“ການຊ່ວຍເຫຼືອຂອງຫວຽດນາມ ແມ່ນບໍ່ອາດຈະຄຳນວນວັດຜອງໄດ້”
ໃນກອບການຢ້ຽມຢາມ ແລະ ເຮັດວຽກຢູ່ລາວ, ຕອນບ່າຍວັນທີ 5 ມີນາ 2013 ຢູ່ທີ່ນະຄອນຫຼວງວຽງຈັນ, ສະຫາຍຮ່າກິມງອກ ເລຂາຊ່ວຍວຽກລັດຖະມົນຕີກະຊວງການຕ່າງປະເທດຫວຽດນາມ ໄດ້ເຂົ້າຢ້ຽມຂ່ຳນັບສະຫາຍທອງລຸນ ສີສຸລິດ ກຳມະການກົມການເມືອງ ຮອງນາຍົກລັດຖະມົນຕີ ລັດຖະມົນຕີວ່າການກະຊວງການຕ່າງປະເທດແຫ່ງ ສປປ ລາວ.
ສະຫາຍຮ່າກິມງອກ ໄດ້ສະແດງຄວາມດີອົກດີໃຈທີ່ໄດ້ເຂົ້າຢ້ຽມຂ່ຳນັບ ເຊິ່ງສະຫາຍຮອງນາຍົກລັດຖະມົນຕີໄດ້ສະຫຼະເວລາອັນລ້ຳຄ່າເພື່ອຕ້ອນຮັບຄະນະ; ສະຫາຍຮ່າກິມງອກ ກໍ່ໄດ້ສົ່ງຄຳອວຍພອນສຸຂະພາບ ຂອງອະດີດຮອງນາຍົກລັດຖະມົນຕີຄວບໜ້າທີ່ລັດຖະມົນຕີກະຊວງການຕ່າງປະເທດ ຟ້າມຢາຄຽມ ແລະ ລັດຖະມົນຕີວ່າການກະຊວງການຕ່າງປະເທດ ຟ້າມບິ່ງມີງ ມາຍັງສະຫາຍຮອງນາຍົກລັດຖະມົນຕີ ແລະ ໄດ້ແຈ້ງຂ່າວບາງເມື້ອໃນຮ່ວມມືລະຫວ່າງສອງຝ່າຍ, ໃນນັ້ນມີໂຄງການແລກປ່ຽນລະຫວ່າງສອງກະຊວງການຕ່າງປະເທດໃນປີໜ້າ.
ສະຫາຍຮອງນາຍົກລັດຖະມົນຕີ ທອງລຸນ ສີສຸລິດ ຊົມເຊີຍຫວຽດນາມທີ່ໄດ້ເຂົ້າຮ່ວມກອງປະຊຸມບັນດາປະເທດທີ່ບໍ່ມີທະເລ ເຊິ່ງກຳລັງໂຮມປະຊຸມຢູ່ລາວ, ສະແດງໃຫ້ເຫັນເຖິງນ້ຳໃຈອ້າຍນ້ອງພິເສດລາວ - ຫວຽດນາມ.
ສະຫາຍຮອງນາຍົກລັດຖະມົນຕີ ທອງລຸນ ສີສຸລິດ ສະແດງຄວາມຂອບອົກຂອບໃຈຕໍ່ພັກ-ລັດຫວຽດນາມເວົ້າລວມ ແລະ ກະຊວງການຕ່າງປະເທດຫວຽດນາມເວົ້າສະເພາະ ທີ່ໄດ້ໃຫ້ການສະໜັບສະໜູນຊ່ວຍເຫຼືອລາວ ຈັດຕັ້ງຢ່າງສຳເລັດຜົນ ຫຼາຍກອງປະຊຸມສາກົນໃນປີ 2012 ແລະ ຫວັງວ່າກະຊວງການຕ່າງປະເທດຫວຽດນາມ ຈະສືບຕໍ່ຮ່ວມມື ຊ່ວຍເຫຼືອລາວ ຈັດຕັ້ງກອງປະຊຸມສາກົນຫຼາຍໆກອງປະຊຸມໃນສະເພາະໜ້າ. ການຊ່ວຍເຫຼືອຂອງຫວຽດນາມໃຫ້ແກ່ລາວ ແມ່ນບໍ່ອາດຈະຄຳນວນວັດຜອງໄດ້.
ສະຫາຍຮອງນາຍົກລັດຖະມົນຕີລາວ ເນັ້ນວ່າ ປີ 2012 ສອງປະເທດລາວ - ຫວຽດນາມເວົ້າລວມ ແລະ ສອງກະຊວງການຕ່າງປະເທດເວົ້າສະເພາະ ໄດ້ສົມທົບກັນຈັດຕັ້ງການເຄື່ອນໄຫວຕ່າງໆ ຢ່າງຟົດຟື້ນ ເພື່ອສະເຫຼີມສະຫຼອງວັນສ້າງຕັ້ງສາຍພົວພັນທາງການທູດລະຫວ່າງສອງປະເທດຄົບຮອບ 50 ປີ ແລະ ວັນເຊັນສົນທິສັນຍາມິດຕະພາບຫວຽດນາມ - ລາວ ຄົບຮອບ 35 ປີ ແລະ ປີ “ສາມັກຄີມິດຕະພາບຫວຽດນາມ - ລາວ 2012” ເຊິ່ງໄດ້ສ້າງສັນຍາລັກອັນເລິກຊຶ່ງໃນຊີວິດສັງຄົມຂອງປະຊາຊົນສອງປະເທດ.
ປີ 2013, ກະຊວງການຕ່າງປະເທດຂອງສອງປະເທດສືບຕໍ່ສົມທົບກັນຢ່າງແໜ້ນແຟ້ນ ເພີ່ມທະວີການແລກປ່ຽນຂໍ້ມູນຂ່າວສານ ບົດຮຽນປະສົບການ ຮ່ວມມືຊ່ວຍເຫຼືອກັນໃຫ້ນັບມື້ນັບມີປະສິດທິຜົນ, ໃນນັ້ນມີການປັບປຸງເພີ່ມຄວາມໜາແໜ້ນຂອງຫຼັກໝາຍຊາຍແດນຖືກຕ້ອງຕາມກຳນົດເວລາ, ປະກອບສ່ວນເພີ່ມພູນຄູນສ້າງສາຍພົວພັນມິດຕະພາບອັນເປັນມູນເຊື້ອ ຄວາມສາມັກຄີພິເສດ ແລະ ການຮ່ວມມືຮອບດ້ານລະຫວ່າງສອງປະເທດໃຫ້ຂະຫຍາຍຕົວຍິ່ງຂຶ້ນ./.
ແຫຼ່ງຂ່າວ: TTXVN