ຂ່ຳນັບຮັບຕ້ອນ ວັນສ້າງຕັ້ງພັກກອມມູນິດຫວຽດນາມ ຄົບຮອບ 83 ປີ: ງານມະໂຫລານ ແລກປ່ຽນ ສະແດງສິລະປະວັນນະຄະດີ ໃນຫົວຂໍ້ “ເຊື່ອໜັ້ນໄປຕາມພັກຕະຫລອດກາລະນານ”
ວ.ກ. ອອນໄລ - ເນື່ອງໃນໂອກາດສະເຫຼີມສະຫຼອງ ວັນສ້າງຕັ້ງພັກກອມມູນິດຫວຽດນາມ ຄົບຮອບ 83 ປີ, ວາລະສານກອມມູນິດ ສົມທົບກັບຄະນະໂຄສະນາອົບຮົມສູນກາງ, ສະຖານີວິທະຍຸໂທລະພາບຫວຽດນາມ, ຄະນະພັກກຸ່ມບໍລິສັດນ້ຳມັນແກ໊ດແຫ່ງຊາດຫວຽດວານ ຈັດຕັ້ງງານມະໂຫລານ ແລກປ່ຽນ ສະແດງສິລະປະວັນນະຄະດີ ໃນຫົວຂໍ້ “ເຊື່ອໜັ້ນໄປຕາມພັກຕະຫລອດກາລະນານ” ຢູ່ທີ່ໂຮງມະໂຫສົບໃຫຍ່ຮ່າໂນ້ຍ ໃນຄ່ຳວັນທີ 02 ກຸມພາ 2013.
ໃຫ້ກຽດເຂົ້າຮ່ວມງານມະໂຫລານມີບັນດາສະຫາຍ: ຕ່ອງທີ້ຝ່ອງ, ກຳມະການກົມການເມືອງສູນກາງພັກ, ຮອງປະທານສະພາແຫ່ງຊາດ; ຫວູຄວາມ, ອະດີດເລຂາທິການສູນກາງພັກ, ອະດີດຮອງນາຍົກລັດຖະມົນຕີ; ເຈິ່ນກວັກເວື້ອງ, ກຳມະການສູນກາງພັກ, ຫົວໜ້າຫ້ອງການສູນກາງ; ຟ້າມບິ່ງມິງ, ກຳມະການສູນກາງພັກ, ລັດຖະມົນຕີກະຊວງການຕ່າງປະເທດ; ເຈິ່ນລືວຫາຍ, ກຳມະການສູນກາງພັກ, ຮອງຫົວໜ້າຜູ້ປະຈຳການຄະນະຈັດຕັ້ງສູນກາງ; ຟານຊວັນຢຸ໊ງ, ກຳມະການສູນກາງພັກ, ປະທານກຳມາທິການວິທະຍາສາດ - ເຕັກໂນໂລຊີ ແລະ ສິ່ງແວດລ້ອມ ສັງກັດສະພາແຫ່ງຊາດ; ໂຕເລິມ, ກຳມະການສູນກາງພັກ, ລັດຖະມົນຕີຊ່ວຍວ່າການກະຊວງຕຳຫຼວດ; ຮສ. ດຣ. ຫວູວັນຝຸກ, ເລຂາຄະນະພັກ, ຜູ້ບັນນາທິການໃຫຍ່ ວາລະສານກອມມູນິດ; ຮ່າດັງ, ອະດີດກຳມະການສູນກາງພັກ, ອະດີດຫົວໜ້າຄະນະແນວຄິດວັດທະນະທຳສູນກາງ; ຜູ້ຕາງໜ້າຄະນະໂຄສະນາອົບຮົມສູນກາງ, ກຸ່ມບໍລິສັດນ້ຳມັນແກ໊ດແຫ່ງຊາດຫວຽດນາມ,…
ຕາງໜ້າຄະນະຈັດຕັ້ງ, ທ່ານ ຮສ. ດຣ. ຫວູວັນຝຸກ ອ່ານສູນທອນພົດໄຂງານມະໂຫລານ, ເຊິ່ງໄດ້ເນັ້ນວ່າ: ລະດູບານໃໝ່ໄດ້ຜ່ານພົ້ນໄປ 83 ລະດູແລ້ວ, ພາຍໃຕ້ແສງສະຫວ່າງຂອງລັດທິມາກ - ເລນິນ, ແນວຄິດໂຮ່ຈີມິນ, ໂດຍສືບຕໍ່ມູນເຊື້ອອະລິຍະທຳຫຼາຍພັນປີຂອງຊາດ, ພັກກອມມູນິດຫວຽດນາມ - “ລູກຄີງຂອງປະຊາຊົນຜູ້ອອກແຮງງານ” - ໄດ້ນຳພາປະເທດລຸກຂຶ້ນ “ຈາກບວກຕົມລຸກຢືນຂຶ້ນຢ່າງສະຫງ່າຜ່າເຜີຍ”; ເຊື່ອໝັ້ນຢ່າງໜັກແໜ້ນ ແລະ ກ້າວຂຶ້ນຢ່າງແຂງແຮງບົນເສັ້ນທາງສັງຄົມນິຍົມ. ຢູ່ໃນໃຈຂອງປະເທດຊາດ, ພັກໄດ້ເຕີບໃຫຍ່ ແລະ ນັບມື້ນັບສົມກຽດກັບ “ຄຸນສົມບັດສິນທຳ, ຄວາມສີວິໄລ”, ເປັນຜູ້ນຳພາ ແລະ ຈັດຕັ້ງໄຊຊະນະທັງໝົດຂອງການປະຕິວັດຫວຽດນາມ.
ເຂົ້າຮ່ວມການແລກປ່ຽນຄວາມຄິດເຫັນ ໃນຫົວຂໍ້ ສືບຕໍ່ປະຕິບັດມະຕິກອງປະຊຸນສູນກາງຄັ້ງທີ 4 ສະໄໝທີ XI, ສະຫາຍຫວູຄວາມ, ອະດີດເລຂາທິການສູນກາງພັກ, ອະດີດຮອງນາຍົກລັດຖະມົນຕີ ເນັ້ນວ່າ ເພື່ອປັບປຸງຄວາມໄວ້ເນື້ອເຊື່ອໃຈຂອງປະຊາຊົນ ຕໍ່ການນຳພາຂອງພັກ, ໃນເວລາສະເພາະໜ້າຕ້ອງເອົາໃຈໃສ່ເຖິງວຽກງານພະນັກງານ, ພະນັກງານຕ້ອງເປັນແບບຢ່າງ, “ສະມາຊິກພັກໄປກ່ອນ, ປະຊາຊົນໄປຕາມຫຼັງ”. ກ່ຽວກັບຫົວຂໍ້ ສືບຕໍ່ຮ່ຳຮຽນ ແລະ ເຮັດຕາມແວ່ນແຍງຄຸນສົມບັດໂຮ່ຈີມິນ, ບັນດາຜູ້ແທນເຂົ້າຮ່ວມການແລກປ່ຽນ ໄດ້ແນະນຳບັນດາບົດຮຽນປະສົບການທີ່ດີຈາກຮາກຖານຕ່າງໆ ແລະ ລ້ວນແຕ່ໃຫ້ທັດສະນະວ່າ ຕ້ອງຜັນຂະຫຍາຍການຮ່ຳຮຽນໂດຍຜ່ານວຽກງານອັນລະອຽດ ຕົວຈິງ; ຕິດແໜ້ນກັບໜ້າທີ່ການເມືອງຂອງອົງການ ກົມກອງ ທ້ອງຖິ່ນ; ເພີ່ມທະວີວຽກງານຕິດຕາມກວດກາ ກວດການຂອງຂັ້ນເທິງ ແລະ ເອົາໃຈໃສ່ການປະຢັດ, ຕ້ານການຟຸມເຟືອຍ,…
ລາຍການສະແດງ
ຂ່ຳນັບຮັບຕ້ອນວັນສ້າງຕັ້ງພັກກອມມູນິດຫວຽດນາມ - ຮູບໂດຍ: ດ່າວງວຽນ
ໃນຊ່ວງເວລາປະເທດຊາດພວມກ້າວເຂົ້າສູ່ລະດູບານໃໝ່, ງານມະໂຫລານ ແລກປ່ຽນສະແດງສິລະປະວັນນະຄະດີ “ເຊື່ອໜັ້ນໄປຕາມພັກຕະຫລອດກາລະນານ” ໄດ້ສະແດງອອກໃນການສະຫຼັບຊັບຊ້ອນລະຫວ່າງບັນຍາກາດສິລະປະກຳ ກັບການແລກປ່ຽນຄວາມຄິດເຫັນ ການສື່ຂ່າວຕາມເນື້ອໃນ ຫົວຂໍ້ໜຶ່ງທີ່ສອດຮ້ອຍຕະຫຼອດ ກ່ຽວກັບພັກ ກ່ຽວກັບປະເທດຊາດ ກ່ຽວກັບບັນດາໜ້າທີ່ ເຊິ່ງທົ່ວພັກພວມຕັ້ງໜ້າຜັນຂະຫຍາຍປະຕິບັດໃນປັດຈຸບັນ ເພື່ອໃຫ້ປະຊາຊົນທົ່ວປະເທດ “ເຊື່ອໜັ້ນໄປຕາມພັກຕະຫລອດກາລະນານ”./.
ໂດຍ ຫງວຽນດຶກ