ສະຫາຍຫງວຽນເຕິນຢຸ໊ງ ນາຍົກລັດຖະມົນຕີແຫ່ງ ສສ ຫວຽດນາມ ພົບປະແລກປ່ຽນຄວາມເຫັນ ກັບສະຫາຍ ຈູມມາລີ ໄຊຍະສອນ ເລຂາທິການໃຫຍ່ ປະທານປະເທດແຫ່ງ ສປປ ລາວ
ວ.ກ.ອອນໄລ - ໂດຍຮັບຄຳເຊີນຂອງສະຫາຍ ທອງສິງ ທຳມະວົງ ນາຍົກລັດຖະມົນຕີແຫ່ງ ສປປ ລາວ, ຕອນເຊົ້າວັນທີ 12 ມີນາ 2013, ສະຫາຍນາຍົກລັດຖະມົນຕີ ຫງວຽນເຕິນຢຸ໊ງ ນຳໜ້າຄະນະຜູ້ແທນຂັ້ນສູງຂອງລັດຖະບານຫວຽດນາມ ໄດ້ເດີນທາງມາເຖິງນະຄອນຫຼວງວຽງຈັນ, ເລິ່ມຕົ້ນການເຂົ້າຮ່ວມໃນບັນດາກອງປະຊຸມຂັ້ນສູງ ກ່ຽວກັບການຊຸກຍູ້ການຮ່ວມມືໃນພາກພື້ນ ແຕ່ວັນທີ 12 ຮອດວັນທີ 15 ມີນາ 2013.
ໃນການມາເຮັດວຽກຄັ້ງນີ້, ສະຫາຍນາຍົກລັດຖະມົນຕີ ຫງວຽນເຕິນຢຸ໊ງ ແລະ ຄະນະຜູ້ແທນລັດຖະບານຫວຽດນາມຈະເຂົ້າຮ່ວມກອງປະຊຸມຂັ້ນສູງ 4 ປະເທດ ກຳປູເຈຍ-ລາວ-ມີອານມາ-ຫວຽດນາມ ຄັ້ງທີ 6 (ກລມວ 6), ກອງປະຊຸມຂັ້ນສູງກ່ຽວກັບຍຸດທະສາດການຮ່ວມມືເສດຖະກິດໃນພູມພາກ ແມ່ນ້ຳອີຣະວາດີ-ແມ່ນ້ຳເຈົ້າພຣະຢາ-ແມ່ນ້ຳຂອງ ຄັ້ງທີ 5 (ACMECS 5), ການພົບປະສົນທະນາລະຫວ່າງການນຳ ACMECS ກັບປະຊາຄົມວິສາຫະກິດ, ເປັນປະທານກອງປະຊຸມຂັ້ນສູງ ກຳປູເຈຍ-ລາວ-ຫວຽດນາມ ຄັ້ງທີ່ 7 (ກລວ 7) ແລະ ຢາມບາງແຂວງພາກເໜືອຂອງລາວ.
ໃນໂອກາດນີ້, ສະຫາຍນາຍົກລັດຖະມົນຕີ ຫງວຽນເຕິນຢຸ໊ງ ໄດ້ມີກຽດພົບປະແລກປ່ຽນຄວາມເຫັນກັບ ສະຫາຍຈູມມາລີ ໄຊຍະສອນ ເລຂາທິການໃຫຍ່ ປະທານປະເທດແຫ່ງ ສສ ລາວ.
ສະຫາຍນາຍົກລັດຖະມົນຕີ ຫງວຽນເຕິນຢຸ໊ງ ໄດ້ອວຍໄຊໃຫ້ພອນຢ່າງສຸດອົກສຸດໃຈ ຕໍ່ຜົນງານຕ່າງໆ ທາງດ້ານວຽກງານພາຍໃນ ແລະ ການຕ່າງປະເທດ ທີ່ປະຊາຊົນລາວອ້າຍນ້ອງຍາດມີໄດ້ ພາຍໃຕ້ການນຳພາຂອງພັກປະຊາຊົນ ປະຕິວັດລາວ ໃນການຜັນຂະຫຍາຍປະຕິບັດ ມະຕິກອງປະຊຸມໃຫຍ່ຄັ້ງທີ IX ຂອງພັກປະຊາຊົນ ປະຕິວັດລາວ ແລະ ແຜນການພັດທະນາເສດຖະກິດ - ສັງຄົມ 5 ປີ ຄັ້ງທີ VII.
ສະຫາຍນາຍົກລັດຖະມົນຕີ ກໍ່ໄດ້ອວຍພອນຢ່າງສຸດໃຈຕໍ່ຜົນສຳເລັດຕ່າງໆ ຂອງລາວ ໃນການຈັດຕັ້ງຢ່າງສຳເລັດຜົນກອງປະຊຸມຂັ້ນສູງ ອາເຊັມ 9, ອາແຊັບ 7, ເວທີປາຖະກະຖາປະຊາຊົນ, ເວທີປາຖະກະຖາວິສາຫະກິດອາຊີ - ເອີຣົບ ແລະ ກາຍເປັນສະມາຊິກຂອງອົງການການຄ້າໂລກໃນປີ 2012 ທີ່ຜ່ານມາ ແລະ ບັນດາກອງປະຊຸມຂັ້ນສູງ ກລວ, ກລມວ, ACMECS ທີ່ພວມດຳເນີນຢູ່ນະຄອນຫຼວງວຽງຈັນ. ບັນດາຜົນສຳເລັດເຫຼົ່ານີ້ໄດ້ຍົກບົດບາດຖານະ ແລະ ອິດທິພົນ ຂອງປະເທດສາທາລະນະລັດ ປະຊາທິປະໄຕ ປະຊາຊົນລາວ ຂຶ້ນນັບມື້ນັບສູງຢູ່ໃນພາກພື້ນ ແລະ ໃນໂລກ.
ສະຫາຍນາຍົກລັດຖະມົນຕີ ຫງວຽນເຕິນຢຸ໊ງ ຢັ້ງຢືນວ່າ ພັກ ລັດ ລັດຖະບານ ແລະ ປະຊາຊົນຫວຽດນາມ ຍາມໃດກໍ່ຄຽງບ່າຄຽງໄລ່ກັບເພື່ອນສະຫາຍລາວ, ຍາມໃດກໍ່ມຸ່ງຫວັງຢ່າງຈິງໃຈທີ່ສຸດວ່າ ປະເທດລາວຂະຫຍາຍຕົວວັດທະນາຖາວອນ ປະຊາຊົນລາວອ້າຍນ້ອງມີຊີວິດການເປັນຢູ່ນັບມື້ນັບອິ່ນໜຳສຳລານ ສົມບູນພູມສຸກ.
ສະຫາຍນາຍົກລັດຖະມົນຕີ ເນັ້ນວ່າ ລັດຖະບານຫວຽດນາມຈະເອົາໃຈໃສ່ຊີ້ນຳບັນດາກະຊວງ ຂະແໜງການ ທ້ອງຖິ່ນຂອງຫວຽດນາມ ໃຫ້ຕັ້ງໜ້າສົມທົບກັບບັນດາກະຊວງ ຂະແໜງການ ແລະ ທ້ອງຖິ່ນຕ່າງໆຂອງລາວ ເພື່ອຜັນຂະຫຍາຍປະຕິບັດບັນດາຂໍ້ຕົກລົງຂັ້ນສູງ ລະຫວ່າງສອງປະເທດ, ແນໃສ່ສ້າງໃຫ້ມີການຜັນປ່ຽນຢ່າງຈະແຈ້ງ, ພິເສດແມ່ນກ່ຽວກັບການຮ່ວມມືເສດຖະກິດ ການຄ້າ ການລົງທຶນ, ນຳເອົາຜົນປະໂຫຍດຕົວຈິງມາໃຫ້ປະຊາຊົນສອງປະເທດ.
ໃນບັນດາການພົບປະແລກປ່ຽນຄວາມເຫັນ, ນາຍົກລັດຖະມົນຕີ ຫງວຽນເຕິນຢຸ໊ງ ກັບນາຍົກລັດຖະມົນຕີ ຮຸນແຊນ ແລະ ເລຂາທິການໃຫຍ່ ປະທານປະເທດລາວ ຈູມມາລີ ໄຊຍະສອນ ໄດ້ເປັນເອກະພາບກັນ ກ່ຽວກັບການຮັບປະກັນສິ່ງແວດລ້ອມ ແລະ ຄວາມໝັ້ນຄົງຂອງແຫຼ່ງນ້ຳໃນແມ່ນ້ຳຂອງ, ກໍ່ຄືສືບຕໍ່ປະສານສົມທົບ ແລະ ສະໜັບສະໜູນ ຫຼັກໝັ້ນລວມຂອງອາຊຽນ ຄືທີ່ໄດ້ລະບຸໄວ້ໃນ ຖະແຫຼງການວ່າດ້ວຍຫຼັກການ 6 ປະການກ່ຽວກັບທະເລຕາເວັນອອກ, ໃນນັ້ນມີການຮັບປະກັນສັນຕິພາບ ສະຖຽນລະພາບ ຄວາມສະຫງົບ ຄວາມປອດໄພ ແລະ ຄວາມເສລີພາບໃນການເດີນທະເລຢູ່ທະເລຕາເວັນອອກ, ແກ້ໄຂການພິພາດດ້ວຍສັນຕິວິທີ, ເຄົາລົບນັບຖືປະຕິບັດຕາມກົດໝາຍລະຫວ່າງຊາດ, ກ່ອນອື່ນໝົດແມ່ນ ອະນຸສັນຍາສະຫະປະຊາຊາດ ວ່າດ້ວຍກົດໝາຍທະເລ ປີ 1982 ແລະ ຖະແຫຼງການກ່ຽວກັບວິທີການປະພຶດ ຂອງບັນດາຝ່າຍຢູ່ທະເລຕາເວັນອອກ (DOC), ກ້າວໄປເຖິງການກໍ່ສ້າງ ປະມວນຂໍ້ກຳນົດກ່ຽວກັບການປະພຶດ ຂອງບັນດາຝ່າຍຢູ່ທະເລຕາເວັນອອກ (COC)./.
ຮຽບຮຽງໂດຍ ນດ