ວັນໝຽວ - ກວັກຕື໋ຢ໊າມ, ສັນຍາລັກແຫ່ງຄວາມຍືນຍົງ ຂອງຍອດແຍແຫ່ງວັດທະນະທຳ, ການສຶກສາຫວຽດນາມ
ສະຫາຍຮອງນາຍົກລັດຖະມົນຕີຫງວຽນທ້ຽນເຍິນ ມອບໃບຮັບຮອງວັດຖຸບູຮານແຫ່ງຊາດພິເສດໃຫ້ແກ່ ວັນໝຽວ-ກວັກຕື໋ຢ໊າມ
ໃຫ້ກຽດເຂົ້າຮ່ວມພິທີຕ້ອນມີສະຫາຍ ຟ້າມກວາງຫງີ້ ກຳມະການກົມການເມືອງ ເລຂາຄະນະພັກນະຄອນຮ່າໂນ້ຍ, ສະຫາຍຫງວຽນທ້ຽນເຍິນ ກຳມະການສູນກາງພັກ ຮອງນາຍົກລັດຖະມົນຕີ, ການນຳບັນດາກະຊວງ ຂະແໜງການ, ຫົວໜ້າຫ້ອງການຜູ້ຕາງໜ້າອົງການສຶກສາ ວິທະຍາສາດ ແລະ ວັດທະນະທຳຂອງສະຫະປະຊາຊາດ (UNESCO) ປະຈຳຫວຽດນາມ ທ່ານນາງ ກາເທີຣີນ ມູນເລີ ມາຣີນ, ພ້ອມດ້ວຍບາງທ່ານເອກອັກຄະລັດຖະທູດ ທີ່ປຶກສາສະຖານທູດ, ຜູ້ຕາງໜ້າບັນດາອົງການຈັດຕັ້ງສາກົນ ແລະ ນັກວິທະຍາສາດ ນັກຄົ້ນຄວ້າປະຫວັດສາດຫຼາຍທ່ານ,...
ຢູ່ທີ່ພິທີ, ສະຫາຍຮອງນາຍົກລັດຖະມົນຕີ ຫງວຽນທ້ຽນເຍິນ ເນັ້ນວ່າ ການສຶກສາເປັນໜຶ່ງໃນບັນດາເສົາຄ້ຳທີ່ສຳຄັນຂອງແຕ່ລະປະເທດ. ວັນໝຽວ-ກວັກຕື໋ຢ໊າມ ເປັນສັນຍາລັກແຫ່ງຄວາມຍືນຍົງ ໝັ້ນຄົງຖາວອນຂອງຍອດແຍແຫ່ງວັດທະນະທຳ, ການສຶກສາຫວຽດນາມ.
ການທີ່ວັດຖຸບູຮານແຫ່ງຊາດພິເສດວັນໝຽວ-ກວັກຕື໋ຢ໊າມ ແລະ ສິລາຈາລຶກຈໍຫງວນ 82 ແຜ່ນ ຢູ່ວັນໝຽວ-ກວັກຕື໋ຢ໊າມ ໄດ້ຮັບການຮັບຮອງຍ້ອງຍໍຊົມເຊີຍຈາກໂລກນັ້ນ ມັນເປັນກຽດອັນສະຫງ່າ ແລະ ກໍ່ເປັນໜ້າທີ່ຮັບຜິດຊອບຂອງປະຊາຊົນນະຄອນຫຼວງຮ່າໂນ້ຍເວົ້າສະເພາະ ແລະ ຂອງປະຊາຊົນທົ່ວປະເທດເວົ້າລວມ. ສະຫາຍຮອງນາຍົກລັດຖະມົນຕີຫງວຽນທ້ຽນເຍິນ ສະເໜີໃຫ້ການນຳນະຄອນຫຼວງ, ຂະແໜງການວັດທະນະທຳ ການສຶກສານະຄອນຫຼວງ, ແຕ່ລະຄອບຄົວ ແລະ ປະຊາຊົນນະຄອນຫຼວງແຕ່ລະຄົນ ຕ້ອງມີຫົວຄິດປະດິດສ້າງ ແລະ ວິທີການສະເພາະຂອງຕົນ ເພື່ອເຮັດໃຫ້ລູກຫຼານ ແລະ ຮຸ້ນຊາວໜຸ່ມມີຄວາມເຂົ້າໃຈຢ່າງເລິກເຊິ່ງກວ່າອີກ ເອກອ້າງທະນົງໃຈກວ່າອີກ ກ່ຽວກັບວັນໝຽວ-ກວັກຕື໋ຢ໊າມ, ກ່ຽວກັບມູນເຊື້ອຂະຫຍັນໝັ້ນພຽນໃນການຮຽນເພື່ອປົກປັກຮັກສາປະເທດຊາດ ແລະ ສ້າງສາພັດທະນາປະເທດໃຫ້ນັບມື້ນັບຮັ່ງມີສວຍງາມ.
ວັນໝຽວ-ກວັກຕື໋ຢ໊າມ ເປັນໜຶ່ງໃນກວ່າ 4.000 ວັດຖຸບູຮານຂອງນະຄອນຫຼວງຮ່າໂນ້ຍ. ນີ້ແມ່ນບໍລິເວນວັດຖຸບູຮານພິເສດຂອງຮ່າໂນ້ຍ, ບ່ອນເຕົ້າໂຮມລວມສູນຄຸນຄ່າມໍລະດົກວັດທະນະທຳມີຮູບ ແລະ ວັດທະນະທຳອະຮູບ, ປະຫວັດສາດ ແລະ ສິນລະປະກຳ, ວິທະຍາສາດ ແລະ ການສຶກສາ, ຂໍ້ມູນຂ່າວສານຄວາມລະລຶກ, ຄວາມເອກອ້າງທະນົງໃຈ ຂອງຊາວນະຄອນຫຼວງຮ່າໂນ້ຍ ແລະ ຂອງຊາດຫວຽດນາມ.
ວັນໝຽວ-ກວັກຕື໋ຢ໊າມ ຍາມໃດກໍ່ເປັນສະຖານທີ່ສຳລັບການມາຢ້ຽມເບິ່ງ ທັດສະນະສຶກສາ ຄົ້ນຄວ້າຮ່ຳຮຽນຫາຄວາມຮູ້ ຂອງປະຊາຊົນພາຍໃນປະເທດ ນັກທ່ອງທ່ຽວຕ່າງປະເທດ ແລະ ຂອງຜູ້ນຳຫຼາຍປະເທດໃນໂລກ. ຈຳນວນແຂກທີ່ມາຢ້ຽມເບິ່ງວັນໝຽວ-ກວັກຕື໋ຢ໊າມ ໄດ້ເພີ່ມຂຶ້ນຈາກ 300.000 ທ່ຽວຄົນຕໍ່ປີ ຂຶ້ນເປັນ 1,5 ລ້ານກວ່າທ່ຽວຄົນຕໍ່ປີ./.
ແຫຼ່ງຂ່າວ: chinhphu.vn
