການຕໍ່ສູ້ຂອງປະຊາຊົນຫວຽດນາມ ຕ້ານຈັກກະພັດອາເມລິກາຜູ້ຮຸກຮານ ເພື່ອເອກະລາດ ເສລີພາບ ເອກະພາບແຫ່ງຊາດ ແມ່ນການຕໍ່ສູ້ອັນເປັນທຳ ສອດຄ່ອງກັບອຸດົມຄະຕິ ແລະ ຄວາມມຸ່ງມາດປາຖະໜາຂອງປະຊາຊົນໂລກ...
ທ່ານນາງ ເຮແລນ ຫລຸກ (Hélene Luc), ອະດີດສະມາຊິກວຸດທິສາພາ, ປະທານກິຕິມະສັກສະມາຄົມມິດຕະພາບຝຣັ່ງ - ຫວຽດນາມ ເວົ້າວ່າ ວັນທີ 27 ມັງກອນ 1973 ແມ່ນວັນໜຶ່ງທີ່ສວຍງາມທີ່ສຸດໃນປະຫວັດສາດ ຂອງປະຊາຊົນຫວຽດນາມ ເມື່ອສັນຍາປາຣີ ໄດ້ຮັບການລົງລາຍເຊັນ. ປະຊາຊົນຝຣັ່ງ ກໍ່ຄືບັນດາຜູ້ຮັກຫອມສັນຕິພາບ ແລະ ຄວາມຍຸດຕິທຳໃນໂລກ ພ້ອມກັບປະຊາຊົນຫວຽດນາມພາກພູມໃຈຕ້ອງຮັບໄຊຊະນະດັ່ງກ່າວນັ້ນ.
ທ່ານນາງ ເຮແລນ ຫລຸກ ແບ່ງປັນ: “...ຂ້າພະເຂົ້າຂໍສະແດງຄວາມນິຍົມນັບຖືຕໍ່ຄວາມເດັດດ່ຽວໜຽວແໜ້ນຂອງພວກເພື່ອນ ທີ່ຕັດສິນໃຈເຮັດໃຫ້ຊີວິດການເປັນຢູ່ອິ່ມໜຳສຳລານກວ່າເກົ່າ, ຕັດສິນໃຈປົກປັກຮັກສາສັນຕິພາບ. ເລື່ອງຄວາມຮັກເຊິ່ງພວກເຮົາໄດ້ຜ່ານໃນພຶດຕິກຳ ເພື່ອສັນຕິພາບ ແລະ ຄວາມຍຸດຕິທຳນັ້ນ ຈະບໍ່ຢຸດຢູ່ກັບບ່ອນຈັກເທື່ອ”./.
ຂ່າວແລະຮູບໂດຍ: ແທງຖວີ