ວ.ກ. ອອນໄລ - ຕອນບ່າຍວັນທີ 21 ກຸມພາ 2013, ຢູ່ທີ່ສຳນັກງານກະຊວງຕຳຫຼວດຫວຽດນາມ, ທ່ານພົນເອກ ເຈິ່ນດ້າຍກວາງ, ກຳມະການກົມກາງເມືອງ, ລັດຖະມົນຕີວ່າການກະຊວງຕຳຫຼວດ ແຫ່ງ ສສ ຫວຽດນາມ ໄດ້ເປັນເຈົ້າພາບພິທີຕ້ອນຮັບຢ່າງເປັນທາງການ ຄະນະຜູ້ແທນຂັ້ນສູງ ກະຊວງປ້ອງກັນຄວາມສະຫງົບ ແຫ່ງສາທາລະນະລັດ ປະຊາທິປະໄຕ ປະຊາຊົນລາວ ນຳໂດຍທ່ານ ດຣ. ທອງບັນ ແສງອາພອນ, ເລຂາທິການສູນກາງ ພັກປະຊາຊົນປະຕິວັດລາວ, ລັດຖະມົນຕີວ່າການກະຊວງ ມາຢ້ຽມຢາມ ແລະ ເຮັດວຽກກັບກະຊວງຕຳຫຼວງຫວຽດນາມ.
ທ່ານ ເຈິ່ນດ້າຍກວາງ ລັດຖະມົນຕີກະຊວງຕຳຫຼວດຫວຽດນາມ ແລະ ທ່ານ ທອງບັນ ແສງອາພອນ ລັດຖະມົນຕີກະຊວງປ້ອງກັນຄວາມສະຫງົບລາວ ກວດແຖວກອງກຽດຕິຍົດຕຳຫຼວດປະຊາຊົນຫວຽດນາມ
ພາຍຫຼັງພິທີຕ້ອນຮັບ, ສອງຝ່າຍກໍ່ໄດ້ດຳເນີນການພົບປະປຶກສາຫາລື. ທ່ານພົນເອກ ເຈິ່ນດ້າຍກວາງ ສະແດງຄວາມເຊື່ອໝັ້ນວ່າ ການມາຢ້ຽມຢາມຂອງຄະນະຜູ້ແທນຈະປະກອບສ່ວນສືບຕໍ່ອະນຸລັກຮັກສາ ແລະ ເສີມຂະຫຍາຍສາຍພົວພັນມິດຕະພາບພິເສດ ລະຫວ່າງສອງພັກ, ສອງລັດ ແລະ ປະຊາຊົນສອງປະເທດອ້າຍນ້ອງ ຫວຽດນາມ - ລາວ.
ຕາງໜ້າການນຳກະຊວງຕຳຫຼວດ, ທ່ານລັດຖະມົນຕີ ເຈິ່ນດ້າຍກວາງ ໄດ້ແຈ້ງຂ່າວລາຍລະອຽດຕົ້ນຕໍກ່ຽວກັບວຽກງານປົກປັກຮັກສາລະບຽບຄວາງສະຫງົບ ຂອງກຳລັງຕຳຫຼວດປະຊາຊົນ ໃນບຸນປີໃໝ່ ປີມະເສງທີ່ຜ່ານມາ; ແຈ້ງໃຫ້ຄະນະຜູ້ແທນຊາບ ກ່ຽວກັບບັນດາຈຸດໜັກໃຈກາງຂອງວຽກງານຮັບປະກັນລະບຽບຄວາມສະຫງົບ ຂອງກະຊວງຕຳຫຼວດໃນເວລາທີ່ຈະມາເຖິງ.
ເມື່ອເວົ້າເຖິງໝາກຜົນການຮ່ວມມື ລະຫວ່າງກະຊວງຕຳຫຼວດຫວຽດນາມ ກັບກະຊວງປ້ອງກັນຄວາມສະຫງົບລາວ, ທ່ານລັດຖະມົນຕີ ເຈິ່ນດ້າຍກວາງ ໄດ້ເນັ້ນວ່າ ໃນທັນທີທັນໃດພາຍຫຼັງທີ່ສອງກະຊວງລົງນາມໃນແຜນການຮ່ວມມືປີ 2013 ກະຊວງຕຳຫຼວດຫວຽດນາມກໍ່ໄດ້ຊີ້ນຳບັນດາກົມກອງວິຊາການ, ອົງການຈັດຕັ້ງຕຳຫຼວດທ້ອງຖິ່ນ ກໍ່ສ້າງແຜນການ ແລະ ຜັນຂະຫຍາຍການປະຕິບັດບັນດາເນື້ອໃນທີ່ສອງຝ່າຍໄດ້ເປັນເອກະພາບ ຢ່າງເຂັ້ມງວດ.
ໃນການພົບປະປຶກສາຫາລື, ສອງຝ່າຍໄດ້ພິຈາລະນາແລກປ່ຽນຄວາມຄິດເຫັນກ່ຽວກັບສະພາບການໂລກ ແລະ ພາກພື້ນ ແລະ ບັນດາບັນຫາທີ່ສອງຝ່າຍຕ່າງກໍ່ສົນໃຈ, ທ່ານລັດຖະມົນຕີ ເຈິ່ນດ້າຍກວາງ ແລະ ທ່ານລັດຖະມົນຕີວ່າການກະຊວງປ້ອງກັນຄວາມສະຫງົບລາວ ທອງບັນ ແສງອາພອນ ໄດ້ເປັນເອກະພາບກັນວ່າ ໃນເວລາທີ່ຈະມາເຖິງ ສອງກະຊວງຕ້ອງສືບຕໍ່ຍູ້ແຮງການຮ່ວມມື ແນໃສ່ຮັບປະກັນຄວາມສະຫງົບແຫ່ງຊາດ ຄວາມເປັນລະບຽບປອດໄພສັງຄົມຂອງສອງຊາດ, ປະກອບສ່ວນເພີ່ມພູນຄູນສ້າງສາຍພົວພັນອັນເປັນມູນເຊື້ອ ຫວຽດນາມ - ລາວ ໃຫ້ຂະຫຍາຍຕົວຂຽວສົດງົດງາມ ແລະ ໝັ້ນຄົງຂະໜົງແກ່ນຕະຫຼອດການ.
ໃນໂອກາດນີ້, ລັດແຫ່ງ ສປປ ລາວ ໄດ້ປະດັບຫຼຽນໄຊມິດຕະພາບ ຫຼຽນໄຊແຮງງານ ຫຼຽນໄຊອິດສະຫຼະຊັ້ນຕ່າງໆ 86 ຫຼຽນ ໃຫ້ບັນດານາຍພົນ ນາຍແລະພົນຕຳຫຼວດ ທີ່ເຮັດວຽກຢູ່ບັນດາກົມກອງ ຫົວໜ່ວຍສັງກັດກະຊວງຕຳຫຼວດຫວຽດນາມ ທີ່ໄດ້ມີການປະກອບສ່ວນອັນສຳຄັນ ເຂົ້າໃນວຽກງານປະສານສົມທົບກັນປົກປັກຮັກສາ ກອງປະຊຸມ ອາເຊມ 9 ທີ່ຫາກໍ່ໄດ້ດຳເນີນຢູ່ລາວ ກໍ່ຄືໃນພາລະກິດການປ້ອງກັນຄວາງສະຫງົບ, ກໍ່ສ້າງ ແລະ ພັດທະນາການພົວພັນຮ່ວມມືລະຫວ່າງກຳລັງປ້ອງກັນຄວາງສະຫງົບຂອງສອງປະເທດ ໃນເວລາທີ່ຜ່ານມາ./.
ໂດຍນັກຂ່າວ
