ເສີມຂະຫຍາຍຄຸນຄ່າວັດທະນະທຳອັນເປັນມູນເຊື້ອ ຂອງຄອບຄົວກວຽດນາມ
ວ.ກ - ເພື່ອເສີມຂະຫຍາຍບັນດາຄຸນຄ່າວັດທະນະທຳມູນເຊື້ອ ກໍ່ສ້າງຄອບຄົວຫວຽດນາມກ້າວໜ້າ ແລະ ຜາສຸກ, ກ່ອນອື່ນໝົດຕ້ອງຢັ້ງຢືນບັນດາຄຸນຄ່າວັດທະນະທຳອັນເປັນມູນເຊື້ອຂອງຄອບຄົວຫວຽດນາມ.
ທ່ານປະທານປະເທດ ເຈືອງເຕິນຊາງ ມາຢາມ ອວຍພອນປີໃໝ່ ແລະ ມອບຂອງຂວັນໃຫ້ຄອບຄົວແມ່ເຖົ້າ ຫງວຽນທີ້ແຊັງ ຢູ່ບ້ານຮ່ວາເລີ້ຍ ຕາແສງຮ່ວາອານ ນະຄອນກາວແຫຼງ ແຂວງດົ່ງຖາບ ວັນທີ 13 ກຸມພາ 2013. ຕາມເວັບໄຊ: dangcongsan.vn
ກ່ຽວກັບຄອບຄົວຫວຽດນານອັນເປັນມູນເຊື້ອ
ໂດຍໄດ້ຮັບການກໍ່ຮ່າງສ້າງຮູບຂຶ້ນ ແລະ ພັດທະນາໃນຕະຫຼອດວິວັດທະນາການປະຫວັດສາດຫຼາຍພັນປີ ແຫ່ງການສ້າງສາ ແລະ ປົດປັກຮັກສາປະເທດຊາດ ຂອງວົງຄະນາຍາດປະຊາກອນກະສິກຳ, ຄອບຄົວຫວຽດນາມມູນເຊື້ອ ເປັນຜົນຜະໜວກບັນດາສິ່ງຍອດຍິ່ງ ໃນວັດທະນະທຳຈິດໃຈອັນປະເສີດຂອງຊາດ. ຄອບຄົວຫວຽດນາມມູນເຊື້ອມີຮູບແບບ ໂຄງປະກອບ ຂະໜາດ ແລະ ພາລະບົດບາດຕ່າງກັນ ໂດຍແລ້ວແຕ່ການເຄື່ອນເໜັງ ແລະ ການຜັນປ່ຽນຂອງປະຫວັດສາດແຫ່ງຊາດ. ແຕ່ເບິ່ງລວມແລ້ວ, ຄອບຄົວຫວຽດນາມຕົ້ນຕໍແມ່ນຄອບຄົວຊາວນາ. ນັ້ນແມ່ນຄອບຄົວສອງເຊັ່ນຄົນ ແລະ ມີລູກຫຼາຍຄົນ ເຊິ່ງຢູ່ໃກ້ຊິດຕິດແໜ້ນກັບຄອບຄົວພໍ່ແມ່ ຍາດຕິພີ່ນ້ອງ, ສ້າງເປັນໂຄດວົງ ປະຊາຄົມໝູ່ບ້ານລວມກັນ. ຄອບຄົວຫວຽດນາມມູນເຊື້ອມີລັກສະນະພິເສດຫຼາຍຢ່າງ, ໃນນັ້ນມີລັກສະນະພື້ນຖານບາງຢ່າງດັ່ງລຸ່ມນີ້:
ທີໜຶ່ງ, ຄອບຄົວຫວຽດນາມຢູ່ຊົນນະບົດເປັນຕົ້ນຕໍ ແລະ ປະກົດຕົວໃນຖານະນາມເປັນຫົວໜ່ວຍຜະລິດ ແລະ ຊົມໃຊ້ໜຶ່ງທີ່ຫາກຸ້ມຕົນເອງ ອັດແຈບ. ຊັບສົມບັດຂອງຄອບຄົວຫວຽດນາມແມ່ນຂອງລວມ. ສະມາຊິກທຸກຄົນໃນຄອບຄົວລ້ວນແຕ່ເຂົ້າຮ່ວມການອອກແຮງງານທຳການຜະລິດ. ຄອບຄົວຫວຽດນາມມູນເຊື້ອ ເຖິງວ່າມີຄວາມສະເໝີພາບ ປະຊາທິປະໄຕ ທີ່ແນ່ນອນກໍ່ຕາມ ແຕ່ລັກສະນະເຈົ້າໂຄດຍັງຄົງເປັນຈຸດພິເສດສະເພາະ.
ທີສອງ, ຄອບຄົວປະຕິບັດພາລະບົດບາດກຳເນີດເກີດລູກອັນເປັນເອກະລັກ ໄດ້ຮັບການເຊີດຊູ. ລູກເຕົ້າແມ່ນຊັບສົມບັດຂອງຄອບຄົວ, ເປັນບ່ອນອີງ ເພິ່ງພາອາໄສ, ເປັນ “ອັນຄ້ຳປະກັນ” ຂອງພໍ່ແມ່ເມື່ອເຖິງໄວຊະລາ.
ທີສາມ, ຄຸນສົມບັດເປັນແກ່ນສານຂອງວັດທະນະທຳຄອບຄົວຫວຽດນາມມູນເຊື້ອ. ເລີ່ມຈາກວັດທະນະທຳຄອບຄົວ ເປີດກວ້າງອອກເປັນວັດທະນະທຳຂອງບ້ານ ຂອງປະເທດ ຂອງຊາດ. ວັດທະນະທຳຄອບຄົວມູນເຊື້ອໄດ້ສະແດງອອກຢ່າງລະອຽກດ້ວຍ: ການສັ່ງສອນຂອງຄອບຄົວ; ກົດຂໍ້ບັງຄັບຂອງຄອບຄົວ; ຮີດຄອງປະເພນີຄອບຄົວ. ບັນດາເນື້ອໃນອັນພື້ນຖານນີ້ຂອງວັດທະນະທຳຄອບຄົວມູນເຊື້ອ ເຖິງວ່າຖືກຜົນສະທ້ອນຂອງລັດທິຂົງຈື້ກໍ່ຕາມ ແຕ່ມັນກໍ່ໄດ້ຫັນເປັນຫວຽດນາມແລ້ວ ແລະ ໄດ້ປະກອບສ່ວນສ້າງເປັນບັນດາຄຸນຄ່າມູນເຊື້ອອັນດີງາມຂອງຄອບຄົວຫວຽດນາມ.
ທີສີ່, ນັບຖືຄວາມຜູກພັນຮັກໄຄ່ມິດຈິດມິດໃຈ ເປັນເອກະລັກພິເສດຂອງຄອບຄົວມູນເຊື້ອຫວຽດນາມ. ມີມະໂນທຳ ນັບຖືມິດຈິດມິດໃຈ ມີຄວາມກະຕັນຍູ ຊື່ສັດສະເໝີຕົ້ນສະເໝີປາຍ ມີໃຈເມດຕາກະລູນາ ແມ່ນເອກະລັກວັດທະນະທຳອັນປະເສີດ ຂອງຄົນຫວຽດນາມ. ມັນໄດ້ສະແດງອອກຢ່າງລະອຽດຕົວຈິງໃນຊີວິດຄອບຄົວ.
ຄອບຄົວມູນເຊື້ອຫວຽດນາມ ເປັນຄຸນຄ່າມະນຸດສະທຳອັນປະເສີດເລີດລ້ຳ, ເປັນຊັບສົມບັດທາງຈິດໃຈອັນລ້ຳຄ່າຂອງຊາດຫວຽດນາມ. ໃນຂະບວນວິວັດການຍູ້ແຮງການຫັນເປັນອຸດສາຫະກຳ ທັນສະໄໝ ແລະ ເຊື່ອມໂຍງເຂົ້າກັບສາກົນປັດຈຸບັນ, ຄອບຄົວຫວຽດນາມພວມມີການປ່ຽນແປງຫຼາຍຢ່າງ ຄ່ອຍໆປ່ຽນແທນໃຫ້ແກ່ຄອບຄົວມູນເຊື້ອ, ແຕ່ວ່າ ບັນດາຄຸນຄ່າທີ່ມີກຳລັງຊີວິດຍືນຍົງຂອງຄອບຄົວມູນເຊື້ອ ກໍ່ຍັງປະກົດຕົວຢູ່ໃນຊີວິດຂອງພວກເຮົາ ດ້ວຍຖານະນາມເປັນບັນດາຄຸນຄ່າອັນດີງາມ ແລະ ປະເສີດເລີດລ້ຳຂອງມູນເຊື້ອວັດທະນະທຳແຫ່ງຊາດ.
ບັນດາຄຸນຄ່າວັດທະນະທຳມູນເຊື້ອອັນດີງາມຂອງຄອບຄົວ
ຜ່ານປະຫວັດສາດແຫ່ງການກໍ່ຕັ້ງ ສ້າງສາພັດທະນາປະເທດ ແລະ ປົດປັກຮັກສາປະເທດຫຼາຍພັນປີຂອງຊາດ, ຄອບຄົວຫວຽດນາມ ກໍ່ໄດ້ຜັນປ່ຽນເລື້ອຍໆ. ຂະບວນວິວັດການຜັນປ່ຽນນັ້ນ ກໍ່ແມ່ນຂະບວນວິວັດການກໍ່ຮ່າງສ້າງຮູບ ແລະ ປັບປຸງບູລະນະບັນດາຄຸນຄ່າວັດທະນະທຳອັນດີງາມຂອງຄອບຄົວມູນເຊື້ອ. ບັນດາຄຸນຄ່າວັດທະນະທຳມູນເຊື້ອອັນດີງາມຂອງຄອບຄົວ ນັບມື້ນັບໄດ້ຮັກສາ ເສີມຂະຫຍາຍ ແລະ ສືບທອດ. ນັ້ນຄືນ້ຳໃຈຮັກຊາດ ຮັກບ້ານເກີດເມືອງນອນ ຮັກຄອບຄົວ; ຄວາມຮັກແພງຮ່ວມແຮງຮ່ວມໃຈລະຫວ່າງຜົວເມຍ; ນ້ຳໃຈອ້າຍນ້ອງຮັກແພງຫຸ້ມຫໍ່ ຊ່ວຍເຫຼືອກັນ; ນ້ຳໃຈໄທບ້ານດຽວກັນ; ມີນ້ຳໃຈເມດຕາກະລຸນາ ເຫັນແກ່ປະໂຫຍດຄົນອື່ນ; ນ້ຳໃຈເສຍສະຫຼະ; ຄວາມກະຕັນຍູ; ມັກຮ່ຳຮຽນ; ຂະຫຍັນໝັ່ນພຽນ; ເດັດດ່ຽວ ບໍ່ຍອມຈຳນົນ…ບັນດາຄຸນຄ່າເຫຼົ່ານີ້ໄດ້ສະແດງອອກຢ່າງລະອຽດດັ່ງນີ້:
ຄຸນຄ່າເສດຖະກິດຂອງຄອບຄົວ
ຄອບຄົວມູນເຊື້ອມີຈຸດພິເສດອັນພື້ນຖານໜຶ່ງຄື ມັນເປັນຫົວໜ່ວຍເສດຖະກິດໜຶ່ງ. ເຄື່ອນໄຫວເສດຖະກິດ ແລະ ປະຕິບັດພາລະບົດບາດເສດຖະກິດ ແມ່ນຄຸນຄ່າອັນພື້ນຖານໜຶ່ງຂອງຄອບຄົວມູນເຊື້ອ. ຖ້າຫາກບໍ່ມີເງື່ອນໄຂເສດຖະກິດທີ່ແນ່ນອນ ຄອບຄົວກໍ່ຈະບໍ່ສາມາດຄົງຕົວຢູ່ໄດ້. ຄອບຄົວມູນເຊື້ອ ແມ່ນຄອບຄົວຊົນນະບົດ ຂອງຊາວນາທີ່ເປັນເອກະລາດ ຜະລິດຫາກຸ້ມຕົນເອງ. ຜູ້ຊາຍເປັນເຈົ້າຄອບຄົວ ມີສິດຕັດສິນບັນດາບັນຫາໃຫຍ່ໃນການຜະລິດ ທຸລະກິດ ແລກປ່ຽນຄ້າຂາຍ. ແມ່ຍິງມີບົດບາດເປັນ “ຜູ້ຄວບຄຸມພາຍໃນ” ຄຸ້ມຄອງການໃຊ້ຈ່າຍ ເຮັດວຽກເຮືອນຄົວ. ຊັບສົມບັດຂອງຄອບຄົວແມ່ນຂອງລວມ.
ຄອບຄົວມູນເຊື້ອ, ນອກຈາກເປັນຫົວໜ່ວຍຜະລິດໜຶ່ງແລ້ວ ຄອບຄົວກໍ່ເປັນຫົວໜ່ວຍບໍລິໂພກອຸປະໂພກ ແລະ ທຸລະກິດ. ດ້ວຍຖານະນາມເປັນເຈົ້າພາບເສດຖະກິດເອກະລາດ ມັນແມ່ນຄຸນຄ່າອັນພື້ນຖານທີ່ມີລັກສະນະກຳນົດການຄົງຕົວ ແລະ ຂະຫຍາຍຕົວຂອງຄອບຄົວມູນເຊື້ອ.
ຄຸນຄ່າຄຸນສົມບັດຂອງຄອບຄົວ
ຄຸນຄ່າຄຸນສົມບັດ ແມ່ນຄຸນຄ່າອັນພື້ນຖານ ທີ່ໄດ້ຮັບຄວາມເຄົາລົບນັບຖືທີ່ສຸດໃນຄອບຄົວມູນເຊື້ອຫວຽດນາມ. ນັ້ນແມ່ນລະບົບຄຸນຄ່າທີ່ກວມລວມ ແລະ ເຊື່ອມຊືມທຸກໆສາຍພົວພັນໃນຄອບຄົວ ແລະ ຂອງຄອບຄົວກັບສັງຄົມ. ຄອບຄົວມີລະບຽບ ມີການສັ່ງສອນ ມີກົດຂໍ້ບັງຄັບ ມີຮີດຄອງປະເພນີ ມີກິລິຍາມາລະຍາດດີ ສາມັກຄີປອງດອງ ພາຍໃນອຸ່ນອຽນກັບພາຍນອກສະຫງົບ ເຄົາລົບຜູ້ໃຫຍ່ຮັກໄຄ່ເດັກນ້ອຍ ມີຄວາມກະຕັນຍູ ມີລະບຽບວິໄນ ມີຄວາມຮັກຄວາມເມດຕາ ຄວາມຮັບຜິດຊອບ...ນັ້ນເປັນແບບຢ່າງທີ່ໄດ້ຮັບການເຊີດຊູຍົກຍ້ອງຂອງຄອບຄົວມູນເຊື້ອໃນຫຼາຍພັນປີທີ່ຜ່ານມາ. ຄຸນຄ່າເຫຼົ່ານີ້ໄດ້ສະແດງອອກຢ່າງລະອຽດທີ່ສຸດໃນຊີວິດຄອບຄົວຫວຽດນາມ.
ຄຸນຄ່າຄຸນສົມບັດຂອງຄອບຄົວມູນຊື້ອ ແມ່ນບັນດາຄຸນຄ່າອັນປະເສີດເລີດລ້ຳທີ່ເຊື່ອມຊືມໃນຊີວິດຄອບຄົວ ແລະ ສັງຄົມຫວຽດນາມ. ປັດຈຸບັນນີ້, ເຖິງວ່າເສດຖະກິດຕະຫຼາດໄດ້ເຮັດໃຫ້ສາຍພົວພັນສັງຄົມຫຼາຍອັນປ່ຽນແປງ ຄອບຄົວກໍ່ມີການປ່ຽນແປງຫຼາຍຢ່າງ ແຕ່ວ່າຄຸນຄ່າຄຸນສົມບັດມູນເຊື້ອຫຼາຍຢ່າງຂອງຄອບຄົວ ກໍ່ຍັງເປັນມາດຕະຖານການດຳລົງຊີວີດ ເປັນມາດຕະຖານຄຸນສົມບັດສັງຄົມຢູ່ຄືເກົ່າ.
ຄຸນຄ່າພັດທະນາຂອງຄອບຄົວ
ພ້ອມກັນກັບເສດຖະກິດຕະຫຼາດ ແລະ ເຊື່ອມໂຍງເຂົ້າກັບສາກົນ, ຫຼາຍພາລະບົດບາດຂອງຄອບຄົວມູນເຊື້ອກໍ່ໄດ້ມີການປ່ຽນແປງ, ແຕ່ວ່າພາລະບົດບາດຈິດຕະ-ສະລີລະສາດ, ຄວາມຮູ້ສຶກທາງໃຈ, ການເກີດລູກ ແລະ ສະໜອງແຫຼ່ງກຳລັງຄົນໃຫ້ສັງຄົມ ແມ່ນຄຸນຄ່າມູນເຊື້ອອັນພື້ນຖານຂອງຄອບຄົວ ເຊິ່ງຍັງຄົງປະກົດອອກໃນສັງຄົມປັດຈຸບັນ.
ຄອບຄົວມູນເຊື້ອບໍ່ພຽງແຕ່ເປັນບ່ອນກຳເນີດເກີດລູກ ບຳລຸງລ້ຽງດູຟື້ນຟູສຸຂະພາບ ຜະລິດສຳກຳລັງແຮງງານຂອງສະມາຊິກແຕ່ລະຄົນໃນຄອບຄົວເທົ່ານັ້ນ ຫາກຍັງເປັນບ່ອນພັດທະນາແຫຼ່ງຊັບພະຍາກອນມະນຸດອັນແທ້ຈິງ ເພື່ອຕອບສະໜອງຄວາມຮຽກຮ້ອງຕ້ອງການຂອງສັງຄົມໃນແຕ່ລະໄລຍະປະຫວັດສາດ. ກ່າວໂດຍສັງເຂບ, ຄອບຄົວມູນເຊື້ອແມ່ນສະຖານທີ່ຕົ້ນຕໍແຫ່ງໜຶ່ງທີ່ລ້ຽງເກືອ ບຳລຸງ ກໍ່ສ້າງ ພັດທະນາແຫຼ່ງທຶນມະນຸດ ແຫຼ່ງກຳລັງຄົມ ສະໜອງໃຫ້ສັງຄົມໃນຂະບວນວິວັດການພັດທະນາເສດຖະກິດ - ສັງຄົມ ແລະ ປົກປັກຮັກສາປະເທດຊາດ.
ຄຸນຄ່າປະຊາຄົມຂອງຄອບຄົວ
ຄອບຄົວມູນເຊື້ອແມ່ນສັງຄົມໜຶ່ງທີ່ຫຍໍ້ເຂົ້າ ສ່ວນຫຼາຍແມ່ນອັດແຈບ. ສະມາຊິກຄອບຄົວແຕ່ລະຄົນຜູກພັນສະໜິດແໜ້ນນຳກັນ ດ້ວຍຄວາມຮັກແລະເລືອດເນື້ອເຊື້ອສາຍດຽວກັນຂອງຄອບຄົວ. ເລີ່ມຈາກຄວາມຮູ້ສຶກທາງໃຈຮັກແພງກັນໃນຄອບຄົວ ເປີດກວ້າງອອກເປັນຄວາມຮູ້ສຶກທາງໃຈຮັກແພງກັນໃນວົງຕະກຸນ ວົງຄະນາຍາດໝູ່ບ້ານ ແລະ ປະເທດ. ໃນຄອບຄົວມູນເຊື້ອ, ລັກສະນະຕິດແໜ້ນວົງຄະນາຍາດ ແລະ ສະຕິຮັບຜິດຊອບຕໍ່ວົງຄະນາຍາດຂອງສະມາຊິກແຕ່ລະຄົນໄດ້ເປັນຮູບເປັນຮ່າງຂຶ້ນ ແລະ ບຳລຸງຄູນສ້າງແຕ່ເມື່ອຫາກໍ່ເກີດອອກມາ. ຄວາມຮູ້ສຶກທາງໃຈ ແລະ ສະຕິຮັບຜິດຊອບຕໍ່ວົງຄະນາຍາດນັ້ນ ມັນເປັນຈຸດພິເສດສະເພາະຂອງວັດທະນະທຳມູນເຊື້ອຫວຽດນາມ.
ບັນດາຄຸນຄ່າວັດທະນະທຳມູເຊື້ອວົງຄະນາຍາດຂອງຄອບຄົວນັ້ນ ມີຫຼາຍຈຸດທີ່ສົມຄູ່ ສອດຄ່ອງເໝາະສົມກັບການຂະຫຍາຍຕົວ ຂອງສັງຄົມປັດຈຸບັນ. ແຕ່ລະຄົນໄດ້ຮັບການສັ່ງສອນຂອງຄອບຄົວ ຮັບເອົາ ແລະ ຊາບຊືມບັນດາຄຸນຄ່າມູນເຊື້ອວົງຄະນາຍາດຂອງຄອບຄົວ ໃນເມື່ອເຂົ້າຮ່ວມຊີວິດສັງຄົມ ຈະມີຄວາມສະດວກຫຼາຍຢ່າງທີ່ສຸດ. ເຂົາເຈົ້າຈະເຮັດໃຫ້ບັນດາຄຸນຄ່າມູນເຊື້ອວົງຄະນາຍາດອັນດີງາມຂອງຄອບຄົວ ກາຍເປັນບັນດາຄຸນຄ່າຂອງປະຊາຄົມໃນສັງຄົມທັນສະໄໝ ດ້ວຍຂະໜາດຕ່າງໆທີ່ຕ່າງກັນ ນັບແຕ່ປະຊາຄົມທ້ອງຖິ່ນ ເຖິງປະຊາຄົມແຫ່ງຊາດ ປະຊາຄົມພາກພື້ນ ແລະ ສາກົນ. ໃນຂະບວນວິວັດການສັງສັນ ແລະ ເຊື່ອມໂຍງເຂົ້າກັນຂອງມະນຸດທັນສະໄໝ, ບັນດາຄຸນຄ່າມູນເຊື້ອວົງຄະນາຍາດ ແມ່ນເຄື່ອງເດີນທາງອັນລ້ຳຄ່າຂອງມູນເຊື້ອວັດທະນະທຳແຫ່ງຊາດ ທີ່ມອບໂອນຖ່າຍທອດໃຫ້ບັນດາເຊັ່ນຄົນຫວຽດນາມ.
ເສີມຂະຫຍາຍຄຸນຄ່າວັດທະນະທຳມູນເຊື້ອຂອງຄອບຄົວ
ໃນສະພາບການປັດຈຸບັນ, ເພື່ອສືບຕໍ່ເສີມຂະຫຍາຍບັນດາຄຸນຄ່າວັດທະນະທຳມູນເຊື້ອຂອງຄອບຄົວ, ຕ້ອງປະຕິບັດໜ້າທີ່ຈຳນວນໜຶ່ງດັ່ງລຸ່ມນີ້:
- ສຸມໃສ່ໂຄສະນາ ເຜີຍແຜ່ ຂົນຂວາຍປະຊາຊົນທຸກຊັ້ນວັນນະ ໃຫ້ພ້ອມກັນປະຕິບັດ “ຍຸດທະສາດພັດທະນາຄອບຄົວຫວຽດນາມຮອດປີ 2020, ວິໄສທັດເຖິງປີ 2030” ດ້ວຍຈຸດໝາຍກໍ່ສ້າງຄອບຄົວຫວຽດນາມອິ່ມໜຳສຳລານ ກ້າວໜ້າ ຜະສຸກ, ເປັນອູ່ທີ່ອົບອຸ່ນຂອງແຕ່ລະຄົນ, ເປັນຈຸລັງທີ່ສົດໄສຂອງສັງຄົມ. ຖືວ່າອັນນັ້ນແມ່ນໜ້າທີ່ອັນສຳຄັນຂອງທົ່ວທັງລະບົບການເມືອງ, ຂອງບັນດາການຈັດຕັ້ງສັງຄົມ, ຂອງແຕ່ລະຄອບຄົວ ແລະ ບຸກຄົນແຕ່ລະຄົນ.
- ມີບັນດານະໂຍບາຍອັນລະອຽດ ເພື່ອພັດທະນາເສດຖະກິດຄອບຄົວ.
- ລົງທຶນຄົ້ນຄວ້າ ຮັບຮູ້ ຕີລາຄາ ແລະ ກໍ່ສ້າງລະບົບຄຸນຄ່າວັດທະນະທຳມູນເຊື້ອຂອງຄອບຄົວຫວຽດນາມ.
- ກໍ່ສ້າງຍຸດທະສາດສຶກສາອົບຮົມຄຸນຄ່າມູນເຊື້ອຂອງຄອບຄົວ. ກ່ອນອື່ນໝົດແມ່ນເສີມຂະຫຍາຍການສຶກສາຄອບຄົວ. ພ້ອມກັນນັ້ນ ກໍ່ຕ້ອງມີບັນດາມາດຕະຖານ ແບບວິທີສົມທົບຢ່າງມີຜົນສັກສິດລະຫວ່າງການສຶກສາຄອບຄົວ ໂຮງຮຽນ ແລະ ສັງຄົມ ໃນການສຶກສາອົບຮົມບັນດາຄຸນຄ່າມູນເຊື້ອຂອງຄອບຄົວ.
- ມີວິທີແກ້ທີ່ເໝາະສົມເພື່ອປະຕິບັດລະບົບສະຫວັດດິການສັງຄົມໃຫ້ດີ; ພ້ອມກັນນັ້ນກໍ່ ກໍ່ສ້າງແລະພັດທະນາລະບົບບໍລິການສັງຄົມ ແນໃສ່ຮັບໃຊ້ຄອບຄົວ.
- ເປັນເຈົ້າການ ຕັ້ງໜ້າໂຄສະນາ ເຜີຍແຜ່ ແລະ ປະຕິບັດກົດໝາຍທີ່ກ່ຽວພັນເຖິງຄອບຄົວ, ເປັນຕົ້ນແມ່ນກົດໝາຍວ່າດ້ວຍການສົມລົດແລະຄອບຄົວ, ກົດໝາຍວ່າດ້ວຍການປົກປັກຮັກສາ ເບິ່ງແຍງດູແລ ແລະ ສຶກສາເດັດນ້ອຍ, ກົດໝາຍວ່າດ້ວຍຄວາມສະເໝີພາບທາງດ້ານເພດ, ກົດໝາຍວ່າດ້ວຍການປ້ອງກັນແລະຕ້ານການໃຊ້ຄວາມຮຸນແຮງໃນຄອບຄົວ... ການປະຕິບັດກົດໝາຍເຫຼົ່ານັ້ນຢ່າງເຂັ້ມງວດ ກໍ່ຈະປະກອບສ່ວນຢ່າງຕັ້ງໜ້າເຂົ້າໃນການສືບທອດ ແລະ ເສີມຂະຫຍາຍບັນດາຄຸນຄ່າວັດທະນະທຳມູນເຊື້ອອັນດີງາມ ຂອງຄອບຄົວຫວຽດນາມ ໃນໄລຍະປັດຈຸບັນ./.
