ວິທະຍາສາດແລະເຕັກໂນໂລຊີຄວນໄດ້ຮັບການຖືວ່າເປັນການບຸກທະລຸ
ຍຸດທະສາດທີ່ສຳຄັນ ເພື່ອນຳຫວຽດນາມໄປສູ່ການພັດທະນາທີ່ໄວແລະຍືນຍົງ
ຍຸດທະສາດທີ່ສຳຄັນ ເພື່ອນຳຫວຽດນາມໄປສູ່ການພັດທະນາທີ່ໄວແລະຍືນຍົງ
ວກ. - ພຶດຕິກຳແຫ່ງການພັດທະນາຂອງມະນຸດຊາດໃຫ້ເຫັນວ່າ, ປະເທດໃດໆໃນໂລກທີ່ໃຫ້ຄວາມສໍາຄັນ ແລະເສີມຂະຫຍາຍການນໍາໃຊ້ວິທະຍາສາດແລະເຕັກໂນໂລຊີ ກໍ່ໄດ້ບັນລຸຜົນສໍາເລັດຫຼາຍຢ່າງ ໃນການພັດທະນາເສດຖະກິດ-ສັງຄົມ ແລະ ໄດ້ຍົກສູງຖານະບົດບາດຂອງຊາດຕົນໃນເວທີສາກົນຢ່າງຕໍ່ເນື່ອງ. ໃນປະຈຸບັນ, ຕໍ່ໜ້າຄວາມຕ້ອງການພັດທະນາປະເທດຢ່າງໄວວາແລະຍືນຍົງໃນໄລຍະໃໝ່, ຫວຽດນາມຕ້ອງຖືວ່າ ວິທະຍາສາດແລະເຕັກໂນໂລຊີແມ່ນການບຸກທະລຸຍຸດທະສາດ, ປະກອບສ່ວນເຂົ້າໃນການປະຕິບັດຢ່າງສຳເລັດຜົນ ພາລະກິດການສ້າງສາແລະປົກປັກຮັກສາປະເທດຊາດ, ບັນລຸເປົ້າໝາຍ ປະຊາຊົນຮັ່ງມີ, ປະເທດຊາດເຂັ້ມແຂງ, ມີປະຊາທິປະໄຕ ຍຸດຕິທຳ ແລະອາລະຍະທຳ
1 - ໃນປະຫວັດສາດ, ບັນດາການປະຕິວັດວິທະຍາສາດແລະເຕັກໂນໂລຊີໄດ້ສົ່ງຜົນກະທົບຢ່າງແຮງແລະເລິກເຊິ່ງ ເຖິງຂະບວນການພັດທະນາຂອງສັງຄົມ, ນຳມະນຸດຊາດກ້າວຂ້າມຂໍ້ຈຳກັດແລະຄວາມທ້າທາຍຫຼາຍຢ່າງ ໃນທຳມະຊາດ, ເສດຖະກິດ-ສັງຄົມ, ກຳນົດຖານະບົດບາດຂອງປະເທດຕ່າງໆໃນໂລກ.
ພຶດຕິກຳໃຫ້ເຫັນວ່າ, ຄວາມຄິດປະດິດສ້າງແລະສິ່ງປະດິດທາງວິທະຍາສາດແລະເຕັກໂນໂລຊີ ໃນຫຼາຍຂົງເຂດເຊັ່ນ ໄຟຟ້າ, ພະລັງງານ, ວັດສະດຸໃໝ່, ພະລັງງານປະລຳມານູ... ໄດ້ຖືກນຳໃຊ້ໂດຍມະນຸດມາເປັນເວລາດົນນານ, ມີການປະກອບສ່ວນອັນສຳຄັນເຂົ້າໃນການພັດທະນາສັງຄົມ. ທາດປະສົມໃໝ່ຈຳນວນຫຼາຍໃນຂະແໜງເຄມີທີ່ມີລັກສະນະທາງຊີວະພາບ, ຄຸນສົມບັດສະເພາະ ເປັນວັດຖຸດິບໃນການຜະລິດຢາຕ້ານເຊື້ອ, ວັກຊີນ... ໃຊ້ໃນການປິ່ນປົວພະຍາດຕ່າງໆ, ຊ່ວຍໃຫ້ມະນຸດເອົາຊະນະພະຍາດລະບາດຫຼາຍປະເພດ. ໃນຂົງເຂດກົນລະສາດ, ການຜະລິດເຄື່ອງຈັກຫຼາຍລຸ້ນເຊັ່ນ: ເຄື່ອງຈັກອາຍນໍ້າ, ເຄື່ອງຈັກເຜົາພາຍໃນ, ໂມເຕີໄຟຟ້າ, ເຄື່ອງຈັກໄອພົ່ນ, ເຄື່ອງຈັກໄຮບຣິດ... ໄດ້ແກ້ໄຂບັນຫາການເຄື່ອນຍ້າຍ ແລະການຂົນສົ່ງຂອງມະນຸດ. ການພັດທະນາດ້ານໂທລະຄົມມະນາຄົມ, ວິທະຍຸ, ໂທລະທັດ, ເຄື່ອງຄອມພິວເຕີ ໄດ້ເຮັດໃຫ້ມີການປ່ຽນແປງໂດຍພື້ນຖານໃນຊີວິດວັດທະນະທຳ, ສັງຄົມ, ເສດຖະກິດ ແລະຈິດໃຈຂອງມະນຸດ, ເພີ່ມທະວີແລະຂະຫຍາຍໂອກາດໃນການແລກປ່ຽນວັດທະນະທຳ ແລະຄວາມຮ່ວມມືທາງດ້ານເສດຖະກິດ,...ຂອງບັນດາຊຸມຊົນ, ຊາດ-ປະຊາຊາດໃນໂລກ. ພິເສດແມ່ນ ເຖິງທ້າຍສະຕະວັດທີ 20 ຕົ້ນສະຕະວັດທີ 21, ການພັດທະນາຢ່າງວ່ອງໄວຂອງເຕັກໂນໂລຊີຂໍ້ມູນຂ່າວສານ, ອິນເຕີເນັດ, ເຕັກໂນໂລຊີຊີວະພາບ, ແພດສາດ, ຫຸ່ນຍົນຮຸ່ມໃໝ່, ເຕັກໂນໂລຊີການວິເຄາະ... ໄດ້ນຳພາມະນຸດເຂົ້າສູ່ຍຸກໃໝ່, ບັນດາຂີດຈຳກັດທີ່ຫຍຸ້ງຍາກທີ່ເບິ່ງຄືວ່າເອົາຊະນະບໍ່ໄດ້ ໄດ້ຖືກມະນຸດເອົາຊະນະ ຜ່ານການນຳໃຊ້ວິທະຍາສາດແລະເຕັກໂນໂລຍີ. ການເຊື່ອມຕໍ່ລະຫວ່າງຊູເປີຣ໌ຄອມພິວເຕີຜ່ານລະບົບອິນເຕີເນັດ ຊ່ວຍໃນການຜັນຂະຫຍາຍຕົວແບບການຄໍານວນ, ການຈຳລອງ ແລະການພະຍາກອນ ດ້ວຍການຄໍານວນຫຼາຍຕື້ຄັ້ງຕໍ່ວິນາທີ. ເຕັກໂນໂລຊີຊີວະພາບລະດັບໂມເລກຸນ, ພັນທຸກຳ, ການເຊື່ອມໂຍງທາງຊີວະພາບໄດ້ເຂົ້າເລິກໃນອົງປະກອບທີ່ນ້ອຍທີ່ສຸດຂອງເຊລ, ແຊກແຊງເຂົ້າໃນແຕ່ລະພາກສ່ວນຂອງຮ່າງກາຍ, ດັດປັບສິ່ງມີຊີວິດໜຶ່ງ, ຫຼືຈຳພວກສັດພືດໜຶ່ງ, ທົ່ງນາ, ຟາມ… ຫຸ່ນຍົນຮຸ່ນໃໝ່ຊ່ວຍຜູ້ຄົນເຮັດຫຼາຍສິ່ງຫຼາຍຢ່າງເລິກລົງໄປໃນມະຫາສະໝຸດ, ໃນໃຈກາງໂລກ, ໃນອາວະກາດ ແລະ ຢູ່ໃນດາວເຄາະອື່ນໆທີ່ຢູ່ຫ່າງໄກ.
ຈາກການຮັບຮູ້ຢ່າງຈະແຈ້ງກ່ຽວກັບບົດບາດອັນໃຫຍ່ຫຼວງຂອງວິທະຍາສາດແລະເຕັກໂນໂລຊີ ໃນພາລະກິດການພັດທະນາເສດຖະກິດ-ສັງຄົມ, ການສ້າງສາແລະປົກປັກຮັກສາປະເທດຊາດ, ພັກກອມມູນິດຫວຽດນາມຢັ້ງຢືນສະເໝີວ່າ ພ້ອມກັນກັບການສຶກສາແລະຝຶກອົບຮົມ, ວິທະຍາສາດແລະເຕັກໂນໂລຊີຍາມໃດກໍ່ແມ່ນນະໂຍບາຍແຫ່ງຊາດທີ່ສຳຄັນອັນດັບໜຶ່ງ, ບັນດາຍຸດທະສາດວິທະຍາສາດແລະເຕັກໂນໂລຊີຕ້ອງແນໃສ່ເປົ້າໝາຍ ຫັນເປັນອຸດສາຫະກຳຕາມທິດທັນສະໄໝ, ບືນຕົວຂຶ້ນສູ່ລະດັບກ້າວໜ້າຂອງໂລກ; ນຳໃຊ້ຢ່າງມີປະສິດທິຜົນແລະເພີ່ມຄວາມສາມາດດ້ານວິທະຍາສາດແລະເຕັກໂນໂລຊີຂອງປະເທດຂຶ້ນຢ່າງໄວ; ຕ້ອງພັດທະນາວິທະຍາສາດສັງຄົມ, ວິທະຍາສາດທຳມະຊາດ, ວິທະຍາສາດເຕັກນິກຢ່າງຄົບຊຸດ ໄປຄຽງຄູ່ກັບການພັດທະນາການສຶກສາ, ວັດທະນະທຳ ແລະ ຍົກລະດັບປັນຍາຄວາມຮູ້ຂອງປະຊາຊົນ.
2 - ໃນຂະບວນການປ່ຽນແປງໃໝ່ປະເທດຫວຽດນາມ, ວິທະຍາສາດແລະເຕັກໂນໂລຊີໄດ້ປະກອບສ່ວນອັນສຳຄັນຫຼາຍຢ່າງ. ໃນໄລຍະປີ 1991-2000, ພື້ນຖານເສດຖະກິດຫວຽດນາມ ມີການພັດທະນາໃໝ່່ໃນກຳລັງການຜະລິດ, ການພົວພັນການຜະລິດແລະການເຊື່ອມໂຍງສາກົນ; ຊີວິດການເປັນຢູ່ດ້ານວັດຖຸແລະຈິດໃຈຂອງປະຊາຊົນໄດ້ຮັບການປົວແປງໃຫ້ດີຂຶ້ນຢ່າງຈະແຈ້ງ, ວັດທະນະທຳ-ສັງຄົມມີຄວາມກ້າວໜ້າຢ່າງຕໍ່ເນື່ອງ; ຄວາມສະຫງົບ, ການເມືອງມີສະຖຽນລະພາບ ສ້າງເງື່ອນໄຂເພື່ອຊຸກຍູ້ການຫັນເປັນອຸດສາຫະກຳ ທັນສະໄໝ. ລວມຍອດຜະລິດຕະພັນພາຍໃນປະເທດ (ຈີດີພີ) ພາຍຫຼັງ 10 ປີເພີ່ມຂຶ້ນທົບສອງກວ່າເທົ່າ (2,07 ເທື່ອ). ວິທະຍາສາດແລະເຕັກໂນໂລຊີໃນໄລຍະນີ້ມີບັນດາເນື້ອໃນໃໝ່ທີ່ສຳຄັນ, ປະກອບສ່ວນເຂົ້າໃນຄວາມສຳເລັດຂອງປະເທດ, ເຊັ່ນ ລະບົບເອກະສານທາງກົດໝາຍຖືກສ້າງຂຶ້ນໃນເບື້ອງຕົ້ນແລະດຳເນີນການ ເພື່ອດຶງດູດການລົງທຶນຈາກຕ່າງປະເທດ ຜ່ານການນຳເຂົ້າເຕັກໂນໂລຊີ, ເຊັນສັນຍາມອບໂອນເຕັກໂນໂລຊີ; ປ່ຽນແປງໃໝ່ເຕັກໂນໂລຊີທີ່ຫຼ້າຫຼັງຂອງວິສາຫະກິດໃນປະເທດ; ເລີ່ມນຳເຕັກໂນໂລຊີມາໃຊ້ໃນວຽກງານການຄຸ້ມຄອງ. ໃນໄລຍະນີ້ ວິທະຍາສາດແລະເຕັກໂນໂລຊີໄດ້ຜັນຂະຫຍາຍເນື້ອໃນຕ່າງໆເຊັ່ນ ຄົ້ນຄວ້າວິທະຍາສາດ (ຜັນຂະຫຍາຍບັນດາໂຄງການ, ແຜນການຄົ້ນຄວ້າວິທະຍາສາດຈຸດສຸມຂອງລັດ, ຂະຫຍາຍຂອບເຂດການຄົ້ນຄວ້າວິທະຍາສາດລົງສູ່ທ້ອງຖິ່ນ); ພັດທະນາເຕັກໂນໂລຊີ (ພັດທະນາບັນດາເຕັກໂນໂລຊີຈຸດສຸມຂອງລັດ); ປົກປັກຮັກສາສິ່ງແວດລ້ອມ (ປະກາດໃຊ້ບັນດາລະບຽບການແລະມາດຕະຖານກ່ຽວກັບການປົກປັກຮັກສາສິ່ງແວດລ້ອມ, ຜັນຂະຫຍາຍເນື້ອໃນປົກປັກຮັກສາສິ່ງແວດລ້ອມຂອງບັນດາໂຄງການພັດທະນາເສດຖະກິດ-ສັງຄົມ); ການພັດທະນາມາດຕະຖານ, ການວັດແທກ, ຄຸນນະພາບ; ເລີ່ມເຂົ້າເຖິງບັນຫາຊັບສິນທາງປັນຍາ; ປ່ຽນແປງໃໝ່ການຄຸ້ມຄອງ, ເປີດກວ້າງການດຶງດູດແຫຼ່ງພະລັງເພື່ອພັດທະນາວິທະຍາສາດ, ເຕັກໂນໂລຊີ; ຍູ້ແຮງການຮ່ວມມືສາກົນທາງດ້ານວິທະຍາສາດແລະເຕັກໂນໂລຊີ...
ໃນໄລຍະປີ 2001-2010, ຫວຽດນາມໄດ້ປະສົບຄວາມສຳເລັດທີ່ສຳຄັນໃນການປະຕິບັດເປົ້າໝາຍລວມ ໃນການເຄື່ອນຍ້າຍຈາກກຸ່ມປະເທດທີ່ມີລາຍໄດ້ຕ່ຳ ໄປສູ່ກຸ່ມປະເທດທີ່ມີລາຍໄດ້ປານກາງ. ນີ້ແມ່ນບາດກ້າວສຳຄັນໃນການປ່ຽນແປງບົດບາດທີ່ຕັ້ງຂອງຫວຽດນາມ. ຈີດີພີຕໍ່ຫົວຄົນບັນລຸໄດ້ຫຼາຍກວ່າ 42% ຂອງລະດັບສະເລ່ຍ ແລະຢູ່ອັນດັບທີ 7 ໃນ 11 ປະເທດອາຊີຕາເວັນອອກສຽງໃຕ້ (ເພີ່ມຂຶ້ນ 10 % ທຽບກັບໄລຍະກ່ອນ); ຈີດີພີ ໃນປີ 2010 ສູງກວ່າສອງເທົ່າໃນປີ 2000. ລະດັບແລະຄຸນນະພາບຊີວິດດ້ານວັດຖຸ, ວັດທະນະທຳແລະຈິດໃຈໄດ້ຮັບການຍົກສູງຢ່າງຈະແຈ້ງ. ໂຄງສ້າງພື້ນຖານຄ່ອຍໆຕອບສະໜອງໄດ້ກັບຄວາມຮຽກຮ້ອງຕ້ອງການຂອງການພັດທະນາເສດຖະກິດ, ການປ້ອງກັນຊາດ ແລະຄວາມັ້ນຄົງ. ລະບົບກົດໝາຍກ່ຽວກັບວິທະຍາສາດແລະເຕັກໂນໂລຊີໃນໄລຍະນີ້ໄດ້ຮັບການປັບປຸງບູລະນະໃຫ້ສອດຄ່ອງກັບຄວາມຕ້ອງການຂອງການເຊື່ອມໂຍງສາກົນ. ການຄົ້ນຄວ້າພື້ນຖານໃນວິທະຍາສາດທຳມະຊາດໄດ້ຮັບການຍົກສູງຂຶ້ນທາງດ້ານຄຸນນະພາບຕາມມາດຕະຖານສາກົນ; ວິທະຍາສາດແລະເຕັກໂນໂລຊີຄ່ອຍໆເຂົ້າໃກ້ກັບລະດັບເຕັກໂນໂລຊີຂັ້ນສູງຂອງພາກພື້ນ ແລະແກ້ໄຂຫຼາຍໜ້າທີ່ທີ່ສຳຄັນຂອງຊາດ; ທ່າແຮງທາງວິທະຍາສາດແລະເຕັກໂນໂລຊີໄດ້ຮັບການເພີ່ມທະວີ; ເພີ່ມຄວາມເປັນເຈົ້າຕົນເອງ, ຄວາມຮັບຜິດຊອບດ້ວຍຕົນເອງ ແລະສ້າງຕັ້ງວິສາຫະກິດວິທະຍາສາດແລະເຕັກໂນໂລຊີ. ກົນໄກຈັດຕັ້ງ, ຄຸ້ມຄອງວິທະຍາສາດແລະເຕັກໂນໂລຊີໄດ້ຮັບການປ່ຽນແປງໃໝ່, ກົນໄກການເງິນສຳລັບວິທະຍາສາດແລະເຕັກໂນໂລຊີໄດ້ຮັບການສ້າງຕັ້ງຂຶ້ນໃນເບື້ອງຕົ້ນ; ພັດທະນາອົງການຈັດຕັ້ງ ເພື່ອຕິດຕໍ່ແລະເຊື່ອມໂຍງການເຄື່ອນໄຫວວິທະຍາສາດ ກັບການຜະລິດ, ທຸລະກິດ. ການຮ່ວມມືສາກົນໃນວິທະຍາສາດແລະເຕັກໂນໂລຊີ ໄດ້ຮັບການເປີດກວ້າງ ແລະເພີ່ມທະວີ.
ໃນໄລຍະປີ 2010-2020, ຍຸດທະສາດການພັດທະນາປະເທດຊາດບັນລຸໄດ້ຜົນສຳເລັດທີ່ສຳຄັນຫຼາຍ, ຖານະບົດບາດຂອງຫວຽດນາມໃນເວທີສາກົນໄດ້ຮັບການຍົກສູງຂຶ້ນ. ອັດຕາການເຕີບໂຕທາງດ້ານເສດຖະກິດໄດ້ຮັກສາຢູ່ໃນລະດັບສູງພໍສົມຄວນ. ໃນໄລຍະປີ 2011-2015, ອັດຕາການເຕີບໂຕ ຈີດີພີ ສະເລ່ຍ 5,9% ຕໍ່ປີ, ໄລຍະປີ 2016-2019 ອັດຕາການເຕີບໂຕສະເລ່ຍ 6,8% ຕໍ່ປີ, ປີ 2020 ຍ້ອນການລະບາດຂອງພະຍາດໂຄວິດ-19 ອັດຕາການເຕີບໂຕເກືອບ 3%, ສະເລ່ຍໄລຍະປີ 2016-2020 ແມ່ນປະມານ 5,9% ຕໍ່ປີ. ຄິດສະເລ່ຍແລ້ວ ໃນໄລຍະປີ 2011-2020, ການເຕີບໂຕ ຈີດີພີ ແມ່ນປະມານ 5,9% ຕໍ່ປີ, ເຊິ່ງຢູ່ໃນກຸ່ມປະເທດທີ່ມີການເຕີບໂຕສູງໃນພາກພື້ນແລະໃນໂລກ. ຂະໜາດຂອງ ຈີດີພີ ເພີ່ມຂຶ້ນ 2,95 ເທົ່າ, ຈາກ 116 ຕື້ໂດລາສະຫະລັດປີ 2010 ຂຶ້ນເປັນ 343 ຕື້ໂດລາສະຫະລັດປີ 2020. ຈີດີພີ ຕໍ່ຫົວຄົນເພີ່ມຂຶ້ນຈາກ 1.331 ໂດລາສະຫະລັດໃນປີ 2010 ເປັນ 3.521 ໂດລາສະຫະລັດໃນປີ 2020. ຄຸນນະພາບຂອງການເຕີບໂຕໄດ້ຮັບການປັບປຸງ, ສະມັດຕະພາບຂອງງານໄດ້ຮັບການຍົກສູງຂຶ້ນຢ່າງຈະແຈ້ງ. ການເຕີບໂຕເສດຖະກິດຄ່ອຍໆຫຼຸດຜ່ອນການເພິ່ງພາການຂຸດຄົ້ນຊັບພະຍາກອນທຳມະຊາດ, ເພີ່ມການອີງໃສ່ການນຳໃຊ້ວິທະຍາສາດ, ເຕັກໂນໂລຊີ ແລະການປ່ຽນແປງໃໝ່ປະດິດສ້າງ, ຮູບແບບການເຕີບໂຕໄດ້ຮັບການປ່ຽນແປງໃໝ່ໃຫ້ສອດຄ່ອງກັບທ່າອຽງຂອງຍຸກສະໄໝ. ໂຄງສ້າງເສດຖະກິດຂະແໜງການ ແລະພາຍໃນຂະແໜງການ ມີການປ່ຽນແປງໃນທາງບວກ, ອັດຕາສ່ວນອຸດສາຫະກຳປຸງແຕ່ງ, ປະດິດ ແລະການໝູນໃຊ້ເຕັກໂນໂລຊີສູງ ໄດ້ເພີ່ມຂຶ້ນ. ໂຄງສ້າງການຜະລິດກະສິກຳ ມີການປ່ຽນແປງໃນທາງບວກ ມຸ່ງໃສ່ການເສີມຂະຫຍາຍທ່າແຮງ, ທ່າໄດ້ປຽບຂອງເຂດ ພາກພື້ນ, ຄວາມຕ້ອງການຂອງຕະຫຼາດ, ຄ່ອງຕົວກັບການປ່ຽນແປງສະພາບອາກາດ ແລະ ຮັບປະກັນຄວາມໝັ້ນຄົງດ້ານສະບຽງອາຫານ. ການຜະລິດກະສິກຳໄດ້ຮັບການພັດທະນາຢ່າງລວມສູນ ຕາມທິດທາງຜະລິດສິນຄ້າ, ທັນສະໄໝ, ມີຄຸນຄ່າເພີ່ມສູງ ແລະຍືນຍົງ. ກໍ່ຕັ້ງຫຼາຍຮູບແບບການຜະລິດທີ່ນຳໃຊ້ເຕັກໂນໂລຊີສູງ, ຍູ້ແຮງການເຊື່ອມຕໍ່ການຜະລິດກະສິກຳຕາມພວງພະນັງຄຸນຄ່າ. ການພັດທະນາກະສິກຳເຕັກໂນໂລຊີສູງ, ກະສິກຳສະອາດ, ກະສິກຳອິນຊີ ໄດ້ຮັບຄວາມເອົາໃຈໃສ່, ຄ່ອຍໆຫັນໄປສູ່ການປູກພືດແລະລ້ຽງສັດທີ່ມີຜົນຜະລິດສູງ, ມີຄຸນນະພາບແລະປະສິດທິພາບດີ. ຄຸນະພາບຂອງຜະລິດຕະພັນຫຼາຍປະເພດຕອບສະໜອງໄດ້ກັບຄວາມປອດໄພຕາມມາດຕະຖານສາກົນ. ຮູບແບບເສດຖະກິດຮ່ວມມື ແລະວິສາຫະກິດກະສິກຳ ໄດ້ເພີ່ມຂຶ້ນຢ່າງໄວ. ຄຸນນະພາບຂອງການເຕີບໂຕໄດ້ຮັບການປັບປຸງຢ່າງຕໍ່ເນື່ອງ.ປີ 2019, ວິສາຫະກິດເຕັກໂນໂລຊີສູງ, ນຳໃຊ້ເຕັກໂນໂລຊີສູງກວມເອົາຫຼາຍກວ່າ 13% ໃນຈຳນວນວິສາຫະກິດອຸດສາຫະກຳປຸງແຕ່ງ, ປະດິດ. ມູນຄ່າຂອງຜະລິດຕະພັນເຕັກໂນໂລຢີສູງ, ນໍາໃຊ້ເຕັກໂນໂລຢີສູງ ເພີ່ມຂຶ້ນຈາກ 26% ໃນປີ 2010 ເປັນຫຼາຍກວ່າ 40% ປີ 2019. ບາງຂະແໜງການອຸດສາຫະກກຳສະໜັບສະໜູນ ໄດ້ຮັບການສ້າງຕັ້ງຂຶ້ນ ແລະເພີ່ມອັດຕາສ່ວນຂອງການຫັນເປັນພາຍໃນ. ຄວາມສາມາດແຂ່ງຂັນລະດັບໂລກຂອງຂະແໜງການອຸດສາຫະກຳຫວຽດນາມເພີ່ມຂຶ້ນຈາກຕຳແໜ່ງ 58 (ປີ 2009) ຂຶ້ນເປັນ 42 (ປີ 2019). ຕຳແໜ່ງການຈັດອັນດັບສະພາບແວດລ້ອມທາງທຸລະກິດທົ່ວໂລກຂອງຫວຽດນາມໄດ້ຮັບການປົວແປງໃຫ້ດີຂຶ້ນຫຼາຍ. ການພັດທະນາແຫຼ່ງຊັບພະຍາກອນມະນຸດໄດ້ຮັບການຍູ້ແຮງ, ໂດຍສະເພາະບຸກຄະລາກອນຄຸນນະພາສູງ, ໂດຍຕິດແໜ້ນກັບຄວາມຕ້ອງການຂອງຕະຫຼາດ. ຄວາມສາມາດບົ່ມຊ້ອນທາງວິທະຍາສາດ, ເຕັກໂນໂລຊີແຫ່ງຊາດ ໄດ້ຮັບການເພີ່ມທະວີ. ບາງຂົງເຂດວິທະຍາສາດທຳມະຊາດບັນລຸລະດັບສູງຂອງພາກພື້ນແລະໂລກ. ການຄົ້ນຄວ້າ, ປະຢຸກໃຊ້, ຍົກສູງຄວາມສາມາດແລະລະດັບວິທະຍາສາດ, ເຕັກໂນໂລຊີ ໄດ້ຮັບຄວາມເອົໃຈໃສ່. ຫວຽດນາມມີຄວາມສາມາດພຽງພໍໃນການອອກແບບ ແລະ ຜະລິດເຕັກໂນໂລຍີ ອຸປະກອນຈໍານວນຫຼາຍຕາມມາດຕະຖານສາກົນ. ຫຼາຍວິສາຫະກິດ, ກຸ່ມບໍລິສັດຂະໜາດໃຫຍ່ໃນປະເທດແລະຕ່າງປະເທດ ໄດ້ລົງທຶນຂະໜາດໃຫຍ່ເພື່ອນຳໃຊ້ເຕັກໂນໂລຊີສູງເຂົ້າໃນການຜະລິດສິນຄ້າເຕັກໂນໂລຊີຈຳໜ່າຍກະຈາຍໄປທົ່ວໂລກ. ລະບົບຫ້ອງທົດລອງຈຸດສຸມ, ຫ້ອງທົດລອງສະເພາະຂະແໜງການ ສືບຕໍ່ໄດ້ຮັບການເອົາໃຈໃສ່ໃນການລົງທຶນ, ຍົກສູງປະສິດທິຜົນການເຄື່ອນໄຫວ. ໂຄງສ້າງພື້ນຖານດ້ານການວິໄຈໃນບາງຂົງເຂດສຳຄັນເຊັ່ນ ເຕັກໂນໂລຊີຊີວະພາບ, ປິໂຕເຄມີ, ວັດສະດຸໃໝ່, ລະບົບອັດຕະໂນມັດ, ນາໂນ, ເຕັກໂນໂລຊີຄອມພິວເຕີ, ການແພດ...ໄດ້ຮັບການເພີ່ມທະວີ. ໄດ້ເປີດຕົວແລະພັດທະນາ ລະບົບຄວາມຮູ້ດິຈິຕອນ ຫວຽດນາມ. ການຮ່ວມມືສາກົນທາງດ້ານວິທະຍາສາດ, ເຕັກໂນໂລຊີ ມີການຜັນປ່ຽນທາງບວກ. ຕະຫຼາດວິທະຍາສາດແລະເຕັກໂນໂລຊີ ມີການພັດທະນາຢ່າງໄວ, ມີສະຖານທີ່ແລກປ່ຽນ 15 ແຫ່ງ, ສະຖານທີ່ບົ່ມເພາະເຕັກໂນໂລຍີ 50 ແຫ່ງ. ການຄຸ້ມຄອງຊັບສິນທາງປັນຍາ ແລະການບັງຄັບໃຊ້ສິດທິໃນຊັບສິນທາງປັນຍາໄດ້ຮັບການເພີ່ມທະວີ, ຈຳນວນໃບປະກາດຊັບສິນທາງປັນຍາ ແລະ ໃບປະກາດຊັບສິນອຸດສາຫະກຳ ໄດ້ເພີ່ມຂຶ້ນຢ່າງໄວ. ລະບົບມາດຕະຖານແຫ່ງຊາດນັບມື້ນັບເຂົ້າເຖິງກັບມາດຕະຖານສາກົນ. ຖານຂໍ້ມູນກ່ຽວກັບເຕັກໂນໂລຊີແລະຜູ້ຊ່ຽວຊານ ໄດ້ຮັບການສ້າງຕັງຂຶ້ນແລ້ວ. ລະບົບນິເວດການເລີ່ມຕົ້ນນະວັດຕະກຳໄດ້ຮັບການພັດທະນາຢ່າງດີ. ດັດຊະນີນະວັດຕະກຳຂອງຫວຽດນາມໃນປີ 2019 ຢູ່ໃນອັນດັບຕົ້ນໆຂອງກຸ່ມປະເທດທີ່ມີລາຍໄດ້ປານກາງຕ່ຳ.
ໃນໄລຍະນີ້, ວິທະຍາສາດແລະເຕັກໂນໂລຊີຖືກປະເມີນວ່າເປັນໄມ້ງັດໃນຂະບວນການປັບໂຄງສ້າງເສດຖະກິດ, ການປ່ຽນຮູບແບບການເຕີບໂຕ, ການຍົກສູງສະມັດຕະພາບ ຄຸນນະພາບ ປະສິດທິຜົນ ແລະ ຄວາມສາມາດແຂ່ງຂັນຂອງເສດຖະກິດຫວຽດນາມ ໃນທ່າອຽງການເຊື່ອມໂຍງ. ວິທະຍາສາດແລະເຕັກໂນໂລຊີແມ່ນກຸນແຈສຳຄັນໃນການຫຍໍ້ຂະບວນການຫັນເປັນອຸດສາຫະກຳ ທັນສະໄໝຂອງຫວຽດນາມ ກໍ່ຄືສຳລັບຄວາມສຳເລັດຜົນໃນການເຊື່ອມໂຍງສາກົນ, ໄປທັນກັບປະເທດອື່ນໃນໂລກ. ນັ້ນກໍ່ແມ່ນປັດໄຈທີ່ຕັດສິນໃນການຫັນປ່ຽນພື້ນຖານເສດຖະກິດເປັນເສດຖະກິດພູມປັນຍາ, ຂະຫຍາຍອັດຕະພາບວິທະຍາສາດແລະເຕັກໂນໂລຊີ ຈາກສະຖາບັນ, ໂຮງຮຽນ ໄປເປັນຂອງວິສາຫະກິດ... ກົດໝາຍວ່າດ້ວຍວິທະຍາສາດແລະເຕັກໂນໂລຊີຫວຽດນາມປີ 2013 ໄດ້ສ້າງຄວາມກ້າວໜ້າອັນພື້ນຖານໃນການເຄື່ອນໄຫວວິທະຍາສາດແລະເຕັກໂນໂລຊີ, ນັ້ນແມ່ນການປ່ຽນແປງໃໝ່ກ່ຽວກັບການຈັດຕັ້ງວິທະຍາສາດແລະເຕັກໂນໂລຊີ; ການບຸກທະລຸທາງດ້ານນະໂຍບາຍການນຳໃຊ້ແລະຄ່າຕອບແທນສຳລັບບຸກຄະລາກອນທາງວິທະຍາສາດແລະເຕັກໂນໂລຊີ; ການປ່ຽນແປງໃໝ່ກ່ຽວກັບແບບວິທີການລົງທຶນສຳລັບວິທະຍາສາດແລະເຕັກໂນໂລຊີ; ການປ່ຽນແປງໃໝ່ການປະຢຸກໃຊ້ຜົນການວິໄຈແລະເຜີຍແຜ່ຄວາມຮູ້ທາງວິທະຍາສາດແລະເຕັກໂນໂລຊີ; ການຄຸ້ມຄອງແລະນຳໃຊ້ງົບປະມານຂອງລັດ, ການເງິນສຳລັບການຄົ້ນຄວ້າວິທະຍາສາດແລະເຕັກໂນໂລຊີ; ການເຊື່ອມໂຍງສາກົນທາງດ້ານວິທະຍາສາດແລະເຕັກໂນໂລຊີ; ການໃຫ້ກຽດແກ່ນັກວິທະຍາສາດ, ຖືເອົາວັນທີ 18 ພຶດສະພາ ຂອງທຸກປີ ເປັນວັນວິທະຍາສາດແລະເຕັກໂນໂລຊີຫວຽດນາມ. ລະບົບເອກະສານຂອງພັກກອມມູນິດຫວຽດນາມ ແລະຂໍ້ກຳນົດກົດໝາຍກ່ຽວກັບວິທະຍາສາດແລະເຕັກໂນໂລຊີ ໂດຍພື້ນຖານແລ້ວໄດ້ຂັບນຳຂະແໜງວິທະຍາສາດແລະເຕັກໂນໂລຊີໃຫ້ພັດທະນາຢ່າງໄວ. ຄຽງຂ້າງກັນນັ້ນ, ຕໍ່ໜ້າຄວາມຕ້ອງການພັດທະນາປະເທດໃນສະໄໝໃໝ່, ຫຼາຍບັນຫາທີ່ກ່ຽວຂ້ອງກັບວິທະຍາສາດແລະເຕັກໂນໂລຊີ ກໍ່ໄດ້ຮັບການຄົ້ນຄວ້າແລະຜັນຂະຫຍາຍ, ເຊັ່ນ ລະບົບນິເວດເລີ່ມຕົ້ນທຸລະກິດ, ເສດຖະກິດໝູນວຽນ, ເສດຖະກິດສີຂຽວ, ການປະຕິວັດອຸດສາຫະກຳຄັ້ງທີສີ່, ການພັດທະນາເຂດແລະສະຫະເຂດ,ເສດຖະກິດດິຈີຕອນ, ການປ່ຽນດິຈີຕອນແຫ່ງຊາດ, ການຍູ້ແຮງການຮ່ວມມືສາກົນ, ລັດຖະບານສ້າງສັນ,...
3 – ປະຈຸບັນ, ໃນສະພາບການໂລກາພິວັດແລະເຊື່ອມໂຍງສາກົນທີ່ໄດ້ແລະກຳລັງນຳມາເຊິ່ງໂອກາດດີ ແຕ່ຍັງກໍ່ໃຫ້ເກີດຄວາມທ້າທາຍບໍ່ໜ້ອຍ ສຳລັບການພັດທະນາທີ່ຍືນຍົງຂອງຫວຽດນາມ. ຮ່າງເອກະສານກອງປະຊຸມໃຫຍ່ຄັ້ງທີ່ 13 ຂອງພັກກອມມູນິດຫວຽດນາມພິນິດໄສວ່າ, ວິທະຍາສາດ-ເຕັກໂນໂລຊີ, ການປ່ຽນແປງໃໝ່ປະດິດສ້າງ ແລະການປະຕິວັດອຸດສາຫະກຳຄັ້ງທີສີ່ ກຳລັງຜັນປ່ຽນຢ່າງໄວວາ, ທະລຸທະລວງ, ສົ່ງຜົນກະທົບຢ່າງເລິກເຊິ່ງແລະຫຼາຍດ້ານ ໃນຂອບເຂດທົ່ວໂລກ. ວິທະຍາສາດ-ເຕັກໂນໂລຊີ ແລະການປ່ຽນແປງໃໝ່ປະດິດສ້າງ ນັບມື້ນັບກາຍເປັນປັດໄຈຕັດສິນຕໍ່ຄວາມສາມາດແຂ່ງຂັນຂອງທຸກປະເທດ. ເຕັກໂນໂລຊີດິຈິຕອນເຮັດໃຫ້ມີການປ່ຽນແປງໃນແບບວິທີການຄຸ້ມຄອງລັດ, ຮູບແບບການຜະລິດ ທຸລະກິດ, ການບໍລິໂພກແລະຊີວິດວັດທະນະທຳ ສັງຄົມ; ຊຸກຍູ້ການພັດທະນາເສດຖະກິດດິຈິຕອນ, ສັງຄົມດິຈິຕອນ. ພຶດຕິກຳດັ່ງກ່າວຮຽກຮ້ອງໃຫ້ຫວຽດນາມຕ້ອງຍູ້ແຮງການປ່ຽນແປງໃໝ່ຮູບແບບການເຕີບໂຕ ໄປສູ່ການພັດທະນາຕາມລວງເລິກ, ການຫັນປ່ຽນໂຄງປະກອບເສດຖະກິດໄປສູ່ຄວາມທັນສະໄໝຢ່າງໄວ, ຍົກສູງຄຸນນະພາບຂອງແຫຼ່ງບຸກຄະລາກອນ, ສືບຕໍ່ຍູ້ແຮງການຫັນເປັນອຸດສາຫະກຳ ທັນສະໄໝບົນພື້ນຖານຂອງວິທະຍາສາດ, ເຕັກໂນໂລຊີ ແລະການປ່ຽນແປງໃໝ່ປະດິດສ້າງ. ວິທະຍາສາດແລະເຕັກໂນໂລຊີຄວນໄດ້ຮັບການຖືວ່າເປັນ ການບຸກທະລຸຍຸດທະສາດທີ່ສຳຄັນ ເພື່ອນຳຫວຽດນາມໄປສູ່ການພັດທະນາທີ່ໄວແລະຍືນຍົງ. ດັ່ງນັ້ນ, ຂະແໜງການວິທະຍາສາດແລະເຕັກໂນໂລຊີຕ້ອງໄດ້ປ່ຽນແປງໃໝ່ບາງທິດທາງການພັດທະນາຈຸດໜັກດັ່ງນີ້:
ທີໜຶ່ງ, ສ້າງລະບົບນິເວດວິທະຍາສາດແລະເຕັກໂນໂລຊີໃນທຸກໂຄງສ້າງ, ທຸກເສົາຫຼັກຂອງການພັດທະນາ. ຕາມໂຄງສ້າງແນວນອນ, ທຸກພາກສ່ວນ, ເຈົ້າພາບເສດຖະກິດ ແລະ ອົງປະກອບໂຄງສ້າງຂອງສັງຄົມ ຕ້ອງຖືວິທະຍາສາດແລະເຕັກໂນໂລຊີ, ການປ່ຽນແປງໃໝ່ປະດິດສ້າງ ເປັນແຮງຂັບເຄື່ອນທີ່ສ້າງແຮງກະຕຸ້ນໃຫ້ແກ່ການພັດທະນາຂອງອົງກອນ, ເຈົ້າພາບນັ້ນເອງ. ການພັດທະນາຂອງແຕ່ລະພາກສ່ວນ, ແຕ່ລະເຈົ້າພາບໃນລະບົບ ແມ່ນແຮງຂັບເຄື່ອນໃຫ້ແກ່ການພັດທະນາພາກສ່ວນແລະເຈົ້າພາບເສດຖະກິດທີ່ຍັງເຫຼືອ. ການພັດທະນາຢ່າງສະໝ່ຳສະເໝີບັນດາຂົງເຂດວິທະຍາຍາສາດແລະເຕັກໂນໂລຊີໃນລະບົບໂດຍລວມ. ຕາມໂຄງສ້າງແນວຕັ້ງ, ໃນພາກສ່ວນ, ເຈົ້າພາບເສດຖະກິດໜຶ່ງ, ວິທະຍາສາດແລະເຕັກໂນໂລຊີຕ້ອງປະຕິບັດໜ້າທີ່ເປັນ “ສາຍເຊືອກ” ເພື່ອສ້າງຄວາມສໍາພັນທາງອິນຊີແລະຕ່ອງໂສ້ມູນຄ່າ.
ທີສອງ, ໃຫ້ຄວາມສຳຄັນກັບການຝຶກອົບຮົມຊັບພະຍາກອນມະນຸດທາງວິທະຍາສາດແລະເຕັກໂນໂລຊີ, ຮັບປະກັນອາຍຸແລະຄຸນສົມບັດຂອງພະນັກງານວິທະຍາສາດແລະເຕັກໂນໂລຊີຢ່າງເຕັມສ່ວນ ເພື່ອຕອບສະໜອງຄວາມຕ້ອງການຂອງທຸກຂະແໜງການ, ທຸກຂົງເຂດ ແລະໄລຍະການພັດທະນາ ຂອງສັງຄົມຫວຽດນາມ. ປຸກຕື່ນແລະສົ່ງເສີມຄວາມທະເຍີທະຍານ, ຄວາມໄຝ່ຝັນ, ຄວາມປາດຖະໜາ ແລະແຮງບັນດານໃຈໃນການປ່ຽນແປງໃໝ່ປະດິດສ້າງໃຫ້ກັບທຸກຄົນ ໃນຂະບວນການຄົ້ນຄວ້າ ແລະຝຶກອົບຮົມທາງວິທະຍາສາດແລະເຕັກໂນໂລຊີ. ປັບປຸງບູລະນະກົນໄກ, ນະໂຍບາຍຮັບປະກັນຊີວິດການເປັນຢູ່ໃຫ້ພະນັກງານທີ່ເຮັດວຽກງານຄົ້ນຄວ້າວິທະຍາສາດ.
ທີສາມ, ແກ້ໄຂ ເພີ່ມເຕີມ ແລະບູລະຍະ ເອກະສານກົດໝາຍ ແລະກົນໄກ, ນະໂຍບາຍກ່ຽວກັບວິທະຍາສາດແລະເຕັກໂນໂລຊີ, ປະກອບສ່ວນສ້າງແລວທາງກົດໝາຍແລະສະພາບແວດລ້ອມທີ່ເອື້ອອຳນວຍໃຫ້ແກ່ການພັດທະນາວິທະຍາສາດແລະເຕັກໂນໂລຊີ. ກົນໄກການເງິນຕ້ອງໂປ່ງໃສ ແໜ້ນແຟ້ນ, ສອດຄ່ອງກັບສະໄໝໃໝ່, ຕ້ອງຜັນຂະຫຍາຍຂໍ້ກຳນົດກ່ຽວກັບຊັບສິນທາງປັນຍາຢ່າງແຂງແຮງແລະເຂັ້ມງວດກວ່າອີກ, ປະກອບສ່ວນສົ່ງເສີມແລະຊຸກຍູ້ການຄົ້ນຄວ້າ, ຜະລິດທຸລະກິດ, ລົງທຶນເຂົ້າໃນວິທະຍາສາດແລະເຕັກໂນໂລຊີ.
ທີສີ່, ກຳນົດ, ຄັດເລືອກບາງຂະແໜງການ, ຂົງເຂດວິທະຍາສາດແລະເຕັກໂນໂລຊີທີ່ເປັນແກນກາງ, ເສົາຫຼັກ, ຈຳເປັນ, ປາຍແຫຼມ ເພື່ອລົງທຶນພັດທະນາຕາມມາດຕະຖານຂອງການເຊື່ອມໂຍງສາກົນ. ຍູ້ແຮງການຮ່ວມມືສາກົນທາງດ້ານວິທະຍາສາດແລະເຕັກໂນໂລຊີ, ຖືວ່າການຝຶກອົບຮົມທາງວິທະຍາສາດແລະເຕັກໂນໂລຊີແມ່ນຕະຫຼາດທີ່ດຶງດູດການລົງທຶນຈາກພາບໃນແລະຕ່າງປະທເທດ. ຍູ້ແຮງການຄົ້ນຄວ້າວິທະຍາສາດແລະເຕັກໂນໂລຊີໃນຂົງເຂດຄວາມໝັ້ນຄົງ-ການປ້ອງກັນປະເທດ, ປົກປັກຮັກສາອຳນາດອະທິປະໄຕແຫ່ງຊາດ, ກ້າວໄປສູ່ການເປັນເຈົ້າຂອງເຕັກໂນໂລຍີທີ່ສໍາຄັນຫຼາຍຊະນິດ. ສຸມໃສ່ການພັດທະນາບັນດາຂົງເຂດວິທະຍາສາດແລະເຕັກໂນໂລຊີທີ່ເປັນເສົາຫຼັກຂອງການປະຕິວັດອຸດສາຫະກຳຄັ້ງທີສີ່ (ປະກອບດ້ວຍເຕັກໂນໂລຊີດິຈິຕອນ, ເຕັກໂນໂລຊີຊີວະພາບ, ຟີຊິກ, ວັດສະດຸຂັ້ນສູງ, ພະລັງງານ ແລະສິ່ງແວດລ້ອມ).
ທີຫ້າ, ສືບຕໍ່ຍູ້ແຮງການເຄື່ອນໄຫວຄົ້ນຄວ້າ, ສືບສວນພື້ນຖານ, ສ້າງສະພາບແວດລ້ອມເພື່ອປະສົມປະສານວິທະຍາສາດແລະເຕັກໂນໂລຊີຫຼາຍຂະແໜງການ, ສະຫະວິຊາການ ໃນການເຂົ້າຮ່ວມໃຫ້ຄຳປຶກສາການກຳນົດແຜນນະໂຍບາຍຂອງພັກ, ນະໂຍບາຍ ກົດໝາຍຂອງລັດ, ໃຫ້ຄຳປຶກສາການປະເມີນງານທີ່ສຳຄັນຂອງລັດ. ເພີ່ມທະວີບົດບາດອະນຸຍາໂຕຕຸລະການ, ທີ່ປຶກສາເອກະລາດ ກ່ຽວກັບວິທະຍາສາດແລະເຕັກໂນໂລຊີ ຂອງອົງການຈັດຕັ້ງວິທະຍາສາດແລະເຕັກໂນໂລຊີ ໃນບັນດາບັນຫາເສດຖະກິດ-ສັງຄົມ. ສ້າງແຜນຍຸດທະສາດຂະແໜງການວິທະຍາສາດແລະເຕັກໂນໂລຊີຫວຽດນາມໄລຍະປີ 2020-2030 ແລະວິໄສທັດເຖິງປີ 2040 ທີ່ເປັນໄປໄດ້ ແລະສອດຄ່ອງເໝາະສົມ (ມີພາກສ່ວນແກນກາງ, ພາກສ່ວນສຳຄັນແລະພາກສ່ວນສຳຮອງ).
ທີຫົກ, ຍູ້ແຮງການສື່ສານທາງວິທະຍາສາດແລະເຕັກໂນໂລຊີ. ແຜ່ກະຈາຍແລະເສີມຂະຫຍາຍຈິດໃຈຄົ້ນຄວ້າ, ຮ່ຳຮຽນ ແລະປະຢຸກໃຊ້ວິທະຍາສາດແລະເຕັກໂນໂລຊີໃນລະບົບການເມືອງແລະອົງຄະນະມະຫາຊົນທັງໝົດ, ໃນທຸກໆການເຄື່ອນໄຫວສັງຄົມ. ສ້າງສະພາບແວດລ້ອມການແຂ່ງຂັນໃນກິດຈະກໍາວິທະຍາສາດແລະເຕັກໂນໂລຊີ, ສ້າງຄວາມຍືດຫຍຸ່ນໃນການຫັນປ່ຽນອາຊີບ ຈາກການຄົ້ນຄວ້າວິທະຍາສາດແລະເຕັກໂນໂລຊີ ໄປສູ່ອາຊີບອື່ນ. ຍ້ອງຍໍໃຫ້ລາງວັນຢ່າງທັນທ່ວງທີແກ່ຜູ້ທີ່ມີສິ່ງປະດິດ ນະວັດຕະກຳ ແລະຊຸກຍູ້ການປະຢຸກໃຊ້ວິທະຍາສາດແລະເຕັກໂນໂລຊີ ໃນການພັດທະນາເສດຖະກິດ-ສັງຄົມຂອງຫວຽດນາມ./.
-----------------------
ບົດນີ້ໄດ້ລົງພິມໃນວາລະສານກອມມູນິດສະບັບທີ 958 (ເດືອນມັງກອນ 2021).