ການພັດທະນາອຸດສາຫະກໍາປະດິດ, ປຸງແຕ່ງຢູ່ຫວຽດນາມ:
ຄວາມຮັບຮູ້ ແລະ ການກໍານົດນະໂຍບາຍ
(ຕອນທີ 2: ການພັດທະນາອຸດສາຫະກໍາປະດິດ, ປຸງແຕ່ງ ເພື່ອຫຼຸດພົ້ນຈາກກັບດັກ ລາຍໄດ້ປານກາງ, ກາຍເປັນປະເທດທີ່ມີລາຍໄດ້ສູງ)
ຄວາມຮັບຮູ້ ແລະ ການກໍານົດນະໂຍບາຍ
ວກ. - ກັບດັກລາຍໄດ້ປານກາງມັກຈະເກີດຂຶ້ນຢູ່ບັນດາພື້ນຖານເສດຖະກິດ ພວມພັດທະນາ - ເມື່ອຄ່າແຮງງານເພີ່ມຂຶ້ນ - ໃນຂະນະທີ່ຄວາມສາມາດໃນການແຂ່ງຂັນດ້ານລາຄາຫຼຸດລົງ, ກໍ່ຍາກທີ່ຈະສາມາດແຂ່ງຂັນກັບ ບັນດາພື້ນຖານເສດຖະກິດ ທີ່ກ້າວໜ້າທາງດ້ານເຕັກໂນໂລຊີ, ຫຼື ກັບບັນດາພື້ນຖານເສດຖະກິດທີ່ມີຄ່າແຮງງານ ຕໍ່າກວ່າໃນການຜະລິດສິນຄ້າລາຄາຖືກ. ພິຈາລະນາໃນຂະບວນວິວັດການຂະຫຍາຍຕົວ ຂອງບັນດາປະເທດທີ່ປະສົບຜົນສໍາເລັດ ໃນການຫັນປ່ຽນ ຈາກປະເທດທີ່ມີລາຍໄດ້ຕໍ່າ ຂຶ້ນເປັນປະເທດມີລາຍໄດ້ສູງ ໃນຊຸມທົດສະວັດກ່ອນນີ້, ຫວຽດນາມຈະສາມາດຖອດຖອນໄດ້ບັນດາບົດຮຽນປະສົບການທີ່ເປັນປະໂຫຍດ ເພື່ອຫຼີດລ່ຽງກັບດັກລາຍໄດ້ປານກາງ.
ກັບດັກລາຍໄດ້ປານກາງ ແລະ ປັດໄຈຊ່ວຍໃຫ້ສາມາດຫຼີກລ່ຽງຈາກກັບດັກລາຍໄດ້ປານກາງ
ກັບດັກລາຍໄດ້ປານກາງຖືກເຂົ້າໃຈວ່າ ເປັນສະພາວະທີ່ປະເທດໜຶ່ງໆສາມາດບັນລຸລະດັບລາຍໄດ້ທີ່ແນ່ນອນ ຍ້ອນບັນດາທ່າໄດ້ປຽບຕ່າງໆ ທີ່ມີຢູ່ແລ້ວນັ້ນ, ແຕ່ກໍ່ຢຸດຢູ່ພຽງແຕ່ໃນມາດຖານກໍານົດດັ່ງກ່າວເທົ່ານັ້ນ ຫາກບໍ່ອາດສາມາດເຮັດໃຫ້ເພີ່ມຂຶ້ນເພື່ອກາຍເປັຍປະເທດທີ່ຮັ່ງມີຕື່ມອີກ. ກັບດັກລາຍໄດ້ປານກາງເກີດຂຶ້ນ ເມື່ອປະເທດພັດທະນາຖືກຢຸດສະຫງັກ ຫຼືຊໍ້າບໍ່ໜໍາແມ່ນກາຍເປັນຄວາມສະຫງັກຊັກຊ້າ ພາຍຫຼັງທີ່ບັນລຸເຖິງລວມຍອດຜະລິດຕະພັນພາຍໃນປະເທດ (GDP - ຈີດີພີ) ສະເລ່ຍຕໍ່ຫົວຄົນ ນອນໃນລະດັບແຕ່ 1.000 ໂດລາສະຫະລັດເຖິງ 12.000 ໂດລາສະຫະລັດ ຕາມມາດຕະຖານຂອງທະນາຄານໂລກ (WB).
ເບິ່ງຈາກຂະບວນວິວັດການຂະຫຍາຍຕົວ ຂອງບັນດາປະເທດທີ່ແຕກຕ່າງກັນ ໃນໄລຍະ 60 ປີທີ່ຜ່ານມາ, ສາມາດເຫັນໄດ້ວ່າ ປະເທດຈໍານວນໜຶ່ງໄດ້ປະສົບຜົນສໍາເລັດ ໃນການຮັກສາລະດັບການເຕີບໂຕຢ່າງຕໍ່ເນື່ອງ ເພື່ອຫັນປ່ຽນຈາກປະເທດທີ່ມີລາຍໄດ້ຕໍ່າ ກ້າວຂຶ້ນເປັນປະເທດມີລາຍໄດ້ສູງ (ເຊັ່ນ: ຍີ່ປຸ່ນ, ເກົາຫຼີໃຕ້, ສິງກະໂປ), ໃນຂະນະທີ່ມີປະເທດຈໍານວນໜຶ່ງຍັງນອນໃນລະດັບລາຍໄດ້ປານກາງ, ຍັງບໍ່ສາມາດກ້າຍຂຶ້ນເຖິງລະດັບລາຍໄດ້ສູງ (ເຊັ່ນ: ມາເລເຊຍ, ໄທ, ອິນໂດເນເຊຍ, ຟີລິບປິນ). ຈາກຂໍ້ມູນຂອງທະນາຄານໂລກໄດ້ໃຫ້ເຫັນວ່າ: ໃນປີ 1966, ຍີ່ປຸ່ນຫາກໍ່ກາຍເປັນປະເທດທີ່ມີລາຍໄດ້ປານກາງ, ສິງກະໂປບັນລຸຈີດີພີສະເລ່ຍຕໍ່ຫົວຄົນຫຼາຍກວ່າ 1.000 ໂດລາສະຫະລັດໃນປີ 1971, ເກົາຫຼີໃຕ້ ແລະ ມາເລເຊຍ ພ້ອມກັນບັນລຸມາດຖານ ກໍານົດນີ້ໄດ້ໃນປີ 1977, ໄທ ບັນລຸໄດ້ໃນປີ 1988, ອິນໂດເນເຊຍ ແລະ ຟີລິບປິນ ບັນລຸໄດ້ໃນປີ 1995. ມາຮອດປີ 2019, ຈີດີພີສະເລ່ຍຕໍ່ຫົວຄົນຂອງບັນດາປະເທດເຫຼົ່ານີ້ ສາມາດບັນລຸໄດ້ຕາມລໍາດັບຄື: ຍີ່ປຸ່ນ ບັນລຸ 40.248 ໂດລາສະຫະລັດ, ສິງກະໂປ ບັນລຸ 65.233 ໂດລາສະຫະລັດ, ເກົາຫຼີໃຕ້ ບັນລຸ 31.761 ໂດລາສະຫະລັດ, ມາເລເຊຍ ບັນລຸ 11.414 ໂດລາສະຫະລັດ, ໄທ ບັນລຸ 7.808 ໂດລາສະຫະລັດ, ອິນໂດເນເຊຍ ບັນລຸ 4.135 ໂດລາສະຫະລັດ ແລະ ຟີລິບປິນ ບັນລຸ 3.485 ໂດລາສະຫະລັດ. ຄືແນວນັ້ນ, ຢູ່ບັນດາປະເທດເຫຼົ່ານີ້, ມີພຽງຍີ່ປຸ່ນ, ເກົາຫຼີໃຕ້, ສິງກະໂປເທົ່ານັ້ນທີ່ໄດ້ກາຍເປັນປະເທດທີ່ມີລາຍໄດ້ສູງ, ບັນດາປະເທດຍັງເຫຼືອແມ່ນຍັງຢູ່ໃນສະພາວະລາຍໄດ້ປານກາງ.
ຂະບວນວິວັດຈາກປະເທດມີລາຍໄດ້ປານກາງ ກ້າວຂຶ້ນເປັນປະເທດທີ່ມີລາຍໄດ້ສູງ ຂອງແຕ່ລະປະເທດມີຄວາມແຕກຕ່າງກັນທັງທາງດ້ານເວລາ ແລະ ກໍາລັງຜັດດັນການຂະຫຍາຍຕົວ. ຈາກການຄົ້ນຄວ້າຂອງທະນາຄານພັດທະນາອາຊີ (ADB) ໃນປີ 2017 ໄດ້ຊີ້ໃຫ້ເຫັນວ່າ: ໄລຍະເວລາສະເລ່ຍເພື່ອໃຫ້ປະເທດໜຶ່ງໆ ຫັນປ່ຽນຈາກປະເທດລາຍໄດ້ປານກາງຕໍ່າ ກ້າວຂຶ້ນເປັນປະເທດທີ່ມີລາຍໄດ້ສູງ ແມ່ນປະມານ 30 ຫາ 40 ປີ. ຖ້າຫາກປະເທດໜຶ່ງໆ ໃນໄລຍະເວລາ 40 ປີ ນັບແຕ່ເວລາສາມາດບັນລຸໄດ້ມາດຖານ ກໍານົດລາຍໄດ້ປານກາງ ຫາກຍັງບໍ່ສາມາດກາຍເປັນປະເທດທີ່ມີລາຍໄດ້ສູງ, ແມ່ນປະ ເທດດັ່ງກ່າວຖືກຖືວ່າພວມຕິດໃນກັບດັກລາຍໄດ້ປານກາງ. ຖ້າຫາກພິຈາລະນາສະພາບໃນແຕ່ລະປະເທດ, ປະເທດອາຊີຕາເວັນອອກຈໍານວນໜຶ່ງ ໄດ້ຫຍໍ້ໄລຍະເວລາການຫັນປ່ຽນໃຫ້ສັ້ນລົງຫຼາຍທີ່ສຸດ, ຍີ່ປຸ່ນ ແລະ ສິງກະໂຕ ຕ້ອງການເວລາ 20 ປີ, ດ້ວຍລະດັບການເຕີບໂຕຂອງຈີດີພີສະເລ່ຍຕໍ່ຫົວຄົນ ບັນລຸເຖິງ 6% ຫາ 8% ຕໍ່ປີ; ເກົາຫຼີໃຕ້ ຕ້ອງການເວລາພຽງ 18 ປີ, ດ້ວຍລະດັບການເຕີບໂຕຂອງຈີດີພີສະເລ່ຍຕໍ່ຫົວຄົນບັນລຸ 9% ຕໍ່ປີ. ມາເລເຊຍມີຈຸດເລີ່ມຕົ້ນພ້ອມກັບເກົາຫຼີໃຕ້, ແຕ່ມາຮອດປັດຈຸບັນ, ພາຍຫຼັງເວລາ 40 ປີ, ຈີດີພີສະເລ່ຍຕໍ່ຫົວຄົນຫາກໍ່ພວມກ້າວເຂົ້າໃກ້ລະດັບ 12.000 ໂດລາສະ ຫະລັດ, ລະດັບການເຕີບໂຕຂອງຈີດີພີບັນລຸ 6% ຕໍ່ປີ.
ເພື່ອສາມາດກໍານົດໄດ້ກໍາລັງຜັດດັນການເຕີບໂຕ, ເບິ່ງຈາກໂຄງປະກອບຈີດີພີ ຂອງບັນດາປະເທດໃນຂະບວນວິວັດການຫັນປ່ຽນ ກໍ່ສາມາດເຫັນໄດ້ຢ່າງຈະແຈ້ງເຖິງການຄ່ອຍໆຫຼຸດລົງຂອງຂະແໜງກະສິກໍາ ແລະການເພີ່ມຂຶ້ນຂອງອຸດສາຫະກໍາ - ກໍ່ສ້າງ ແລະບໍລິການ, ພິເສດແມ່ນການປະກອບສ່ວນຂອງຂະແໜງປະດິດແລະປຸງແຕ່ງໃນຈີດີພີ. ຈາກຂໍ້ມູນຂອງທະນາຄານໂລກໄດ້ໃຫ້ເຫັນວ່າ: ຂະບວນວິວັດການຫັນປ່ຽນຂອງເກົາຫຼີໃຕ້ໄດ້ແກ່ຍາວແຕ່ປີ 1977 ເຖິງປີ 1995, ໃນໄລຍະເວລາດັ່ງກ່າວນັ້ນ, ການປະກອບສ່ວນຂອງກະສິກໍາໃນຈີດີພີໄດ້ຫຼຸດລົງຈາກ 22% ມາເປັນ 5%, ອຸດສາຫະກໍາ - ກໍ່ສ້າງ ໄດ້ເພີ່ມຂຶ້ນຈາກ 28% ມາເປັນ 36% (ໃນນັ້ນ, ການປະດິດແລະປຸງແຕ່ງ ໄດ້ເພີ່ມຂຶ້ນຈາກ 21% ມາເປັນ 26%), ການບໍລິການເພີ່ມຂຶ້ນຈາກ 39% ມາເປັນ 49%. ຂະບວນວິວັດການຫັນປ່ຽນຂອງສິງກະໂປ ໄດ້ແກ່ຍາວເປັນເວລາ 20 ປີ, ນັບແຕ່ປີ 1971 ເຖິງປີ 1991, ໃນໄລຍະດັ່ງກ່າວນີ້, ການປະກອບສ່ວນຂອງກະສິກໍາ ໃນຈີດີພີໄດ້ຫຼຸດລົງຈາກ 3% ມາເປັນ 0,2%, ອຸດສາຫະກໍາ - ກໍ່ສ້າງ ໄດ້ເພີ່ມຂຶ້ນຈາກ 28% ມາເປັນ 33% (ໃນນັ້ນ, ການປະດິດແລະປຸງແຕ່ງໄດ້ເພີ່ມຂຶ້ນຈາກ 19% ມາເປັນ 25%), ການບໍລິການຫຼຸດລົງຈາກ 64% ມາເປັນ 63%. ມາເລເຊຍໃຊ້ເວລາຫຼາຍກວ່າ 40 ປີ, ນັບແຕ່ປີ 1977 ເຖິງປີ 2019, ເພື່ອເຮັດໃຫ້ຈີດີພີສະເລ່ຍຕໍ່ຫົວຄົນເພີ່ມຂຶ້ນຈາກ 1.000 ໂດລາສະຫະລັດມາເປັນ 11.414 ໂດລາສະຫະລັດ, ອາດຈະບັນລຸມາດຖານກຳນົດເປັນປະເທດທີ່ມີລາຍໄດ້ສູງໃນສອງສາມປີຕໍ່ໜ້າ. ໃນໄລຍະນີ້, ການປະກອບສ່ວນ ຂອງກະສິກໍາໃນຈີດີພີໄດ້ຫຼຸດລົງຈາກ 28% ມາເປັນ 7%, ອຸດສາຫະກໍາ-ກໍ່ສ້າງໄດ້ເພີ່ມຂຶ້ນໃນລະດັບສູງສຸດເຖິງ 49% ໃນປີ 2004 ແລ້ວຫຼຸດລົງມາຢູ່ລະດັບ 37% ໃນປີ 2019 (ໃນນັ້ນ, ອຸດສາຫະກໍາປະດິດແລະປຸງແຕ່ງໄດ້ເພີ່ມຂຶ້ນຈາກ 20% ສູ່ລະດັບສູງສຸດເຖິງ 37% ໃນຕົ້ນຊຸມປີ 2000 ແລ້ວຄ່ອຍໆຫຼຸດລົງມາໃນລະດັບ 21% ໃນປີ 2019), ການບໍລິການເພີ່ມຂຶ້ນຈາກ 33% ມາເປັນ 55%.
ຫວຽດນາມກາຍເປັນປະເທດທີ່ມີລາຍໄດ້ປານກາງນັບແຕ່ປີ 2008, ໃຊ້ເວລາຫຼາຍກວ່າ 10 ປີ, ຂະບວນວິວັດການຫັນປ່ຽນໂຄງປະກອບເສດຖະກິດຂອງຫວຽດນາມ ໄດ້ດໍາເນີນການຊັກຊ້າກວ່າ ເມື່ອທຽບກັບບັນດາປະເທດທີ່ລິເລີ່ມກ່ອນ, ເສັ້ນທາງການຂະຫຍາຍຕົວຍັງບໍ່ທັນມີບາດກ້າວບຸກທະລຸ ນັບຕັ້ງແຕ່ຊຸມປີທໍາອິດ, ຄືກັບຍີ່ປຸ່ນ, ເກົາຫຼີໃຕ້, ສິງກະໂປ. ແຕ່ປີ 2010 ເຖິງປີ 2019, ການປະກອບສ່ວນຂອງກະສິກໍາໃນ ຈີດີພີ ຫວຽດນາມໄດ້ຫຼຸດລົງຈາກ 18,3% ມາເປັນ 13,9%, ອຸດສາຫະກໍາ-ກໍ່ສ້າງ ໄດ້ເພີ່ມຂຶ້ນຈາກ 32,1% ມາເປັນ 34,4% (ໃນນັ້ນ, ອຸດສາຫະກໍາປະດິດແລະປຸງແຕ່ງ ໄດ້ເພີ່ມຂຶ້ນຈາກ 12,9% ມາເປັນ 16,4%), ການບໍລິການເພີ່ມຂຶ້ນຈາກ 36,9% ມາເປັນ 41,6%. ລະດັບການເຕີບໂຕສະເລ່ຍຂອງຫວຽດນາມໃນ 10 ປີທໍາອິດ ບັນລຸ 6%, ຕໍ່າກວ່າລະດັບສະເລ່ຍ 10 ປີທໍາອິດຂອງບັນດາປະເທດທີ່ລິເລີ່ມກ່ອນ (ຍີ່ປຸ່ນ ບັນລຸ 7%, ເກົາຫຼີໃຕ້ ບັນລຸ 8,9%, ສິງກະໂປ ບັນລຸ 8,8%).
ເສັ້ນທາງການເຕີບໂຕຂອງແຕ່ລະປະເທດໄດ້ໃຫ້ເຫັນເຖິງຄວາມແຕກຕ່າງ ລະຫວ່າງບັນດາປະເທດທີ່ບໍ່ຕິດກັບດັກ ແລະພວມຕິດກັບດັກລາຍໄດ້ປານກາງ. ເຖິງວ່າລະດັບການເຕີບໂຕສະເລ່ຍ ໃນຕະຫຼອດໄລຍະຂອງບັນດາປະເທດບໍ່ມີຄວາມຜິດໂຕນທີ່ໃຫຍ່ຫຼວງ, ພຽງແຕ່ຢູ່ໃນລະດັບ 6% ຫາ 8% ເທົ່ານັ້ນ, ແຕ່ບັນດາປະເທດທີ່ປະສົບຜົນສໍາເລັດເຊັ່ນ: ຍີ່ປຸ່ນ, ເກົາຫຼີໃຕ້, ສິງກະໂປ ສາມາດບັນລຸໄດ້ລະດັບການເຕີບໂຕທີ່ໄວແລະຕໍ່ເນື່ອງ ໃນສອງສາມປີທໍາອິດ, ສ້າງເປັນຖ່ວງທ່າຂະຫຍາຍຕົວທີ່ເຂັ້ມ ແຂງໃຫ້ແກ່ຊຸມປີຕໍ່ໄປ, ໃນຂະນະນັ້ນ, ບັນດາປະເທດທີ່ພວມຕິດກັບດັກລາຍໄດ້ປານກາງ ບໍ່ສາມາດສ້າງໄດ້ບາດກ້າວບຸກທະລຸທີ່ເຂັ້ມແຂງໃນໄລຍະທໍາອິດ, ພາຍຫຼັງທີ່ບັນລຸໄດ້ ມາດຖານກໍານົດລາຍໄດ້ປານກາງແລ້ວ, ການເຕີບໂຕກໍ່ມີສັນຍານສະຫງັກຊັກຊ້າລົງ, ແກ່ຍາວເວລາການກ້າວຂຶ້ນສູ່ມາດຖານກໍານົດລາຍໄດ້ທີ່ສູງກວ່າ. ເກົາຫຼີໃຕ້ ແລະ ສິງກະໂປ ມີຈຸດເລີ່ມຮ່ວມກັນຄືແຕ່ປີ 1977, ໃນສອງສາມປີທໍາອິດພາຍຫຼັງທີ່ການເປັນປະເທດມີລາຍໄດ້ປານກາງ, ສອງປະເທດນີ້ ມີເສັ້ນທາງການເຕີບໂຕທີ່ໃກ້ຄຽງກັນ, ແຕ່ວ່າ ນັບແຕ່ປີ 1984 ເປັນຕົ້ນມາ, ສອງປະເທດມີທິດທາງເດີນທີ່ແຕກຕ່າງກັນ ຢ່າງສິ້ນເຊີງ. ໃນຂະນະທີ່ເກົາຫຼີໃຕ້ ມີການເຕີບໂຕຢ່າງໄວວາ, ຄ່ອຍຮັດແຄບໄລຍະຫ່າງກັບຍີ່ປຸ່ນ, ສິງກະໂປ ແລະ ໜີຫ່າງຈາກບັນດາປະເທດທີ່ຍັງເຫຼືອເທື່ອລະກ້າວ, ສ່ວນມາເລເຊຍ ພັດບໍ່ສາມາດສ້າງໄດ້ບາດກ້າວບຸກທະລຸຄືກັບເກົາຫຼີໃຕ້, ມີການເຕີບໂຕທີ່ຊັກຊ້າກວ່າ ແລະ ໃຊ້ເວລາຫຼາຍກວ່າ ເພື່ອບັນລຸເຖິງລະດັບລາຍໄດ້ອັນດຽວກັນ. ໃນໄລຍະເສລາ 10 ປີ, ແຕ່ປີ 1985 ເຖິງປີ 1995, ຈີດີພີສະເລ່ຍຕໍ່ຫົວຄົນ ຂອງເກົາຫຼີໃຕ້ ໄດ້ເພີ່ມຂຶ້ນ 5 ເທື່ອ, ໃນຂະນະທີ່ມາເລເຊຍ ເພີ່ມຂຶ້ນພຽງ 2 ເທື່ອເທົ່ານັ້ນ. ເມື່ອສົມທຽບດ້ານມາດຕະການ, ນະໂຍບາຍທີ່ສອງປະເທດໄດ້ຈັດຕັ້ງຜັນຂະຫຍາຍໃນໄລຍະນີ້ ກໍ່ສາມາດຖອດຖອນໄດ້ບົດຮຽນປະສົບການທີ່ເປັນປະໂຫຍດ ໃຫ້ແກ່ບັນດາປະເທດທີ່ເດີນຕາມຫຼັງ ເພື່ອໃຫ້ຫຼີກລ່ຽງໄດ້ຈາກກັບດັກລາຍໄດ້ປານກາງ.
ໃນໄລຍະແຕ່ປີ 1960 ເຖິງປີ 1990, ເກົາຫຼີໃຕ້ ແລະ ມາເລເຊຍ ລ້ວນແຕ່ໄດ້ນໍາໃຊ້ບັນດາແຜນການ 5 ປີ ເພື່ອເປັນພື້ນຖານໃຫ້ແກ່ການປະກາດໃຊ້ບັນດານະໂຍບາຍພັດທະນາເສດຖະກິດ, ການຫັນເປັນອຸດສາຫະກໍາໃນໄລຍະກາງ. ແຜນການຄັ້ງທີໜຶ່ງຂອງເກົາຫຼີໃຕ້ ເລີ່ມຕົ້ນແຕ່ປີ 1962 ເຖິງປີ 1966, ໃນໄລຍະເວລາ 30 ປີ, ດ້ວຍພວງພະນັງ 7 ແຜນການ ແລະ ສິ້ນສຸດດ້ວຍແຜນການຄັ້ງທີ 7 ໃນປີ 1992 ເຖິງປີ 1996. ສາມແຜນການທໍາອິດໄດ້ພາເກົາຫຼີໃຕ້ ຈາກປະເທດດ້ອຍພັດທະນາ ກາຍເປັນປະເທດທີ່ມີລາຍໄດ້ປານກາງ ແລະ ສີ່ແຜນການຕໍ່ມາ, ໄດ້ນໍາພາເກົາຫຼີໃຕ້ ກາຍເປັນປະເທດທີ່ມີລາຍໄດ້ສູງ. ພວງພະນັງແຜນການຂອງມາເລເຊຍ ໄດ້ເລີ່ມຕົ້ນແຕ່ປີ 1966 ແລະ ຍັງສືບຕໍ່ມາຮອດປັດຈຸບັນນີ້, ດ້ວຍແຜນການໃນມໍ່ໆມານີ້ ແມ່ນແຜນການຄັ້ງທີ 12 ສໍາລັບໄລຍະແຕ່ປີ 2021 ເຖິງປີ 2025. ກ້າວເຂົ້າສູ່ໄລຍະແຜນການຄັ້ງທີສາມ (1976 - 1980), ມາເລເຊຍ ໄດ້ກາຍເປັນປະເທດທີ່ມີລາຍໄດ້ປານກາງ, ໂດຍຜ່ານການປະຕິບັດ 10 ແຜນການ, ມາເລເຊຍຈິ່ງສາມາດກາຍເປັນປະເທດທີ່ມີລາຍໄດ້ສູງ.
ມາຮອດຊຸມປີ 1960, ເກົາຫຼີໃຕ້ຍັງເປັນໜຶ່ງໃນບັນດາພື້ນຖານເສດຖະກິດກະສິກໍາ ທີ່ທຸກຈົນ, ລ້າຫຼັງ, ຖືກສົງຄາມທໍາລາຍມ້າງເພ ແລະ ຕົກຢູ່ໃນວົນວຽນແຫ່ງຄວາມທຸກຍາກຂາດເຂີນ, ດ້ວຍມາດຕາຖ່ວງກະສິກໍາໃນຈີດີພີກວມເອົາເຖິງ 36%, ຈີດີພີສະເລ່ຍຕໍ່ກົວຄົນຢູ່ໃນລະດັບ 158 ໂດລາສະຫະລັດ. ພາຍຫຼັງທີ່ປະທານາທິບໍດີ ປາກຈຸງຮີ ຂຶ້ນກໍາອໍານາດການປົກຄອງໃນປີ 1961 ແລະ ຕັດສິນໃຈນຳພາປະເທດຊາດກ້າວເຖິງຄວາມເປັນເຈົ້າຕົນເອງທາງດ້ານເສດຖະກິດ, ບັນດາແຜນການ 5 ປີໄດ້ຮັບການສ້າງຂຶ້ນດ້ວຍບັນດາຈຸດໝາຍທີ່ເຕັມດ້ວຍຄວາມມຸ່ງຫວັງອັນສູງສົ່ງ ແລະ ບັນດານະໂຍບາຍທີ່ ເຂັ້ມແຂງ ເພື່ອບັນໄດ້ຈຸດໝາຍທີ່ວາງອອກ. ເຊັ່ນດຽວກັນ, ມາເລເຊຍ ໃນໄລຍະຕົ້ນຊຸມປີ 1960, ກໍ່ເປັນປະເທດກະສິກໍາໜຶ່ງທີ່ມີມາດຕາຖ່ວງກະສິກໍາກວມເອົາເຖິງ 43,7% ຂອງຈີດີພີ ແລະລະດັບລາຍໄດ້ສະເລ່ຍຕໍ່ຫົວຄົນບັນລຸພຽງ 235 ໂດລາສະຫະລັດ.
ເຖິງວ່າຈະຢູ່ໃນລະດັບການຂະຫຍາຍຕົວຮ່ວມກັນ ແລະ ຮ່ວມປະເຊີນໜ້າກັບ ບັນດາບັນຫາທີ່ຄ້າຍຄືກັນ ຄື: ຄວາມທຸກຍາກ, ຄວາມດ້ອຍພັດທະນາ, ແຕ່ວິທີການແກ້ໄຂບັນຫາຂອງແຕ່ລະປະເທດ ມີຄວາມແຕກຕ່າງກັນ. ໃນຂະນະທີ່ເກົາຫຼີໃຕ້ມີການກຳນົດທິດທີ່ຈະແຈ້ງ ໃນການກໍານົດບັນດາບຸລິມະສິດການພັດທະນາ, ສຸມໃສ່ການພັດທະນາບັນດາຂະແໜງອຸດສາຫະກໍາ, ເລີ່ມຕົ້ນຈາກບັນດາຂະແໜງອຸດສາຫະກໍາທີ່ເປັນພື້ນຖານ (ການຫັນເປັນໄຟຟ້າ, ກັ່ນຕອງນໍ້າມັນ, ຝ້າຍສັງເຄາະ…), ຕໍ່ມາແມ່ນບັນດາຂະແໜງນໍາໃຊ້ເຕັກໂນໂລຊີ ແລະ ທັກສະຂອງຄົນງານ, ການເຂົ້າເຖິງຕາມຕ່ອງໂສ້ການສະໜອງ, ຕ່ອງໂສ້ມູນຄ່າ (ຝຸ່ນ ຕິດພັນກັບກະສິກໍາ; ໂລຫະ, ເຫຼັກ, ທາດເຄມີ ກັບການຕໍ່ກໍາປັ່ນ, ເຄື່ອງຈັກ, ອຸປະກອນ; ທາດທຣານຊິດເຕີ້ຕິດພັນກັບເອເລັກໂຕຣນິກ …), ມາເລເຊຍພັດສຸມໃສ່ບັນດາບັນຫາສັງຄົມເປັນຕົ້ນຕໍ ຕະຫຼອດທັງບັນດາໄລຍະປະຕິບັດແຜນການ (ລົບລ້າງຄວາມທຸກຍາກ, ຄວາມຍຸຕິທໍາສັງຄົມ, ການພັດທະນາທີ່ເທົ່າທຽມກັນລະຫວ່າງບັນດາຊົນເຜົ່າ…). ເຖິງວ່າໃນພຶດຕິກໍາຕົວຈິງ, ລັດຖະບານ ມາເລເຊຍໄດ້ຈັດຕັ້ງຜັນຂະຫຍາຍນະໂຍບາຍຫຼາຍຢ່າງ ເພື່ອໜູນຊ່ວຍການພັດທະນາອຸດສາຫະກໍາພາຍໃນປະເທດ ເຊັ່ນ: ແຜນງານພັດທະນາຜູ້ຮັບເໝົາສໍາຮອງ, ແຜນງານພັດທະນາເຄື່ອງໝາຍການຄ້າຍານຍົນພາຍໃນປະເທດ (Proton, Perodua), ແຕ່ວ່າບັນດານະໂຍບາຍເຫຼົ່ານີ້ ພັດບໍ່ໄດ້ຮັບການຈັດຕັ້ງຜັນຂະຫຍາຍຢ່າງເປັນລະບົບ ຄືກັບເກົາຫຼີໃຕ້ ແລະບໍ່ໄດ້ສະແດງອອກຢ່າງຈະແຈ້ງ ໃນຈຸດໝາຍສັງລວມຂອງບັນດາແຜນການ 5 ປີ. ກົງກັນຂ້າມ, ສໍາລັບເກົາຫຼີໃຕ້ແລ້ວ, ການທີ່ບໍ່ສະເໜີບັນຫາສັງຄົມຢູ່ໃນຈຸດໝາຍການພັດທະນາຂອງບັນດາແຜນການ 5 ປີນັ້ນ ບໍ່ໝາຍຄວາມວ່າ ເກົາຫຼີໃຕ້ ບໍ່ຖືສໍາຄັນຕໍ່ການແກ້ໄຂບັນດາບັນຫາເຫຼົ່ານີ້, ຫາກໃນຕົວຈິງແລ້ວ, ເກົາຫຼີໃຕ້ໄດ້ເລືອກເຟັ້ນການພັດທະນາອຸດສາຫະກໍາເປັນຈຸດເລີ່ມຕົ້ນ, ຜ່ານການພັດທະນາຂອງບັນດາຂະແໜງອຸດສາຫະກໍາ, ບັນດາບັນຫາສັງຄົມ ກໍ່ໄດ້ຮັບການແກ້ໄຂໄປພ້ອມໆກັນ. ການພັດທະນອຸດສາຫະກໍາສາມາດສ້າງໄດ້ວຽກເຮັດງານທໍາຫຼາຍຂຶ້ນ, ເພີ່ມລາຍໄດ້ໃຫ້ແກ່ຊາວຜູ້ອອກແຮງງານ ແລະທົ່ວສັງຄົມ, ຮັບປະກັນການພັດທະນາທີ່ສະເໝີພາບລະຫວ່າງບັນດາເຂດ, ທ້ອງຖິ່ນຕ່າງໆ.
ກັບດັກມູນຄ່າເພີ່ມຕໍ່າ ແລະ ກໍາລັງອຸດສາຫະກໍາພາຍໃນປະເທດ
ຄຽງຄູ່ກັບນິຍາມກັບດັກລາຍໄດ້ປານກາງ, ນິຍາມກັບດັກມູນຄ່າເພີ່ມຕໍ່າ ກໍ່ຖືກນໍາໃຊ້ ເພື່ອເວົ້າເຖິງສະພາບການພັດທະນາເສດຖະກິດຂອງປະເທດໜຶ່ງໆ. ກອງປະຊຸມຂອງອົງການສະຫະປະຊາຊາດ ກ່ຽວກັບການຄ້າ ແລະ ການພັດທະນາ (UNCTAD) ໄດ້ໃຫ້ການພັນລະນາເຖິງປະເທດຊາດໜຶ່ງທີ່ຕິດກັບດັກມູນຄ່າເພີ່ມຕໍ່າວ່າ: ເມື່ອປະເທດຊາດດັ່ງກ່າວມີແຕ່ດຶງດູດໄດ້ການລົງທຶນໂດຍກົງຈາກຕ່າງປະເທດ (FDI) ເປັນອັນຕົ້ນຕໍຈາກບັນດາວິສາຫະກິດທີ່ບໍ່ມີຈຸດປະສົງ ສ້າງການເຊື່ອມໂຍງກັບບັນດາພື້ນຖານເສດຖະກິດພາຍໃນປະເທດ, ບໍ່ສາມາດສ້າງໄດ້ຜົນກະທົບທີ່ແຜ່ກວ້າງ ແລະ ເຄື່ອນໄຫວດ້ວຍຈຸດໝາຍໄລຍະສັ້ນໆ, ບັນດາວິສາຫະກິດດັ່ງກ່າວ ມີປະສິດທິພາບການເຄື່ອນໄຫວທີ່ຕໍ່າ ເມື່ອພິຈາລະນາໃນທຸກດ້ານ: ການລົງທຶນ, ສະມັດຕະພາບ ແລະ ການພັດທະນາທັກສະ, ການລົງທຶນຕົ້ນຕໍເຂົ້າໃນບັນດາຂະແໜງການທີ່ນໍາໃຊ້ແຮງງານ, ການແຂ່ງຂັນດ້ານລາຄາແທນໃຫ້ການແຂ່ງຂັນດ້ານຄຸນນະພາບ, ໄລຍະເວລາການສົ່ງມອບສິນຄ້າ ແລະມັກຈະມອງວ່າແຮງງານເປັນປັດໄຈດ້ານລາຍຈ່າຍຫຼາຍກວ່າ ທີ່ຈະເປັນແຫຼ່ງກໍາລັງແຮງທີ່ຕ້ອງໄດ້ຮັບການພັດທະນາ.
ນິຍາມຂອງ UNCTAD ຫາກໍ່ເປັນພຽງການສັງເກດດ້ານດຽວຈາກຂົງເຂດການລົງທຶນໂດຍກົງຈາກຕ່າງປະເທດ, ໃນຂະນະທີ່ປະເທດຕິດກັບດັກມູນຄ່າເພີ່ມຕໍ່າອາດຈະບໍ່ແມ່ນພຽງແຕ່ຍ້ອນຂົງເຂດການລົງທຶນໂດຍກົງຈາກຕ່າງປະເທດເທົ່ານັ້ນ, ຫາກຍັງແມ່ນ ຍ້ອນສາເຫດອື່ນໆອີກ, ຕົ້ນຕໍແມ່ນຂຶ້ນກັບຄວາມອາດສາມາດເປັນເຈົ້າຕົນເອງ, ສ້າງຄວາມເຂັ້ມແຂງດ້ວຍຕົນເອງ ຂອງຂົງເຂດເອກະຊົນພາຍໃນປະເທດ, ຂຶ້ນກັບຄວາມອາດສາມາດຂອງຂົງເຂດເອກະຊົນທີ່ອາດຈະເຕີບໃຫຍ່ຂະຫຍາຍຕົວ, ມີຄວາມເປັນເອກະພາບ, ເປັນເຈົ້າດ້ານພື້ນຖານເສດຖະກິດ ແລະມີກໍາລັງຄວາມສາມາດແຂ່ງຂັນເທິງຕະຫຼາດໂລກ, ຄ່ອຍໆຫຼຸດພົ້ນຈາກການຂຶ້ນກັບແຫຼ່ງກໍາລັງແຮງຈາກທາງນອກ. ພິຈາລະນາທາງດ້ານທາດແທ້ແລ້ວ, ກັບດັກມູນຄ່າເພີ່ມຕໍ່າ ກໍ່ແມ່ນໜຶ່ງໃນການສະ ແດງອອກຂອງກັບດັກລາຍໄດ້ປານກາງ, ມັນເກີດຂຶ້ນກໍ່ຕໍ່ເມື່ອປະເທດໜຶ່ງໆບໍ່ສາມາດສ້າງພື້ນຖານອຸດສາຫະກໍາພາຍໃນປະເທດໃຫ້ເຂັ້ມແຂງໄດ້ (ຂົງເຂດວິສາຫະກິດເອກະຊົນພາຍໃນປະເທດ), ການເຕີບໂຕຕົ້ນຕໍແມ່ນອີງໃສ່ແຫຼ່ງກໍາລັງແຮງພາຍນອກ (ຂົງເຂດ ການລົງທຶນໂດຍກົງຈາກຕ່າງປະເທດ), ເມື່ອທ່າໄດ້ປຽບພາຍໃນປະເທດບໍ່ມີຫຼົງຫຼົງເຫຼືອແລ້ວ (ລາຍຈ່າຍແຮງງານທີ່ຕໍ່າ, ສິດພິເສດດ້ານພາສີອາກອນທີ່ໜ້າຈັບໃຈ…), ບັນດາວິສາຫະກິດທີ່ມີການລົງທຶນໂດຍກົງຈາກຕ່າງປະເທດ ໄດ້ຫັນໄປສູ່ບັນດາປະເທດທີ່ມີທ່າໄດ້ປຽບດີກວ່າ ແລະ ລາຍຈ່າຍໃນການຜະລິດເພື່ອການແຂ່ງຂັນດີກວ່າ (ບັນດານັກເສດຖະກິດເອີ້ນປະກົດການດັ່ງກ່າວນີ້ວ່າ ຮູບແບບການໂບຍບິນຂອງຝູງຫ່ານຟ້າ - flying geese) ອັນພາໄປເຖິງຂະບວນວິວັດຫຼຸດຜ່ອນອຸດສາຫະກໍາ (deindustrialzation), ເຫຼືອໄວ້ແຕ່ຂະແໜງອຸດສາຫະກໍາທີ່ປະກອບດ້ວຍບັນດາວິສາຫະກິດພາຍໃນປະເທດ ທີ່ບໍ່ມີຄວາມສາມາດແຂ່ງຂັນກັບບັນດາເສດຖະກິດທີ່ຂະຫຍາຍຕົວທາງດ້ານເຕັກໂນໂລຊີ, ຫຼື ກັບພື້ນຖານເສດຖະກິດທີ່ມີຄ່າແຮງງານຕໍ່າກວ່າ ໃນການຜະລິດສິນຄ້າລາຄາຖືກ.
ໃນໄລຍະແຕ່ປີ 1951 ເຖິງປີ 1989, ບັນດາພື້ນຖານເສດຖະກິດໃໝ່ທີ່ຫັນເປັນອຸດສາຫະກໍາ (NIEs) ເຊັ່ນ: ເກົາຫຼີໃຕ້, ສິງກະໂປ, ບັນດາອານາເຂດໄຕ້ຫວັນ, ຮົງກົງ (ສປ ຈີນ) ແລະບັນດາປະເທດ ASEAN 4 (ມາເລເຊຍ, ໄທ, ອິນໂດເນເຊຍ, ຟີລິບປິນ) ລ້ວນແຕ່ສາມາດດຶງດູດແຫຼ່ງທຶນໃຫຍ່ ຈາກບັນດາວິສາຫະກິດຍີ່ປຸ່ນ, ດ້ວຍລວມຍອດທຶນທີ່ລົງໂດຍກົງທັງໝົດເຂົ້າໃນ NIEs ຈໍານວນ 19.919 ຕື້ໂດລາສະຫະລັດ ແລະ ເຂົ້າໃນ ASEAN ຈໍານວນ 17.531 ຕື້ໂດລາສະຫະລັດ(1). ພາຍຫຼັງສອງ, ສາມທົດສະວັດຕໍ່ມາ, ບັນດາພື້ນຖານເສດຖະກິດໃໝ່ທີ່ຫັນເປັນອຸດສາຫະກໍາ ກໍ່ສາມາດສ້າງສາພື້ນຖານອຸດສາຫະກໍາພາຍໃນປະເທດທີ່ເຂັ້ມແຂງດ້ວຍຕົນເອງໄດ້, ໂດຍບໍ່ຂຶ້ນກັບຕ່າງປະເທດອີກຕໍ່ໄປ, ຊໍ້າບໍ່ໜໍາຍັງສາມາດແຂ່ງຂັນໂດບກົງກັບບັນດາວິສາຫະກິດຍີ່ປຸ່ນ, ໃນຂະນະດຽວກັນນັ້ນ ບັນດາປະເທດ ASEAN4 ມາເຖິງປັດຈຸບັນຍັງຂຶ້ນກັບບັນດາວິສາຫະກິດທີ່ມີການລົງທຶນໂດຍກົງຈາກຕ່າງປະເທດ ໃນເກືອບວ່າທຸກຂະແໜງອຸດສາຫະກໍາ. ມາໃນຊຸມປີ 1980, ໃນຂະນະທີ່ບັນດາວິສາຫະກິດຍີ່ປຸ່ນ ຢູ່ບັນດາພື້ນຖານເສດຖະກິດ NIEs ສາມາດບັນລຸໄດ້ມາດຕາສ່ວນການຫັນເປັນພາຍໃນຫຼາຍກວ່າ 50% ແຕ່ຢູ່ ASEAN4, ມາດຕາສ່ວນການເກັບຊື້ພາຍໃນປະເທດຂອງບັນດາວິສາຫະກິດຍີ່ປຸ່ນ ພຽງແຕ່ຢູ່ໃນລະດັບ 42% ເທົ່ານັ້ນ, ແຕ່ຕົ້ນຕໍແລ້ວກໍ່ແມ່ນຈາກບັນດາວິສາຫະກິດທີ່ມີການລົງທຶນໂດຍກົງຈາກຕ່າງປະເທດ. ຢູ່ບັນດາພື້ນຖານເສດຖະກິດ NIEs, ສ່ວນໃຫຍ່ແລ້ວແມ່ນບັນດາວິສາຫະກິດທີ່ມີການລົງທຶນໂດຍກົງຈາກຍີ່ປຸ່ນ ສາມາດຖອດຊ່ຽວຊານຄົນຍີ່ປຸ່ນກັບຄືນປະເທດ, ປ່ອຍໃຫ້ຄົນປະຈໍາຖິ່ນນັ້ນເປັນຜູ້ຄຸ້ມຄອງແລະຂັບເຄື່ອນໂຮງງານດ້ວຍຕົນເອງ; ແຕ່ຢູ່ບັນດາປະເທດ ASEAN4 ມາຮອດປັດຈຸບັນນີ້ ຍັງຂຶ້ນກັບການນໍາຂັ້ນກາງແລະຂັ້ນສູງ ຂອງຄົນຍີ່ປຸ່ນ ໂດຍບໍ່ໄດ້ຖ່າຍທອດໃຫ້ແກ່ຖັນແຖວບຸກຄະລາກອນທີ່ເປັນຄົນປະຈໍາຖິ່ນ. ຄວາມແຕກຕ່າງລະຫວ່າງບັນດາພື້ນຖານເສດຖະກິດ NIEs ແລະ ASEAN4 ໄດ້ໃຫ້ເຫັນເຖິງບົດບາດນໍາພາຂອງຂະແໜງອຸດສາຫະກໍາປະດິດ, ປຸງແຕ່ງ ແລະ ຄວາມສໍາຄັນຂອງກໍາລັງຄວາມສາມາດ ຂອງວິສາຫະກິດອຸດສາຫະກໍາ ກໍ່ຄືຊັບພະຍາກອນມະນຸດຂະແໜງອຸດສາຫະກໍາພາຍໃນ ປະເທດ ໃນຂະບວນວິວັດການຫັນເປັນປະເທດອຸດສາຫະກໍາ, ທັນສະໄໝ ແລະພາປະເທດຊາດຫຼີກລ່ຽງຈາກກັບດັກລາຍໄດ້ປານກາງ.
ນັບແຕ່ການເປີດປະຕູເສດຖະກິດ, ຫວຽດນາມໄດ້ກາຍເປັນສະຖານທີ່ທີ່ດຶງດູດນັກລົງທຶນຕ່າງປະເທດ. ໃນຊຸມປີມໍ່ໆມານີ້, ເວລາໃດຫວຽດນາມກໍນໍາໜ້າບັນດາປະເທດອາຊຽນ ດ້ານການດຶງດູດການລົງທຶນຈາກຕ່າງປະເທດ. ມາຮອດທ້າຍປີ 2019, ຫວຽດນາມສາມາດດຶງດູດໄດ້ເກືອບ 40.000 ໂຄງການ, ດ້ວຍລວມຍອດທຶນຈົດທະບຽນທັງໝົດບັນລຸຫຼາຍກວ່າ 363,3 ຕື້ໂດລາສະຫະລັດ. ຖ້າຄິດໄລ່ຕາມອັດຕາສ່ວນຮ້ອຍ (%) ຂອງຈີດີພີ ຫຼືຄິດໄລ່ຕາມຫົວຄົນແລ້ວ, ການລົງທຶນໂດຍກົງຈາກຕ່າງປະເທດໃນຫວຽດນາມໄດ້ລື່ນກາຍຈີນ, ອິນເດຍ ແລະ ຫຼາຍປະເທດໃນອາຊີຕາເວັນອອກສຽງໃຕ້. ໃນບັນດາໂຄງການລົງທຶນໂດຍກົງຈາກຕ່າງປະເທດຢູ່ຫວຽດນາມ, ຫຼາຍໂຄງການມີມູນຄ່າສູງຂອງບັນດາກຸ່ມບໍລິສັດຂ້າມຊາດແຖວໜ້າໃນຫຼາຍຂົງເຂດ. ແຕ່ວ່າ ການລົງທຶນໂດຍກົງຈາກຕ່າງປະເທດໃນຫວຽດນາມ ສ່ວນໃຫຍ່ແມ່ນສຸມໃສ່ບັນດາຂະແໜງການຂຸດຄົ້ນຕະຫຼາດ ເຊັ່ນການເຄື່ອນໄຫວທຸລະກິດອະສັງຫາລິມະຊັບ ຫຼື ບັນດາຂະແໜງປະດິດ, ປຸງແຕ່ງ ທີ່ນໍາໃຊ້ແຮງງານ, ມູນຄ່າເພີ່ມຕໍ່າ ເຊັ່ນ: ຕັດຫຍິບ, ຜະລິດເກີບ, ຜະລິດຕະພັນຈາກຢາງພາລາ, ພາດສະຕິກ, ສະບຽງອາຫານ, ເຄື່ອງດື່ມ, ເຄື່ອງເຟີນີເຈີ ແລະ ໄມ້, ເຈ້ຍ… ຕາມບົດລາຍງານຂອງທະນາຄານໂລກ (ປີ 2018) ໄດ້ໃຫ້ຮູ້ວ່າ: ນັກລົງທຶນຈໍານວນຫຼາຍມັກກ່າວວ່າ ລາຍຈ່າຍຄ່າແຮງງານ ແລະ ພະລັງງານຕໍ່າ ກໍ່ຄືນະໂຍບາຍການໃຫ້ສິດພິເສດດ້ານພາສີອາກອນທີ່ຈັບໃຈ ແມ່ນບັນດາເຫດຜົນຫຼັກໆ ເພື່ອເຮັດໃຫ້ທຶນຫຼັ່ງໄຫຼເຂົ້າມາຫວຽດນາມ, ໃນຂະນະດຽວກັນນັ້ນ, ກໍ່ມີວິສາຫະກິດທີ່ມີການລົງທຶນໂດຍກົງຈາກຕ່າງປະເທດຈໍານວນນ້ອຍທີ່ສຸດທີ່ກ່າວວ່າ: ສີມືແຮງງານສູງ ຫຼື ຕ່ອງໂສ້ການສະໜອງພາຍໃນປະເທດມີຄວາມສາມາດພຽງພໍເພື່ອການແຂ່ງຂັນ ແມ່ນທ່າແຮງຂອງຫວຽດນາມ. ບົດລາຍງານຍັງຊີ້ໃຫ້ເຫັນວ່າ ເພື່ອສາມາດຫຼີກລ່ຽງກັບດັກລາຍໄດ້ປານກາງ ຫຼື ກັບດັກມູນຄ່າເພີ່ມຕໍ່າ ແລະ ກາຍເປັນປະເທດທີ່ມີລາຍໄດ້ສູງ, ຫວຽດນາມ ຕ້ອງມີຍຸດທະສາດດຶງດູດການລົງທຶນໂດຍກົງຈາກຕ່າງປະເທດລຸ່ນໃໝ່, ຕິດພັນກັບບັນດາຍຸດທະສາດ ແລະ ການກໍານົດແຜນພັດທະນາຂອງປະເທດຊາດ, ສ້າງບັນດາຕ່ອງໂສ້ການສະໜອງ ແລະ ກຸ່ມເຊື່ອມໂຍງຂະແໜງອຸດສາຫະກໍາ, ສຸມໃສ່ບັນດາຂະແໜງ, ຂັ້ນຕອນຕ່າງໆທີ່ສ້າງເປັນມູນຄ່າເພີ່ມສູງ, ນໍາໃຊ້ເຕັກໂນໂລຊີທີ່ເປັນມິດກັບສິ່ງແວດລ້ອມ ແລະ ສິ້ນເປືອງພະລັງງານໜ້ອຍ, ດຶງດູດເອົາບັນດາໂຄງການ, ບັນດານັກລົງທຶນ ເພື່ອການພັດທະນາທີ່ຍືນຍົງ ຕາມທິດຖືສໍາຄັນຄຸນນະພາບ ແລະ ປະສິດທິພາບທາງເສດຖະກິດ - ສັງຄົມ, ຮັບປະກັນວຽກງານປ້ອງກັນຊາດ - ປ້ອງກັນຄວາມສະຫງົບ ແລະ ເພີ່ມທະວີການເຊື່ອມຈອດກັບບັນດາວິສາຫະກິດພາຍໃນປະເທດ.
ເພື່ອໃຫ້ຂົງເຂດການລົງທຶນໂດຍກົງຈາກຕ່າງປະເທດສາມາດປະກອບສ່ວນ, ຊ່ວຍເຫຼືອໃຫ້ພື້ນຖານເສດຖະກິດຫວຽດນາມໄດ້ດີກວ່າເກົ່າ ໃນຂະບວນວິວັດການຫັນເປັນອຸດສາຫະກໍາ ທັນສະໄໝ ແລະ ການສັບຊ້ອນໂຄງປະກອບເສດຖະກິດຄືນໃໝ່ ຕາມທິດຍົກສູງສູງສະມັດຕະພາບ ແລະ ຄຸນຄ່າທີ່ສ້າງຂຶ້ນພາຍໃນປະເທດ, ຮັດແຄບໄລຍະຫ່າງ ກັບບັນດາປະເທດພັດທະນາ, ຫວຽດນາມຕ້ອງປ່ຽນແປງວິທີການດຶງດູດການລົງທຶນໂດຍກົງຈາກຕ່າງປະເທດ, ອີງໃສ່ບັນດາທ່າໄດ້ປຽບເພື່ອແຂ່ງຂັນດ້ວຍຄວາມເປັນເຈົ້າການ (ສີມືແຮງງານ, ຄວາມສາມາດປະດິດສ້າງ ແລະ ສິ່ງແວດລ້ອມທໍາມະຊາດ ແລະ ການດໍາເນີນທຸລະກິດ, ການລົງທຶນທີ່ສະດວກ), ແທນໃຫ້ຂໍ້ໄດ້ປຽບດ້ານການແຂ່ງຂັນແບບຄົງທີ່ແລະບໍ່ຍືນຍົງຄືແຕ່ກ່ອນ (ຊັບພະຍາກອນທໍາມະຊາດ, ແຮງງານທໍາມະດາ, ກົນໄກໃຫ້ສິດພິເສດທີ່ງ່າຍດາຍ ແລະ ດຶງດູດໃຈ).
ເວົ້າແບບລະອຽດຕົວຈິງແລ້ວ, ຫວຽດນາມຕ້ອງສຸມໃສ່ການດຶງດູງບັນດານັກລົງທຶນ ຕ່າງປະເທດທີ່ສາມາດ: 1. ສ້າງຄ່າແຮງງານທີ່ສູງກວ່າ (ສົ້ນອອກ/ແຮງງານມີຄຸນຄ່າສູງຂຶ້ນ); 2. ຊຸກຍູ້ການພັດທະນາທັກສະ, ການຖ່າຍທອດເຕັກໂນໂລຊີ, ການຄົ້ນຄວ້າ ແລະ ພັດທະນາພາຍໃນປະເທດ; 3. ຊຸກຍູ້ການນໍາໃຊ້ແຫຼ່ງກໍາລັງແຮງຢ່າງມີປະສິດທິພາບກວ່າເກົ່າ (ບໍ່ພຽງແຕ່ພະນັກງານເທົ່ານັ້ນ, ຫາກນັບທັງທີ່ດິນ, ແຫຼ່ງນໍ້າ, ວັດຖຸດິບ,…); 4. ສ້າງໂອກາດໃຫ້ວິສາຫະກິດ ແລະ ນັກລົງທຶນພາຍໃນປະເທດໄດ້ຮ່ວມືກັບບັນດາວິສາຫະກິດຕ່າງປະເທດ ຢູ່ໃນບັນດາຕ່ອງໂສ້ຄຸນຄ່າທົ່ວໂລກ, ໃນຂະນະທີ່ບໍ່ສາມາດກົດໜ່ວງນັກລົງທຶນ ແລະ ວິສາຫະກິດຂະໜາດກາງ ແລະ ຂະໜາດນ້ອຍພາຍໃນປະເທດ; 5. ຍົກສູງຄວາມສາມາດແຂ່ງຂັນຂອງບັນດາວິສາຫະກິດຫວຽດນາມ, ພາຍໃນປະເທດກໍ່ຄື ຕ່າງປະເທດ (ດ້ວຍການປົວແປງຕ່ອງໂສ້ການສະໜອງ, ໂລຈິສະຕິກ…).
ແຝງຄວາມໝາຍດ້ານນະໂຍບາຍ
ຈາກການໄຈ້ແຍກມາຂ້າງເທິງນີ້ໄດ້ໃຫ້ເຫັນວ່າ: ເສັ້ນທາງກ້າວຂຶ້ນ ຈາກປະເທດມີລາຍໄດ້ປານກາງ ກາຍເປັນປະເທດທີ່ມີລາຍໄດ້ສູງ ແມ່ນບໍ່ອາດປະລະອຸດສາຫະກໍາ ປະດິດ, ປຸງແຕ່ງ ແລະ ບົນເສັ້ນທາງດັ່ງກ່າວນັ້ນ ກະໂຕວິສາຫະກິດອຸດສາຫະກໍາພາຍໃນປະເທດ ເປັນປັດໄຈຊຸກຍູ້ການພັດທະນາເສດຖະກິດທີ່ຍືນຍົງ ແລະສາມາດເຮັດໃຫ້ຫຼຸດພົ້ນຈາກກັບດັກລາຍໄດ້ປານກາງ, ຫຼຸດພົ້ນຈາກກັບດັກມູນຄ່າເພີ່ມຕໍ່າ. ການລົງທຶນໂດຍກົງຈາກຕ່າງປະເທດເຂົ້າໃນອຸດສາຫະກໍາປະດິດແລະປຸງແຕ່ງ ແມ່ນກໍາລັງຜັດດັນ ນໍາພາ, ແຕ່ວ່າ ວິສາຫະກິດອຸດສາຫະກໍາພາຍໃນປະເທດ ຈິ່ງເປັນພື້ນຖານທີ່ແໜ້ນແກ່ນ ເພື່ອຊ່ວຍໃຫ້ປະເທດໜຶ່ງໆ ສາມາດຫຼຸດພົ້ນອອກຈາກກັບດັກລາຍໄດ້ປານກາງ. ຍ້ອນແນວນັ້ນ, ການດຶງດູດການລົງທຶນໂດຍກົງຈາກຕ່າງປະເທດຕ້ອງມີຍຸດທະສາດ ແລະ ມີການເລືອກເຟັ້ນ, ຫຼີກລ່ຽງການຮັບເອົາເຕັກໂນໂລຊີຕໍ່າເຂົ້າມາແກ່ງແຍ້ງແຂ່ງຂັນໂດຍກົງກັບບັນດາວິສາຫະກິດອຸດສາຫະກໍາພາຍໃນປະເທດ ເພື່ອຫຼີກລ່ຽງກັບດັກມູນຄ່າເພີ່ມຕໍ່າ; ສ້າງແລະພັດທະນາກໍາລັງວິສາຫະກິດອຸດສາຫະກໍາພາຍໃນປະເທດໃຫ້ເຂັ້ມແຂງ, ຕິດພັນສະໜິດແໜ້ນກັບຂົງເຂດການລົງທຶນໂດຍກົງຈາກຕ່າງປະເທດ ແລະສາມາດສ້າງໄດ້ ກໍາລັງວິສາຫະກິດພາຍໃນປະເທດທີ່ເຂັ້ມແຂງເທື່ອລະກ້າວ, ເມື່ອວິສາຫະກິດພາຍໃນປະ ເທດມີຂະໜາດໃຫຍ່ແລ້ວ, ກໍ່ມີບົດບາດນຳພາ ແລະສາມາດສ້າງເປັນຕ່ອງໂສ້ການສະໜອງພາຍໃນປະເທດໄດ້.
ຈາກບົດຮຽນປະສົບການຂອງເກົາຫຼີໃຕ້, ມາເລເຊຍ ແລະ ບັນດາປະເທດທີ່ໄປກ່ອນໄດ້ໃຫ້ເຫັນວ່າ: ມີຫຼາຍເສັ້ນທາງເພື່ອນໍາພາປະເທດຊາດ ຈາກປະເທດມີລາຍໄດ້ປານກາງ ກາຍເປັນປະເທດທີ່ມີລາຍໄດ້ສູງ, ແລະເສັ້ນທາງດັ່ງກ່າວຈະສັ້ນຫຼືຍາວນັ້ນ ແມ່ນຂຶ້ນກັບວິທີທີ່ປະເທດນັ້ນໆໄດ້ກໍານົດຈຸດໝາຍທີ່ຖືກຕ້ອງກັບແຕ່ລະໄລຍະກາງ ແລະສຸມໃສ່ກໍາລັງແຮງ, ນະໂຍບາຍ ເພື່ອບັນລຸໄດ້ຈຸດໝາຍທີ່ວາງອອກ. ເກົາຫຼີໃຕ້ສາມາດຫຍໍ້ໄລຍະທາງກ້າວໄປສູ່ປະເທດທີ່ມີລາຍໄດ້ສູງ ກໍ່ຍ້ອນວ່າພວກເຂົາສາມາດກໍານົດໄດ້ຈຸດໝາຍການຫັນເປັນອຸດສາຫະກໍາທີ່ຈະແຈ້ງ, ສອດທະລຸຕະຫຼອດໄລຍະແຜນການ 5 ປີ ແລະທຸກນະໂຍບາຍ, ແຫຼ່ງກໍາລັງແຮງສັງຄົມໄດ້ຖືກລະດົມ, ນໍາໃຊ້ເພື່ອບັນລຸຈຸດໝາຍດັ່ງກ່າວ. ນະໂຍບາຍພັດທະນາອຸດສາຫະກໍາ ຕ້ອງໄດ້ຖືກກໍານົດໃນສະພາບແວດລ້ອມທີ່ກວ້າງກວ່າ, ກວມລວມເອົາທັງບັນດານະໂຍບາຍທີ່ກະທົບໂດຍກົງເຖິງວິສາຫະກິດອຸດສາຫະກໍາ ແລະ ບັນດານະໂຍບາຍທາງອ້ອມ ແຕ່ພັດມີຜົນສະທ້ອນທີ່ໃຫຍ່ຫຼວງ ເຖິງການຂະຫຍາຍຕົວ ຂອງຂະແໜງອຸດສາຫະກໍາເວົ້າລວມ, ເວົ້າສະເພາະແມ່ນ ວິສາຫະກິດອຸດສາຫະກໍາ. ເພື່ອໃຫ້ສາມາດກໍານົດໄດ້ຈຸດໝາຍຢ່າງຖືກຕ້ອງ, ຕ້ອງມີກົນໄກປະສານງານ ລະຫວ່າງລັດແລະວິສາຫະກິດ ເພື່ອມີຄວາມເຫັນດີເປັນເອກະພາບ ລະຫວ່າງບັນດາອົງການລັດຖະບານ ແລະ ລະຫວ່າງລັດກັບຂົງເຂດເອກະຊົນ. ດ້ວຍເຫດນັ້ນ, ຕ້ອງສ້າງແລະຮັກສາກົນໄນການເຈລະຈານະໂຍບາຍ ກັບບັນດາວິສາຫະກິດອຸດສາຫະກໍາ, ຕິດຕາມ, ກວດກາແລະວັດແທກ, ຕີລາຄາການປົວແປງຄຸນນະພາບນະໂຍບາຍ ແລະຄວາມສາມາດແຂ່ງຂັນ ຂອງອຸດສາຫະກໍາຫວຽດນາມ ສົມທຽບກັບບັນດາປະເທດໃນພາກພື້ນ ແລະ ປະເທດຈໍານວນໜຶ່ງໃນໂລກ.
ເພື່ອດຶງດູດໄດ້ການລົງທຶນໂດຍກົງຈາກຕ່າງປະເທດທີ່ມີມູນຄ່າສູງ, ຕ້ອງແກ້ໄຂສິ່ງທ້າທາຍຈໍານວນໜຶ່ງ ແລະ ສິ່ງກີດຂວາງທາງດ້ານກົນໄກ, ນະໂຍບາຍໃນວົງໂຄຈອນການລົງທຶນທັງໝົດຂອງວິສາຫະກິດ ແລະ ປ່ຽນແປງວິທີການເຂົ້າເຖິງການລົງທຶນໂດຍກົງຈາກຕ່າງປະເທດຄືໃນປັດຈຸບັນ. ທີໜຶ່ງ, ຕ້ອງຫັນສູ່ບັນດານັກລົງທຶນທີ່ມີກໍາລັງຜັດດັນ ການພັດທະນາທີ່ອີງໃສ່ແຮງງານທີ່ມີທັກສະ, ສີມືການຊ່າງສູງ, ເຕັກໂນໂລຊີທີ່ໃຊ້ຊັບພະຍາກອນຢ່າງປະຢັດ ແທນທີ່ຈະເພິ່ງພາຄ່າແຮງງານຕໍ່າ, ການບໍລິການພື້ນຖານໂຄງລ່າງທີ່ມີລາຍຈ່າຍຕໍ່າ; ຕ້ອງມີມາດຖານການກັ່ນຕອງ, ເລືອກເຟັ້ນນັກລົງທຶນທີ່ເປັນເອກະພາບ ນັບແຕ່ຂັ້ນສູນກາງລົງຮອດທ້ອງຖິ່ນ ເພື່ອຮັບປະກັນການດຶງດູດການລົງທຶນທີ່ຖືກຕ້ອງ ຕາມຄວາມຮຽກຮ້ອງຂອງພື້ນຖານເສດຖະກິດ. ສືບຕໍ່ຜັນຂະຫຍາຍຢ່າງມີປະສິດທິຜົນ ໃນບັນດາການເຄື່ອນໄຫວເຊື່ອມໂຍງວິສາຫະກິດພາຍໃນປະເທດ ກັບວິສາຫະກິດທີ່ມີການລົງທຶນໂດຍກົງຈາກຕ່າງປະເທດ, ກໍ່ສ້າງກໍາລັງຊ່ວຍໃຫ້ວິສາຫະກິດພາຍໃນປະເທດໄດ້ເຂົ້າຮ່ວມໃນ ຕ່ອງໂສ້ການສະໜອງ ຂອງວິສາຫະກິດທີ່ມີການລົງທຶນໂດຍກົງຈາກຕ່າງປະເທດ (ຕໍ່ໄລຍະເວລາປະຕິບັດແຜນງານພັດທະນາອຸດສາຫະກໍາສະໜັບ ສະໜູນ). ທີສອງ, ການຊຸກຍູ້ການລົງທຶນຕ້ອງມີຄວາມເປັນເຈົ້າການ, ມີຈຸດໝາຍ ເພື່ອສາມາດດຶງດູດໄດ້ ບັນດານັກລົງທຶນທີ່ພື້ນຖານເສດຖະກິດມີຄວາມຕ້ອງການ, ແທນໃຫ້ການຕົກທ່າຮັບ, ເປີດກວ້າງຕະຫຼາດລໍຖ້າໃຫ້ນັກລົງທຶນເຂົ້າມາຫາ. ທີສາມ, ເຄື່ອງມືທາງການຕະຫຼາດເພື່ອການລົງທຶນ ຕ້ອງເຂົ້າເຖິງຕາມຂະແໜງການ, ຕາມ ຕ່ອງໂສ້ຄຸນຄ່າ ເພື່ອໃຫ້ສາມາດດຶງດູດໄດ້ ນັກລົງທຶນທີ່ອີງໃສ່ທ່າໄດ້ປຽບແຂ່ງຂັນ ໄລຍະຍາວ, ແທນໃຫ້ເຄື່ອງມືທາງການຕະຫຼາດແບບດັ້ງເດີມທີ່ອີງໃສ່ການໃຫ້ສິດພິເສດສູງ ເພື່ອດຶງດູດນັກລົງທຶນທີ່ອາໄສແຕ່ທ່າໄດ້ປຽບດ້ານລາຍຈ່າຍໃນໄລຍະສັ້ນ; ໜູນຊ່ວຍ, ສ້າງເງື່ອນໄຂອັນສະດວກທີ່ສຸດ ໃຫ້ແກ່ການເຄື່ອນໄຫວຜະລິດ, ທຸລະກິດ ຂອງບັນດານັກລົງທຶນຕ່າງປະເທດທີ່ມີໃນປັດຈຸບັນ ແທນໃຫ້ການຈັດຕັ້ງບັນດາເຫດການຊຸກຍູ້ການລົງທຶນທີ່ບໍ່ມີປະສິດທິຜົນ, ຍ້ອນວ່າ ກະໂຕບັນດານັກລົງທຶນໃນປັດຈຸບັນກໍ່ແມ່ນ “ນັກການທູດ”, ເປັນຊ່ອງທາງໂຄສະນາກ່ຽວກັບນະໂຍບາຍ, ສະພາບແວດລ້ອມການລົງທຶນ, ດໍາເນີນທຸລະກິດຢູ່ຫວຽດນາມຢ່າງພາວະວິໄສ, ມີປະສິດທິຜົນສູງສຸດ. ທີສີ່, ການໃຫ້ສິດພິເສດແກ່ນັກລົງທຶນ ຕ້ອງອີງໃສ່ປະສິດທິຜົນ, ມູນຄ່າເພີ່ມທີ່ສ້າງຂຶ້ນພາຍໃນປະເທດ, ໝາກຜົນເຄື່ອນໄຫວ ພາຍຫຼັງການລົງທຶນແທນໃຫ້ການໃຫ້ສິດພິເສດທີ່ອີງໃສ່ຈໍານວນທຶນຈົດທະບຽນ ແລະ ຂະໜາດການລົງທຶນເທົ່ານັ້ນ./.
-------------------------------
(1) ເບິ່ງ: S. Urata: “Japanese Foreign Direct Investment and Its Effect on Foreign”, In T. Ito, & A. O. Krueger: Trade and Protectionism, NBER-EASE Volume 2 (pp. 273 - 304), Chicago: University of Chicago Press, 1993.
- ບົດນີ້ໄດ້ລົງພິມໃນວາລະສານກອມມູນິດ ສະບັບທີ 952 (ເດືອນຕຸລາ 2020)