ວ.ກ.ອອນໄລ - ວັນທີ 22 ມີນາ 2013, ຢູ່ທີ່ສຳນັກງານ ຄະນະພົວພັນຕ່າງປະເທດສູນກາງພັກ ປະຊາຊົນປະຕິວັກລາວ, ສະຫາຍສູນທອນ ໄຊຍະຈັກ, ກຳມະການສູນກາງພັກ, ຮອງຫົວໜ້າຄະນະພົວພັນຕ່າງປະເທດສູນກາງ, ລັດຖະມົນຕີຊ່ວຍວ່າການກະຊວງການຕ່າງປະເທດແຫ່ງ ສປປ ລາວ ໄດ້ຕ້ອນຮັບສະຫາຍ ຫງວຽນແມ້ງຮຸ່ງ ເອກອັກຄະລັດຖະທູດຫວຽດນາມປະຈຳລາວ ເຂົ້າຂ່ຳນັບອວຍພອນວັນສ້າງຕັ້ງພັກປະຊາຊົນປະຕິວັດລາວ ຄົບຮອບ 58 ປີ (22-3-1955 – 22-3-2013).
ຢູ່ທີ່ການພົບປະ, ສະຫາຍເອກອັກຄະລັດຖະທູດ ຫງວຽນແມ້ງຮຸ່ງໄດ້ອວຍໄຊໃຫ້ພອນເນື່ອງໃນໂອກາດງານສະເຫຼີມສະຫຼອງທີ່ມີຄວາມໝາຍສຳຄັນນີ້; ອວຍພອນບັນດາຜົນສຳເລັດອັນໃຫຍ່ຫຼວງ ຮອບດ້ານໃນທຸກໆຂົງເຂດທີ່ ສປປ ລາວ ຍາດມາໄດ້ໃນ 58 ປີທີ່ຜ່ານມາ ພາຍໃຕ້ການນຳພາອັນສະຫຼາດສ່ອງໃສຂອງພັກປະຊາຊົນປະຕິວັດລາວ.
ສະຫາຍເອກອັກຄະລັດຖະທູດໄດ້ອາໄສສະຫາຍສູນທອນ ໄຊຍະຈັກ ນຳເອົາກະຕ່າດອກໄມ້ແຫ່ງຄວາມອວຍໄຊໃຫ້ພອນ ຂອງສະຫາຍເລຂາທິການໃຫຍ່ຫງວຽນຝູຈ້ອງ ໄປມອບໃຫ້ສະຫາຍຈູມມາລີ ໄຊຍະສອນ ເລຂາທິການໃຫຍ່ ປະທານປະເທດແຫ່ງ ສປປ ລາວ; ສະຫາຍເນັ້ນວ່າ ໃນປີ 2012 ສອງປະເທດໄດ້ຈັດຕັ້ງຢ່າງສຳເລັດຜົນ ປີສາມັກຄີມິດຕະພາບຫວຽດນາມ-ລາວ, ລາວ-ຫວຽດນາມ ເຊິ່ງມີກຳລັງແຮງແຜ່ລາມກວ້າງໃນຊີວິດສັງຄົມສອງປະເທດ ແລະ ຫວ່າງມໍ່ໆນີ້ ແມ່ນການໄປຢ້ຽມຢາມລາວ ຂອງສະຫາຍນາຍົກລັດຖະມົນຕີ ຫງວຽນເຕິນຢຸ໊ງ ຈະເປັນການສ້າງທ່ວງທ່າໃໝ່ເພື່ອໃຫ້ປີ 2013 ສອງປະເທດຊຸກຍູ້ການຮ່ວມມືຢ່າງຮອບດ້ານໃນທຸກໆຂົງເຂດ.
ສະຫາຍເອກອັກຄະລັດຖະທູດຢັ້ງຢືນວ່າ ບັນດາໄຊຊະນະທີ່ປະຊາຊົນລາວຍາດມາໄດ້ເປັນການລະດົມກຳລັງໃຈຢ່າງໃຫຍ່ຫຼວງຕໍ່ກັບຫວຽດນາມ ໃນພາລະກິດການສ້າງສາ ແລະ ປົກປັກຮັປສາປະເທດຊາດ, ແລະ ເຊື່ອໝັ້ນວ່າ ພາຍໃຕ້ການນຳພາຂອງພັກປະຊາຊົນປະຕິວັດລາວ ປະຊາຊົນລາວອ້າຍນ້ອງຈະຍາດໄດ້ໄຊຊະນະໃຫຍ່ຫຼວງກວ່າອີກ, ຖານະບົດບາບຂອງລາວນັບມື້ນັບໄດ້ຍົກສູງຂຶ້ນໃນພາກພື້ນ ແລະ ໂລກ; ສາຍພົວພັນມິດຕະພາບ ຄວາມສາມັກຄີພິເສດ ແລະ ການຮ່ວມມືຮອບດ້ານລະຫວ່າງສອງປະເທດນັບມື້ນັບພັດທະນາເຂົ້າສູ່ລວງເລິກ ແລະ ມີປະສິດທິຜົນ.
ສະຫາຍສູນທອນ ໄຊຍະຈັກ ໄດ້ສະແດງຄວາມຂອບອົກຂອບໃຈຢ່າງຈິງໃຈຕໍ່ສະຫາຍເອກອັກຄະລັດຖະທູດຫງວຽນແມ້ງຮຸ່ງ ແລະ ຢັ້ງຢືນວ່າບັນດາໄຊຊະນະທີ່ປະຊາຊົນລາວຍາດມາໄດ້ໃນ 58 ປີທີ່ຜ່ານມາ ບໍ່ອາດຈະແຍກອອກຈາກການຊ່ວຍເຫຼືອຂອງຫວຽດນາມໄດ້. ພັກແລະລັດລາວ ຮູ້ບຸນຄຸນຢ່າງເລິກເຊິ່ງຕໍ່ການຊ່ວຍເຫຼືອຂອງຫວຽດນາມໃນຕະຫຼອດເວລາທີ່ຜ່ານມາ ແລະ ໝັ້ນໝາຍວ່າຈະເຮັດຈົນສຸດຄວາມສາມາດເພື່ອປົກປັກຮັກສາ ເພີ່ນພູນຄູນສ້າງສາຍພົວພັນພິເສດຫວຽດນາມ - ລາວ ໃຫ້ຂຽວສົດງົດງາມຕະຫຼອດການ.
ສະຫາຍໃຫ້ຄຳໝັ້ນສັນຍາວ່າ ຈະຮ່ວມມືຢ່າງແໜ້ນແຟ້ນກັບສະຖານທູດຫວຽດນາມຢູ່ລາວ ເພື່ອຊຸກຍູ້ການພົວພັນຮ່ວມມືຮອບດ້ານຫວຽດນາມ - ລາວ ໃຫ້ນັບມື້ນັບຂະຫຍາຍຕົວຢ່າງໜັກແໜ້ນ, ຕອບສະໜອງໄດ້ກັບຄວາມມຸ່ງຫວັງຂອງປະຊາຊົນສອງປະເທດ./.
ແຫຼ່ງຂ່າວ: TTXVN