ເພີ່ມທະວີການພົວພັນດ້ານການເງິນ ລະຫວ່າງຫວຽດນາມ - ລາວ
ວ.ກ. ອອນໄລ - ວັນທີ 05 ກຸມພາ 2013, ທີ່ນະຄອນຫຼວງຮ່າໂນ້ຍ, ສະຫາຍ ເວືອງດິ່ງເຫວ້ ລັດຖະມົນຕີກະຊວງການເງິນແຫ່ງ ສສ ຫວຽດນາມ ແລະ ສະຫາຍ ພູເພັດ ຄຳພູນວົງ ລັດຖະມົນຕີກະຊວງການເງິນແຫ່ງ ສປປ ລາວ ໄດ້ພົບປະສົນທະນາກັນ ກ່ຽວກັບສະພາບການເສດຖະກິດການເງິນສັງລວມ ຂອງສອງປະເທດ.
ທີ່ການພົບປະສົນທະນາ, ສະຫາຍລັດຖະມົນຕີທັງສອງ ໄດ້ທົບທວນຄືນບັນດາເຫດການສຳຄັນ ໃນການພົວພັນຮ່ວມມືລະຫວ່າງສອງກະຊວງການເງິນ ຫວຽດນາມ - ລາວ ໃນປີ 2012, ເຊິ່ງເປັນປີສາມັກຄີມິດຕະພາບ ຫວຽດນາມ - ລາວ, ປະກອບສ່ວນເຂົ້າໃນຜົນສຳເລັດລວມ ຂອງການພົວພັນຮ່ວມມືລະຫວ່າງສອງປະເທດ.
ແລກປ່ຽນກ່ຽວກັບການເຄື່ອນໄຫວໃນປີ 2013, ສະຫາຍລັດຖະມົນຕີ ເວືອງດິ່ງເຫວ້ ສະເໜີໃຫ້ສຸມໃສ່ໃຫ້ບຸລິມະສິດ ແກ່ການບຳລຸມກໍ່ສ້າງ ຍົກສູງຄວາມສາມາດຂອງພະນັກງານຂະແໜງການການເງິນລາວ. ພິເສດແມ່ນ ຜັນຂະຫຍາຍບັນດາໂຄງການກໍ່ສ້າງພື້ນຖານວັດຖຸໂຮງຮຽນຕ່າງໆ ຂອງກະຊວງການເງິນລາວ ໃຫ້ທັນກັບກຳນົດເວລາ ແລະ ສຳເລັດຜົນດ້ວຍຄຸນນະພາບສູງ. ພ້ອມກັນນັ້ນ ຫວຽດນາມຈະສືບຕໍ່ຊ່ວຍເຫຼືອເຄື່ອງປະກອບເຄື່ອງຈັກ ແລະ ພື້ນຖານວັດຖຸອັນຮີບດ່ວນຈຳນວນໜຶ່ງ ຕາມຄວາມຕ້ອງການຕົວຈິງຂອງຝ່າຍລາວ ແລະ ຄວາມສາມາດຕອບສະໜອງຂອງກະຊວງການເງິນຫວຽດນາມ.
ໃນປີ 2012 - ປີສາມັກຄີມິດຕະພາບຫວຽດນາມ - ລາວ, ສອງກະຊວງການເງິນໄດ້ຈັດຕັ້ງບັນດາການເຄື່ອນໄຫວຮ່ວມມືເຊັ່ນ: ເລິ່ມລົງມືປະຕິບັດໂຄງການດັດແປງ ຍົກລະດັບພື້ນຖານວັດຖຸຂອງໂຮງຮຽນວິທະຍາໄລການເງິນພາກເໜືອລາວ, ເລິ່ມລົງມືປະຕິບັດໂຄງການດັດແປງ ຍົກລະດັບພື້ນຖານວັດຖຸຂອງ ສະຖາບັນເສດຖະກິດ - ການເງິນ ດົງຄຳສ້າງ ໄລຍະ 2; ຈັດຕັ້ງການພົບປະແລກປ່ຽນຄັ້ງທີ 5 ລະຫວ່າງພະນັກງານ ຂ້າລັດຖະການການເງິນ ສອງປະເທດ ຫວຽດນາມ - ລາວ; ຈັດຕັ້ງຢ່າງສຳເລັດຜົນ ການປະຊຸມຄັ້ງທີ 9 ຄະນະຊີ້ນຳໂຄງການຮ່ວມມື ລະຫວ່າງສອງກະຊວງການເງິນ ຫວຽດນາມ ແລະ ລາວ;...
ໃນໂອກາດນີ້, ໂດຍປະຕິບັດຕາມການມອບສິດ ຂອງປະທານປະເທດແຫ່ງ ສສ ຫວຽດນາມ, ສະຫາຍລັດຖະມົນຕີກະຊວງການເງິນ ເວືອງດິ່ງເຫວ້ ໄດ້ປະດັບຫຼຽນໄຊເອກະລາດຊັ້ນສອງ ໃຫ້ສະຫາຍ ພູເພັດ ຄຳພູນວົງ ລັດຖະມົນຕີກະຊວງການເງິນແຫ່ງ ສປປ ລາວ, ແລະ ປະດັບຫຼຽນໄຊເອກະລາດຊັ້ນສາມ ໃຫ້ສະຫາຍ ສັນຕິພາບ ພົມວິຫານ ລັດຖະມົນຕີຊ່ວຍວ່າການກະຊວງການເງິນແຫ່ງ ສປປ ລາວ, ທີ່ໄດ້ມີຜົນງານດີເດັ່ນເປັນພິເສດ ໃນການປັບປຸງ ແລະ ເພີ່ມທະວີສາຍພົວພັນມິດຕະພາບອັນເປັນມູນເຊື້ອ ຄວາມສາມັກຄີພິເສດ ລະຫວ່າງສອງປະເທດຫວຽດນາມ - ລາວ.
ໃນພິທີອັນສົມກຽດນີ້ ໂດຍປະຕິບັດຕາມການມອບສິດ ຂອງລັດຖາບານແຫ່ງ ສປປ ລາວ, ສະຫາຍ ພູເພັດ ຄຳພູນວົງ ລັດຖະມົນຕີກະຊວງການເງິນແຫ່ງ ສປປ ລາວ ໄດ້ປະດັບຫຼຽນໄຊອິດສະຫຼະຊັ້ນສອງ ໃຫ້ສະຫາຍ ເວືອງດິ່ງເຫວ້ ລັດຖະມົນຕີກະຊວງການເງິນຫວຽດນາມ ແລະ ສະຫາຍ ຫງວຽນກົງງຽບ ລັດຖະມົນຕີຊ່ວຍວ່າການກະຊວງການເງິນຫວຽດນາມ./.
ແຫຼ່ງຂ່າວ: TTXVN