ເຄື່ອນໄຫວການຕ່າງປະເທດ ເນື່ອງໃນໂອກາດບຸນປີໃໝ່ປະຈຳຊາດຫວຽດນາມ ປີມະເສງ 2013
ເປັນກຽດມາຮ່ວມງານຮັບແຂກມີ ເລຂາທິການໃຫຍ່ອາຊຽນ ທ່ານເລເລືອງມິງ, ຜູ້ຕາງໜ້າກະຊວງການຕ່າງປະເທດ ອິນໂດເນເຊຍ, ເອກອັກຄະລັດຖະທູດ - ຫົວໜ້າຄະນະຜູ້ຕາງໜ້າ ບັນດາປະເທດຢູ່ອາຊຽນ, ເອກອັກຄະລັດຖະທູດ ບັນດາປະເທດອາຊຽນ ຢູ່ອິນໂດເນເຊຍ, ເອກອັກຄະລັດຖະທູດ - ຜູ້ຕາງໜ້າປະຈຳການບັນດາປະເທດຢູ່ອາຊຽນ, ເອກອັກຄະລັດຖະທູດ ບັນດາປະເທດຄູ່ສົນທະນາ ແລະ ບັນດາປະເທດອື່ນຢູ່ ອິນໂດເນເຊຍ, ຜູ້ຕາງໜ້າຄະນະທູຕານຸທູດ ແລະ ບັນດາອົງການສື່ມວນຊົນ.
ກ່າວປາໄສໃນງານຮັບແຂກ, ທ່ານເອກອັກຄະລັດຖະທູດ - ຫົວໜ້າຄະນະຜູ້ຕາງໜ້າຫວຽດນາມ ທີ່ອາຊຽນ ຫວູດັງຢຸ໊ງ ເນັ້ນວ່າ: ສະພາບການພາກພື້ນ ແລະ ໃນໂລກປີ 2012 ສືບຕໍ່ມີການຜັນປ່ຽນສັບສົນ, ອັນໄດ້ສ້າງໂອກາດໃໝ່ ພ້ອມດ້ວຍສິ່ງທ້າທາຍບໍ່ໜ້ອຍຫຼາຍຢ່າງອອກມາ ໃຫ້ອາຊຽນ ກໍ່ຄືແຕ່ລະປະເທດສະມາຊິກ. ທ່ານເອກອັກຄະລັດຖະທູດຫວູດັງຢຸ໊ງ ຢັ້ງຢືນວ່າ ໃນປີ 2013 ຫວຽດນາມຈະເສີມຂະຫຍາຍຫຼາຍກວ່າອີກ ບົດບາດຊຸກຍູ້ຄວາມມານະພະຍາຍາມລວມ ໃນການກໍ່ສ້າງປະຊາຄົມອາຊຽນໃນປີ 2015 ທີ່ອີງບົນສາມເສົາຄ້ຳຄື ປະຊາຄົມການເມືອງ - ຄວາມສະຫງົບ, ປະຊາຄົມເສດຖະກິດ ແລະ ປະຊາຄົມວັດທະນະທຳ - ສັງຄົມ, ສູ້ຊົນເພື່ອສັນຕິພາບ, ສະຖຽນລະພາບ, ການຮ່ວມມື ແລະ ຄວາມພັດທະນາຢູ່ໃນພາກພື້ນ.
ທ່ານເອກອັກຄະລັດຖະທູດ ຫວູດັງຢຸ໊ງ ໄດ້ຝາກຄຳອວຍພອນປີໃໝ່ ແລະ ຂອບອົກຂອບໃຈຢ່າງຈິງໃຈ ຕໍ່ບັນດາ ຜູ້ຕາງໜ້າປະຈຳການບັນດາປະເທດຢູ່ອາຊຽນ, ເອກອັກຄະລັດຖະທູດບັນດາປະເທດຄູ່ສົນທະນາ ແລະ ປະເທດເພື່ອນມິດ ທີ່ໄດ້ໃຫ້ການສະໜັບສະໜູນຢ່າງສຸດອົກສຸດໃຈ, ຮ່ວມມືຢ່າງຕັ້ງໜ້າກັບຫວຽດນາມ ໃນປີ 2012 ແລະ ສະແດງຄວາມປາຖະໜາຈະໄດ້ຮັກສາ ແລະ ເສີມຂະຫຍາຍຍິ່ງກວ່າອີກ ສາຍພົວພັນອັນດີງາມໃນປີ 2013. ທ່ານເອກອັກຄະລັດຖະທູດ ກໍ່ໄດ້ຂ່ຳນັບຊົມເຊີຍທ່ານເລຂາທິການໃຫຍ່ອາຊຽນ ແລະ ສະແດງຄວາມເຊື່ອໝັ້ນວ່າ ທ່ານເລເລືອງມິງ ໃນອາຍຸປະຈຳການ 5 ປີ (2013 - 2017) ຈະສຳເລັດໜ້າທີ່ອັນສຳຄັນຂອງຕົນຢ່າງດີເດັ່ນ, ປະກອບສ່ວນຊຸກຍູ້ການປະຕິບັດບັນດາຈຸດໝາຍຂອງອາຊຽນ, ກໍ່ຄືເພີ່ມທະວີກຳລັງຄວາມສາມາດ ແລະ ປະກອບສ່ວນຢ່າງມີປະສິດທິຜົນເຂົ້າໃນການເຄື່ອນໄຫວຂອງຄະນະເລຂາອາຊຽນ.
ສ່ວນຕົນເອງ, ທ່ານເລຂາທິການໃຫຍ່ເລເລືອງມິງ ໄດ້ຕີລາຄາສູງຕໍ່ຄວາມຕັ້ງໜ້າເຂົ້າຮ່ວມປະກອບສ່ວນ ຂອງຄະນະຜູ້ຕາງໜ້າປະຈຳການຫວຽດນາມ ຢູ່ອາຊຽນ ໃນການເຄື່ອນໄຫວຕ່າງໆຂອງ ກຳມາທິການບັນດາຜູ້ຕາງໜ້າປະຈຳການຢູ່ອາຊຽນ (CPR), ແລະ ປາຖະໜາວ່າ ຄະນະຜູ້ຕາງໜ້າບັນດາປະເທດຢູ່ອາຊຽນ ຈະສືບຕໍ່ຮ່ວມມື ແລະ ຊ່ວຍໜູນຢ່າງຕັ້ງໜ້າໃຫ້ ຄະນະເລຂາທິການອາຊຽນ ຕອບສະໜອງຄວາມຮຽກຮ້ອງຕ້ອງການຊຸກຍູ້ ແລະ ປະຕິບັດສຳເລັດບັນດາຈຸດໝາຍກໍ່ສ້າງປະຊາຄົມອາຊຽນ./.
ຕາມຂ່າວ: TTXVN