ຫວຽດນາມລົບລ້າງຄວາມຫ່າງທາງດ້ານເພດ ໄວກວ່າໝູ່ໃນພາກພື້ນ
ວ.ກ.ອອນໄລ - ດ້ວຍຄວາມມານະພະຍາຍາມປະຕິບັດບັນດາໂຄງການ ແຜນການຊຸກຍູ້ຄວາມສະເໝີພາບທາງດ້ານເພດ ແລະ ຄວາມກ້າວໜ້າຂອງແມ່ຍິງ, ຫວຽດນາມຖືກເພື່ອນມິດສາກົນຮັບຮອງວ່າ ເປັນປະເທດລົບລ້າງຄວາມຫ່າງທາງດ້ານເພດໄວກວ່າໝູ່ ຢູ່ພາກພື້ນອາຊີຕາເວັນອອກສຽງໃຕ້.
ນັ້ນແມ່ນຂ່າວດີກ່ຽວກັບວຽກງານປະຕິບັດຄວາມສະເໝີພາບທາງດ້ານເພດ ເຊິ່ງທ່ານນາງຟ້າມທີ້ຫາຍຈ່ວຽນ ລັດທະມົນຕີວ່າການກະຊວງແຮງງານ-ນັກຮົບຜູ້ເສຍອົງຄະແລະສັງຄົມ ລາຍງານຕໍ່ທີ່ເວທີສົນທະນານະໂຍບາຍກ່ຽວກັບຄວາມສະເໝີພາບທາງດ້ານເພດ ໂດຍແມ່ນໂຄງການພັດທະນາແຫ່ງສະຫະປະຊາຊາດ (UNDP) ປະຈຳຫວຽດນາມ ແລະ ກະຊວງແຮງງານ-ນັກຮົບຜູ້ເສຍອົງຄະແລະສັງຄົມ ຈັດຕັ້ງວັນທີ 28 ກຸມພາ 2013.
ດັດຊະນີຄວາມບໍ່ສະເໝີພາບທາງດ້ານເພດຂອງຫວຽດນາມຢູ່ລຳດັບທີ 3 ໃນພາກພື້ນອາຊຽນ ຖັດຈາກສິງຄະໂປ, ມາເລເຊຍ ແລະ ຢູ່ລຳດັບທີ 48 ໃນຈຳນວນ 187 ປະເທດໃນໂລກ.
ທ່ານນາງລັດຖະມົນຕີ ຟ້າມທີ້ຫາຍຈ່ວຽນ ໄດ້ອ້າງອີງໝາກຜົນຂອງການສຳຫຼວດໜຶ່ງເພື່ອໃຫ້ເຫັນວ່າ ການປະຕິບັດຄວາມສະເໝີພາບທາງດ້ານເພດຢູ່ຫວຽດນາມ ໄດ້ປະກອບສ່ວນຍົກສູງບົດບາດຖານະນອງແມ່ຍິງ. ອັດຕາສ່ວນແມ່ຍິງຢູ່ໃນສະພາແຫ່ງຊາດບັນລຸ 24,4%, ຢູ່ໃນລຳດັບທີ 43/141 ປະເທດໃນໂລກ ແລະ ຢູ່ລຳດັບທີ 2 ໃນ 8 ປະເທດອາຊຽນທີ່ມີລັດຖະສາພາ, ສະພາແຫ່ງຊາດ. 40% ກະຊວງ, ອົງການທຽບເທົ່າກະຊວງ, ອົງການຂຶ້ນກັບລັດຖະບານ ມີການນຳຫຼັກແຫຼ່ງເປັນແມ່ຍິງ. 24/63 ແຂວງ, ນະຄອນຂຶ້ນກັບສູນກາງ ມີປະທານ ຫຼືຮອງປະທານຄະນະກຳມະການປະຊາຊົນເປັນແມ່ຍິງ. ເພດຍິງເປັນເຈົ້າຂອງວິສາຫະກິດກວນກວ່າ 20%.
ດ້ານອື່ນອີກ, ປັດຈຸບັນນີ້ ອັດຕາສ່ວນເດັກຍີງຢູ່ເຂດຫ່າງໄກສອກຫຼີກ ເຂດຊົນເຜົ່າ ໄປໂຮງຮຽນໄດ້ບັນລຸ 80%. ນັກສຶດສາຍິງຢູ່ມະຫາວິທະຍາໄລຕ່າງໆ ກວມເຖິງ 61,6%, ປະລິນຍາໂທຍິງກວມ 30,5%. ປີ 2012, ໃນຈຳນວນ 1,5 ລ້ານກວ່າຄົນທີໄດ້ຮັບວຽກເຮັດງານທຳໃໝ່ນັ້ນ ແມ່ຍິງກວມເຖິງ 48%.
ເຖິງວ່າໄດ້ມີຜົນສຳເລັດຕ່າງໆໃນການຮັບປະກັນຄວາມສະເໝີພາບທາງດ້ານເພດກໍ່ຕາມ ແຕ່ບັນດາຜູ້ຊ່ຽວຊານທີ່ມາຮ່ວນເວທີສົນທະນາກໍ່ໄດ້ໃຫ້ການສັງເກດວ່າ ໄລຍະຫ່າງທາງດ້ານເພດຢູ່ຫວຽດນາມກໍຍັງມີຢູ່ໃນທຸກໆຂົງເຂດຂອງຊີວິດສັງຄົມ ແລະ ຢູ່ທຸກຂັ້ນ ທຸກຂະແໜງການ. ຄວາມຮັບຮູ້ກ່ຽວກັບບົດບາດຂອງແມ່ຍິງ ແລະ ຄວາມສະເໝີພາບທາງດ້ານເພດ ຍັງຖືກຈຳກັດ. ຢູ່ໃນຫຼາຍທ້ອງຖິ່ນ, ກະໂຕແມ່ຍິງເອງກໍ່ຍັງບໍ່ທັນມີຄວາມຮູ້ກ່ຽວກັບບັນດານະໂຍບາຍ ຫຼືບັນດາຂໍ້ມາດຕາກົດໝາຍທີ່ຮັບປະກັນສິດຜົນປະໂຫຍດຂອງເຂົາເຈົ້າ.
ເພາະສະນັ້ນ, ບັນດາຜູ້ຊ່ຽວຊານກ່ຽວກັບຄວາມສະເໝີພາບທາງດ້ານເພດໄດ້ສະເໜີແນະໃຫ້ຫວຽດນາມ ຄວນຕ້ອງເພີ່ມທະວີການເກັບກຳຂໍ້ມູນຂ່າວສານກ່ຽວກັບສາເຫດ ຜົນຕາມມາ ຂອງບັນດາຮູບການຈຳແນກເພດ, ຮູບການໃຊ້ຄວາມຮຸນແຮງຕໍ່ແມ່ຍິງ ເດັກຍິງ, ແລະສົມທົບການໃຊ້ຂໍ້ມູນກ່ຽວກັບເພດ ແລະ ໄວອາຍຸ ເພື່ອສາມາດສ້າງ ຜັນຂະຫຍາຍປະຄິບັດບັນດາກົດໝາຍ ນະໂຍບາຍ ແລະ ມາດຕະການກີດກັ້ນ ແລະ ລົບລ້າງຄວາມບໍ່ສະເໝີພາບທາງດ້ານເພດ ຢ່າງສອດຄ່ອງກັບພາກຕົວຈິງ.
ທ່ານນາງ ປຣະຕິພາ ເມທາ (Pratibha Mehta) ຜູ້ປະສານງານປະຈຳການຂອງ UNDP ຢູ່ຫວຽດນາມກໍ່ເນັ້ນວ່າ ການໃຊ້ຄວາມຮຸນແຮງຕໍ່ແມ່ຍິງ ໄດ້ກໍ່ໃຫ້ເກີດຄວາມເສຍຫາຍຢ່າງໃຫຍ່ຫຼວງທາງດ້ານເສດຖະກິດ. ຢູ່ຫວຽດນາມ, ຕາມກິດຈະການຄົ້ນຄວ້າໜຶ່ງຂອງສະຫະປະຊາຊາດ, ຜົນກະທົບເສດຖະກິດຂອງຄວາມຮຸນແຮງພາຍໃນຄອບຄົວພາໃຫ້ສະມັດຕະພາບຂອງງານຫລຸດຜ່ອນລົງ, ຄາດຄະເນວ່າຄວາມເສຍຫາຍທາງດ້ານເສດຖະກິດທຽບເທົ່າກັບ 1,78% GDP ປີ 2010. ເພາະສະນັ້ນ, ຫວຽດນາມຕ້ອງສືບຕໍ່ກໍ່ສ້າງກົດໝາຍ ແລະ ນະໂຍບາຍແນໃສ່ຊຸກຍູ້ການປະຕິບັດຄວາມສະເໝີພາບທາງດ້ານເພດ./.
ແຫຼ່ງຂ່າວ: TTXVN