ກອງປະຊຸມຮ່ວມມື ລະຫວ່າງສະພາແຫ່ງຊາດ ຫວຽດນາມ - ລາວ - ກຳປູເຈຍ
ຄະນະຜູ້ແທນຫວຽດນາມທີ່ກອງປະຊຸມ - ແຫຼ່ງ: TTXVN
ໃຫ້ກຽດເຂົ້າຮ່ວມກອງປະຊຸມຍັງມີ ການນຳກຳມາທິການເສດຖະກິດ ການເງິນ ທະນາຄານ ແລະ ກວດສອບບັນຊີຂອງສະພາແຫ່ງຊາດ ແລະ ສະພາສູງກຳປູເຈຍ; ການນຳກຳມາທິການເສດຖະກິດ ແຜນການ ແລະ ການເງິນຂອງສະພາແຫ່ງຊາດລາວ ແລະ ການນຳກຳມາທິການການເງິນ - ງົບປະມານຂອງສະພາແຫ່ງຊາດຫວຽດນາມ ພ້ອມດ້ວຍຜູ້ຕາງໜ້າກະຊວງການເງິນ ອົງການກວດສອບບັນຊີແຫ່ງລັດຂອງບັນດາປະເທດຫວຽດນາມ ລາວ ກຳປູເຈຍ.
ເຂົ້າຮ່ວມກອງປະຊຸມຍັງມີຜູ້ຊ່ຽວຊານສາກົນຈຳນວນໜຶ່ງໃນຂົງເຂດການເງິນ ທະນາຄານ ການກວດສອບບັນຊີ.
ຄະນະຜູ້ແທນຫວຽດນາມນຳໂດຍສະຫາຍ ບູ່ຍດັ້ງຢຸ໊ງ, ຮອງປະທານກຳມາທິການການເງິນ - ງົບປະມານສະພາແຫ່ງຊາດ ເປັນຫົວໜ້າຄະນະ ແລະ ມີການເຂົ້າຮ່ວມຂອງ ທ່ານຮອງຜູ້ອຳນວຍການໃຫຍ່ອົງການກວດສອບບັນຊີແຫ່ງລັດ ຫ່ວາງໂຮ່ງລາກ ພ້ອມດ້ວຍຮອງລັດທະມົນຕີປະຈຳການກະຊວງການເງິນ ຫງວຽນກົງງຽບ. ເອກອັກຄະລັດຖະທູດຫວຽດນາມຢູ່ກຳປູເຈຍ ໂງແອງຢຸ໊ງ ກໍ່ໄດ້ເຂົ້າຮ່ວມໃນວາລະໄຂກອງປະຊຸມ.
ກ່າວຄຳປາໄສໄຂກອງປະຊຸມ, ປະທານສະພາແຫ່ງຊາດກຳປູເຈຍ ເຮງ ຊຳຣິນ ເນັ້ນເຖິງບົດບາບຕິດຕາມກວດກາຂອງສະພາແຫ່ງຊາດ ຕໍ່ກັບການເຄື່ອນໄຫວຄຸ້ມຄອງການເງິນ ງົບປະມານ ໃນຂະບວນວິວັດການສ້າງສາ ແລະ ພັດທະນາຂອງແຕ່ລະປະເທດ.
ກອງປະຊຸມຄັ້ງນີ້ແມ່ນໂອກາດດີ ເພື່ອໃຫ້ບັນດາຝ່າຍແລກປ່ຽນທັດສະນະຢູ່ຂັ້ນວາງກຳນົດນະໂຍບາຍ ແລະ ແລກປ່ຽນບົດຮຽນປະສົບການໃນການຄຸ້ມຄອງງົບປະມານແຫ່ງລັດເວົ້າລວມ ໂດຍສຸມໃສ່ບັນດາເນື້ອໃນເຊັ່ນ ຄຸ້ມຄອງງົບປະມານແຫ່ງລັດ; ການປະສານສົມທົບລະຫວ່າງບັນດາອົງການຂອງສະພາແຫ່ງຊາດ ໃນການເຄື່ອນໄຫວຕິດຕາມກວດກາງົບປະມານແຫ່ງລັດ; ບົດຮຽນປະສົບການຄຸ້ມຄອງງົບປະມານຂອງບັນດາປະເທດກຳລັງພັດທະນາ ແລະ ບັນດາບັນຫາທີ່ວາງອອກມາໃຫ້ປະເທດທັງສາມ.
ພ້ອມກັນນັ້ນ, ກອງປະຊຸມກໍ່ໄດ້ປຶກສາຫາລື ກໍ່ສ້າງກົນໄກຮ່ວມມືຢ່າງແໜ້ນແຟ້ນ ລຽນຕິດກວ່າອີກ ລະຫວ່າງບັນດາຄະນະກຳມາທິການທີ່ກ່ຽວຂ້ອງ ຂອງສະພາແຫ່ງຊາດສາມປະເທດ ໃນການເພີ່ມທະວີການເຄື່ອນໄຫວຕິດຕາມກວດກາການເງິນ, ງົບປະມານແຫ່ງລັດ, ຮັບໃຊ້ໃຫ້ແກ່ຄວາມຕ້ອງການພັດທະນາ.
ຄຽງຂ້າງນັ້ນ, ກອງປະຊຸມກໍ່ໄດ້ສຸມໃສ່ແລກປ່ຽນບົດຮຽນປະສົບການ ກ່ຽວກັບການສົມທົບລະຫວ່າງບັນດາຄະນະກຳມາທິການພາລະບົດບາບຂອງສະພາແຫ່ງຊາດ ກັບບັນດາອົງການຂອງລັດຖະບານ ໃນການຮັບປະກັນແຫຼ່ງການເງິນ ງົບປະມານ ແລະ ເງິນຊ່ວຍເຫຼືອໄດ້ນຳໃຊ້ຖືກຕ້ອງຕາມຈຸດປະສົງ ໂປ່ງໃສ, ຮັບໃຊ້ໃນວິວັດການລົບລ້າງຄວາມອຶດຫີວ ຫລຸດຜ່ອນຄວາມທຸກຈົນໃຫ້ປະຊາຊົນ ແລະ ປະຕິບັດບັນດາໜ້າທີ່ພັດທະນາເສດຖະກິດ ສັງຄົມຂອງແຕ່ລະປະເທດ.
ຜົນສຳເລັດຂອງກອງປະຊຸມປະກອບສ່ວນອັນສຳຄັນໃຫ້ແກ່ການເຄື່ອນໄຫວກໍ່ສ້າງນະໂຍບາຍ ກົດໝາຍ, ປະຕິຮູບລະບົບນະໂຍບາຍ, ຍົກສູງປະສິດທິຜົນການເຄື່ອນໄຫວຄຸ້ມຄອງງົບປະມານແຫ່ງລັດ ເພື່ອຕອບສະໜອງຄວາມຮຽກຮ້ອງຕ້ອງການຮັກສາເສດຖະກິດມະຫາພາບໃຫ້ສະຖຽນໝັ້ນ, ຮັບໃຊ້ໃຫ້ແກ່ການພັດທະນາເສດຖະກິດ - ສັງຄົມ ແລະ ເຊື່ອມໂຍງເຂົ້າກັບເສດຖະກິດໂລກຂອງຫວຽດນາ ລາວ ກຳປູເຈຍ ໃນສະພາບການໃໝ່./.
ແຫຼ່ງຂ່າວ: TTXVN
