ທ່ານປະທານປະເທດ ເຈືອງເຕິນຊາງ ຕ້ອນຮັບທ່ານຮອງສະພາແຫ່ງຊາດລາວ
ວ.ກ.ອອນໄລ - ວັນທີ 13 ມີນາ 2013, ຢູ່ທີ່ທຳນຽບປະທານປະເທດຫວຽດນາມ, ທ່ານປະທານປະເທດ ເຈືອງເຕິນຊາງ ໄດ້ໃຫ້ກຽດຕ້ອນຮັບທ່ານ ສົມພັນ ແພງຄຳມີ ຮອງປະທານສະພາແຫ່ງຊາດ ແຫ່ງ ສປປ ລາວ ພ້ອມດ້ວຍຄະນະປະຕິບັດງານສະພາແຫ່ງຊາດລາວ ທີ່ກຳລັງຢ້ຽມຢາມ ແລະ ເຮັດວຽກຢູ່ຫວຽດນາມຢ່າງເປັນທາງການ.
ທ່ານປະທານປະເທດ ເຈືອງເຕິນຊາງ ຕ້ອນຮັບທ່ານ ສົມພັນ ແພງຄຳມີ ຮອງປະທານສະພາແຫ່ງຊາດລາວ - ແຫຼ່ງຂ່າວ: TTXVN
ໃນພິທີຕ້ອນຮັບ, ທ່ານ ສົມພັນ ແພງຄຳມີ ຮອງປະທານສະພາແຫ່ງຊາດລາວ ໄດ້ສະແດງຄວາມຮູ້ສຶກເປັນກຽດທີ່ໄດ້ພົບປະກັບທ່ານປະທານປະເທດ ເຈືອງເຕິນຊາງ ແລະ ໄດ້ແຈ້ງຂ່າວໃຫ້ທ່ານປະທານປະເທດ ເຈືອງເຕິນຊາງ ຊາບກ່ຽວກັບຜົນຂອງການພົບປະແລກປ່ຽນຄວາມເຫັນ ກັບທ່ານນາງ ຫງວຽນທີ້ກິມເງິນ ຮອງປະທານສະພາແຫ່ງຊາດຫວຽດນາມ; ທ່ານສົມພັນ ແພງຄຳມີ ຮອງປະທານສະພາແຫ່ງຊາດລາວ ຢັ້ງຢືນຈຸດປະສົງຂອງການຢ້ຽມຢາມ ແລະ ເຮັດວຽກຂອງຄະນະຢູ່ຫວຽດນາມຄັ້ງນີ້ ແມ່ນແນໃສ່ແລກປ່ຽນບົດຮຽນປະສົບການກ່ຽວກັບການກໍ່ສ້າງລະບົບເອກະສານກົດໝາຍ.
ທ່ານຮອງປະທານສະພາແຫ່ງຊາດລາວ ສົມພັນ ແພງຄຳມີ ສະແດງຄວາມຂອບອົກຂອບໃຈຕໍ່ການນຳສະພາແຫ່ງຊາດຫວຽດນາມ ທີ່ໄດ້ສ້າງເງື່ອນໄຂໃຫ້ຄະນະໄປຄົ້ນຄວ້າ ແລະ ຊອກຫາຄວາມຮູ້ຢູ່ທ້ອງຖິ່ນຕ່າງໆຂອງຫວຽດນາມ, ພ້ອມກັນນັ້ນກໍ່ເນັ້ນວ່າ ຈະສືບຕໍ່ພ້ອມກັນກັບສະພາແຫ່ງຊາດຫວຽດນາມ ກໍ່ສ້າງສາຍພົວພັນຮ່ວມມືຢ່າງໜັກແໜ້ນ ມີປະສິດທິຜົນ ເຂົ້າສູ່ລວງເລິກ; ປະກອນສ່ວນເຊີດຊູສາຍພົວພັນຮ່ວມມືມິດຕະພາບອັນເປັນມູນເຊື້ອພິເສດ ລະຫວ່າງສອງຊາດ ສອງປະເທດຂຶ້ນສູ່ລະດັບສູງ. ທ່ານຮອງປະທານສະພາແຫ່ງຊາດລາວ ສົມພັນ ແພງຄຳມີ ສະແດງຄວາມມຸ່ງຫວັງວ່າ ທ່ານປະທານປະເທດ ເຈືອງເຕິນຊາງ ແລະ ບັນດາອົງການພາລະບົດບາດຂອງຫວຽດນາມ ຈະສືບຕໍ່ສ້າງເງື່ອນໄຂອຳນວຍຄວາມສະດວກໃຫ້ບັນດາຄະນະປະຕິບັດງານຂັ້ນສູງຂອງລາວ ມາຢ້ຽມຢາມ ແລະ ເຮັດວຽກຢູ່ຫວຽດນາມ.
ທ່ານຮອງປະທານສະພາແຫ່ງຊາດລາວ ສົມພັນ ແພງຄຳມີ ຢັ້ງຢືນວ່າ ລາວສະໜັບສະໜູນຫຼັກໝັ້ນຂອງຫວຽດນາມ ໃນການເປັນເຈົ້າພາບຈັດຕັ້ງເວທີປາຖະກະຖາທີ່ມີການເຂົ້າຮ່ວມຂອງສະພາແຫ່ງຊາດບັນດາປະເທດໃນພາກພື້ນ.
ທ່ານປະທານປະເທດ ເຈືອງເຕິນຊາງ ຊົມເຊີຍການຮ່ວມມືຢ່າງແໜ້ນແຟ້ນລະຫວ່າງສອງສະພາແຫ່ງຊາດ, ຖືວ່າ ຜົນສຳເລັດຂອງການມາຢ້ຽມຢາມແມ່ນໝາກຜົນຕົວຈິງຂອງການຮ່ວມມືປະຈຳປີລະຫວ່າງສອງພັກ ສອງລັດ. ທ່ານປະທານປະເທດ ເຈືອງເຕິນຊາງ ເນັ້ນວ່າ ຫວຽດນາມ ແລະ ລາວ ຫາກໍຈັດຕັ້ງສຳເລັດຜົນປີສາມັກຄີມິດຕະພາບພິເສດ ແລະ ສອງຝ່າຍລ້ວນແຕ່ດີອົກດີໃຈທີ່ສຸດ ກ່ຽວກັບບັນດາຜົນສຳເລັດທີ່ບັນລຸໄດ້ໃນເວລາທີ່ຜ່ານມາ. ຕີລາຄາສູງຕໍ່ການທີ່ພັກ ລັດ ແລະ ປະຊາຊົນລາວ ໄດ້ຈັດຕັ້ງຢ່າງສຳເລັດຜົນຫຼາຍເຫດການການເມືອງພາຍໃນປະເທດ ແລະ ສາກົນໃນເວລາຜ່ານມາ, ທ່ານປະທານປະເທດ ຢັ້ງຢືນວ່າ ຈະເຮັດຈົນສຸດຄວາມສາມາດຂອງຕົນເພື່ອປະກອບສ່ວນປັບປຸງສາຍພົວພັນມິດຕະພາບພິເສດລະຫວ່າງສອງປະເທດ./.
ແຫຼ່ງຂ່າວ: TTXVN
