ບົດນຳ: 2013 - ປີ ຫົວລ້ຽວຫົວຕໍ່
ວ.ກ - ປະເທດຫວຽດນາມຂອງພວກເຮົາໄດ້ກ້າວເຂົ້າສູ່ປີ 2013 ແລ້ວ. ປີນີ້ເປັນປີທີສາມແຫ່ງການປະຕິບັດ ມະຕິກອງປະຊຸມໃຫຍ່ຄັ້ງທີ XI ຂອງພັກ, ແລະ ກໍ່ເປັນປີທີສາມແຫ່ງການປະຕິບັດ ແຜນພັດທະນາເສດຖະກິດ - ສັງຄົມ 5 ປີ 2011 - 2015.
ທາງດ້ານເສດຖະກິດ, ໄດ້ສຸມໃສ່ຈຸດໝາຍໃຫ້ບຸລິມະສິດແກ່ການຈຳກັດຄວບຄຸມເງິນເຟີ້, ຮັກສາສະຖຽນລະພາບເສດຖະກິດມະຫາພາກ, ຮັບປະກັນຄວາມຈະເລີນເຕີບໂຕໃນລະດັບສົມເຫດສົມຜົນ ຕິດກັບການປ່ຽນແປງໃໝ່ຕົວແບບເຕີບໂຕເສດຖະກິດ ແລະ ຈັດວາງສັບຊ້ອນໂຄງປະກອບເສດຖະກິດຄືນໃໝ່, ຍົກສູງຄຸນນະພາບ ປະສິດທິຜົນຂອງພື້ນຖານເສດຖະກິດ. ທາງດ້ານສັງຄົມ, ຕັ້ງໜ້າພະຍາຍາມແກ້ໄຂບັນດາບັນຫາເຄັ່ງຮ້ອນທາງສັງຄົມ ແລະ ວຽກເຮັດງານທຳ, ຮັບປະກັນສະຫວັດດີການສັງຄົມ ແລະ ຄວາມປອດໄພທາງສັງຄົມ.
ກ່ຽວກັບການກໍ່ສ້າງ, ປັບປຸງພັກ, ໄດ້ສຸມໃສ່ການຜັນຂະຫຍາຍ ແລະ ປະຕິບັດມະຕິກອງປະຊຸມສູນກາງພັກຄັ້ງທີ 4 ສະໄໝທີ XI ວ່າດ້ວຍ “ບັນຫາຮີບດ່ວນຈຳນວນໜຶ່ງກ່ຽວກັບການກໍ່ສ້າງພັກໃນປັດຈຸບັນ”. ຈຸດໜັກໃຈກາງ ແລະ ຮີບດ່ວນທີ່ສຸດ ແມ່ນຕໍ່ສູ້ຢ່າງເດັດດ່ຽວເພື່ອກີດກັ້ນ ແລະ ຍູ້ຖອຍສະພາບການຊຸດໂຊມທາງດ້ານການເມືອງແນວຄິດ, ຄຸນສົມບັດສິນທຳ, ແບບແຜນດຳລົງຊີວິດຂອງພາກສ່ວນພະນັກງານ ສະມາຊິກພັກທີ່ມີຈຳນວນບໍ່ໜ້ອຍ, ກ່ອນອື່ນໝົດແມ່ນພະນັກງານນຳພາ ແລະ ຄຸ້ມຄອງຂັ້ນຕ່າງໆ, ຍົກສູງຄວາມສາມາດນຳພາ ແລະ ກຳລັງສູ້ຮົບຂອງພັກ, ປັບປຸງຄວາມເຊື່ອຖືຂອງສະມາຊິກພັກ ແລະ ປະຊາຊົມ.
ທ້າຍປີ ຫັນເບິ່ງຄືນຫຼັງ, ກອງປະຊຸມສູນກາງຄັ້ງທີ 6 ສະໄໝທີ XI ຂອງພັກໄດ້ສັງເກດວ່າ: ເສດຖະກິດມີການຜັນປ່ຽນທີ່ແນ່ນອນ. ການເຕີບໂຕ GDP ສູງກວ່າ 5%, ດັດຊະນີລາຄາຄ່າຄອງຊີບຕ່ຳກວ່າ 10%, ແຕ່ວ່າ ຜົນຂອງການເຕີບໂຕເສດຖະກິດ ແລະ ຜົນງານການຈຳກັດເງິນເຟີ້ ຍັງບໍ່ທັນໝັ້ນຄົງ. ເສດຖະກິດມະຫາພາກມີຄວາມໝັ້ນຄົງກວ່າແຕ່ກ່ອນ ແຕ່ຍັງບໍ່ທັນສະຖຽນລະພາບແທ້ຈິງເທື່ອ. ຄວາມປອດໄພທາງສັງຄົມໄດ້ຮັບປະກັນໂດຍພື້ນຖານ, ແຕ່ວ່າວຽກເຮັດງານທຳ ແລະ ຊີວິດການເປັນຢູ່ຂອງປະຊາຊົມພາກສ່ວນໜຶ່ງຍັງພົບຄວາມຫຍຸ້ງຍາກຫຼາຍ. ບັນດາຂົງເຂດການສຶກສາ, ບຳລຸງກໍ່ສ້າງ, ວິທະຍາສາດ - ເຕັກໂນໂລຊີ, ສາທາລະນະສຸກ, ວັດທະນະທຳ,... ລ້ວນແຕ່ໄດ້ຮັບຜົນສຳເລັດຈຳນວນໜຶ່ງ, ແຕ່ຍັງບໍ່ທັນມີການປ່ຽນແປງຢ່າງພື້ນຖານ.
ການສຳຫຼວດ ຕຳນິຕິຊົມຕົນເອງ ແລະ ຕຳນິຕິຊົມເພື່ອນສະຫາຍ ຕາມຈິດໃຈມະຕິກອງປະຊຸມສູນກາງພັກຄັ້ງທີ 4 ສະໄໝທີ XI ໄດ້ບັນລຸໝາກຜົນເບື້ອງຕົ້ນທີ່ສຳຄັນ, ສ້າງໃຫ້ມີການຜັນປ່ຽນຈຳນວນໜຶ່ງໃນພາກຕົວຈິງ, ແຕ່ຍັງຕ້ອງເຮັດຫຼາຍວຽກກວ່າອີກ ເພື່ອສືບຕໍ່ນຳເອົາມະຕິດັ່ງກ່າວເຂົ້າໃນຊີວິດຕົວຈິງ, ຊຸກຍູ້ແຂງແຮງກວ່າອີກການປະຕິບັດໜ້າທີ່ກໍ່ສ້າງ, ປັບປຸງພັກໃນຊຸມປີສະເພາະໜ້າ.
ປີ 2012 ກໍ່ໄດ້ຮັບຮູ້ບັນດາຄວາມມານະພະຍາຍາມ ແລະ ຜົນສຳເລັດໃນການເພີ່ມທະວີການປ້ອງກັນປະເທດ - ປ້ອງກັນຄວາມສະຫງົບ, ຮັກສາຄວາມໝັ້ນຄົງທາງການເມືອງ - ສັງຄົມ, ຍົກສູງປະສິທິຜົນຂອງການເຄື່ອນໄຫວພົວພັນຕ່າງປະເທດ ແລະ ເຊື່ອງໂຍງເຂົ້າກັບສາກົນ.
ປີ 2013 ເປັນປີຫົວລ້ຽວຫົວຕໍ່ຂອງແຜນພັດທະນາເສດຖະກິດ - ສັງຄົມ 5 ປີ 2011 - 2015, ແລະ ກໍ່ເປັນປີຫົວລ້ຽວຫົວຕໍ່ແຫ່ງການປະຕິບັດບັນດາໜ້າທີ່ລວມ ເຊິ່ງກອງປະຊຸມໃຫຍ່ຄັ້ງທີ XI ຂອງພັກວາງອອກມາໃຫ້ສະໄໝ 5 ປີນີ້.
ການເປັນຫົວລ້ຽວຫົວຕໍ່ ກໍ່ມີຄວາມໝາຍດຽວກັນກັບການຜັນປ່ຽນ, ແລະ ອັນນັ້ນຕ້ອງເປັນການຜັນປ່ຽນຕາມທິດຕັ້ງໜ້າ. ເພື່ອສ້າງໃຫ້ມີການຜັນປ່ຽນນັ້ນ ຕ້ອງເລິ່ມຈາກໜ້າທີ່ອັນພື້ນຖານ, ຕີລາຄາສະພາບການ ແລະ ບັນດາຄວາມສາມາດຕົວຈິງຢ່າງຖືກຕ້ອງ ເພື່ອວາງແຜນນະໂຍບາຍ ແລະ ວິທີແກ້ທີ່ສອດຄ່ອງເໝາະສົມ.
ເສດຖະກິດຂອງປະເທດເຮົາຍັງຢືນຢູ່ຕໍ່ໜ້າຄວາມຫຍຸ້ງຍາກ ສິ່ງທ້າທາຍຫຼາຍຢ່າງທີ່ສຸດ, ແຜນການ 5 ປີໄດ້ດຳເນີນໄປເປັນເວລາສອງປີແລ້ວ ແຕ່ການປະຕິບັດລະດັບຄາດໝາຍຕ່າງໆ ຍັງຕ່ຳກວ່າຫຼາຍທຽບກັບຈຸດໝາຍທີ່ໄດ້ວາງອອກມາ. ຕາມການຄາດຄະເນ ເສດຖະກິດໂລກຍັງມີການຜັນປ່ຽນຢ່າງສັບສົນ, ຍັງຈະມີໄພອັນຕະລາຍ ແລະ ຄວາມສ່ຽງຫຼາຍຢ່າງ.
ຈຸດໝາຍສັງລວມທາງດ້ານເສດຖະກິດ - ສັງຄົມທີ່ວາງອອກມາໃຫ້ປີ 2013 ແມ່ນ: ເພີ່ມທະວີການຫັນເປັນບໍລິສຸດສົດໃສ, ຮັບປະກັນສະຖຽນລະພາບເສດຖະກິດມະຫາພາກ, ຈຳກັດເງິນເຟີ້ໃຫ້ຕ່ຳກວ່າ, ຍົກການຈະເລີນເຕີບໂຕເສດຖະກິດຂຶ້ນສູງກວ່າປີ 2012. ຊຸກຍູ້ປະຕິບັດ 3 ການບຸກທະລຸຍຸດທະສາດ ຕິດແໜ້ນກັບການຈັດວາງສັບຊ້ອນໂຄງປະກອບເສດຖະກິດຄືນໃໝ່, ປ່ຽນແປງຕົວແບບເຕີບໂຕເສດຖະກິດ. ຮັບປະກັນຄວາມປອດໄພທາງສັງຄົມ ແລະ ສະຫວັດດີການສັງຄົມ.
ບັນດາລະດັບຄາດໝາຍຕົ້ນຕໍແມ່ນ: ຍອດຜະລິດຕະພັນພາຍໃນປະເທດ (GDP) ເພີ່ມຂຶ້ນປະມານ 5,5%. ມູນຄ່າສົ່ງນອກເພີ່ມຂຶ້ນປະມານ 10%. ອັດຕາສ່ວນມູນຄ່າຂາເຂົ້າຫຼາຍກວ່າຂາອອກປະມານ 8%. ອັດຕາສ່ວນ ລາຍຈ່າຍງົບປະມານຫຼາຍກວ່າລາຍຮັບງົບປະມານ ບໍ່ກາຍ 4,8% GDP. ລະດັບຄວາມໄວໃນການເພີ່ມລາຄາຄ່າຄອງຊີບ (CPI) ປະມານ 7% - 8%. ລວມຍອດເງິນລົງທຶນການພັດທະນາໃນທົ່ວສັງຄົມ ກວນປະມານ 30% GDP. ຮັບປະກັນຄວາມປອດໄພຂອງໜີ້ສິນຫຼວງ. ສູ້ຊົນປະຕິບັດບັນດາຕົວເລກຄາດໝາຍກ່ຽວກັບວຽກເຮັດງານທຳ, ຫລຸດຜ່ອນອັດຕາສ່ວນຄອບຄົວທຸກຍາກ, ຍົກສູງຊີວິດການເປັນຢູ່ຂອງປະຊາຊົນ, ຮັບປະກັນຄວາມປອດໄພທາງສັງຄົມ ແລະ ປົກປັກຮັກສາສິ່ງແວດລ້ອມ.
ຄຽງຄູ່ກັບເສດຖະກິດ - ສັງຄົມຍັງມີຈຸດໝາຍຍົກສູງປະສິດທິຜົນວຽກງານການພົວພັນຕ່າງປະເທດ ແລະ ເຊື່ອມໂຍງເຂົ້າກັບສາກົນ; ເພີ່ມທະວີການປ້ອງກັນປະເທດ ປ້ອງກັນຄວາມສະຫງົບ ແລະ ຮັບປະກັນສະຖຽນລະພາບທາງການເມືອງ - ສັງຄົມ.
ຈຸດໝາຍສັງລວມຂອງປີ 2013 ເກືອບຄ້າຍຄືກັນກັບຈຸດໝາຍສັງລວມທີ່ວາງອອກມາໃຫ້ແກ່ປີ 2012. ແຕ່ຢູ່ເບື້ອງຫຼັງຂອງແຕ່ລະຈຸດໝາຍອັນລະອຽດ, ນັບທັງບັນດາລະດັບຄາດໝາຍຕົ້ນຕໍຂອງແຜນການ, ລ້ວນແຕ່ກວນລວມທັງຄວາມຮຽກຮ້ອງຕ້ອງການຕ້ອງບັນລຸລະດັບສູງກວ່າ, ເຮັດໄດ້ດີກວ່າ, ມີຄຸນນະພາບ ແລະ ປະສິດທິຜົນສູງກວ່າ. ຄວາມຮຽກຮ້ອງຕ້ອງການລວມທີ່ສຸດແມ່ນ ສ້າງຮາກຖານການພັດທະນາຢ່າງໜັກແໜ້ນກວ່າອີກ ໃຫ້ແກ່ຊູມປີຕໍ່ໆໄປ.
ປີ 2013, ຄຽງຂ້າງບັນດາວຽກງານໃຫຍ່ໆເຊັ່ນ ດັດແປງລັດຖະທຳມະນູນ ປີ 1992, ຍົກສູງຄວາມສາມາດ ແລະ ປະສິດທິຜົນຂອງການຄຸ້ມຄອງ ການກຳກັບບໍລິຫານວຽກງານຂອງກົງຈັກແຫ່ງລັດ, ສືບຕໍ່ນຳເອົາການປະຕິຮູບດ້ານການບໍລິຫານ, ປະຕິຮູບການຍຸດຕິທຳໃຫ້ເຂົ້າສູ່ລວງເລິກ, ປ້ອງກັນ ແລະ ຕ້ານການສໍ້ລາດບັງຫຼວງ ການຟຸມເຟືອຍ, ແມ່ນຕ້ອງຊຸກຍູ້ວຽກງານກໍ່ສ້າງ ດັດແປງພັກຢ່າງແຂງແຮງກວ່າອີກ.
ມະຕິກອງປະຊຸມສູນກາງພັກຄັ້ງທີ 4 ສະໄໝທີ XI ແລະ ບັນດາໜ້າທີ່, ວິທີແກ້ໄຂທີ່ໄດ້ວາງອອກມາໃນມະຕິດັ່ງກ່າວນີ້ ຕ້ອງໄດ້ຮັບການສືບຕໍ່ປະຕິບັດຢ່າງມີປະສິດທິຜົນ, ບໍ່ພຽງແຕ່ໃນປີ 2013 ເທົ່ານັ້ນ ຫາກໃນຊຸມປີຕໍ່ໄປອີກ. ນຳເອົາການຕຳນິຕິຊົມຕົນເອງ ແລະ ຕຳນິຕິຊົມ ເຂົ້າເປັນປົກກະຕິ ບໍ່ໄດ້ໝາຍຄວາມວ່າເປັນການລົດຜ່ອນລັກສະນະສຳຄັນຂອງມັນ, ຫາກແມ່ນການເຮັດໃຫ້ການຕຳນິຕິຊົມຕົນເອງ ແລະ ຕຳນິຕິຊົມ ກາຍເປັນອາວຸດທາງຈິດໃຈອັນແທ້ຈິງ ທີ່ປະຈຳການຢູ່ໃນການດຳເນີນຊີວິດພັກ. ການກໍ່ສ້າງຖັນແຖວພະນັກງານນຳພາ ຄຸ້ມຄອງຂັ້ນຕ່າງໆ, ເປັນຕົ້ນແມ່ນຂັ້ນສູນກາງ, ຕອບສະໜອງຄວາມຮຽກຮ້ອງຕ້ອງການຂອງພາລະກິດການຫັນເປັນອຸດສາຫະກຳ ທັນສະໄໝ ແລະ ເຊື່ອມໂຍງເຂົ້າກັບສາກົນນັ້ນ ມັນບໍ່ແມ່ນວຽກງານຂອງມື້ໜຶ່ງຍາມດຽວ. ສ້າງແຜນກຳນົດຖັນແຖວພະນັກງານຂັ້ນສູງຂຶ້ນມາໄດ້ມັນເປັນການຍາກ, ແຕ່ປະຕິບັດແຜນກຳນົດນັ້ນໃຫ້ໄດ້ດີແທ້ ພັດຍາກກວ່າອີກ. ກຳນົດຢ່າງຈະແຈ້ງອຳນາດຕັດສິນ ສິດຂອບເຂດ, ໜ້າທີ່ຮັບຜິດຊອບຂອງຜູ້ນຳໜ້າຄະນະພັກ, ອຳນາດການປົກຄອງ ໃນສາຍພົວພັນກັບລວມໝູ່ຄະນະພັກ, ອົງການກົມກອງ, ສືບຕໍ່ປ່ຽນແປງໃໝ່ແບບວິທີການນຳພາຂອງພັກ ເປັນວຽກງານທີ່ໄດ້ເຮັດ, ກຳລັງເຮັດ ແລະ ຍັງຕ້ອງສືບຕໍ່ເຮັດຕໍ່ໄປໃນຫຼາຍປີອີກ. ຊຸກຍູ້ການກໍ່ສ້າງ ແລະ ປັບປຸງດັດແປງພັກ, ຕາມຈິດໃຈມະຕິກອງປະຊຸມໃຫຍ່ຄັ້ງທີ XI, ຕ້ອງເຮັດໃຫ້ພັກບໍລິສຸດປອດໃສ ແລະ ໝັ້ນຄົງເຂັ້ມແຂງຢ່າງແທ້ຈິງ, ຍົກສູງຄວາມສາມາດນຳພາ ແລະ ກຳລັງສູ້ຮົບຂອງພັກຂຶ້ນ ເປັນພັກປະຕິວັດທີ່ແທ້ຈິງ, ຕິດພັນສະໜິດແໜ້ນກັບປະຊາຊົນ ແລະ ຮັບໃຊ້ປະຊາຊົນ.
ແນ່ນອນວ່າ ປີ 2013 ຈະເປັນປີແຫ່ງການສູ້ຊົນຢ່າງເດັດດ່ຽວໜຽວແໜ້ນ ເພື່ອການຜັນປ່ຽນຈະເລີນພັດທະນາ. ແຕ່ການຜັນປ່ຽນຈະມີຄວາມໝາຍຮອດລະດັບໃດນັ້ນ ສ່ວນສຳຄັນແມ່ນຂຶ້ນກັບເຈດຈຳນົງ, ຄວາມຕັດສິນໃຈ ແລະ ການກະທຳຂອງທົ່ວພັກ, ທົ່ວກອງທັບ, ທົ່ວປວງຊົນຫວຽດນາມ./.
ວາລະສານກອມມູນິດ