ວ.ກ.ອອນໄລ - ນາຍົກລັດຖະມົນຕີ ຫງວຽນເຕິນຢູ໊ງ ຫາກໍ່ອະນຸມັດຜ່ານ ແຜນການຈັດວາງໂຄງປະກອບເສດຖະກິດຄືນໃໝ່ ຕິດແໜ້ນກັບການຫັນປ່ຽນຕົວແບບເຕີບໂຕເສດຖະກິດ ຕາມທິດຍົກສູງຄຸນນະພາບ ປະສິດທິຜົນ ແລະ ຄວາມສາມາດແກ່ງແຍ້ງ ໃນໄລຍະ 2013 - 2020 ເຊິ່ງໃນນັ້ນເຕົ້າໂຮມລວມສູນໃສ່ການຈັດວາງຄືນໃໝ່ ໂຄງປະກອບການລົງທຶນສ່ວນລວມ ໂຄງປະກອບບັນດາການຈັດຕັ້ງສິນເຊື່ອ ໂຄງປະກອບບັນດາກຸ່ມເສດຖະກິດ ແລະ ບໍລິສັດໃຫຍ່ແຫ່ງລັດ.
ພາບປະກອບ - ຕາມແຫຼ່ງ: internet
ປະຕິບັດນະໂຍບາຍເງິນຕາຢ່າງຮອບຄອບ ມີປະສິດທິຜົນ
ກ່ຽວກັບທິດທາງຈັດວາງໂຄງປະກອບຂົງເຂດຕົ້ນຕໍຈຳນວນໜຶ່ງຄືນໃໝ່, ຂໍ້ຕົກລົງຂອງນາຍົກລັດຖະມົນຕີໄດ້ລະບຸໄວ້ວ່າ ຮັກສາສິ່ງແວດລ້ອມເສດຖະກິດມະຫາພາກອັນສະດວກດີ ມີສະຖຽນລະພາບ ເຊິ່ງໃນນັ້ນປະຕິບັດນະໂຍບາຍເງິນຕາຢ່າງຮອບຄອບ ມີປະສິດທິຜົນ; ນຳໃຊ້ບັນດາເຄື່ອງມືຂອງນະໂຍບາຍເງິນຕາຢ່າງໄຫວພິບ ມີປະສິດທິຜົນ; ເຊື່ອມໂຍງຢ່າງແໜ້ນແຟ້ນ ຄົບຊຸດກັບນະໂຍບາຍງົບປະມານ ແນໃສ່ປະຕິບັດຈຸດໝາຍຈຳກັດໄພເງິນເຟີ້, ຮັກສາເສດຖະກິດມະຫາພາກໃຫ້ໝັ້ນຖ່ຽງ ແລະ ຮັບປະກັນການເຕີບໂຕເສດຖະກິດຢ່າງເໝາະສົມ ສອດຄ່ອງກັບຈຸດພິເສດ ເງື່ອນໄຂເສດຖະກິດ-ສັງຄົມຂອງປະເທດໃນແຕ່ລະໄລຍະ.
ຄຽງຂ້າງນັ້ນ, ປະຕິບັດນະໂຍບາຍງົບປະມານຢ່າງແໜ້ນແຟ້ນ ມີປະສິດທິຜົນ ປະຢັດຢ່າງເຖິງຖອງ. ຍູ້ແຮງການຂາອອກ, ກວດກາຢ່າງເຄັ່ງຄັດຕໍ່ບັນດາປະເພບສິນຄ້າຂາເຂົ້າທີ່ບໍ່ໄດ້ຮັບການສົ່ງເສີມ ບັນດາປະເພດສິນຄ້າທີ່ຜະລິດຢູ່ພາຍໃນປະເທດໄດ້ແລ້ວ. ຍູ້ແຮງການພັດທະນາອຸດສາຫະກຳສະໜັບສະໜູນ, ອຸດສາຫະກຳຜະລິດສິນຄ້າໃຊ້ສອຍພາຍໃນປະເທດ.
ພ້ອມກັນນັ້ນ, ເພີ່ມທະວີການກວດກາລາຄາ ຕະຫຼາດ; ຮັບປະກັນຄວາມສົມດຸນລະຫວ່າງການສະໜອງ-ຄວາມຕ້ອງການ ກ່ຽວກັບບັນດາປະເພດສິນຄ້າທີ່ຈຳເປັນຕ້ອງການຍິ່ງ. ປະຕິບັດຢ່າງສະເໝີຕົ້ນສະເໝີປາຍແຜນນະໂຍບາຍຄຸ້ມຄອງລາຄາຕາມກົນໄກຕະຫຼາດມີການດັດສົມຂອງລັດ ຕໍ່ກັບໄຟຟ້າ ຖ່ານຫີນ ນ້ຳມັນເຊື້ອໄຟ ການບໍລິການສ່ວນລວມ ຕາມລຳດັບດຳເນີນທີ່ເໝາະສົມ.
ປ່ຽນແປງໃໝ່ກົນໄກຈັດແບ່ງ ແລະ ຄຸ້ມຄອງການນຳໃຊ້ທຶນ
ກ່ຽວກັບການຈັດວາງໂຄງປະກອບການລົງທຶນຄືນໃໝ່, ຈຸດໜັກແມ່ນການລົງທອນສ່ວນລວມ, ຈະລະດົມຢ່າງສົມເຫດສົມຜົນບັນດາແຫຼ່ງກຳລັງ ໃຫ້ແກ່ການລົງທຶນພັດທະນາ, ຮັບປະກັນລວມຍອດເງິນລົງທຶນສັງຄົມ ໄດ້ປະມານ 30 - 35% GDP.
ຮັກສາອັດຕາສ່ວນການລົງທຶນຂອງລັດຢ່າງສົມເຫດສົມຜົນ, ປະມານ 35 - 40% ລວມຍອດການລົງທຶນສັງຄົມທັງໝົດ; ໃຊ້ປະມານ 20 - 25% ຂອງລວມຍອດຄ່າໃຊ້ຈ່າຍງົບປະມານ ເພື່ອລົງທຶນໃຫ້ແກ່ການພັດທະນາ. ປ່ຽນແປງໃໝ່ກົນໄກຈັດແບ່ງ ແລະ ຄຸ້ມຄອງການນຳໃຊ້ແຫຼ່ງທຶນ, ກຳຈັດຜ່ານຜ່າສະພາບການລົງທຶນຢ່າງກະແຈກກະຈ່າຍ ແລະ ຟຸມເຟືອຍ.
ເປີດກວ້າງຢ່າງສຸດຂີດ ຂອບເຂດ ແລະ ໂອກາດ ໃຫ້ແກ່ການລົງທຶນຂອງເອກະຊົນ, ເປັນຕັ້ນແມ່ນເອກະຊົນພາຍໃນປະເທດ. ສົ່ງເສີມ ແລະ ສ້າງເງື່ອນໄຂອຳນວຍຄວາມສະດວກໃຫ້ເອກະຊົນລົງທຶນເຂົ້າໃນຂົງເຂດພັດທະນາ ໂຄງສ້າງພື້ນຖານ, ບັນດາຂະແໜງການ ບັນດາຜະລິດຕະພັນທີ່ມີທ່າດີ, ແລະບັນດາເຂດເສດຖະກິດທີ່ເປັນກຳລັງໝູນ.
ສຸມກຳລັງແກ້ໄຂໜີ້ສິນເຮິຮ້າຍ
ກ່ຽວກັບການຈັດວາງໂຄງປະກອບລະບົບການເງິນ-ທະນາຄານ, ຈຸດໜັກແມ່ນບັນດາການຈັດຕັ້ງສິນເຊື່ອ, ໃນໄລຍະ 2013 - 2015, ຈະສຸມໃສ່ປັບປຸງສະພາບການການເງິນຂອງບັນດາການຈັດຕັ້ງສິນເຊື່ອໃຫ້ແຂງແຮງສົດໃສ, ກ່ອນອື່ນໝົດ ສຸມໃສ່ແກ້ໄຂໜີ້ສິນເຮິຮ້າຍຂອງທັງລະບົບການຈັດຕັ້ງສິນເຊື່ອ ແລະ ຂອງແຕ່ລະອົງການຈັດຕັ້ງສິນເຊື່ອ, ສຸມໃສ່ຂະຫຍາຍບັນດາການເຄື່ອນໄຫວຕົ້ນຕໍ, ຮັບປະກັນຄວາມສາມາດຊຳລະສະສາງ, ການຈ່າຍເງິນ ແລະ ພັດທະນາຢ່າງໝັ້ນຄົງ ຍືນຍົງ, ສຸມໃສ່ແກ້ໄຂສະພາບການກຳມະສິດໄຂວ່ກັນ ແລະ ເພີ່ມທະວີລັກສະນະຈະແຈ້ງໂປ່ງໃສໃນການເຄື່ອນໄຫວຂອງບັນດາການຈັດຕັ້ງສິນເຊື່ອ.
ຄຽງຂ້ານນັ້ນ, ຈັດວາງໂຄງປະກອບລະບົບບັນດາການຈັດຕັ້ງສິນເຊື່ອຄືນໃໝ່ ຢ່າງພື້ນຖານ ເຖິງຖອງ ແລະ ຮອບດ້ານ ເພື່ອເຖິງປີ 2020 ສ້າງຕັ້ງໄດ້ລະບົບບັນດາການຈັດຕັ້ງສິນເຊື່ອມີຄວາມສາມາດຫຼາຍດ້ານ ຕາມທິດທັນສະໄໝ ເຄື່ອນໄຫວຢ່າງປອດໄພ ມີປະສິດທິຜົນໜັກແໜ້ນ ດ້ວຍການປະກອບຫຼາຍຮູບຫຼາຍແບບທາງດ້ານກຳມະສິດ, ຂະໜາດ, ປະເພດຮູບແບບ,...
ແບ່ງປະເພດວິສາຫະກິດ ຈັດວາງບັນດາວິສາຫະກິດແຫ່ງລັດຄືນໃໝ່
ກ່ຽວກັບການຈັດວາງໂຄງປະກອບວິສາຫະກິດຄືນໃໝ່, ຈຸດໜັກແມ່ນບັນດາກຸ່ນເສດຖະກິດແລະບໍລິສັດໃຫຍ່ແຫ່ງລັດ, ຈະປະຕິບັດການແບ່ງປະເພດ, ຈັດວາງບັນດາວິສາຫະກິດແຫ່ງລັດຄືນໃໝ່, ສຸມໃສ່ບັນດາຂົງເຂດຕົ້ນຕໍຄື ອຸດສາຫະກຳການປ້ອງກັນປະເທດ, ບັນດາຂະແໜງການ ຂົງເຂດອຸດສາຫະກຳຜູກຂາດທຳມະຊາດ ຫຼືສະໜອງສິນຄ້າ ການບໍລິການຈຳເປັນຕ້ອງການຍິ່ງ ແລະ ບາງຂະແໜງການອຸດສາຫະກຳທີ່ເປັນຮາກຖານ ເຕັກໂນໂລຊີສູງ ທີ່ມີກຳລັງແຜ່ລາມກວ້າງ; ຍູ້ແຮງການຫັນເປັນຫຸ້ນສ່ວນ, ຫັນເປັນຫຼາຍຮູບແບບກຳມະສິດ ຕໍ່ກັບບັນດາວິສາຫະກິດແຫ່ງລັດ ທີ່ລັດບໍ່ຈຳເປັນຕ້ອງຖືກຳມະສິດ 100%.
ຕໍ່ກັບແຕ່ລະກຸ່ມເສດຖະກິດ ບໍລິສັດໃຫຍ່ແຫ່ງລັດ, ປະຕິບັດການຈັດວາງຄືນໃໝ່ລາຍຊື່ການລົງທຶນ ແລະ ຂະແໜງອາຊີບການທຸລະກິດ ໂດຍລວມສູນໃສ່ບັນດາຂະແໜງອາຊີບການທຸລະກິດຕົ້ນຕໍ; ດຳເນີນໂດຍໄວການຖອນທຶນຂອງລັດທີ່ໄດ້ລົງທຶນເຂົ້າໃນບັນດາຂະແໜງການ ທີ່ບໍ່ແມ່ນການທຸລະກິດຕົ້ນຕໍ ຫຼືບໍ່ພົວພັນໂດຍກົງກັບ ຂະແໜງການທຸລະກິດຕົ້ນຕໍ, ແລະ ຖອນທຶນຂອງລັດຢູ່ບັນດາບໍລິສັດຫຸ້ນສ່ວນ ເຊິ່ງລັດບໍ່ຈຳເປັນຕ້ອງຖືຫຸ້ນສ່ວນແຊກຄຸມ.
ປະຕິບັດກົດໝາຍ ລະບຽບວິໄນການບໍລິຫານຂອງລັດ ແລະ ລະບຽບວິໄນຕະຫຼາດຢ່າງເຂັ້ມງວດ, ປ່ຽນແປງໃໝ່ລະບົບໄມ້ງັດເສດຖະກິດ ເພື່ອຮັບປະກັນໃຫ້ວິສາຫະກິດແຫ່ງລັດເຄື່ອນໄຫວຕາມກົນໄກຕະຫຼາດ ແລະ ແກ່ງແຍ້ງຢ່າງສະເໝີພາບ ຄືກັບບັນດາວິສາຫະກິດສັງກັດພາກສ່ວນເສດຖະກິດອື່ນໆ.
ສືບຕໍ່ຍູ້ແຮງການຈັດວາງໂຄງປະກອບ ຍົກສູງຄຸນນະພາບ ປະສິດທິຜົນ ຄວາມສາມາດແກ່ງແຍ້ງ ຂອງບັນດາວິສາຫະກິດເອກະຊົນ; ສົ່ງເສີມການກໍ່ຮ່າງສ້າງຕົວ ແລະ ພັດທະນາບັນດາກຸ່ມເສດຖະກິດເອກະຊົນທີ່ມີກຳລັງຊ້ອນແຝງແຂງແຮງ ມີຄວາມສາມາດແກ່ງແຍ້ງໃນຕະຫຼາດພາຍໃນ ແລະ ຕ່າງປະເທດ.
ນາຍົກລັດຖະມົນຕີຮຽກຮ້ອງໃຫ້ບັນດາລັດຖະມົນຕີ, ບັນດາຫົວໜ້າອົງການທຽບເທົ່າກະຊວງ ອົງການສັງກັດລັດຖະບານ, ປະທານຄະນະກຳມະການປະຊາຊົນແຂວງ ນະຄອນສັງກັດສູນກາງ ມີໜ້າທີ່ຮັບຜິດຊອບຕ້ອງຮີບດ່ວນກໍ່ສ້າງ ແລະ ຜັນຂະຫຍາຍໃນເຄິ່ງຕົ້ນປີ 2013 ນີ້ ໂຄງການການກະທຳຈັດວາງໂຄງປະກອບຄືນໃໝ່ ຕາມຂົງເຂດ ຂະແໜງການ ຫຼືເຂດແດນ ທີ່ຂຶ້ນກັບສິດອຳນາດຄຸ້ມຄອງລັດ ທີ່ໄດ້ຮັບໝອບໝາຍ./.
ແຫຼ່ງຂ່າວ: chinhphu.vn
