ກອງທະຫານຫວຽດນາມ ຈະເຂົ້າຮ່ວມກຳລັງຮັກສາສັນຕິພາບ
ວ.ກ. ອອນໄລ - ຕອນບ່າຍວັນທີ 25 ກຸມພາ 2013, ຢູ່ທີ່ນະຄອນຫຼວງຮ່າໂນ້ຍ, ທ່ານພົນໂທ ຫງວຽນຈີວິ້ງ, ລັດຖະມົນຕີຊ່ວຍວ່າການກະຊວງປ້ອງກັນປະເທດຫວຽດນາມ ໄດ້ຕ້ອນຮັບທ່ານ ແອັດມົນ ມູເລດ (Edmond Mulet), ຜູ້ຊ່ວຍວຽກເລຂາທິການໃຫຍ່ ສະຫະປະຊາຊາດ, ຮັບຜິດຊອບອົງການຮັກສາສັນຕິພາບແຫ່ງ ສະຫະປະຊາຊາດ.
ຢູ່ທີ່ການຕ້ອນຮັບ, ທ່ານ ແອັດມົນ ມູເລດ ໄດ້ຂອບອົກຂອບໃຈຕໍ່ທ່ານພົນໂທ ຫງວຽນຈີວິ້ງ ທີ່ໄດ້ສະຫຼະເວລາອັນລ້ຳຄ່າເພື່ອຕ້ອນຮັບຄະນະ ແລະ ແຈ້ງຂ່າວກ່ຽວກັບໝາກຜົນການເຮັດວຽກກັບບັນດາອົງການພາລະບົດບາດ ຂອງກະຊວງປ້ອງກັນປະເທດຫວຽດນາມ.
ທ່ານພົນໂທ ຫງວຽນຈີວິ້ງ ເນັ້ນວ່າ: ການຊ່ວຍເຫຼືອ, ປະກອບສ່ວນ, ແບ່ງປັນບົດຮຽນປະສົບການຂອງອົງການຮັກສາສັນຕິພາບແຫ່ງ ສະຫະປະຊາຊາດ ແລະ ບັນດາຄວາມຄິດເຫັນປະກອບສ່ວນຂອງທ່ານ ແອັດມົນ ມູເລດ ໃນການມາຢ້ຽມຢາມ ເຮັດວຽກຄັ້ງນີ້ ຈະຊ່ວຍໃຫ້ກອງທັບປະຊາຊົນຫວຽດນາມ ດຳເນີນເປັນຢ່າງດີວຽກງານກະກຽມບາງເນື້ອໃນ ເພື່ອເຂົ້າຮ່ວມກຳລັງຮັກສາສັນຕິພາບຂອງສະຫະປະຊາຊາດ ໃນຕົ້ນປີ 2014.
ທ່ານພົນໂທ ຫງວຽນຈີວິ້ງ ໄດ້ແຈ້ງຂ່າວກ່ຽວກັບວຽກງານກໍ່ສ້າງນາຍທະຫານວິຊາສະເພາະ ດ້ານເສນາທິການ, ເສນາຮັກ, ຊ່າງແສງ ແລະ ນາຍທະຫານເຮັດໜ້າທີ່ສັງເກດການຢູ່ທີ່ສະຫະປະຊາຊາດ.
ທ່ານ ແອັດມົນ ມູເລດ ໃຫ້ຮູ້ວ່າ ທາງຝ່າຍອົງການຮັກສາສັນຕິພາບແຫ່ງ ສະຫະປະຊາຊາດ ຈະມີແຜນການ ປຶກສາຫາລືຢ່າງລະອຽດກັບ ກອງທັບປະຊາຊົນຫວຽດນາມ, ພ້ອມກັນນັ້ນກໍ່ສ້າງເງື່ອນໄຂອັນສະດວກດີໃຫ້ຝ່າຍຫວຽດນາມ ແຕ່ງຕັ້ງຄະນະຜູ້ແທນໄປຢ້ຽມຢາມໂດຍກົງ ຢູ່ຄະນະການທະຫານໜຶ່ງ ທີ່ກຳລັງປະຕິບັດໜ້າທີ່ຮັກສາສັນຕິພາບຂອງສະຫະປະຊາຊາດ./.
ແຫຼ່ງຂ່າວ: TTXVN