ການປ່ຽນແປງໃໝ່ການຄຸ້ມຄອງເງິນຕາຢູ່ຫວຽດນາມ
ໃນເງື່ອນໄຂຂອງການພັດທະນາເສດຖະກິດດິຈິຕອນ
ໃນເງື່ອນໄຂຂອງການພັດທະນາເສດຖະກິດດິຈິຕອນ
ວກ. - ໃນຊຸມປີທີ່ຜ່ານມາມໍ່ນີ້, ຢູ່ຫວຽດນາມ, ເສດຖະກິດດິຈິຕອນໄດ້ຮັບຄວາມເອົາໃຈໃສ່ ແລະ ບຸລິມະສິດການພັດທະນາ ດັ່ງນັ້ນຈຶ່ງມີການຫັນປ່ຽນຢ່າງແຂງແຮງ. ມະຕິເລກທີ່ 52-NQ/TW, ວັນທີ 27 ກັນຍາ 2019, ຂອງກົມການເມືອງ, “ກ່ຽວກັບແຜນນະໂຍບາຍແລະນະໂຍບາຍຈໍານວນໜຶ່ງ ເພື່ອເຂົ້າຮ່ວມຢ່າງຫ້າວຫັນໃນການປະຕິວັດອຸດສາຫະກໍາຄັ້ງທີສີ່” ກຳນົດເປົ້າໝາຍຮອດປີ 2025, ເສດຖະກິດດິຈິຕອນຈະປະກອບສ່ວນ 20% ເຂົ້າໃນລວມຍອດຜະລິດຕະພັນພາຍໃນປະເທດ (ຈີດີພີ). ທະນາຄານແຫ່ງລັດຫວຽດນາມ ແມ່ນອົງການຄຸ້ມຄອງລັດກ່ຽວກັບເງິນຕາ ແລະການເຄື່ອນໄຫວຂອງທະນາຄານ, ໃນໄລຍະປີ 2016-2020 ໄດ້ຄາດຄະເນ, ປະເມີນການກະທົບຂອງທ່າອຽງນີ້ຕໍ່ຂົງເຂດການເງິນ, ທະນາຄານໃນສາມດ້ານແມ່ນ ນະໂຍບາຍການເງິນ, ການກວດສອບຄວາມປອດໄພທາງການເງິນ ແລະ ການຊໍາລະເງິນ, ພ້ອມກັນນັ້ນກໍຜັນຂະຫຍາຍຫຼາຍວິທີແກ້ໄຂຢ່າງຄົບຊຸດ ເພື່ອປະຕິບັດແຜນນະໂຍບາຍຂອງພັກແລະລັດກ່ຽວກັບເສດຖະກິດດິຈິຕອນ.
ຂໍ້ດີແລະສິ່ງທ້າທາຍທີ່ເກີດຈາກເສດຖະກິດດິຈິຕອນ
ເສດຖະກິດດິຈິຕອນນັບມື້ນັບກາຍເປັນອົງປະກອບທີ່ສຳຄັນຂອງພື້ນຖານເສດຖະກິດ; ມັນໄດ້ຮັບການພັດທະນາບົນພື້ນຖານການປະຍຸກເຕັກໂນໂລຊີດິຈິຕອນ ແລະ ຂໍ້ມູນໃຫຍ່ ເພື່ອສ້າງຮູບແບບທຸລະກິດໃຫມ່, ສ້າງຜະລິດຕະພັນແລະບໍລິການຫຼາຍຢ່າງ, ສະໜັບສະໜູນການການສະໜອງການບໍລິການດິຈິຕອນ ໃຫ້ແກ່ວິສາຫະກິດແລະປະຊາຊົນ ຜ່ານການປະສົມເຕັກໂນໂລຍີທີ່ທັນສະໄໝຫຼາຍອັນ (ການປະມວນຜົນແບບກຸ່ມເມກ, ປັນຍາປະດິດ (AI), ອິນເຕີເນັດເຊື່ອມຕໍ່ທຸກສິ່ງ (IoT),...). ໃນພື້ນຖານເສດຖະກິດດິຈິຕອນ, ບັນດາວິສາຫະກິດຈະປ່ຽນຂະບວນການຜະລິດ, ທຸລະກິດໄປເປັນຮູບແບບຕາມລະບົບນິເວດທີ່ເຊື່ອມຕໍ່ຕ່ອງໂສ້ຄຸນຄ່າ ຕັ້ງແຕ່ການຜະລິດ, ການຄ້າ, ໂລຈິສະຕິກສ໌... ຈົນເຖິງການຊົມໃຊ້ບໍລິໂພກ, ປະກອບສ່ວນຫັນປ່ຽນພື້ນຖານເສດຖະກິດໂດຍພື້ນຖານ, ສ້າງວຽກເຮັດງານທຳໃໝ່ເປັນຈຳນວນຫຼາຍ, ປະກອບສ່ວນເພີ່ມສະມັດຕະພາບຂອງງານ.
ຂະບວນການປ່ຽນດິຈິຕອນໄດ້ແລະພວມກະທົບໂດຍພື້ນຖານເຖິງໂຄງສ້າງລະບົບການເງິນ, ຜ່ານການປະຍຸກເຕັກໂນໂລຍີການເງິນທີ່ທັນສະໄໝເຊັ່ນ: ການລະບຸຕົວຕົນລູກຄ້າທາງເອເລັກໂຕຣນິກ (e-KYC), ການຊຳລະເງິນທີ່ບໍ່ໃຊ້ເງິນສົດ, ສະກຸນເງິນສະເໝືອນ (1), ເງິນ Stablecoins(2), ສະກຸນເງິນດິຈິຕອນຂອງທະນາຄານກາງ(3), ການໃຫ້ກູ້ຢືມແບບເພື່ອນຕໍ່ເພື່ອນ (Peer-to-Peer Lending)... ຊຸກຍູ້ການປະດິດສ້າງ ແລະ ການແຂ່ງຂັນເຕັກໂນໂລຊີ; ເຮັດໃຫ້ເກີດການປ່ຽນແປງຢ່າງເລິກເຊິ່ງຕໍ່ໂຄງສ້າງລະບົບການເງິນໂດຍລວມ ແລະໂຄງສ້າງແຮງງານໃນຂະແໜງການການເງິນໂດຍສະເພາະ ໂດຍປ່ຽນທິດທາງການເພີ່ມການໃຊ້ປັນຍາປະດິດແທນແຮງງານທຳມະດາ. ຜົນກະທົບເຫຼົ່ານີ້ໄດ້ສ້າງຄວາມສະດວກແລະສິ່ງທ້າທາຍໃຫ້ກັບລະບົບການເງິນ, ຈາກນັ້ນກະທົບເຖິງປະສິດທິຜົນແລະປະສິດທິພາບຂອງການບໍລິຫານນະໂຍບາຍການເງິນ ແລະການເຄື່ອນໄຫວຂອງທະນາຄານສູນກາງ.
ການນຳໃຊ້ເຕັກໂນໂລຍີຂໍ້ມູນຂ່າວສານຊ່ວຍສົ່ງເສີມການປ່ຽນແປງໃໝ່ປະດິດສ້າງ ເພື່ອສ້າງພື້ນຖານເພີ່ມສະມັດຕະພາບຂອງງານ, ປັບປຸງຄຸນນະພາບຊີວິດໃຫ້ດີຂຶ້ນ. ຕາມເສດຖະສາດກຼາດຊິກ ແລະ ເສດຖະສາດການເງິນ, ການປະຍຸກເຕັກໂນໂລຊີການທະນາຄານເພີ່ມຂຶ້ນ ເຮັດໃຫ້ວົງຈອນການເງິນມີການຂະຫຍາຍຕົວໄວຂຶ້ນ, ສົ່ງເສີມທຸລະກຳທາງເສດຖະກິດທີ່ໄວແລະສະດວກກວ່າ, ປະຫຍັດຕົ້ນທຶນຕົວກາງ, ປະກອບສ່ວນເພີ່ມປະສິດທິພາບທາງເສດຖະກິດ. ຄຽງຂ້າງກັນນັ້ນ, ສັງຄົມທີ່ໃຊ້ເງິນສົດໜ້ອຍລົງດ້ວຍການປ່ຽນເປັນດິຈິຕອນ ຍັງຊ່ວຍຈຳກັດເສດຖະກິດໃຕ້ດິນ, ຫຼຸດການສູນເສຍລາຍໄດ້ຈາກພາສີ. ສະມັດຕະພາບແຮງງານສັງຄົມເພີ່ມຂຶ້ນຊ່ວຍຫຼຸດຕົ້ນທຶນການຜະລິດ, ສະໜັບສະໜູນການຮັກສາສະຖຽນລະພາບອັດຕາເງິນເຟີ້ ເຊິ່ງເປັນເປົ້າໝາຍຂອງການບໍລິຫານນະໂຍບາຍການເງິນໃນປະເທດສ່ວຍໃຫຍ່. ການນຳໃຊ້ຄວາມກ້າວໜ້າທາງວິທະຍາສາດ-ເຕັກໂນໂລຊີໃນດ້ານການເງິນ-ທະນາຄານ ກໍ່ຊຸກຍູ້ການເງິນຢ່າງຮອບດ້ານ, ເພີ່ມຄວາມສາມາດເຂົ້າເຖິງແຫຼ່ງການເງິນຂອງເຂດຫ່າງໄກສອກຫຼີກ, ໂດຍສະເພາະກຸ່ມຄົນດ້ອຍໂອກາດໃນສັງຄົມ.
ທ່າອ່ຽງທີ່ໄດ້ປະກົດຕົວແລະພັດທະນາຢ່າງໄວເມື່ອບໍ່ດົນມານີ້ແມ່ນ ການສົ່ງເສີມການຄົ້ນຄວ້າສະກຸນເງິນດິຈິຕອນ ໂດຍທະນາຄານກາງທີ່ສຳຄັນບາງແຫ່ງເຊັ່ນ: ອາເມລິກາ, ອັງກິດ, ສະວິເດນ ແລະອື່ນໆ, ໃນນັ້ນຜູ້ບຸກເບີກຄືທະນາຄານກາງຂອງຈີນໄດ້ກ້າວໄປສູ່ການທົດສອບຂະໜາດໃຫຍ່, ເພື່ອໃຊ້ປະໂຫຍດຈາກເຕັກໂນໂລຊີ, ສ້າງເຄື່ອງມື ແລະແບບວິທີການບໍລິຫານນະໂຍບາຍເງິນຕາໃໝ່, ຫຼຸດຄ່າໃຊ້ຈ່າຍໃນການອອກແລະຮັກສາສະກຸນເງິນ ແລະ ເພີ່ມຄວາມໂປ່ງໃສໃນການເຮັດທຸລະກຳທາງເສດຖະກິດ, ເພີ່ມຄວາມເປີດກວ້າງທາງການເງິນ.
ຢ່າງໃດກໍ່ຕາມ, ເສດຖະກິດດິຈິຕອນຍັງເປັນສິ່ງທ້າທາຍຫຼາຍຢ່າງຕໍ່ການບໍລິຫານນະໂຍບາຍການເງິນ ແລະ ການເຄື່ອນໄຫວຂອງທະນາຄານ, ລວມທັງ:
ທີໜຶ່ງ, ທ້າທາຍຄວາມສາມາດໃນການຄຸ້ມຄອງການສະໜອງເງິນ ແລະ ຖານະພິເສດຂອງທະນາຄານກາງ ໃນການອອກເງິນ ຖ້າສະກຸນເງິນສະເໝືອນ, ໂດຍສະເພາະສະກຸນເງິນສະເໝືອນທີ່ອອກໂດຍເອກະຊົນ ໄດ້ຮັບການຍອມຮັບຢ່າງກວ້າງຂວາງໃນລະບົບເສດຖະກິດ ໃນຖານະວິທີການຊໍາລະເງິນ ຫຼືການສະສົມຊັບສິນ; ເວລານັ້ນ, ປະສິດທິພາບແລະປະສິດທິຜົນຂອງຜົນກະທົບຂອງນະໂຍບາຍການເງິນ ຕໍ່ການເຄື່ອນໄຫວເສດຖະກິດ ຜ່ານເຄື່ອງມືນະໂຍບາຍການເງິນທີ່ດຳເນີນການຢູ່ ຈະຫຼຸດລົງຢ່າງຫຼາຍ.
ທີສອງ, ເຕັກໂນໂລຊີການຊໍາລະເງິນທີ່ທັນສະໄໝຊ່ວຍເພີ່ມການໝູນວຽນຂອງສະກຸນເງິນ, ມີອິດທິພົນຕໍ່ການວາງແຜນແລະການຈັດການ ການສະໜອງເງິນຂອງທະນາຄານກາງ ໃນການຄວບຄຸມແຮງກົດດັນດ້ານເງິນເຟີ້; ມັນຍັງສ້າງສິ່ງທ້າທາຍຫຼາຍຢ່າງໃຫ້ກັບຂອບການຄຸ້ມຄອງປະລິມານການສະໜອງເງິນຂອງທະນາຄານກາງ.
ທີສາມ, ບົດບາດຂອງຊ່ອງທາງສິນເຊື່ອດັ້ງເດີມ, ໂດຍສະເພາະແມ່ນສິນເຊື່ອບຸກຄົນທໍາມະດາ ແລະ ສິນເຊື່ອຂອງຜູ້ບໍລິໂພກ ຈະປະເຊີນກັບການແຂ່ງຂັນທີ່ຮຸນແຮງ ໃນສະພາບການພັດທະນາການໃຫ້ກູ້ຢືມແບບເພື່ອນຕໍ່ເພື່ອນ (Peer-to-peer Lending).
ທີສີ່, ສິ່ງທ້າທາຍດ້ານຄວາມປອດໄພທາງການເງິນ, ອາດຊະຍາກຳທາງດິຈິຕອນ, ໄພຂົ່ມຂູ່ດ້ານຄວາມປອດໄພທີ່ບໍ່ເປັນແບບດັ້ງເດີມ ນັບມື້ນັບສັບສົນຂຶ້ນ ເມື່ອສະກຸນເງິນສະເໝືອນສ່ວນຕົວ ຫຼືການບໍລິການ ແລະ ຜະລິດຕະພັນການເງິນໃໝ່ ບົນພື້ນຖານຂອງເຕັກໂນໂລຊີການເງິນ (fintech) ໄດ້ຖືກພັດທະນາແລະນຳໄປໃຊ້ເຂົ້າໃນການປິດບັງການເຮັດທຸລະກໍາເຊັ່ນ: ການຟອກເງິນ, ການສໍ້ໂກງຫຼາຍລະດັບການເງິນ, ບັນດາຮູບແບບ “ສິນເຊື່ອດໍາ” ທີ່ປອມຕົວ...
ທີຫ້າ, ສິ່ງທ້າທາຍຕໍ່ຄວາມໝັ້ນຄົງຂອງລະບົບການເງິນເມື່ອມູນຄ່າຊັບສິນສະເໝືອນແລະສະກຸນເງິນສະເໝືອນຜັນຜວຍຢ່າງໄວວາ, ສົ່ງຜົນກະທົບຢ່າງໃຫຍ່ຫຼວງຕໍ່ຈິດຕະວິທະຍາຂອງນັກລົງທຶນ, ຕໍ່ກັບກະແສທຶນສາກົນທີ່ເຄື່ອນຍ້າຍລະຫວ່າງປະເທດທີ່ກິດຈະກໍາ fintech ທີ່ພັດທະນາແລ້ວ.
ທີຫົກ, ສິ່ງທ້າທາຍທັງໝົດເທິງນີ້ນໍາໄປສູ່ບັນຫາໃຫຍ່ທີ່ສຸດ ທີ່ຫຼາຍປະເທດກໍາລັງປະເຊີນຢູ່ໃນທຸກມື້ນີ້ແມ່ນ “ຊ່ອງຫວ່າງນະໂຍບາຍ” ໃນການຄຸ້ມຄອງກິດຈະກໍາການຫັນເປັນດິຈິຕອນ ໃນຂົງເຂດການເງິນ, ເພື່ອເພີ່ມປະສິດທິພາບຂໍ້ດີທີ່ໄດ້ມາຈາກເຕັກໂນໂລຊີ ແຕ່ຍັງເພື່ອຮັບປະກັນການຄວບຄຸມຄວາມສ່ຽງແລະສິ່່ງທ້າທາຍ ເຊິ່ງຂົງເຂດນີ້ສາມາດສ້າງໄດ້, ຮັບປະກັນຄວາມໝັ້ນຄົງແລະຄວາມປອດໄພຂອງລະບົບການເງິນ, ປົກປ້ອງສິດຜົນປະໂຫຍດຂອງຜູ້ບໍລິໂພກ, ບໍ່ພຽງແຕ່ໃນແຕ່ລະປະເທດ ແຕ່ຍັງໃນລະດັບໂລກອີກດ້ວຍ. ເນື່ອງຈາກການປ່ຽນແປງຢ່າງໄວວາຂອງຂະບວນການຫັນເປັນດິຈິຕອນໃນລະບົບເສດຖະກິດ, ລະບຽບກົດໝາຍບໍ່ໄດ້ມີການປ່ຽນແປງທັນກັບເວລາທີ່ຈະປັບປ່ຽນ, ດັ່ງນັ້ນ ເພື່ອຕອບສະໜອງຄວາມຕ້ອງການຂອງຊີວິດ ແລະ ສາມາດນຳເອົາການປະດິດສ້າງທາງດິຈິຕອນ, ໂດຍສະເພາະຄວາມຄິດປະດິດສ້າງໃນຂົງເຂດການເງິນແລະທະນາຄານ, ເຂົ້າຄຸ້ມຄອງໃນກອບກົດໝາຍ, ຈາກນັ້ນຈັດການແກ້ໄຂໄດ້ກັບຄວາມບໍ່ພຽງພໍ ຂອງສະພາບແວດລ້ອມທາງດ້ານກົດໝາຍດັ່ງທີ່ໄດ້ກ່າວມາຂ້າງເທິງ, ຫຼາຍປະເທດຕ້ອງໄດ້ອອກກົດໝາຍແລະບັງຄັບໃຊ້ກອບກົດໝາຍທົດລອງ (Sandbox) ເພື່ອຄວບຄຸມກິດຈະກໍາເຫຼົ່ານີ້.
ການຄຸ້ມຄອງເງິນຕາໃນພື້ນຖານເສດຖະກິດດິຈິຕອນຢູ່ຫວຽດນາມ
ທີໜຶ່ງ, ສຳລັບການບໍລິຫານນະໂຍບາຍເງິນຕາ, ຄວາມກ້າວໜ້າທາງດ້ານວິທະຍາສາດ-ເຕັກໂນໂລຊີ ໄດ້ແລະກຳລັງອຳນວຍຄວາມສະດວກ ໃຫ້ແກ່ການປະຕິບັດເປົ້າໝາຍຄວບຄຸມເງິນເຟີ້ ໃນການບໍລິຫານນະໂຍບາຍເງິນຕາຢູ່ຫວຽດນາມ. ໃນຊຸມປີທີ່ຜ່ານມາ, ວຽກງານການບໍລິຫານ, ຄວບຄຸມ ແລະ ຮັກສາຄວາມເປັນປົກກະຕິຂອງເງິນເຟີ້ຢູ່ຫວຽດນາມ ໄດ້ຮັບການຕີລາຄາສູງຈາກບັນດາອົງກອນຢູ່ໃນປະເທດແລະຕ່າງປະເທດ, ວ່າເປັນຜົນງານຂອງການບໍລິຫານນະໂຍບາຍເງິນຕາທີ່ຮອບຄອບ, ຍືດຫຍຸ່ນ, ເປັນເຈົ້າການ ແລະ ຢຶດໝັ້ນ ຂອງທະນາຄານແຫ່ງລັດ. ອັນນີ້ກໍ່ແມ່ນຍ້ອນການປະກອບສ່ວນຂອງການປັບປຸງປັດໃຈດ້ານການສະໜອງ ໂດຍຜ່ານການນຳໃຊ້ວິທະຍາສາດແລະເຕັກໂນໂລຊີ ເຂົ້າໃນການຜະລິດໃນສະພາບແວດລ້ອມທີ່ເປັນດິຈິຕອນ. ການປະຍຸກເຫຼົ່ານີ້ໄດ້ປ່ຽນຮູບແບບການຜະລິດໂດຍພື້ນຖານ, ສ້າງການປ່ຽນແປງດ້ານຄຸນນະພາບໃນສະມັດຕະພາບແຮງງານ, ຫຼຸດຜ່ອນການມີສ່ວນຮ່ວມຂອງມະນຸດເຂົ້າໃນຂະບວນການຜະລິດ, ຈາກນັ້ນຫຼຸດຜ່ອນຄ່າໃຊ້ຈ່າຍການຜະລິດໃນປະເທດທີ່ມີພື້ນຖານດິຈິຕອນທີ່ໂດດເດັ່ນ. ໃນໂລກໂລກາພິວັດ, ທ່າອ່ຽງອັດຕາເງິນເຟີ້ຕໍ່າ ຍ້ອນຄວາມກ້າວໜ້າທາງດ້ານເຕັກໂນໂລຊີ ຈະແຜ່ຂະຫຍາຍໃນທົ່ວສາຍໂສ້ຄຸນຄ່າທີ່ຫວຽດນາມແມ່ນຕ່ອງໂສ້ໜຶ່ງ. ຄຽງຄູ່ກັນນັ້ນ, ການພັດທະນາການຄ້າເອເລັກໂຕຣນິກໄດ້ເຮັດໃຫ້ສິນຄ້າພາຍໃນປະເທດປະເຊີນກັບຄວາມກົດດັນຂອງການແຂ່ງຂັນຫຼຸດລາຄາກັບສິນຄ້າຕ່າງປະເທດ, ຈາກນັ້ນຈຶງຊ່ວຍຫຼຸດແຮງກົດດັນຕໍ່ລະດັບເງິນເຟີ້.
ທີສອງ, ເຕັກໂນໂລຊີດິຈິຕອນຊຸກຍູ້ລະບົບການຊໍາລະເງິນທີ່ຂະຫຍາຍຕົວໄວທີ່ສຸດເທົ່າທີ່ເຄີຍມີມາ, ສ້າງການປ່ຽນແປງທີ່ໂດດເດັ່ນກ່ຽວກັບໂຄງສ້າງພື້ນຖານ, ຜະລິດຕະພັນ ແລະບໍລິການ. ພ້ອມກັນກັບລະບົບນິເວດນັ້ນ, ທະນາຄານແຫ່ງລັດໄດ້ອອກນະໂຍບາຍແລະວິທີແກ້ໄຂຫຼາຍຢ່າງ ເພື່ອອຳນວຍຄວາມສະດວກໃຫ້ແກ່ການພັດທະນາຕົວກາງການຊໍາລະເງິນ ທີ່ນຳເອົາສິ່ງອຳນວຍຄວາມສະດວກ ແລະປະສົບການດິຈິຕອນໃໝ່່ມາສູ່ຜູ້ໃຊ້. ເພື່ອພັດທະນາໂຄງສ້າງພື້ນຖານການຊຳເງິນມຸ່ງສູ່ມາດຕະຖານສາກົນ, ທະນາຄານແຫ່ງລັດໄດ້ປັບປຸງລະບົບການຊໍາລະເງິນເອເລັກໂຕຣນິກລະຫວ່າງທະນາຄານທີ່ທັນສະໄໝເປັນປົກກະຕິ ຕາມທິດລວມສູນ, ມີບົດບາດເປັນກະດູກສັນຫຼັງຂອງລະບົບການຊໍາລະເງິນຂອງປະເທດ. ໃນ 9 ເດືອນຕົ້ນປີ 2020, ລະບົບການຊໍາລະເງິນເອເລັກໂຕຣນິກລະຫວ່າງທະນາຄານໄດ້ດຳເນີນການ ທຸລະກໍາຫຼາຍກວ່າ 106 ລ້ານຄັ້ງ, ເທົ່າກັບ 75.539 ພັນຕື້ດົ່ງ (ຫຼຸດ 9,69% ທາງດ້ານປະລິມານ ແລະ ເພີ່ມ 8,49% ທາງດ້ານຄຸນຄ່າຂອງທຸລະກຳ ເມື່ອທຽບກັບເວລາດຽວກັນຂອງປີ 2019). ລະບົບການຫັກບັນຊີອັດຕະໂນມັດສຳລັບທຸລະກຳຂາຍຍ່ອຍ (ACH) ກໍ່ໄດ້ຖືກທະນາຄານແຫ່ງລັດຊີ້ນຳ ໃຫ້ບໍລິສັດຫຸ້ນສ່ວນຊຳລະເງິນແຫ່ງຊາດຫວຽດນາມ (NAPAS) ສ້າງຂຶ້ນແລະນຳໃຊ້ຕັ້ງແຕ່ເດືອນກໍລະກົດ 2020 ດ້ວຍຄວາມສາມາດຊຳລະເງິນຕາມເວລາແທ້ (real-time), ເຄື່ອນໄຫວຢ່າງຕໍ່ເນື່ອງຕະຫຼອດ 24 ຊົ່ວໂມງທຸກວັນ, ການປະມວນຜົນທຸລະກຳຫຼາຍຊ່ອງທາງ.
ຜະລິດຕະພັນແລະບໍລິການດ້ານການທະນາຄານຈຳນວນຫຼາຍຖືກນຳໃຊ້ໂດຍທະນາຄາມບົນພື້ນຖານການນຳໃຊ້ເຕັກໂນໂລຊີທີ່ທັນສະໄໝ, ເພີ່ມປະສົບການຂອງລູກຄ່າເຊັ່ນ: ບໍລິການຂອງທະນາຄານ, ການຊຳລະເງິນທາງເອເລັກໂຕຣນິກບົນອິນເຕີເນັດ, ໂທລະສັບມືຖືພ້ອມການປະຍຸກອິນເຕີເນັດເຊື່ອມຕໍ່ທຸກສິ່ງ (IoT) ອະນຸຍາດໃຫ້ລູກຄ້າເຂົ້າເຖິງແລະໃຊ້ບໍລິການທະນາຄານ ຫຼືເຊື່ອມຕໍ່ກັບລະບົບນິເວດດິຈິຕອນອື່ນໆ; ໃຫ້ບໍລິການເບີກຈ່າຍແລະໃຫ້ຢືມບົນພື້ນຖານຂອງການສະໜັບສະໜູນຈາກແອບພຼີເຄຊັນປັນຍາປະດິດ (A.I), ຫັນເປັນຂະບວນການອັດຕະໂນມັດກ້ວຍຫຸ່ນຍົນ (R.P.A) ແລະ ຂໍ້ມູນໃຫຍ່ (Big data) ເພື່ອເກັບກຳ ວິເຄາະຂໍ້ມູນ ແລະ ປະເມີນແລະແຍກປະເພດລູກຄ່າສໍາລັບການຕັດສິນໃຈເບີກຈ່າຍ,… ໃນນັ້ນ, ການບໍລິການທະນາຄານຜ່ານມືຖື (mobile banking) ບັນລຸຜົນໄດ້ຮັບທີ່ໜ້າປະທັບໃຈ ດ້ວຍການເຕີບໂຕຂອງການຊຳລະຜ່ານມືຖືໃນປີ 2020 ເພີ່ມຂຶ້ນ 123,9% ທາງດ້ານຄຸນຄ່າ ແລະ 125,4% ທາງດ້ານປະລິມານ ເມື່ອທຽບກັບປີ 2019, ການຊຳລະເງິນດ້ວຍລະຫັດ QR ເພີ່ມຂຶ້ນ 82,4% ກ່ຽວກັບປະລິມານການເຮັດທຸລະກຳ ແລະ ຈາກການສໍາຫຼວດຜູ້ບໍລິໂພກທົ່ວໂລກຂອງ PwC (ໜຶ່ງໃນສີ່ບໍລິສັດກວດສອບບັນຊີຊັ້ນນຳຂອງໂລກ) ຕໍ່ 27 ປະເທດແລະດິນແດນ, ຫວຽດນາມແມ່ນໜຶ່ງໃນຕະຫຼາດທີ່ເຕີບໂຕໄວທີ່ສຸດໃນໂລກສໍາລັບການຊໍາລະເງິນຜ່ານມືຖືໃນປີ 2019. ຢ່າງໃດກໍຕາມ, ຂະບວນການປ່ຽນດິຈິຕອນໃນຂົງເຂດການເງິນແລະການທະນາຄານຂອງຫວຽດນາມປະຈຸບັນກຳລັງປະເຊີນໜ້າກັບຄວາມສ່ຽງທີ່ອາດຈະເກີດຂຶ້ນຫຼາຍຢ່າງ ຈາກທ່າອຽງທີ່ເພີ່ມຂຶ້ນຂອງອາດຊະຍາກຳໃນໂລກໄຊເບີຣ໌ ແລະການໂຈມຕີທາງອິນເຕີເນັດ. ກໍລະນີທີ່ຜ່ານມາ ມີການລັກຍອດເງິນໃນບັນຊີທະນາຄານ ຂອງຜູ້ໃຊ້ບໍລິການຊໍາລະເງິນອອກໄລຜ່ານທາງອິນເຕີເນັດ ຫຼືໂທລະສັບມືຖື ເປັນຫຼັກຖານຂອງບັນຫານີ້. ໃນສະພາບການດັ່ງກ່າວ, ທະນາຄານແຫ່ງລັດໄດ້ແລະກຳລັງປະສານສົມທົບຢ່າງຕັ້ງໜ້າ ກັບກະຊວງຕຳຫຼວດແລະບັນດາອົງການຮັບຜິດຊອບພາຍໃນ ເພື່ອເພີ່ມທະວີການແລກປ່ຽນຂໍ້ມູນຂ່າວສ່ານ... ເພື່ອຮັບໃຊ້ການປ້ອງກັນແລະຕ້ານອາຊະຍາກຳທາງອິນເຕີເນັດ.
ທີສາມ, ທີ່ກ່ຽວຂ້ອງກັບຄວາມໝັ້ນຄົງທາງເງິນຕາແລະການເງິນ, ໃນເວລາທີ່ຜ່ານມາ, ທະນາຄານແຫ່ງລັດໄດ້ຜັນຂະຫຍາຍມາດຕະການຕ່າງໆຢ່າງແຂງແຮງ ຄົບຊຸດ ເພື່ອເພີ່ມປະສິດທິພາບແລະປະສິດທິຜົນຂອງວຽກງານກວດກາ, ຕິດຕາມກວດກາທະນາຄານ ໃນທິດທາງທີ່ເຂົ້າເຖິງກັບການປະຕິບັດແລະມາດຕະຖານສາກົນ ແລະ ສອດຄ່ອງກັບພຶດຕິກຳແຫ່ງການພັດທະນາຂອງຂະແໜງການທະນາຄານໃນໄລຍະໃໝ່, ປັບປຸງນະໂຍບາຍຄວາມປອດໄພມະຫາພາກເທື່ອລະກ້າວ ເພື່ອສ້າງພື້ນຖານກົດໝາຍຊ່ວຍປ້ອງກັຍຄວາມສ່ຽງຂອງລະບົບ. ອາໃສສິ່ງດັ່ງກ່າວ, ສະຖຽນລະພາບຂອງການເງິນ, ເງິນຕາໄດ້ຮັກສາ; ສະຖາບັນສິນເຊື່ອປັບປຸງຄວາມສາມາດທາງການເງິນ, ປັບປຸງອັດຕາສ່ວນຄວາມປອດໄພ, ເສີມສ້າງການຄວບຄຸມຄວາມສ່ຽງຕາມກົດໝາຍ ແລະສອດຄ່ອງກັບການປະຕິບັດສາກົນ, ອັດຕາສ່ວນໜີ້ເສຍຖືກຄວບຄຸມໃນລະດັບທີ່ປອດໄພ.
ເຖິງຢ່າງໃດກໍ່ຕາມ, ສະຖຽນລະພາບທາງດ້ານການເງິນແລະເງິນຕາຢູ່ຫວຽດນາມຍັງປະເຊີນກັບດ້ານລົບຈາກການພັດທະນາໄວແລະຍາກທີ່ຈະຄວບຄຸມ ຂອງບໍລິການແລະຜະລິດຕະພັນ fintech. ໃນເວລາທີ່ຜ່ານມາ, ການຫຼອກລວງເພີ່ມຂຶ້ນ ເພາະວ່າຜູ້ຄົນຖືກຈອບອອຍແລະລໍ້ລວງໃຫ້ໄດ້ກໍາໄລສູງເມື່ອເຂົ້າຮ່ວມເຄືອຂ່າຍການເງິນຫຼາຍລະດັບ ແລະລົງທຶນໃນສະກຸນເງິນສະເໝືອນຈິງ; ພວກບໍ່ດີບາງຄົນໄດ້ສວຍໂອກາດ, ປອມແປງກິດຈະການໃຫ້ກູ້ຢືມແບບເພື່ອນຕໍ່ເພື່ອນ ເພື່ອດໍາເນີນການກະທໍາທີ່ຜິດກົດໝາຍ: ໃຫ້ກູ້ຢືມເງິນດອກເບ້ຍສູງ, ນໍາໃຊ້ສິນເຊື່ອດໍາ. ເພື່ອຈັດການແກ້ໄຂບັນຫານີ້, ທະນາຄານແຫ່ງລັດໄດ້ຢືນຢັນຕັ້ງແຕ່ຕົ້ນວ່າ ສະກຸນເງິນສະເໝືອນບໍ່ແມ່ນວິທີການຊຳລະເງິນຕາມກົດໝາຍຂອງຫວຽດນາມ, ພ້ອມກັນນັ້ນກໍໄດ້ຍູ້ແຮງວຽກງານການໂຄສະນາ ເພື່ອຍົກສູງຄວາມຮັບຮູ້ຂອງປະຊາຊົນ ໃນການນຳໃຊ້ຜະລິດຕະພັນການເງິນ ເຕັກໂນໂລຊີທີ່ບໍ່ໄດ້ຮັບການປົກປ້ອງໂດຍກົດໝາຍ. ແຕ່ວ່າ, ການສ້າງສະພາບແວດລ້ອມດ້ານກົດລະບຽບທີ່ເອື້ອອໍານວຍ ເພື່ອສະໜັບສະໜູນບໍລິສັດ fintech ໃຫ້ດໍາເນີນການໃນລັກສະນະທີ່ດີ, ແນະນຳສິ່ງຜະລິດແລະສິ່ງປະດິດໃໝ່ໆ ປະກອບສ່ວນຊຸກຍູ້ການພັດທະນາເສດຖະກິດ ແລະເຜີຍແຜ່ການເງິນ, ພ້ອມກັນນັ້ນ ການຄວບຄຸມຄວາມສ່ຽງດ້ານການເງິນທີ່ອາດເກີດຂຶ້ນຈາກການພັດທະນາໄວຂອງ fintech ແລະນະວັດຕະກໍາດິຈິຕອນ ເປັນສິ່ງຈໍາເປັນທີ່ສຸດ.
ທິດທາງການຄຸ້ມຄອງເງິນຕາໃນເງື່ອນໄຂ
ຂອງການພັດທະນາລະບົບເສດຖະກິດດິຈິຕອນໃນເວລາທີ່ຈະມາເຖິງ
ທີໜຶ່ງ, ຢຶດໝັ້ນໃນເປົ້າໝາຍຮັກສາສະຖຽນລະພາບທາງເສດຖະກິດມະຫາພາກ, ຄວບຄຸມເງິນເຟີ້, ສືບຕໍ່ປະຕິບັດນະໂຍບາຍການເງິນຢ່າງຮອບຄອບແລະໄຫວພິບ. ຍູ້ແຮງການຄົ້ນຄວ້າແລະປະກາດໃຊ້ໂດຍໄວ ກອບກົດໝາຍເພື່ອຄວບຄຸມການໃຫ້ກູ້ຢືມແບບເພື່ອນຕໍ່ເພື່ອນ, ສະກຸນເງິນດິຈິຕອນຂອງທະນາຄານສູນກາງ (CBDC)... ພ້ອມກັນນັ້ນ, ເປັນເຈົ້າການປັບກອບການດຳເນີນນະໂຍບາຍເງິນຕາ, ຄ່ອຍໆຫັນປ່ຽນຈາກການຄວບຄຸມນະໂຍບາຍເງິນຕາຕາມເປົ້າໝາຍປະລິມານການສະໜອງເງິນ ສູ່ເປົ້າໝາຍການດຳເນີນງານຕາມອັດຕາດອກເບ້ຍ ເພື່ອເພີ່ມຄວາມຍືດຫຍຸ່ນຂອງນະໂຍບາຍເງິນຕາ ຕາມມະຕິເລກທີ 986/QĐ-TTg, ວັນທີ 8 ສິງຫາ 2018, ຂອງນາຍົກລັດຖະມົນຕີ, “ກ່ຽວກັບການອະນຸມັດຍຸດທະສາດການພັດທະນາຂະແໜງການທະນາຄານຂອງຫວຽດນາມຮອດປີ 2025, ກຳນົດທິດຮອດປີ 2030”, ຜ່ານນັ້ນ ເພີ່ມຄວາມສາມາດໃນການປັບຕົວເຂົ້າກັບການຫັນປ່ຽນດິຈິຕອນທີ່ເພີ່ມຂຶ້ນຢ່າງໄວໃນຂົງເຂດການເງິນ ແລະການທະນາຄານ.
ທີສອງ, ປັບປຸງກອບກົດໝາຍສຳລັບການເຄື່ອນໄຫວຊຳລະເງິນທີ່ບໍ່ໃຊ້ເງິນສົດ ຜ່ານການປະກາດໃຊ້ດຳລັດໃໝ່ ແທນໃຫ້ດຳລັດເລກທີ 101/2012/NĐ-CP ກຳນົດກ່ຽວກັບການຊຳລະເງິນທີ່ບໍ່ໃຊ້ເງິນສົດ; ດໍາລັດວ່າດ້ວຍການປັບປຸງແລະເພີ່ມເຕີມດໍາລັດສະບັບເລກທີ 222/2013/NĐ-CP ກຳນົດກ່ຽວກັບການຊຳລະເງິນດ້ວຍເງິນສົດ. ເພີ່ມຄວາມປອດໄພ ແລະການຮັກສາຄວາມລັບ, ຮັບປະກັນການເຄື່ອນໄຫວຢ່າງຕໍ່ເນື່ອງ ຂອງລະບົບການຊຳລະເງິນ; ປົກປ້ອງສິດຜົນປະໂຫຍດອັນຊອບທຳຂອງລູກຄ້າ. ຊີ້ນຳບັນດາອົງການສິນເຊື່ອໃນການຍູ້ແຮງການປະຍຸກໃຊ້ນະວັດຕະກຳ ແລະການປະດິດສ້າງເຕັກໂນໂລຊີການທະນາຄານ, ປ່ຽນແປງແລະກ້າວໄປສູ່ຮູບແບບການດຳເນີນງານທະນາຄານດິຈິຕອນເຕັມຮູບແບບ, ອະນຸຍາດໃຫ້ລູກຄ້າສາມາດເຮັດທຸລະກຳ ກັບທະນາຄານໄດ້ທຸກເວລາ, ທຸກບ່ອນ; ຄົ້ນຄວ້າແລະສະເໜີໃຫ້ທະນາຄານເຂົ້າເຖິງເອກະສານຮັບຮອງຄວາມຖືກຕ້ອງຂອງພົນລະເມືອງເອເລັກໂຕຣນິກ ແລະຂໍ້ມູນປະຈຳຕົວ ເພື່ອຫຼຸດເອກະສານແລະຂັ້ນຕອນການເຮັດທຸລະກຳລະຫວ່າງທະນາຄານແລະລູກຄ້າ.
ທີສາມ, ສ້າງກົນໄກການຄຸ້ມຄອງການທົດລອງ (Regulatory Sandbox) ອະນຸຍາດໃຫ້ວິສາຫະກິດ fintech ແລະ ຮູບແບບການຊໍາລະເງິນໃຫມ່... ນຳໃຊ້ນະວັດຕະກຳເຕັກໂນໂລຊີ ແລະນະວັດຕະກຳດິຈິຕອນ ເຂົ້າໃນກິດຈະກຳການທະນາຄານ; ສ້າງແລະຜັນຂະຫຍາຍຍຸດທະສາດການເງິນຮອບດ້ານແຫ່ງຊາດຮອດປີ 2025, ກຳນົດທິດຮອດປີ 2030.
ທີສີ່, ເພີ່ມທະວີວຽກງານກວດກາ ຕິດຕາມກວດກາ, ການປ້ອງກັນ ກີດກັ້ນ ແລະ ຕ້ານການລະເມີດກົດໝາຍໃນຂົງເຂດທະນາຄານ; ປັບປຸງຂອບການວິເຄາະຄວາມປອດໄພມະຫາພາກ, ເພີ່ມການເຕືອນໄພ, ການກວດພົບຄວາມສ່ຽງຂອງລະບົບໂດຍໄວ, ລວມທັງຄວາມສ່ຽງດ້ານເຕັກໂນໂລຊີທາງດ້ານການເງິນ. ສືບຕໍ່ການສ້າງແລະປັບປຸງຂອບກົດໝາຍ, ຂໍ້ກຳນົດກ່ຽວກັບຄວາມໝັ້ນຄົງທາງດ້ານການເງິນ ແລະ ນະໂຍບາຍຮັກສາຄວາມໝັ້ນຄົງທາງດ້ານມະຫາພາກ ເພື່ອປ້ອງກັນຄວາມສ່ຽງທີ່ມີລັກສະນະລະບົບ./.
-------------------
(1) ສະກຸນເງິນສະເໝືອນແມ່ນເງິນທີ່ອອກໂດຍເອກະຊົນ, ບໍ່ມີຊັບສິນຮັບປະກັນ, ດັ່ງນັ້ນຄວາມຜັນຜວນຂອງລາຄາຂອງສະກຸນເງິນນີ້ແມ່ນໃຫຍ່ຫຼາຍ. ສະກຸນເງິນສະເໝືອນທີ່ໃຊ້ທົ່ວໄປ, ລວມມີ Bitcoin, Ethereum,...
(2) ສະກຸນເງິນ Stablecoins ແມ່ນສະກຸນເງິນສະເໝືອນ ທີ່ອອກໂດຍເອກະຊົນ, ແຕ່ມີຊັບສິນຮັບປະກັນ ເພື່ອຈຳກັດຄວາມຜັນຜວນຂອງລາຄາເມື່ອທຽບກັບສະກຸນເງິນສະເໝືອນປົກກະຕິ. ບັນດາຊັບສິນຮັບປະກັນອາດຈະແມ່ນສະກຸນຫຼັກເຊັ່ນ ໂດລາສະຫະລັດ, ເອີໂຣ; ສະກຸນເງິນສະເໝືອນເຊັ່ນ Bitcoin, Ethereum,... ແຕ່ໃຊ້ອັດຕາການຄໍ້າປະກັນສູງ (ຍົກຕົວຢ່າງ: 1000 ໂດລາສະຫະລັດທຽບເທົ່າຂອງ Bitcoin ທີ່ໄດ້ໃຊ້ເປັນຊັບສິນຮັບປະກັນສຳລັບການອອກ 500 USD ທຽບເທົ່າຂອງ Stablecoins); ສູດການຄິດໄລ່ແມ່ນຂອງຜູ້ອອກຫຼຽນເອງ ເພື່ອຮັບປະກັນການສະ ໜອງ/ຄວາມຕ້ອງການຂອງຫຼຽນ ຈະຈໍາກັດຄວາມຜັນຜວນຂອງລາຄາຂະໜາດໃຫຍ່. ບັນດາສະກຸນເງິນສະເໝືອນທີ່ໄດ້ໃຊ້ຫຼາຍລວມມີ: Tether, TrueUSD,...
(3) ສະກຸນເງິນເຕັກໂນໂລຊີດິຈິຕອນທີ່ອອກໂດຍທະນາຄານສູນກາງ ເຊິ່ງເປັນວິທີການຊຳລະເງິນທຽບເທົ່າເງິນສົດ ແຕ່ໃນຮູບແບບເອເລັກໂຕຣນິກ.
- ບົດນີ້ໄດ້ລົງພິມໃນວາລະສານກອມມູນິດ ສະບັບທີ 962 (ເດືອນມີນາ 2021)